য়ুনাইতেদ কিংদমগী ইকায় খুম্ননীংঙাই ওইরবা প্রধান মন্ত্রী, শ্রী বোরিস জোন্সন্না ভারতকী প্রধান মন্ত্রী, শ্রী নরেন্দ্র মোদীগী পাউজেলগী মতুং ইন্না এপ্রিল ২১-২২, ২০২২দা ওফিসিএল ওইবা ভারতকী খোঙচৎকীদমক্তা লাক্লি। মসিনা য়ু.কে.গী প্রধান মন্ত্রী অমা ওইনা মহাক্কী অহানবা ভারত খোঙচৎনি।
প্রধান মন্ত্রীবু এপ্রিল ২২দা প্রধান মন্ত্রী মোদীনা রাস্ত্রপতি ভবন্দা তরাম্না ওকখি। পি.এম. জোন্সন্না মতুং তারকপদা রাজ ঘাত্তা চত্তুনা মহাত্মা গান্ধীগী মফমদা লৈ কত্তুনা ইকায় খুম্নবা উৎখি।
প্রধান মন্ত্রী মোদীনা ভারত্তা লাক্লিবা প্রধান মন্ত্রী বোরিস জোন্সনগা লোয়ননা হাইদ্রবাদ হাউস্তা লৈবাক অনিগী মরীগী মতাংদা ৱারী শাখি অমসুং মহাকপু ইকায় খুম্নবা ওইনা চাক্লেন অমসু শীনখি। এক্সতর্নেল এফিয়র্স মন্ত্রী, দাঃ এস. জয়শঙ্করনা য়ু.কে.গী প্রধান মন্ত্রীগা মসিগী মমাংদা ৱারী শাখি।
প্রধান মন্ত্রীনা লৈবাক অনিগী মরীগী মতাংদা ৱারী শাবদা মে ২০২১দা হৌদোকখিবা রোদমেপ ২০২৩গী মতাংদা হৌজিক ফাওবদা খুমাং চাউশিনখিবশিংবু থাগৎনখি অমসুং লৈবাক অনিগী মরীগী মনুং চনবা পাক চাউরবা হীরম খুদিংদা হেন্না চাউবা অমসুং থবক্তা মিৎয়েং চঙবা খুৎশম্নবা অমা লৈহন্নবা হোৎনরিবা অসিদসু খোঙফম চেৎপগী ৱারোল ফোংদোক্নখি। হৌজিক চত্থরিবা এফ.তি.এ.গী ৱারী অমসুং ইনহেন্স ত্রেদ পার্ত্নরশিপকী থবক্তা পাংথোক্লিবা অসিবুসু থাগৎনবগা লোয়ননা ওক্তোবর ২০২২ ফাওবগী মনুংদা পাক চাউবা অমসুং খাল নাইবা লল্লোন ইতিক্কী য়ানবা অমা পুরক্নবা য়ানবা পুরকখি। এফ.তি.এ.না ইং ২০৩০ ফাওবদা লৈবাক অনিগী লল্লোন-ইতিক্কী মরীবু শরুক অনিদা হেনগৎহন্নবা লম্বী য়াৎকনি।
লুচিংবা অনিনা দিফেন্স অমসুং সেক্যুরিতীগী মতাংদা খুৎশম্নববু ভারত-য়ু.কে. কম্প্রিহেন্সিব স্ত্রেতজিক পার্ত্নরশিপকী মরু ওইবা ৱাফম অমনি হায়না য়ানবা পুরক্তুনা লৈবাক অনিগী আর্ম্দ ফোর্সকী তঙাই ফদবশিংবু পুন্না শেমগৎ-শাগৎমিন্নবগী ৱাফম য়াওনা দিফেন্সকী মতাংদা খুৎশম্নবগী খুদোংচাবা কয়াগী মতাংদসু ৱা খন্নখি। লৈবাক অসিনা সাইবর গবর্নেন্স, সিবর দিতরেন্স অমসুং লৈবাক্কী মরু ওইবা ইনফ্রাস্ত্রকচরশিংবু ঙাক-শেনবগী ৱারোলশিংনা অখন্নবা ওইনা সাইবর সেক্যুরিতীগী হীরমদা খুৎশম্নরিবা অসিবু হেনগৎহন্নবা অপুনবা ৱারোল থাদোকখি। তেরোরিজম অমসুং রেদিকেল এক্সত্রীমিজমগী লেপ্তনা লৈরিবা শিংনবা কয়াবু মাইয়োক্নবদা নক্ননা খুৎশম্নবগী য়ানবসু মখোয়না পুরকখি।
প্রধান মন্ত্রী অনিনা ইন্দো-পেসিফিক, অফঘানিস্তান, য়ু.এন.এস.সি., জি.২০ অমসুং কম্মনৱেল্থতা তেংবাংনবা য়াওনা নাকল অনিগী অপাম্বা মান্নবা লমদম অমসুং মালেমগী হীরম কয়াগী মতাংদা মশাগী ৱাখল্লোন ফোংদোক্নখি। মেরিতাইম সেক্যুরিতী পিল্লরগী মখাদা লৈবা ইন্দো-পেসিফিক ক্বীন্স ইনিসিএতিবতা য়ু.কে.না য়াওরকপবু ভারতনা তরাম্না ওকখি অমসুং ইন্দো-পেসিফিক লমদমদা থবক তৌমিন্নবগী থৌওং হেনগৎহন্নবা য়ানবসু পুরকখি।
লুচিংবা অনি অসিনা হৌজিক চত্থরিবা য়ুক্রেন-রসিয়াগী মরক্তা খুৎ থোক্নরিবা অসিগী মতাংদা ৱারী শাখি। প্রধান মন্ত্রীনা হৌজিক ফিভম কন্না লুশিল্লক্লিবা হ্যুমেনিতরিয়ন ক্রাইসিস অসিদা থম্মোই শেংনা নুংঙাইতবা ফোংদোকখি অমসুং খৎন-চৈনবা খুদক্তা লেপ্নবা হায়রিবা অসিবু অমুক হন্না ফোংদোক্লদুনা হকথেংননা ৱারী শাবা অমসুং দিপ্লোমেসীনা মখা তানা পায়খৎকদবা অমত্তা ঙাইরবা থৌওংনি হায়না ফোংদোকখি।
পি.এম. মোদীনা প্রধান মন্ত্রী জোন্সনবু মমাংগী চহিদা কোপ২৬ মায় পাক্না শীন-লাঙখিবগীদমক্তা থাগৎপা ফোংদোকখি। পেরিস এগ্রীমেন্তকী পান্দম ফংনবা অইং-অশাগী মতাংদা মিৎয়েং শানবা থবক পায়খৎপা অমসুং গ্লাসগো ক্লাইমেত পেক্তপু থবক ওইনা পাংথোকহন্নবা খোঙফম চেৎলিবা অসিগী মতাংদসু মখোয়না নৌহৌননা ফোংদোক্নখি। ওফ-শোর ৱিন্দ ইনর্জী অমসুং গ্রীন হাইদ্রোজেন য়াওনা ক্লীন ইনর্জীবু খোঙজেল য়াঙনা শিজিন্নবগী মতাংদা খুৎশম্নবা অমসুং ভারত অমসুং য়ু.কে.না কোপ২৬তা পুন্না হৌদোকমিন্নখিবা সি.দি.আর.আই.গী মখাদা লৈবা আই.এস.এ. অমসুং আই.আর.আই.এস. প্লেৎফোর্মগী মখা পোনবা গ্লোবেল গ্রীন গ্রিদ- ৱান সন ৱান ৱর্ল্দ ৱান গ্রিদ ইনিসিএতিব (ও.এস.ও.দবল্যু.ও.জি.)পু ঙন্না থবক হৌহন্নবগীদমক্তা নক্ননা থবক তৌমিন্নবগী মতাংদসু মখোয়না য়ানখি।
ভারত-য়ু.কে. গ্লোবেল ইন্নোভেসন পার্ত্নরশিপ অমসুং গ্লোবেল সেন্তর ফোর ন্যুক্লিয়র ইনর্জী পার্ত্নরশিপ (জি.সি.এন.ই.পি.) থবক্তা ওন্থোকপগা মরী লৈনবা এম.ও.য়ু. অনি অমসু খোঙচৎ অসিগী মনুংদা লান্নখি। ভারত অমসুং য়ু.কে.না গ্লোবেল ইন্নোভেসন পার্ত্নরশিপকী খুত্থাংদা থর্দ ৱর্ল্দ লৈবাকশিংদা ক্লাইমেত স্মার্ত সস্তেনেবল ইনোওভেসন পীবা অমসুং চাউথোকহন্নবা তেংবাংবদা চঙগদবা মিলিয়ন পাউন্দ ৭৫ পুন্না পুথোকমিন্নবা হায়নসু য়ানবা পুরকখি। পার্ত্নরশিপ অসিগী মখাদা শাখিবা অনৌবা জি.আই.পি. ফন্দ অসিনা ভারতকী অনৌবা থৌওং পাংথোকপশিংবু শৌগৎনবা মার্কেত্তগী অহেনবা মিলিয়ন পাউন্দ ১০০ শাগৎনবা পান্দমসু থমগনি।
মখাদা পীরিবশিং অসিসু লাউথোকপগী মনুং চনখি – ১) স্ত্রেতজিক তেক দাইলোগ - ৫জি., এ.আই.নচিংবা অনৌবা অমসুং চাউখৎলক্লিবা তেক্নোলোজীগী মতাংদা মন্ত্রালয়গী থাক্তা ৱারী শাবা, ২) ইন্তিগ্রেতেদ ইলেক্ত্রিক প্রোপলসনগী মতাংদা খুৎশম্নবা – নেভী অনিগী মরক্তা তেক্নোলোজী পুন্না শেমগৎমিন্নবা।
প্রধান মন্ত্রী জোন্সন্না এপ্রিল ২১দগী হৌনা সাবর্মতী আশ্রম, ভদোদরাগী মাসৱার ইন্দস্ত্রীএল ইস্তেত্তা লৈবা জে.সি.বি. প্লান্ত অমসুং গান্ধীনগরগী গিফ্ত সিতীদা লৈবা গুজরাত বাইওতেক্নোলোজী য়ুনিভর্সিতীদা চত্তুনা গুজরাতকী অহমেদবাদতগী মহাক্কী খোঙচৎ হান্ননা হৌখ্রবনি।
প্রধান মন্ত্রী মোদীনা ভারতকী প্রসিদেন্সী মখাদা পাংথোক্কদবা জি.৩০ সম্মিৎকীদমক্তা প্রধান মন্ত্রী জোন্সনবু ইং ২০২৩দা ভারত্তা লাক্নবা পাউজেল পীখি। প্রধান মন্ত্রী জোন্সন্নসু প্রধান মন্ত্রী মোদীদা য়ু.কে.দা লাক্নবা পাউজেল পীখি অমসুং প্রধান মন্ত্রীনা পাউজেল অসিবু য়াখি।
