Innovation, integrity and inclusion have emerged as key mantras in the field of management: PM
Focus is now on collaborative, innovative and transformative management, says PM
Technology management is as important as human management: PM Modi

ଜୟ ଜଗନ୍ନାଥ!

ଜୟ ମା’ ସମଲେଶ୍ୱରୀ !

ଓଡ଼ିଶାର ଭାଇ ଓ ଭଉଣୀମାନଙ୍କୁ ମୋର ଜୁହାର

ନୂଆ ବର୍ଷ ସମସ୍ତଙ୍କ ପାଇଁ ମଙ୍ଗଳମୟ ହେଉ।

ଓଡ଼ିଶାର ମାନନୀୟ ରାଜ୍ୟପାଳ ପ୍ରଫେସର ଗଣେଶୀ ଲାଲ ମହୋଦୟ, ମୁଖ୍ୟମନ୍ତ୍ରୀ ମୋର ବନ୍ଧୁ ଶ୍ରୀମାନ ନବୀନ ପଟ୍ଟନାୟକ ମହାଶୟ, କେନ୍ଦ୍ର କ୍ୟାବିନେଟରେ ମୋର ସହଯୋଗୀ ଡ. ରମେଶ ପୋଖରିୟାଲ ନିଶଙ୍କ ଜୀ, ଓଡ଼ିଶାର ରତ୍ନ ଭାଇ ଧର୍ମେନ୍ଦ୍ର ପ୍ରଧାନ, ଶ୍ରୀ ପ୍ରତାପ ଚନ୍ଦ୍ର ଷଡ଼ଙ୍ଗୀ, ଓଡ଼ିଶା ସରକାରରେ ମନ୍ତ୍ରୀ, ସାଂସଦ ଓ ବିଧାୟକଗଣ, ଆଇଆଇଏମ ସମ୍ବଲପୁର ଅଧ୍ୟକ୍ଷା ଶ୍ରୀମତୀ ଅରୁନ୍ଧତୀ ଭଟ୍ଟାଚାର୍ଯ୍ୟ ମହୋଦୟା, ନିର୍ଦ୍ଦେଶକ ପ୍ରଫେସର ମହାଦେବ ଜୟସୱାଲ, ଅଧ୍ୟାପକ କର୍ମଚାରୀ ଗଣ ଏବଂ ମୋର ସମସ୍ତ ଯୁବ ସାଥୀଗଣ!

ଆଜି ଆଇଆଇଏମ କ୍ୟାମ୍ପସର ଶିଳାନ୍ୟାସ ସହିତ ଓଡ଼ିଶାର ଯୁବା ସାମର୍ଥ୍ୟକୁ ଦୃଢ଼ତା ପ୍ରଦାନ କରୁଥିବା ଏକ ନୂତନ ସ୍ତମ୍ଭ ମଧ୍ୟ ସ୍ଥାପନ କରାଯାଇଛି। ଆଇଆଇଏମ ସମ୍ବଲପୁରର ସ୍ଥାୟୀ କ୍ୟାମ୍ପସ, ଓଡ଼ିଶାର ମହାନ ସଂସ୍କୃତି ଏବଂ ସମ୍ପଦକୁ ପରିଚୟ ଦେବା ସହିତ ଓଡ଼ିଶାକୁ ମ୍ୟାନେଜମେଣ୍ଟ ଦୁନିଆରେ ଏକ ନୂତନ ପରିଚୟ ପ୍ରଦାନ କରିବ। ନୂତନ ବର୍ଷର ଆରମ୍ଭରେ, ଏହି ଶୁଭାରମ୍ଭ ଆମ ସମସ୍ତଙ୍କ ଆନନ୍ଦକୁ ଦୁଇ ଗୁଣିତ କରି ଦେଇଛି।

ସାଥୀଗଣ,

ବିଗତ ଦଶନ୍ଧିରେ ଏକ ନୂଆ ଧାରା ଦେଶ ଦେଖିଥିଲା। ବାହାରେ ପ୍ରସ୍ତୁତି ବହୁରାଷ୍ଟ୍ରୀୟ କମ୍ପାନୀଗୁଡ଼ିକ ବୃହତ ସଂଖ୍ୟାରେ ଭାରତକୁ ଆସୁଥିଲେ ଏବଂ ଏହି ମାଟିରେ ଆଗକୁ ବଢ଼ିଥିଲେ। କିନ୍ତୁ ଚଳିତ ଦଶନ୍ଧି ଏବଂ ଏହି ଶତାବ୍ଦୀ ହେଉଛି ଭାରତରେ ବହୁରାଷ୍ଟ୍ରୀୟ ସଂସ୍ଥା ଗଢ଼ି ଉଠିବାର ସମୟ। ଭାରତର ସାମର୍ଥ୍ୟକୁ ବିଶ୍ୱରେ ପ୍ରସାରିତ କରିବା ଲାଗି ଏହା ହେଉଛି ସର୍ବୋତ୍ତମ ସମୟ। ଆଜିର ଷ୍ଟାର୍ଟଅପ ଆସନ୍ତାକାଲି ବହୁରାଷ୍ଟ୍ରୀୟ ସଂସ୍ଥାର ରୂପ ନେବ। ଆହୁରି ଏହି ସବୁ ଷ୍ଟାର୍ଟଅପ କେଉଁ ସହରରେ ନିର୍ମିତ ହେଉଛି? ସେହିସବୁ ସହର ଯାହାକୁ ଆମେ ଟିୟର-2, ଟିୟର-3 ସହର କହିଥାଉ, ଆଜିର ଷ୍ଟାର୍ଟଅପର ପ୍ରଭାବ ସେହିସବୁ ସ୍ଥାନରେ ଦେଖିବାକୁ ମିଳୁଛି। ଏହି ଷ୍ଟାର୍ଟଅପ୍ସଗୁଡ଼ିକୁ, ଭାରତୀୟ ଯୁବକମାନଙ୍କର ନୂଆ କମ୍ପାନୀଗୁଡ଼ିକୁ ଆହୁରି ଆଗକୁ ବଢ଼ିବା ଲାଗି ଭଲ ମ୍ୟାନେଜରମାନଙ୍କର ଆବଶ୍ୟକତା ରହିଛି। ଦେଶର ନୂଆ କ୍ଷେତ୍ରରୁ, ନୂଆ ଅଭିଜ୍ଞତା ନେଇ ବାହାରୁଥିବା ମ୍ୟାନେଜମେଣ୍ଟ ବିଶେଷଜ୍ଞ, ଭାରତର କମ୍ପାନୀଗୁଡ଼ିକୁ ନୂତନ ଶିଖର ପ୍ରଦାନ କରିବାରେ ବଡ଼ ଭୂମିକା ନିର୍ବାହ କରିବେ।

ସାଥୀଗଣ,

ମୁଁ କୌଣସି ଏକ ସ୍ଥାନରେ ପଢ଼ି ଜାଣିଲି ଯେ ଚଳିତ ବର୍ଷ କୋଭିଡ ସଙ୍କଟ ଥିବା ସତ୍ତ୍ୱେ ଭାରତ ବିଗତ ବର୍ଷ ତୁଳନାରେ ଅଧିକ ୟୁନିକର୍ଣ୍ଣ ଦେଇପାରିଛି। ଆଜି କୃଷି ଠାରୁ ଆରମ୍ଭ କରି ମହାକାଶ କ୍ଷେତ୍ର ପର୍ଯ୍ୟନ୍ତ ଯେଉଁ ଅଭୂତପୂର୍ବ ସଂସ୍କାର ଅଣାଯାଉଛି, ସେଥିରେ ଷ୍ଟାର୍ଟଅପ୍ସଗୁଡ଼ିକ ପାଇଁ ପରିସର ଲଗାତାର ବଢ଼ୁଛି। ଆପଣମାନଙ୍କୁ ଏହି ନୂତନ ସମ୍ଭାବନା ଲାଗି ନିଜକୁ ପ୍ରସ୍ତୁତ କରିବାକୁ ହେବ। ଆପଣମାନଙ୍କୁ ନିଜ କ୍ୟାରିଅରକୁ ଭାରତର ଆଶା ଓ ଆକାଂକ୍ଷା ସହିତ ଯୋଡ଼ିବାକୁ ହେବ। ଏହି ନୂଆ ଦଶକରେ ବ୍ରାଣ୍ଡ ଇଣ୍ଡିଆକୁ ନୂଆ ବୈଶ୍ୱିକ ପରିଚୟ ଦେବାର ଦାୟିତ୍ୱ ଆମ ସମସ୍ତଙ୍କ ଉପରେ ରହିଛି। ବିଶେଷ କରି ଆମର ଯୁବକମାନଙ୍କ ଉପରେ ରହିଛି।.

ବନ୍ଧୁଗଣ,

ଆଇଆଇଏମ ସମ୍ବଲପୁରର ଧ୍ୟେୟ ମନ୍ତ୍ର ହେଉଛି-ନବସର୍ଜନମ ଶୁଚିତା ସମାବେଶତ୍ୱମ। ଅର୍ଥାତ୍ ନବୋନ୍ମେଷ, ବିଶ୍ୱସନୀୟତା ଏବଂ ସମାବେଶୀତା। ଆପଣମାନଙ୍କୁ ଏହି ମନ୍ତ୍ରର ଶକ୍ତି ସହିତ ଦେଶକୁ ନିଜ ମ୍ୟାନେଜମେଣ୍ଟ ସ୍କିଲ ଦେଖାଇବାର ଅଛି। ଆପଣମାନଙ୍କୁ ନୂତନ ନିର୍ମାଣକୁ ପ୍ରୋତ୍ସାହିତ କରିବା ସହିତ, ସମସ୍ତଙ୍କର ସମାବେଶୀତା ଉପରେ ମଧ୍ୟ ଜୋର ଦେବାକୁ ହେବ, ଯେଉଁମାନେ ବିକାଶର ଦୌଡ଼ରେ ପଛରେ ପଡ଼ିଯାଇଛନ୍ତି, ସେମାନଙ୍କୁ ମଧ୍ୟ ସାଥୀରେ ଆଣିବାକୁ ହେବ। ଯେଉଁସ୍ଥାନରେ ଆଇଆଇଏମର ସ୍ଥାୟୀ କ୍ୟାମ୍ପସ ନିର୍ମାଣ ହେବାକୁ ଯାଉଛି, ସେଠାରେ ପୂର୍ବରୁ ମେଡ଼ିକାଲ ବିଶ୍ୱବିଦ୍ୟାଳୟ ରହିଛି, ଇଞ୍ଜିନିୟରିଂ ବିଶ୍ୱବିଦ୍ୟାଳୟ ରହିଛି, ତିନୋଟି ଅନ୍ୟ ବିଶ୍ୱବିଦ୍ୟାଳୟ ମଧ୍ୟ ରହିଛି। ଏହାଛଡ଼ା ସୈନିକ ସ୍କୁଲ, ସିଆରପିଏଫ ଏବଂ ପୁଲିସ ଟ୍ରେନିଂ ଇନଷ୍ଟିଚ୍ୟୁଟ ମଧ୍ୟ ରହିଛି। ଯେଉଁମାନେ ସମ୍ବଲପୁର ସମ୍ପର୍କରେ ଅଧିକ ଜାଣନ୍ତି ନାହିଁ, ସେମାନେ ମଧ୍ୟ ଏବେ ଅନୁମାନ ଲଗାଇପାରିବେ ଯେ ଆଇଆଇଏମ ଭଳି ପ୍ରତିଷ୍ଠିତ ସଂସ୍ଥାନ ନିର୍ମାଣ ହେବା ପରେ ଏହି କ୍ଷେତ୍ର ଏକ ବୃହତ ଶିକ୍ଷାକେନ୍ଦ୍ରରେ ପରିଣତ ହେବ। ସମ୍ବଲପୁର ଆଇଆଇଏମ ଏବଂ ଏହି କ୍ଷେତ୍ରରେ ପଢ଼ୁଥିବା ଛାତ୍ରଛାତ୍ରୀ-ପେସାଦାରଙ୍କ ଲାଗି ସବୁଠୁ ବଡ଼ ବିଶେଷତା ହେଉଛି ଯେ ଏହି ସମ୍ପୂର୍ଣ୍ଣ ଇଲାକା ଆପଣମାନଙ୍କ ପାଇଁ ଏକ ପ୍ରାକ୍ଟିକାଲ ଲ୍ୟାବ ଭଳି କାର୍ଯ୍ୟ କରିବ। ଏହି ସ୍ଥାନ ପ୍ରାକୃତିକ ରୂପରେ ଅତ୍ୟନ୍ତ ଭବ୍ୟ ହୋଇଥିବା ବେଳେ ଏଠାରେ ଓଡ଼ିଶାର ଗୌରବ ହୀରାକୁଦ ନଦୀବନ୍ଧ, ଆପଣମାନଙ୍କ ଠାରୁ ଖୁବ ନିକଟରେ ରହିଛି। ନଦୀବନ୍ଧ ନିକଟରେ ଥିବା ଦେବ୍ରୀଗଡ଼ ଅଭୟାରଣ୍ୟର ନିଜସ୍ୱ ସ୍ୱାତନ୍ତ୍ର୍ୟ ରହିଛି, ତା’ଛଡ଼ା ଏହା ମଧ୍ୟରେ ସେହି ପୂଣ୍ୟ ସ୍ଥାନ ମଧ୍ୟ ରହିଛି ଯାହାକୁ ବୀର ସୁରେନ୍ଦ୍ର ସାଏ ଜୀ ନିଜର ବେସ ଭାବେ ସ୍ଥାପନ କରିଥିଲେ। ଏହି ଅଞ୍ଚଳର ପର୍ଯ୍ୟଟନ ସମ୍ଭାବନାକୁ ଆହୁରି ବଢ଼ାଇବା ଲାଗି ଏଠାକାର ଛାତ୍ରଛାତ୍ରୀଙ୍କର ବିଚାର ଏବଂ ମ୍ୟାନେଜମେଣ୍ଟ ଦକ୍ଷତା ଖୁବ କାମରେ ଆସିପାରିବ। ସେହିପରି ସମ୍ବଲପୁରୀ ବସ୍ତ୍ର ମଧ୍ୟ ଦେଶବିଦେଶରେ ଲୋକପ୍ରିୟ। ଏହାର ଅଭିନବ କାରିଗରୀ, ଡିଜାଇନ ଏବଂ ସଂରଚନା ବେଶ ସ୍ୱତନ୍ତ୍ର। ସେହିପରି ଏହି କ୍ଷେତ୍ରରେ ହସ୍ତତନ୍ତ ଉପରେ ଅନେକ କାମ ହୋଇଥାଏ, ରୂପା ତାରକସୀ, ପଥର ଖୋଦେଇ, କାଠ ନାମ, ବ୍ରାସ କାମରେ ଆମର ଆଦିବାସୀ ଭାଇ-ଭଉଣୀମାନେ ଅତ୍ୟନ୍ତ ପାରଙ୍ଗମ। ଆଇଆଇଏମର ଛାତ୍ରଛାତ୍ରୀଙ୍କ ଲାଗି ସମ୍ବଲପୁରର ଲୋକାଲକୁ ଭୋକାଲ କରିବା, ସେମାନଙ୍କ ପାଇଁ ଏକ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ।

ସାଥୀଗଣ,

ଆପଣମାନେ ଏହା ଭଲ ଭାବେ ଜାଣିଛନ୍ତି ଯେ ସମ୍ବଲପୁର ଏବଂ ଏହାର ଆଖପାଖର ଅଞ୍ଚଳ ନିଜର ଖଣି ଏବଂ ଖଣି ଶକ୍ତି ପାଇଁ ମଧ୍ୟ ପ୍ରସିଦ୍ଧ। ଉଚ୍ଚମାନର ଲୁହାପଥର, ବକ୍ସାଇଟ, କ୍ରୋମାଇଟ, ମାଙ୍ଗାନିଜ, କୋଇଲା, ଚୂନପଥର ଠାରୁ ଆରମ୍ଭ କରି ସୁନା, ଧାତୁପଥର, ହୀରା ଏଠାକାର ପ୍ରାକୃତିକ ସମ୍ପଦକୁ ଅନେକଗୁଣା ବଢ଼ାଇ ଦେଇଥାଏ। ଦେଶର ଏହି ପ୍ରାକୃତିକ ସମ୍ପଦଗୁଡ଼ିକର ଉନ୍ନତ ପରିଚାଳନା କିପରି ହେବ, ଏହି ସମ୍ପୂର୍ଣ୍ଣ କ୍ଷେତ୍ରର ବିକାଶ, ଲୋକମାନଙ୍କର ବିକାଶ ପାଇଁ ଆପଣମାନଙ୍କୁ ଅଭିନବ ବିଚାର ନେଇ କାର୍ଯ୍ୟ କରିବାକୁ ହେବ।

ସାଥୀଗଣ,

ମୁଁ ଆପଣମାନଙ୍କୁ ଏଇ କେତୋଟି ଉଦାହରଣ ଦେଲି। ଓଡ଼ିଶାରେ ଜଙ୍ଗଲ ସମ୍ପଦ, ଖଣିଜ, ରଙ୍ଗବତୀ-ସଙ୍ଗୀତ, ଆଦିବାସୀ କଳା ଏବଂ ଶିଳ୍ପ, ସ୍ୱଭାବ କବି ଗଙ୍ଗାଧର ମେହେରଙ୍କ କବିତା, କ’ଣ ନାହିଁ ଓଡ଼ିଶା ପାଖରେ! ଆପଣମାନଙ୍କ ମଧ୍ୟରୁ ଅନେକ ସାଥୀମାନେ ଯେତେବେଳେ ସମ୍ବଲପୁରୀ ବସ୍ତ୍ର ଉଦ୍ୟୋଗ କିମ୍ବା କଟକର ରୂପା ତାରକସୀ କାମକୁ ବିଶ୍ୱସ୍ତରରେ ପରିଚୟ ଦେବା ଲାଗି ନିଜର କୌଶଳକୁ ଉପଯୋଗ କରିବେ, ଏଠାକାର ପର୍ଯ୍ୟଟନକୁ ବଢ଼ାଇବା ଲାଗି କାମ କରିବେ, ତା’ହେଲେ ଆତ୍ମନିର୍ଭର ଭାରତ ଅଭିଯାନ ସହିତ ଓଡ଼ିଶାର ବିକାଶ ଆହୁରି ତ୍ୱରାନ୍ୱିତ କରାଯାଇପାରିବ ଏବଂ ରାଜ୍ୟ ଆହୁରି ଉଚ୍ଚକୁ ଉଠିପାରିବ।

ବନ୍ଧୁଗଣ,

ଲୋକାଲକୁ ଗ୍ଲୋବାଲ କରିବା ଲାଗି ଆପଣମାନେ ସମସ୍ତେ ଆଇଆଇଏମର ଯୁବସାଥୀମାନଙ୍କୁ ନୂତନ ଏବଂ ଅଭିନବ ସମାଧାନ ଖୋଜିବାର ଅଛି। ମୋର ବିଶ୍ୱାସ ରହିଛି, ଆମର ଆଇଆଇଏମ ଦେଶର ଆତ୍ମନିର୍ଭରଶୀଳତା ଅଭିଯାନରେ ସ୍ଥାନୀୟ ଉତ୍ପାଦ ଏବଂ ଅନ୍ତର୍ଜାତୀୟ ସହଯୋଗ ମଧ୍ୟରେ ସେତୁ ଭଳି କାମ କରିପାରିବ। ସାରା ଦୁନିଆରେ ବ୍ୟାପି ରହିଥିବା ଆପଣମାନଙ୍କର ଆଲୁମ୍ନି (ପୂର୍ବତନ ଛାତ୍ରଛାତ୍ରୀ) ନେଟୱାର୍କ ମଧ୍ୟ ଏଥିରେ ଅତ୍ୟନ୍ତ ସହାୟକ ହୋଇପାରିବ। ବର୍ଷ 2014 ସୁଦ୍ଧା ଆମ ଦେଶରେ 13ଟି ଆଇଆଇଏମ ଥିଲା। ଏବେ ଦେଶରେ 20ଟି ଆଇଆଇଏମ ରହିଛି। ଏତେ ବଡ଼ ପ୍ରତିଭା ଭଣ୍ଡାର, ଆତ୍ମନିର୍ଭର ଭାରତ ଅଭିଯାନକୁ ଅଧିକ ବିସ୍ତାର ଦେଇପାରିବ।

ବନ୍ଧୁଗଣ,

ଆଜିର ଦୁନିଆରେ ନୂତନ ସୁଯୋଗ ରହିଛି, ମ୍ୟାନେଜମେଣ୍ଟ ଦୁନିଆ ଆଗରେ ନୂଆ ଆହ୍ୱାନ ମଧ୍ୟ ରହିଛି। ଏହି ଆହ୍ୱାନଗୁଡ଼ିକୁ ମଧ୍ୟ ଆପଣମାନଙ୍କୁ ବୁଝିବାକୁ ହେବ। ଉଦାହରଣ ଭାବେ ଦେଖିଲେ ଏବେ ଯେପରି ଆଡିଟିଭ ପ୍ରିଣ୍ଟିଂ ବା ଥ୍ରୀଡି ପ୍ରିଣ୍ଟିଂ ସାରା ଉତ୍ପାଦନ ଅର୍ଥବ୍ୟବସ୍ଥାକୁ ବଦଳାଇ ଦେଇଛି। ଏବେ ଆପଣ ଖବରରୁ ଜାଣିବାକୁ ପାଇଥିବେ, ବିଗତ ମାସରେ ହିଁ ଗୋଟିଏ କମ୍ପାନୀ ଚେନ୍ନାଇ ନିକଟରେ ଏକ ସମ୍ପୂର୍ଣ୍ଣ ଦୁଇ ମହଲା ଅଟ୍ଟାଳିକୁ ଥ୍ରୀଡି ପ୍ରିଣ୍ଟ କରି ଦେଇଥିଲା। ଏବେ ଉତ୍ପାଦନର ପଦ୍ଧତି ବଦଳୁଥିବାରୁ ଲଜିଷ୍ଟିକ୍ସ ଏବଂ ଯୋଗାଣ ଶୃଙ୍ଖଳ ସହ ଜଡ଼ିତ ବ୍ୟବସ୍ଥାକୁ ମଧ୍ୟ ବଦଳାଇବାକୁ ପଡ଼ିବ। ସେହିପରି ଟେକ୍ନୋଲୋଜି ଆଜି ପ୍ରତ୍ୟେକ ଭୌଗଳିକ ସୀମାକୁ ଦୂର କରି ଦେଇଛି। ବିମାନ ଯୋଗାଯୋଗ ବିଂଶ ଶତାବ୍ଦୀର ବ୍ୟବସାୟକୁ ବାଧାମୁକ୍ତ କରିଥିଲା, ଏବେ ଡିଜିଟାଲ ସଂଯୋଗ ଏକବିଂଶ ଶତାବ୍ଦୀର ବ୍ୟବସାୟକୁ ବଦଳାଇଦେବ। ଯେକୌଣସି ସ୍ଥାନରୁ କାମ କରିବାର ବିଚାର ଫଳରେ ସାରା ଦୁନିଆ ବୈଶ୍ୱିକ ଗ୍ରାମରୁ ବୈଶ୍ୱିକ କାର୍ଯ୍ୟସ୍ଥଳୀରେ ପରିଣତ ହୋଇଯାଇଛି। ଭାରତ ମଧ୍ୟ ଏଥିପାଇଁ ପ୍ରତ୍ୟେକ ଜରୁରି ସଂସ୍କାର ବିଗତ କିଛି ମାସରେ ଦ୍ରୁତ ଗତିରେ କରିବା ଆରମ୍ଭ କରିଛି। କେବଳ ସମୟ ସହିତ ନୁହେଁ ସମୟ ଠାରୁ ଆଗକୁ ବଢ଼ିବା ଲାଗି ମଧ୍ୟ ଆମକୁ ଚେଷ୍ଟା କରିବାକୁ ହେବ।

ବନ୍ଧୁଗଣ,

କାର୍ଯ୍ୟପଦ୍ଧତି ବଦଳିବା ସହିତ ମ୍ୟାନେଜମେଣ୍ଟ ଦକ୍ଷତାର ଚାହିଦା ମଧ୍ୟ ବଦଳୁଅଛି। ଏବେ ଟପଡାଉନ କିମ୍ବା ଟପ ହେଭି ମ୍ୟାନେଜମେଣ୍ଟ ପରିବର୍ତ୍ତେ ସହଭାଗୀ, ଅଭିନବ ଏବଂ ପରିବର୍ତ୍ତନଶୀଳ ମ୍ୟାନେଜମେଣ୍ଟର ସମୟ ଆସିଛି। ଏହି ସହଭାଗିତା ଆମର ସାଥୀମାନଙ୍କର ପାଇଁ ଜରୁରି ହୋଇଥିବା ବେଳେ ବୋଟ୍ସ ଏବଂ ଆଲଗୋରିଦିମ ଏବେ ଦଳର ସଦସ୍ୟ ରୂପରେ ଆମ ସହିତ ରହିଛି। ସେଥିପାଇଁ ଆଜି ମାନବ ପ୍ରବନ୍ଧନ ଯେତେ ଜରୁରି ବୈଷୟିକ ପ୍ରବନ୍ଧନ ମଧ୍ୟ ସେତିକି ଜରୁରି। ମୁଁ ଆପଣମାନଙ୍କୁ, ଦେଶର ସମସ୍ତ ଆଇଆଇଏମକୁ ଏବଂ ବିଜନେସ ମ୍ୟାନେଜମେଣ୍ଟ ସହ ଜଡ଼ିତ ଅନ୍ୟ ଶିକ୍ଷାନୁଷ୍ଠାନଗୁଡ଼ିକୁ ଗୋଟିଏ ଅନୁରୋଧ କରିବି। କରୋନା ସଂକ୍ରମଣର ଏହି ସମୟରେ ପ୍ରଯୁକ୍ତି ଓ ଦଳଗତ କାର୍ଯ୍ୟ କରିବାର ଭାବନା ନେଇ ଦେଶ କିପରି କାମ କଲା, କିପରି ଭାବେ 130 କୋଟି ଦେଶବାସୀଙ୍କ ସୁରକ୍ଷା ଲାଗି ପଦକ୍ଷେପ ନିଆଗଲା, ଦାୟିତ୍ୱ ନେଇ ସହଭାଗିତା ଜରିଆରେ ଜନଭାଗିଦାରୀ ଅଭିଯାନ କାର୍ଯ୍ୟକାରୀ କରାଗଲା, ଏ ସମସ୍ତ ବିଷୟ ଉପରେ ଗବେଷଣା କରାଯିବା ଓ ଡକ୍ୟୁମେଣ୍ଟ ପ୍ରସ୍ତୁତ କରାଯିବା ଉଚିତ। ଦକ୍ଷତା ଏବଂ କ୍ଷମତା ବଢ଼ାଇବା ଲାଗି ଖୁବ କମ ସମୟରେ କିପରି କାର୍ଯ୍ୟ କରାଗଲା, ତାହା ମ୍ୟାନେଜମେଣ୍ଟ ପାଇଁ ବହୁତ ବଡ଼ ଶିକ୍ଷା। କୋଭିଡ କାଳରେ ଦେଶ ପିପିଇ କିଟ, ମାସ୍କ, ଭେଣ୍ଟିଲେଟରର ସ୍ଥାୟୀ ସମାଧାନ ବାହାର କରିଦେଲା।

ବନ୍ଧୁଗଣ,

ପୂର୍ବରୁ ଆମ ଦେଶରେ ସମସ୍ୟାଗୁଡ଼ିକର କ୍ଷଣସ୍ଥାୟୀ ସମାଧାନ କରାଯାଉଥିଲା। କିନ୍ତୁ ଏବେ ସେହି ପରମ୍ପରା ବଦଳିଯାଇଛି। ଏବେ ଆମେ ତତ୍କାଳ ଆବଶ୍ୟକତା ଠାରୁ ଆଗକୁ ବଢ଼ି ଦୀର୍ଘକାଳୀନ ସମାଧାନ ଉପରେ ଜୋର ଦେଉଛୁ। ଏଥିରୁ ମ୍ୟାନେଜମେଣ୍ଟ ପାଇଁ ଶିଖିବାର ଏକ ବହୁତ ଭଲ ଦିଗ ସାମ୍ନାକୁ ଆସିଛି। ଆମ ଗହଣରେ ଅରୁନ୍ଧତି ମହୋଦୟା ଉପସ୍ଥିତ ଅଛନ୍ତି। ଦେଶରେ ଗରିବଙ୍କ ଲାଗି ଜନଧନ ବ୍ୟାଙ୍କ ଖାତା ଖୋଲିବା ପାଇଁ କିପରି ଯୋଜନା କରାଗଲା, ଏହାକୁ କିପରି ଭାବେ କାର୍ଯ୍ୟକାରୀ କରାଗଲା ଏବଂ ଏହାକୁ କିପରି ଭାବେ ପରିଚାଳନା କରାଗଲା, ଏ ସମସ୍ତ ପ୍ରକ୍ରିୟାରେ ସେ ପ୍ରତ୍ୟକ୍ଷ ଭାବେ ସାକ୍ଷୀ ରହିଛନ୍ତି, କାରଣ ସେ ସମୟରେ ସେ ବ୍ୟାଙ୍କର ଦାୟିତ୍ୱରେ ଥିଲେ। ଏକଦା ବ୍ୟାଙ୍କର ଦୁଆର ମାଡ଼ୁନଥିବା ଗରିବଙ୍କ ପାଇଁ 40 କୋଟିରୁ ଅଧିକ ବ୍ୟାଙ୍କ ଆକାଉଣ୍ଟ ଖୋଲିବା ସେତେଟା ସହଜ ନଥିଲା। ମୁଁ ଏସବୁ କଥା ଆପଣମାନଙ୍କୁ ଏଥିପାଇଁ କହୁଛି ଯେ ମ୍ୟାନେଜମେଣ୍ଟର ଅର୍ଥ କେବଳ ବଡ଼ କମ୍ପାନୀ ଚଳାଇବା ନୁହେଁ। ଏହାର ପ୍ରକୃତ ଅର୍ଥ ହେଉଛି ଭାରତ ଭଳି ବଡ଼ ଦେଶର ଜନଜୀବନରେ ସୁଧାର ଆଣିବା ଦିଗରେ କାର୍ଯ୍ୟ କରିବା। ମୁଁ ଆପଣମାନଙ୍କୁ ଆଉ ଏକ ଉଦାହରଣ ଦେଉଛି ଏବଂ ଏହା ଏଥିପାଇଁ ଜରୁରି କାରଣ ଓଡ଼ିଶା ମାଟିର ସନ୍ତାନ ଭାଇ ଧର୍ମେନ୍ଦ୍ରଙ୍କର ଏଥିରେ ବଡ଼ ଭୂମିକା ରହିଛି।

ସାଥୀଗଣ,

ଆମ ଦେଶରେ ରୋଷେଇ ଗ୍ୟାସ, ସ୍ୱାଧୀନତାର ପାଖାପାଖି 10 ବର୍ଷ ପରେ ଆସିଯାଇଥିଲା। କିନ୍ତୁ ପରବର୍ତ୍ତୀ ଦଶନ୍ଧିଗୁଡ଼ିକରେ ରୋଷେଇ ଗ୍ୟାସ କେବଳ ସଉକ ପାଲଟିଯାଇଥିଲା। ଧନୀ ଲୋକମାନଙ୍କର ପ୍ରତିଷ୍ଠା ପାଲଟିଯାଇଥିଲା। ଲୋକମାନଙ୍କୁ ଗୋଟିଏ ଗ୍ୟାସ ସଂଯୋଗ ପାଇଁ କେତେ ଚକ୍କର ଲଗାଇବାକୁ ପଡ଼ୁଥିଲା, ତଥାପି ସେମାନଙ୍କୁ ଗ୍ୟାସ ମିଳୁନଥିଲା। ପରିସ୍ଥିତି ଏପରି ହୋଇଥିଲା ଯେ ବର୍ଷ 2014 ପର୍ଯ୍ୟନ୍ତ ଆଜକୁ 6 ବର୍ଷ ପୂର୍ବେ, 2014 ପର୍ଯ୍ୟନ୍ତ ଦେଶରେ ରୋଷେଇ ଗ୍ୟାସର କଭରେଜ ମାତ୍ର 55 ପ୍ରତିଶତ ଥିଲା। ଏପରି ଆଭିମୁଖ୍ୟରେ ପରିବର୍ତ୍ତନ ହେଉନଥିବା କାରଣରୁ ସମସ୍ୟାର ସମାଧାନ ହୋଇପାରୁନଥିଲା। 60 ବର୍ଷରେ ରୋଷେଇ ଗ୍ୟାସର କଭରେଜ ମାତ୍ର 55 ପ୍ରତିଶତ। ଏହି ଗତିରେ ଦେଶ ଚାଲିଥିଲେ ସମସ୍ତଙ୍କ ନିକଟରେ ଗ୍ୟାସ ପହଞ୍ଚାଇବା ଲାଗି ଆହୁରି ଅର୍ଦ୍ଧଶତାବ୍ଦୀ ବିତିଯାଇଥାନ୍ତା। 2014ରେ ଆମ ସରକାର ଗଠନ ହେବା ପରେ ଆମେ ସ୍ଥିର କଲୁ ଏହାର ସ୍ଥାୟୀ ସମାଧାନ ମଧ୍ୟ କରିବାକୁ ହେବ। ଆପଣମାନେ ଜାଣନ୍ତି ଆଜି ଦେଶରେ ଗ୍ୟାସ କଭରେଜ କେତେ ରହିଛି? 98 ପ୍ରତିଶତରୁ ମଧ୍ୟ ଅଧିକ। ଏବଂ ଏଠାରେ ମ୍ୟାନେଜମେଣ୍ଟ ସହିତ ଜଡ଼ିତ ଆପଣମାନେ ସମସ୍ତେ ଜାଣନ୍ତି ଯେ ଆରମ୍ଭ କରିବା ପରେ ଅଳ୍ପବହୁତ ଆଗକୁ ବଢ଼ିବା ସହଜ ହୋଇପାରେ। କିନ୍ତୁ ସବୁଠୁ ବଡ଼ ଚ୍ୟାଲେଞ୍ଜ ହେଉଛି ଏହି କଭରେଜକୁ ଶତପ୍ରତିଶତ କରିବା।

ବନ୍ଧୁଗଣ,

ଏଠାରେ ପ୍ରଶ୍ନ ଉଠୁଛି ଆମେ ଏହା କିପରି ଭାବେ ପ୍ରାପ୍ତ କଲୁ, କିପରି ଲକ୍ଷ୍ୟ ହାସଲ କଲୁ? ଆପଣମାନଙ୍କ ଭଳି ମ୍ୟାନେଜମେଣ୍ଟର ସାଥୀମାନଙ୍କ ପାଇଁ ଏହା ବହୁତ ବଡ଼ କେସ ଷ୍ଟଡି।

ବନ୍ଧୁଗଣ,

ଆମେ ଗୋଟିଏ ପଟେ ସମସ୍ୟାକୁ ରଖିଲୁ ଏବଂ ଆଉ ଗୋଟିଏ ପଟେ ସ୍ଥାୟୀ ସମାଧାନକୁ। ତେବେ ସମସ୍ୟା ଥିଲା ନୂଆ ବିତରକଙ୍କୁ ନେଇ। ଆମେ ଦଶ ହଜାର ନୂଆ ଗ୍ୟାସ ବିତରକମାନଙ୍କୁ ନିଯୁକ୍ତି ଦେଲୁ। ସମସ୍ୟା ଥିଲା ବଟଲିଂ ପ୍ଲାଣ୍ଟ କ୍ଷମତାକୁ ନେଇ। ଆମେ ସାରା ଦେଶରେ ନୂଆ ବଟଲିଂ ପ୍ଲାଣ୍ଟ ସ୍ଥାପନ କଲୁ, ଦେଶର କ୍ଷମତା ବଢ଼ାଇଲୁ। ଆହୁରି ଇମ୍ପୋର୍ଟ ଟର୍ମିନାଲ କ୍ଷମତାକୁ ନେଇ ସମସ୍ୟା ଥିଲା। ଆମେ ସେଥିରେ ମଧ୍ୟ ସୁଧାର ଆଣିଲୁ। ପାଇପ ଲାଇନ କ୍ଷମତାକୁ ନେଇ ସମସ୍ୟା ଥିଲା। ଆମେ ସେଥିରେ ମଧ୍ୟ ହଜାର ହଜାର କୋଟି ଟଙ୍କା ଖର୍ଚ୍ଚ କଲୁ ଏବଂ ଆଜି ମଧ୍ୟ କରୁଛୁ। ସମସ୍ୟା ଥିଲା ଗରିବ ହିତାଧିକାରୀଙ୍କ ଚୟନକୁ ନେଇ। ଆମେ ସମ୍ପୂର୍ଣ୍ଣ ପାରଦର୍ଶିତା ସହିତ ସେହି କାମ ମଧ୍ୟ ପୂରଣ କଲୁ। ବିଶେଷ କରି ଉଜ୍ଜ୍ୱଳା ଯୋଜନା ଆରମ୍ଭ କରାଯାଇ ଏହି କାର୍ଯ୍ୟକୁ ସଫଳ ରୂପ ଦିଆଗଲା।

ବନ୍ଧୁଗଣ,

ସ୍ଥାୟୀ ସମାଧାନ ଦେବାର ଏହି ଉଦ୍ଦେଶ୍ୟ ଫଳରେ ଆଜି ଦେଶରେ 28 କୋଟିରୁ ଅଧିକ ଗ୍ୟାସ ସଂଯୋଗ ହୋଇପାରିଛି। 2014ରେ ଗ୍ୟାସ ସଂଯୋଗ ମାତ୍ର 14 କୋଟି ଥିଲା। ଚିନ୍ତାକରନ୍ତୁ, 60 ବର୍ଷରେ 14 କୋଟି ଗ୍ୟାସ ସଂଯୋଗ ଏବଂ ବିଗତ ମାତ୍ର 6 ବର୍ଷରେ ଦେଶରେ 14 କୋଟିରୁ ଅଧିକ ଗ୍ୟାସ ସଂଯୋଗ ଦିଆଗଲା। ଏବେ ଲୋକମାନଙ୍କୁ ରୋଷେଇ ଗ୍ୟାସ ପାଇଁ ଦୌଡ଼ିବାକୁ ପଡ଼ୁନାହିଁ, ଏଣେତେଣେ ବୁଲିବାକୁ ପଡ଼ୁନାହିଁ। ଏଠାରେ ଓଡ଼ିଶାରେ ମଧ୍ୟ ଉଜ୍ଜ୍ୱଳା ଯୋଜନା କାରଣରୁ ପାଖାପାଖି 50 ଲକ୍ଷ ଗରିବ ପରିବାରକୁ ଗ୍ୟାସ ସଂଯୋଗ ମିଳିପାରିଛି। ଏହି ସମ୍ପୂର୍ଣ୍ଣ ଅଭିଯାନ ସମୟରେ ଦେଶରେ ଯେଉଁ କ୍ଷମତା ବିକାଶ କରାଗଲା, ସେହି କାରଣରୁ ଓଡ଼ିଶାର 19ଟି ଜିଲ୍ଲାରେ ସିଟି ଗ୍ୟାସ ଡିଷ୍ଟ୍ରିବ୍ୟୁସନ ନେଟୱାର୍କ ପ୍ରସ୍ତୁତ ହେଉଛି।

ବନ୍ଧୁଗଣ,

ଏସବୁ ଉଦାହରଣ ମୁଁ ଆଣମାନଙ୍କୁ ଏଥିପାଇଁ ବୁଝାଇଲି କାରଣ ଆପଣମାନେ ଯେତେ ଅଧିକ ଦେଶର ଆବଶ୍ୟକତା, ସମସ୍ୟାକୁ ବୁଝିପାରିବେ, ଆପଣ ସେତେ ଭଲ ମ୍ୟାନେଜର ହୋଇପାରିବେ ଏବଂ ସେତେ ଭଲ ସମାଧାନ ମଧ୍ୟ ଦେଇପାରିବେ। ମୁଁ ଭାବୁଛି, ଉଚ୍ଚ ଶିକ୍ଷା ସହ ଜଡ଼ିତ ଶିକ୍ଷାନୁଷ୍ଠାନଗୁଡ଼ିକ କେବଳ ନିଜର ବିଶେଷଜ୍ଞତା ମଧ୍ୟରେ ସୀମିତ ରହିବା ଅନୁଚିତ। ସେମାନଙ୍କର ପରିଧି ବ୍ୟାପକ ହେବା ଉଚିତ। ଏଠାରେ ପଢ଼ୁଥିବା ଛାତ୍ରଛାତ୍ରୀଙ୍କର ଏଥିରେ ବଡ଼ ଭୂମିକା ରହିପାରିବ। ନୂଆ ଶିକ୍ଷା ନୀତିରେ ବିସ୍ତୃତ, ବହୁବିଷୟକ, ସାମଗ୍ରିକ ଦୃଷ୍ଟିକୋଣ ଉପରେ ଜୋର ଦିଆଯାଇଛି। ପେସାଦାର ଶିକ୍ଷା କ୍ଷେତ୍ରରେ ଯେଉଁସବୁ ବାଧା ଉତ୍ପନ୍ନ ହେଉଛି ସେଗୁଡ଼ିକୁ ଦୂର କରିବା ଲାଗି ପ୍ରୟାସ କରାଯାଉଛି। ଆମେ ଦେଶର ବିକାଶ ଲାଗି ପ୍ରତ୍ୟେକଙ୍କୁ ମୁଖ୍ୟଧାରାକୁ ଆଣିବା ଲାଗି ଚାହୁଁଛୁ। ଏହା ମଧ୍ୟ ସମାବେଶୀ ପ୍ରକୃତି। ମୋର ଭରସା ରହିଛି, ଆପଣମାନେ ଏହି ସଂକଳ୍ପକୁ ପୂରଣ କରିବେ। ଆପଣମାନଙ୍କର ପ୍ରୟାସ ଏବଂ ଆଇଆଇଏମ ସମ୍ବଲପୁରର ପ୍ରୟାସ, ଆତ୍ମନିର୍ଭର ଭାରତ ଅଭିଯାନକୁ ସିଦ୍ଧ କରିପାରିବ। ଏହି ଶୁଭକାମନା ସହିତ, ଆପଣମାନଙ୍କୁ ଅନେକ ଅନେକ ଧନ୍ୟବାଦ। ନମସ୍କାର!

Explore More
୭୭ତମ ସ୍ବାଧୀନତା ଦିବସ ଅବସରରେ ଲାଲକିଲ୍ଲା ପ୍ରାଚୀରରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଭିଭାଷଣର ମୂଳ ପାଠ

ଲୋକପ୍ରିୟ ଅଭିଭାଷଣ

୭୭ତମ ସ୍ବାଧୀନତା ଦିବସ ଅବସରରେ ଲାଲକିଲ୍ଲା ପ୍ରାଚୀରରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଭିଭାଷଣର ମୂଳ ପାଠ
India stock market hits $5 trillion milestone fortnight ahead of Lok Sabha election results

Media Coverage

India stock market hits $5 trillion milestone fortnight ahead of Lok Sabha election results
NM on the go

Nm on the go

Always be the first to hear from the PM. Get the App Now!
...
'ସମ୍ବାଦ'କୁ ପ୍ରଧାନମନ୍ତ୍ରୀ ମୋଦୀଙ୍କ ସାକ୍ଷାତକାର
May 22, 2024

ଲୋକସଭା ସହ ଓଡ଼ିଶାରେ ବିଧାନସଭା ନିର୍ବାଚନ। ନିର୍ବାଚନର ଏହି ଅବହାୱା ଭିତରେ ଘନ ଘନ ଓଡ଼ିଶା ଗସ୍ତରେ ଆସି ପ୍ରଚାରର ମଙ୍ଗ ଧରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ବିଭିନ୍ନ ନିର୍ବାଚନୀ ସଭାରେ ଯୋଗଦେଇ ରାଜ୍ୟ ସରକାରଙ୍କ ବିରୋଧରେ ସ୍ବରକୁ ଶାଣିତ କରିବା ସହ ବିଜେପି ସରକାର ଗଠନ କରିବ ବୋଲି ଦୃଢ଼ୋକ୍ତି କରିଛନ୍ତି। ନିକଟରେ ଓଡ଼ିଶା ଗସ୍ତରେ ଥିବା ଅବସରରେ ‘ସମ୍ବାଦ’ ସହ ସ୍ବତନ୍ତ୍ର ସାକ୍ଷାତକାରରେ ବିଜେଡି ସରକାରର ବିଫଳତା ସହ ଓଡ଼ିଶା ପରିପ୍ରେକ୍ଷୀରେ ବିଜେପିର ସୁଚିନ୍ତିତ ଯୋଜନା ଏବଂ ଓଡ଼ିଶାର ବିକାଶ ପାଇଁ ଲକ୍ଷ୍ୟ ସମ୍ପର୍କରେ ସେ ଏକ ବିସ୍ତୃତ ଚିତ୍ର ଦେଇଛନ୍ତି। ପ୍ରଧାନମନ୍ତ୍ରୀଙ୍କୁ ଭେଟିଥିଲେ ‘ସମ୍ବାଦ’ର ସମ୍ପାଦକ ତନୟା ପଟ୍ଟନାୟକ ଓ ବାର୍ତ୍ତା ସମ୍ପାଦକ ଭବାନୀ ଶଙ୍କର ତ୍ରିପାଠୀ।

ସମ୍ବାଦ: କେନ୍ଦ୍ରରେ ‘ମୋଦୀ ବନାମ କିଏ?’ ବୋଲି ଚର୍ଚ୍ଚା ଚାଲିଥିବା ବେଳେ ଓଡ଼ିଶାରେ ମତଦାତାଙ୍କ ମନରେ ମୁଖ୍ୟ ପ୍ରଶ୍ନ ହେଉଛି ‘ନବୀନ ବନାମ କିଏ?’ ଆପଣ ଭାବୁଛନ୍ତି କି ଏଠି ବିଜେପି ପାଇଁ ଜଣେ ମୁଖ୍ୟମନ୍ତ୍ରୀ ଚେହେରା ଘୋଷଣା କରିବା ଅଧିକ ଲାଭଦାୟକ ହୋଇଥା’ନ୍ତା?

ମୋଦୀ: ଗତ ସପ୍ତାହରେ ମୁଁ ଓଡ଼ିଶାର ଅନେକ ସ୍ଥାନକୁ ଯାଇ ବିଶାଳ ସମାବେଶକୁ ସମ୍ବୋଧିତ କରିଥିଲି, ରୋଡ୍ ସୋ’ ମାଧ୍ୟମରେ ଲୋକଙ୍କ ଆଶୀର୍ବାଦ ଲୋଡ଼ିଥିଲି, ଲୋକଙ୍କ ସମସ୍ୟା ଓ ଚିନ୍ତାକୁ ଅନୁଭବ କରିଥିଲି। ସେଥିରୁ ସ୍ପଷ୍ଟ ହୋଇଥିଲି ଯେ ବର୍ତ୍ତମାନ ପରିପ୍ରେକ୍ଷୀରେ ଓଡ଼ିଶାର ପ୍ରମୁଖ ପ୍ରସଙ୍ଗ ହେଉଛି ଶାସନ ପରିବର୍ତ୍ତନ। ଜନସାଧାରଣ କ୍ରୋଧିତ ହେବାପଛରେ କାରଣ ହେଉଛି, ସେମାନେ ସମର୍ଥନ କରିବାକୁ ବାଧ୍ୟବୋଲି ନବୀନ ସରକାର ଧରିନେଇଛନ୍ତି। ସେମାନେ କ୍ଳାନ୍ତ ଏଇଥିପାଇଁ ଯେ ସ୍ଥିରତା, ଦୁର୍ନୀତି ଓ ପ୍ରଗତିର ଅଭାବ ସାଙ୍ଗକୁ ଉତ୍ତରଦାୟିତ୍ବର ଅଭାବ। ଯେଉଁଥିପାଇଁ ଜନସାଧାରଣ ଏକ ସ୍ପଷ୍ଟ ଓ ଦୃଢ଼ ଆଭିମୁଖ୍ୟ ଚାହାନ୍ତି, ଯାହାକି ଓଡ଼ିଶାର ଅଭିବୃଦ୍ଧିକୁ ଏକ ନୂତନ ଦିଗ ଓ ଗତି ଦେଇପାରିବ। ଗତ ୧୦ବ‌ର୍ଷ ଧରି କେନ୍ଦ୍ରରେ ଆମର ସରକାରର ଉତ୍ତମ ଶାସନ ଓ ବିକାଶକୁ ଓଡ଼ିଶାବାସୀ ହୃଦୟଙ୍ଗମ କରିସାରିଛନ୍ତି। ସେମାନେ ସ୍ଥିରନିଶ୍ଚିତ, ବିଜେପି ହେଉଛି ଏକମାତ୍ର ଦଳ ଯିଏକି ସେମାନଙ୍କ ଆକାଂକ୍ଷା ପୂରଣ କରିପାରିବ। ମୁଖ୍ୟମନ୍ତ୍ରୀ ଚେହେରା ବାବଦରେ ମୁଁ ସ୍ପଷ୍ଟଭାବେ କହିବାକୁ ଚାହେଁ ଯେ ବିଜେପିର ମୁଖ୍ୟମନ୍ତ୍ରୀ ନିଶ୍ଚିତ ଭାବେ ଓଡ଼ିଶା ମାଟିର ପୁଅ କିମ୍ବା ଝିଅ ।

ସମ୍ବାଦ: ବିଜେପି ଓଡ଼ିଆ ଅସ୍ମିତାକୁ ପ୍ରମୁଖ ନିର୍ବାଚନୀ ପ୍ରସଙ୍ଗ କରିବା ପଛରେ କ’ଣ କାରଣ ରହିଛି?

ମୋଦୀ: ଇତିହାସ, ସଂସ୍କୃତି, କଳା, ସ୍ଥାପତ୍ୟ ଓ ସାହିତ୍ୟ କଥା ଉଠିଲେ ଓଡ଼ିଶା ହେଉଛି ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦପ୍ରାପ୍ତ ଅନ୍ୟତମ ଜୀବନ୍ତ ରାଜ୍ୟ। ମୁଁ ସର୍ବଦା ଓଡ଼ିଆ ସଂସ୍କୃତିର ଜଣେ ପ୍ରଶଂସକ। ଯେତେବେଳେ ଜି-୨୦ ଶିଖର ସମ୍ମିଳନୀରେ ପ୍ରଦର୍ଶିତ କୋଣାର୍କ ଚକ୍ର ବିଶ୍ବସ୍ତରୀୟ ନେତାମ‌ାନେ ମେ‌ା‌େତ ପଚାରିଥିଲେ, ତାହା ମୋତେ ବେଶ୍‌ ଖୁସି ଦେଇଥିଲା। କିଛିବର୍ଷ ତଳେ ଲିଙ୍ଗରାଜ ମନ୍ଦିର ପରିଦର୍ଶନ କରିବାପରେ ମୁଁ ଏକ ଫଟୋ ପୋଷ୍ଟ୍‌ କରିଥିଲି, ଯାହାକି ସେହିବର୍ଷ କୌଣସି ରାଜନେତାଙ୍କର ସବୁଠାରୁ ଲୋକପ୍ରିୟ ଫଟୋ ଭାବେ ବିବେଚିତ ହୋଇଥିଲା। ପୁରୀର ଐଶ୍ବରୀୟତା ହେଉ କିମ୍ବା ପଟ୍ଟଚିତ୍ର ଭଳି ସୁନ୍ଦର କଳା କି ଓଡ଼ିଆ ପରି ମଧୁର ଭାଷା ହେଉ, ସବୁଗୁଡ଼ିକ ପାଇଁ ଓଡ଼ିଶାର ସ୍ବତନ୍ତ୍ରତା ରହିଛି। ଓଡ଼ିଆମାନେ ମଧ୍ୟ ଖୁବ୍ ଦୟାଳୁ ଓ ହୃଦୟବାନ। ସର୍ବୋପରି ପ୍ରତିବର୍ଷ ମହାପ୍ରଭୁ ଜଗନ୍ନାଥଙ୍କ ରଥଯାତ୍ରା ଦେଖିବାକୁ ଆସୁଥିବା ଲକ୍ଷଲକ୍ଷ ଭକ୍ତଙ୍କୁ ସେମାନେ ଆତିଥ୍ୟ ପ୍ରଦାନ କରିଥା’ନ୍ତି। ସେହି ଓଡ଼ିଶାବାସୀ ମଧ୍ୟ ଭଲଭାବେ ଜାଣନ୍ତି ବିଜେପି ହିଁ ଓଡ଼ିଆ ସଂସ୍କୃତି ଓ ଭାବନାକୁ ସମ୍ମାନ ଦିଏ ଏବଂ ସେମାନଙ୍କର ଯାହାକିଛି ଆକାଂକ୍ଷା ରହିଛି ଏହି ଦଳ ହିଁ ପୂରଣ କରିବ।

ସମ୍ବାଦ: ଆପଣ କାହିଁକି ଭାବୁଛନ୍ତି ଯେ ବିଜେଡି ଶାସନର ଗତ ଦୁଇ ଦଶନ୍ଧି ଭିତରେ ଓଡ଼ିଶାର ଅଗ୍ରଗତି ହୋଇନାହିଁ?

ମୋଦୀ: ଓଡ଼ିଶାର ପ୍ରତ୍ୟେକ ସ୍ତରରେ ଅବହେଳା ସ୍ପଷ୍ଟଭାବେ ଦିଶୁଛି। ରାଜ୍ୟର କୃଷକମାନଙ୍କ ଉଦାହରଣ ନିଆଯାଉ। ବିଭିନ୍ନ ଫସଲ ପାଇଁ କେନ୍ଦ୍ର ସରକାର ଏମ୍ଏସ୍‌ପି ସ୍ଥିର କରିଛନ୍ତି। ଅଥଚ ବିଜେଡି ସରକାର ତା’ଠାରୁ କମ୍ ମୂଲ୍ୟ ଦେଉଛନ୍ତି। ରାଜ୍ୟରେ ବିଜେପି ସରକାର ଚାଷୀଙ୍କୁ ଧାନ କ୍ବିଣ୍ଟାଲ ପିଛା ୩,୧୦୦ ଟଙ୍କା ଦେବା ନିଶ୍ଚିତ କରାଇବେ ଏବଂ ତୁରନ୍ତ ଏହି ଅର୍ଥ ସେମାନଙ୍କ ବ୍ୟାଙ୍କ ଜମାଖାତାକୁ ଚାଲିଯିବ। ଏଠାରେ ଦଶନ୍ଧି ଦଶନ୍ଧି ଧରି ଅନେକ ଜଳସେଚନ ପ୍ରକଳ୍ପ ବିଳମ୍ବିତ ହୋଇଚାଲିଛି। ଫଳରେ, ରାଜ୍ୟର ଚାଷୀମାନଙ୍କୁ ଫସଲ ଉତ୍ପାଦନରୁ ବଞ୍ଚିତ କରିଛି। ଆମେ ସେଗୁଡ଼ିକୁ ଅଗ୍ରାଧିକାର ଭିତ୍ତିରେ ସାରିବୁ।

ଓଡ଼ିଶାରେ ଗରିବ ଲୋକଙ୍କ ଦୁଃଖ ଅତ୍ୟନ୍ତ ମର୍ମସ୍ପର୍ଶୀ। ବିଶେଷକରି ଗ୍ରାମାଞ୍ଚଳ ଓ ଆଦିବାସୀ ଅଞ୍ଚଳର ସ୍ବାସ୍ଥ୍ୟସେବା ଭିତ୍ତିଭୂମି ଭୁଶୁଡ଼ି ପଡ଼ିଛି। ସେସବୁ ଅଞ୍ଚଳରେ ଲୋକେ ଏବେ ବି ମ୍ୟାଲେରିଆ, ଡାଇରିଆ ଓ ସାପକାମୁଡ଼ା ସହ ସଂଘର୍ଷ କରୁଛନ୍ତି। ଏପରି ସର୍ବନିମ୍ନ ସ୍ବାସ୍ଥ୍ୟସେବାର ଅଭାବ ଗରିବ ଓ ଆଦିବାସୀଙ୍କ ଜୀବନ ଉପରେ ନକାରାତ୍ମକ ପ୍ରଭାବ ପକାଉଛି। ଏହା ଏଭଳି ପରିସ୍ଥିତି ସୃଷ୍ଟିକରୁଛି ଯେକୌଣସି ଗୁରୁତର ସ୍ବାସ୍ଥ୍ୟଭିତ୍ତିକ ସମସ୍ୟା ସେମାନଙ୍କୁ ଆହୁରି ଗଭୀର ଦାରିଦ୍ର୍ୟ ଭିତରକୁ ଟାଣିନେଉଛି। ସେହିପରି, ଦୀର୍ଘ ଦଶନ୍ଧି ଦଶନ୍ଧି ଧରି କ୍ଷମତାରେ ରହିବାପରେ ବି ବିଜେଡି ସରକାର ପ୍ରତ୍ୟେକ ଓଡ଼ିଆଙ୍କ ମୁଣ୍ଡ ଉପରେ ଛାତଟିଏ ସୁନିଶ୍ଚିତ କରିପାରିନାହିଁ। ବରଂ, ପ୍ରଧାନମନ୍ତ୍ରୀ ଆବାସ ଯୋଜନାକୁ ମନ୍ଥର କରିବାସହ ସେଥିରୁ ଅର୍ଥ ଆତ୍ମସାତ୍ କରୁଥିବା ଅଭିଯୋଗ ହେଉଛି। ଓଡ଼ିଶାର ଯୁବକମାନଙ୍କ ଅବସ୍ଥା ଦେଖନ୍ତୁ। ସେମାନେ ଦେଶର ଅନ୍ୟତମ ଉଜ୍ବଳ ଓ ଦକ୍ଷ ଯୁବବର୍ଗ। ମାତ୍ର, କାମ ପାଇଁ ଅନ୍ୟ ରାଜ୍ୟକୁ ସେମାନେ ଯାଉଛନ୍ତି। ଏହାର କାରଣ ହେଲା; ପୁଞ୍ଜିନିବେଶ, ଶିଳ୍ପ ଓ ସୁଯୋଗକୁ ଆକର୍ଷିତ କରିବା ଲାଗି ବିଜେଡି ସରକାରର ଦୂରଦୃଷ୍ଟି ଅଭାବ ରହିଛି। ସେମାନେ ଶିକ୍ଷା କ୍ଷେତ୍ରକୁ ମଧ୍ୟ ଅଣଦେଖା କରିଛନ୍ତି। ବିଜେପି ନେତୃତ୍ବାଧୀନ ସରକାର ଅନେକ ସହରରେ ଆଇଟି ପାର୍କ ସ୍ଥାପନ କରିବ ଏବଂ ଉଚ୍ଚଶିକ୍ଷାର ଦକ୍ଷତା ବୃଦ୍ଧି କରାଇବ। ଶିଳ୍ପ ଆଣିବା ସହିତ ସେଥିରେ ଓଡ଼ିଆ ଯୁବକମାନଙ୍କ ଭବିଷ୍ୟତ ଉଜ୍ଜ୍ବଳ କରିବାର ସୁଯୋଗ ପହଞ୍ଚାଇବ।

ସମ୍ବାଦ: ବିଜେପି ଗତ କିଛିବର୍ଷ ମଧ୍ୟରେ ବିଜେଡିକୁ କଡ଼ା ସମାଲୋଚନା କରିନାହିଁ। ମାତ୍ର, ଏଇ କିଛିବର୍ଷ ମଧ୍ୟରେ ହଠାତ୍‌ ରାଜ୍ୟ ସରକାରଙ୍କୁ ତୀବ୍ର ସମାଲୋଚନା କରିବାକୁ ବୁଦ୍ଧିଜୀବୀମାନେ ଯଥେଷ୍ଟ ନୁହେଁ କିମ୍ବା ବିଳମ୍ବ ବୋଲି କହୁଛନ୍ତି। ଏ ସମ୍ପର୍କରେ ଆପଣ କ’ଣ କହିବେ?

ମୋଦୀ: ବିଗତ ବର୍ଷମାନଙ୍କରେ ଓଡ଼ିଶାର ବିଜେପି ଦୃଢ଼ଭାବେ ଯେଉଁସବୁ ପ୍ରସଙ୍ଗ ଉଠାଇଛି, ସେସବୁ ଓଡ଼ିଶାର ସ୍ବାର୍ଥ ସହିତ ଜଡ଼ିତ। ଆପଣ ନିଜ ମିଡିଆ ହାଉସ୍‌ର ରିପୋର୍ଟ ବା ଅନ୍ୟମାନଙ୍କ ରିପୋର୍ଟ ଦେଖିପାରିବେ। ଅନେକ ଦୁର୍ନୀତି ଘଟଣାରେ ଆମେ ଲଗାତାର ବିଜେଡି ସରକାରଙ୍କୁ ପ୍ରଶ୍ନ କରିଛୁ। ମଦ ମାଫିଆଙ୍କ ସହ ସେମାନଙ୍କ ସମ୍ପର୍କ ବାବଦରେ ପ୍ରଶ୍ନ କରିଛୁ। ବିଗିଡ଼ି ଯାଇଥିବା ଆଇନଶୃଙ୍ଖଳାକୁ ନେଇ ଆମେ ରାଜ୍ୟ ସରକାରଙ୍କୁ ସମାଲୋଚନା କରିଛୁ। କେନ୍ଦ୍ରୀୟ କଲ୍ୟାଣକାରୀ ଯୋଜନା କାର୍ଯ୍ୟକାରୀ କରିବାରେ ବିଫଳତା ଅଥବା ଦୁର୍ନୀତିକୁ ନେଇ ବି ପ୍ରଶ୍ନ କରିଛୁ। ତେଣୁ, ବିଜେଡି ସରକାରକୁ ବିଜେପି କଡ଼ା ସମ‌ାଲୋଚନା କରିନାହିଁ ବୋଲି କହିବା ଏକ ଭ୍ରାନ୍ତ ଧାରଣା। ଯେମିତି କେନ୍ଦ୍ରରେ କଂଗ୍ରେସ ଓ ତା’ର ସହଯୋଗୀମାନେ ସମାଲୋଚନାକୁ ବ୍ୟକ୍ତିଗତ ସ୍ତରକୁ ନେଇଯିବା ସହ ଏକ ତିକ୍ତତାପୂର୍ଣ୍ଣ ପରିବେଶ ସୃଷ୍ଟିକରିଛନ୍ତି, ଆମେ ସେମିତି କରିନାହୁଁ। ବରଂ, ଗଠନମୂଳକ ତଥା ପ୍ରସଙ୍ଗଭିତ୍ତିକ ସମାଲୋଚନାକୁ ଗୁରୁତ୍ବ ଦେଇଛୁ।

ସମ୍ବାଦ: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ଯେ ଓଡ଼ିଶାରେ ସରକାର ଗଠନ ପାଇଁ ବିଜେପି ସ୍ବପ୍ନ ଦେଖୁଛି। ଏହା ଉପରେ ଆପଣଙ୍କର ପ୍ରତିକ୍ରିୟା କ’ଣ?

ମୋଦୀ: ବିଜେପି ଏକ ସମୃଦ୍ଧ ତଥା ଅନ୍ତର୍ଭୁକ୍ତ ଓଡ଼ିଶାର ସ୍ବପ୍ନ ଦେଖୁଛି। ଦାରିଦ୍ର୍ୟ ବିରୋଧୀ ଲଢ଼େଇରେ ଓଡ଼ିଶାର ଗରିବ ଲୋକଙ୍କୁ ସଶକ୍ତ କରିବାର ସ୍ବପ୍ନ ଦେଖୁଛି। ସ୍ବୟଂ ସହାୟିକା ଗୋଷ୍ଠୀ ମାଧ୍ୟମରେ ରାଜ୍ୟରେ ଲକ୍ଷ ଲକ୍ଷ ଲକ୍ଷପତି ଦିଦି ସୃଷ୍ଟି କରିବାକୁ ସ୍ବପ୍ନ ଦେଖୁଛି। ଯୁବପିଢ଼ିକୁ ରୋଜଗାରକ୍ଷମ କରିବା ପାଇଁ ଓଡ଼ିଶାକୁ ପର୍ଯ୍ୟଟନସ୍ଥଳୀରେ ରୂପାନ୍ତର କରିବାର ସ୍ବପ୍ନ ଦେଖୁଛି। ସୁଭଦ୍ରା ଯୋଜନା ମାଧ୍ୟମରେ ପ୍ରତ୍ୟେକ ମହିଳାଙ୍କୁ ଆର୍ଥିକ ସଶକ୍ତୀକରଣ କରିବାକୁ ସ୍ବପ୍ନ ଦେଖୁଛି। ଓଡ଼ିଶାର ଗରିବ, କୃଷକ, ମହିଳା ଓ ଯୁବକଙ୍କ ଜୀବନକୁ ଉନ୍ନତ କରିବା ହେଉଛି ବିଜେପିର ସ୍ବପ୍ନ। ବିଜେପିର ସ୍ବପ୍ନ କେବେ କ୍ଷମତା ହାସଲ ପାଇଁ ନୁହେଁ, ବରଂ ସର୍ବଦା ଲୋକଙ୍କ ସେବା କରିବା ପାଇଁ ଉଦ୍ଦିଷ୍ଟ।

ସମ୍ବାଦ: ଆପଣ କହିଛନ୍ତି ବିଜେପି ସରକାର ଅଧୀନରେ ଓଡ଼ିଶା ଏକ ନମ୍ବର ରାଜ୍ୟ ହେବ। ପ୍ରଧାନମନ୍ତ୍ରୀଙ୍କ ଦୃଷ୍ଟିରେ ବର୍ତ୍ତମାନ ଓଡ଼ିଶା ବିକାଶର କେଉଁ କ୍ଷେତ୍ର ପାଇଁ ପ୍ରାଥମିକତା ରହିଛି?

ମୋଦୀ: ଓଡ଼ିଶାର ଜନସାଧାରଣ ଦୁଇ ଦଶନ୍ଧିରୁ ଅଧିକ ସମୟ ଧରି ଅବହେଳାର ଶିକାର ହୋଇଛନ୍ତି। ପଛୁଆବର୍ଗ ଓ ଆଦିବାସୀମାନଙ୍କ ବିକାଶ ଓ ସଶକ୍ତୀକରଣ ପାଇଁ ପ୍ରତିଶ୍ରୁତି ଦିଆଯାଇଛି, ମାତ୍ର ସେମାନଙ୍କ ସଂଘର୍ଷର ଅନ୍ତ ଘଟିନାହିଁ। ରାଜ୍ୟରେ ନୂତନ ନିଯୁକ୍ତି ସୁଯୋଗକୁ ବି ବନ୍ଦ କରିଦିଆଯାଇଛି। ବିଜେପିର ବିକାଶ ମଡେଲ ଏହିସବୁ ସମସ୍ୟାର ଅବସାନ ଘଟାଇବ। ସମାଜର ପ୍ରତ୍ୟେକବର୍ଗ ଏଥିରୁ ଉପକୃତ ହୋଇପାରିବେ। ବିଜେପିର ଡବଲ ଇଞ୍ଜିନ ସରକାର ଅନେକ ରାଜ୍ୟରେ ଏହିଭଳି କାର୍ଯ୍ୟ କରିପାରିଛି। ଏହାର ବିକାଶ ମଡେଲ୍‌ ଦ୍ରୁତ ବିକାଶ ସହିତ ଦୁର୍ନୀତିମୁକ୍ତ ଶାସନ ପାଇଁ ଏକ ଗ୍ୟାରେଣ୍ଟି। ଓଡ଼ିଶାର ଲୋକେ ମଧ୍ୟ ରାଜ୍ୟରେ ସମାନ ମଡେଲ ଚାହୁଁଛନ୍ତି। ସେମାନେ ଜାଣିଛନ୍ତି ଯେ ‘ଇଜ୍‌ ଅଫ୍ ଡୁଇଂ’ ବା କାମକୁ ସହଜ କରିବା ପ୍ରକ୍ରିୟା କାର୍ଯ୍ୟକାରୀ କରିବାରେ ବିଜେଡି ସରକାର ବିଫଳ ହୋଇଛନ୍ତି। ମାତ୍ର, ଲୋକମାନଙ୍କ ସାମୂହିକ ସ୍ବାର୍ଥ ପ୍ରତି ବିଜେପି ଗୁରୁତ୍ବ ଦେବ। ଓଡ଼ିଶାର ପ୍ରତି ୫୦୦ ସ୍ବୟଂ ସହାୟିକା ଗୋଷ୍ଠୀ ପାଇଁ ଶିଳ୍ପ କ୍ଳଷ୍ଟର ନିର୍ମାଣ କରିବୁ। ଏହିଭଳି ଆମେ ଅନେକ ପଦକ୍ଷେପ ନେବୁ, ସେଥିରୁ ଲୋକମାନେ ଅନୁଭବ କରିବେ ଯେ କିପରି ବିକାଶଠାରୁ ସେମାନଙ୍କୁ ଦୂରେଇ ରଖାଯାଇଥିଲା।

ସମ୍ବାଦ: କେନ୍ଦ୍ରୀୟ ନେତାଙ୍କ ଓଡ଼ିଶାଗସ୍ତକୁ ସମାଲୋଚନା କରିବା ସହିତ ଏହା କେବଳ ପର୍ଯ୍ୟଟନ ବୋଲି ବିଜେଡି ମତ ଦେଇଛି। ଏହିଭଳି ମନ୍ତବ୍ୟକୁ ଆପଣ କିଭଳି ଖଣ୍ଡନ କରିବେ?

ମୋଦୀ: ସେମାନଙ୍କୁ ପ୍ରଶ୍ନ ପଚରାଯିବା ଉଚିତ ହେବ କି, ଗତ ୨୫ ବର୍ଷ ଭିତରେ ଓଡ଼ିଶାବାସୀଙ୍କ ପାଇଁ ବିଜେଡି କ’ଣ କରିଛି? ରାଜ୍ୟବାସୀଙ୍କ ପ୍ରତିଭା ଓ ପରିଶ୍ରମ କାହିଁକି ଉପଯୁକ୍ତ ଫଳାଫଳ ପାଇପାରୁନାହିଁ? ଓଡ଼ିଶାର ଯୁବକମାନଙ୍କୁ କାହିଁକି ସୁଯୋଗ ହାସଲ ପାଇଁ ଅନ୍ୟ ରାଜ୍ୟ ଆଡ଼େ ଦୃଷ୍ଟିଦେବାକୁ ପଡୁଛି? ଆମେ ଗଲା ୧୦ବର୍ଷ ମଧ୍ୟରେ ଦେଶର ପ୍ରତ୍ୟେକ କୋଣଅନୁକୋଣରେ ବିକାଶ ପହଞ୍ଚାଇବା ପାଇଁ ନିରନ୍ତର ପରିଶ୍ରମ କରିଛୁ। ଓଡ଼ିଶାର ଲୋକମାନେ ମଧ୍ୟ କେନ୍ଦ୍ର ସରକାରଙ୍କ ଯୋଜନାରୁ ଉପକୃତ ହୋଇପାରିଛନ୍ତି। ଉଦାହରଣ ସ୍ବରୂପ, ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ୨୭ ଲକ୍ଷରୁ ଅଧିକ ଗୃହନିର୍ମାଣ କରାଯାଇଛି, ୫୫ ଲକ୍ଷରୁ ଅଧିକ ମହିଳା ହିତାଧିକାରୀ ମାଗଣା ଗ୍ୟାସ ସଂଯୋଗ ପାଇଛନ୍ତି, ୭୩ ପ୍ରତିଶତ ପରିବାରଙ୍କ ଘରେ ବିଶୁଦ୍ଧ ଜଳ ସଂଯୋଗ ଦିଆଯାଇଛି। ସେହିଭଳି କେନ୍ଦ୍ରୀୟ ପାଣ୍ଠିରୁ ୨୪ ହଜାର କୋଟିରୁ ଅଧିକ ଟଙ୍କା ଡିବିଟି(ପ୍ରତ୍ୟକ୍ଷ ଲାଭ ହସ୍ତାନ୍ତର) ମାଧ୍ୟମରେ ଲୋକଙ୍କ ବ୍ୟାଙ୍କ ଜମାଖାତାରେ ସିଧାସଳଖ ପହଞ୍ଚିଛି। ତେବେ, ଏସବୁ ସତ୍ତ୍ବେ ରାଜ୍ୟର ପ୍ରକୃତ ଦକ୍ଷତା ବା ସମ୍ଭାବନା ଅନାଲୋଚିତ ହୋଇ ରହିଛି। ଗତ ୨୫ ବର୍ଷ ଧରି କ୍ଷମତାରେ ଥିବା ବିଜେଡି ସରକାର ବିକାଶ ପାଇଁ ଏକ ଅର୍ଦ୍ଧ-ହୃଦୟ ତଥା ଦୂର ଆଭିମୁଖ୍ୟ ଦେଖାଇଛି।

ସମ୍ବାଦ: ମଧ୍ୟପ୍ରଦେଶର ‘ଲାଡଲି ବେହନା ଯୋଜନା’ ପରି ଓଡ଼ିଶାର ‘ସୁଭଦ୍ରା ଯୋଜନା’ ଖେଳ ପରିବର୍ତ୍ତନକାରୀ ହେବ କି?

ମୋଦୀ: ଗତ ୧୦ ବର୍ଷ ମଧ୍ୟରେ ମହିଳା ନେତୃତ୍ବାଧୀନ ବିକାଶକୁ ଆମେ ଗୁରୁତ୍ବ ଦେଇଆସିଛୁ। ଆମ ପାଇଁ ମହିଳାମାନଙ୍କୁ ସଶକ୍ତ କରିବା ଅର୍ଥ ସମଗ୍ର ଦେଶକୁ ସଶକ୍ତ କରିବା। କଥାରେ ଅଛି, ଜଣେ ମହିଳାଙ୍କୁ ସଶକ୍ତ କରିବା ମାନେ ସମଗ୍ର ପରିବାରକୁ ସଶକ୍ତ କରିବା। ଜାତୀୟ ସ୍ତରରେ ଆମର ନିଜସ୍ବ ପ୍ରମୁଖ ଯୋଜନାଗୁଡ଼ିକର ହିତାଧିକାରୀ ହେଉଛନ୍ତି ମହିଳା। ମୁଦ୍ରା ଋଣ ହେଉ କି, ସ୍ବନିଧି ଋଣ କି ଷ୍ଟାଣ୍ଡ୍ଅପ୍ ଋଣ, ବିଭିନ୍ନ ଯୋଜନା ଅନ୍ତର୍ଗତ ଅଧିକାଂଶ ସରକାରୀ ଋଣ ମହିଳାମାନଙ୍କୁ ପ୍ରଦାନ କରାଯାଇଛି। ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ଅଧିକାଂଶ ଘର ମହିଳାଙ୍କ ନାମରେ ରହିଛି କିମ୍ବା ସେମାନଙ୍କର ଯୁଗ୍ମ-ମାଲିକାନା ରହିଛି। ଓଡ଼ିଶାରେ ଆମ ଦଳ ‘ମେଧାବୀ ଝିଅ’ ଯୋଜନାରେ ଦାରିଦ୍ର୍ୟ ସୀମାରେଖା ତଳେ ଥିବା ପ୍ରତ୍ୟେକ ଛାତ୍ରୀଙ୍କୁ ୨ ଲକ୍ଷ ଟଙ୍କାର ଆଶ୍ବାସନା ପ୍ରମାଣପତ୍ର ନିଶ୍ଚିତ କରିଛି। ମହିଳାମାନଙ୍କୁ ଅଧିକ ସଶକ୍ତ କରିବାକୁ ‘ସୁଭଦ୍ରା ଯୋଜନା’ ଲକ୍ଷ୍ୟ ରଖିଛି। ଏହି ଯୋଜନା ସେମାନଙ୍କୁ ଦୁଇ ବର୍ଷ ଭିତରେ ସେମାନଙ୍କ ଆବଶ୍ୟକତା ପୂରଣ ପାଇଁ ୫୦ ହଜାର ଟଙ୍କା ବିନିଯୋଗ କରିବାର ସୁବିଧା ଯୋଗାଇବ। ଭବିଷ୍ୟତ ପାଇଁ ଆମର ଦୃଷ୍ଟିକୋଣ ସ୍ପଷ୍ଟ। ଆମେ ଏହାକୁ ଓଡ଼ିଶାରେ ବାସ୍ତବତାରେ ପରିଣତ କରିବା ପାଇଁ ପ୍ରତିବଦ୍ଧ।

ସମ୍ବାଦ: ଭାରତ ଭଳି ଗାଣତନ୍ତ୍ରିକ ଦେଶରେ ବିରୋଧୀ ଦଳର ଭୂମିକା ପ୍ରତି ମୋଦୀଙ୍କ କିଭଳି କଳ୍ପନା ରହିଛି?

ମୋଦୀ: ଆମେ ୧୦ ବର୍ଷ ଧରି ସରକାର ଚଳାଉଛୁ। ଏହି ସମୟ ମଧ୍ୟରେ ବିରୋଧୀ ଏକ ସକ୍ରିୟ ଭୂମିକା ଗ୍ରହଣ କରିବା ଏବଂ ଲୋକଙ୍କ ସ୍ବର ହେବାର ସୁଯୋଗ ପାଇଛନ୍ତି। ଏକ ଗଠନମୂଳକ ଆଭିମୁଖ୍ୟ ସହିତ ସେମାନେ ଦେଶର ବିକାଶ ପରିପ୍ରେକ୍ଷୀରେ ସକାରାତ୍ମକ ପ୍ରଭାବ ପକାଇ ପାରିଥା’ନ୍ତେ। ମାତ୍ର ସେମାନେ ତାହା କରିବାରେ ବିଫଳ ହୋଇଛନ୍ତି। ବିରୋଧୀମାନେ ଏବେ ଏକ ଗୋଲକଧନ୍ଦାରେ ଛନ୍ଦି ହୋଇଛନ୍ତି। ମୁଁ ଯାହା କରୁଛି, ମୋ’ ସରକାର ଯାହା କରୁଛନ୍ତି, ସେମାନେ ସେସବୁକୁ ବିରୋଧ କରିବାକୁ ଚାହାନ୍ତି। ଏଭଳି ମାନସିକତାରେ ସେମାନେ ଦେଶ ବିରୋଧରେ ମଧ୍ୟ ଯିବାକୁ ପ୍ରସ୍ତୁତ। ତେଣୁ ବିରୋଧୀ ଦଳଗୁଡ଼ିକ ନିଜର ଭୂମିକା ନିର୍ବାହ କରିବାରେ ବିଫଳ ହୋଇଛନ୍ତି। ଯଦି ଭାରତୀୟ ଅଭିବୃଦ୍ଧି କାହାଣୀରେ ବିରୋଧୀଦଳ ନିଜକୁ କେବଳ ଏକ ‘ନାହିଁ କହୁଥିବା ଦଳ’ରେ ବିବେଚିତ ହେବାକୁ ଚାହାନ୍ତି, ତା’ହେଲେ ଭୋଟର୍‌ମାନେ ରାଜ୍ୟ ବା ଜାତୀୟ ନିର୍ବାଚନରେ ସେମାନଙ୍କୁ ଅଣଦେଖା କରିବା ସ୍ବାଭାବିକ।

ସମ୍ବାଦ: ବିରୋଧୀଙ୍କ ଅଭିଯୋଗ ଯେ ଗଣତନ୍ତ୍ରର ସ୍ବରକୁ ଦମନ କରିବା ଲାଗି ଇଡି ଓ ସିବିଆଇର ଅପବ୍ୟବହାର କରି ମୋଦୀ ଦେଶରେ ଏକଛତ୍ରବାଦୀ ଶାସନ ଲାଗୁ କରିବାକୁ ଚାହାନ୍ତି। ଏ ସମ୍ପର୍କରେ ଆପଣ କ’ଣ କହିବେ? ?

ମୋଦୀ: ଯଦି ଇଡି ଓ ସିବିଆଇ ବ୍ୟବହାର କରି ଗଣତନ୍ତ୍ରକୁ ସହଜରେ ଦମନ କରାଯାଇପାରିବ, ତେବେ ଏହି ସଂସ୍ଥାଗୁଡ଼ିକୁ ବର୍ଷ ବର୍ଷ ଧରି ବ୍ୟବହାର କରି ଆସୁଥିବା କଂଗ୍ରେସ ଦଳ ୨୦୧୪ ନିର୍ବାଚନକୁ ସହଜରେ ଜିତି ପାରିଥା’ନ୍ତା। ତା’ହେଲେ ସେମାନେ କାହିଁକି ହାରିଗଲେ? ବାସ୍ତବତା ହେଉଛି, ଭାରତ ପରି ବିସ୍ତୃତ ଓ ବିବିଧ ଦେଶରେ ଗଣତନ୍ତ୍ରକୁ ଏଭଳି ଉପାୟ ଦ୍ବାରା ଅଟକାଯାଇପାରିବ ନାହିଁ। ଭାରତୀୟମାନେ ସଜାଗ ଓ ସଚେତନ। ସେମାନଙ୍କର ସାମୂହିକ ଇଚ୍ଛା ଦ୍ବାରା ହିଁ ଦେଶର ଭାଗ୍ୟ ନିର୍ଣ୍ଣୟ ହୋଇଥାଏ। ଆଜି ସୁଦ୍ଧା ଇଡି ଦ୍ବାରା ତଦନ୍ତ କରାଯାଇଥିବା ସମସ୍ତ ଦୁର୍ନୀତି ମାମଲାରେ କେବଳ ୩ ପ୍ରତିଶତ ହିଁ ରାଜନେତା ଜଡ଼ିତ ଅଛନ୍ତି। ବାକି ୯୭ ପ୍ରତିଶତଙ୍କ ଭିତରେ ବିଭିନ୍ନ ସରକାରୀ ଅଧିକାରୀ ଓ ଅପରାଧୀ ଅଛନ୍ତି ଏବଂ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଉଛି। ଏଥିରୁ ଏହା ପ୍ରମାଣିତ ଯେ ଆମର ଏହି ସଂସ୍ଥାଗୁଡ଼ିକ କେବଳ ରାଜନୈତିକ ପକ୍ଷପାତିତାରେ କାମ କରୁନାହାନ୍ତି। ଏଥିସହିତ ୨୦୧୪ ପୂର୍ବରୁ ଇଡି କେବଳ ୫ ହଜାର କୋଟି ଟଙ୍କାର ସମ୍ପତ୍ତି ଜବତ କରିଥିଲା ବେଳେ ଗତ ୧୦ ବର୍ଷ ଭିତରେ ସେହି ପରିମାଣ ଏକ ଲକ୍ଷ କୋଟି ଟଙ୍କାକୁ ଟପିଯାଇଛି। ଏହା ଦର୍ଶାଉଛି କି, ଆମ ସଂସ୍ଥାଗୁଡ଼ିକ ସେମାନଙ୍କ କର୍ତ୍ତବ୍ୟ ଠିକ୍‌ରେ ପାଳନ କରୁଛନ୍ତି। ତେଣୁ ସେହି ସଂସ୍ଥାଗୁଡ଼ିକୁ ବିନା ହସ୍ତକ୍ଷେପରେ କାମ କରିବାକୁ ଦିଆଯିବା ଜରୁରୀ। ଇନ୍‌ଡି ଗଠବନ୍ଧନ ପ୍ରଥମଦିନରୁ ଦୁର୍ନୀତିଗ୍ରସ୍ତଙ୍କ ଏକ ମିଳିତ ମଞ୍ଚ ଥିଲା। ନିର୍ବାଚନରେ ହାରିଯିବେ ବୋଲି ଜାଣି ଏହିଭଳି ମନ୍ଦ ବାହାନାର ଆଶ୍ରୟ ନେଇଛନ୍ତି।

ସମ୍ବାଦ: ଆପଣ ଭାବୁଛନ୍ତି କି, ‘୪୦୦ ପାର୍’ ସ୍ଳୋଗାନ ଆତ୍ମସନ୍ତୋଷ ଓ ଅତ୍ୟଧିକ ଆତ୍ମବିଶ୍ବାସ ସୃଷ୍ଟି କରି ବିଜେପିକୁ ପଛକୁ ନେଇଯିବ?

ମୋଦୀ: ଦେଶ ଏକ ନିର୍ଣ୍ଣାୟକ ଓ ସ୍ଥିର ସରକାର ଚାହେଁ ବୋଲି ନିଷ୍ପତ୍ତି ନେଇସାରିଛି। ଦେଶବାସୀ ହିଁ ଆମକୁ ‘ଏଇ ଥର, ୪୦୦ ପାର୍’ର ଲକ୍ଷ୍ୟ ଦେଇଛନ୍ତି। ଏହାର କାରଣ ହେଲା, ବିଜେପିର କାର୍ଯ୍ୟକର୍ତ୍ତାମାନେ ସର୍ବଦା ନିମ୍ନସ୍ତରରୁ କାମ କରୁଛନ୍ତି ଏବଂ ଲୋକଙ୍କ ସହ ରହିଛନ୍ତି। ନିର୍ବାଚନ ଥାଉ କି ନଥାଉ, ସେମାନେ ଲୋକଙ୍କ ଇଚ୍ଛା ସହିତ ତାଳମେଳ ରଖିଛନ୍ତି ଏବଂ ସେମାନଙ୍କ ଆକାଂକ୍ଷା ପୂରଣ ପାଇଁ କାର୍ଯ୍ୟ କରୁଛନ୍ତି। ମୁଁ ଏକଥା ମଧ୍ୟ କହିବାକୁ ଚାହେଁ ଯେ ଆମ ଦଳର ମାର୍ଗଦର୍ଶିକାରେ ‘ଦେଶ ପ୍ରଥମ’ ବୋଲି ରହିଛି। ଏକ ରାଜନୈତିକ ଆନ୍ଦୋଳନ ଭାବେ ଆମେ ଉଭା ହୋଇଛୁ। ଲୋକସଭାରେ ମାତ୍ର ୨ ଜଣ ସାଂସଦ ରହିବାଠାରୁ ଆରମ୍ଭ କରି ଦୁଇଥର ପୂୂର୍ଣ୍ଣ ସଂଖ୍ୟାଗରିଷ୍ଠ ସରକାର ଗଠନ କରିବା ଏବଂ ତୃତୀୟଥର ପାଇଁ ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରିବା ଯାଏ ଆମ କାର୍ଯ୍ୟକର୍ତ୍ତାମାନେ ଅହେତୁକ ଦୃଢ଼ତା, କଠିନ ପରିଶ୍ରମ ଓ ସାହସ ପ୍ରଦର୍ଶନ କରି ଆସିଛନ୍ତି। ସେମାନଙ୍କ ପାଇଁ ଏକ ନିର୍ବାଚନରେ ଜିତିବା ଏକମାତ୍ର ଉଦ୍ଦେଶ୍ୟ କି ଶେଷକଥା ନୁହେଁ। ତେଣୁ ଏଠି ଆତ୍ମସନ୍ତୋଷର ସ୍ଥାନ ନାହିଁ।

ସମ୍ବାଦ: ପୂର୍ବ ଭାରତରେ ବିଜେପିର ପ୍ରଦର୍ଶନ ଆଶାନୁରୂପ ନଥିଲା। ୨୦୨୪ ନିର୍ବାଚନ କ’ଣ ବିଜେପି ସପକ୍ଷରେ ଯିବ ବୋଲି ଆପଣ ଭାବୁଛନ୍ତି?

ମୋଦୀ: ୨୦୧୯ ଲୋକସଭା ନିର୍ବାଚନରେ ବିଜେପି ପୂର୍ବ ଭାରତର ଏକମାତ୍ର ବୃହତ୍ତମ ଦଳ ଭାବେ ଉଭା ହୋଇଥିଲା। ଝାଡ଼ଖଣ୍ଡରେ ଏନ୍‌ଡିଏ ୧୪ ଆସନରୁ୧୨ଟି ଜିତିବା ସହ ୫୬ ପ୍ରତିଶତରୁ ଅଧିକ ଭୋଟ ପାଇଥିଲା। ଓଡ଼ିଶାରେ ଆମେ ପୂର୍ବାପେକ୍ଷା ୭ଟି ଆସନ ଅଧିକ ପାଇ ୮ରେ ପହଞ୍ଚିଥିଲୁ। ପଶ୍ଚିମବଙ୍ଗରେ ଆମେ ୪୨ ଆସନରୁ ୧୮ଟି ଜିତିଥିଲୁ ଏବଂ ଏକ ନଗଣ୍ୟ ଉପସ୍ଥିତିରୁ ମୁଖ୍ୟ ବିରୋଧୀ ଦଳ ହୋଇପାରିଥିଲୁ। ବିହାରରେ ଏନ୍‌ଡିଏ ୪୦ଟି ଆସନରୁ ୩୯ଟି ଜିତିଥିଲା। ତେଣୁ, ପୂର୍ବଭାରତରେ ଆମେ ଐତିହାସିକ ସଫଳତା ହାସଲ କରିଥିଲୁ ବୋଲି କୁହାଯାଇପ‌ାରେ। ଏହି ସଫଳତା ହାସଲ ପଛରେ କାରଣ ହେଉଛି ଦୁର୍ନୀତିଗ୍ରସ୍ତ ଓ ବଂଶବାଦୀ ନେତାଙ୍କ ଶାସନରେ ଲୋକେ କ୍ଳାନ୍ତ ହୋଇପଡ଼ିଥିଲେ। ଯେମିତିକି ଟିଏମ୍‌ସି ନେତାମାନେ ବିଭିନ୍ନ ପ୍ରକାର ଦୁର୍ନୀତି କରିବାରେ ରେକର୍ଡ କରିଛନ୍ତି। ନିକଟ ଅତୀତରେ ଓଡ଼ିଶାର ଏକ ମଦ କାରଖାନାରୁ ଜଣେ ଝାଡ଼ଖଣ୍ଡ ସାଂସଦଙ୍କ ପାହାଡ଼ତୁଲ୍ୟ ଟଙ୍କାଗଦା ଉଦ୍ଧାର ହୋଇଥିଲା। ଜବତ ଟଙ୍କାଗୁଡ଼ିକୁ ଗଣିବା ଲାଗି ଆମ ସଂସ୍ଥାଗୁଡ଼ିକୁ ଦିନ ଦିନ ଲାଗିଗଲା। ଏହିସବୁ କାରଣ ପାଇଁ ପୂର୍ବଭାରତରେ ଆମେ ଦୃଢ଼ ଉପସ୍ଥିତି ରଖିପାରିଛୁ।

ସମ୍ବାଦ: ଭାରତୀୟ ଜନସଂଖ୍ୟାର ଏକ ଗୁରୁତ୍ବପୂର୍ଣ୍ଣ ଭାଗ ମଧ୍ୟବିତ୍ତ ଶ୍ରେଣୀର, ଯେଉଁମାନେ ଇନ୍ଧନ ଗ୍ୟାସ ଓ ଖାଦ୍ୟ ଭଳି ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧି ଦ୍ବାରା ଭୀଷଣ ଭାବରେ ପ୍ରଭାବିତ। ଏ ବାବଦରେ ଆପଣଙ୍କ ମତାମତ କ’ଣ?

ମୋଦୀ: ଭାରତରେ ମୁଦ୍ରାସ୍ଫୀତି ଏକ ପ୍ରମୁଖ ପ୍ରସଙ୍ଗ ହୋଇ ରହି ଆସିଛି। କିନ୍ତୁ ଅତୀତର ଅନ୍ୟ କୌଣସି ସରକାର ଗତ ୧୦ ବର୍ଷ ପରି ଏହି ପ୍ରସଙ୍ଗକୁ ଗମ୍ଭୀର ଓ ବିସ୍ତୃତ ଭାବରେ କ୍ବଚିତ୍ ସମାଧାନ କରିଛନ୍ତି। ୧୯୭୪ ମସିହାରେ ଭାରତରେ ମୁଦ୍ରାସ୍ଫୀତି ହାର ସର୍ବାଧିକ ୩୦ ପ୍ରତିଶତ ରହିଥିଲା। ସେତେବେଳେ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଥିଲେ। ୧୯୮୦ ଦଶକର ଆରମ୍ଭରେ ଦେଶ ପୁଣି ଇନ୍ଦିରାଙ୍କ ଅଧୀନରେ ଥିଲା ବେଳେ ଏହା ୧୦ ପ୍ରତିଶତରୁ ଅଧିକ ରହିଥିଲା। ୧୯୯୦ ଦଶକରେ ଏହା ମଧ୍ୟ ସମାନ ସ୍ତରରେ ରହିଲା। ୨୦୧୦ରେ ଜଣେ ଅର୍ଥନୀତିଜ୍ଞ ସରକାରଙ୍କ ନେତୃତ୍ବ ନେଉଥିବା ସତ୍ତ୍ବେ ମୁଦ୍ରାସ୍ଫୀତି ପ୍ରାୟ ୧୨ ପ୍ରତିଶତ ରହିଥିଲା। ସେହି ତୁଳନାରେ ୨ବର୍ଷର ମହାମାରୀ, ବୈଶ୍ବିକ ଅନିଶ୍ଚିତତା ଏବଂ ଏହାର ପ୍ରଭାବ ଆମର ଇନ୍ଧନ, ସାର ଓ ଖାଦ୍ୟ ଉପରେ ପଡ଼ିବା ସତ୍ତ୍ବେ ଆମ ସରକାର ଉପଭୋକ୍ତା ଦର ସୂଚକାଙ୍କ(ସିପିଆଇ) ମୁଦ୍ରାସ୍ଫୀତିକୁ ୫ ପ୍ରତିଶତ ତଳେ ରଖିବାରେ ସଫଳ ହୋଇଛି। ସ୍ବାଧୀନତା ପରବର୍ତ୍ତୀ ସମସ୍ତ ପ୍ରଧାନମନ୍ତ୍ରୀଙ୍କ ମଧ୍ୟରେ ମୁଦ୍ରାସ୍ଫୀତି ନିୟନ୍ତ୍ରଣ ଉପରେ ଆମର ଦକ୍ଷତା ସର୍ବୋତ୍ତମ ରହିଛି। ଅନେକ ବିକଶିତ ରାଷ୍ଟ୍ର ତୁଳନାରେ ମୁଦ୍ରାସ୍ଫୀତି ହାର କମ୍ ଥିବା ଦେଶମାନଙ୍କ ଭିତରେ ଭାରତ ଅନ୍ୟତମ। ଏହାର କାରଣ ହେଉଛି, ଆମ କୃଷକମାନେ ବିଶ୍ବ ଖାଦ୍ୟ ଚାହିଦା ପୂରଣ କରିବାରେ ସଫଳ ହୋଇଛନ୍ତି। ଭାରତରେ ଆଜି ବିଶ୍ବର ସବୁଠୁ ଶସ୍ତା ୟୁରିଆ ସାର ରହିଛି। ତେଣୁ ୟୁକେ, ଫ୍ରାନ୍ସ ଓ ଜର୍ମାନୀ ପରି ବୃହତ୍ତର ଅର୍ଥନୈତିକ ରାଷ୍ଟ୍ର ତୁଳନାରେ ଆମେ ଖାଦ୍ୟ ଓ ସାର ମୁଦ୍ରାସ୍ଫୀତିକୁ କମ୍ ରଖିପାରିବୁ। ଆଜି ବିଶ୍ବରେ ଦେଖାଦେଇଥିବା ବିବାଦର ମୁକାବିଲା ଯୋଗୁଁ ବିଶ୍ବସ୍ତରରେ ତୈଳଦରରେ ବୃଦ୍ଧି ଘଟିଛି। କିନ୍ତୁ ବିଶ୍ବସ୍ତରୀୟ ଚାପ ସତ୍ତ୍ବେ ଲୋକଙ୍କୁ ମହଙ୍ଗା ପେଟ୍ରୋଲ ଓ ଡିଜେଲ ଭାର ବହନ କରିବାକୁ ପଡ଼ିବନି ବୋଲି ଆମ ସରକାର ନିଶ୍ଚିତ କରିଛନ୍ତି। ଏହା ବ୍ୟତୀତ, ଆମେ ଗରିବ ଓ ମଧ୍ୟବିତ୍ତ ଶ୍ରେଣୀର ଲୋକଙ୍କୁ ମୁଦ୍ରାସ୍ଫୀତିର ପ୍ରତିକୂଳ ପ୍ରଭାବରୁ ରକ୍ଷା କରିଛୁ। ମୁଦ୍ରାସ୍ଫୀତିର ମୁକାବିଲା ପାଇଁ ଆମେ ସେମାନଙ୍କୁ ସାମାଜିକ ଓ ଅର୍ଥନୈତିକ ଉପକରଣ ଯୋଗାଇ ସଶକ୍ତ କରିଛୁ। ସେହିପରି, ସ୍ବଳ୍ପମୂଲ୍ୟର ଏଲ୍ଇଡି ବଲ୍‌ବ ଯୋଗୁଁ ପ୍ରତ୍ୟେକ ପରିବାର ପାଇଁ ହାରାହାରି ବିଦ୍ୟୁତ୍ ବିଲ ହ୍ରାସ ପାଇଛି। ଆଜି ୭ ଲକ୍ଷ ଟଙ୍କା ପର୍ଯ୍ୟନ୍ତ କୌଣସି ଆୟକର ନାହିଁ। ଅର୍ଥାତ୍ ଲୋକେ ହଜାରେ ଟଙ୍କା ସଞ୍ଚୟ କରିପାରୁଛନ୍ତି ଯାହା ଅନ୍ୟଥା ଆୟକର ଆଡ଼କୁ ଯାଇଥା’ନ୍ତା। ଆୟୁଷ୍ମାନ୍ ଭାରତ ଯୋଜନା ଅଧୀନରେ ମାଗଣା ଚିକିତ୍ସା ଯୋଗୁଁ ପରିବାର ଉପରେ ୫ ଲକ୍ଷ ଟଙ୍କା ଯାଏ ସ୍ବାସ୍ଥ୍ୟ ବୋଝ ହ୍ରାସ ପାଇଛି। ଆଗରୁ ବଜାରରେ ମିଳୁଥିବା ୧୦୦ ଟଙ୍କାର ଔଷଧ ଏବେ ଜନ ଔଷଧି ଯୋଜନାରେ ମାତ୍ର ୧୦ ଟଙ୍କା କି ୨୦ ଟଙ୍କାରେ ଉପଲବ୍ଧ ହୋଇପାରୁଛି। କୋଭିଡ ବେଳରୁ ୮୦ କୋଟି ଲୋକ ମାଗଣା ଖାଦ୍ୟଶସ୍ୟ ଗ୍ରହଣ କରୁଛନ୍ତି ଯାହା ସେମାନଙ୍କ ଜୀବନକୁ ବହୁତ ସହଜ କରିଦେଇଛି। ନିକଟରେ ହୋଇଥିବା ଏକ ସର୍ବେକ୍ଷଣରୁ ଜଣାପଡ଼ିଛି କି, ଗ୍ରାମାଞ୍ଚଳର ପ୍ରଥମ ପରିବାରମାନେ ସେମାନଙ୍କ ମାସିକ ଖର୍ଚ୍ଚର ୫୦ ପ୍ରତିଶତରୁ କମ୍ ଅଣଖାଦ୍ୟ ବାବଦରେ ଖର୍ଚ୍ଚ କରୁଛନ୍ତି, ଯାହା ସେମାନଙ୍କ ସମୃଦ୍ଧିରେ ବୃଦ୍ଧିକୁ ଦର୍ଶାଉଛି। ଆଜି ଭାରତରେ ମାତ୍ର ୧୦ ଟଙ୍କାରେ ୧ ଜିବି ଡାଟା ପରି ବିଶ୍ବର ସବୁଠୁ ଶସ୍ତା ଇଣ୍ଟରନେଟ୍ ସେବା ଉପଲବ୍ଧ। ୨୦୧୪ରେ ଏହା ୩୦୦ ଟଙ୍କା ହୋଇଥିବ। ଏହି ସ୍ବଳ୍ପ ମୂଲ୍ୟ ଡିଜିଟାଲ ଓ ଆର୍ଥିକ ଅନ୍ତର୍ଭୁକ୍ତ ସଂସ୍କାରକୁ ବ୍ୟାପକ ପରିମାଣରେ ବଢ଼ାଇବାକୁ ସାହାଯ୍ୟ କରିଛି।

ସମ୍ବାଦ: ଓଡ଼ିଶାର ଲୋକମାନଙ୍କ ପାଇଁ ମୋଦୀଙ୍କ ଗ୍ୟାରେଣ୍ଟିରେ କ’ଣ ରହିଛି?

ମୋଦୀ: ମୋର ଗ୍ୟାରେଣ୍ଟି ଓଡ଼ିଶାର ଗୌରବକୁ ପୁନର୍ଜୀବିତ କରୁଛି। କେବଳ ଭାରତରେ ନୁହେଁ, ବିଶ୍ବରେ ମଧ୍ୟ ଓଡ଼ିଶାର ସଂସ୍କୃତି ଓ ଭାଷାର ଗୌରବକୁ ପୁନଃସ୍ଥାପିତ କରୁଛି। ମୋର ଗ୍ୟାରେଣ୍ଟି ହେଉଛି ମହିଳା ନେତୃତ୍ବ ବିକାଶ। ମୋର ଗ୍ୟାରେଣ୍ଟି ହେଉଛି ଓଡ଼ିଶାର ଯୁବକମାନଙ୍କ ପାଇଁ ଅଭିବୃଦ୍ଧି ଓ ସୁଯୋଗ ଆଣିବା। ମୋର ଗ୍ୟାରେଣ୍ଟି ଓଡ଼ିଶାରେ ଅଧିକ ଶିଳ୍ପ, ପୁଞ୍ଜିନିବେଶ ଓ ଭିତ୍ତିଭୂମିକୁ ସ୍ବାଗତ କରୁଛି। ମୋର ଗ୍ୟାରେଣ୍ଟି ହେଉଛି ଦୁର୍ନୀତିମୁକ୍ତ ଓଡ଼ିଶା ଏବଂ ଚିଟ୍ ଫଣ୍ଡ୍ ଯୋଜନାରେ ହଜିଯାଇଥିବା ଟଙ୍କା ଫେରାଇ ଆଣିବା। ମୋର ଗ୍ୟାରେଣ୍ଟି ‘ପିଏମ୍ ସୂର୍ଯ୍ୟଘର, ମାଗଣା ବିଜୁଳି’ ଯୋଜନାରେ ଓଡ଼ିଶାବାସୀଙ୍କ ବିଦ୍ୟୁତ୍ ବିଲ୍‌କୁ ଶୂନକୁ ଆଣିବା। ୨୦୨୭ ସୁଦ୍ଧା ଓଡ଼ିଶାରେ ୨୫ ଲକ୍ଷ ଲକ୍ଷପତି ଦିଦି ସୃଷ୍ଟି କରିବା ହେଉଛି ମୋ’ ଗ୍ୟାରେଣ୍ଟି। ବିକଶିତ ଭାରତ ପାଇଁ ଏକ ବିକଶିତ ଓଡ଼ିଶା ହେଉଛି ମୋ’ ଗ୍ୟାରେଣ୍ଟି। ଆମର ସଂକଳ୍ପପତ୍ର ଓଡ଼ିଶାର ଉଜ୍ବଳ ଭବିଷ୍ୟତ ପାଇଁ ଏକ ରୋଡ୍-ମ୍ୟାପ୍ ପ୍ରସ୍ତୁତ କରିଛି। ଉଦାହରଣ ସ୍ବରୂପ, ଆମେ ଓଡ଼ିଶାର ଦୀର୍ଘ ଉପକୂଳର ସମ୍ଭାବନାକୁ ଖୋଜି ବାହାର କରିବାକୁ ଚାହୁଛୁ। ଆମର ଇସ୍ତାହାର ମତ୍ସ୍ୟଜୀବୀମାନଙ୍କୁ ଅତ୍ୟାଧୁନିକ ଜ୍ଞାନକୌଶଳ, ଆଧୁନିକ ପଦ୍ଧତି ଏବଂ ଗୁରୁତ୍ବପୂର୍ଣ୍ଣ ସୂଚନା ପ୍ରଦାନ କରିବାର ପ୍ରତିଶ୍ରୁତି ଦେଉଛି। ଆମ ଦୃଷ୍ଟିକୋଣରେ ଉତ୍ପାଦନ କ୍ଳଷ୍ଟର ପ୍ରତିଷ୍ଠା, ବୈଷୟିକ ଜ୍ଞାନକୌଶଳ, ଶୈବାଳ ଓ ମୁକ୍ତା ଚାଷକୁ ପ୍ରୋତ୍ସାହିତ କରିବା ଆଦି ରହିଛି।

ଆମର ଅନ୍ନଦାତା ହେଉଛନ୍ତି ଆମର ମୁଖ୍ୟ ପ୍ରାଥମିକତା ଏବଂ ଓଡ଼ିଶାର କୃଷକମାନେ ଦେଶର ଅନ୍ୟ କୃଷକମାନଙ୍କ ସହିତ ସମାନ ଭାବରେ ଏମ୍ଏସ୍‌ପି ଗ୍ରହଣ କରିବା ଆମେ ନିିଶ୍ଚିତ କରିବୁ। ଓଡ଼ିଶାରେ ଶୀତଳ ଭଣ୍ଡାର ପ୍ରତିଷ୍ଠା ଓ କୃଷି ପ୍ରକ୍ରିୟାକରଣ ୟୁନିଟ୍ ସ୍ଥାପନ ପାଇଁ ଆମେ ୩,୦୦୦ କୋଟିର ‘କୃଷି ସଂରକ୍ଷଣ କୋଷ’ ସ୍ଥାପନ କରିବୁ। ଆମ ସଂକଳ୍ପ ହେଉଛି ଓଡ଼ିଶାର ଗରିବମାନଙ୍କ ପାଇଁ ୧୫ ଲକ୍ଷ ଗୃହ ନିର୍ମାଣ କରିବା ଏବଂ ଡବଲ ଇଞ୍ଜିନ୍ ସରକାରର ଶହେ ଦିନ ଭିତରେ ଆୟୁଷ୍ମାନ ଭାରତ ଯୋଜନାକୁ କାର୍ଯ୍ୟକାରୀ କରି ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସୁବିଧା ଯୋଗାଇବା। ଓଡ଼ିଶାର ପ୍ରଗତିରେ ସିଧାସଳଖ ସହଯୋଗ କରୁଥିବା ଛୋଟ ବ୍ୟବସାୟ ଓ ଏମ୍ଏସ୍ଏମ୍ଇଗୁଡ଼ିକ ପାଇଁ ‘ଇଜ୍‌ ଅଫ୍ ଡୁଇଂ’ ନିଶ୍ଚିତ କରିବାକୁ ଆମେ ପ୍ରତିବଦ୍ଧ। ଆମ ଦୃଷ୍ଟିକୋଣରେ ଓଡ଼ିଶାକୁ ଏକ ଉଦ୍ୟୋଗ କେନ୍ଦ୍ରରେ ପରିଣତ ସହ ନିଜସ୍ବ ଜ୍ଞାନକୌଶଳରେ ୪ଟି ଆଇଟି ପାର୍କ ସ୍ଥାପନ କରିବା ମଧ୍ୟ ଅନ୍ତର୍ଭୁକ୍ତ।

ନିମ୍ନରେ ସାକ୍ଷାତକାରର କ୍ଲିପିଂ :

 Source: ସମ୍ବାଦ