نئی دہلی، 14/نومبر 2021 ۔ بھارت سرکار امر شہید بھگوان برسا منڈا کے یوم پیدائش 15 نومبر کو جن جاتیہ گورو دِوس کے طور پر منارہی ہے۔ اس موقع پر وزیر اعظم جناب نریندر مودی بھوپال کے جمبوری میدان میں منعقد ہورہے جن جاتیہ گورو دِوس مہا سمیلن میں شرکت کے لئے مدھیہ پردیش کا دورہ کریں گے، جس میں وہ دوپہر تقریباً ایک بجے جن جاتیہ برادری کی فلاح و بہبود کے لئے متعدد کلیدی اقدامات کا آغاز کریں گے۔
جن جاتیہ گورو دِوس مہاسمیلن میں وزیر اعظم مدھیہ پردیش میں ’راشن آپ کے گرام‘ اسکیم کا آغاز کریں گے۔ اس کا مقصد جن جاتیہ برادری کے مستفیدین کو پی ڈی ایس راشن کا ماہانہ کوٹہ ہر ماہ ان کے گاؤوں تک پہنچانا ہے تاکہ انھیں راشن کے حصول کے لئے سستی قیمت کی دکان پر نہ جانا پڑے۔
مہاسمیلن کے دوران وزیر اعظم مدھیہ پردیش سکل سیل (ہیمو گلوبینو پیتھی) مشن کے آغاز کی مناسبت سے جینیٹک کاؤنسلنگ کارڈ بھی مستفیدین کے حوالے کریں گے۔ اس مشن کو سکل سیل اینیمیا، تھیلیسیمیا اور دیگر ہیموگلوبینو پیتھیز سے متاثرہ مریضوں کا معائنہ اور بندوبست کرنے اور ان بیماریوں کے بارے میں عوام کے اندر بیداری میں اضافہ کرنے کے لئے تیار کیا گیا ہے۔ ایسی بیماریاں مدھیہ پردیش کی جن جاتیہ کے درمیان نمایاں طور پر دیکھی جارہی ہیں۔
وزیر اعظم اس موقع پر ملک بھر میں 50 ایکلویہ ماڈل رہائشی اسکولوں کا سنگ بنیاد بھی رکھیں گے۔ جن ریاستوں اور مرکز کے زیر انتظام علاقوں میں ان اسکولوں کا سنگ بنیاد رکھا جائے گا ان میں آندھراپردیش، چھتیس گڑھ، جھارکھنڈ، مدھیہ پردیش، مہاراشٹر، اڈیشہ، تری پورہ، دادر و نگر حویلی اور دمن و دیو شامل ہیں۔
وزیر اعظم جن جاتیہ خودامدادی گروپوں کے ذریعہ تیار کردہ مصنوعات کی نمائش اور مدھیہ پردیش کی جن جاتیہ برادری سے تعلق رکھنے والے جنگ آزادی کے شہیدوں اور ہیروز پر مشتمل تصویری نمائش کا دورہ بھی کریں گے۔ وہ نئے نئے بحال کئے گئے خاص طور پر خطرات کی زد والے قبائلی گروپوں سے تعلق رکھنے والے اساتذہ کو تقرری نامہ بھی سونپیں گے۔
تقریب کے دوران مدھیہ پردیش کے گورنر اور وزیر اعلیٰ، ڈاکٹر وریندر کمار، جناب نریندر سنگھ تومر، جناب جیوترادتیہ ایم سندھیا، مرکزی وزرائے مملکت جناب پرہلاد ایس پٹیل، جناب پھگن سنگھ کلستے اور ڈاکٹر ایل مروگن بھی موجود ہوں گے۔
دورے کے دوران وزیر اعظم دوبارہ تعمیر کئے گئے رانی کملاپتی ریلوے اسٹیشن کا افتتاح بھی کریں گے اور مدھیہ پردیش میں ریلوے سے متعلق متعدد اقدامات کا آغاز بھی کریں گے۔
