نوجوانوں کی ترقی کے ایک تاریخی اقدام کے طور پر وزیر اعظم جناب نریندر مودی آج صبح 11 بجے نئی دہلی کے وِگیان بھون میں نوجوانوں پر مرکوز 62ہزار کروڑ روپے سے زیادہ مالیت کے مختلف اقدامات کا آغاز کریں گے،تاکہ ملک بھر میں تعلیم، مہارت سازی اور کاروبار کو بہتر فروغ مل سکے۔ اس پروگرام میں کوشل دکشانت سماروہ بھی شامل ہوگا، جو قومی مہارت اجلاس کا چوتھا ایڈیشن ہے اوراس کا انعقاد وزیر اعظم کے وژن کے مطابق کیا جا رہا ہے، جہاں وزارت برائے مہارت سازی اور کاروباری ترقی کے تحت آئی ٹی آئیز کے 46 آل انڈیا ٹاپرز کو اعزاز نوازا جائے گا۔
وزیر اعظم 60,000 کروڑ کی سرمایہ کاری کے ساتھ مرکزی اسپانسر شدہ اسکیم پی ایم – سیتو(پردھان منتری اسکیلنگ اینڈ امپلائبلٹی ٹرانسفورمیشن تھرو اپگریڈیڈ آئی ٹی آئی ایز) کا آغاز کریں گے۔ اس اسکیم میں ملک بھر میں 1,000 سرکاری آئی ٹی آئیز کو ایک ہب اور اسپوک ماڈل میں اپ گریڈ کرنے کا تصور کیا گیا ہے، جس میں 200 ہب آئی ٹی آئیز اور 800 اسپوک آئی ٹی آئی ایز شامل ہیں۔ ہر مرکز کو اوسطاً چار اسپوکس سے منسلک کیا جائے گا، جو جدید انفراسٹرکچر، جدید تجارت، ڈیجیٹل لرننگ سسٹم اور انکیوبیشن سہولیات سے لیس کلسٹرز بنائے گا۔ کلیدی صنعت کے شراکت دار ان کلسٹرز کا انتظام کریں گے، مارکیٹ کی طلب کے مطابق نتائج پر مبنی مہارت کی ترقی کو یقینی بنائیں گے۔ ان مرکزوں میں اختراعی مراکز، ٹرینر کی تربیت کی سہولیات، پیداواری یونٹس اور جگہ کا تعین کرنے کی خدمات بھی شامل ہوں گی۔ اسکیم کے نفاذ کے پہلے مرحلے میں پٹنہ اور دربھنگہ میں آئی ٹی آئی ایز پر خصوصی توجہ دی جائے گی۔
وزیر اعظم 34 ریاستوں اور مرکز کے زیر انتظام علاقوں میں 400 نوودیہ ودیالیوں اور 200 ایکلویہ ماڈل رہائشی اسکولوں میں قائم 1,200 پیشہ ورانہ مہارت کی لیباریز کا افتتاح کریں گے۔ یہ لیبارٹریز انفارمیشن ٹیکنالوجی، آٹوموٹیو، زراعت، الیکٹرانکس، لاجسٹکس اور سیاحت سمیت دور دراز اور قبائلی علاقوں کے طلباء کو 12 اعلیٰ طلب والے شعبوں میں تربیت فراہم کریں گی۔ قومی تعلیمی پالیسی 2020 اور سی بی ایس ای کے نصاب کے مطابق، اس پروجیکٹ میں 1,200 پیشہ ور اساتذہ کی تربیت بھی شامل ہے تاکہ وہ روزگار کو بنیاد بناتے ہوئےصنعت سے متعلقہ تعلیم فراہم کرسکیں۔
یہ پروگرام بہار میں تبدیلی کے منصوبوں پر توجہ مرکوز کرے گا، جو ریاست کے مالا مال ورثےاور نوجوان آبادی کی عکاسی کرتا ہے۔ وزیر اعظم بہار کی اصلاح شدہ مکھ منتری نشچے سیوم سہایاتا بھتہ یوجنا کا آغاز کریں گے، جس کے تحت تقریباً پانچ لاکھ گریجویٹ نوجوانوں کو ہر سال 1000 روپے ماہانہ الاؤنس اور دو سال تک مفت ہنر کی تربیت دی جائے گی۔ وزیر اعظم نئے ڈیزائن کردہ بہار اسٹوڈنٹ کریڈٹ کارڈ اسکیم کا بھی آغاز کریں گے، جس سے 4 لاکھ روپے تک مکمل طور پر بلاسود تعلیمی قرضے فراہم ہوں گے ، جس سے اعلیٰ تعلیم کا مالی بوجھ نمایاں طور پر کم ہو جائے گا۔ اس اسکیم کے تحت 3.92 لاکھ سے زیادہ طلباء پہلے ہی 7,880 کروڑ روپے سے زیادہ کے قرض حاصل کر چکے ہیں۔وزیر اعظم ریاست میں باقاعدہ طور پرنوجوانوں کو بااختیاربنانے کے لیے بہار یووا آیوگ کا افتتاح کریں گے جو کہ 18 سے 45 سال کی عمر کے لوگوں کے لیے ایک قانونی کمیشن ہے۔
وزیر اعظم بہار میں جن نائک کرپوری ٹھاکر اسکل یونیورسٹی کا بھی افتتاح کریں گے، جس کا مقصد عالمی سطح پر مسابقتی افرادی قوت تیار کرنے کے لیے صنعت پر مبنی کورسز اور پیشہ ورانہ تعلیم فراہم کرنا ہے۔
اعلیٰ تعلیم کے مواقع کو بہتر بنانے کے وژن کے ساتھ قومی تعلیمی پالیسی 2020 کو آگے بڑھاتے ہوئے، وزیر اعظم مودی پی ایم-اُشا (پردھان منتری اوچ چھیتر شکشا ابھیان) کے تحت بہار کی چار یونیورسٹیوں — پٹنہ یونیورسٹی، مدھیہ پورہ میں واقع بھوپندر نرائن منڈل یونیورسٹی، چھپرا میں واقع جے پرکاش یونیورسٹی اور پٹنہ میں واقع نالندہ اوپن یونیورسٹی میں نئی تعلیمی اور تحقیقی سہولیات کی بنیاد رکھیں گے۔کل 160 کروڑ روپے کے اخراجات والے یہ منصوبے جدید تعلیمی بنیادی ڈھانچے، جدید لیبارٹریز، ہاسٹلز اور کثیر شعبہ جاتی تعلیم کو فروغ دے کر 27,000 سے زیادہ طلباء کو فائدہ پہنچائیں گے۔
وزیر اعظم این آئی ٹی پٹنہ کے بیہٹا کیمپس کو بھی قوم کے نام وقف کریں گے۔ 6,500 طلباء کی گنجائش والا یہ کیمپس جدید سہولیات سے آراستہ ہے، جن میں 5جی یوز کیس لیب، آئی ایس آر او کے تعاون سے قائم ایک علاقائی اسپیس اکیڈمک سینٹر اور انوویشن و انکیوبیشن سینٹرشامل ہیں، جو اب تک نو اسٹارٹ اپس کو معاونت فراہم کر چکا ہے۔
وزیر اعظم بہار سرکار میں 4,000 سے زائد نئے بھرتی ہونے والے امیدواروں کو تقرری نامہ تقسیم کریں گے اور مکھیہ منتری بالک /بالیکا اسکالرشپ اسکیم کے تحت درجہ 9 اور 10 کے 25 لاکھ طلباء کو براہِ راست فائدے کی منتقلی(ڈی بی ٹی) کے ذریعے 450 کروڑ روپے کے وظائف جاری کریں گے۔
ان اقدامات کے آغاز سے ہندوستان کے نوجوانوں کے لیے اہم مواقع پیدا ہونے کی توقع ہے۔ تعلیم، مہارت سازی، کاروبار اور بہتر بنیادی ڈھانچے کو یکجا کرتے ہوئے ان کا مقصد ملک کی ترقی کے لیے ایک مضبوط بنیاد فراہم کرنا ہے۔ بہار پر خصوصی توجہ دینے کے ساتھ، یہ ریاست ہنر مند افرادی قوت کے مرکز کے طور پر ترقی کرنے کے ساتھ ہی علاقائی و قومی سطح پر ترقی میں نمایاں کردار ادا کرے گی۔
