ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ନୂଆଦିଲ୍ଲୀଠାରେ ସିଏସଆଇଆର ସୋସାଇଟି ବୈଠକ ଅନୁଷ୍ଠିତ ହୋଇଯାଇଛି ।
ଏହି ଅବସରରେ ପ୍ରଧାନମନ୍ତ୍ରୀଙ୍କୁ ସିଏସଆଇଆର ଦ୍ଵାରା କରାଯାଇଥିବା କାର୍ଯ୍ୟ ସମ୍ପର୍କରେ ସମ୍ୟକ ସୂଚନା ଦିଆଯାଇଥିଲା । ସେ ହାତକୁ ନିଆଯାଇଥିବା କାର୍ଯ୍ୟକୁ ପ୍ରଶଂସା କରିବା ସହିତ ଭବିଷ୍ୟତର କାର୍ଯ୍ୟଖସଡା ପ୍ରସ୍ତୁତି ଲାଗି ପରାମର୍ଶ ଦେଇଥିଲେ ।
ପ୍ରଧାନମନ୍ତ୍ରୀ ଭର୍ଚୁଆଲ ଲାବ ବିକଶିତ କରିବା ଉପରେ ଗୁରୁତ୍ଵାରୋପ କରିଥିଲେ, ଯାହାଦ୍ୱାରା ଦେଶର ପ୍ରତ୍ୟେକ କୋଣରେ ଥିବା ବିଭିନ୍ନ ବର୍ଗର ଛାତ୍ରଛାତ୍ରୀଙ୍କ ନିକଟରେ ବିଜ୍ଞାନ ଭଲଭାବେ ପହଞ୍ଚିପାରିବ । ଯୁବ ଛାତ୍ରଛାତ୍ରୀଙ୍କୁ ବିଜ୍ଞାନଆଡକୁ ଆକୃଷ୍ଟ କରିବାର ଆବଶ୍ୟକତା ଏବଂ ପରବର୍ତ୍ତୀ ପିଢିଠାରେ ବୈଜ୍ଞାନିକ ସୂକ୍ଷ୍ମଦର୍ଶିତାକୁ ଆହୁରି ସୁଦୃଢ କରିବାର ଆବଶ୍ୟକତା ଉପରେ ସେ ଆଲୋକପାତ କରିଥିଲେ । ବିଶ୍ଵର ବିଭିନ୍ନ ପ୍ରାନ୍ତରେ କାର୍ଯ୍ୟ କରୁଥିବା ଭାରତୀୟଙ୍କ ମଧ୍ୟରେ ଗବେଷଣା ଓ ବିକାଶ ପ୍ରକଳ୍ପରେ ସହଭାଗିତା ବୃଦ୍ଧି ସମ୍ପର୍କରେ ସେ ପରାମର୍ଶ ଦେଇଥିଲେ ।
ଭାରତର ମହାତ୍ଵାକାଂକ୍ଷୀ ଆବଶ୍ୟକତା ପୂରଣ କରିବା ଲାଗି ବୈଜ୍ଞାନିକମାନଙ୍କୁ ଆହ୍ଵାନ କରି ସେ କହିଥିଲେ ଯେ, ଦେଶର ବାସ୍ତବିକ ସାମାଜିକ ପ୍ରସଙ୍ଗ ଯଥା – କୃଷି ଉତ୍ପାଦର ମୂଲ୍ୟବୃଦ୍ଧି, ଅପପୃଷ୍ଟି ଏବଂ ଜଳ ସଂରକ୍ଷଣ ଦିଗରେ ସିଏସଆଇଆର ଗୁରୁତ୍ଵାରୋପ କରିବା ଆବଶ୍ୟକ ।
5ଜି, ଆର୍ଟିଫିସିଆଲ ଇଣ୍ଟେଲିଜେନ୍ସ ଏବଂ ଅକ୍ଷୟ ଶକ୍ତି ସଞ୍ଚୟ ପାଇଁ ଶସ୍ତା ଏବଂ ଦୀର୍ଘସ୍ଥାୟୀ ବ୍ୟାଟେରୀ ଆଦି ନୂଆ ଆହ୍ଵାନଗୁଡିକର ମୁକାବିଲା କରିବା ଲାଗି ବୈଜ୍ଞାନିକମାନେ ଗୁରୁତ୍ଵାରୋପ କରିବା ଉଚିତ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ବିଶ୍ଵସ୍ତରୀୟ ଉତ୍ପାଦ ପ୍ରସ୍ତୁତ କରିବା ଲାଗି ପାରମ୍ପରିକ ଜ୍ଞାନ ଓ ଆଧୁନିକ ବିଜ୍ଞାନର ମିଶ୍ରଣର ଆବଶ୍ୟକତା ଉପରେ ସେ ଆଲୋକପାତ କରିଥିଲେ । ସେ ମଧ୍ୟ ନବୋନ୍ମେଷର ବ୍ୟବସାୟିକରଣ ଆବଶ୍ୟକତା ଉପରେ ଜୋର ଦେଇଥିଲେ ।
ସାଧାରଣ ଜନତାଙ୍କ ଜୀବନଧାରଣ ମାନରେ ସୁଧାର ଆଣିବା ଲାଗି ବୈଜ୍ଞାନିକ ସମୁଦାୟ କାର୍ଯ୍ୟ କରିବା ଉଚିତ ବୋଲି ପ୍ରଧାନମନ୍ତ୍ରୀ କହିଥିଲେ ।
