ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀସ୍ଥିତ ଭାରତ ମଣ୍ଡପମରେ ନୀତି ଆୟୋଗ ପରିଚାଳନା ପରିଷଦର ଦଶମ ବୈଠକରେ ଅଧ୍ୟକ୍ଷତା କରିଛନ୍ତି। ଏଥିରେ 24ଟି ରାଜ୍ୟ ଏବଂ 7ଟି କେନ୍ଦ୍ରଶାସିତ ଅଞ୍ଚଳର ମୁଖ୍ୟମନ୍ତ୍ରୀ ଏବଂ ଉପରାଜ୍ୟପାଳମାନେ ଅଂଶଗ୍ରହଣ କରିଥିଲେ। ଚଳିତ ବର୍ଷର ବିଷୟବସ୍ତୁ ଥିଲା ବିକଶିତ ଭାରତ 2047 ପାଇଁ ବିକଶିତ ରାଜ୍ୟ। ପହଲଗାମ ଆତଙ୍କବାଦୀ ଆକ୍ରମଣରେ ପୀଡିତଙ୍କ ସ୍ମୃତିରେ ଏକ ମିନିଟର ନୀରବ ପ୍ରାର୍ଥନା କରାଯିବା ସହିତ ବୈଠକ ଆରମ୍ଭ ହୋଇଥିଲା।
ପ୍ରଧାନମନ୍ତ୍ରୀ କହିଥିଲେ ଯେ ଦେଶ ବିକଶିତ ଭାରତ ହେବା ପ୍ରତ୍ୟେକ ଭାରତୀୟଙ୍କ ଅଭିଳାଷ। ଏହା କୌଣସି ଦଳର ଏଜେଣ୍ଡା ନୁହେଁ, ବରଂ 140 କୋଟି ଭାରତୀୟଙ୍କ ଆକାଂକ୍ଷା। ସେ କହିଥିଲେ ଯେ ଯଦି ସମସ୍ତ ରାଜ୍ୟ ଏହି ଲକ୍ଷ୍ୟ ଦିଗରେ ମିଳିତ ଭାବେ କାର୍ଯ୍ୟ କରନ୍ତି, ତେବେ ଆମେ ଚମତ୍କାର ପ୍ରଗତି ହାସଲ କରିବୁ। ସେ ଏହା ମଧ୍ୟ କହିଥିଲେ ଯେ ଆମେ ପ୍ରତିଶ୍ରୁତିବଦ୍ଧ ହେବା ଉଚିତ ଯେ ପ୍ରତ୍ୟେକ ରାଜ୍ୟ, ପ୍ରତ୍ୟେକ ସହର, ପ୍ରତ୍ୟେକ ଗ୍ରାମ ବିକଶିତ ହେବ, ଏବଂ ତା’ପରେ ଯାଇ 2047 ମସିହା ପୂର୍ବରୁ ବିକଶିତ ଭାରତ ଲକ୍ଷ୍ୟ ହାସଲ କରାଯିବ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତ ବିଶ୍ୱର ଶ୍ରେଷ୍ଠ ପାଞ୍ଚଟି ଅର୍ଥବ୍ୟବସ୍ଥା ମଧ୍ୟରେ ସ୍ଥାନ ପାଇଛି ଏବଂ 25 କୋଟି ଲୋକ ଦାରିଦ୍ର୍ୟରୁ ମୁକ୍ତି ପାଇଛନ୍ତି। ସେ ଗୁରୁତ୍ୱାରୋପ କରିଥିଲେ ଯେ ଭାରତକୁ ଏହି ପରିବର୍ତ୍ତନର ଗତିକୁ ବୃଦ୍ଧି କରିବାର ଆବଶ୍ୟକତା ରହିଛି। ସେ ରାଜ୍ୟଗୁଡ଼ିକୁ ସେମାନଙ୍କ ଉତ୍ପାଦନ ସାମର୍ଥ୍ୟର ଲାଭ ଉଠାଇବା ପାଇଁ ପ୍ରୋତ୍ସାହିତ କରିଥିଲେ। ସେ କହିଥିଲେ ଯେ ଭାରତ ସରକାର ଉତ୍ପାଦନ ମିଶନ ଘୋଷଣା କରିଛନ୍ତି।
ପ୍ରଧାନମନ୍ତ୍ରୀ କହିଥିଲେ ଯେ ବିଶ୍ୱ ନିବେଶକମାନେ ଭାରତ ପ୍ରତି ଅତ୍ୟନ୍ତ ଆଗ୍ରହୀ। ଏହି ସୁଯୋଗର ଉପଯୋଗ କରିବା ଏବଂ ନିବେଶକୁ ସହଜ କରିବା ଲାଗି ସେ ରାଜ୍ୟଗୁଡ଼ିକୁ ଉତ୍ସାହିତ କରିଥିଲେ। ୟୁଏଇ, ବ୍ରିଟେନ ଏବଂ ଅଷ୍ଟ୍ରେଲିଆ ସହିତ ନିକଟରେ ହୋଇଥିବା ବାଣିଜ୍ୟ ରାଜିନାମା ବିଷୟରେ ଉଲ୍ଲେଖ କରି ସେ କହିଥିଲେ ଯେ ରାଜ୍ୟଗୁଡ଼ିକ ଏହାର ସର୍ବାଧିକ ଉପଯୋଗ କରିବା ଉଚିତ।
ଦକ୍ଷତା ବିକାଶ ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଏନଇପି ଶିକ୍ଷା ଏବଂ ଦକ୍ଷତା ବିକାଶ ଉପରେ ଗୁରୁତ୍ୱ ଦେଇଥାଏ। ସେ କହିଥିଲେ ଯେ ରାଜ୍ୟଗୁଡ଼ିକ ବିଭିନ୍ନ କୌଶଳ ପାଇଁ ଯୋଜନା କରିବା ଉଚିତ, ଯାହା ଆର୍ଟିଫିସିଆଲ ଇଣ୍ଟେଲିଜେନ୍ସ, ସେମିକଣ୍ଡକ୍ଟର, 3ଡି ପ୍ରିଣ୍ଟିଂ ଭଳି ଆଧୁନିକ ପ୍ରଯୁକ୍ତିବିଦ୍ୟା ସହିତ ସୁସଙ୍ଗତ। ସେ କହିଥିଲେ ଯେ ଆମର ଜନସାଂଖିକୀୟ ଲାଭାଂଶ କାରଣରୁ ଆମେ ବିଶ୍ୱର ଦକ୍ଷତା ରାଜଧାନୀ ହୋଇପାରିବୁ। ପ୍ରଧାନମନ୍ତ୍ରୀ କହିଥିଲେ ଯେ ଦକ୍ଷତା ବିକାଶ ପାଇଁ 60,000 କୋଟି ଟଙ୍କାର ଏକ ଯୋଜନାକୁ ଭାରତ ସରକାର ଅନୁମୋଦନ କରିଛନ୍ତି। ଦକ୍ଷତା ବୃଦ୍ଧି ପାଇଁ ରାଜ୍ୟଗୁଡ଼ିକ ଆଧୁନିକ ପ୍ରଶିକ୍ଷଣ ଭିତ୍ତିଭୂମି ଏବଂ ଗ୍ରାମୀଣ ପ୍ରଶିକ୍ଷଣ କେନ୍ଦ୍ର ଉପରେ ଧ୍ୟାନ ଦେବା ଆବଶ୍ୟକ।
ପ୍ରଧାନମନ୍ତ୍ରୀ ସାଇବର ସୁରକ୍ଷାକୁ ଏକ ଆହ୍ୱାନ ତଥା ସୁଯୋଗ ବୋଲି ଦର୍ଶାଇଥିଲେ। ବିପୁଳ ସମ୍ଭାବନା ଏବଂ ସୁଯୋଗର କ୍ଷେତ୍ର ଭାବେ ହାଇଡ୍ରୋଜେନ୍ ଏବଂ ସବୁଜ ଶକ୍ତି ଉପରେ ସେ ଗୁରୁତ୍ୱାରୋପ କରିଥିଲେ।
ପ୍ରଧାନମନ୍ତ୍ରୀ କହିଥିଲେ ଯେ ଜି-20 ଶିଖର ସମ୍ମିଳନୀ ଭାରତକୁ ଏକ ବିଶ୍ୱସ୍ତରୀୟ ପର୍ଯ୍ୟଟନ ସ୍ଥଳୀ ଭାବେ ସ୍ୱୀକୃତି ଦେବାରେ ସହାୟକ ହୋଇଥିଲା, କିନ୍ତୁ ରାଜ୍ୟଗୁଡ଼ିକ ଏହି ସୁଯୋଗର ଲାଭ ଉଠାଇବା ଉଚିତ। ବିଶ୍ୱସ୍ତରୀୟ ମାନକ ଏବଂ ଆଶାନୁରୂପ ଅତିକମରେ ଗୋଟିଏ ପର୍ଯ୍ୟଟନ ସ୍ଥଳୀ ବିକଶିତ କରିବା ଲାଗି ସେ ରାଜ୍ୟଗୁଡ଼ିକୁ ଅନୁରୋଧ କରିଥିଲେ। ସେ କହିଥିଲେ ଯେ 25-30 ପର୍ଯ୍ୟଟନ ସ୍ଥଳୀ ସମଗ୍ର ଭାରତରେ ସୃଷ୍ଟି କରାଯାଇପାରିବ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତରେ ଦ୍ରୁତ ଗତିରେ ସହରୀକରଣ ହେଉଛି। ସେ ରାଜ୍ୟଗୁଡ଼ିକୁ ସହରଗୁଡ଼ିକୁ ସ୍ଥିରତା ଏବଂ ଅଭିବୃଦ୍ଧିର ଇଞ୍ଜିନରେ ପରିଣତ କରିବାକୁ କହିଥିଲେ ଏବଂ ଦ୍ୱିତୀୟ ଏବଂ ତୃତୀୟ ଶ୍ରେଣୀ ସହର ଉପରେ ଧ୍ୟାନ ଦେବାକୁ ଅନୁରୋଧ କରିଥିଲେ। ସେ ଉଲ୍ଲେଖ କରିଥିଲେ ଯେ ମୂଳଧନ ପାଇଁ 1 ଲକ୍ଷ କୋଟି ଟଙ୍କାର ସହରୀ ଚ୍ୟାଲେଞ୍ଜ ପାଣ୍ଠି ସୃଷ୍ଟି କରାଯାଉଛି।
ଭାରତର ନାରୀ ଶକ୍ତିର ବିଶାଳ ସାମର୍ଥ୍ୟ ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ମହିଳାମାନଙ୍କ ପାଇଁ ଆଇନରେ ପରିବର୍ତ୍ତନ ଆଣିବାକୁ ସେ ଅନୁରୋଧ କରିଥିଲେ, ଯାହାଦ୍ୱାରା ସେମାନେ ବିକାଶ ପଥରେ ସାମିଲ ହୋଇପାରିବେ। ସେ କହିଥିଲେ ଯେ କର୍ମଜୀବୀ ମହିଳାମାନଙ୍କ ପାଇଁ ସରକାରୀ ଏବଂ ଘରୋଇ କ୍ଷେତ୍ରରେ ସଂସ୍କାର ହେବା ଉଚିତ ଏବଂ ସେମାନଙ୍କ କାର୍ଯ୍ୟ ସହଜ କରିବା ଉପରେ ଗୁରୁତ୍ୱ ଦିଆଯିବା ଉଚିତ।
ଜଳ ଅଭାବ ତଥା ବନ୍ୟା ମୁକାବିଲା କରିବା ପାଇଁ ରାଜ୍ୟଗୁଡ଼ିକ ମଧ୍ୟରେ ନଦୀଗୁଡ଼ିକୁ ପରସ୍ପର ସହ ଯୋଡ଼ିବାକୁ ପ୍ରଧାନମନ୍ତ୍ରୀ ରାଜ୍ୟଗୁଡ଼ିକୁ ଉତ୍ସାହିତ କରିଥିଲେ। ନିକଟରେ କୋଶି-ମୋଚି ସଂଯୋଗ ଗ୍ରୀଡ ଆରମ୍ଭ କରିଥିବା ବିହାରକୁ ସେ ପ୍ରଶଂସା କରିଥିଲେ। ସେ ଆକାଂକ୍ଷୀ ଜିଲ୍ଲା କାର୍ଯ୍ୟକ୍ରମର ମଧ୍ୟ ପ୍ରଶଂସା କରିଥିଲେ, ଯାହା ସାମୂହିକ ପ୍ରୟାସ ମାଧ୍ୟମରେ ସଫଳ ହୋଇଛି।
ପ୍ରଧାନମନ୍ତ୍ରୀ କହିଥିଲେ ଯେ କୃଷି କ୍ଷେତ୍ରରେ ଆମକୁ ‘ଲ୍ୟାବ୍ ଟୁ ଲ୍ୟାଣ୍ଡ’ ବା ପ୍ରୟୋଗଶାଳାରୁ ଚାଷ ଜମି ଉପରେ ଧ୍ୟାନ ଦେବାକୁ ପଡ଼ିବ। ସେ ‘ବିକଶିତ କୃଷି ସଂକଳ୍ପ ଅଭିଯାନ’ ବିଷୟରେ କହିଥିଲେ, ଯେଉଁଥିରେ ଆଗାମୀ ଦିନରେ ପାଖାପାଖି 2500 ବୈଜ୍ଞାନିକ ଗାଁ ଏବଂ ଗ୍ରାମୀଣ କେନ୍ଦ୍ରଗୁଡ଼ିକୁ ଯିବେ, ଯେଉଁଠାରେ ସେମାନେ ଫସଲ ବିବିଧକରଣ ଏବଂ ରାସାୟନିକ ମୁକ୍ତ ଚାଷ ଭଳି ବିଷୟ ଉପରେ ବିଚାର-ବିମର୍ଶ କରିବେ। ଏହି ପ୍ରୟାସକୁ ସମର୍ଥନ କରିବାକୁ ସେ ସମସ୍ତ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଥିଲେ।
ସ୍ୱାସ୍ଥ୍ୟ ସେବା ପ୍ରଦାନ ଉପରେ ଧ୍ୟାନ ଦେବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ କୋଭିଡ ସମ୍ବନ୍ଧୀୟ ଯେକୌଣସି ଆହ୍ୱାନର ମୁକାବିଲା ପାଇଁ ପ୍ରସ୍ତୁତ ରହିବା ପାଇଁ ଆମକୁ ଅକ୍ସିଜେନ ପ୍ଲାଣ୍ଟ ଏବଂ ପ୍ରସ୍ତୁତି ଉପରେ ନଜର ରଖିବାକୁ ହେବ। ସେ କହିଥିଲେ ଯେ ରାଜ୍ୟଗୁଡ଼ିକୁ ଟେଲିମେଡିସିନ୍ ସମ୍ପ୍ରସାରଣ କରିବାର ଆବଶ୍ୟକତା ରହିଛି, ଯାହାଦ୍ୱାରା ଜିଲ୍ଲା ଡାକ୍ତରଖାନାଗୁଡ଼ିକରେ ଭଲ ଡାକ୍ତରମାନଙ୍କୁ ଯୋଡ଼ାଯାଇପାରିବ ଏବଂ ଇ-ସଞ୍ଜୀବନୀ ଏବଂ ଟେଲି ପରାମର୍ଶ ସୁବିଧା ଉପଲବ୍ଧ କରାଯିବ।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ‘ଅପରେସନ ସିନ୍ଦୁର’କୁ ଏକକାଳୀନ ପଦକ୍ଷେପ ଭାବେ ବିବେଚନା କରାଯିବା ଉଚିତ ନୁହେଁ ଏବଂ ଆମକୁ ଏକ ଦୀର୍ଘକାଳୀନ ଆଭିମୁଖ୍ୟ ଗ୍ରହଣ କରିବାକୁ ପଡ଼ିବ। ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ନାଗରିକ ପ୍ରସ୍ତୁତି କ୍ଷେତ୍ରରେ ଆମକୁ ଆମର ଆଭିମୁଖ୍ୟର ଆଧୁନିକୀକରଣ କରିବାକୁ ପଡ଼ିବ। ସେ କହିଥିଲେ ଯେ ନିକଟରେ ହୋଇଥିବା ମକ୍ ଡ୍ରିଲ୍ ଦ୍ୱାରା ନାଗରିକ ପ୍ରତିରକ୍ଷା ରାଷ୍ଟ୍ରଗୁଡ଼ିକ ନାଗରିକ ପ୍ରତିରକ୍ଷା ପ୍ରସ୍ତୁତିକୁ ସଂସ୍ଥାଗତ କରିବା ଉପରେ ଆମର ଧ୍ୟାନ ପୁନଃସ୍ଥାପିତ ହୋଇଛି।
ମୁଖ୍ୟମନ୍ତ୍ରୀ ଏବଂ ଉପରାଜ୍ୟପାଳମାନେ ଅପରେସନ ସିନ୍ଦୁରର ଯଥାର୍ଥତା ଏବଂ ଟାର୍ଗେଟ୍ ଷ୍ଟ୍ରାଇକ୍ ପାଇଁ ପ୍ରଶଂସା କରିଥିଲେ ଯାହା ଆତଙ୍କବାଦୀ ଭିତ୍ତିଭୂମିକୁ ଧ୍ୱଂସ କରିଥିଲା। ଗୋଟିଏ ସ୍ୱରରେ ସେମାନେ ପ୍ରଧାନମନ୍ତ୍ରୀଙ୍କ ନେତୃତ୍ୱ ଏବଂ ସଶସ୍ତ୍ର ବାହିନୀର ବୀରତ୍ୱକୁ ପ୍ରଶଂସା କରିଥିଲେ। ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରଶୀଳତାର ପ୍ରୟାସକୁ ମଧ୍ୟ ସେମାନେ ପ୍ରଶଂସା କରିଥିଲେ, ଯାହା ପ୍ରତିରକ୍ଷା ବାହିନୀକୁ ସୁଦୃଢ଼ କରିଛି ଏବଂ ଆମର ସାମର୍ଥ୍ୟ ଉପରେ ଆତ୍ମବିଶ୍ୱାସ ବୃଦ୍ଧି କରିଛି।
ମୁଖ୍ୟମନ୍ତ୍ରୀ/ଉପରାଜ୍ୟପାଳମାନେ 2047 ମସିହାରେ ବିକଶିତ ଭାରତ ପାଇଁ ବିକଶିତ ରାଜ୍ୟର ପରିକଳ୍ପନା ପାଇଁ ବିଭିନ୍ନ ପରାମର୍ଶ ଦେଇଥିଲେ ଏବଂ ସେମାନଙ୍କ ରାଜ୍ୟରେ ନିଆଯାଇଥିବା ପଦକ୍ଷେପ ଉପରେ ମଧ୍ୟ ଆଲୋଚନା କରିଥିଲେ। କୃଷି, ଶିକ୍ଷା ଏବଂ ଦକ୍ଷତା ବିକାଶ, ଉଦ୍ୟମୀତା, ପାନୀୟ ଜଳ, ଅନୁପାଳନ ହ୍ରାସ, ଶାସନ, ଡିଜିଟାଇଜେସନ୍, ମହିଳା ସଶକ୍ତିକରଣ, ସାଇବର ସୁରକ୍ଷା ଇତ୍ୟାଦି କ୍ଷେତ୍ରରେ କେତେକ ପ୍ରମୁଖ ପରାମର୍ଶ ଏବଂ ସର୍ବୋତ୍ତମ ଅଭ୍ୟାସ ଉପରେ ଆଲୋକପାତ କରାଯାଇଥିଲା। ଅନେକ ରାଜ୍ୟ ମଧ୍ୟ 2047 ମସିହା ପାଇଁ ଏକ ରାଜ୍ୟ ସଂକଳ୍ପ ସୃଷ୍ଟି କରିବା ଲାଗି ସେମାନଙ୍କ ପ୍ରୟାସ ବିଷୟରେ ସୂଚନା ଦେଇଥିଲେ।
ଏହି ବୈଠକରେ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକ ଦେଇଥିବା ପରାମର୍ଶକୁ ଅଧ୍ୟୟନ କରିବାକୁ ପ୍ରଧାନମନ୍ତ୍ରୀ ନୀତି ଆୟୋଗକୁ କହିଥିଲେ। ସେ କହିଥିଲେ ଯେ ନୀତି ଆୟୋଗର ଦଶମ ପରିଚାଳନା ପରିଷଦ ବୈଠକ ଏହାର 10 ବର୍ଷର ଯାତ୍ରାର ଏକ ମାଇଲଖୁଣ୍ଟ, ଯାହା 2047 ପାଇଁ ଦୃଷ୍ଟିକୋଣକୁ ପରିଭାଷିତ ଏବଂ ରୂପରେଖ ପ୍ରଦାନ କରିଥାଏ। ସେ କହିଥିଲେ ଯେ ପରିଚାଳନା ପରିଷଦ ବୈଠକ ରାଷ୍ଟ୍ର ନିର୍ମାଣରେ ସହାୟକ ହୋଇଛି ଏବଂ ଏହା ମିଳିତ କାର୍ଯ୍ୟାନୁଷ୍ଠାନ ଏବଂ ସହଭାଗୀ ଆକାଂକ୍ଷାଗୁଡ଼ିକର ଏକ ମଞ୍ଚ ଭାବେ ଉଭା ହୋଇଛି। ଏହି ବୈଠକରେ ଅଂଶଗ୍ରହଣ କରିବା ଏବଂ ସେମାନଙ୍କ ମତାମତ ଓ ଅଭିଜ୍ଞତା ବାଣ୍ଟିବା ପାଇଁ ସେ ସମସ୍ତ ମୁଖ୍ୟମନ୍ତ୍ରୀ ଏବଂ ଉପରାଜ୍ୟପାଳଙ୍କ ପ୍ରତି କୃତଜ୍ଞତା ବ୍ୟକ୍ତ କରିଥିଲେ ଏବଂ ବିଶ୍ୱାସ ବ୍ୟକ୍ତ କରିଥିଲେ ଯେ ଭାରତ ସହଯୋଗୀ ସଂଘୀୟ ବ୍ୟବସ୍ଥାର ଶକ୍ତି ମାଧ୍ୟମରେ ବିକଶିତ ଭାରତ ଲକ୍ଷ୍ୟ ହାସଲ ପାଇଁ ବିକଶିତ ରାଜ୍ୟ @2047ର ପରିକଳ୍ପନାକୁ ପୂରଣ କରିବା ଦିଗରେ ଅଗ୍ରସର ହେଉଛି।
