জয় মা খোদাল,
ঙসি অখন্নবা থৌরম অসিদা, শেংলবা খোদালধামগী লমদম অমসুং ইমা খোদালগী ভক্তশিংগা উনবগী খুদোংচাবা ফংবা অসি ঐগী লাইবক য়াম্না ফবনি। ঙসি শ্রী খোদালধাম ত্রস্তনা মীয়ামগী য়াইফনবা লমদা অতোপ্পা মরুওইবা থবক অমা পায়খৎলে। ঙসি অমরেলিদা কেন্সর হোস্পিতাল অমসুং রিছার্স সেন্তরগী থবক হৌরে। লাক্লিবা চহি খরগী মনুংদা, শ্রী খোদালধাম ত্রস্ত লিংখৎপা চহি ১৪ মপুংফারগনি। হায়রিবা থৌরমশিং অসিগীদমক ময়াম পুম্নমক ঐনা য়াইফ-পাউজেল পীজরি।
ঐগী ইমুং-মনুংগী মীওইশিং,
থবক, গুনশিং অমসুং কৎথোকপগী ৱাশক্কা লোয়ননা চহি ১৪গী মমাঙদা লিউবা পতিদার ফুরুপনা শ্রী খোদালধাম ত্রস্ত লিংখৎখি। মতম অদুদগী হৌনা ত্রস্ত অসিনা মীওই মিল্লিয়ন কয়াগী পুন্সিদা অহোংবা পুরকখ্রে। লাইরিক-লাইশু, লৌউ-শিংউ নত্ত্রগা হকশেলগী লমদা অদোমগী ত্রস্ত অসিনা লেপ্তনা হিরম খুদিংমক্তা অফবা থবক পাংথোক্নবা হোৎনরি। অমরেলিদা শাগদৌরিবা কেন্সর হোস্পিতাল অসি মীয়াম থবক তৌবগী অতোপ্পা খুদম অমা ওইগনি হায়না ঐনা থাজৈ। মসিনা অমরেলি য়াওনা সৌরাস্ত্রাগী পাক-চাউরবা লমদম কান্নবা পীগনি।
মরুপশিং,
কেন্সরগুম্বা শাথিরবা লায়না অমা লায়য়েংবা হায়বসি মীওই অমগী অমসুং ইমুং অমগী অচৌবা শিংনবা অমনি। অনাবা মীওই অমতা কেন্সর লায়য়েংবদা খুদোংচাদবশিং মায়োক্নদবা সরকারনা হোৎনরি। মসিগী ৱাখল্লোন্দা, হৌখিবা চহি ৯দা অনৌবা কেন্সর হোস্পিতাল ৩০ লিংখৎলে। হৌজিক অনৌবা কেন্সর হোস্পিতাল ১০ শেমগৎলি।
মরুপশিং,
কেন্সর লায়য়েংবদা মতম চানা খঙদোকপা অসি য়াম্না মরুওই। ঐখোয়গী খুঙ্গংগী মীয়াম্না কেন্সরগী মরমদা খঙলবা মতমদা, মসি য়াম্না থেংমল্লি, মসি হকচাংগী মফম খুদিংমক্তা শন্দোকখি। অসিগুম্বা ফিবম অসি থোক্তনবা, কেন্দ্র সরকারনা খুঙ্গংশিংদা অয়ুস্মান অরোগ্যা মন্দির লাখ ১.৫ হেন্না শারে। অয়ুস্মান অরোগ্যা মন্দিরশিংদা কেন্সর য়াওনা অরুবা লায়নাশিং ঙন্না খঙদোক্নবা থবক পায়খৎলে। কেন্সর অসি ঙল্লিঙৈদা খঙদোকলবদি, মসি লায়য়েংবদা দোক্তরশিংগী মতেং য়াম্না পাংই। কেন্দ্র সরকারগী থবক অসিদা নুপীশিংশু কান্নবা য়াম্না ফংই। সর্ভাইকেল কেন্সর নত্ত্রগা ব্রিস্ত কেন্সর ওইগেরা, মসি ঙল্লিঙৈদা খঙদোকপদা অয়ুস্মান অরোগ্যা মন্দিরশিংনা মরুওইবা থৌদাং অমা লৌরি।
মরুপশিং,
হৌখিবা চহি ২০দা মমাঙদা অমুক্তা ওইখিদ্রিবা মওংদা গুজরাত্তা হকশেলগী ফিবম য়াম্না ফগৎলে। ঙসি গুজরাত ভারত্তা মেদিকেলগী মফম অমা ওইরে। ২০০২ ফাওবদা, গুজরাত্তা মেদিকেল কলেজ ১১ খক লৈরমখি, ঙসিদি কলেজ মশিং ৪০ য়ৌরে। পি.জি সিত মশিংশু শরুক অহুম হেনগৎলে। হৌজিক রাজকোত্তা অনৌবা এ.আই.আই.এম.এস ফাওবা লৈরে। ২০০২ ফাওবদা, গুজরাত্তা ফার্মাসি কলেজ ১৩ খক লৈরমখি, ঙসি মশিং ১০০ য়ৌরে। চহি ২০গী মনুংদা, দিপ্লোমা ফার্মাসি কলেজ মশিং ৬তগী মশিং ৩০দা হেনগৎলে। হকশেলগী লমদা অচৌবা অওনবা পুরক্নবা নমুনা অমা গুজরাতনা পীরে। রাজ্য অসিদা খুঙ্গং খুদিংমক্তা কম্মুনিতি হেল্থ সেন্তরশিং লিংখৎলে। ত্রাইবেল অমসুং লায়রবশিংগী লমদমশিংদা হকশেলগী খুদোংচাবশিং ফংহল্লে। গুজরাত্তা এম্বুলেন্স ১০৮ গী খুদোংচাবদা মীয়াম্না লৈরিবা থাজবা হেনগৎলে।
ঐগী ইমুং-মনুংগী মীওইশিং,
লৈবাক অসি চাউখৎনবগীদমক লৈবাক অসিগী মীয়াম মশা ফবা অমসুং মপাঙ্গল কনবা দরকার ওই। ঙসি মা খোদালগী থৌজালগা লোয়ননা, ঐখোয়গী সরকারনা মসিগী ৱাখল্লোন অসি তুংইন্নরি। ঐখোয়না অয়ুস্মান ভারত য়োজনা হৌদোকপদগী লায়রবশিং অরুবা লায়নাশিং লায়য়েংবগী মতাংদা ৱানিঙাই ওইদ্রে। ঙসিদি, স্কিম অসিগী মতেংদগী মীওই করোর ৬ হোস্পিতালদা মিং চল্লে অমসুং লায়য়েংলে। মসিদা মশিং য়াম্লবা কেন্সর অনাবা কয়া য়াওরি। করিগুম্বা অয়ুস্মান ভারত স্কিম লৈরমদ্রবদি, লায়রবা মীওইশিং অসি লুপা করোর লাখ ১ চাদিং তৌরমগনি। ঐখোয়গী সরকারনা জন ঔসাধি কেন্দ্র লিশিং ১০ হাংদোক্লে, মফম অসিদা মীয়াম্না হিদাক-লাংথক মমল চাদা ৮০ তানা ফংলে। হৌজিক সরকারনা পি.এম জন ঔসাধি কেন্দ্র মশিং লিশিং ২৫ দা হেনগৎহল্লগনি। মমল হোংবা হিদাক-লাংথকশিংনা মরম ওইদুনা, অনাবশিংনা লুপ করোর লিশিং ৩০ কনবা ঙম্লে। সরকারনা কেন্সরগী হিদাক্কী মমল য়েংশিনবদগী কেন্সর অনাবা মীওই কয়া কান্নবা ফংলে।
মরুপশিং,
ঐহাক্কা অদোমগা অচেৎপা মরী অমা লৈনরি। ঐনা অদোমগী মরক্তা লাকপদা, ঐনা শোইদনা করিগুম্বা খর হায়জগনি। ঙসিশু ঐনা অদোমগী মফমদা অমুক হন্না হায়জরি। মওং অমদা, ঐনা ৱাফম ৯ হায়জরি। মমাগী থবক লাকপদা মতমদা নবরাত্রি নিংশিবা অসি মহৌশানি, মরম অদুনা ঐনা ৱাফম ৯ হায়রিবনি। ঐনা ৱাফম ৯ অসি অমুক্কা হন্না অদোমগী মফমদা হায়জরি। অহানবদা, ঈশিং মরিক অমা ফাওবা মাঙহল্লোইদবনি অমসুং ঈশিং লিক্নবা শীজিন্নবগী মতাংদা মীয়ামদা হেন্না খঙহনগদবনি। অনিশুবদা, খুঙ্গং অমদগী খুঙ্গং অমদা চৎতুনা মীয়ামদা দিজিতেল ত্রান্সসেক্সনশিংগী মরমদা খঙহনগদবনি। অহুমশুবদা, অদোমগী খুঙ্গং, অদোমগী লৈকায়, অদোমগী সহর লু-নানবদা মকোক তানবা থবক তৌগদবনি। মরিশুবদা, ঙম্লিবমখৈ লমদম অসিগী পোৎথোকশিং শীজিন্নগদবনি, ভারত্তা শাবা পোৎলমশিং খক্তা শীজিন্নগদবনি। মঙাশুবদা, অদোমগী লৈবাক হান্না য়েংগদবনি, অদোমগী লৈবাক কোয়গদবনি অমসুং অদোমগী লৈবাক্কী তুরিজম চাউখৎহনগদবনি। তরুকশুবদা, লৌমীশিং মশিং হেন্না মহৌশাগী ওইবা লৌউ-শিংউগী থবকশিংগী মরমদা খঙহনগদবনি। তরেৎশুবদা, অদোমগী পুন্সিদা মিল্লেতশিং অমসুং শ্রী অন্না শীজিন্নগদবনি, মসি পাক-শান্না খকহনগদবনি। নিপালশুবদা, হকচাং ফবা, য়োগা নত্ত্রগা শান্নবা অসি অদোমগী পুন্সিগী তৎনবা য়াদ্রবা শরুক অমা ওইহনগদবনি। ঐগী মপনশুবা হায়জবদি, মখল খুদিংমক্কী ময়াই কাবা চীঞ্জাক্তগী লাপ্না লৈগদবনি, মখোয় অদোমগী পুন্সিদগী থাপ্না থমগদবনি।
মরুপশিং,
কৎথোকপা অমসুং তৌবা ঙম্বগা লোয়ননা অদোমগী থৌদাং খুদিংমক অদোম্না মখা তানা পাংথোক্কনি হায়না ঐনা থাজবা থম্লি। অমরেলিদা শাগদৌরিবা কেন্সর হোস্পিতাল অসি খুন্নাইগী য়াইফনবা থবক তৌবগী অতোপ্পা খুদম অমা ওইরগনি। মখোয়গী তুংগী থবকশিংগীদমক ঐনা লিউবা পতিদার সমাজ অমসুং শ্রী খোদালধাম ত্রস্ত য়াইফ-পাউজেল পীজরি। মা খোদালগী থৌজালগা লোয়ননা, অদোম্না মখা তানা মীয়ামগী থবক তৌবা ওইরসনু। অমুক হন্না ময়াম পুম্নমক্কী মফমদা ঐগী য়াইফ-পাউজেল পীজরি।
ঐ করিগুম্বা অমা হায়জগে, লান্না লৌবীগনু। হৌজিক ঈশ্বর, লক্সমী ইমা মফম অসিদা লেংশিল্লে অমসুং ঐ য়াম্না হরাওই। অদুবু মপান লৈবাকশিংদা লুহোংবা অসি অচুম্বরা? ঐখোয়গী লৈবাক্তা লুহোংবা য়াদবরা? ভারত্তগী শেন কয়া য়াম্না চৎখ্রে! মপান লৈবাকশিংদা চৎলগা লুহোংবগী লায়না অসি ঐখোয়গী খুন্নাইদা লৈহল্লোইদবনি। করিগীদমক ইমা খোদালগী মফমদা লুহোংবগী থৌরম পাংথোক্লোইদৌরিবনো? মরম অদুনা ঐনা ভারত্তা লুহোংসি হায়রবনি। মেদ ইন ইন্দিয়াগা মেরিদ ইন ইন্দিয়াগা চপ মান্নৈ। করিগুম্বা অদোম ইমুং-মনুংগী মীওই অমা ওইরবদি মসি অদোম খনগদবনি। ঐ শাংনা ঙাংলরোই। মীয়াম পুম্নমক য়াইফ-পাউজেল পীজরি। অদোম থাগৎচরি। জয় মা খোদাল !
