গোৱাগী রাজ্যপাল শ্রী পি.এস. শ্রীধরন পিল্লাইজী, মমিং লৈরবা নহা ওইরিবা মুখ্য মন্ত্রী বৈদ প্রমোদ সাৱন্তজী, কেন্দ্র মন্ত্রীশিং সরবানন্দ সোনোৱালজী, শ্রীপদ নায়কজী, দা. মহেন্দ্রভাই মুঞ্জপারাজী, শ্রী শেখরজী, মালেম শিনবা থুংবদগী ৱর্ল্দ আয়ুর্বেদ কোংগ্রেস অসিদা শরুক য়ারিবা আয়ুশকী লমদা লৈরিবা স্কোলর অমসুং এক্সপর্ত পুম্নমক, অতোপ্পা দিগ্নিতরীশিং অমসুং নুপী অমদি নুপাশিং!
গোৱাগী ফজরবা লমদম অসিদা ৱর্ল্দ আয়ুর্বেদ কোংগ্রেসকীদমক ভারত অমসুং মপালদগী লাক্লিবা মরুপ পুম্নমকপু তরাম্না ওকচরি। ৱর্ল্দ আয়ুর্বেদ কোংগ্রেস মাইপাকহনবগীদমক ঐহাক্না পুম্নমকপু থমোয় শেংনা থাগৎপা ফোঙদোকচরি। থৌরম অসি ভারতনা মাগী নীংতম্বগী ‘আমৃত কাল’গী খোঙচৎ হৌবা মতমদা পাঙথোক্লি। ঐখোয়গী লোইশিং, বিজ্ঞান অমসুং কলচরেল এক্সপরিয়েন্সকী কুত্থাংদা মালেমগী য়াইফনবা ফিরেপ লৌবা অসি ‘অমৃত কাল’গী অচৌবা পান্দম অমনি। অমসুং আয়ুর্বেদ অসি মসিগীদমক মপাঙ্গল কনবা অমসুং কান্নগদবা মীদিয়ম অমনি। ভারতনা চহি অসিদা জি-২০ গ্রুপকী য়ুম্বু ওইরি অমসুং চিয়র তৌরি। জি২০ সম্মিৎকী থিম অসি – “ৱান আর্থ, ৱান ফেমিলী, ৱান ফ্যুচর”না ওইরি! ময়াম্না ৱর্ল্দ আয়ুর্বেদ কোংগ্রেসতা মালেম পুম্বগী হকশেলগা লোয়ননা অসিগুম্বা হীরমশিংগী মতাংদা খন্ন-নৈনগনি। মালেমগী লৈবাক ৩০ হেনবনা আয়ুর্বেদপু ত্রেদিস্নেল মেদিসিনগী সিস্তেম অমা ওইনা শকখঙবা অসিদা ঐহাক্না নুংঙাইবা পোকই। পুন্না ঐখোয়না আয়ুর্বেদপু শকখঙনবা লৈবাক কয়া কয়াদা য়ৌহন্নবা হোৎনবা তাই।
মরুপশিং,
ঙসি ঐহাক্না আয়ুশকা মরী লৈনবা ইন্সতিত্যুসন অহুম কত্থোকপগী খুদোংচাবা ফংজখি। ওল ইন্দিয়া ইন্সতিত্যুত ওফ আয়ুর্বেদ – গোৱা, নেস্নেল ইন্সতিত্যুত ওফ উন্নানি মেদিসিন – ঘজিয়াবাদ অমসুং নেস্নেল ইন্সতিত্যুত ওফ হোমিওপেথী-দিল্লীনা আয়ুশ হেল্থ কিয়র সিস্তেমদা অনৌবা ইনোৎ অমা হাপ্লগনি।
মরুপশিং,
আয়ুর্বেদ অসি ‘সর্বে ভবন্তু সুখিন, সর্বে সন্তু নিরাময়’ হায়বদি ‘পুম্নমক নুংঙাইবা ওইরসনু, পুম্নমক লাইনা-তিন্না চেনদবা ওইরসনু’ হায়বা ফিলোসোফী অমসুং মোত্তো চেনবা অদুগুম্বা বিজ্ঞান অমনি। অতোপ্পা ৱাহৈদনা লাইনা অমা শন্দোরকপা মতমফা মদু লায়েংনবা হোৎনবগী মহুৎ পুন্সিবু লাইনা চেনদবা ওইহনগদবনি। মসিগী ৱাখল্লোন অসি করিগুম্বা লাইনা লৈত্রবদি ঐখোয়না মশা-মউ ফবা ওইগনি। অদুবু আয়ুর্বেদকী মতুং ইন্নসু মশা-মউ ফবা হায়বগী ৱাহন্থোক অসি অদুক্কী মতিক চাউখ্রে। ময়াম্না খঙই মদুদি আয়ুর্বেদনা হায় সম দোস সমাগ্বিস্চ, সম ধাতু মক ক্রিয়া। প্রসন্ন আত্মেন্দ্রিয় মনা, স্বস্থ ইতি অভিধীয়তে হায়বদি হকচাংদা খল কাইদবা মীওইনা থবক থৌরম পুম্মক খল কাইদে অমসুং ৱাখলনা নুংঙাই, হকচাং ফনা লৈ। মরম অসিনা আয়ুর্বেদনা লায়েংবগী মথক্তা মশা মউ ফনা লৈনবা ৱারী শাই অমসুং মশা মউ ফনা লৈহনবনি। মালেমনা হৌজিক অহোংবা অমসুং ত্রেন্দ পুম্নমক্তগী থোরক্লে অমসুং পুন্সিগী অরিবা ফিলোসোফীদা হঞ্জিল্লক্লি। অমসুং ভারতনা মসিদা মাংজৌননা থবক পাইখৎপা হৌখিবদা নুংঙাইবা পোকই। ঐহাক্না গুজরাতকী মুখ্য মন্ত্রী ওইনা শেবা তৌরিঙৈ মতমদা ঐখোয়না আয়ুর্বেদপু চাউখৎহন্নবা খোঙথাং কয়া পাইখৎপা হৌখি। ঐখোয়না আয়ুর্বেদকা মরী লৈনবা ইন্সতিত্যুসনশিং চাউখৎহনখি অমসুং গুজরাত আয়ুর্বেদ য়ুনিভর্সিতী মোদর্নাইজ তৌখি। মসিগী ফলনা ঙসি মালেমগী অহানবা অমসুং অমত্তা ঙাইবা গ্লোবেল সেন্তর ফোর ত্রেদিস্নেল মেদিসিন অসি দব্ল্যু.ঐচ.ও.না জামনগরদা লিংখৎখি। ঐখোয়না সরকারদা তোখাইবা আয়ুশ মন্ত্রালয় অমা হাংদোকখি মসিনা আয়ুর্বেদতা থৱায় য়াওবা অমসুং থাজবা হেনগৎহনখি। ঙসি এম্সকী পরিং মখদা ‘ওল ইন্দিয়া ইন্সতিত্যুত ওফ আয়ুর্বেদ’সু হাংদোক্লি। চহি অসিদা গ্লোবেল আয়ুশ ইন্নোভেসন অমসুং ইনভেস্তমেন্ত সম্মিৎ মাইপাক্না পাঙথোকখি অমসুং দব্ল্যু.ঐচ.ও.না ভারতকী খোঙথাংশিং অসিবু থাগৎখি। মালেম পুম্বনা হৌজিক গ্লোবেল ফেস্তিবেল ওফ হেল্থ এন্দ ৱেলনেস ওইনা ইন্তর্নেস্নেল য়োগ দে পালন তৌরি। অতোপ্পা ৱাহৈদনা য়োগ অমসুং আয়ুর্বেদ অসি মমাংদা নাথৈদুনা থমখিবা অদু ঙসিদি অপুনবা মীওইবা জাতিগী অনৌবা আশাগী মঙাল ওইরকখি।
মরুপশিং,
আয়ুর্বেদকা মরী লৈনবা অতোপ্পা হীরম অমা লৈ ৱাফম অদু ঐহাক্না ৱর্ল্দ আয়ুর্বেদ কোংগ্রেসতা শোইদনা থমজনীংই। মসি তুংদা লাক্কদৌরিবা চহিচাশিংদা আয়ুর্বেদকী অফবা তুংলমচৎকীদমক চপ মান্না মথৌ তাই।
মরুপশিং,
আয়ুর্বেদকী মতাংদা মালেমনা য়ারকপা অসি ঙাইবদা মতম য়াম্না চংখি মরমদি মোদর্ন সাইন্স হায়বা অসি খুদম-চাংদমদা য়ুম্ফম ওই। ঐখোয়দা আয়ুর্বেদকা মরী লৈনবা ফলশিং লোয়ননা ইফেক্তশিং লে অদুবু ঐখোয়দা খুদম-চাংদমদি লৈখিদে। মসিনা মরম ওইদুনা ঙসি ঐখোয়না ‘দেতা-বেজ ইভিদেন্স’ দোক্যুমেন্তেসন তৌবা য়াম্না মরু ওইরক্লি। হীরম অসিদা ঐখোয়না মতম শাংনা লেপ্পা লৈতনা হোৎনবা তাই। ঐখোয়গী মেদিকেল দেতা, রিসর্চ অমসুং জর্নেলসিং পুন্না পুথোকপা অমসুং মোদর্ন সাইন্তিফিক পেরামিতরদা ক্লেম খুদিংমক ভেরিফাই তৌবা তাই। মাইকৈ অসিদা হৌখিবা চহি খরদা ভারত্তা চাউনা থবক পাইখৎখি। ঐখোয়না ইভিদেন্স-বেজ রিসর্চ দেতাগীদমক আয়ুশ রিসর্চ পোর্তেল অমসু শেমখি। মসিদা রিসর্চ স্তদী ৪০,০০০রোমগী দেতা য়াওরি। কোরোনা মনুংদা ঐখোয়দা আয়ুশকা মরী লৈনবা অখন্নবা রিসর্চ স্তদী ১৫০রোম লৈখি। মসিগী এক্সপরিয়েন্স অসিনা মাং থাদুনা ঐখোয়না হৌজিক ‘নেস্নেল আয়ুশ রিসর্চ কনসোর্তিয়ম’ শেম্নবা মাইকৈদা চংশিল্লি। য়োগ অমসুং আয়ুর্বেদকা মরী লৈনবা মরু ওইবা রিসর্চসু এম্সকী সেন্তর ফোর ইন্তিগ্রেতেদ মেদিসিনগুম্বা ইন্সতিত্যুসনশিংদা তৌরি। মফম অসিগী আয়ুর্বেদ অমসুং য়োগগা মরী লৈনবা রিসর্চ পেপরশিং মমিং লৈরবা ইন্তর্নেস্নেল জর্নেলশিংদা ফোঙবা অসিদা ঐহাক্না নুংঙাইবা পোকই। হন্দক্তা জর্নেল ওফ দি অমেরিকন কোলেজ ওফ কার্দিওলোজী অমসুং ন্যুরোলোজী জর্নেলগুম্বা মমিং লৈরবা জর্নেলশিংদা রিসর্চ পেপর কয়া ফোঙখি। ঐহাক্না ৱর্ল্দ আয়ুর্বেদ কোংগ্রেসতা শরুক য়াবীরিবা পুম্নমক্তা আয়ুর্বেদকী গ্লোবেল স্তেচর ফংনবা ভারতকী লোয়ননা চুংশিন্নবা অমসুং মতেং পাংনবা হায়জরি।
ইচিল-ইনাওশিং,
আয়ুর্বেদকী তোইনা খন্ন-নৈনদবা ফীচর অমগা লৈ। মীওই খরনা আয়ুর্বেদঅসি শুপ্নগী লায়েংনবনি হায়না খল্লিঅদুবু মসিগী কান্নবদি আয়ুর্বেদনা পুন্সি করম্না হিংগনি তাকপী তম্বী। করিগুম্বা ঐহাক্না মোদর্ন তর্মিনোলোজী শীজিন্নদুনা মসুবু শন্দোক্না তাকপা তারবদি মদুগী খুদম অমা ঐহাক্না পীজগে। মালেগী খ্বাইদগী ফবা কম্পনীদগী অদোম্না খ্বাইদগী ফবা কার অমা লৈরে। কার অসিদা মেন্যুএল বুক অমা য়াওরকই। মসিদা করম্বা থাও হাপকনি, করম্বা মতমদা অমদি করম্না সর্ভিসিং তৌগনি অমসুং করম্না মেন্তেন তৌগনি ঐখোয়না খঙবা তাই। করিগুম্বা দিজল ইঞ্জিন কারদা পেত্রোল হাপলুবা তারবদি শোইনদ অৱাবা নংগনি। মতৌ অসুম্না করিগুম্বা কম্প্যুতর অমা পাইবা তারবদি মাগী হর্দৱে্য়র অমসুং সোফৱেয়র নীংথিনা মথৌ তৌবা তাই। অমরোমদা ঐখোয়গী মেছিনশিং য়েংশিল্লিঙৈদা ঐখোয়গী হকচাংদা মীৎয়েং চংদে, করম্বা মখলগী চীঞ্জাক চাগদগে, করম্বা মখলগী রুতিন থমগনি অমসুং করি তৌরোই হায়বা অসিদা মীৎয়েং চংদে। আয়ুর্বেদনা ঐখোয়দা হর্দৱেয়র অমসুং সোফৱেয়রগুম্না হকচাং অমসুং ৱাখলসু পুন্না মশা-মউ ফনা লৈবা অমসুং চিন্না-চান্না লৈবা তঙাই ফদে তাকপী। খুদম ওইনা ঙসি নীংথিনা তুম্বা অসিনা মেদিকেল সাইন্সকীদমক অচৌবা তোপিক অমনি। অদোম খঙলব্রা, মহারিসি চরকগুম্বা আচার্য়না মসিগী মতাংদা চহিচা কয়াগী মমাংদা কুপ্না ইদুনা থম্লমখি। মসিনা আয়ুর্বেদকী মতিক-ময়াই।
মরুপশিং,
ঐখোয়গী লৈবাক্তা হায়নবা অমা লৈ: ‘স্বাস্থ্যম পরমার্থ সাধনম’ হায়বদি হকশেল অসিনা তৌবা ঙম্বা অমসুং চাউখৎপগী পাম্বৈনি। ঐখোয়গী পুন্সিদা মসিগী মন্ত্রগী ৱাহন্থোক লৈরিবা অসিগা চপ মান্ননা শেন্মীৎলোনগী মীৎয়েংদগী য়েংবদসু মরু ওই। ঙসি আয়ুশকী লমদা অনৌবা ওইথোকপা য়াবা মশিং লাকঙমদনা লৈরে। আয়ুর্বেদকী মনা মশিং থাবা, আয়ুশকী হীদাক লাংথক শাবা অমসুং সপ্লাই তৌবা, নত্ত্রগা দিজিতেল সর্ভিসশিং পীবা ওইরবসু আয়ুশ স্তার্ত-অপশিংগীদমক অচৌবা স্কোপ অমা লৈ।
ইচিল-ইনাওশিং,
আয়ুশ ইন্দস্ত্রীগী খ্বাইদগী চাউবা মপাঙ্গল অসি মসিদা মীপুম খুদিংমক্কীদমক তোঙান-তোঙানবা মখলগী খুদোংচাবশিং লৈ। খুদম ওইনা এম.এস.এম.ই., স্মোল স্কেল ইন্দস্ত্রী ৪০,০০০রোমনা তোঙান-তোঙানবা প্রদক্ত কয়া ফংহল্লি অমসুং ভারত্তা আয়ুশকী লমদা তোঙান-তোঙানবা থৌশিলশিং পাইখৎলি। মসিনা লোকেল ইকনোমীদা শাহৌ অমা পীরি। লৈবাক্কী আয়ুশ ইন্দস্ত্রী অসি চহি নিপানগী মমাংদা শুপ্নগী করোর ২০,০০০ খক্তা ওইরমখি। ঙসিদি আয়ুশ ইন্দস্ত্রী অসি লুপা করোর লাখ ১.৫রোম ওইরে। মসিনা হায়বদি চহি ৭-৮ অসিদা শরুক ৭রোম খুমাং চাউশিনখি হায়বনি। আয়ুশ অসিমক অচৌবা ইন্দস্ত্রী অমসুং অচৌবা ইকনোমী অমা ওইরক্লে। মসিনা তুংদা গ্লোবেল মার্কেৎতা হেন্না খুমাং চাউশিল্লকপা য়ানা লৈ। গ্লোবেল হরবেল মেদিসিন অমসুং স্পাইসেসকী মার্কেৎ অসি দোলর বিলিয়ন ১২০রোম ওই হায়বদি লুপা করোর লাখ ১০রোম ওই। ত্রেদিস্নেল মেদিসিনগী সেক্তর অসি লেপ্পা লৈতনা খুমাং চাউশিল্লি অমসুং ঐখোয়না ওইথোকপা য়াবা খুদিংমক্কী মপুং ফানা কান্নবা লৌগদবনি। লৌউ-শিংউগী অনৌবা সেক্তর অমা রুরেল ইকনোমীগীদমক, ঐখোয়গী লৌমীশিংগীদমক থোরক্লি অমসুং মখোয়না য়াম্না অফবা মমলশিং ফংলি। সেক্তর অসিদা নহারোল কয়াগীদমক অনৌবা থবক লাখ কয়া পীরি।
মরুপশিং,
আয়ুর্বেদক মীয়াম্না পাম্নরক্লিবা অতোপ্পা মরু ওইবা হীরম অদুদি আয়ুর্বেদ অমসুং য়োগ তুরিজমনি। তুরিজমগী হব ওইরিবা গোৱাগুম্বা রাজ্য অমদা তুরিজম সেক্তরনা আয়ুর্বেদ অমসুং নেচরোপেথী চাউখৎহন্দুনা অনৌবা পনখৈ তম্না পুবা ঙমগনি। ওল ইন্দিয়া ইন্সতিত্যুত ওফ আয়ুর্বেদ – গোৱানা মাইকৈ অসিদা মরু ওইবা অহৌবা অমা ওইরগনি।
মরুপশিং,
ঙসি ভারতনা মালেমগী মাংদা ‘ৱান আর্থ, ৱান হেল্থ’কী ফ্যুচরিস্তিক বিজন অমা মাংদা থম্মি। ‘ৱান আর্থ, ৱান হেল্থ’কী ৱাহন্থোক্তি হকশেকগীদমক য়ুনিভর্সে বিজন অমা হায়বনি। ঈশিংদা লৈবা শাশিং, লমলক্কী শাশিং, মীওইবা নত্ত্রগা পাম্বৈগী হকশেল অসি অমগা অমগা মরী লৈনৈ। মখোয়বু তোখাই-তোখাইনা উবগী মহুৎ ওইনা অপুনবা ওইনা উবা তাই। আয়ুর্বেদকী মসিগী হোলিস্তিক বিজ অসি ভারতকী চৎনবী অমসুং পুন্সি মহিংগী শরুকনি। গোৱাদা পাঙথোক্লিবা ৱর্ল্দ আয়ুর্বেদ কোংগ্রেসতা হীরম পুম্নমক কুপ্না খন্নবা পাম্মি। ঐখোয়না আয়ুর্বেদ অমসুং আয়ুশপু হোলিস্তিক ওইনা করম্না মাংদা পুখৎকদগে হায়বগী রোদমেপ অমা শেম্বা তাই। অদোমগী খোঙথাংশিংনা মাইকৈ অসিদা শোইদনা কান্নবা পীগনি হায়না ঐহাক্না থাজৈ। থাজবা অসিগা লোয়ননা ঐহাক্না পুম্নমকপু হন্না-হন্না থাগৎচরি! আয়ুশ অমসুং আয়ুর্বেদতা য়াইফ মঙ্গোল পীজরি!
