ଆଜି ମହାରାଷ୍ଟ୍ରର ପ୍ରତିଷ୍ଠା ଦିବସ। ମହାରାଷ୍ଟ୍ର ଦିବସରେ ଛତ୍ରପତି ଶିବାଜୀ ମହାରାଜ ଏବଂ ଦେଶର ସମସ୍ତ ଭାଇ ଓ ଭଉଣୀମାନଙ୍କୁ ଅନେକ ଅନେକ ଶୁଭେଚ୍ଛା !
ଆଜି ଗୁଜରାଟର ମଧ୍ୟ ପ୍ରତିଷ୍ଠା ଦିବସ, ଗୁଜରାଟ ପ୍ରତିଷ୍ଠା ଦିବସରେ ସାରା ବିଶ୍ୱରେ ଥିବା ସମସ୍ତ ଗୁଜରାଟୀ ଭାଇ ଓ ଭଉଣୀମାନଙ୍କୁ ଅନେକ -ଅନେକ ଶୁଭକାମନା।
ୱେଭସ ଶିଖର ସମ୍ମିଳନୀରେ ଉପସ୍ଥିତ ମହାରାଷ୍ଟ୍ରର ରାଜ୍ୟପାଳ ସି. ପି. ରାଧାକ୍ରିଷ୍ଣନ ଜୀ, ମହାରାଷ୍ଟ୍ରର ଲୋକପ୍ରିୟ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ ଜୀ, କେନ୍ଦ୍ର ମନ୍ତ୍ରିମଣ୍ଡଳରେ ମୋର ସହଯୋଗୀ ଅଶ୍ୱିନୀ ବୈଷ୍ଣବ ଜୀ, ଏଲ. ମୁରୁଗନ ଜୀ, ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଜୀ, ଅଜିତ ପାୱାର ଜୀ, ବିଶ୍ୱର କୋଣ ଅନୁକୋଣରୁ ଯୋଡି ହୋଇଥିବା ସୃଜନଶୀଳ ବିଶ୍ୱର ସମସ୍ତ ମାନ୍ୟଗଣ୍ୟ ବ୍ୟକ୍ତି, ବିଭିନ୍ନ ଦେଶରୁ ଆସି ଯୋଗଦେଇଥିବା ସୂଚନା, ଯୋଗାଯୋଗ, କଳା ଏବଂ ସଂସ୍କୃତି ବିଭାଗର ମନ୍ତ୍ରୀଗଣ, ବିଭିନ୍ନ ଦେଶର ରାଷ୍ଟ୍ରଦୂତ, ବିଶ୍ୱର କୋଣ ଅନୁକୋଣରୁ ଆସି ଏଠାରେ ଯୋଗଦେଇଥିବା ସୃଜନଶୀଳ ବିଶ୍ୱର ବ୍ୟକ୍ତିବିଶେଷ, ଅନ୍ୟ ମାନ୍ୟଗଣ୍ୟ ବ୍ୟକ୍ତିଗଣ, ମହିଳା ଏବଂ ଭଦ୍ରବ୍ୟକ୍ତିଗଣ!
ସାଥୀଗଣ,
ଆଜି ଏଠାରେ ମୁମ୍ୱାଇରେ ୧୦୦ରୁ ଅଧିକ ଦେଶର କଳାକାର, ଉଦ୍ଭାବକ, ନିବେଶକ ଏବଂ ନୀତି ନିର୍ଦ୍ଧାରକମାନେ ଗୋଟିଏ ଛାତ ତଳେ ଏକତ୍ରିତ ହୋଇଛନ୍ତି। ଏକ ପ୍ରକାରରେ, ଆଜି ଏଠାରେ ବୈଶ୍ୱିକ ପ୍ରତିଭା ଏବଂ ବୈଶ୍ୱିକ ସୃଜନଶୀଳତାର ଏକ ଗ୍ଲୋବାଲ ଇକୋସିଷ୍ଟମର ମୂଳଦୁଆ ପକାଯାଉଛି। ବିଶ୍ୱ ଅଡିଓ ଭିଜୁଆଲ୍ ଏବଂ ମନୋରଞ୍ଜନ ସମ୍ମିଳନୀ ଅର୍ଥାତ ୱେଭ୍ସ, ଏହା କେବଳ ଏକ ସଂକ୍ଷିପ୍ତ ନାମ ନୁହେଁ। ଏହା ପ୍ରକୃତରେ, ସଂସ୍କୃତିର, ସୃଜନଶୀଳତାର, ସାର୍ବଜନୀନ ସଂଯୋଗର ଏକ ୱେଭ୍ ବା ତରଙ୍ଗ। ଏହି ୱେଭ୍ ଚଳଚ୍ଚିତ୍ର, ସଙ୍ଗୀତ, ଖେଳ, ଆନିମେସନ୍, କାହାଣୀ, ସୃଜନଶୀଳତାର ବିଶାଳ ଦୁନିଆର ଏକ ବିଶ୍ୱସ୍ତରୀୟ ମଞ୍ଚ। ଏହା ଆପଣଙ୍କ ଭଳି ପ୍ରତ୍ୟେକ କଳାକାର, ପ୍ରତ୍ୟେକ ସୃଷ୍ଟିକର୍ତ୍ତାଙ୍କର, ଯେଉଁଠାରେ ପ୍ରତ୍ୟେକ କଳାକାର, ପ୍ରତ୍ୟେକ ଯୁବକ, ଏକ ନୂତନ ଚିନ୍ତାଧାରା ସହିତ ସୃଜନଶୀଳ ଦୁନିଆ ସହିତ ଯୋଡ଼ି ହେବେ। ଏହି ଐତିହାସିକ ଏବଂ ଗୌରବମୟ ଆରମ୍ଭ ପାଇଁ, ଦେଶ-ବିଦେଶରୁ ଏକତ୍ରିତ ହୋଇଥିବା ସମସ୍ତ ମାନ୍ୟଗଣ୍ୟ ବ୍ୟକ୍ତିଙ୍କୁ ମୁଁ ମୋର ହାର୍ଦ୍ଦିକ ଅଭିନନ୍ଦନ ଏବଂ ଶୁଭେଚ୍ଛା ଜଣାଉଛି।
ସାଥୀଗଣ,
‘‘ଆଜି ମଇ ୧ ତାରିଖ, ୧୧୨ ବର୍ଷ ପୂର୍ବେ, ୧୯୧୩ ରେ ମେ ୩ତାରିଖରେ ଭାରତରେ ପ୍ରଥମ ଫିଚର ଚଳଚ୍ଚିତ୍ର ରାଜା ହରିଶ୍ଚନ୍ଦ୍ର ମୁକ୍ତିଲାଭ କରିଥିଲା। ଏହାର ନିର୍ମାତା ଦାଦା ସାହେବ ଫାଲକେ ଜୀ ଥିଲେ, ଏବଂ ଗତକାଲି ତାଙ୍କର ଜୟନ୍ତୀ ଥିଲା। ବିଗତ ଶତାବ୍ଦୀରେ, ଭାରତୀୟ ସିନେମା ଭାରତକୁ ବିଶ୍ୱର ପ୍ରତ୍ୟେକ କୋଣକୁ ନେଇଯିବାରେ ସଫଳ ହୋଇଛି। ରୁଷରେ ରାଜ କପୁର ଜୀଙ୍କ ଲୋକପ୍ରିୟତା, କାନ୍ସରେ ସତ୍ୟଜିତ ରାୟଙ୍କ ଲୋକପ୍ରିୟତା ଏବଂ ଓସ୍କାରରେ ଆରଆରଆରର ସଫଳତାରେ ପ୍ରତିଫଳିତ ହୋଇଛି। ଗୁରୁ ଦତ୍ତଙ୍କ ସିନେମାଟିକ୍ ପୋଏଟ୍ରୀ ହେଉ କିମ୍ୱା ରିତ୍ୱିକ ଘଟକଙ୍କ ସାମାଜିକ ପ୍ରତିଫଳନ, ଏ. ଆର୍. ରେହମାନ୍ଙ୍କ ସଙ୍ଗୀତ ହେଉ କିମ୍ୱା ରାଜାମୌଲିଙ୍କ ମହାଗାଥା, ପ୍ରତ୍ୟେକ କାହାଣୀ ଭାରତୀୟ ସଂସ୍କୃତିର ସ୍ୱର ହୋଇ ବିଶ୍ୱର କୋଟି କୋଟି ଲୋକଙ୍କ ହୃଦୟରେ ପ୍ରବେଶ କରିଛି। ଆଜି, ୱେଭସ୍ର ଏହି ମଞ୍ଚରେ, ଆମେ ଡାକ-ଟିକଟ ମାଧ୍ୟମରେ ଭାରତୀୟ ଚଳଚ୍ଚିତ୍ରର ଅନେକ ମହାନ ବ୍ୟକ୍ତିତ୍ୱଙ୍କୁ ସ୍ମରଣ କରିଛୁ।
ସାଥୀଗଣ,
ବର୍ଷ ବର୍ଷ ଧରି, ମୁଁ କେତେବେଳେ ଖେଳ ଜଗତର ଲୋକଙ୍କୁ ଭେଟିଛି, କେତେବେଳେ ସଙ୍ଗୀତ ଜଗତର ଲୋକଙ୍କୁ ଭେଟିଛି, ଚଳଚ୍ଚିତ୍ର ନିର୍ମାତାଙ୍କୁ ଭେଟିଛି, କେତେବେଳେ ପରଦାରେ ଚମକୁଥିବା ମୁହଁକୁ ଭେଟିଛି। ଏହି ଆଲୋଚନାଗୁଡ଼ିକ ପ୍ରାୟତଃ ଭାରତର ସୃଜନଶୀଳତା, ସୃଜନଶୀଳ ସାମର୍ଥ୍ୟ ଏବଂ ବିଶ୍ୱସ୍ତରୀୟ ସହଯୋଗର କଥା ଉଠୁଥିଲା । ଯେତେବେଳେ ବି ମୁଁ ସମସ୍ତ ସୃଜନଶୀଳ ଜଗତର ଲୋକଙ୍କୁ ଭେଟିଥିଲି, ଆପଣମାନଙ୍କଠାରୁ ବିଚାର ନେଇଥିଲି, ମୁଁ ନିଜେ ମଧ୍ୟ ଏହି ବିଷୟକୁ ଗଭୀର ଭାବରେ ଯିବାର ସୁଯୋଗ ପାଇଥିଲି। ତା’ପରେ ମୁଁ ଏକ ପରୀକ୍ଷା ମଧ୍ୟ କଲି। ଛଅ-ସାତ ବର୍ଷ ପୂର୍ବେ, ଯେତେବେଳେ ମହାତ୍ମା ଗାନ୍ଧୀ ଜୀଙ୍କ ୧୫୦ତମ ଜୟନ୍ତୀର ଅବସର ଆସିଲା, ସେତେବେଳେ ମୁଁ ୧୫୦ଟି ଦେଶର ଗାୟକ-ଗାୟିକାମାନଙ୍କୁ ଗାନ୍ଧୀଜୀଙ୍କ ପ୍ରିୟ ଗୀତ ‘ବୈଷ୍ଣବ ଜନ କୋ ତେନେ କହିଏ’ ଗାଇବା ପାଇଁ ପ୍ରେରିତ କରିଥିଲି। ନରସୀ ମେହେତା ଜୀଙ୍କ ଦ୍ୱାରା ରଚିତ ଏହି ଗୀତ ୫୦୦-୬୦୦ବର୍ଷ ପୁରୁଣା, କିନ୍ତୁ 'ଗାନ୍ଧୀ ୧୫୦' ସମୟରେ ସାରା ବିଶ୍ୱର କଳାକାରମାନେ ଏହାକୁ ଗାଇଛନ୍ତି ଏବଂ ଏହାର ବହୁତ ପ୍ରଭାବ ପଡ଼ିଛି, ଏଥିରେ ବିଶ୍ୱ ଏକାଠି ହୋଇଯାଇଥିଲା। ଏଠାରେ ମଧ୍ୟ ଅନେକ ଲୋକ ବସିଛନ୍ତି, ଯେଉଁମାନେ ଗାନ୍ଧୀଜୀଙ୍କ ଚିନ୍ତାଧାରାକୁ ଆଗକୁ ନେଇ 'ଗାନ୍ଧୀ ୧୫୦' ସମୟରେ ୨-୨, ୩-୩ ମିନିଟର ନିଜ ନିଜର ଭିଡିଓ ତିଆରି କରିଥିଲେ। ଭାରତ ଏବଂ ସମଗ୍ର ବିଶ୍ୱର ସୃଜନଶୀଳ ବିଶ୍ୱର ଶକ୍ତି ମିଳିତ ଭାବେ କ’ଣ ଚମତ୍କାର କାର୍ଯ୍ୟ କରିପାରିବେ, ତାହାର ଝଲକ ଆମେ ଦେଖିଛୁ। ଆଜି ସେହି ସମୟର କଳ୍ପନାଗୁଡିକ ୱେଭ୍ସ ଭାବରେ ଏହି ଭୁମିରେ ପଦାର୍ପଣ କରିଛି ।
ସାଥିଗଣ,
ଯେପରି ଏକ ନୂତନ ସୂର୍ଯ୍ୟ ଉଦୟ ହେବା ମାତ୍ରେ ଆକାଶକୁ ରଙ୍ଗାୟିତ କରିଦେଇଥାଏ, ସେହିଭଳି ଏହି ଶିଖର ସମ୍ମିଳନୀ ପ୍ରଥମ ମୁହୂର୍ତ୍ତରୁ ଉଜ୍ଜ୍ୱଳ ହେବାରେ ଲାଗିଛି । ପ୍ରଥମ ମୁହୂର୍ତ୍ତରୁ ହିଁ ଶିଖର ସମ୍ମିଳନୀ ଉଦ୍ଦେଶ୍ୟରେ ଗର୍ଜନ କରୁଛି ବୋଲି ସେ କହିଛନ୍ତି। ୱେଭ୍ସ ଏହାର ପ୍ରଥମ ସଂସ୍କରଣରେ ବିଶ୍ୱର ଦୃଷ୍ଟି ଆକର୍ଷଣ କରିଛି । ଆମର ପରାମର୍ଶଦାତା ବୋର୍ଡ ସହିତ ଜଡିତ ସମସ୍ତ ସହକର୍ମୀଙ୍କ ଦ୍ୱାରା କରାଯାଇଥିବା କଠିନ ପରିଶ୍ରମ ଆଜି ଏଠାରେ ଦୃଶ୍ୟମାନ ହେଉଛି । ବିଗତ ଦିନଗୁଡିକରେ ଆପଣ ସୃଜନଶୀତଳାରେ ଆହ୍ୱାନ, କ୍ରିଏଟୋସ୍ଫିୟର ଅଭିଯାନକୁ ଏକ ବୃହତ୍ ଭାବରେ ଆରମ୍ଭ କରିଛନ୍ତି । ବିଶ୍ୱର ପ୍ରାୟ ୬୦ଟି ଦେଶରୁ ୧ ଲକ୍ଷ ସୃଜନଶୀଳ ବ୍ୟକ୍ତି ଏଥିରେ ଭାଗ ନେଇଛନ୍ତି, ଏବଂ ୩୨ଟି ଚ୍ୟାଲେଞ୍ଜରେ ୮୦୦ ଫାଇନାଲିଷ୍ଟ ଚୟନ କରାଯାଇଛି । ସମସ୍ତ ଫାଇନାଲିଷ୍ଟମାନଙ୍କୁ ମୁଁ ଅନେକ-ଅନେକ ଶୁଭକାମନା ଜଣାଉଛି । ଆପଣଙ୍କୁ ସୁଯୋଗ ମିଳିଛି ଦୁନିଆରେ ପ୍ରାଧାନ୍ୟ ବିସ୍ତାର କରିବାକୁ, କିଛି ପ୍ରଦର୍ଶନ କରିବାକୁ ।
ସାଥୀଗଣ,
ମୋତେ କୁହାଯାଇଛି ଯେ ଏଠାରେ ଇଣ୍ଡିଆ ପାଭିଲିଅନରେ ଆପଣମାନେ ବହୁତ କିଛି ନୂତନ ସୃଷ୍ଟି କରିଛନ୍ତି। ମୁଁ ମଧ୍ୟ ଏହାକୁ ଦେଖିବାକୁ ବହୁତ ଆଗ୍ରହୀ, ମୁଁ ନିଶ୍ଚିତ ଯିବି। ୱେଭସ୍ ବଜାରର ପଦକ୍ଷେପ ମଧ୍ୟ ଅତ୍ୟନ୍ତ ଆକର୍ଷଣୀୟ। ଏହାଦ୍ୱାରା ନୂଆ ନିର୍ମାତାଙ୍କୁ ପ୍ରୋତ୍ସାହନ ମିଳିବ, ସେମାନେ ନୂଆ ବଜାର ସହିତ ଯୋଡ଼ି ହୋଇପାରିବେ। କଳା କ୍ଷେତ୍ରରେ କ୍ରେତା ଏବଂ ବିକ୍ରେତାଙ୍କୁ ଯୋଡ଼ିବାର ଏହି ବିଚାର ବାସ୍ତବରେ ବହୁତ ଭଲ।
ସାଥୀଗଣ,
ଆମେ ଦେଖୁଛୁ ଯେ ଏକ ଛୋଟ ପିଲାର ଜୀବନର ଆରମ୍ଭରୁ, ଯେତେବେଳେ ପିଲା ଜନ୍ମ ହୁଏ, ମା 'ସହିତ ତା' ର ସମ୍ପର୍କ ମଧ୍ୟ ଲୋରୀରୁ ଆରମ୍ଭ ହୋଇଥାଏ । ସେ ତାଙ୍କ ମା 'ଙ୍କ ଠାରୁ ପ୍ରଥମ ସ୍ୱର ଶୁଣନ୍ତି। ସେ ସଙ୍ଗୀତରୁ ପ୍ରଥମ ସ୍ୱର ବୁଝନ୍ତି, ଯେପରି ଜଣେ ମା’ଏକ ପିଲାର ସ୍ୱପ୍ନ ବୁଣନ୍ତି, ସେହିପରି ସୃଜନଶୀଳ ଦୁନିଆରେ ଲୋକମାନେ ଏକ ଯୁଗର ସ୍ୱପ୍ନ ବୁଣନ୍ତି। ଏଭଳି ଲୋକଙ୍କୁ ଏକାଠି କରିବା ୱେଭ୍ସର ଲକ୍ଷ୍ୟ
ସାଥୀଗଣ,
ଲାଲକିଲ୍ଲାରୁ ମୁଁ ସମସ୍ତଙ୍କ ପ୍ରୟାସ ବିଷୟରେ କହିଥିଲି । ଆଜି ମୋର ଏହି ବିଶ୍ୱାସ ଆହୁରି ଦୃଢ ହୋଇଯାଇଛି ଯେ ଆପଣ ସମସ୍ତଙ୍କର ପ୍ରୟାସ ଆଗାମୀ ବର୍ଷଗୁଡିକରେ ୱେଭସ୍କୁ ନୂତନ ଶିଖରକୁ ନେଇଯିବ । ମୁଁ ମୋର ଶିଳ୍ପ ସହକର୍ମୀମାନଙ୍କୁ ଅନୁରୋଧ କରିବି ଯେ ସେମାନେ ଯେପରି ପ୍ରଥମ ଶିଖର ସମ୍ମିଳନୀରେ ହାତ ଧରିଛନ୍ତି, ସେହିଭଳି ଭବିଷ୍ୟତରେ ମଧ୍ୟ ସମାନ କାର୍ଯ୍ୟ ଜାରି ରଖନ୍ତୁ । ବର୍ତ୍ତମାନ ୱେଭ୍ସରେ ଅନେକ ସୁନ୍ଦର ତରଙ୍ଗ ଆସିବାକୁ ଅଛି, ଭବିଷ୍ୟତରେ ୱେଭସ ପୁରସ୍କାର ଆସିବା ଆରମ୍ଭ ହେବାକୁ ଯାଉଛି। ଏଗୁଡିକ କଳା ଏବଂ ସୃଜନଶୀଳତା ଜଗତରେ ସବୁଠାରୁ ସମ୍ମାନଜନକ ପୁରସ୍କାର ହେବାକୁ ଯାଉଛି । ଆମକୁ ଏକଜୁଟ କରିବାକୁ ହେବ, ବିଶ୍ୱର ହୃଦୟ ଜିତିବାକୁ ହେବ, ଲୋକଙ୍କୁ ଜିତିବାକୁ ହେବ ।
ସାଥୀଗଣ,
ଆଜି ଭାରତ, ବିଶ୍ୱର ତୃତୀୟ ସର୍ବବୃହତ୍ ଅର୍ଥବ୍ୟବସ୍ଥା ହେବା ଦିଗରେ ଦ୍ରୁତ ଗତିରେ ଅଗ୍ରସର ହେଉଛି। ଆଜି ବିଶ୍ୱ ଫିନଟେକ୍ ଗ୍ରହଣୀୟତା ହାରରେ ଭାରତ ଏକ ନମ୍ୱର ସ୍ଥାନରେ ରହିଛି। ଏହା ବିଶ୍ୱର ଦ୍ୱିତୀୟ ସର୍ବବୃହତ୍ ମୋବାଇଲ୍ ଫୋନ୍ ଉତ୍ପାଦନକାରୀ । ଭାରତରେ ବିଶ୍ୱର ତୃତୀୟ ସର୍ବବୃହତ୍ ଷ୍ଟାର୍ଟଅପ୍ ଇକୋସିଷ୍ଟମ ରହିଛି। ବିକଶିତ ଭାରତ ପାଇଁ ଆମର ଯାତ୍ରା ଏବେ ଆରମ୍ଭ ହୋଇଛି। ଭାରତ ପାଖରେ ଦେବା ପାଇଁ ଆହୁରି ଅନେକ କିଛି ଅଛି। ୧୦୦ କୋଟିରୁ ଅଧିକ ଜନସଂଖ୍ୟା ବିଶିଷ୍ଟ ଭାରତ ମଧ୍ୟ ୧୦୦ କୋଟିରୁ ଅଧିକ କାହାଣୀର ଦେଶ। ଦୁଇ ହଜାର ବର୍ଷ ପୂର୍ବେ, ଯେତେବେଳେ ଭରତ ମୁନି ନାଟ୍ୟ ଶାସ୍ତ୍ର ଲେଖିଥିଲେ, ସେତେବେଳେ ତାଙ୍କର ବାର୍ତ୍ତା ଥିଲା- ‘ନାଟ୍ୟମ୍ ଭବୟତି ଲୋକମ୍’ ଅର୍ଥାତ୍, କଳା ବିଶ୍ୱକୁ ଆବେଗ, ଭାବନା ପ୍ରଦାନ କରିଥାଏ। ଶହ ଶହ ବର୍ଷ ପୂର୍ବେ, ଯେତେବେଳେ କାଳିଦାସ ଅଭିଜ୍ଞାନ-ଶକୁନ୍ତଳମ୍ ଲେଖିଥିଲେ, ସେତେବେଳେ ଭାରତ ଶାସ୍ତ୍ରୀୟ ନାଟକକୁ ଏକ ନୂତନ ଦିଗ ଦେଇଥିଲା। ଭାରତର ପ୍ରତ୍ୟେକ ପଥରେ ଏକ କାହାଣୀ ରହିଛି, ପ୍ରତ୍ୟେକ ପାହାଡ଼ର ଏକ ଗୀତ ରହିଛି, ପ୍ରତ୍ୟେକ ନଦୀର କିଛି ନା କିଛି ଗୁଞ୍ଜରଣ ରହିଛି। ଯଦି ଆପଣ ଭାରତର ୬ଲକ୍ଷରୁ ଅଧିକ ଗ୍ରାମକୁ ଯିବା, ତେବେ ପ୍ରତ୍ୟେକ ଗାଁର ନିଜସ୍ୱ ଲୋକକଥା ରହିଛି, କାହାଣୀ କହିବାର ନିଜସ୍ୱ ଶୈଳୀ ରହିଛି। ଏଠାରେ ବିଭିନ୍ନ ସମାଜ ନିଜର ଇତିହାସକୁ ଲୋକକଥା ମାଧ୍ୟମରେ ପରବର୍ତ୍ତୀ ପିଢ଼ି ପର୍ଯ୍ୟନ୍ତ ହସ୍ତାନ୍ତର କରିଛନ୍ତି। ଆମର ଏଠାରେ ସଙ୍ଗୀତ ମଧ୍ୟ ଏକ ମାଧ୍ୟମ। ଭଜନ ହେଉ, ଗଜଲ ହେଉ, ଶାସ୍ତ୍ରୀୟ ହେଉ କିମ୍ୱା ସମସାମୟିକ, ପ୍ରତ୍ୟେକ ସ୍ୱରର ଏକ କାହାଣୀ ଅଛି, ପ୍ରତ୍ୟେକ ତାଳରେ ଏକ ଆତ୍ମା ରହିଛି ।
ସାଥୀଗଣ,
ଆମ ପାଖରେ ନାଦ ବ୍ରହ୍ମ, ଅର୍ଥାତ୍ ‘ସାଉଣ୍ଡ ଅଫ ଡିଭାଇନ’ର ଧାରଣା ରହିଛି। ଆମ ଦେବତାମାନେ ମଧ୍ୟ ସଙ୍ଗୀତ ଏବଂ ନୃତ୍ୟ ମାଧ୍ୟମରେ ନିଜକୁ ପ୍ରକାଶ କରନ୍ତି। ଭଗବାନ ଶିବଙ୍କ ଡମରୁ-ସୃଷ୍ଟିର ପ୍ରଥମ ଧ୍ୱନି, ମା ସରସ୍ୱତୀଙ୍କ ବୀଣା-ଜ୍ଞାନ ଏବଂ ଶିକ୍ଷାର ତାଳ, ଶ୍ରୀ କୃଷ୍ଣଙ୍କ ବଂଶୀ-ପ୍ରେମ ଏବଂ ସୌନ୍ଦର୍ଯ୍ୟର ଅମର ବାର୍ତ୍ତା, ବିଷ୍ଣୁଙ୍କ ଶଙ୍ଖ ଧ୍ୱନି-ସକରାତ୍ମକ ଶକ୍ତିର ଆହ୍ୱାନ, ଏସବୁ ଏତେ ବ୍ୟାପକ ଯେ ଆମେ ଏଠାରେ ଯେଉଁ ମନ ମୋହିନେଉଥିବା ଚିତ୍ତାକର୍ଷକ ସାଂସ୍କୃତିକ ପ୍ରଦର୍ଶନରେ ମଧ୍ୟ ଏହାର ଏକ ଝଲକ ଦେଖିବାକୁ ମିଳିଲା । ସେଥିପାଇଁ ମୁଁ କହୁଛି-ଏହା ହିଁ ସଠିକ୍ ସମୟ। ଭାରତରେ କଣ୍ଟେଣ୍ଟ ସୃଷ୍ଟି କରିବା, ବିଶ୍ୱ ପାଇଁ ସୃଷ୍ଟି କରିବା ପାଇଁ ଏହା ହେଉଛି ଉପଯୁକ୍ତ ସମୟ। ଆଜି ଯେତେବେଳେ ବିଶ୍ୱ କାହାଣୀ କହିବା ପାଇଁ ନୂଆ ନୂଆ ଉପାୟ ଖୋଜୁଛି, ସେତେବେଳେ ଭାରତ ପାଖରେ ହଜାର ହଜାର ବର୍ଷର କାହାଣୀଗୁଡ଼ିକର ଭଣ୍ଡାର ରହିଛି। ଏବଂ ଏହି ଭଣ୍ଡାର କାଳଜୟୀ, ଚିନ୍ତା ଉଦ୍ରେକକାରୀ ଏବଂ ପ୍ରକୃତରେ ବିଶ୍ୱସ୍ତରୀୟ। ଆଉ ଏହା ନୁହେଁ ଯେ ଏଥିରେ କେବଳ ସଂସ୍କୃତି ସମ୍ୱନ୍ଧୀୟ ବିଷୟ ରହିଛି, ବରଂ ଏଥିରେ ବିଜ୍ଞାନ, କ୍ରୀଡ଼ା, ବୀରତ୍ୱର କାହାଣୀ, ବଳିଦାନ -ତପସ୍ୟାର କାହାଣୀ ରହିଛି। ଆମ କାହାଣୀରେ ବିଜ୍ଞାନ ଅଛି, କଳ୍ପନା ଅଛି, ସାହସ ଅଛି, ସାହସିକତା ଅଛି, ଭାରତର ଏହି ଭଣ୍ଡାରର ଝୁଡ଼ି ବହୁତ ବଡ଼, ବହୁତ ବିଶାଳ। ଏହି ଭଣ୍ଡାରକୁ ବିଶ୍ୱର ପ୍ରତ୍ୟେକ କୋଣକୁ ନେଇଯିବା, ଏହାକୁ ଭବିଷ୍ୟତ ପିଢ଼ି ସମ୍ମୁଖରେ ଏକ ନୂତନ ଏବଂ ଆକର୍ଷଣୀୟ ଉପାୟରେ ରଖିବା କେଭ୍ସ ମଞ୍ଚର ଏହା ହିଁ ବଡ଼ ଦାୟିତ୍ୱ ।
ସାଥୀଗଣ,
ଆପଣମାନଙ୍କ ମଧ୍ୟରୁ ଅଧିକାଂଶ ଲୋକେ ଜାଣିଥିବେ ଯେ ଆମ ଦେଶରେ ସ୍ୱାଧୀନତାର ମାତ୍ର କିଛି ବର୍ଷ ପରେ ପଦ୍ମ ପୁରସ୍କାର ଆରମ୍ଭ ହୋଇଥିଲା। ଏତେ ବର୍ଷ ଧରି ଏହି ପୁରସ୍କାର ପ୍ରଦାନ କରାଯାଉଛି, କିନ୍ତୁ ଆମେ ଏହି ପୁରସ୍କାରଗୁଡ଼ିକୁ ଲୋକପ୍ରିୟ କରିଛୁ। ଯେଉଁମାନେ ଦେଶର କୋଣ ଅନୁକୋଣରେ ଦେଶ ପାଇଁ ବଞ୍ଚୁଛନ୍ତି, ସମାଜର ସେବା କରୁଛନ୍ତି, ଆମେ ସେମାନଙ୍କୁ ଚିହ୍ନଟ କରିଛୁ, ସେମାନଙ୍କୁ ପ୍ରତିଷ୍ଠା ଦେଇଛୁ, ତେଣୁ ପରମ୍ପରାର ସ୍ୱରୂ ବଦଳିଛି। ଏବେ ସାରା ଦେଶ ଏହାକୁ ଖୋଲା ହୃଦୟରେ ସ୍ୱୀକୃତି ଦେଇଛି, ଏବେ ଏହା କେବଳ ଏକ କାର୍ଯ୍ୟକ୍ରମ ନୁହେଁ, ବରଂ ସମଗ୍ର ଦେଶର ଉତ୍ସବ ପାଲଟିଛି। ୱେଭ୍ସ ମଧ୍ୟ ସେହିଭଳି। ସୃଜନଶୀଳ ଦୁନିଆରେ, ଚଳଚ୍ଚିତ୍ରରେ, ସଙ୍ଗୀତରେ, ଆନିମେସନରେ, ଗେମିଂରେ, ଭାରତର କୋଣ ଅନୁକୋଣରେ ଯେଉଁ ପ୍ରତିଭା ରହିଛି, ୱେଭ୍ସ ତାହାକୁ ଏକ ମଞ୍ଚ ପ୍ରଦାନ କରିବ, ସେତେବେଳେ ବିଶ୍ୱ ମଧ୍ୟ ଏହାର ପ୍ରଶଂସା କରିବ।
ସାଥୀଗଣ,
ବିଷୟବସ୍ତୁ ନିର୍ମାଣରେ ଭାରତର ଆଉ ଏକ ବିଶେଷତ୍ୱ ଆପଣଙ୍କୁ ବହୁତ ସାହାଯ୍ୟ କରିବାକୁ ଯାଉଛି। ଆନୋ ଭଦ୍ରାଃ କ୍ରତାଭୋ ୟନ୍ତୁ ବିଶ୍ୱତଃ ଧାରଣାର ଆମେ ଅନୁଗାମୀ। ଏହାର ଅର୍ଥ ହେଉଛି, ଆମ ପାଖକୁ ଚାରି ଦିଗରୁ ଭଲ ବିଚାର ଆସୁ। ଏହା ଆମ ସଭ୍ୟତାର ଉନ୍ମୁକ୍ତତାର ପ୍ରମାଣ। ଏହି ଭାବନା ସହିତ ପାର୍ସୀମାନେ ଏଠାକୁ ଆସିଥିଲେ। ଏବଂ ଆଜି ମଧ୍ୟ, ପାର୍ସୀ ସମ୍ପ୍ରଦାୟ ଭାରତରେ ଅତ୍ୟନ୍ତ ଗର୍ବର ସହ ଉନ୍ନତି କରୁଛି। ଏହା ମଧ୍ୟ ସୁଦୃଢ଼ ହେବ। ଇହୁଦୀମାନେ ଏଠାକୁ ଆସିଥିଲେ ଏବଂ ଭାରତୀୟ ଭାବେ ରହିଥିଲେ। ବିଶ୍ୱର ପ୍ରତ୍ୟେକ ସମାଜ, ପ୍ରତ୍ୟେକ ଦେଶର ନିଜସ୍ୱ ସଫଳତା ରହିଛି। ଏହି କାର୍ଯ୍ୟକ୍ରମରେ ଏଠାରେ ଅନେକ ଗୁଡିଏ ଦେଶର ମନ୍ତ୍ରୀଗଣ ଅଛନ୍ତି, ଦେଶର ପ୍ରତିନିଧି ଅଛନ୍ତି, ସେହି ଦେଶଗୁଡ଼ିକର ନିଜସ୍ୱ ସଫଳତା ରହିଛି, ସାରା ବିଶ୍ୱରୁ ବିଚାର ଏବଂ କଳାକୁ ସ୍ୱାଗତ କରୁଛନ୍ତି, ସେମାନଙ୍କୁ ସମ୍ମାନ ଦେଉଛନ୍ତି, ଏହା ହେଉଛି ଆମ ସଂସ୍କୃତିର ଶକ୍ତି। ତେଣୁ ମିଳିତ ଭାବେ, ଆମେ ପ୍ରତ୍ୟେକ ସଂସ୍କୃତିରେ ବିଭିନ୍ନ ଦେଶର ସଫଳତା ସହିତ ଜଡ଼ିତ ମହାନ ବିଷୟବସ୍ତୁ ମଧ୍ୟ ସୃଷ୍ଟି କରିପାରିବା। ଏହି 'ଗ୍ଲୋବାଲ କନେକ୍ଟ’ ଆମର ଦୃଷ୍ଟିକୋଣକୁ ଆହୁରି ମଜବୁତ କରିବ ।
ସାଥୀଗଣ,
ମୁଁ ଆଜି ବିଶ୍ୱବାସୀଙ୍କୁ, ଭାରତ ବାହାରେ ଥିବା ସୃଜନଶୀଳ ବିଶ୍ୱବାସୀଙ୍କୁ ମଧ୍ୟ ଆଶ୍ୱସ୍ତ କରିବାକୁ ଚାହୁଁଛି ଯେ ଯେତେବେଳେ ଆପଣ ଭାରତ ସହିତ ଯୋଡ଼ି ହେବେ, ଯେତେବେଳେ ଭାରତର କାହାଣୀ ଜାଣିବେ, ସେତେବେଳେ ଆପଣଙ୍କୁ ଏପରି କାହାଣୀ ମିଳିବ, ଯାହା ଆପଣଙ୍କୁ ଅନୁଭବ ହେବ, ମୋ ଦେଶରେ ମଧ୍ୟ ଏପରି ହୋଇଥାଏ। ଆପଣ ଭାରତ ସହିତ ଏକ ଅତି ସ୍ୱାଭାବିକ ସମ୍ପର୍କ ଅନୁଭବ କରିବେ, ତା' ପରେ ଆପଣଙ୍କୁ ଆମର ‘କ୍ରିଏଟ ଇନ ଇଣ୍ଡିଆ’ ମନ୍ତ୍ରକୁ ଅଧିକ ସହଜ ଅନୁଭବ କରିବେ।
ସାଥୀଗଣ,
ଏହା ଭାରତରେ କମଳା ଅର୍ଥବ୍ୟବସ୍ଥାର ଉଦୟ ହେବାର ସମୟ। ବିଷୟବସ୍ତୁ, ସୃଜନଶୀଳତା ଏବଂ ସଂସ୍କୃତି-ଏଗୁଡ଼ିକ ହେଉଛି କମଳା ଅର୍ଥବ୍ୟବସ୍ଥାର ତିନୋଟି ଅକ୍ଷ। ଭାରତୀୟ ଚଳଚ୍ଚିତ୍ରର ପ୍ରସାର ଏବେ ବିଶ୍ୱର ପ୍ରତ୍ୟେକ କୋଣରେ ପହଞ୍ଚୁଛି। ଆଜି ଭାରତୀୟ ଚଳଚ୍ଚିତ୍ର ଶହେରୁ ଅଧିକ ଦେଶରେ ମୁକ୍ତିଲାଭ କରୁଛି। ବିଦେଶୀ ଦର୍ଶକମାନେ ମଧ୍ୟ ବର୍ତ୍ତମାନ ଭାରତୀୟ ଚଳଚ୍ଚିତ୍ରଗୁଡ଼ିକୁ କେବଳ ସାଧାରଣ ଭାବେ ଦେଖିବା ପରିବର୍ତ୍ତେ ବୁଝିବାକୁ ଚେଷ୍ଟା କରୁଛନ୍ତି। ସେଥିପାଇଁ ଆଜି ବହୁ ସଂଖ୍ୟାରେ ବିଦେଶୀ ଦର୍ଶକ ସବ୍ଟାଇଟଲ ବା ଉପଶୀର୍ଷକ ସହିତ ଭାରତୀୟ ବିଷୟବସ୍ତୁ ଦେଖୁଛନ୍ତି। ଭାରତରେ ଓଟିଟି ଉଦ୍ୟୋଗ ଗତ କିଛି ବର୍ଷ ମଧ୍ୟରେ ୧୦ଗୁଣ ଅଭିବୃଦ୍ଧି ହାସଲ କରିଛି। ପରଦାର ଆକାର ଛୋଟ ହେଉଥିଲେ ମଧ୍ୟ ଏହାର ପରିସର ଅସୀମ ହୋଇଛି । ପରଦା ସୂକ୍ଷ୍ମ ହେବାରେ ଲାଗିଛି, କିନ୍ତୁ ବାର୍ତ୍ତା ବଡ ହେବାରେ ଲାଗିଛି। ଆଜିକାଲି ଭାରତୀୟ ଖାଦ୍ୟ ବିଶ୍ୱର ପ୍ରିୟ ହେବାରେ ଲାଗିଛି। ମୋର ବିଶ୍ୱାସ ଯେ ଆଗାମୀ ଦିନରେ ଭାରତର ଗୀତ ମଧ୍ୟ ବିଶ୍ୱ ପରିଚୟ ହେବ।
ସାଥୀଗଣ,
ଭାରତର ସୃଜନଶୀଳ ଅର୍ଥବ୍ୟବସ୍ଥା ଆଗାମୀ ବର୍ଷରେ ଜିଡିପିରେ ଏହାର ଅବଦାନକୁ ଆହୁରି ବୃଦ୍ଧି କରିପାରେ । ଆଜି ଭାରତ ଚଳଚ୍ଚିତ୍ର ପ୍ରଯୋଜନା, ଡିଜିଟାଲ ବିଷୟବସ୍ତୁ, ଖେଳ, ଫ୍ୟାସନ, ଏବଂ ସଙ୍ଗୀତର ଏକ ବିଶ୍ୱସ୍ତରୀୟ ହବ୍ ପାଲଟିଛି । ଲାଇଭ କନସର୍ଟ ସହିତ ଜଡିତ ଶିଳ୍ପ ପାଇଁ ଆମ ସମ୍ମୁଖରେ ଅନେକ ସମ୍ଭାବନା ରହିଛି । ଆଜି ବିଶ୍ୱ ଆନିମେସନ ବଜାରରେ ଆକାର ୪୩୦ ବିଲିୟନ ଡଲାରରୁ ଅଧିକ। ଆସନ୍ତା ୧୦ବର୍ଷ ମଧ୍ୟରେ ଏହା ଦ୍ୱିଗୁଣିତ ହୋଇପାରେ ବୋଲି ଆକଳନ କରାଯାଇଛି । ଭାରତର ଆନିମେସନ ଏବଂ ଗ୍ରାଫିକ୍ସ ଇଣ୍ଡଷ୍ଟ୍ରି ପାଇଁ ଏହା ଏକ ବଡ ସୁଯୋଗ ଅଟେ ।
ସାଥୀଗଣ,
କମଳା ଅର୍ଥବ୍ୟବସ୍ଥାର ଏହି ଉତ୍କର୍ଷରେ, ମୁଁ ୱେଭସର ଏହି ମଞ୍ଚରୁ ଦେଶର ପ୍ରତ୍ୟେକ ଯୁବ ସୃଷ୍ଟିକର୍ତ୍ତାଙ୍କୁ କହିବି, ଆପଣ ଗୌହାଟୀର ସଙ୍ଗୀତଜ୍ଞ ହୁଅନ୍ତୁ, କୋଚିର ପୋଡକାଷ୍ଟର୍ ହୁଅନ୍ତୁ, ବେଙ୍ଗାଲୁରୁର ଗେମ୍ ଡିଜାଇନର ହୁଅନ୍ତୁ, କିମ୍ୱା ପଞ୍ଜାବର ଚଳଚ୍ଚିତ୍ର ନିର୍ମାତା ହୁଅନ୍ତୁ, ଆପଣ ସମସ୍ତେ ଭାରତର ଅର୍ଥବ୍ୟବସ୍ଥାରେ ଏକ ନୂତନ ୱେଭ୍ ବା ତରଙ୍ଗ ଆଣୁଛନ୍ତି-ସୃଜନଶୀଳତାର ତରଙ୍ଗ ଆପଣଙ୍କ କଠିନ ପରିଶ୍ରମକୁ, ଆପଣଙ୍କ ଉତ୍ସାହକୁ ପରିଚାଳିତ କରୁଛି। ଆମ ସରକାର ମଧ୍ୟ ଆପଣଙ୍କ ପ୍ରତ୍ୟେକ ପ୍ରୟାସରେ ଆପଣଙ୍କ ସହିତ ଅଛନ୍ତି। ସ୍କିଲ୍ ଇଣ୍ଡିଆ ଠାରୁ ଆରମ୍ଭ କରି ଷ୍ଟାର୍ଟଅପ୍ ସହଯୋଗ ପର୍ଯ୍ୟନ୍ତ, ଏଭିଜିସି ଶିଳ୍ପ ପାଇଁ ନୀତି ଠାରୁ ଆରମ୍ଭ କରି ୱେଭସ୍ ଭଳି ପ୍ଲାଟଫର୍ମ ପର୍ଯ୍ୟନ୍ତ, ଆମେ ପ୍ରତ୍ୟେକ ପଦକ୍ଷେପରେ ଆପଣଙ୍କ ସ୍ୱପ୍ନକୁ ସାକାର କରିବାରେ ନିରନ୍ତର ନିୟୋଜିତ ରହିଛୁ। ଆମେ ଏପରି ଏକ ପରିବେଶ ସୃଷ୍ଟି କରୁଛୁ ଯେଉଁଠି ଆପଣଙ୍କ ବିଚାର ଏବଂ କଳ୍ପନାଶକ୍ତିର ମୂଲ୍ୟ ରହିଛି। ଯାହା ନୂତନ ସ୍ୱପ୍ନକୁ ଜନ୍ମ ଦେବ, ଏବଂ ସେହି ସ୍ୱପ୍ନଗୁଡ଼ିକୁ ସାକାର କରିବା ପାଇଁ ଆପଣଙ୍କୁ ଶକ୍ତି ଦେବ। ୱେଭସ ସମ୍ମିଳନୀ ଜରିଆରେ ଆପଣମାନଙ୍କୁ ଏକ ବଡ଼ ମଞ୍ଚ ମଧ୍ୟ ମିଳିବ। ଏହା ଏପରି ଏକ ମଞ୍ଚ ଯେଉଁଠାରେ ସୃଜନଶୀଳତା ଏବଂ କୋଡିଂ ଏକା ସହିତ ଥିବ । ଯେଉଁଠାରେ ସଫ୍ଟୱେର୍ ଏବଂ କାହାଣୀ କହିବା ଏକସଙ୍ଗେ ହେଉଥିବ, ଯେଉଁଠାରେ କଳା ଏବଂ ପରିବର୍ଦ୍ଧିତ ବାସ୍ତବତା ଏକସଙ୍ଗେ ହେବ । ଆପଣମାନେ ଏହି ମଞ୍ଚର ସମ୍ପୂର୍ଣ୍ଣ ଉପଯୋଗ କରନ୍ତୁ, ବଡ଼ ବଡ଼ ସ୍ୱପ୍ନ ଦେଖନ୍ତୁ, ସେଗୁଡ଼ିକୁ ପୂରଣ କରିବା ପାଇଁ ନିଜର ସମସ୍ତ ଶକ୍ତି ଲଗେଇ ଦିଅନ୍ତୁ।
ସାଥୀଗଣ,
ମୋର ସମ୍ପୂର୍ଣ୍ଣ ବିଶ୍ୱାସ ଆପଣଙ୍କ ଉପରେ ରହିଛି, ବିଷୟବସ୍ତୁ ଉପରେ ରହିଛି ଏବଂ ଏହାର କାରଣ ମଧ୍ୟ ରହିଛି । ଯୁବକମାନଙ୍କ ଉତ୍ସାହରେ, ସେମାନଙ୍କ କାର୍ଯ୍ୟ ଶୈଳୀରେ, କୌଣସି ପ୍ରତିବନ୍ଧକ ନାହିଁ, କୌଣସି ବୋଝ କିମ୍ୱା ସୀମା ନାହିଁ, ତେଣୁ ଆପଣଙ୍କର ସୃଜନଶୀଳତା ସମ୍ପୂର୍ଣ୍ଣ ମୁକ୍ତ-ପ୍ରବାହିତ, କୌଣସି ଦ୍ୱିଧା ନାହିଁ, କୌଣସି ଅନିଚ୍ଛା ନାହିଁ। ମୁଁ ବ୍ୟକ୍ତିଗତ ଭାବେ ଅନେକ ଯୁବ ନିର୍ମାତା, ଗେମର ଏବଂ ଆହୁରି ଅନେକଙ୍କ ସହ କଥାବାର୍ତ୍ତା କରିଛି। ସୋସିଆଲ ମିଡିଆରେ ମଧ୍ୟ ମୁଁ ଆପଣଙ୍କ ସୃଜନଶୀଳତାକୁ ଦେଖୁଥାଏ, ଆପଣଙ୍କ ଶକ୍ତିକୁ ଅନୁଭବ କରେ, ଏହା କୌଣସି ସଂଯୋଗ ନୁହେଁ ଯେ ଆଜି ଯେତେବେଳେ ଭାରତରେ ବିଶ୍ୱର ସର୍ବବୃହତ ଯୁବ ଜନସଂଖ୍ୟା ଅଛି, ସେତେବେଳେ ଆମର ସୃଜନଶୀଳତାର ନୂତନ ଦିଗ ମଧ୍ୟ ସାମ୍ନାକୁ ଆସୁଛି। 'ରିଲ୍’,'ପଡକାଷ୍ଟ’, 'ଗେମ୍’ ,' ଆନିମେସନ୍’ , 'ଷ୍ଟାର୍ଟଅପ୍’ , ‘ ଏଆରଭିଆର୍’ ଭଳି ଫର୍ମାଟରେ ଆମର ଯୁବ ମସ୍ତିଷ୍କ ପ୍ରତ୍ୟେକ ଫର୍ମାଟରେ ବହୁତ ଭଲ କାମ କରୁଛନ୍ତି। ପ୍ରକୃତ ଅର୍ଥରେ, ତରଙ୍ଗ ଆପଣଙ୍କ ପିଢ଼ି ପାଇଁ, ଯାହାଦ୍ୱାରା ଆପଣ ନିଜର ଶକ୍ତି, ନିଜର ଦକ୍ଷତା ଦ୍ୱାରା ସୃଜନଶୀଳତାର ଏହି ସମ୍ପୂର୍ଣ୍ଣ ବିପ୍ଳବକୁ ପୁନଃ-କଳ୍ପନା କରିପାରିବେ, ପୁନଃ-ବ୍ୟାଖ୍ୟା କରିପାରିବେ।
ସାଥୀଗଣ,
ସୃଜନଶୀଳତାର ଦୁନିଆରେ ଆପଣମାନଙ୍କ ସମ୍ମୁଖରେ, ମୁଁ ଆଉ ଏକ ବିଷୟ ଉପରେ ଆଲୋଚନା କରିବାକୁ ଚାହୁଁଛି। ଏହି ବିଷୟ ହେଉଛି-ସୃଜନଶୀଳ ଉତ୍ତରଦାୟିତ୍ୱ, ଆମେ ସମସ୍ତେ ଏକବିଂଶ ଶତାବ୍ଦୀକୁ ଦେଖୁଛୁ, ଯାହା ଏକ ପ୍ରଯୁକ୍ତିବିଦ୍ୟା ପରିଚାଳିତ ଶତାବ୍ଦୀ। ପ୍ରତ୍ୟେକ ବ୍ୟକ୍ତିଙ୍କ ଜୀବନରେ ଟେକ୍ନୋଲୋଜିର ଭୂମିକା କ୍ରମାଗତ ଭାବେ ବୃଦ୍ଧି ପାଉଛି। ଏଭଳି ପରିସ୍ଥିତିରେ ମାନବୀୟ ସମ୍ୱେଦନଶୀଳତାକୁ ବଜାୟ ରଖିବା ପାଇଁ ଅତିରିକ୍ତ ପ୍ରୟାସର ଆବଶ୍ୟକତା ରହିଛି। କେବଳ ସୃଜନଶୀଳ ଜଗତ ଏହା କରିପାରିବ । ଆମେ ମଣିଷକୁ ରୋବୋଟ୍ ହେବାକୁ ଦେବାର ଆବଶ୍ୟକତା ନାହିଁ। ଆମକୁ ମଣିଷକୁ ଅଧିକରୁ ଅଧିକ ସମ୍ୱେଦନଶୀଳ କରିବାକୁ ହେବ, ତାକୁ ଅଧିକ ସମୃଦ୍ଧ କରିବାକୁ ହେବ। ମାନବଜାତିର ଏହି ସମୃଦ୍ଧି ସୂଚନାର ପର୍ବତରୁ ଆସିବ ନାହିଁ, ଏହା ଟେକ୍ନୋଲୋଜିର ଗତି ଏବଂ ପ୍ରସାରରୁ ଆସିବ ନାହିଁ, ଏଥିପାଇଁ ଆମକୁ ଗୀତ, ସଙ୍ଗୀତ, କଳା, ନୃତ୍ୟକୁ ଗୁରୁତ୍ୱ ଦେବାକୁ ପଡିବ। ହଜାର ହଜାର ବର୍ଷ ଧରି ସେମାନେ ମାନବୀୟ ସମ୍ୱେଦନଶୀଳତାକୁ ଜାଗ୍ରତରେ ରଖିଛନ୍ତି। ଆମକୁ ଏହାକୁ ଆହୁରି ସୁଦୃଢ଼ କରିବାର ଆବଶ୍ୟକତା ରହିଛି। ଆମକୁ ଆଉ ଏକ ଗୁରୁତ୍ୱପୂର୍ଣ୍ଣ କଥା ମନେ ରଖିବାକୁ ହେବ। ଆଜି, ଆମର ଯୁବ ପିଢ଼ିକୁ କେତେକ ମାନବ ବିରୋଧୀ ଚିନ୍ତାଧାରାରୁ ରକ୍ଷା କରିବାର ଆବଶ୍ୟକତା ରହିଛି। ୱେଭସ୍ ହେଉଛି ଏକ ପ୍ଲାଟଫର୍ମ ଯାହା ଏହା କରିପାରିବ। ଯଦି ଆମେ ଏହି ଦାୟିତ୍ୱରୁ ପଛକୁ ହଟିବା, ତେବେ ଏହା ଯୁବପିଢ଼ି ପାଇଁ ଅତ୍ୟନ୍ତ ଘାତକ ହେବ।
ସାଥୀଗଣ,
ଆଜି ଟେକ୍ନୋଲୋଜି ସୃଜନଶୀଳ ବିଶ୍ୱ ପାଇଁ ଏକ ଖୋଲା ଆକାଶ ସୃଷ୍ଟି କରିଛି, ତେଣୁ ବିଶ୍ୱସ୍ତରୀୟ ସମନ୍ୱୟ ଏବେ ସମାନ ଭାବରେ ଗୁରୁତ୍ୱପୂର୍ଣ୍ଣ। ମୋର ବିଶ୍ୱାସ ଅଛି, ଏହି ମଞ୍ଚ ଆମର ସ୍ରଷ୍ଟାମାନଙ୍କୁ ବିଶ୍ୱସ୍ତରୀୟ କାହାଣୀକାରଙ୍କ ସହ ଯୋଡ଼ିଦେବ, ଆମର ଆନିମେଟରମାନଙ୍କୁ ବିଶ୍ୱସ୍ତରୀୟ ଦୂରଦୃଷ୍ଟିସମ୍ପନ୍ନଙ୍କ ସହ ଯୋଡ଼ିଦେବ, ଆମର ଗେମରମାନଙ୍କୁ ବିଶ୍ୱସ୍ତରୀୟ ଚାମ୍ପିଅନ୍ ରେ ପରିଣତ କରିବ। ମୁଁ ସମସ୍ତ ବୈଶ୍ୱିକ ନିବେଶକମାନଙ୍କୁ, ବୈଶ୍ୱିକ ସ୍ରଷ୍ଟାମାନଙ୍କୁ ନିମନ୍ତ୍ରଣ କରୁଛି, ଆପଣମାନେ ଭାରତକୁ ନିଜର ବିଷୟବସ୍ତୁ ବା କଣ୍ଟେଣ୍ଟର କ୍ଷେତ୍ର କରନ୍ତୁ। ବିଶ୍ୱରର ନିର୍ମାତାମାନଙ୍କୁ କହୁଛି-ବଡ଼ ସ୍ୱପ୍ନ ଦେଖନ୍ତୁ, ଏବଂ ନିଜ କାହାଣୀ କୁହନ୍ତୁ। ନିବେଶକମାନଙ୍କୁ ନିବେଦନ କରୁଛି - ସେମାନେ କେବଳ ମଞ୍ଚରେ ନୁହେଁ, ବରଂ ଲୋକମାନଙ୍କ ମଧ୍ୟରେ ମଧ୍ୟ ନିବେଶ କରନ୍ତୁ। ଭାରତୀୟ ଯୁବକମାନଙ୍କୁ ପରାମର୍ଶ ଦେଉଛି - ସେମାନେ ବିଶ୍ୱକୁ ନିଜର ଏକ ଶହ କୋଟି ଅଜଣା କାହାଣୀ କୁହନ୍ତୁ!
ଆପଣ ସମସ୍ତଙ୍କୁ ପ୍ରଥମ ୱେଭସ ଶିଖର ସମ୍ମିଳନୀ ପାଇଁ ମୁଁ ପୁଣିଥରେ ଅନେକ ଅନେକ ଶୁଭକାମନା ଜଣାଉଛି,
ଆପଣ ସମସ୍ତଙ୍କୁ ବହୁତ-ବହୁତ ଧନ୍ୟବାଦ ।
ନମସ୍କାର।
