ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନ୍ଫରେନ୍ସିଂ ବ୍ୟବସ୍ଥାରେ ଦ୍ୱିତୀୟ ଜାତୀୟ ଯୁବ ପାର୍ଲାମେଣ୍ଟ ଉତ୍ସବର ସମାବର୍ତ୍ତନ କାର୍ଯ୍ୟକ୍ରମରେ ଉଦ୍ବୋଧନ ଦେଇଛନ୍ତି । ସଂସଦର କେନ୍ଦ୍ରୀୟ କକ୍ଷରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ଅବସରରେ ପ୍ରଧାନମନ୍ତ୍ରୀ ମଧ୍ୟ ଉତ୍ସବର ୩ ଜଣ ଯୁବ ଜାତୀୟ ବିଜେତାଙ୍କ ମତାମତ ଶୁଣିଥିଲେ । ଏହି କାର୍ଯ୍ୟକ୍ରମରେ ଲୋକସଭା ବାଚସ୍ପତି, କେନ୍ଦ୍ର ଶିକ୍ଷାମନ୍ତ୍ରୀ ଏବଂ କେନ୍ଦ୍ର କ୍ରୀଡା ଓ ଯୁବ ବ୍ୟାପାର ରାଷ୍ଟ୍ରମନ୍ତ୍ରୀ ଉପସ୍ଥିତ ଥିଲେ । ସ୍ୱାମୀ ବିବେକାନନ୍ଦଙ୍କୁ ତାଙ୍କ ଜୟନ୍ତୀରେ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ ଯେ ସମୟର ପ୍ରବାହ ସତ୍ତ୍ୱେ ଆମର ଜାତୀୟ ଜୀବନରେ ସ୍ୱାମୀ ବିବେକାନନ୍ଦଙ୍କ ପ୍ରଭାବ ଓ ପ୍ରତିଷ୍ଠା ଅକ୍ଷୁଣ୍ଣ ରହିଛି । ଜାତୀୟତା ଓ ରାଷ୍ଟ୍ର ନିର୍ମାଣରେ ତାଙ୍କର ଦୃଷ୍ଟିକୋଣ ତଥା ଜନସାଧାରଣ ଓ ସମଗ୍ର ବିଶ୍ୱର ସେବା କରିବା ପାଇଁ ତାଙ୍କ ବାଣୀ ଏବେ ମଧ୍ୟ ଆମକୁ ଅନୁପ୍ରାଣିତ କରୁଛି । ବ୍ୟକ୍ତି ଓ ଅନୁଷ୍ଠାନ ପ୍ରତି ସ୍ୱାମୀଜୀଙ୍କ ଅବଦାନ ସଂପର୍କରେ ଆଲୋକପାତ କରି ପ୍ରଧାନମନ୍ତୀ କହିଥିଲେ ଯେ ଯେଉଁ ବ୍ୟକ୍ତିବିଶେଷ ସ୍ୱାମୀ ବିବେକାନନ୍ଦଙ୍କ ସଂସ୍ପର୍ଶରେ ଆସି ଅନୁଷ୍ଠାନମାନ ନିର୍ମାଣ କରିଥିଲେ ସେମାନେ ପରବର୍ତ୍ତୀ କାଳରେ ନୂଆ ଅନୁଷ୍ଠାନ ନିର୍ମାତାମାନଙ୍କୁ ସୃଷ୍ଟି କରିଥିଲେ । ଏହାଦ୍ୱାରା ଏକ ସଦ୍ଚକ୍ର ସୃଷ୍ଟି ହୋଇଥିଲା ; ଯେଉଁଥିରେ ବ୍ୟକ୍ତିକୁ ନେଇ ଅନୁଷ୍ଠାନ ଗଠିତ ହୋଇଥିଲା ଏବଂ ଅନୁଷ୍ଠାନ ଉତ୍ତମ ବ୍ୟକ୍ତି ନିର୍ମାଣ କରୁଥିଲା । ଏହା ଭାରତର ଏକ ବିରାଟ ବଳ । ଏ ବେକାର ଭାରତରେ ଉତ୍ତମ କଂପାନୀ ନିର୍ମାଣ ଏବଂ ସେହି କଂପାନୀ ମାଧ୍ୟମରେ କିପରି ଉତ୍ତମ ବ୍ୟକ୍ତିବିଶେଷ ତିଆରି ହେଉଛନ୍ତି ତାହାର ଉଦାହରଣ ଦେଇ ସେ ଏହି ସଦ୍ଚକ୍ରର ବ୍ୟାଖ୍ୟା କରିଥିଲେ । ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ ଯେ ନୂଆ ଶିକ୍ଷାନୀତିରୁ ଯୁବ ସମାଜ ନମନୀୟତା, ଅଭିନବତା ଓ ନବସୃଜନକାରୀ ଶିକ୍ଷା ଢାଞ୍ଚା ଶିଖିବାର ସୁଯୋଗ ନେବା ଉଚିତ । ଆମେ ଦେଶରେ ଏପରି ଏକ ପରିବେଶ ସୃଷ୍ଟି କରିବାକୁ ଚେଷ୍ଟିତ; ଯଦ୍ଦ୍ୱାରା କୌଣସି ଯୁବକଯୁବତୀ ବିଦେଶମୁହାଁ ହେବେ ନାହିଁ ।
ପ୍ରଧାନମନ୍ତ୍ରୀ କହିଥିଲେ ଯେ ସ୍ୱାମୀ ବିବେକାନନ୍ଦ ରାଷ୍ଟ୍ର ଗଠନର ମୂଳଦୁଆ ପାଇଁ ଯେଉଁ ଯୁବ ସମାଜ ଚାହୁଁଥିଲେ ସେଥିରେ ସେ ପ୍ରତ୍ୟେକଙ୍କଠାରେ ବିଶ୍ୱାସ, ସ୍ୱଚ୍ଛ ହୃଦୟ, ନିର୍ଭୀକତା, ଭୟଶୂନ୍ୟତା ଓ ସାହସ ଦେଖୁଥିଲେ । ଏହି ଅବସରରେ ସେ ଯୁବ ସମାଜକୁ ସ୍ୱାମୀ ବିବେକାନନ୍ଦଙ୍କ ମନ୍ତ୍ର ପ୍ରଦାନ କରିଥିଲେ । ସେ କହିଥିଲେ ଯେ ସ୍ୱାମୀଜୀ ଶାରିରୀକ ସୁସ୍ଥତା ପାଇଁ ଲୁହାର ମାଂସପେଶୀ ଓ ଇସ୍ପାତର ସ୍ନାୟୁ କଥା କହୁଥିଲେ । ସେହିଭଳି ବ୍ୟକ୍ତିତ୍ୱର ବିକାଶ ପାଇଁ ସ୍ୱାମୀଜୀଙ୍କ ମନ୍ତ୍ର ଥିଲା ନିଜ ଉପରେ ବିଶ୍ୱାସ କରିବା ବା ଆତ୍ମବିଶ୍ୱାସ । ସେହିଭଳି ନେତୃତ୍ୱ ଓ ଦଳଗତ କାର୍ଯ୍ୟ ପାଇଁ ସ୍ୱାମୀଜୀଙ୍କ ମନ୍ତ୍ର ଥିଲା ସମସ୍ତଙ୍କ ଉପରେ ବିଶ୍ୱାସ ରଖିବା ।
ଏହି ଅବସରରେ ପ୍ରଧାନମନ୍ତ୍ରୀ ଯୁବ ସମାଜକୁ ଆହ୍ୱାନ ଦେଇ କହିଥିଲେ ଯେ ସେମାନେ ରାଜନୀତିରେ ନିଃସ୍ୱାର୍ଥପର ଓ ଗଠନମୂଳକ ଅବଦାନ ରଖିବାକୁ ଆଗେଇ ଆସିବା ଉଚିତ । ସେ କହିଥିଲେ ଯେ ଏବେ ସାଧୁ, ସଚ୍ଚୋଟ ଲୋକମାନେ ଜନସେବା ପାଇଁ ସୁଯୋଗ ପାଉଛନ୍ତି । ରାଜନୀତି ନୀତିହୀନ ଓ ନିର୍ଲଜଙ୍କ କାର୍ଯ୍ୟ ବୋଲି ଯେଉଁ ପୁରୁଣା ବିଚାର ରହିଛି ତାହାକୁ ପରିବର୍ତ୍ତନ କରିବା ପାଇଁ କାମ କରିବାକୁ ସେ ଯୁବ ସମାଜକୁ ଆହ୍ୱାନ ଜଣାଇଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ଏବେ ସଚ୍ଚୋଟତା, ସାଧୁତା ଓ ପ୍ରଦର୍ଶନ ରାଜନୀତିରେ ଗୁରୁତ୍ୱ ପାଉଛି । ଏହି ପ୍ରସଙ୍ଗରେ ସେ ପାରିବାରିକ ରାଜନୀତି ଓ ବଂଶବାଦ ସଂପର୍କରେ ଦୀର୍ଘ ଆଲୋଚନା କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଯେଉଁ ରାଜନେତାମାନେ ଦୁର୍ନୀତିକୁ ଉତ୍ତରାଧିକାରୀ ସୂତ୍ରରେ ପାଇ ରାଜନୀତିରେ ରହିଛନ୍ତି ସେହିମାନଙ୍କ ପାଇଁ ହିଁ ଆଜି ଜନସାଧାରଣଙ୍କ ନିମନ୍ତେ ଭ୍ରଷ୍ଟାଚାର ଏକ ବୋଝ ପାଲଟିଛି । ରାଜନୀତିରୁ ଏହି ବଂଶବାଦର ମୂଳୋତ୍ପାଟନ ପାଇଁ ସେ ଯୁବ ସମାଜକୁ ଆହ୍ୱାନ ଜଣାଇଛନ୍ତି । ଏହି ବଂଶବାଦୀ ବ୍ୟବସ୍ଥା ଓ ପାରିବାରିକ ରାଜନୀତି ଦ୍ୱାରା ଅଯୋଗ୍ୟତା ସୃଷ୍ଟି ହୁଏ ଏବଂ ଗଣତାନ୍ତ୍ରିକ ବ୍ୟବସ୍ଥାରେ ଏକଚ୍ଛତ୍ରବାଦ ମୁଣ୍ଡ ଟେକେ । ଏହି ବ୍ୟବସ୍ଥାର ବ୍ୟକ୍ତିବିଶେଷ ପରିବାରର ରାଜନୀତିକୁ ସୁରକ୍ଷିତ କରନ୍ତି ଏବଂ ରାଜନୀତିରେ ବଂଶର ସୁରକ୍ଷା ଦିଗରେ ଯତ୍ନବାନ ହୋଇଥାନ୍ତି । ‘ଆଜି ସାଙ୍ଗିଆ ଓ ପରିବାରର ନାମକୁ ଆଶାବାଡି କରି ନିର୍ବାଚନ ଜିତିବା ନୀତିର ଅବସାନ ଘଟିଛି । ତଥାପି ପାରିବାରିକ ରାଜନୀତି ବେମାରିର ଅବସାନ ଘଟିନାହିଁ । ରାଜନୈତିକ ପରିବାର ନିଜକୁ ଓ ପରିବାରକୁ ଅଗ୍ରାଧିକାର ଦିଏ । ସ୍ୱାର୍ଥରକ୍ଷାରେ ମାତି ରାଷ୍ଟ୍ରର ସ୍ୱାର୍ଥକୁ ପଦଦଳିତ କରେ । ଏହା ହିଁ ଭାରତରେ ସାମାଜିକ ଦୁର୍ନୀତିର ପ୍ରମୁଖ କାରଣ ବୋଲି ପ୍ରଧାନମନ୍ତ୍ରୀ କହିଛନ୍ତି ।
