ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସ ଜରିଆରେ ବାରାଣସୀରେ ଆୟୋଜିତ ଇଣ୍ଡିଆ କାର୍ପେଟ ଏକ୍ସପୋକୁ ସମ୍ବୋଧିତ କରିଥିଲେ ।
ଭାରତ ଏବଂ ବିଦେଶରୁ ଆସିଥିବା ଅତିଥିମାନଙ୍କୁ ସ୍ୱାଗତ କରି ପ୍ରଧାନମନ୍ତ୍ରୀ କହିଥିଲେ ଯେ ପ୍ରଥମ ଥର ପାଇଁ ବାରାଣସୀର ଦୀନଦୟାଲ ହସ୍ତକଳା ସଂକୁଳ ଠାରେ ଇଣ୍ଡିଆ କାର୍ପେଟ ଏକ୍ସପୋ ଆୟୋଜନ କରାଯାଉଛି । କାର୍ପେଟ ଶିଳ୍ପ ପାଇଁ ବାରାଣସୀ, ଭଦୋଇ ଏବଂ ମିର୍ଜାପୁର ଗୁରୁତ୍ୱପୂର୍ଣ୍ଣ କେନ୍ଦ୍ର ବୋଲି ସେ ଉଲ୍ଲେଖ କରିଥିଲେ । ହସ୍ତଶିଳ୍ପ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗକୁ ପ୍ରୋତ୍ସାହିତ କରିବା ଲାଗି ନିଆଯାଉଥିବା ପଦକ୍ଷେପ ସମ୍ପର୍କରେ ସେ କହିଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତରେ ହସ୍ତଶିଳ୍ପର ଦୀର୍ଘ ପରମ୍ପରା ରହିଛି, ଏବଂ ବାରାଣସୀ ଏହି କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛି । ଏହି ପରିପ୍ରେକ୍ଷୀରେ ସେ ସ୍ଥାନୀୟ ଅଂଚଳର ବାସିନ୍ଦା ମହାନ ସନ୍ଥ କବି, କବୀରଙ୍କ ବିଷୟରେ ଉଲ୍ଲେଖ କରିଥିଲେ ।
ସେ କହିଥିଲେ ଯେ ସ୍ୱାଧୀନତା ସଂଗ୍ରାମ ଏବଂ ଆତ୍ମନିର୍ଭରଶୀଳତା ପାଇଁ ହସ୍ତଶିଳ୍ପ ପ୍ରେରଣାର ଉତ୍ସ ହୋଇ ଆସିଛି । ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ମହାତ୍ମା ଗାନ୍ଧୀଙ୍କ ସତ୍ୟାଗ୍ରହ, ଏବଂ ଚରଖା ବିଷୟରେ ଉଲ୍ଲେଖ କରିଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତ ଆଜି ଗାଲିଚାର ସର୍ବବୃହତ ଉତ୍ପାଦନକାରୀ ଏବଂ ବିଶ୍ୱ ବଜାରରେ ଏହାର ଅଂଶଧନ ପାଖାପାଖି 35 ପ୍ରତିଶତ ରହିଛି । ଏହି କ୍ଷେତ୍ରରେ ପ୍ରଭାବୀ ରପ୍ତାନୀ ପ୍ରଦର୍ଶନ ବିଷୟରେ ସେ କହିଥିଲେ । ସେ କହିଥିଲେ ମଧ୍ୟମ ବର୍ଗଙ୍କ ଉତ୍ଥାନ ଏବଂ ଗାଲିଚା ଶିଳ୍ପକୁ ଦିଆଯାଉଥିବା ସହଯୋଗ ଏହି କ୍ଷେତ୍ରର ଅଭିବୃଦ୍ଧି ଲାଗି ଦୁଇଟି ବଡ଼ କାରଣ । ସେ ଗାଲିଚା ପ୍ରସ୍ତୁତକାରୀମାନଙ୍କ ଦକ୍ଷତାର ପ୍ରଶଂସା କରିଥିଲେ, ଯାହା “ଭାରତ ନିର୍ମିତ ଗାଲିଚା”କୁ ଏକ ବଡ଼ ବ୍ରାଣ୍ଡରେ ପରିଣତ କରିପାରିଛି । ଗାଲିଚା ରପ୍ତାନୀକାରୀମାନଙ୍କୁ ଦିଆଯାଉଥିବା ଲଜିଷ୍ଟିକ୍ସ ସହଯୋଗ ଏବଂ ମାନ ସୁନିଶ୍ଚିତ କରିବା ଲାଗି ବିଶ୍ୱସ୍ତରୀୟ ପରୀକ୍ଷାଗାର ନିର୍ମାଣ କରାଯିବା ବିଷୟରେ ସେ କହିଥିଲେ । ସେ ମଧ୍ୟ ଅନ୍ୟ ସହାୟକ ପଦକ୍ଷେପ ବିଶେଷ କରି ଆଧୁନିକ ଲୁଗାବୁଣା ଯନ୍ତ୍ର ଏବଂ ଏହି କ୍ଷେତ୍ର ପାଇଁ ଉପଲବ୍ଧ ଋଣ ସୁବିଧା ବିଷୟରେ କହିଥିଲେ ।
ଗାଲିଚା ନିର୍ମାତାମାନଙ୍କ ଦକ୍ଷତା ଏବଂ କଠିନ ପରିଶ୍ରମକୁ ରାଷ୍ଟ୍ରର ଏକ ଶକ୍ତି ଭାବେ ସୁନିଶ୍ଚିତ କରିବା ଲାଗି କେନ୍ଦ୍ର ସରକାର ସମର୍ପିତ ବୋଲି ପ୍ରଧାନମନ୍ତ୍ରୀ କହିଥିଲେ ।
