ఉమ్మడి విలువలను కాపాడుకునే, సంకటస్థితిని పరిష్కరించి విశ్వాసాన్ని నింపే విధానాలు, ప్రమాణాలను నెలకొల్పే దిశగా సమష్టి అంతర్జాతీయ కృషి అత్యావశ్యకం: ప్రధానమంత్రి
ఆరోగ్యం, విద్య, వ్యవసాయంతోపాటు అనేక అంశాలను మెరుగుపరచడం ద్వారా లక్షలాది జీవితాల్లో ఏఐ మార్పు తేగలదు: ప్రధానమంత్రి
ఏఐ ఆధారిత భవిత దిశగా ప్రజల్లో నైపుణ్యాభివృద్ధి, నైపుణ్యాల మెరుగుదలపై పెట్టుబడులు రావాలి: ప్రధానమంత్రి
ఏఐ అప్లికేషన్లను మేం ప్రజా శ్రేయస్సు కోసం అభివృద్ధి చేస్తున్నాం: ప్రధానమంత్రి
శ్రేయస్సు కోసం, అందరి కోసం ఏఐ అన్న సంకల్పంతో అనుభవాన్ని, నైపుణ్యాన్ని పంచుకునేందుకు భారత్ సిద్ధంగా ఉంది: ప్రధానమంత్రి
ఫిబ్రవరి 10న ఎలిసీ ప్యాలెస్ లో అధ్యక్షుడు ఇమ్మాన్యుయేల్ మాక్రాన్ ఇచ్చిన విందుతో ఈ ఉన్నత స్థాయి సమావేశం ప్రారంభమైంది. దేశాధినేతలు, అంతర్జాతీయ సంస్థల నాయకులు, ప్రధాన ఏఐ కంపెనీల సీఈవోలు, ఇతర విశిష్ట అతిథులంతా ఈ సమావేశంలో పాల్గొన్నారు.
నేటి చర్చల వల్ల ఒక విషయం తేటతెల్లమయ్యింది – సమావేశాల్లో పాల్గొన్నభాగస్వాములందరూ ఒకే ఆశయాన్ని, ఒకే లక్ష్యాన్నీ కలిగి ఉన్నారు.
“ఏఐ ఫౌండేషన్”, “కౌన్సిల్ ఫర్ సస్టెయినబుల్ ఏఐ” లను ఏర్పాటు చేయాలన్న నిర్ణయాన్ని నేను స్వాగతిస్తున్నాను. ఈ పథకాలను ప్రవేశపెడుతున్నందుకు ఫ్రాన్స్ దేశానికి, నా ప్రియ మిత్రుడు, అధ్యక్షుడు మేక్రాన్ కు అభినందనలు తెలియజేస్తున్నాను.
‘గ్లోబల్ పార్టనర్షిప్ ఫర్ ఏఐ’ ను సిసలైన అంతర్జాతీయ స్థాయికి తీసుకువెళ్ళాలి. అభివృద్ధి చెందుతున్న దేశాల ఆశలూ ఆకాంక్షలూ ప్రాముఖ్యాలూ అవసరాలను ఈ భాగస్వామ్యం పరిగణనలోకి తీసుకోవాలి .
ఏక్షన్ సమిట్ ద్వారా సాధించిన ప్రగతిని మరింత ముందుకు నడిపేందుకు తదుపరి సమావేశాల ఆతిథ్య బాధ్యతను భారత్ సంతోషంగా స్వీకరిస్తుంది.
ధన్యవాదాలు.
