ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଦ୍ୱୀପାଂଚଳଗୁଡିକର ସାମଗ୍ରୀକ ବିକାଶ ପାଇଁ ହୋଇଥିବା ଅଗ୍ରଗତି ସମୀକ୍ଷା କରିଥିଲେ ।
ଜୁନ ପହିଲା, 2017ରେ କେନ୍ଦ୍ର ସରକାର ଦ୍ୱୀପାଞ୍ଚଳ ବିକାଶ ସଂସ୍ଥା ଗଠନ କରିଥିଲେ । 26ଟି ଦ୍ୱୀପକୁ ସାମଗ୍ରୀକ ବିକାଶ ପାଇଁ ଚୟନ କରାଯାଇଥିଲା ।
ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରକଳ୍ପ, ଡିଜିଟାଲ ଯୋଗାଯୋଗ, ସବୁଜ ଶକ୍ତି, ଲବଣ ଶୋଧନ ପ୍ଲାଂଟ, ବର୍ଜ୍ୟ ପରିଚାଳନା, ମତ୍ସ୍ୟଚାଷକୁ ପ୍ରୋତ୍ସାହନ ଏବଂ ପର୍ଯ୍ୟଟନ ଆଧାରିତ ପ୍ରକଳ୍ପ ସମେତ ସାମଗ୍ରୀକ ବିକାଶର ଉପାଦାନ ସମ୍ପର୍କରେ ନୀତି ଆୟୋଗ ଏକ ପ୍ରଦର୍ଶନ କରିଥିଲେ ।
ଆଣ୍ଡାମାନ ନିକୋବର ଦ୍ୱୀପରେ ହୋଇଥିବା କାର୍ଯ୍ୟର ସମୀକ୍ଷା କରି ପ୍ରଧାନମନ୍ତ୍ରୀ ପର୍ଯ୍ୟଟନ ବିକାଶ ପାଇଁ ଚିହ୍ନଟ ହୋଇଥିବା କ୍ଷେତ୍ରରେ ପର୍ଯ୍ୟଟନ ଆଧାରିତ ଇକୋ ସିଷ୍ଟମ ବିକଶିତ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । ଶକ୍ତି କ୍ଷେତ୍ରରେ ଦ୍ୱୀପଗୁଡ଼ିକୁ ଆତ୍ମନିର୍ଭରଶୀଳ କରିବା ଲାଗି ସେ ଆହ୍ୱାନ କରିଥିଲେ ଯାହା ସୌର ଶକ୍ତି ଉପରେ ଆଧାରିତ ହୋଇଥିବ ।
ଆଣ୍ଡାମାନ ଏବଂ ନିକୋବର ଦ୍ୱୀପକୁ ଯାଉଥିବା ବିଦେଶୀଙ୍କ ପାଇଁ ନିଷିଦ୍ଧାଂଚଳରେ ପ୍ରବେଶ ଅନୁମତି ଲାଗି ସ୍ଵରାଷ୍ଟ୍ର ମନ୍ତ୍ରଣାଳୟ ନେଇଥିବା ନିଷ୍ପତ୍ତି ସମ୍ପର୍କରେ ମଧ୍ୟ ପ୍ରଧାନମନ୍ତ୍ରୀଙ୍କୁ ବିସ୍ତୃତ ସୂଚନା ଦିଆଯାଇଥିଲା । ଦକ୍ଷିଣ ପୂର୍ବ ଏସିଆ ସହିତ ଏସବୁ ଦ୍ୱୀପଗୁଡ଼ିକର ବ୍ୟାପକ ଯୋଗାଯୋଗ ବିଷୟରେ ମଧ୍ୟ ଆଲୋଚନା କରାଯାଇଥିଲା ।
ଲାକ୍ଷାଦ୍ୱୀପରେ ବିକାଶମୂଳକ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା ସମୟରେ ପ୍ରଧାନମନ୍ତ୍ରୀଙ୍କୁ ଟୁନା ମାଛ ଚାଷ ଏବଂ “ଲାକ୍ଷାଦ୍ୱୀପ ଟୁନା”କୁ ସ୍ୱତନ୍ତ୍ର ପରିଚୟ ଦେବା ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ଅବଗତ କରାଯାଇଥିଲା । ସ୍ୱଚ୍ଛତା ଦିଗରେ ଲାକ୍ଷାଦ୍ୱୀପର ପଦକ୍ଷେପକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ ।
ଉଭୟ ଆଣ୍ଡାମାନ ଓ ନିକୋବର ଦ୍ୱୀପସମୂହ ଏବଂ ଲାକ୍ଷାଦ୍ୱୀପରେ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରକଳ୍ପର ବିକାଶ ସମ୍ପର୍କରେ ମଧ୍ୟ ଆଲୋଚନା କରାଯାଇଥିଲା । ସାମୁଦ୍ରିକ ଶୈବାଳ ଏବଂ କୃଷି କ୍ଷେତ୍ର ପାଇଁ ସହାୟକ ଅନ୍ୟ କାର୍ଯ୍ୟକ୍ରମ ସମ୍ପର୍କରେ ରହିଥିବା ସମ୍ଭାବନାକୁ ଉଜାଗର କରିବା ଲାଗି ପ୍ରଧାନମନ୍ତ୍ରୀ ସମ୍ପୃକ୍ତ ଅଧିକାରୀମାନଙ୍କୁ ଆଦେଶ ଦେଇଥିଲେ ।
ଏହି ବୈଠକରେ ସ୍ୱରାଷ୍ଟ୍ରମନ୍ତ୍ରୀ ଶ୍ରୀ ରାଜନାଥ ସିଂ, ଆଣ୍ଡାମାନ ଏବଂ ନିକୋବର ଦ୍ୱୀପ ସମୂହ ତଥା ଲାକ୍ଷାଦ୍ୱୀପର ରାଜ୍ୟପାଳଗଣ, ନୀତି ଆୟୋଗ ମୁଖ୍ୟ କାର୍ଯ୍ୟନିର୍ବାହୀ ଏବଂ କେନ୍ଦ୍ର ସରକାରଙ୍କ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
