ମହାମହିମ ରାଷ୍ଟ୍ରପତି ଡାନୀ ଫୌରେ, ସିସିଲି
ପ୍ରତିନିଧି ଦଳର ସମ୍ମାନନୀୟ ସଦସ୍ୟଗଣ
ଗଣମାଧ୍ୟମର ବନ୍ଧୁ,
ରାଷ୍ଟ୍ରପତି ଫୌରେ ଏବଂ ତାଙ୍କ ସହ ଆସିଥିବା ପ୍ରତିନିଧିଦଳକୁ ସ୍ୱାଗତ କରିବା ମୋ ପାଇଁ ଅତ୍ୟନ୍ତ ସୌଭାଗ୍ୟର ବିଷୟ । 2015ରେ ମୋର ସିସିଲି ଗସ୍ତ, ଯାହା ଭାରତ ମହାସାଗର କ୍ଷେତ୍ରକୁ ମୋର ପ୍ରଥମ ଯାତ୍ରା ଥିଲା, ସେ ସମ୍ପର୍କରେ ମୁଁ ଏବେ ମନେ ପକାଇପାରୁଛି । ସେହି ବର୍ଷ ତତ୍କାଳୀନ ରାଷ୍ଟ୍ରପତି ଜେମ୍ସ ମିଶେଲ୍ସ ମଧ୍ୟ ଭାରତ ଗସ୍ତରେ ଆସିଥିଲେ ।
ଏହି ଯାତ୍ରା ଆମର ଘନିଷ୍ଠ ରଣନୈତିକ ଭାଗିଦାରୀ ଲାଗି ଆମର ପ୍ରତିବଦ୍ଧତାକୁ ଦର୍ଶାଉଛି । ଜୁନ 1976ରେ ସିସିଲି ସ୍ୱାଧୀନତା ହେବା ପରେ ଆମେ ଦୁଇ ଗଣତାନ୍ତ୍ରିକ ଦେଶ ମଧ୍ୟରେ ସ୍ୱତନ୍ତ୍ର ସମ୍ପର୍କ ରହିଆସିଛି । ଆଜି ଭାରତ ଏବଂ ସିସିଲି ପରସ୍ପରର ଗୁରୁତ୍ୱପୂର୍ଣ୍ଣ ରଣନୈତିକ ଭାଗୀଦାର ଅଟନ୍ତି । ଆମେ ଦୁଇ ଦେଶର ଗଣତନ୍ତ୍ରର ମୂଲ୍ୟବୋଧକୁ ସମର୍ଥନ କରିଥାଉ ଏବଂ ଭାରତୀୟ ମହାସାଗରରେ ଶାନ୍ତି, ସୁରକ୍ଷା ଏବଂ ସ୍ଥିରତାକୁ ବଜାୟ ରଖି ଜିଓ-ଷ୍ଟ୍ରାଟେଜିକ ଭିଜନରେ ମଧ୍ୟ ସମାନ ରୂପରେ ଭାଗୀ ହେଉଛୁ ।
ରାଷ୍ଟ୍ରପତି ଫୌରେ ଏବଂ ମୋ ମଧ୍ୟରେ ଆଜି ଆଲୋଚନା ସଫଳ ଥିଲା । ସିସିଲି ଆଫ୍ରିକାରେ ଉଚ୍ଚ ମାନବୀୟ ବିକାଶ ସୂଚକାଙ୍କ ହାସଲ କରିଛି ଏବଂ ନୀଳ ଅର୍ଥବ୍ୟବସ୍ଥାର ବିଶ୍ୱ ନେତୃତ୍ୱ ମଧ୍ୟରୁ ଅନ୍ୟତମ ହୋଇ ଉଭା ହୋଇଛି । ମୁଁ ରାଷ୍ଟ୍ରପତି ଫୌରେଙ୍କୁ ଏହି ଉପଲବ୍ଧୀ ପାଇଁ ଅନେକ ଅଭିନନ୍ଦନ ଜଣାଉଛି ।
ଭାରତ ଏବଂ ସିସିଲି ଭାରତ ମହାସାଗର କ୍ଷେତ୍ର ସହ ଯୋଡ଼ି ହୋଇଛନ୍ତି । ଆମ ନାଗରିକଙ୍କ ସମୃଦ୍ଧି ଲାଗି ସୁରକ୍ଷିତ ସାମୁଦ୍ରୀକ ପରିବେଶରେ ସାମୁଦ୍ରିକ ଅର୍ଥବ୍ୟବସ୍ଥାର ନିରନ୍ତର ବିକାଶ ଗୁରୁତ୍ୱପୂର୍ଣ୍ଣ ଅଟେ । ପାରମ୍ପରିକ ଏବଂ ଅଣ ପାରମ୍ପରିକ ବିପଦର ସଫଳତାପୂର୍ବକ ମୁକାବିଲା କରି ହିଁ ଆମେ ମହାସାଗର ଦ୍ଵାରା ପ୍ରଦତ୍ତ ସୁଯୋଗର ଲାଭ ଉଠାଇପାରିବା । ଆଜି ଆମର ଆଲୋଚନାରେ, ଆମେ ସମୁଦ୍ର ଆଧାରିତ ନୀଳ ଅର୍ଥବ୍ୟବସ୍ଥାର ସମ୍ପୂର୍ଣ୍ଣ ଲାଭ ଉଠାଇବା ଦିଗରେ ମିଳିତ ଭାବେ କାର୍ଯ୍ୟ କରିବା ଲାଗି ନିଜର ପ୍ରତିବଦ୍ଧତାକୁ ଦୋହରାଉଛୁ । ଆମ ମଧ୍ୟରେ ସାମୁଦ୍ରିକ ଆହ୍ୱାନର ମୁକାବିଲା ଲାଗି ସହଯୋଗ ଉପରେ ଗଭୀର ରଣନୈତିକ ବୁଝାମଣା ରହିଛି ।
ଘନିଷ୍ଠ ଭାଗୀଦାର ରୂପରେ ଏହା ଆମର ଆପୋସ ଉତ୍ତରଦାୟିତ୍ୱ ଯେ ଆମେ ନିଜ ଏକାଧିକାର ସାମୁଦ୍ରିକ ଆର୍ଥିକ ପରିସୀମା ଏବଂ ଉପକୂଳ କ୍ଷେତ୍ରର ଆଖାପାଖରେ ସାମୂହିକ ସାମୁଦ୍ରିକ ସୁରକ୍ଷା ସୁନିଶ୍ଚିତ କରିବା । ଆମକୁ ଜଳଦସ୍ୟୁ, ଡ୍ରଗ୍ସ ଏବଂ ମାନବ ଚାଲାଣ ଓ ସାମୁଦ୍ରିକ ସମ୍ବଳର ଅବୈଧ ଶୋଷଣ ଭଳି ଅନ୍ତର୍ଜାତୀୟ ଅପରାଧରୁ ବିପଦ ରହିଛି । ଏହା ବିରୋଧରେ ଆମକୁ ନିଜ ସତର୍କତା ଏବଂ ସହଯୋଗ ବଢ଼ାଇବାକୁ ହେବ । ସିସିଲିକୁ ଏହାର ପ୍ରତିରକ୍ଷା ସାମର୍ଥ୍ୟ ଏବଂ ସାମୁଦ୍ରିକ ଭିତ୍ତିଭୂମିକୁ ସୁଦୃଢ଼ କରିବା ଏବଂ ପ୍ରତିରକ୍ଷା ବାହିନୀର କ୍ଷମତା ବଢ଼ାଇବାରେ ସହାୟତା ଯୋଗାଇ ଦେବାକୁ ଭାରତ ପ୍ରତିବଦ୍ଧ ଅଟେ । ଏହାଦ୍ୱାରା ସିସିଲି ପାରମ୍ପରିକ ଏବଂ ଅଣପାରମ୍ପରିକ ଉଭୟ ପ୍ରକାରର ସାମୁଦ୍ରିକ ଆହ୍ୱାନଗୁଡ଼ିକର ପ୍ରଭାବୀ ମୁକାବିଲା କରିପାରିବ ଏବଂ ସାମୁଦ୍ରିକ ସମ୍ବଳର ସୁରକ୍ଷା କରିପାରିବ । ଏ ସନ୍ଦର୍ଭରେ ମୁଁ ସିସିଲିର ପ୍ରତିରକ୍ଷା ଲାଗି 100 ନିୟୁତ ଆମେରିକୀୟ ଡଲାର ଋଣ ଦେବା ଲାଗି ଘୋଷଣା କରି ଆନନ୍ଦ ପ୍ରକାଶ କରୁଛି । ଏହି ଋଣ ଦ୍ୱାରା ସିସିଲିକୁ ନିଜର ଗସ୍ତ ସମୟରେ ମୁଁ ଯେଉଁ ଅନ୍ୟ ଡୋର୍ନିଅର ଏଆରକ୍ରାଫ୍ଟ ପାଇଁ ପ୍ରତିଶ୍ରୁତି ଦେଇଥିଲି ତାହା କାଲି ଅର୍ପଣ କରିବା ଲାଗି ପ୍ରସ୍ତୁତ । ଏହାର ମଡେଲ ଏବେ ଆପଣମାନଙ୍କ ସାମ୍ନାରେ ରଖାଯାଇଛି । ଏହା 29 ଜୁନରେ ସିସିଲି ଜାତୀୟ ଦିବସ ସମାରୋହରେ ଭାଗ ନେବା ଲାଗି ଠିକ ସମୟରେ ସେଠାରେ ପହଞ୍ଚାଯିବ ।
ଏଜାମ୍ପସନ ଦ୍ୱୀପ ପ୍ରକଳ୍ପ ସମ୍ପର୍କରେ ପାରସ୍ପରିକ ସ୍ୱାର୍ଥ ଆଧାରରେ ମିଳିମିଶି କାମ କରିବା ଲାଗି ଆମେ ସହମତ ଅଟୁ । ସାମୁଦ୍ରିକ ଦିଗ ନିର୍ଣ୍ଣୟ ଚାର୍ଟର ଉପଲବ୍ଧତାକୁ ସୁଧାରିବା ଲାଗି ହାଇଡ୍ରୋଗ୍ରାଫୀ ସର୍ବେକ୍ଷଣ କରିବା ଲାଗି ଆମେ ବ୍ୟାପକ ଭାବେ ସହଯୋଗ କରୁଛୁ । ଏହି ପ୍ରୟାସର ଅଂଶବିଶେଷ ସ୍ୱରୂପ ଆମେ ଆଜି ହ୍ୱାଇଟ ସିପିଂ ଡାଟାର ଆଦାନପ୍ରଦାନ ଲାଗି ଏକ ଏମଓୟୁ ସ୍ୱାକ୍ଷର କରିଛୁ । ଆଜି ଆମର ଆଲୋଚନା ସମୟରେ ମୁଁ ସିସିଲିର ରାଷ୍ଟ୍ରୀୟ ପ୍ରାଥମିକତା ପ୍ରକଳ୍ପ ଲାଗି ପ୍ରଭାବୀ ଯୋଗଦାନ ଜାରି ରଖିବା ପାଇଁ ଭାରତର ପ୍ରତିବଦ୍ଧତା ଦୋହରାଇଛି । ଏହି ପ୍ରକଳ୍ପ ଦ୍ୱାରା କେବଳ ସିସିଲିର ଅର୍ଥବ୍ୟବସ୍ଥାରେ ସୁଧାର ଆସିବ ନାହିଁ ବରଂ ଆମର ଆପୋସ ସମ୍ପର୍କ ବହୁ ଗୁଣରେ ପ୍ରଗାଢ଼ ହେବ ।
ସ୍ୱତନ୍ତ୍ର ଅନୁଦାନ ଅନ୍ତର୍ଗତ ସିସିଲିର ତିନୋଟି ସାଧାରଣ ଭିତ୍ତିଭୂମି ପ୍ରକଳ୍ପକୁ ଅର୍ଥ ଯୋଗାଣ ପାଇଁ ଭାରତ ପ୍ରସ୍ତୁତ ଅଛି । ଏଥିରେ ସରକାରୀ ଆବାସ, ନୂଆ ପୋଲିସ ମୁଖ୍ୟାଳୟ ଏବଂ ଆଟର୍ଣ୍ଣି ଜେନେରାଲଙ୍କ କାର୍ଯ୍ୟାଳୟ ସାମିଲ ରହିଛି ।
ଆଜି ଆମେ ଏକ ଏମଓୟୁରେ ସ୍ୱାକ୍ଷର କରିଛୁ, ଯାହାର ଅନ୍ତର୍ଗତ ସିସିଲିରେ କିଛି ଉଚ୍ଚ ମାନର, ସୁଦୃଶ୍ୟମାନ ଏବଂ ନାଗରିକ କୈନ୍ଦ୍ରିକ କ୍ଷୁଦ୍ର ବିକାଶ ପ୍ରକଳ୍ପ ଆରମ୍ଭ କରିବା ଲାଗି ଆମ ପକ୍ଷରୁ ଆର୍ଥିକ ସହାୟତା ଯୋଗାଇ ଦିଆଯିବ । ମୁଁ ରାଷ୍ଟ୍ରପତି ଫୌରେଙ୍କୁ ଆଶ୍ୱାସନା ଦେଇଛି ଯେ ଭାରତ ସିସିଲିର ସାଧାରଣ ନାଗରିକଙ୍କ ସମେତ ପ୍ରତିରକ୍ଷା କର୍ମୀଙ୍କ ଲାଗି ଆଇଟିଇସି ଏବଂ ଅନ୍ୟ କାର୍ଯ୍ୟକ୍ରମ ଅନ୍ତର୍ଗତ ପ୍ରଶିକ୍ଷଣ ପ୍ରଦାନ କରି ସିସିଲିର କ୍ଷମତା ବିକାଶକୁ ବଢ଼ାଇବା ଲାଗି ସବୁବେଳେ ପ୍ରତିଶ୍ରୁତିବଦ୍ଧ ରହିବ । ସିସିଲି ଦ୍ୱାରା ନିର୍ଦ୍ଧାରିତ କ୍ଷେତ୍ରରେ ଭାରତୀୟ ବିଶେଷଜ୍ଞ ସିସିଲିକୁ ଡେପୁଟେସନରେ ପଠାଯିବ । ସିସିଲିର ଅର୍ଥବ୍ୟବସ୍ଥାରେ ଭାରତୀୟ ସମୁଦାୟର ଯୋଗ ଆମ ପାଇଁ ଗର୍ବର ବିଷୟ ଅଟେ । ଆମ ଦୁଇ ଦେଶ ଏବଂ ଏଠାକାର ଲୋକମାନଙ୍କ ମଧ୍ୟରେ ସହଭାଗୀ ସଂସ୍କୃତି ଆମ ପାଇଁ ଗର୍ବର ବିଷୟ ଅଟେ ଏବଂ ଏହା ଆମ ସମ୍ପର୍କକୁ ପ୍ରଗାଢ଼ କରିବା ଲାଗି ଅନେକ ସମ୍ଭାବନା ପ୍ରଦାନ କରୁଛି । ଆମକୁ ଦୁଇଟି ବଡ଼ ଅଲଦାବ୍ରା କଇଁଛ ଉପହାର ସ୍ୱରୂପ ଦେବା ଲାଗି ମୁଁ ରାଷ୍ଟ୍ରପତି ଫୌରେଙ୍କୁ ଧନ୍ୟବାଦ ଜଣାଉଛି । ସିସିଲିରୁ ପୂର୍ବରୁ ମଧ୍ୟ ଏପରି ଦୀର୍ଘାୟୁ କଇଁଛ ଭାରତ ହାସଲ କରିଛି । ସେମାନେ ତିନି ଶତାବ୍ଦୀ ଧରି ସାକ୍ଷୀ ରହିଛନ୍ତି । ଭାରତରେ ଏହି ଜୀବ ଏବଂ ପ୍ରକୃତିର ଅନେକ ଜୀବଜନ୍ତୁ, ପଶୁ, ବୃକ୍ଷଲତାଙ୍କ ପ୍ରତି ଅତ୍ୟନ୍ତ ଶ୍ରଦ୍ଧା ଭାବ ରହିଛି । ଏହି ଦୀର୍ଘାୟୁ କଇଁଛ ଆଗକୁ ମଧ୍ୟ ଆମର ଚିରନ୍ତନ ମିତ୍ରତା ଏବଂ ଶୁଭ ପ୍ରଭାବର ପ୍ରତୀକ ହୋଇ ରହିବେ ।
ମୁଁ ପୁଣିଥରେ ରାଷ୍ଟ୍ରପତି ଫୌରେ ଏବଂ ତାଙ୍କ ପ୍ରତିନିଧିମଣ୍ଡଳଙ୍କୁ ହାର୍ଦ୍ଦିକ ସ୍ୱାଗତ କରୁଅଛି ଏବଂ ଆଶା କରୁଛି ଯେ ସେମାନଙ୍କ ଭାରତ ଗସ୍ତ ଆନନ୍ଦଦାୟକ ହେଉ । ମୁଁ ରାଷ୍ଟ୍ରପତି ଫୌରେ ଏବଂ ସିସିଲିର ଲୋକମାନଙ୍କୁ ସେମାନଙ୍କ ଜାତୀୟ ଦିବସ 29 ଜୁନ ପାଇଁ ମଧ୍ୟ ନିଜ ପକ୍ଷରୁ ଏବଂ 125 କୋଟି ଭାରତବାସୀଙ୍କ ତରଫରୁ ଶୁଭକାମନା ଜଣାଉଛି ।
