وزیراعظم جناب نریندر مودی 2 ستمبر کو صبح تقریباً 10 بجے نئی دہلی کے یشوبھومی میں ‘سیمی کون انڈیا – 2025’ کا افتتاح کریں گے، جس کا مقصد بھارت کے سیمی کنڈکٹر ایکوسسٹم کو فروغ دینا ہے۔وزیراعظم 3 ستمبر کو صبح تقریباً 9:30 بجے کانفرنس میں بھی شرکت کریں گے، جس میں وہ سی ای اوز کے راؤنڈ ٹیبل میں بھی حصہ لیں گے۔
یہ تین روزہ کانفرنس جو 2 سے 4 ستمبر تک منعقد ہوگی، بھارت میں مضبوط، لچکدار اور پائیدار سیمی کنڈکٹر ایکوسسٹم کو فروغ دینے پر توجہ مرکوز کرے گی۔ اس میں سیمی کون انڈیا پروگرام کی پیش رفت، سیمی کنڈکٹر فاب اور ایڈوانسڈ پیکجنگ پروجیکٹس، انفراسٹرکچر کی تیاری، اسمارٹ مینوفیکچرنگ، تحقیق و ترقی (آر/ اینڈ ڈی) اور مصنوعی ذہانت (اے آئی) میں جدید اختراعات، سرمایہ کاری کے مواقع، ریاستی سطح پر پالیسی کے نفاذ، اور دیگر موضوعات پر سیشنز شامل ہوں گے۔اس کے علاوہ، اس پروگرام میں ڈیزائن لنکڈ انسینٹیو (ڈی ایل آئی) اسکیم کے تحت اقدامات، اسٹارٹ اپ ایکوسسٹم کی ترقی، بین الاقوامی تعاون، اور بھارت کے سیمی کنڈکٹر شعبے کے مستقبل کے روڈ میپ پر بھی روشنی ڈالی جائے گی۔
اس کانفرنس میں 20,750 سے زائد شرکاء شرکت کریں گے، جن میں 48 سے زائد ممالک کے 2,500 سے زیادہ نمائندے، 150 سے زائد مقررین، جن میں 50 سے زائد عالمی رہنما شامل ہیں اور 350 سے زائد نمائش کنندگان شامل ہوں گے۔اس میں 6 ممالک کے راؤنڈ ٹیبل مباحثے، ملکوں کے پویلین، اور ورک فورس ڈیولپمنٹ اور اسٹارٹ اپس کے لیے مخصوص پویلین بھی شامل ہوں گے۔
دنیا بھر میں منعقد ہونے والی سیمی کون کانفرنسوں کا مقصد سیمی کنڈکٹر کے شعبے میں ٹیکنالوجیکل ترقیات اور مختلف ممالک کی پالیسیوں کو زیادہ سے زیادہ پہنچانا اور اپنے سیمی کنڈکٹر ایکوسسٹم کو مضبوط بنانا ہے۔وزیراعظم کے وژن کو آگے بڑھاتے ہوئے، جس کا مقصد بھارت کو سیمی کنڈکٹر ڈیزائن، مینوفیکچرنگ اور ٹیکنالوجی ڈیولپمنٹ کا مرکز کے طور پر پیش کرنا ہے، کانفرنس 2022 میں بنگلور، 2023 میں گاندھی نگر اور 2024 میں گریٹر نوئیڈا میں منعقد کی گئی ہے۔
