ମୁଁ ୨୫ତମ ଏସସିଓ ଶିଖର ସମ୍ମିଳନୀରେ ଅଂଶଗ୍ରହଣ କରି ବହୁତ ଆନନ୍ଦିତ। ଆମକୁ ପ୍ରଦାନ କରାଯାଇଥିବା ଚମତ୍କାର ସ୍ୱାଗତ ଏବଂ ଆତିଥ୍ୟ ପାଇଁ ମୁଁ ରାଷ୍ଟ୍ରପତି ଜିନପିଙ୍ଗଙ୍କୁ ହୃଦୟରୁ କୃତଜ୍ଞତା ଜଣାଉଛି।
ଆଜି ଉଜବେକିସ୍ତାନର ସ୍ୱାଧୀନତା ଦିବସ। ଗତକାଲି କିର୍ଗିଜସ୍ତାନର ଜାତୀୟ ଦିବସ ଥିଲା। ଏହି ଅବସରରେ, ମୁଁ ଉଭୟ ନେତାଙ୍କୁ ମୋର ଶୁଭେଚ୍ଛା ଏବଂ ଶୁଭକାମନା ଜଣାଉଛି।
ମହାମହିମଗଣ,
ଗତ ୨୪ ବର୍ଷ ମଧ୍ୟରେ, ଏସସିଓ ସମଗ୍ର ୟୁରେସିଆନ କ୍ଷେତ୍ରର ବିସ୍ତୃତ ପରିବାରକୁ ସଂଯୋଗ କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଭାରତ ସର୍ବଦା ଏକ ସକ୍ରିୟ ସଦସ୍ୟ ଭାବରେ ଏକ ଗଠନମୂଳକ ଏବଂ ସକାରାତ୍ମକ ଭୂମିକା ଗ୍ରହଣ କରିଆସିଛି।
ଏସସିଓ ପ୍ରତି, ଭାରତର ଚିନ୍ତାଧାରା ଏବଂ ନୀତି ତିନୋଟି ମୁଖ୍ୟ ସ୍ତମ୍ଭ ଉପରେ ଆଧାରିତ:
ଏସ - ସୁରକ୍ଷା,
ସି - ସଂଯୋଗୀକରଣ,
ଓ - ସୁଯୋଗ।
ପ୍ରଥମ ସ୍ତମ୍ଭ, "ଏସ, ଅର୍ଥାତ୍, ସୁରକ୍ଷା" ସମ୍ପର୍କରେ ମୁଁ କହିବାକୁ ଚାହେଁ ଯେ, ସୁରକ୍ଷା, ଶାନ୍ତି ଏବଂ ସ୍ଥିରତା ଯେକୌଣସି ଦେଶର ବିକାଶର ଆଧାର ଅଟେ। କିନ୍ତୁ ଆତଙ୍କବାଦ, ବିଚ୍ଛିନ୍ନତାବାଦ ଏବଂ ଉଗ୍ରବାଦ ଏହି ପଥରେ ବଡ଼ ଆହ୍ୱାନ।
ଆତଙ୍କବାଦ କେବଳ ଗୋଟିଏ ଦେଶର ସୁରକ୍ଷା ପାଇଁ ଏକ ଆହ୍ୱାନ ନୁହେଁ, ବରଂ ସମଗ୍ର ମାନବଜାତି ପାଇଁ ଏକ ସାମୂହିକ ଆହ୍ୱାନ। କୌଣସି ଦେଶ, କୌଣସି ସମାଜ, କୌଣସି ନାଗରିକ ଏଥିରୁ ନିଜକୁ ସୁରକ୍ଷିତ ବୋଲି ଭାବିପାରିବେ ନାହିଁ। ସେଥିପାଇଁ ଭାରତ ଆତଙ୍କବାଦ ବିରୋଧୀ ଲଢ଼େଇରେ ଏକତା ଉପରେ ଗୁରୁତ୍ୱ ଦେଇଛି।
ଏସସିଓ-ରାଟ୍ସ ଏଥିରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଏହି ବର୍ଷ, ଭାରତ ମିଳିତ ସୂଚନା ଅଭିଯାନର ନେତୃତ୍ୱ ନେଇ "ଅଲ-କାଏଦା" ଏବଂ ଏହା ସହିତ ଜଡିତ ଆତଙ୍କବାଦୀ ସଂଗଠନଗୁଡ଼ିକ ସହିତ ଲଢ଼ିବା ପାଇଁ ପଦକ୍ଷେପ ନେଇଛି। ଆମେ ମୌଳବାଦ ବିରୁଦ୍ଧରେ ସମନ୍ୱୟ ବୃଦ୍ଧି ଏବଂ ମିଳିତ ପଦକ୍ଷେପ ନେବାକୁ ମଧ୍ୟ ପ୍ରସ୍ତାବ ଦେଇଛୁ।
ଆମେ ଆତଙ୍କବାଦ ପାଣ୍ଠି ବିରୁଦ୍ଧରେ ଆମର ସ୍ୱର ଉଠାଇଛୁ। ଏଥିରେ ମିଳିଥିବା ସମର୍ଥନ ପାଇଁ ମୁଁ ମୋର କୃତଜ୍ଞତା ପ୍ରକାଶ କରୁଛି।
ମହାମହିମଗଣ,
ଭାରତ ଗତ ଚାରି ଦଶନ୍ଧି ଧରି ନିର୍ମମ ଆତଙ୍କବାଦର ଶିକାର ହୋଇଆସୁଛି। ଅନେକ ମା’ ସେମାନଙ୍କ ପିଲାମାନଙ୍କୁ ହରାଇଛନ୍ତି ଏବଂ ଅନେକ ପିଲା ଅନାଥ ହୋଇଛନ୍ତି।
ନିକଟରେ, ଆମେ ପହଲଗାମରେ ଆତଙ୍କବାଦର ଏକ ଅତ୍ୟନ୍ତ ଘୃଣ୍ୟ ରୂପ ଦେଖିଲୁ। ଏହି ଦୁଃଖର ସମୟରେ ଆମ ସହିତ ଠିଆ ହୋଇଥିବା ବନ୍ଧୁ ରାଷ୍ଟ୍ରମାନଙ୍କ ପ୍ରତି ମୁଁ ମୋର କୃତଜ୍ଞତା ପ୍ରକାଶ କରୁଛି। ଏହି ଆକ୍ରମଣ କେବଳ ଭାରତର ବିବେକ ପ୍ରତି ଆଘାତ ନଥିଲା, ଏହା ପ୍ରତ୍ୟେକ ଦେଶ, ମାନବତାରେ ବିଶ୍ୱାସ କରୁଥିବା ପ୍ରତ୍ୟେକ ବ୍ୟକ୍ତିଙ୍କ ପାଇଁ ଏକ ଖୋଲା ଆହ୍ଵାନ ଥିଲା।
ଏପରି ପରିସ୍ଥିତିରେ, ପ୍ରଶ୍ନ ଉଠିବା ସ୍ୱାଭାବିକ: କିଛି ଦେଶ ଦ୍ୱାରା ଆତଙ୍କବାଦକୁ ଖୋଲା ସମର୍ଥନ ଆମ ପାଇଁ ଗ୍ରହଣୀୟ ହୋଇପାରିବ କି?
ମହାମହିମଗଣ,
ଆମକୁ ସ୍ପଷ୍ଟ ଭାବରେ ଏବଂ ଏକ ସ୍ୱରରେ କହିବାକୁ ପଡିବ: ଆତଙ୍କବାଦ ଉପରେ ଦ୍ୱୈତ ମାନଦଣ୍ଡ ଗ୍ରହଣୀୟ ନୁହେଁ। ଏକାଠି, ଆମକୁ ପ୍ରତ୍ୟେକ ପ୍ରକାର ଏବଂ ପ୍ରକାଶନରେ ଆତଙ୍କବାଦକୁ ବିରୋଧ କରିବାକୁ ପଡିବ। ଏହା ମାନବତା ପ୍ରତି ଆମର ଦାୟିତ୍ୱ।
ଆମକୁ ସ୍ପଷ୍ଟ ଭାବେ ଏକ ସ୍ଵରରେ କହିବାକୁ ପଡିବ ଯେ, ଆତଙ୍କବାଦ ଉପରେ କୌଣସି ଦ୍ଵନ୍ଦାତ୍ମକ ମାନଦଣ୍ଡ ଗ୍ରହଣୀୟ ହେବ ନାହିଁ। ଆମକୁ ମିଳିତ ଭାବରେ ସମସ୍ତ ରୂପ ଏବଂ ମାଧ୍ୟମରେ ଆତଙ୍କବାଦକୁ ବିରୋଧ କରିବାକୁ ପଡିବ। ଏହା ମାନବତା ପ୍ରତି ଆମର କର୍ତ୍ତବ୍ୟ।
ମହାମହିମଗଣ,
ଏବେ ମୁଁ ଦ୍ୱିତୀୟ ସ୍ତମ୍ଭ, ସି, ଅର୍ଥାତ୍ ସଂଯୋଗୀକରଣ ଉପରେ ମୋର ମତାମତ ରଖିବାକୁ ଚାହେଁ। ଭାରତ ସର୍ବଦା ବିଶ୍ୱାସ କରିଆସିଛି ଯେ, ଦୃଢ଼ ସଂଯୋଗୀକରଣ କେବଳ ବାଣିଜ୍ୟ ପାଇଁ ନୁହେଁ ବରଂ ବିଶ୍ୱାସ ଏବଂ ବିକାଶ ପାଇଁ ମଧ୍ୟ ଦ୍ୱାର ଖୋଲିଥାଏ।
ଏହି ଚିନ୍ତାଧାରା ସହିତ, ଆମେ ଚାବାହାର ବନ୍ଦର ଏବଂ ଅନ୍ତର୍ଜାତୀୟ ଉତ୍ତର - ଦକ୍ଷିଣ ପରିବହନ କରିଡର ଭଳି ପଦକ୍ଷେପ ଉପରେ କାମ କରୁଛୁ। ଏଗୁଡ଼ିକ ମାଧ୍ୟମରେ, ଆମେ ଆଫଗାନିସ୍ତାନ ଏବଂ ମଧ୍ୟ ଏସିଆ ସହିତ ସଂଯୋଗୀକରଣ ବୃଦ୍ଧି କରିପାରିବା।
ଆମେ ବିଶ୍ୱାସ କରୁ ଯେ, ପ୍ରତ୍ୟେକ ସଂଯୋଗୀକରଣ ପ୍ରୟାସରେ ସାର୍ବଭୌମତ୍ୱ ଏବଂ କ୍ଷେତ୍ରୀୟ ଅଖଣ୍ଡତାକୁ ସମ୍ମାନ କରାଯିବା ଉଚିତ।
ଏହା ଏସସିଓ ଚାର୍ଟରର ମୌଳିକ ନୀତିରେ ମଧ୍ୟ ନିହିତ ଅଛି।
ସର୍ବଭୌମତ୍ୱକୁ ପାର କରି କରାଯାଉଥିବା ସଂଯୋଗୀକରଣ, ଉଭୟ ବିଶ୍ୱାସ ଏବଂ ଅର୍ଥ ହରାଇଥାଏ।
ମହାମହିମଗଣ,
ତୃତୀୟ ସ୍ତମ୍ଭ ହେଉଛି: ‘ଓ’ ଅର୍ଥାତ୍ ସୁଯୋଗ। ସହଯୋଗ ଏବଂ ସଂସ୍କାର ପାଇଁ ସୁଯୋଗ।
୨୦୨୩ ମସିହାରେ, ଭାରତର ରାଷ୍ଟ୍ରପତିତ୍ୱ ସମୟରେ, ନୂତନ ଶକ୍ତି ଏବଂ ଚିନ୍ତାଧାରା ସୃଷ୍ଟି ହୋଇଥିଲା। ଷ୍ଟାର୍ଟ-ଅପ୍ ଏବଂ ନବସୃଜନ, ପାରମ୍ପରିକ ଔଷଧ, ଯୁବ ସଶକ୍ତିକରଣ, ଡିଜିଟାଲ ଅନ୍ତର୍ଭୁକ୍ତି ଏବଂ ସହଭାଗୀ ବୌଦ୍ଧ ଐତିହ୍ୟ ଭଳି ନୂତନ ବିଷୟ ଆମ ସହଯୋଗରେ ଯୋଡା ଯାଇଥିଲା।
ଆମର ପ୍ରୟାସ ଥିଲା ଏସସିଓକୁ ସରକାରଠାରୁ ଆଗକୁ ନେବା। ସାଧାରଣ ଲୋକ, ଯୁବ ବୈଜ୍ଞାନିକ, ବିଦ୍ୱାନ ଏବଂ ଷ୍ଟାର୍ଟ-ଅପ୍ଗୁଡ଼ିକୁ ମଧ୍ୟ ସଂଯୋଗ କରିବା।
ଆମର ଲୋକ-ଲୋକ ସମ୍ପର୍କକୁ ମଜବୁତ କରିବା ପାଇଁ, ମୁଁ ଆଜି ଆଉ ଏକ ପରାମର୍ଶ ଦେବାକୁ ଚାହୁଁଛି - ଏସସିଓ ଅଧୀନରେ ଏକ ସଭ୍ୟତାଗତ ସଂଳାପ ମଞ୍ଚ ସୃଷ୍ଟି କରାଯିବା ଉଚିତ। ଏହା ମାଧ୍ୟମରେ, ଆମେ ଆମର ପ୍ରାଚୀନ ସଭ୍ୟତା, କଳା, ସାହିତ୍ୟ ଏବଂ ପରମ୍ପରାକୁ ଏକ ବିଶ୍ୱ ମଞ୍ଚରେ ବାଣ୍ଟିପାରିବା।
ମହାମହିମଗଣ,
ଆଜି ଭାରତ ସଂସ୍କାର, ପ୍ରଦର୍ଶନ ଏବଂ ରୂପାନ୍ତରର ମୌଳିକ ମନ୍ତ୍ର ଉପରେ ଆଗକୁ ବଢ଼ୁଛି। କୋଭିଡ୍ ହେଉ କିମ୍ବା ବିଶ୍ୱ ଆର୍ଥିକ ଅସ୍ଥିରତା, ଆମେ ପ୍ରତ୍ୟେକ ଆହ୍ଵାନକୁ ସୁଯୋଗରେ ପରିଣତ କରିବାକୁ ଚେଷ୍ଟା କରିଛୁ।
ଆମେ ନିରନ୍ତର ବ୍ୟାପକ ସଂସ୍କାର ଉପରେ କାର୍ଯ୍ୟ କରୁଛୁ। ଏହା ଦେଶରେ ବିକାଶ ସହିତ ଆନ୍ତର୍ଜାତୀୟ ସହଯୋଗ ପାଇଁ ନୂତନ ସୁଯୋଗ ଖୋଲି ଦେଉଛି। ମୁଁ ଆପଣମାନଙ୍କୁ ଭାରତର ବିକାଶ ଯାତ୍ରାରେ ଯୋଗଦେବା ପାଇଁ ନିମନ୍ତ୍ରଣ କରୁଛି।
ମହାମହିମଗଣ,
ଏହା ଖୁସିର ବିଷୟ ଯେ, ଏସସିଓ ମଧ୍ୟ ସମୟ ସହିତ ବିକଶିତ ହେଉଛି। ସଂଗଠିତ ଅପରାଧ, ନିଶା କାରବାର ଏବଂ ସାଇବର ସୁରକ୍ଷା ଭଳି ସମସାମୟିକ ଆହ୍ଵାନର ମୁକାବିଲା ପାଇଁ ଚାରୋଟି ନୂତନ କେନ୍ଦ୍ର ପ୍ରତିଷ୍ଠିତ ହେଉଛି। ଆମେ ଏହି ସଂସ୍କାରମୁଖୀ ମାନସିକତାକୁ ସ୍ୱାଗତ କରୁଛୁ।
ଏସସିଓ ସଦସ୍ୟମାନେ ବିଶ୍ୱ ପ୍ରତିଷ୍ଠାନଗୁଡ଼ିକରେ ସଂସ୍କାର ପାଇଁ ପାରସ୍ପରିକ ସହଯୋଗ ବୃଦ୍ଧି କରିପାରିବେ। ଜାତିସଂଘର ୮୦ତମ ବାର୍ଷିକୀ ଅବସରରେ, ଆମେ ସର୍ବସମ୍ମତିକ୍ରମେ ଜାତିସଂଘର ସଂସ୍କାର ପାଇଁ ଆହ୍ୱାନ କରିପାରିବା।
ଦକ୍ଷିଣ ବିଶ୍ଵର ଆକାଂକ୍ଷାକୁ ପୁରୁଣା ଢାଞ୍ଚାରେ ବନ୍ଦୀ ରଖିବା ଭବିଷ୍ୟତ ପିଢ଼ି ପ୍ରତି ଏକ ଘୋର ଅନ୍ୟାୟ। ଆମେ ପୁରୁଣା କଳା-ଧଳା ପରଦାରେ ନୂତନ ପିଢ଼ିର ବହୁରଙ୍ଗୀ ସ୍ୱପ୍ନ ଦେଖାଇପାରିବୁ ନାହିଁ। ପରଦାକୁ ପରିବର୍ତ୍ତନ କରିବାକୁ ପଡିବ।
ଏସସିଓ ବହୁପାକ୍ଷିକତା ଏବଂ ସମାବେଶୀ ବିଶ୍ୱ ବ୍ୟବସ୍ଥାର ମାର୍ଗଦର୍ଶକ ହୋଇପାରିବ। ମୁଁ ଖୁସି ଯେ, ଆଜି ଏହି ଗୁରୁତ୍ୱପୂର୍ଣ୍ଣ ବିଷୟ ଉପରେ ଏକ ବିବୃତ୍ତି ଜାରି କରାଯାଉଛି।
ମହାମହିମଗଣ,
ଆମେ ସମସ୍ତ ଅଂଶୀଦାରଙ୍କ ସହିତ ସମନ୍ୱୟ ଏବଂ ସହଯୋଗରେ ଆଗକୁ ବଢ଼ୁଛୁ। ଏସସିଓର ପରବର୍ତ୍ତୀ ଅଧ୍ୟକ୍ଷ, କିର୍ଗିଜସ୍ତାନର ରାଷ୍ଟ୍ରପତି ଏବଂ ମୋର ବନ୍ଧୁ ରାଷ୍ଟ୍ରପତି ଜାପାରୋଭଙ୍କୁ ମୁଁ ଶୁଭକାମନା ଜଣାଉଛି।
ଆପଣଙ୍କୁ ବହୁତ ବହୁତ ଧନ୍ୟବାଦ।
