ସ୍ୱାଗତ ବନ୍ଧୁଗଣ । ଆଶା କରୁଛି ଆପଣମାନେ ସମସ୍ତେ ଅନ୍ତତଃ କୋଭିଡ ଟିକାର ଗୋଟିଏ ଡୋଜ ନେଇସାରିଥିବେ । କିନ୍ତୁ ତାହା ସତ୍ତ୍ୱେ କରୋନା ପ୍ରୋଟୋକଲ ପାଳନ ପାଇଁ ସହଯୋଗ କରିବାକୁ ମୁଁ ସମସ୍ତଙ୍କୁ ଏବଂ ଗୃହରେ ମୋର ସହଯୋଗୀମାନଙ୍କୁ ପ୍ରାର୍ଥନା କରୁଛି । ଟିକା ବାହୁରେ ଦିଆଯାଉଛି ଏବଂ ଯେଉଁମାନେ ଏହାକୁ ନେଇଛନ୍ତି ସେମାନେ ‘ବାହୁବଳୀ’ ହୋଇଯାଇଛନ୍ତି । କରୋନା ବିରୋଧରେ ଲଢ଼ିବାକୁ ବାହୁବଳୀ ହେବାର ଏକମାତ୍ର ଉପାୟ ହେଉଛି ଟିକାକରଣ କରାଇବା ।
କରୋନା ବିରୋଧୀ ଲଢ଼େଇରେ ୪୦ କୋଟିରୁ ଅଧିକ ଲୋକ ‘ବାହୁବଳୀ’ ହୋଇଯାଇଛନ୍ତି । ଆଗକୁ ମଧ୍ୟ ଏହାକୁ ଦ୍ରୁତ ଗତିରେ ଆଗେଇ ନିଆଯାଉଛି । ଏହି ମହାମାରୀ ସମଗ୍ର ବିଶ୍ୱକୁ ପ୍ରଭାବିତ କରିଛି, ସମଗ୍ର ମାନବଜାତିକୁ ପ୍ରଭାବିତ କରିଛି । ତେଣୁ ସଂସଦରେ ଆମେ ମହାମାରୀ ପ୍ରସଙ୍ଗରେ ମହତ୍ତ୍ୱପୂର୍ଣ୍ଣ ବିତର୍କ ଚାହୁଁଛୁ । ଏହାକୁ ସବୁଠୁ ଅଧିକ ପ୍ରାଥମିକତା ଦିଆଯିବା ଆବଶ୍ୟକ, ଯଦ୍ଦ୍ୱାରା ସମସ୍ତ ମାନନୀୟ ସାଂସଦଙ୍କଠାରୁ ପ୍ରୟୋଗାତ୍ମକ ପରାମର୍ଶ ହାସଲ କରାଯିବ । ଫଳରେ ମହାମାରୀ ବିରୋଧରେ ଅନେକ କିଛି ନୂଆ ସାଧନ ଆପଣେଇବାକୁ ସୁଯୋଗ ମିଳିପାରିବ । ମହାମାରୀ ବିରୋଧୀ ଲଢ଼େଇ ପାଇଁ ଯଦି କିଛି କୌଣସି ଅଭାବବୋଧ ରହିଯାଇଥାଏ, ତେବେ ତାହାକୁ ସଂଶୋଧନ କରାଯିବ ଏବଂ ମିଳିମିଶି ସମସ୍ତେ ଆଗକୁ ବଢ଼ିପାରିବେ ।
ମୁଁ ସମସ୍ତ ଫ୍ଲୋର ଲିଡରଙ୍କୁ ଆସନ୍ତାକାଲି ସନ୍ଧ୍ୟାରେ ସମୟ ବାହାର କରିବା ପାଇଁ ଅନୁରୋଧ କରିଛି । କାରଣ ମହାମାରୀ ସ୍ଥିତି ପ୍ରସଙ୍ଗରେ ମୁଁ ସେମାନଙ୍କ ସମ୍ମୁଖରେ ଏକ ବିସ୍ତୃତ ବିବରଣୀ ଉପସ୍ଥାପନ କରିବାକୁ ଚାହୁଁଛି । ଫ୍ଲୋର ଲିଡରମାନଙ୍କ ସହ ଉଭୟ ଗୃହ ଏବଂ ବାହାରେ ଆଲୋଚନା କରିବାକୁ ଆମେ ଚାହୁଁଛୁ, କାରଣ ମୁଁ ମୁଖ୍ୟମନ୍ତ୍ରୀମାନଙ୍କ ସହ ଲଗାତର ଭାବେ ବୈଠକ କରି ଆଲୋଚନା କରିଛି । ବିଭିନ୍ନ ମଞ୍ଚରେ ନାନା ପ୍ରକାର ଆଲୋଚନା କରାଯାଉଛି । ଗୃହରେ ବିତର୍କ ସମେତ ଫ୍ଲୋର ଲିଡରମାନଙ୍କ ସହ ଏକ ଆଲୋଚନା ଯଦି ହୋଇପାରେ, ତେବେ ଏହା ବହୁତ ଭଲ ହୁଅନ୍ତା ।
ବନ୍ଧୁଗଣ, ଚାଲନ୍ତୁ ଏହି ଅଧିବେଶନକୁ ପ୍ରଭାବୀ ତର୍କ ସହିତ ପରିଣାମ-କୈନ୍ଦ୍ରିକ କରିବା, ଯଦ୍ଦ୍ୱାରା ଜନତାଙ୍କ ପ୍ରଶ୍ନର ଉତ୍ତର ସରକାର ଦେଇପାରିବେ । ଏହି ପରିପ୍ରେକ୍ଷୀରେ ମୁଁ ଗୃହରେ ଅତ୍ୟନ୍ତ କଠୋର ତଥା ତୀକ୍ଷଣ ପ୍ରଶ୍ନ ପଚାରିବା ଲାଗି ସମସ୍ତ ମାନନୀୟ ସାଂସଦ ଓ ସବୁ ଦଳଗୁଡ଼ିକୁ ଆହ୍ୱାନ କରୁଛି, କିନ୍ତୁ ଏକ ଶାନ୍ତିପୂର୍ଣ୍ଣ ବାତାବରଣରେ ସରକାରଙ୍କୁ ତାହାର ପ୍ରତିକି୍ରୟା ରଖିବା ଲାଗି ସୁଯୋଗ ଦିଆଯିବା ଉଚିତ । ସତ୍ୟ ଯେତେବେଳେ ଲୋକଙ୍କ ପାଖରେ ପହଞ୍ଚେ, ଗଣତନ୍ତ୍ର ସୁଦୃଢ଼ ହୋଇଥାଏ । ଏହା ମଧ୍ୟ ଲୋକଙ୍କ ବିଶ୍ୱାସକୁ ମଜଭୁତ କରିଥାଏ ଏବଂ ବିକାଶ ଧାରାରେ ସୁଧାର ଆଣିଥାଏ ।
ବନ୍ଧୁଗଣ, ଏହି ଅଧିବେଶନ ସମୟରେ ଆଭ୍ୟନ୍ତରୀଣ ବ୍ୟବସ୍ଥା ଗତଥର ଭଳି ହୋଇନାହିଁ । ଏଥର ସମସ୍ତେ ବସିବେ ଏବଂ ମିଳିମିଶ କାର୍ଯ୍ୟ କରିବେ କାରଣ ପ୍ରାୟତଃ ସମସ୍ତେ ଟିକା ନେଇସାରିଛନ୍ତି । ମୁଁ ପୁଣିଥରେ ସମସ୍ତଙ୍କୁ ବହୁତ ଧନ୍ୟବାଦ ଜଣାଉଛି ଏବଂ ଆପଣମାନଙ୍କୁ ନିଜର ଯତ୍ନ ନେବାକୁ ଅନୁରୋଧ କରୁଛି । ଚାଲନ୍ତୁ ଦେଶର ଆଶା ଓ ଆକାଂକ୍ଷାଗୁଡ଼ିକୁ ପୂରା କରିବା ଲାଗି ମିଳିମିଶି କାର୍ଯ୍ୟ କରିବା ।
