نئی دہلی، 01فروری 2019: وزیر اعظم نریندر مودی نے آج نیوانڈیا کے لئے بجٹ کی تعریف کی ہے، جس سے قوم کے اندر ایک نئی روح پھونکی جائے گی۔
20-2019 کا عبوری بجٹ پیش کئے جانے کے بعد بہت سے ٹوئٹس اور بیان میں وزیر اعظم نے کہا کہ نیوانڈیا کے لئے بجٹ سے 12 کروڑ سے زیادہ کسانوں اور ان کے کنبوں، 3کروڑ سے زیادہ متوسط طبقے کے ٹیکس دہندگان، پیشہ وارافراد اور ان کے کنبوں نیز 30 سے 40 کروڑ مزدوروں کو فائدہ پہنچے گا۔
وزیر اعظم نے کہا کہ این ڈی اے حکومت کی طرف سے کئے گئے ترقیاتی اقدامات نے بہت سی زندگیوں پر مثبت اثر ڈالا ہے، جس کا اظہار کسانوں کی فلاح وبہبود سے لے کر متوسط طبقے، آمدنی ٹیکس سے ریلیف سے لے کر بنیادی ڈھانچے، مینوفیکچرنگ سے لے کر ایم ایس ایم ای، ہاؤسنگ سے لے کر صحت کی دیکھ بھال اور نیوانڈیا کے لئے رفتار کی تیزی سے ہوتا ہے۔
انہوں نے خوشی ظاہر کی کہ یہ دیکھ کر بڑا اچھا لگتا ہے کہ مزید لوگوں کو غریبی کے چنگل سے چھڑا لیاگیا ہے۔ ہمارا نیا متوسط طبقہ اوپر اٹھ رہا ہے اور اسی طرح ان کے خواب بھی پورے ہورہے ہیں۔ وزیر اعظم نے متوسط طبقے کو ٹیکس میں ریلیف کے لئے مبارکباد دی اور کہا کہ میں متوسط طبقے کو سلام کرتا ہوں، قوم کی ترقی میں ان کے شاندار رول کے لئے۔
بجٹ میں کسانوں کے مفادات کے لئے کئے گئے اقدامات کے بارے میں انہوں نے افسوس ظاہر کیا کہ برسوں سے کسانوں کے لئے بہت سے اقدمات شروع کئے گئے تھے، لیکن افسوس کہ بہت سے کسان کبھی بھی اِن اسکیموں کے تحت نہیں آئے۔ انہوں نے کہا کہ پی ایم کسان ندھی کسانوں کے فلاح وبہبود کے لئے ایک تاریخی قدم ہے، جس سے ان کسانوں کو فائدہ پہنچے گا، جن کے پاس 5 ایکڑ سے کم زمین ہے۔ وزیر اعظم نے کہا کہ نیوانڈیا کے بجٹ میں مویشی فروری کے سیکٹر اور ماہی پروری پر بھی توجہ دی گئی ہے۔
غیر منظم سیکٹر کے مفادات کے تحفظ کی اہمیت کو اجاگر کرتے ہوئے انہوں نے کہا کہ پی ایم شرم یوگی من دھن یوجنا بڑے پیمانے پر مددگار ثابت ہوگی۔ اس شعبے کے مفادات کو زیادہ تحفظ کی ضرورت ہے اور نیو انڈیا کے بجٹ میں ایسا ہی کیاگیا ہے۔ آیوشمان بھارت یوجنا اور سماجی تحفظ کی اسکیموں سے بھی ان کی زندگی پر اثر پرے گا۔
وزیر اعظم نے یہ کہتے ہوئے اپنے بیان کو مکمل کیا کہ اِس بات کو یقینی بنانا ضروری ہے کہ ترقی کے فائدے معاشرے کے سبھی طبقوں تک پہنچے۔ انہوں نے کہا کہ‘بجٹ سے غریبوں کو بااختیار بنایا جائے گا، کسانوں کو ترقی ملے گی اور اقتصادی ترقی کو بڑھاوا ملے گا۔
