ঐহাক্কী নুংশিরবা নহা ওইরিবা মরুপশিং অমসুং পালিগী লমদমসিদা মশাগী শান্ন-খোৎনবগী হৈথোই শিংথোইবা মতৌ উৎপগীদমক্তা শান্নরোই খুদিংবু থাগৎচরি। শান্নবা হায়বসিদা মায়থীবা কৌবা অমত্তা লৈতে। মসিদা অদোম্না মায় পাকপা নত্ত্রগা করিগুম্বা খরা তম্বা ফংই। মরম অদুনা, ঐহাক্না শান্নরোই, মখোয়গী কোচ অমসুং মফমসিদা লৈরিবা মখোয়গী ইমুংগী মীওই খুদিংবু থাগৎচরি।
মরুপশিং,
সন্সদ খেল মহাকুম্ভ অসিদা ঐখোয়না ঙসি উরিবা থৱাই য়াওবগী মতৌ, মশাদা থাজবগী মতৌ উরি। ঙসিদি, নহা খুদিংগী শক্তাক্তি মখোয়গী থৱাই য়াওবগী মতৌনা ওইরি। শান্নরোইশিংনা শান্নবুংদা লৈরিবা ইথিল অদুমক ঙসিগী সরকার অসিদা লৈরি। শান্নরোইশিংনা গ্রাউন্দ লেভেলদা শান্নবগী খুদোংচাবা য়াম্না ফংবা পাম্মি, মশাগী খুঙ্গং, স্কুল, য়ুনিভর্সিতী অদুগা মসিদগী থাক ৱাংখত্তুনা নেস্নেল-ইন্তর্নেস্নেলদা শান্নবগী খুদোংচাবা ফংজবা পাম্মি। শান্নরোইশিংগী মসিগুম্বা অপাম্বা অসিনা ঙসিদি ভারতিয় জনতা পার্তীগী সন্সদ খেল মজাকুম্ভ অসিদগী মতেং ফংলি। ভারতিয় জনতা পার্তীনা মখোয়গী সন্সদকী পাম্বৈদগী মসিগুম্বা খেল মহাকুম্ভ পাংথোক্লিবা অসিবু ঐহাক্না থাগৎচনীংই, পুক্নিং থৌগৎনচনীংই। মসিদি হৌখিবা চহি খরদগী চৎনবী অমা ওইদুনা লাক্লি। বিজেপি সন্সদ খেল মহাকুম্ভনা জিলা, রাজ্যশিংদা পুকচেল শেংজবা শান্নরোই কয়াদা শান্নবগী খুদোংচাবা ফংহন্দুনা লাক্লি। মসিগুম্বা শান্নবগী থৌরম অসিনা অনৌবা শান্নরোই থীদোকপদসু অচৌবা থৌদাং লৌদুনা লাক্লি। অদুগা হৌজিক্তি, ভাজপা সন্সদনা নুপী মচা শান্নরোইশিংগী ওইবা অখন্নবা থৌরম অমসু পাংথোক্লগনি। ঐহাক্না ভাজপা, মখোয়গী সন্সদপু মসিগুম্বা থৌরম অসিবু শিনবী লাঙবীবগীদমক্তা থাগৎচরি।
মরুপশিং,
পালিগী স্কুল মহৈরোই ১১০০ হেনবনা সন্সদ খেল মহাকুম্ভদা শরুক য়াখ্রে হায়না ঐহাক্কী ইফমদা পাউদম্লকখ্রে। শান্নরোই লাক্ষ ২ হেনবনা শান্নবগী মাঙজিল থানা থোক্নরকখি। হায়রিবা শান্নরোই লাক্ষ অনি অসিনা মহাকুম্ভ অসিগী খুত্থাংদা এক্সপোজর গংলি, মশাগী হৈথোই শিংথোইবা উত্থোকপগী ফম্বাক অমা ফংলি, মসিদি মমাংদা অমুক্তা থোকখিদ্রিবা থৌওংনি। ঐহাক্না সন্সদকী ঐহাক্কী খোঙলোই পি.পি. চৌধরীজীবু মসিগুম্বা থৌরম অসি নীংথিনা পাংথোকপগীদমক্তা থাগৎচরি। রাজস্থানগী অথৌবা পোকপা লমদম অসিনা লান্মীদগী হৌরগা শান্নবগী শান্নবুংদা লৈবাক্কী মিংচৎ পুদুনা লাক্লি। অদোম শান্নরোইশিংনা চৎনবী অসি মখা তানা চত্থগনি হায়বগী ঐহাক্না থাজবা থমজরি। শান্নবগী খ্বাইদগী মশক থোকপা মগুন হায়রবদি, মায় পাক্নিংবগী অপাম্বনা মতম পুম্বতা অফবতা তৌনবা ইথিল পীদুনা হোৎনহনবা অসিনি। খ্বাইদগী মীথোই মীহেনবগী ঙমখৈ লৈতে, অদুনা মতম পুম্বদা খ্বাইদগী ওইনবা হোৎনদুনা লৈগদবনি। মসি শান্নবনা ঐখোয়দা তম্বীবা মমল নাইদ্রবা পারা অমনি। মরম অদুনা, মসিগী খেল মহাকুম্ভ অসিদি পুন্সিদা অহোংবা পুরকপগী চাউরবা জৈগ্যা অমসু ওইরিবনি।
মরুপশিং,
শান্নবগী অচৌবা মপাঙ্গল অমসু লৈ। মসিনা নহাশিংবু ফত্তবা লম্বীদা চৎপদগী কনবী। মসিনা ইশাদা থাজবগী চাং হেনগৎহল্লি, মিৎয়েং চঙফম থোকপা থবক্তা মিৎয়েং চঙহনবা ঙম্মি। নিশাগী লাংদা থুবা ওইরো নত্ত্রগা অতোপ্পা ফত্তবা থবক্তা হৈনবা ওইরো, শান্ন-খোৎনবনা পুম্নমক অসিদগী লাপ্না লৈহনবা ঙম্মি। মরম অদুনা, শান্ন-খোৎনবনা মীওই অমগী মশাগী শক্তাক চাউখৎহনবদা অচৌবা থৌদাং য়াই।
ঐহাক্কী নুংশিরবা মরুপশিং,
বিজেপি সরকার, রাজ্যদা নত্ত্রগা কেন্দ্রদা পানবা ওইরো, নহাশিংগী অপাম্বদা অহেনবা মিৎয়েং চঙলি। শান্নরোইশিংনা খ্বাইদগী য়াম্বা খুদোংচাবা পীদুনা, শান্নরোই খনবদা নুং-পান ফাওবা উহন্দুনা, সরকারগী মাইকৈদগী খুদোংচাবা খুদিংমক ফংহন্নবা হোৎনদুনা, মখোয়না ভারতকী শান্নরোইশিংদা মতেং য়াম্না পাংখ্রে। হৌখিবা চহি ১০ অসিদা, মমাংগী মতমশিংগা চাংদম্নবদা, ঐখোয়না শান্ন-খোৎনবগী বজেতপু শরুক অহুম হেনগৎহনখ্রে। লৈবাক্কী শান্নরোই চা কয়ানা ঙসিদি লৈবাক মনুং অমসুং মপান্দা ঊধঝএ স্কিমগী মখাদা ত্রেনিং তৌনরি। খেলো ইন্দিয়া গেসকী মখাদা, শান্নরোই লিশিং অহুম হেনবগী মফমদা থা খুদিংগী লুপা লিশিং ৫০গী শেলগী তেংবাং পীরি। গ্রাসরুত লেভলগী ওইনা, শান্নরোই লাক্ষ কয়ানা স্পোর্ত ইন্দিয়া সেন্তর লিশিং অমা হেনবদা ত্রেনিং তৌনরি। মসিগী মহৈদি ঐখোয়গী মাঙদা উরে। হন্দক্কী এসিয়ন গেম্সতা ঐখোয়না মেদল ১০০ হেন্না লৌদুনা রেকোর্দ থমখ্রে। এসিয়ন গেম্সতা মেদল ফংখিবা শান্নরোই কয়া অমদি খেলো ইন্দিয়া গেম্সতগী হৌদোকখিবা ঙাক্তনি।
ঐহাক্কী নুংশিরবা শান্নরোইশিং,
শান্নরোই অমনা তীম অমগী শরুক ওইদুনা শান্নবা মতমদা মশাগী মায় পাকপদগী হেন্দুনা তীমগী পান্দম ওইরিবা মায় পাক্নবা মশাগী হৈথোই শিংথোইবা উৎলি। মখোয়না মশাগী তীম, লৈবাক্কী পান্দম্বু মশাইগোন্দা হাপ্তুনা চৎলি। ঙসিগী অমৃতকাল অসিদা লৈবাক অসিনা মসিগুম্বা নহা ওইবা ৱাখল্লোনগা লোয়ননা তুংলমচত্তা চঙশিল্লি। হন্দক্কী তাং ১দা থোকখিবা বজেৎ অসিসু লৈবাক্কী নহাশিংগীদমক্তা কত্থোকপনি। সরকারনা রেল, রোদ অমসুং মোদর্ন ইনফ্রাস্ত্রকচরগীদমক্তা লুপা করোর লাক্ষ কয়া থাদরিবা অসিসু লৈবাক্কী নহাশিংগী কান্ননবনি। অফবা শোরোকপু কনানা খ্বাইদগী হেন্না পাম্বগে? ঐখোয়গী নহাশিংনা। অনৌবা বন্দে ভারত ত্রেন উবদা খ্বাইদগী হেন্না নুংঙাইবা ফাওরিবা অসি কনানো? ঐখোয়গী নহারোল। অচম্বা রেল বোগী লিশিং নিফুবু বন্দে ভারতকী থাক্তা ওন্থোক্লগনি হায়না লাউথোকখ্রিবা অসিগী কান্নবা কনানা ফংগনি? ঐখোয়গী নহাশিং। ভারতনা মোদর্ন ইনফ্রাস্ত্রকচরগীদমক্তা লুপা করোর লাক্ষ ১১ থাদগদৌরিবা অসিনা নহাশিংগী থবক ফংবগী পাম্বৈ ওইগনি। ভারতকী নহাশিংনা অনৌবা হীরম কয়া থীদোকপা ঙম্নবা, শান্ন-খোৎনবা নত্ত্রগা অতোপ্পা সেক্তরদা ওইরো, মশাগী ওইবা অচৌবা কম্পেনী কয়া লিংখৎপা ঙম্নবা হায়দুনা লুপা করোর লাক্ষ ১গী ফন্দ অমসু শেমখ্রবনি। সরকারনা স্তার্তঅপশিংগীদমক্তা তেক্স পীবদা কোম্থোকপগী ৱাফম অমসু লাউথোকখ্রবনি।
মরুপশিং,
মাইকৈ মরিদগী পাংথোক্লিবা চাউখৎ থৌরাংগী থবকশিংনা পালিগী লাইবক হোংহল্লগনি, পালিগে শক্তাক হোংলক্লবনি। পালি ওকে সভা খক্তদা, লুপা করোর ১৩,০০০গী শেনফম চঙনা শোরোক কয়া শাখ্রে। রেলৱে স্তেসন, রেলৱে ব্রিজ, রেলৱে দব্লিং তৌবা ওইরো, অদোম খুদিংনা মসিগুম্বা চাউখৎ থৌরাংগী খুদোংচাবা অমসুং কান্নবা ফংলবনি। পালিগী নহা, মহৈরোইশিংদা খ্বাইদগী য়াম্বা খুদোংচাবা ফংহন্নবা অমসুং মখোয়গী স্কিল দিভেলপমেন্তকী মতাংদসু পাঙ্গল হাপ্নবা সরকারনা অহেনবা মিৎয়েং চঙলি। পালিদা IT সেন্তর কয়া অমা শারে, অদুগা কেন্দ্রিয় বিদ্যালয় অনি অমগসু শাখ্রে। সরকারগী স্কুলশিংগী অনৌবা ক্লাসরুম শাবা ওইরো, কম্প্যুতর লেব অনৌবা কয়া শাবা ওইরো, মাইকৈ অসিদা পাংথোকফম থোকপা থবক খুদিংমক য়াম্না কন্না পাংথোক্লি। মফমসিদা মেদিকেল কোলেজ, পাসপোর্ত সেন্তর শাবদগী, খুঙ্গং খুদিংদা সোলর লাইত খিনবদগী, পালিগী মীয়ামগী পুন্সি মহিং অসি য়াম্না নুংঙাইরে। দবল ইঞ্জিন সরকার অসিগী মখাদা পালি য়াওনা রাজস্থানগী মীপুম খুদিংগী মপাঙ্গল হাপ্তুনা মখোয়বু মায় পাকপা ওইহনবা হায়বসিদা ঐখোয়না য়াম্না কন্না হোৎনরি। বিজেপি সরকারগী মসিগুম্বা হোৎনজমন কয়া অসিনা মরম ওইরগা, পালি অমসুং অপুনবা লমদম অসিগী মীয়ামগী পুন্সিদা অচৌবা অহোংবা লাক্লে। পুন্সিদা মাইয়োক্নবা শিংনবগী মশিংনা হন্থরক্লবদা, শান্ন-খোৎনবদা থৱাই য়াওবগী চাং হেনগৎলকই অমসুং মায় পাকপগী চাংসু অদুমক হেনগৎলকই। ঐহাক্না শান্নরোই খুদিংবু অমুক্কা হন্না থাগৎচরি। থাগৎচরি।
