ରାଷ୍ଟ୍ରପତି ଭବନରେ ଆୟାଜିତ ରାଜ୍ୟପାଳ ସମ୍ମିଳନୀରେ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଉଦବୋଧନ ଦେଇଥିଲେ ।
ପ୍ରଧାନମନ୍ତ୍ରୀ ଏହି ସମ୍ମିଳନୀରେ ହୋଇଥିବା ବିଭିନ୍ନ ଆଲୋଚନା ଏବଂ ଉପଯୋଗୀ ପରାମର୍ଶର ପ୍ରଶଂସା କରିଥିଲେ ।
ପ୍ରଧାନମନ୍ତ୍ରୀ “ଏକ ଭାରତ, ଶ୍ରେଷ୍ଠ ଭାରତ” ଅଭିଯାନକୁ ସୁଦୃଢ଼ କରିବା ଲାଗି ରାଜ୍ୟପାଳମାନଙ୍କୁ ଆହ୍ୱାନ କରିଥିଲେ, ଯାହା ଭାଗିଦାରୀ, ସାଂସ୍କୃତିକ ବିନିମୟ ଏବଂ ରାଜ୍ୟଗୁଡ଼ିକ ମଧ୍ୟରେ ଜନ-ଜନ ସମ୍ପର୍କକୁ ପ୍ରୋତ୍ସାହିତ କରିଥାଏ । ଭାରତର ବିଭିନ୍ନତା ମଧ୍ୟରେ ଏକତା ଏବଂ ଅଖଣ୍ଡତାକୁ ପ୍ରେତ୍ସାହନ ଲାଗି ନୂତନ ଉପାୟ ଖୋଜିବା ଲାଗି ସେ ଗୁରୁତ୍ୱାରୋପ କରିଥିଲେ ।
ଶିକ୍ଷା କ୍ଷେତ୍ରର ବିଭିନ୍ନ ଦିଗରେ ଉତ୍କର୍ଷକୁ ପ୍ରୋତ୍ସାହନ ଦେବା ଲାଗି ବିଶ୍ୱବିଦ୍ୟାଳୟଗୁଡ଼ିକୁ ଆହ୍ୱାନ କରିବା ନିମନ୍ତେ କୁଳାଧିପତି ଭାବେ ଦାୟିତ୍ୱ ତୁଲାଇବାକୁ ପ୍ରଧାନମନ୍ତ୍ରୀ ରାଜ୍ୟପାଳମାନଙ୍କୁ ପରାମର୍ଶ ଦେଇଥିଲେ । ସେ କହିଥିଲେ, ଭାରତୀୟ ବିଶ୍ୱବିଦ୍ୟାଳୟଗୁଡ଼ିକ ବିଶ୍ୱର ଶ୍ରେଷ୍ଠ ବିଶ୍ୱବିଦ୍ୟାଳୟ ମଧ୍ୟରେ ସାମିଲ ହେବା ଲାଗି ପ୍ରୟାସ କରିବା ଆବଶ୍ୟକ, ଏଗୁଡ଼ିକର ରୂପାନ୍ତରଣ ପାଇଁ ରାଜ୍ୟପାଳମାନେ ପ୍ରମୁଖ ଭୂମିକା ଗ୍ରହଣ କରିପାରିବେ । ଏହି ପରିପ୍ରେକ୍ଷୀରେ, ଆଇଆଇଏମ ଏବଂ 10 ଟି ଶୀର୍ଷ ସରକାରୀ ଓ 10 ଟି ଶୀର୍ଷ ଘରୋଇ ବିଶ୍ୱବିଦ୍ୟାଳୟକୁ ସ୍ୱାୟତ୍ତତା ପ୍ରଦାନ କରିବା ଲାଗି ପ୍ରୋତ୍ସାହିତ କରିବା ବିଷୟରେ ସେ ଉଲ୍ଲେଖ କରିଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ କେନ୍ଦ୍ର ସରକାର ସାଧାରଣ ଜନତାଙ୍କ “ସହଜ ଜୀବନଧାରଣ” ଦିଗରେ କାର୍ଯ୍ୟ କରୁଛନ୍ତି । ଏହି ଉଦ୍ଦେଶ୍ୟ ଲାଗି ସମର୍ପିତ ହୋଇ କାର୍ଯ୍ୟ କରିବା ଉଦ୍ଦେଶ୍ୟରେ ସରକାରୀ ବିଭାଗ ଏବଂ ପ୍ରଶାସନିକ ସଂସ୍ଥାଗୁଡ଼ିକୁ ସେମାନଙ୍କ ବିପୁଳ ଅଭିଜ୍ଞତା ବଳରେ ରାଜ୍ୟପାଳମାନେ ଅନୁପ୍ରେରିତ କରିପାରିବେ ।
ପ୍ରଧାନମନ୍ତ୍ରୀ ମଧ୍ୟ କେନ୍ଦ୍ର ସରକାରଙ୍କ ମହତ୍ଵାକାଂକ୍ଷୀ ଆୟୁଷ୍ମାନ ଭାରତ ଯୋଜନା ବିଷୟରେ କହିଥିଲେ ।
ଶ୍ରୀ ନରେନ୍ଦ୍ର ମୋଦୀ କହିଥିଲେ ଯେ 2022ରେ ସ୍ୱାଧୀନତାର 150 ବର୍ଷ ପୂର୍ତ୍ତି ଏବଂ 2019ରେ ମହାତ୍ମା ଗାନ୍ଧୀଙ୍କ 150 ତମ ଜନ୍ମ ବାର୍ଷିକୀ ପଡୁଥିବାରୁ ଏହି ଅବସର ବିକାଶ ଲକ୍ଷ୍ୟ ହାସଲ ପାଇଁ ପ୍ରେରଣାଦାୟୀ ମାଇଲ ଖୁଣ୍ଟ ହୋଇପାରିବ । ସେ କହିଥିଲେ, ପରବର୍ତ୍ତୀ କୁମ୍ଭମେଳା ଜାତୀୟ ସ୍ୱାର୍ଥ ଜଡ଼ିତ ଉଦ୍ଦେଶ୍ୟ ସାଧନ ପାଇଁ ଗୁରୁତ୍ୱପୂର୍ଣ୍ଣ ଅବସର ହୋଇପାରିବ ।
