হর হর মহাদেব!
কাশীনা কোরোনাগী মাইয়োক্তা থেংনরিবা লানগী মতাংদা অদোমগা মতম অয়াম্বদা ৱারী শারি, অদোমদগী ই-পাউ কয়া অমসু লৌদুনা লাক্লি অমসুং ঐহাক্না রিসোর্স কয়াগী খুত্থাংদগী হীরম কয়া অমসু খঙবা ঙম্মি। কাশীগী মীয়াম, মফম অসিগী ফেসিলিতী, হোস্পিতালশিংনা অসিগুম্বা লুরবা তাঞ্জা অসিদা মতৌ করম্না থবক তৌরি, অসিগুম্বা হীরমশিংদা অদোম্না মতমগী অকক্নবা লৈরবসু ঐহাক্কী মাংদা নীংথিজনা শেম্লবা প্রজেন্তেসন উৎলি, অদোম্না হায়নীংবশিং হায়রি। ঐখোয়গী মফম অসিদা “কাশ্যম বিশ্বেশ্বর তথা” হায়বা পাউরৌ অমা লৈ হায়বসি ঐখোয়না লোয়না খঙনরবনি। মসিগী ৱাহন্থোক্তি কাশীদা বাবা বিশ্বনাথনা মফম খুদিংদা লৈ হায়বনি অমসুং মফম অসিগী বাবা খুদিংমক বাবা বিশ্বনাথকী অতোপ্পা শক্তম অমনি। কোরোনাগী লুরবা তাঞ্জা অসিদা ঐখোয়গী কাশীগী মীয়াম, মফম অসিদা থবক তৌরিবা মীওই খুদিংমক্না মসিগী ৱারোল অসিগী তসেংবা ৱাহন্থোক তাক্লি। অদোম খুদিংনা শিবগী নীংথিরবা ৱাখল্লোনগী মতুং ইন্না থবক তৌদুনা মীওই খুদিংবু তেংবাংলি। ঐহাক্না কাশীগী প্রজা অমা ওইনা কাশীগী মীয়াম খুদিংবু থাগৎচরি। ঐখোয়গী দাক্তর, নর্স, তেক্নিসিয়ন, ৱার্দ বোয়, এম্ব্যুলেন্স থৌবশিংনা মরু ওইনা পাংথোক্লিবশিং অসি তসেংনা থাগৎনীংঙাইনি। মসিগী লাইচৎ অসি য়াম্না পাক চাওরে অমসুং অদোম্না ৱানা হোৎনদুনা থবক কয়া পাংথোক্লবা ফাওবদা ইশাগী ইমুং-মনুংগী মীওই কনবা ঙমদবা কয়া য়াওরি। ভাইরস অসিনা ঐখোয়গী নক্নবা মীওই কয়াবু মুনবীরে। ঐহাক্না মখোয়শিংগী মফমদা ইকায় খুম্নবা উৎপগা লোয়ননা মখোয়গী ইমুং-মনুংগী অৱাবদসু শরু য়ারি।
মরূপশিং,
ঐখোয়না মাইকৈ কয়া অমদগী কোরোনাগী অনিশুবা ৱেভ অসিগা অমুক্তদা লান্থেংনবগী মথৌ তারি। হন্দক্কী মতাংদা অকিবা ফাওবসু হান্নদগী য়াম্না হেল্লে অমসুং অনাবশিংনা হোস্পিতালদা মতম য়াম্না লৈবগী মথৌসু তারি। ময়াম অসিনা ঐখোয়গী হকশেল শেন্নবগী পথাপ্তা অচৌবা পোৎলুম অমসু পীরে। ভরানসীদি কাশী খক্তগী নত্তনা পুর্বাঞ্চলগী হকশেলগী সেবা কয়াগী অচৌবা মফম অমসু ওইরিবনি। বিহারগী মফম খরগী মীওইসু কাশীগী মখা পোল্লি। মরম অদুনা, তাঞ্জা অসিনা মফম অসিগী হকশেলগী ফেসিলিতীশিংদা লৈহল্লিবা অচৌবা পোৎলুম অসিনা শিংনবা অমসু ওইহল্লবনি। মমাংগী চহি ৭তগী হৌনা, মফম অসিগী হেল্থ সেক্তরগী মতাংদা পায়খৎলিবা থবকশিংনা ঐখোয়দা য়াম্না তেংবাংলি। অদু ওইরবা ফাওবদা হৌজিক অসি য়াম্না তোঙানবা ফীভম অমা ওইরি। ঐখোয়গী দাক্তর, হেল্থ ৱর্করশিংনা হোৎনরিবশিং অসিনা পোৎলুম অসিগা থেংনবা ঙমহল্লিবনি। অদোম খুদিংনা অনাবা অমমমগী পুন্সি কন্নবগীদমক্তা অহিং-নুংথিল নাইদনা থবক তৌরি, ইশা পোত্থাদনা, খুদোংথীবদা থমদুনা কত্থোক্লি, থবক তৌবা লেপ্ত্রি। অদোমগী হোৎনজমন্না মরম ওইদুনা বনারসনা তেল্লবা মতমদা হৌজিক্কী লুরবা তাঞ্জা অসিবু শেন্নরিবা অসিগী মতাংদা লৈবাক পুম্বনা থাগৎনরি, ৱারী শারি।
মরূপশিং,
হৌজিক্কী লুরবা তাঞ্জা অসিদা বনারসকী তেংবাংনবগীদমক্তা লৈরিবা ঐখোয়গী মীয়ামগী মীহুৎ, লৈঙাক্লোই অমসুং আর্ম্দ ফোর্সনা লেপ্তনা থবক তৌরি। ওক্সীজেন পীবগী চাং হেনগৎহন্নবা অনৌবা ওক্সীজেন প্লান্ত কয়া অমা থমদুনা মথৌ তৌহল্লে। বনারসকা লোয়ননা পুর্বাঞ্চলদা ভেন্তিলেতর অমসুং ওক্সীজেন কন্সেন্ত্রেতরগী অনৌবা খুদোংচাবা কয়া পীরি।
মরূপশিং,
বনারসনা তেল্লবা মতমদা ওক্সীজেন অমসুং আই.সি.য়ু. ফমুংগী মশিং কয়া অমা খোঙজেল য়াঙনা হেনগৎহল্লিবা অসিগুম্না পন্দিৎ রাজন মিশ্রা কোবিদ হোস্পিতালসু অথুবা মতমদা থবক তৌবা হৌহনখিবা অসিসু তোপ-তোপ্পা খুদম অমনি। মতমগা চানবা অনৌবা মেছিন কয়া য়ৌরকপদগী মফম অসিদা পাংথোকপা আর.তি.-পি.সি.আর.গী তেস্ত মশিংসু য়াম্না হেনগৎলে। বনারসকী ইন্তিগ্রেতেদ কোবিদ কম্মান্দ সেন্তরনসু য়াম্না পথাপ নাইনা থবক তৌরি হায়না ঐহাক্কী মফমদা পাউদমলকখি। অদোমগী তেক্নোলোজী শিজিন্নবগী থৌওং অসিনা অনাবা অমসুং মীচম মীয়ামদা তঙাই ফদবা খুদোংচাবশিং ফংহল্লিবা অসি য়াম্না শিংথানীংঙাইনি। ঐখোয়গী লৈবাক অসিদা হৌখিবা চহি খরদগী পায়খৎলক্লিবা য়োজনা অমসুং খোঙথাংশিংনা কোরোনাগা লান্থেংনবদা য়াম্না তেংবাংখি। অদোম্না অমুক্তং খন্থবীয়ু, স্বচ্ছ ভারত অভিয়ানগী মতুং ইন্না শাখিবা অমাংশঙশিং ওইরো, ইং ২০১৪দা অদোম্না ঐহাকপু এম.পি. ওইনা খনবীখিবদা ঐহাক্না অদোম্বু থাগৎনবগীদমক্তা লাকখিবা মতমদা, অদোম্না ঐহাক্কী মফমদা য়াম্না নুংশিবা উৎপীখি, য়াইফ থৌজাল কয়া পীবিখি। অদুবু, ঐহাক্না করি তৌখি, অহানবা নুমিত্তা ঐহাক্না পীবগী ৱারী অমত্তা শাখিদে, ঐহাক্না কাশীগী মীয়াম অদোমদা করিগুম্বা অমা নিজখি, অমসুং ঐহাক্না মীয়াম মাংদা কাশীবু লু-নান্না থমসি হায়না অদোম্না ৱাশকপীয়ু হায়খিবনি। কাশীবু কন্নবগীদমক্তা অদোম্না লু-নান্না থমগনি হায়না ৱাশকখিবা অমসুং কাশীগী মীয়াম্না লমদমসিবু লু-নান্না থম্নবগীদমক্তা লেপ্তনা হোৎনখিবা অদুনা ঙসিদি মদুগী কান্নবা ফংলে হায়বসি অদোম খুদিংনা উবা ফংলে। আয়ুশমান ভারতকী মখাদা লেম্না লাইয়েংবগী খুদোংচাবা ফংবা অসিসু য়াম্না কান্নরে, উজ্বলা য়োজনাগী মরমদগী ফংবা গ্যাস সিলিন্দর ওইরো, জন ধন বেঙ্ক একাউন্ত ওইরো, নত্ত্রগা ফিৎ ইন্দিয়া অভিয়ান ওইরো, য়োগ অমসুং অয়ুশকী হীরমদসু য়ু.এন.না মালেম শিনবা থুংবদা মালেমগী য়োগ নুমিৎ পাংথোকপগী অয়াবা পীরকপা অমসুং জুন ২১বু য়োগগী নুমিৎ হায়না লাউথোরকপদা মীয়াম্না অহানবদা করেম-কথাইনখি, অয়েৎপগী ৱাফম ফোংদোক্নখি, কাংলুপ নাইদবা কাংলুপ অদুসু মচু শঙখ্রে, অদুবু ঙসিদি, কোরোনাগা লান্থেংনবদা য়োগনা লৌরিবা থৌদাংসু মালেম শিনবা থুংবনা খঙনরে। য়োগ অমসুং অয়ুশকী মতাংদা খঙনরকপা অসিদগী কোরোনাগা লান্থেংনবদা মীয়াম খুদিংদা থৌনা হাপ্লি।
মরূপশিং,
মহাদেবগী থৌজালদগী বনারস অসি লাইনীং-লাইশোনগী পাঙ্গলতনা থল্লবা শহর অমনি। কোরোনাগী অহানবা ৱেব নত্ত্রগা অনিশুবা ৱেব ওইরো, মফম অসিগী মীয়াম্না খাঙবা কনবা অমসুং সেবা তৌবগী নীংথিরবা থৌওং হৌদোকখি। ঐহাক্কী কাশীগী মীয়াম, মফম অসিগী খুন্নাইগী লুপনা অনাবা, লায়রবা, অহল-লমনশিংবু মশাগী ইমুংমক্নি খন্না তেংবাংলি, মখোয়গীদমক্তা ৱাবীরি। ইমুং অমত্তনা চানবগী ৱাখল ৱাহন্দে, লায়রবা অমদা হিদাক্কী ৱাখল ৱাহন্দে, কাশীনা মখোয়গীদমক্তা মশাবু কত্থোক্লবনি। কারবার তৌবা মীওই কয়া অমনা মাং থানা থোক্লক্তুনা লাইচৎ শন্দোকপগী পরিং থুগায়নবা মখোয়গী দুকান লোনখি। অসিগুম্বা কারবারগী ইচিল-ইনাওশিং, মরূপশিংনা কারবারদা শেল-মাঙবা তোংবা খন্দনা, মীয়ামগী সেবাদা মতম কত্থোকখি। অদোমগী তেংবাংনীংবগী মতৌ অসিনা কনাগুম্বা মীওই অমা হেক্তগী পুক্নিং শুমহৎকনি, অদুবু অন্নপুর্নগী শহর অমসুং মসিগী মীয়ামদা অসিগুম্বা মগুন অসি মহৌশাদগী চেন্দুনা লাক্লিবনি হায়বসি ঐহাক্না খঙই। তেংবাংবা হায়বসি মফম অসিগী নীংজবা অমসুং মখল অমগী মন্ত্রনি।
মরূপশিং,
অদোম্না খোঙফম চেৎপা অমসুং ঐখোয় পুম্নমক্না পুন্না হোৎনমিন্নবা অসিনা লাইচৎ অসিনা লান্দারক্লিবা অসিবু অদোম্না নীংথিজনা মাইয়োক্নবা ঙম্লি। অদুবু হৌজিক নুংঙাইথোকপগী মতমদি নত্তে। ঐখোয়না শাংলবা লান অমা থেংনগদৌবা লৈরি। হৌজিক বনারস অমসুং পুরবঞ্চলগী খুঙ্গংগী মফমশিংদা ঐখোয়না অহেনবা মিৎয়েং চঙগদবনি। অমসুং হৌজিক ঐখোয়গী মন্ত্রা অসি করি ওইগনি? খুদোংচাবা খুদিংগী, য়ুনিৎ খুদিংগী অনৌবা মন্ত্রদি –‘অনাবা মীওইবু লাইয়েংবা’ অসিনি অমসুং ঐখোয়না মসি কাওদ্রি। ঐখোয়না মখোয়বু লাইয়েংবা ঙম্লিবগী মতিক, ঐখোয়গী হকশেলগী খুদোংচাবশিংদা লৈরিবা পোৎলুম হন্থরক্কনি, মরম অদুনা অদোমগী ফেসিলিতী খুদিংদা মন্ত্রা অসি শিজিন্নগদবনি। ‘অনাবা মীওইবু লাইয়েংবা’ অমসুং মাইক্রো-কন্তেনমেন্ত জোনগী ৱাখল্লোন্দা কাশীনা মশাগী ৱাখল পুম্বা থাদখি অমসুং ঙসিদি, মসিগী কান্নবা ফংলে। মাইক্রো-কন্তেনমেন্ত জোন ওন্থোক্তুনা অদোম্না শহর অমসুং খুঙ্গংশিংগী য়ুম্থোং খুদিংদা হিদাক য়েল্লিবা অসি য়াম্না অফবা খোঙথাং অমনি। খোঙথাং অসি খুঙ্গংগী মফমশিংদা য়ারিবমখৈ পাক-শন্না পাংথোক্কদবনি। দাক্তর, লেব অমসুং ই.-মার্কেতিং কম্পেনীশিংবু অমত্তা ওইনা পুন্সীন্দুনা ‘কাশী কৱচ’ মিংথোনবা তেলি-মেদিসিনগী খুদোংচাবা অমা ফংহনবা অসি কাশীনা পাংথোকপা অনৌবা থৌওংনি। খুঙ্গং কয়াগী মীওইশিংনা মসিগী কান্নবা ফংলি, মসিবু মীয়াম খুদিংদা খঙহন্নবা খোঙথাং অমসু পায়খৎফম থোকই। মসিগী মতেংদগী, য়ু.পি.গী সেনিয়র অমসুং নহা দাক্তর কয়ানসু খুঙ্গংগী মফমশিংদা তেলি-মেদিসিনগী খুত্থাংদা মীয়াম্বু তেংবাংলি। মখোয়গী মতেং শিজিন্নদুনা থৌওং অসিবু পাক-শন্না পাংথোকপা য়াগনি। কোবিদকী মাইয়োক্তা খুঙ্গংশিংদা চত্থরিবা লান অসিদা আশা অমসুং এ.এন.এম.গী ইচলশিংনা লৌরিবা থৌদাং অসিসু য়াম্না মশক থোকপা অমনি। ঐহাক্না মখোয়না থেংনরকপা অমসুং খঙলিবশিং অসিগী খুদোংচাবা য়ারিবমখৈ লৌবা পাম্মি।
মরূপশিং,
অনিশুবা ৱেভ অসিদা ভেক্সিন্না ঙাকথোকপা ঐখোয়না উরে। ভেক্সিন্না ঙাকথোকপনা মরম ওইরগা ঐখোয়গী ফ্রন্তলাইন ৱর্করশিংনা তেক্ত-কায়দনা লৈদুনা মীয়ামগী তেংবাংবা ঙম্লি। মসিগী ঙাকথোকপগী কুয়োম অসি মতম খরগী মনুংদা মীওই খুদিংদা য়ৌরগনি। ঐখোয়গী মতম লাকপদা ঐখোয়না ভেক্সিন শোইদনা কাপথোক্কদবনি। কোরোনাগী লাইয়োক্তা লান্থেংনবা অসি মীয়ামগী ইহৌ ওইরকপগা মান্ননা ভেক্সিন কাপথোকপা অসিসু মীয়ামগী থৌদাং ওইহনগদবনি।
মরূপশিং,
থবক অমা পাংথোকপদা থমোই শেংলবা, তেংবাংনীংবগী ইথিল লৈরবা, মীয়ামগী অৱাবা খঙলবা, সাইন্সনা লমজিংবা থৌওং ওইরবা, অদু ওইরবদি খ্বাইদগী অপিকপা থবক ফাওবা উবা ঙম্মি। মমাংদা, পুর্বাঞ্চলদা অঙাংশিংদা ৱাখলগী লাইহৌ হৌবগী লাইওং অমা লৈখিবদু ঐহাক্না নীংশিংলি। লাইনা অসিনা মরম ওইদুনা, থৱাই নুংঙাইতবা মওংদা চহি খুদিংগী অঙাং লিশিং-লিশিং শিবসু য়াওখি, মশিং থিঙমদে। হৌজিক মুখ্য মন্ত্রী ওইরিবা য়োগীজীনা পার্লিয়ামেন্ততা এম.পি. ওইরিঙৈদা, অঙাংশিং অসিনা মথং-মথং শিরকপদা, মহাক্না পার্লিয়ামেন্ততা হিক-হিক লাওনা কপখিবনি। মতমদুগী সরকারদা অঙাংশিং অসিবু কনবীনবা করিগুম্বা খরা তৌনবা হায়জখি, মদুদসু মহাক্না কপখি। মসিগী থৌদোক অসি চহি কয়া চত্থখি। য়োগীজী পার্লিয়ামেন্ততা লৈদুনা লেপ্তনা হায়জখি। অদুগা তুংদা, মহাক্না য়ু.পি.গী মুখ্য মন্ত্রী ওইরে অমসুং ভারত সরকার অমসুং রাজ্য সরকারনা পুন্দুনা, মহাক্না লাইনা অসিগী মাইয়োক্তা খোঙজং চত্থবা হৌখি। মীয়াম্না মসিগী মতাংদা নিংথীনা খঙই অমসুং ঐখোয়না ঙসি অঙাং মশিং য়াম্না কয়া কনবা ঙম্লে। ঐখোয়না লাইনা অসিবু থাক কয়া অমদা লাকশিনবা ঙম্লে। মসিনা পুর্বাঞ্চলগী মীয়াম অমসুং অঙাংশিংদা য়াম্না কান্নহল্লি। মসিগী খুদম অসিনা ঐখোয়দা থমোই শেংনা অমসুং চেকশিনবগা লোয়ননা লেপ্তনা থবক তৌগদবনি হায়বা তাক্লি। ঐখোয়না লান্থেংনরিবা অসি মশক উদবা অমসুং ফত্ত্রবা য়েক্নবা অমগনি হায়বসি ঐখোয়না নীংশিংফম থোকই। মসিগী লানফম অসিদা ঐখোয়গী অঙাংশিংবু কন্দুনা থমগদবনি, মসিগীদমক্তা ঐখোয়না অখন্ননা শেম-শাদুনা লৈগদবনি। ঐহাক্না নুমিৎ খরনিগী মমাংদা য়ু.পি.গী ওথোরিতীশিংগা ৱারী শাখিবদা, অদোমগী চীফ সেক্রেতরী, তিৱারীজীনা পেদিয়াত্রিক্কী মতাংদা, অঙাংশিংদা করিগুম্বা কোরোনা নারবদি করি তৌফম থোকপগে হায়বা ফীভম খুদিংগী মতাংদা য়াম্না কুপ্না হায়রকখি অমসুং ঐহাক্না মদু তাবদা উত্তর প্রদেশ সরকারনা নীংথিজনা অমসুং মাংজৌননা থৱাই য়াওনা থবক তৌরি খঙবদা য়াম্না নুংঙাইবা ফাওখি। থবক কয়া অমা হৌজিক পায়খৎপা হৌখ্রে।
মরূপশিং,
ঐখোয়না লান্থেংনরিবা লানফম অসিদা ব্লেক ফঙ্গসকী অনৌবা শিংনবা অমসু নুমিৎ খরনি অসিদা ঐখোয়গী মাংদা থোক্লক্লে। মসিগা মাইয়োক্ননবগীদমক্তা ঐখোয়না তঙাই ফদবা চেকশিন-থৌরাং অমসুং কাংলোনশিংদা মিৎয়েং চঙবা অসি য়াম্না মরু ওইবনি। ঐহাক্না অদোমগা হৌজিক ৱারী শাবা অসিগী মনুংদা ঐহাক্কী মফমদা লৈবা ই-পাউ খুদিংমক ঐহাক্না অদোমদা পীখ্রবনি।
মরূপশিং,
অনিশুবা ৱেভ অসিগীদমক্তা লৈঙাক্না শেম-শারিবা খুদিংমক অসি কেস মশিং হন্থরক্লবা ফাওবদা অদুমক মখা তানা চত্থগদবনি। মসিগা লোয়ননা, স্তেতিস্তিক্স অমসুং ফীভমশিংবু লেপ্তনা য়েংশিন্দুনা লৈগদবনি। অদোম্না বনারসতগী থেংনদুনা ফংলিবা লৌশিং অসিগী কান্নবা খুদিংমক পুর্বাঞ্চল অমসুং য়ু.পি.পুম্বদা ফংহনগদবনি। ঐহাক্না ঐখোয়গী দাক্তর, হেল্থ ৱর্করশিংনা মখোয়গী লৌশিংবু মখোয়-মশেলদা শোইদনা য়েন্থোকপা পাম্মি। লৈঙাক্লিবা মীওইশিংনসু মখোয়গী লৌশিং অমসুং ইনপুৎশিংবু সরকারদা য়ৌহল্লক্তুনা মসিগী কান্নবা অসি পাক-শন্না ফংহনগদবনি। অমসুং অতোপ্পা মফমশিংদসু খ্বাইদগী ফবা থৌওংশিং য়ৌহনগদবনি। ঐহাক্না মীয়ামগী মীহুৎ খুদিংদা হায়নীংবদি, মীয়াম্না খনগৎলবা মীওইশিংদসু হায়নীংই, মদুদি অদোম্না লেপ্তনা থবক তৌরি, পোৎলুম য়াম্না চাউই। করিগুম্বা কান্দা প্রজা মীয়ামগী য়ানিংবা-য়ানিংদবা ৱাখল্লোন কয়া তাবা তাবনি। অদোম্না মীয়ামগী অপাম্বা খঙদুনা চৎলিবা, ৱাখল শেংলিবা অসিনা মীচম মীয়ামগী পুক্নিং নুংঙাইহন্নবা পাম্বৈ অমা ওইনা মথৌ তৌই হায়না ঐহাক্না থাজবা থম্মি, মরম অদুনা খোঙজং অসিগী শরুক অমা ওইদুনা মীয়াম্বু লমজিংবগীদমক্তা ঐহাক্না অদোমগী মফমদা পেঞ্জবগী ৱাফম ফোংদোক্লি। মীওই অমত্তনা নুংঙাইতবা লৈরবদি, মদুবু কোকহনবা অসি মীয়ামগী মীহুৎ অমগী থৌদাংনি হায়বসি ঐখোয়না নীংশিংগদবনি। হীরম অদুবু ওথোরিতী অমসুং সরকার ফাওবা য়ৌহনবা, মদুগী ৱারোইশিন পুরক্নবা ঐখোয়গী থবক অসি লেপ্তনা চত্থগদবনি। ঐখোয় পুন্দুনা হোৎনরিবা অসিনা অপাম্বা মহৈ অমা পুরকপা ঙমগনি অমসুং বাবা বিশ্বনাথকী থৌজালদগী ঐখোয়না লান অসিদা মায়-পাকপসু ঙমগনি হায়বগী ঐহাক্না থাজবা থম্মি। ঐহাক্না অদোম খুদিংনা হকশেল ফনা লৈনবা থৌজাল নীজরি, বাবা বিশ্বনাথকী খুয়াখাদা কোক নোন্দুনা অদোমগী তেক্ত-কায়দনবা, হকশেল ফনা লৈনবা য়াইফ থৌজাল নীজরি। মীওইবা খুন্নাইবু নুংঙাইনা থম্লিবদি বাবা বিশ্বনাথননি, মরম অদুনা মহাক্কী মফমদা লম-তুগী থৌজাল নীবদি মতাং চাবা ওইরোই। অদোম হকশেল ফনা লৈবীয়ু, অদোমগী ইমুং-মনুং হকচাং ফনা লৈবীয়ু, মসিগী ৱাখল্লোন অসিগা লোয়ননা ঐহাক্না অদোম্বু থাগৎচরি।
