وزیر اعظم جناب نریندر مودی نےآج ویڈیو کانفرنسنگ کے ذریعے پردھان منتری راشٹریہ بال پرسکار (پی ایم آر بی پی) حاصل کرنے والوں کے ساتھ بات چیت کی۔ خواتین و اطفال بہبود کی مرکزی وزیر محترمہ اسمرتی زوبن ایرانی بھی اس موقع پر موجود تھیں۔
اس موقع پر وزیر اعظم نے کہا کہ اس سال کے ایوارڈ خاص ہیں، کیونکہ ایوارڈ یافتگان نے انھیں کورونا کے مشکل دور میں حاصل کیا ہے۔ بات چیت کے دوران وزیر اعظم نے سوچھتا آندولن جیسے اہم برتاؤ میں تبدیلی لانے والی مہمات میں بچوں کے رول کو اجاگر کیا۔ انھوں نے کہا کہ جب کورونا کے وقت بچے ہاتھ دھونے جیسی مہم میں شامل ہوئے تب اس مہم نے لوگوں کی سوچ کو متاثر کیا اور مہم کامیاب ہوئی۔ وزیر اعظم نے مختلف شعبوں کے تنوع کو بھی اجاگر کیا، جن میں اس سال ایوارڈ دیے گئے ہیں۔
وزیر اعظم نے کہا کہ جب ایک چھوٹے سے خیال کے لئے ضروری کام کئے جاتے ہیں تو نتائج متاثر کن ہوتے ہیں۔ انھوں نے بچوں کو کام کرنے پر یقین کرنے کے لئے کہا، کیونکہ خیالات اور عمل کے اس باہمی تعلق سے لوگوں کو اہم چیزوں کے لئے تحریک ملتی ہے۔ وزیر اعظم نے بچوں کو صلاح دی کہ وہ ان فتوحات تک محدود نہ رہیں اور اپنی زندگی میں بہتر نتائج کے لئے کوشش کرتے رہیں۔
وزیر اعظم نے بچوں سے اپنے من میں تین چیزیں، تین عزائم رکھنے کو کہا۔ سب سے پہلے تسلسل کا عزم۔ کام کرنے کی رفتار میں کوئی کمی نہیں ہونی چاہئے۔ دوسرا ملک کے لئے عزم۔ اگر ہم ملک کے لئے کام کرتے ہیں اور ہر کام کو ملک کے حوالے سے دیکھتے ہیں تو وہ کام بذات خود زیادہ اہم ہوجاتا ہے۔ انھوں نے کہا کہ بچوں کو یہ سوچنا چاہئے کہ وہ ملک کے کیا کرسکتے ہیں، کیونکہ ہم آزادی سے 75ویں سال میں داخل ہورہے ہیں۔ تیسرا انکساری کا عزم۔ وزیر اعظم نے نتیجے کے طور پر کہا کہ ہر ایک کامیابی کے ساتھ ہمیں زیادہ منکسر المزاج ہونا چاہئے، کیونکہ ہماری منکسر المزاجی دوسروں کو ہماری کامیابی پر خوش ہونے کے لئے باعث تحریک بنے۔
بھارت سرکار اختراعات، تعلیمی فتوحات، کھیل کود، فن و ثقافت، سماجی خدمات اور بہادری کے شعبوں میں غیرمعمولی صلاحیتوں اور شاندار فتوحات حاصل کرنے والے بچوں کو پردھان منتری راشٹریہ بال پرسکار کے تحت بال شکتی پرسکار دیتی ہے۔ اس سال بال شکتی پرسکار کے مختلف زمروں کے تحت ملک بھر کے 32 عرضی گذاروں کو پی ایم آر بی پی – 2021 کے لئے منتخب کیا گیا ہے۔
