কেবাদিয়াগী সেন্ত্রেল বিজিলেন্স কম্মিসন অমসুং সেন্ত্রেল ব্যুরো ওফ ইনবেস্তিগেসনগী জোইন্ত কনফরেন্সতা পীখিবা প্রধান মন্ত্রীগী ৱারোল

লোকপাল চিয়রমেন জস্তিস পিনাকি চন্দ্র ঘোষ জী, সেত্রেল বিজিলেন্স কম্মিশনার সুরেশ এন. পতেল জী, সি.বি.আই. দাইরেক্তর সুবোধ কুমার জয়স্বাল জী, মশক নাইরবা পেনেলিস্তশিং, তোঙান তোঙানবা রাজ্যশিং অমদি দিপার্তমেন্তশিংগী সেনিয়র ওফিসিয়েলশিং অমসুং অতোপ্পা মশক নাইরবশিংনা থৌরম অসিদা শরুক য়ারি,

চিং-লেম্লবী অমসুং লেম্লবশিং!

সরদার ভল্লভভাই পতেলগী শোদোদা করপ্সনগী থোক্লক্লিবা অনৌবা চেলেঞ্জশিং অসিগী আর্থ লৈবা সোলুসনশিং পুথোক্নবা সেসন অমগীদমক নখোয় পুম্নমক্না মফম অসিদা পুনখ্রে৷ ভারতকী চাওখৎ-থৌরাং, পব্লিক কন্সর্নশিং অমদি প্রজাগী য়াইফনবনা মরু ওইনা খন্দুনা লৈঙাক-শাসন তৌহনবা হায়বসিনা মতম পুম্নমক্তা সরদার ভল্লভভাই পতেলগী খ্বাইদগী মরু ওইবা প্রোইয়োরিতী ওইখ্রে৷ ভারতকী মনিং-মখা তম্বগী অমিৃত মহোতসব ঐখোয়না পাংথোক্লি৷ লাক্কদৌরিবা চহি ২৫দা অত্মনির্ভর ভারতকী অচৌবা রিজোলুসনশিং অসি মংফাওননবা লৈবাক অসিনা চংশিল্লক্লি৷ অফবা লৈঙাক-শাসন, হায়বদি প্রো-পিপল অমসুং প্রোএক্তিব ওইবা শাসন হেন্না মপাঙ্গল কন্না লৈহন্নবা ঐখোয়না হোৎনরি৷ মরম অদুনা, নখোয়গী এক্সন-ওরিয়েন্তেদ দিলিজেন্স অসিনা সরদার সাহেবকী পান্দমশিং অসিদা থৌনা পীরগনি৷

মরুপশিং,

মসি ঐখোয়গী স্ক্রিপচরশিংদা পল্লি:

न्यायमूलं सुराज्यं

स्यात् !

মসিনা হায়রিবা অদুদি,মীপুম খুদিংমক্না পিচার ফংলবা মতম খক্তদা ‘সুরজ’ (অফবা লৈঙাক) লৈবা ওইথোক্কনি হায়বনি৷ পিক্কেরা চাওগেরা করপ্সন হায়বসিনা মী অমগী নত্রগা অমগী হকশিং মাংহল্লি৷ মসিনা লৈবাক্কী প্রজাগী হকশিং মৎলি, লৈবাক্কী চাওখৎপা থিন্থহল্লি অমদি লৈবাক অমা ওইনা ঐখোয়গী কল্লেক্তিব ইনর্জীদসু শোকহল্লি৷ মরুপ-মপাং নখোয় পুম্নমক অমদি নখোয়না মীহুৎ ওইরিবা ইন্সিতিত্যুসনশিংনা করপ্সনগী অরানবা ৱায়েল অসি মুথৎনবগী অচৌবা থৌদাং অমা লৈ৷ ঙসিদি, সরদার পতেলগী শেদোগী মখাদা অমদি ইমা নর্মদাগী তোর্বানশিংদা, নখোয়না নখোয়গী সোলুসনশিং পুথোকপা ঙম্নবা শোঞ্জগদবনি অমদি লৈবাক অসিগীদমক নখোয়গী থৌদাংশিং অসি মংফাওনবদা ইনর্জাইস তৌনবা হোৎনগদবনি৷

মরুপশিং,

হৌখিবা চহি তরুক-তরেৎ অসিদা, লৈবাক অসিদা করপ্সন লাকশিনবা ঙম্নবা প্রজাগী মরক্তা কনফিদেন্স লেংদনা ঐখোয়না থম্বা ঙমখ্রে৷ ঙসিদি মিদলমেন অমতা য়াওদনা সরকারগী স্কিমশিংগী কান্নবশিং ফংগনি হায়না লৈবাক অসিদা লৈরিবা প্রজানা থাজবা থমখ্রে৷ অদুগা ঙসিদি, লৈবক অসিবু নমথাক তৌরম্বশিং, লাইরববু লুত তৌখিবশিং, মখোয়না কয়ামুক ৱাংনা শক্তি লৈরবসু, মখোয়না লৈবাক অসিগী নত্রগা মালেম অসিগী মফম অমা হেক্তদা লৈরবসু, মখোয়দা মীনুংশি মখাতানা উৎলোই, মখোয়বু সরকার অসিনা লেম্না থাররোই হায়নসু লৈবাক অসিনা থাজবা হৌরকখ্রে৷

মরুপশিং,

মসিগী থাজবা অসি য়াম্না লাইনা তরাই-তরাইনা শেমগৎলকখিবা নত্তে হায়বসি নখোয়নসু খঙলম্লগনি৷ মমাংগী সরকারশিং অমদি সিস্তেমশিংনা পোলিতিকেল অমসুং এদমিনিস্ত্রেতিব ৱিল ৱাৎখি৷ ঙসিদি, করপ্সন লান্থেংননবা পোলিতিকেল ৱিলসু লৈরে অমদি এদমিনিস্ত্রেতিব লেবেলদা লেপ্প-লৈতনা ইমপ্রুবমেন্ত লাক্লি৷

মরুপশিং,

মোদর্ন এপ্রোচকা লোইননা, মীওইবা জাতিগী য়াইফননবগীদমক ২১শুবা চহি-চাগী ভারতনা তেক্নোলোজী শিজিন্নবদা মীৎয়েং থম্লি৷ অনৌবা ভারতনা ইন্নোবেত তৌরি, ইনিসিয়েত তৌরি অমদি ইমপ্লিমেন্ত তৌরি৷ করপ্সন অসি সিস্তেম অসিগী শরুক ওইদুনা লৈগনি হায়বসি অনৌবা ভারতনা মখাতানা য়াবা ঙম্লরোই৷ অনৌবা ভারতনা ত্রান্সপরেন্সী লৈবা সিস্তেম, ইফিসিয়েন্ত ওইবা প্রোসেস অমদি ইং-চিকপা শাসন অমা পাম্মী৷

মরুপশিং,

নিং-খা তম্লবা মতুং চহি খুজিংশিংদা, সরকারনা খুদিংমক মহাক্কী কন্ত্রোল মখাদা থমগদবনি হায়বসিনা মমাংগী সিস্তেমগী স্পিরিত ওইরমখি৷ মমাংগী সরকারশিংনা মখোয় মশেলগী মরক্তা মেক্সিমম কন্ত্রোল থম্লকখি অমদি মসিনা মরম ওইদুনা সিস্তেম অসিদা অরানবা তেন্দেন্সী কয়া অমা লাকখি৷ য়ুমদবু ওইরবসু, ইমুংদবু ওইরবসু নত্রগা লৈবাক অমদবু ওইরবসু মেক্সিমম কন্ত্রোল তৌবা অসিনা খ্বাইদগী চাওনা অকাইবা পী৷ মরম অদুনা, নগরিকশিংগী পুন্সিদা সরকারগী ইন্তরফেরেন্স অসি লিমিত্তা থম্নবা ঐখোয়না মসি মিসন মোদ ওইবা মওং অমদা লৌখি৷ সরকারগী প্রোসিদ্যোরশিং অসি লাইথোকহন্নবা ঐখোয়না লেপ্প-লৈতনা হোৎনখি৷মেক্সিমম গভরমেন্ত কন্ত্রোল লৈহনবগী মহুৎতা, মিনিমম গভর্মেন্ত, মেক্সিমম গভর্নেন্সতা মীৎয়েং চংখি৷

মরুপশিং,

লৈবাক অসিগী প্রজাশিং হেন্না শক্তি লৈহন্নবা ত্রস্ত অমসুং তেক্নোলোজীদা মতৌ করম্না অখন্নবা মীৎযেং চংখ্রে হায়বসি নখোয় পুম্নমক্না উখ্রে৷ ঙসিদি লৈবাক অসিদা লৈরিবা সরকার অসিনা লৈবাক্কী প্রজাশিংবু থাজৈ অমদি মখোয়দা চিংননা য়েংদে৷ মসিগী থাজবা অসিনা করপ্সনগী মফম ময়াম অমসু ব্লোক তৌখ্রে৷ করপ্সন অমদি কান্নদবা খুদোংচাদবশিং অসিদগী লাপ্না লৈহন্নবগীদমক, দোকুমেন্তশিং বেরিপিকেসন তৌবগী লেয়রশিং অসি লৌথোকখ্রে৷ দিজিতেল তেক্নোলোজীগী খুৎথাংদা পেন্সনগীদমক বর্থ সর্তিফিকেতশিংদগী হৌরগা লাইফ সর্তিফিকেতশিং ফাওবদা ফেসিলিতী চা কয়া অমা মিদলমেন য়াওদনা ফংহল্লি৷ গ্যাস সিলিন্দরশিং বূক তৌবদগী হৌরগা তেক্সকা মরী লৈনবা প্রোসেসশিং, ওনলাইন অমসুং ফেসলেস প্রোসেসশিংনা করপ্সনগী অচৌবা সোর্স অমা ওইখ্রবা মীয়াম্না ক্বু শাংনা-শাংনা লেপ্পা অসিদগী ফ্রী ওইহনখ্রে৷

মরুপশিং,

ইফিসিয়েন্ত গভর্নেন্স অমদি ইজ ওফ দুইং বিজিনেসতা ত্রস্ত অমসুং তেক্নোলোজীগী ইম্পেক্ত অসি নখোয় পুম্নমক্না নিংথিনা মশক খঙলবা ঙাক্তনি৷ হৌখিবা মতমশিংদা থোক্লম্বা খুদিংমক পর্মিসনশিং অমসুং কমপ্লাইয়েন্সশিং লৌবা নত্রগা বিজিনেসশিং হৌদোকপা নত্রগা বেঙ্কশিংদগী লোনশিং লৌবা নত্রগা থিবা মতমদা, লৈবাক অসিনা অদুক্কী মতিক অৱাবা থেংনরম্মী অদুবু হৌজিক্তি মদু চুমথোকখ্রে৷ হৌখিবা চহি খরা অসিদা, ঐখোয়না আর্কিয়েক লো চা কয়াগী ৱেব লৌথোকখ্রে অমদি হৌজিক লৈরিবা চেলেঞ্জশিং অসি য়েংলগা অনৌবা লোশিং পুথোকখ্রে৷ হৌখিবা চহি খরদা কমপ্লাইয়েন্স লিশিং কয়া মুথৎখ্রে অমদি মতুং তারকপদা অহেনবা লিশিং কয়া মুথৎনবা প্লানশিং লৈরি৷ পর্মিসন অয়াম্বনা ফেসলেস ওইহনখ্রে অমদি সেল্ফ-এসেসমেন্ত অমসুং সেল্ফ-দিক্লারেসনগুম্বা প্রোসেসশিং অসিসু পুক্নিং থৌগৎলি৷ গভর্মেন্ত প্রোক্যোর্মেন্তশিংদা ত্রান্সপরেন্সলী লৈরে অমদি জি.ই.এম.(গভর্মেন্ত ই-মার্কেৎ প্লেস)না মরম ওইদুনা ই-তেন্দরিংদা চমম্নবা লৈরিবা হন্থহল্লে৷ দিজিতেল ফূতপ্রিন্তশিং শিজিন্নবা হেনগৎলকপা অসিনা মরম ওইদুনা ইনবেস্তিগেসনশিং তৌবা হেন্না হেন্না লাইথোকহল্লি অমদি হেন্না খুদোং চাহল্লি৷ হন্দক্তা ইকুই কুইদ্রিঙৈদা হৌদোকখিবা পি.এম. গতি শক্তি নেস্নেল মাস্তর প্লাননা দিসিজন মেকিংদা থেংনরিবা প্রোব্লেম অয়াম্বশিংসু লৌথোক্লগনি৷

মরুপশিং,

ত্রস্ত অমসুং তেক্নোলোজীগী ইরাদা ঐখোয়না চংসিল্লকপা মতমদা, নখোয় পুম্নমক্তা থম্লিবা লৈবাক্কী থাজবা অদুসু চাং মান্ননা মরু ওই৷ লৈবাক্কী হান্না হায়বা পোৎ অমা খক্তমক ঐখোয়না মতম পুম্নমক্তা নিংশিংগদবনি! ঐখোয়গী থবক্কী-পব্লিক ইন্তরেস্ত, পব্লিক কন্সর্নগী য়ার্দস্তিক অমা খক্তমক লৈ!

মসিগী য়ার্দস্তিক অসি করিগুম্বা ঐখোয়গী ৱারেপশিং অসিনা থুংবা থম্লবদি, নখোয়না মতম পুম্নমক্তা ঐহাকপু লৈবাক্কী কর্ময়োগি খুদিংমক্তা লেপ্লিবা অসি উবা ঙমগনি৷ সরকার অসিনা স্ত্রিক ওইবা লিগেল প্রোভিজনশিং মফম চানা থমখ্রে অমদি মখোয়বু চৎনহনবা হায়বসিনা ঐখোয়গী থৌদাংনি৷ অদুবু লোগী শক্তিগা লোইননা, ফেয়র বিহেবিয়র পুক্নিং থৌগৎপা অমদি মোতিবেত তৌবা অসিসু চাং মান্ননা মরু ওই৷

মরুপশিং,

মহৌশানা স্কেম, করপ্সন নত্রগা ইররিগুলরিতী খরা লাকপা মতমদা নখোবু উরকই৷ ৱাখল্লোন অমা ঐনা নখোয়দা সেয়র তৌবা পাম্মী৷ ঐখোয়না প্রিবেন্তিব বিজিলেন্সতা থবক তৌবা করিগী ঙম্লোইদৌরিবনো? করিগুম্বা ঐখোয়না চেকশিন্না লৈরবদি, মসি য়াম্না লাইনা পাংথোকপা ঙমগনি৷ তেক্নোলোজী অমসুং নখোয়গী এক্সপরিয়েন্স শিজিন্নদুনা নখোয়না মসিগী সিস্তেম অসি মখাতানা মপাঙ্গল লৈহনবা ঙমগনি৷

ঙসিদি, লৈবাক অসিদা প্রিবেন্তিব বিজিলেন্স লৈহন্নবা সরকারগী দিপার্তমেন্ত কয়া অমা, বেঙ্কশিং, পি.এস.য়ু.শিং অমসুং ফাইনান্সিয়েল ইন্সতিত্যুসনশিংনা য়াম্না মরু ওইবা থবক তৌরি৷ ঙাকথোকপা হাযবসিনা ফনবা লাইয়েংবদগী হেন্না ফৈ হায়বসি ঐখোয় পুম্নমক্না তাখ্রে৷ প্রিবেন্তিব বিজিলেন্সনা ঐখোয়গী মেথোলোজীগী শরুক অমা ওইহন্নবা নখোয়না হোৎনগদবনি৷ মসিনা খোয়গী থবক অসি লাইথোকহনগনি অমদি লৈবাক্কী রিসোর্সশিং কনবা ঙমগনি৷ সি.ভি.সি.না মহাক্কী মেনুএলদা এমেন্দমেন্ত খরা শেমখ্রে হায়না ঐঙোন্দা হায়রকই৷ ই-বিজিলেন্সকী মতাংদা অহেনবা চেপ্তর অমা মসিগী রুলবূক অসিদা হাপখ্রে৷ নুমিৎ খুদিংগী, থা খুদিংগী ক্রাইমগী পর্পিত্রেতরশিংনা অনৌবা লম্বীশিং পুথোক্লি অদুবু মখোয়গী মাংওইননা ঐখোয়না খোঙথাং অনি থাংগদবনি৷

মরুপশিং,

মসিগী লৈবাক, ইমা ভারতিদা নখোয়গী এফিলিয়েসন লৈরি হায়বসি নখোয়না নিংশিংগদবনি৷ প্রজাবু নমথাক তৌরিবা মীওইশিংগী ওইনদি লৈবাক অসিদা অমদি মালেম অসিদা শাফবা ওইবা মফম অমতা লৈরোই৷ লৈবাক্কী য়েংলগা ঐখোয়না ঐখোয়গী থবক লেপ্প-লৈতনা পাংথেক্কদবনি অমদি পুকচেল শেংনা অমসুং কৎথোকপগা লোইননা ঐখোয়গী থৌদাংশিং উৎকদবনি৷ মী অমা হেক্তবু কিহনবা পোকহনবগী মহুৎতা লাইরবশিংগী মরক্তদগী খ্বাইদগী লাইরবশিংদা লৈরিবা কান্নবা অকিবা অসি লৌথোকপনা নখোয়গী থৌদাংনি হায়বসি নখোয় পুম্নমক্না ৱাখলদা থমগদবনি৷ লৈবাক অসিদা করপ্সনগী মাইয়োক্তা লান্থেংনরিবা অসিদা নখোয়গী থৌদাংশিং অসি য়াম্না মরু ওই৷ তেক্নোলোজীগী নেগেতিব এস্পেক্তশিং লান্থেংনবা অসিসু চাং মান্ননা মরু ওই৷ অকনবা দিজিতেল গভর্নেন্সকা লোইননা, সাইবর ক্রাইম অমসুং সাইবর ফ্রোদ অসিসু অচৌবা চেলেঞ্জ অমা ওইরক্লি৷ মসিগী চেলেঞ্জশিং অসিদা নখোয় পুম্নমক্না হকচিন্না ৱাখল থাদগনি হায়না ঐনা খল্লি৷ সরকারগী দিপার্তমেন্ত পুম্নমক্তা লৈরিবা রুলশিং অমসুং প্রোসিদ্যোরশিং রিভ্যু তৌবগী মতাংদা ঐনা ওগস্ত ১৫দা রেদ ফোর্ততগী হায়জখ্রে৷ অনৌবা ভারতকী অনৌবা খোঙথাংগী লম্বীদা চংশিল্লকপদা অমসুং চহি খুজিং কয়া পন্দুনা লৈরম্লিবা অসিগুম্বা প্রোসেস অমা হেক্তা লৌথোক্নবা সি.ভি.সি. অমসুং সি.বি.আই. য়াওনা এন্তি-করপ্সন ইন্সতিত্যুসন পুম্নমক্তসু ঐনা হায়জবা পাম্মী৷ লৈবাক অসিনা মনিং-মখা তম্লকপগী অমিৃত মহোতসব পাংথোকপা মতমদা অনৌবা ভারতকীদমক অনৌবা এপ্রোচ অমা অমসুং অনৌবা রিজোলুসনশিংগা লোইননা চংশিল্লক্লিবা অসিদগী হেন্না ফবা মতম অমা লৈগদগে? মসিগী মহায়গ্য অসিদা নখোয়নসু হোৎনগদবনি৷ করপ্সনগীদমক অনৌবা ভারতকী জিরো তোলিরেন্স পোলিসী অসি হেন্না মপাঙ্গল লৈহনগদবনি৷ মসিগী ব্রেনস্তোর্মিং ওইরবা মীফম অসিদা অসিগুম্বা প্রোসিদ্যোরশিং অমসুং লোশিং অসিসু নখোয়না খন্ন-নৈনগনি হায়না ঐনা অশা তৌরি৷

লাইরবশিংনা সিস্তেম অসিদা হেন্না নক্না চংশিল্লক্নবগী মওংদা অমসুং মসিদগী করপ্সন লৌথোক্ননবগীদমক নখোয়না লোশিং অসি চৎনহনগদবনি৷ মসি লৈবাক অসিদা পীবা অচৌবা সর্ভিস অমা ওইরগনি৷ মনিং-মখা তম্বগী অসিগুম্লবা মতম অসিদা করপ্সন ফ্রী ওইবা সমাজ অমা শেমগৎপদা নখোয়না ইন্নোবেসনশিংগা লোইননা চংশিল্লক্কনি হায়বগী অশাদা, ঐনা ময়াম পুম্নমক্তা য়াইফ-মঙ্গোল পীজরি!

হন্না-হন্না থাগৎচরি!