খুরিমজরি।
ঙসি অসি এপোইন্তমেন্ত লেত্তর ফংলিবা নহা ওইরিবা মরুপশিংগী কাউঙম্লরোইদবা নুমিৎ অমনি অদুগা মসিগা লোয়ননা নুমিৎ অসি লৈবাক অসিগী য়াম্না পুৱারী ওইরবা নুমিৎ অমসুনি। ১৯৪৭গী হায়রিবা নুমিৎ অসি হায়বসি জুলাই ২২ অসিদা হৌজিক ওইরিবা মচু অহুমগী ফিরাল অসি কন্সতিত্যুন্সী এসেমব্লীনা অয়াবা পীখি। মসিগী য়াম্না মরুওইরবা নুমিৎ অসিদা নখোয় পুম্নমক্না সরকারগী থবক্কী জোইনিং লেত্তর ফংবা হায়বসি য়াম্না পুক্নিং থৌগৎনীংঙাইনি। সরকার থবক তৌবা মতমদা নখোয় পুম্নমক্না মচু অহুমগী মীংচৎ পুরক্নবা হোৎনগদবনি, লৈবাক অসিগী মাই পাকপা পুরক্নবা হোৎনগদবনি। নীংখা তম্লবা মতুংগী মতম অসিদা লৈবাক অসিনা চাউখৎ থৌরাংগী পান্দম ফংনবা হোৎনরিবা মতম অসিদা নখোয়না সরকারগী থবক চংবা হায়বসি য়াম্না চাউবা খুদোংচাবা অমনি। মসিগী নখোয়না কন্না হোৎনবগী মহৈনি। ঐহাক্না এপোইন্তমেন্ত লেত্তর ফংলবা নহারোল খুদিংমক অমসুং নখোয়গী ইমুং মনুংবু থাগৎপা ফোঙদোকচরি।
মরুপশিং,
অজাদি কি অমৃত মহোৎশব অসিদা লৈবাকমচা খুদিংমক্না ভারত অসি লাক্কদৌরিবা চহি ২৫ অসিগী মনুংদা চাউখৎলবা লৈবাক অমা ওইহন্নবা ৱাশক লৌরি। মসিগী চহি ২৫ অসি নখোয় পুম্নমক্কা লোয়ননা ভারতকী ওইনা য়াম্না মরুওইবা অমনি। ঙসি ভারত্তা মালেম্না থম্লিবা থাজবা, মালেম পুম্নমক্না ভারত্তা মীৎয়েং চংলিবা, ভারতকী মরুওইবা অদু মালেম্না খংলক্লবা মতম অসিদা মসিগী খুদোংচাবা অসি ঐখোয় পুম্নমক্না লৌগদবনি। মখোয়না ভারতকী শেন্মিৎলোন অসি ১০শুবা মফমদা লৈরম্বদগী হৌখিবা চহি ৯ অসিদা ৫শুবা মফমদা লাকপা উবা ফংলে। এক্সপর্ত খুদিংমক্না লাক্কদৌরিবা চহি খরা অসিদা ভারত অসি মালেমগী শেন্মীৎলোনগী মকোক থোংবা অহুমগী মনুংদা চল্লগনি হায়না পানরি। মসিনা তাকপদি সেক্তর খুদিংমক্তা থবক্কী খুদোংচাবসু হেনগৎলগদনি অমসুং প্রজা মীয়ামগী চাগাসু হেনগৎলগনি। সরকারগী থবক তৌরিবা মীওই খুদিংমক্কী ওইনা মসিদগী হেন্না নুঙাইবা অমসুং মসিগী হেন্না মরুওইবা মতম অমা লৈররোই। লৈবাক অসিগী খল্লগা লৌবা অদোমগী ৱারেপশিংনা লৈবাক অসিগী চাউখৎ থৌরাংগী খোংজেল য়াংখৎহল্লগনি, মসি নখোয় পুম্নমক্কী খুদোংচাবনি। মসিগী অমৃতকাল অসি অদোম্না লৈবাক অসিগী শেবা তৌবগী য়াম্না চাউবা খুদোংচাবা অমা ফংলগনি। নখোয়গী অহানবা মীৎয়েংদি লৈবাক অসিগী মীয়ামগী পুন্সি মহিংদা অওনবা পুরকপা অমসুং মখোয়গী পুন্সিদগী খুদোংচাদবশিং লৌথোকপা ওইগদবনি। নখোয়না তারিবা দিপার্তমেন্ত অমহেক্তদা, নখোয়না তারিবা সহর নত্রগা খুঙ্গং অমহেক্তদা মখোয়না পাংথোক্লিবা থবক অদুনা মফম অদুগী মীয়ামগী অৱাবা কোকহন্নবা, মখোয়গী পুন্সি মহিং ফগৎহন্নবা হোৎনগদবনি অমসুং চহি ২৫গী মনুংদা লৈবাক অসিবু চাউখৎলবা লৈবাক অমা ওইহন্নবা মংলান অদু মংগদবনি। করিগুম্বা মতমদা মখোয়গী থৌদাং মচা অমনা কনাগুম্বা অমনা মতম শাংনা ঙাইজরবা অৱাবা অমা কোকহনবা ঙমগদৌরিবনি। জনাতা জনার্দন হায়বসি ইশ্বরগুম্বনি। মীয়ামদগী ফংবা থৌজাল, লাইরবশিংদগী ফংবা থৌজাল অসি ইশ্বরগী থৌজালগা মান্নৈ। মরম অদুনা নখোয়না অতোপ্পশিংগী মতেং পাংনবা ৱাখল্লোন্দা থবক তৌরবদি, নহাক্কী মীংচৎ হেনগৎকনি অমসুং পুন্সিগী খ্বাইদগী চাউবা লন অসি অপেনবনি অমসুং মদুগী অপেনবা অদু মফম অদুদগী ফংগনি।
মরুপশিং,
বেঙ্কিং সেক্তরদা লৈবা মীওই কয়ানা ঙসিগী প্রোগ্রাম অসিদগী এপোইন্তমেন্ত লেত্তরশিং ফংলি। ঐখোয়গী বেঙ্কিং সেক্তরনা শেন্মিৎলোন চাউখৎহনবদা চাউনা মতেং পাংই। ঙসিদি বেঙ্কিং সেক্তর অসি মপাঙ্গল খ্বাইদগী কনবা লৈবাকশিংগী মরক্তা ভারত অসিসু অমা ওইরে। অদুবু মসি চহি ৯গী মমাংদা ওইখিদে। লৈবাক্কী খনবদগী শক্তি পাইনীংবনা হেল্লকপা মতমদা করম্বা মখলগী অমাংবা থোকপগে হায়বগী লৈবাক অসিদা খুদম কয়া লৈ, মমাংগী সরকারগী মতমদা মসিগী অমাংবা ঐখোয়গী বেঙ্কিং সেক্তরদা উবা ফংখি, চৈথেং নংখি অমসুং অমাংবা অসি থেংনখি। হৌজিক মতম অসি দিজিতেলগী চহিনি, মীয়াম্না মোবাইল ফোনশিংদগী বেঙ্কিং সর্ভিসেস লৌরি, ফোন বেঙ্কিং তৌরি অদুবু চহি মাপনগী মমাংগী সরকার লৈরিঙৈ মতমদা ফোন বেঙ্কিংগী ৱাখল্লোন অসি তোঙানখি, চৎনবী তোঙানখি, পাম্বৈশিং তোঙানখি। মতম অদুদা, সরকার অদুগী মতমদা ফোন বেঙ্কিং অসি ঐহাকগুম্বা মীচম প্রজাশিংগী, নখোয় অমদি লৈবাক্কী ইরৈবাকচা করোর ১৪০গী ওইরমখিদে। মতম অদুদা অকক্নবা ইমুং অমগা নক্নবা শক্তি পাইরিবা লুচিংবশিংনা বেঙ্কশিংদা ফোন তৌদুনা মখোয়গী অনকপা মীওইশিংগীদমক লুপা করোর লিশিং কয়াগী লোনশিং লৌরমখি। লোনশিং অসি শীংগৎখিবা লৈখিদে অমসুং চেচাংদদি লোইনখি। লোন অমা শীংগৎনবা বেঙ্কতা অতোপ্পা লোন লৌনবা ফোন তৌখি, অনিশুবা লোন শীংগৎলগা অহুমশুবা লোন অমুক লৌখি। ফোন বেঙ্কিং স্কেম অসিনা মমাং সরকারগী খ্বাইদগী চাউবা স্কেমশিংগী মনুংদা অমা ওইরমখি। মমাং সরকারগী স্কেম অসিনা মরম ওইদুনা লৈবাক অসিগী বেঙ্কিং সিস্তেমগী য়াংলেন শরূ তেকখি। ২০১৪দা নখোয় পুম্নমক্না সরকার পাইহন্দুনা লৈবাক অসি শেবা তৌনবা খুদোংচাবা অমা পীখি। ২০১৪দা সরকার পাইরবা মতুংদা ঐখোয়না বেঙ্কেল সেক্তর অমসুং লৈবাকপু অৱাবা অসি মথং-মথং কোকহন্নবা ঐখোয়না থবক তৌবা হৌখি। ঐখোয়না পব্লিক সেক্তর বেঙ্কশিংগী মেনেজমেন্ত মপাঙ্গল কনখৎহনখি, প্রোফেস্নেলিজমদা মীৎয়েং চংখি। লৈবাক অসিদা অপীকপা বেঙ্কশিং মর্জ তৌদুনা অচৌবা বেঙ্কশিং শেমগৎখি। ঐখোয়না মীচম প্রজাগী লুপা লাখ ৫ ফাওবগী শেনফম অসি বেঙ্কতা নমদুনা লৈহনদবা ঙমখি। মরমদা বেঙ্কশিংগীদমক মীচম প্রজাশিংনা থাজবা লৈহনবা হায়বা অসি য়াম্না মরু ওই। মরম অসিনা কো-ওপরেতিব বেঙ্ক কয়া লুপখি। মীচম প্রজাগী ৱানা তানবা শেল অসি মাংহনখি অমসুং মসিনা মরম ওইদুনা প্রজাশিংগী ৯৯%না ৱানা তানখিবা শেল অদু লুপা লাখ ১দগী লাখ ৫ ফাওবদা লিমিৎ হেনগৎহন্দুনা মখোয়গী ৱানা তানবা শেল হঞ্জিনহনবা ঙমখি। সরকারনা পাইখৎপা অতোপ্পা মরু ওইবা খোঙথাং অসি বেঙ্কক্রপসী কোদগুম্বা লোশিং শেম্বনা ওইরি, মরম অমা নৎত্রগা মরম অমদগী করিগুম্বা কম্পনী অমা লোনখিবা তারবদি বেঙ্কশিংনা চৈথেং খ্বাইদগী হন্থনা নংখি। মসিগা ইরোইননা ঐখোয়না অরানবা তৌবশিং থীগৎখি, বেঙ্ক লুৎ তৌখিবশিংগী মরল-মথুম ফাজিনখি। ঙসি মসিগী মহৈ নখোয়গী মাংদা লৈরে। সরকারগী বেঙ্কশিংনা করোর লিশিং কয়া মাংবগী মতাংদা খন্নরমখি, এন.পি.এ.গী ওইনা ঙসি বেঙ্কশিংনা শেন্দোং চাউনা ফংবগী মতাংদা খন্নরি।
মরুপশিং,
সরকারগী বিজনগী মতুং ইন্না হৌখিবা চহি ৯ অসিদা ভারতকী মপাঙ্গল কনবা বেঙ্কিং সিস্তেম অমসুং বেঙ্ককী কর্মচারী পুম্নমক, মখোয়না তৌরিবা থবক অসি ঐখোয় পুম্নমক্কী ওইনা চাউথোকচনীংঙাই ওইবা ৱাফম অমা ওইখি। বেঙ্কতা থবক তৌরিবা ঐগী ইচিল-ইনাওশিংনা কন্না হোৎনখি মসিনা বেঙ্কশিংবু অৱাবদগী কনবা ঙমখি, মসিনা লৈবাক্কী শেন্মীলোন চাউখৎহনবদা অচৌবা থৌদাং অমা লৌখি অমসুং বেঙ্ককী কর্মচারীশিং, বেঙ্ককী মীয়াম্না ঐহাকপু অমসুং ঐহাক্কী বিজন অসিবু য়ানীংদবা উৎখিদে অমসুং পামদবা উৎখিদে। ঐহাক্না নীংশিংলি, জন ধন য়োজনা হৌদোকখিবা মতমদা অরিবা ৱাখল্লোনগা শাগোন্নদুনা হীংলিবা মীয়াম্না ঐঙোন্দা ৱাহং হংখি, লাইরবশিংনা শেলদি লৈতনা বেঙ্ক একাউন্ত হাংলগা করি তৌগনি? বেঙ্কশিংদা অৱাবা পীবা হেনগৎহনগনি, বেঙ্ককী কর্মচারীশিংনা করম্না থবক তৌগনি। য়ানীংদবা কয়া পাকশন্না ফোঙদোক্নরকখি। অদুবু বেঙ্কতা থবক তৌরিবা ঐগী মরুপশিংনা অয়ুক নুমিদাং কন্না হোৎন্দুনা লাইরবশিংগী জন ধন একাউন্ত হাংহনখি, মসিগীদমক মখোয়না স্লমশিংদা চৎখি, বেঙ্ককী কর্মচারীশিংনা মীওইশিং অসিগী বেঙ্ক একাউন্তশিং হাংবীখি। ঙসি লৈবাক অসিদা জন ধন বেঙ্ক একাউন্ত করোর ৫০ হাংখিবা অসি বেঙ্ককী ঐখোয়গী কর্মচারীশিংনা কন্না হোৎনখিবা অমসুং মখোয়গী সর্ভিসনা মরম ওইরগনি। বেঙ্ককী কর্মচারীশিংনা কন্না হোৎনবনা মরম ওইদুনা সরকারনা কোরোনাগী মতমদা নুপী করোর কয়াগী বেঙ্ক একাউন্তশিংদা হকথেংননা শেল ত্রান্সফর তৌবা ঙমহনখি।
মরুপশিং,
মীওই খরনা মসিগী অরানবা পাউথোক অসি শিজিন্নরম্মি অমসুং অনোর্গনাইজ সেক্তরদা লৈবা মীওইশিংগী মতেং পাংনবা ঐখোয়গী বেঙ্কিং সেক্তরদা অসিগুম্বা সিস্তেম লৈতে হায়না লেপ্তনা ফোঙদোকখি। মমাংগী সরকারশিংদা করম্না তৌখিবগে হায়বদু নখোয়না মমুত তানা খংলে। অদুবু ২০১৪গী মতুংদদি ফীভম অসি অসুম্না ওইদ্রে। সরকারনা মুদ্রা য়োজনাগী খুত্থাংদা নহারোলশিংদা গরেন্তী য়াওদনা লোনশিং পীনবা ৱারেপ লৌবদা বেঙ্ককী মীওইশিং মসিগী স্কিম অসি মাংলমদা পুশিনখি। সরকারনা নুপী সেল্ফ হেল্প গ্রুপশিংগী লোনগী শেনফম শরুক অনি হেনগৎপা মতমদা অহেনবা শেল্ফ-হেল্প গ্রুপ কয়ামরুমদা মতেং পাংখিবা অদু বেঙ্কশিংগী ইম্প্লোইয়ীশিংনি। কোবিদকী মতমদা সরকারনা MSME সেক্তরদা মতেং পাংনবা ৱারেপ লৌবা মতমদা MSME সেক্তরদা খ্বাইদগী য়াম্বা লোনশিং পীদুনা অমসুং মখোয়গী থবক মাংখ্রদবা ইন্ত্রপ্রিনোর করোর ১.৫ হেনবগী অপীকপা ইন্দস্ত্রীশিং কল্লদুনা মীওই করোর ১.৫ হেনবগী থবক কনখিবা অদু বেঙ্ককী ইম্প্লোইয়ীশিংনি। লৌমীশিংগী বেঙ্ক একাউন্ততা শেল হকথেংননা পীনবা সরকারনা প্রধান মন্ত্রী কিশান সম্মান নিধি য়োজনা হৌদোকপা মতমদা তেক্নোলোজী মতেংগা লোয়ননা অঙম্বা থাক্তা মসিগী স্কিম অসি মাই পাক্নবা হোৎনখিবা অদু বেঙ্করশিংননি।
সরকারনা স্ত্রীত ভেন্দরশিংগী অমসুং খোঙলম্বীশিংদা থেলাদা পোৎচৈ য়োল্লিবশিংগী সেল্ফ-রেস্পেক্তিং স্কিম অমা হৌদোকপা মতমদা বেঙ্করশিংনা মসিগী লাইরবশিং অসিগী কন্না হোৎনখি অমসুং বেঙ্ক ব্রাঞ্চ খরনা মখোয়বু কৌদুনা মখোয়গীদমক থবক পাইখৎখি অমসুং আইন অমা শেমখি। ঙসিদি, ঐখোয়গী বেঙ্ক ইম্প্লোইয়ীশিংনা কন্না হোৎনবদগী স্ত্রীত ভেন্দর লাখ ৫০ হেন্নবনা বেঙ্কতগী মতেং ফংবা ঙমখ্রে। ঐহাক্না বেঙ্ক ইপ্লোইয়ী খুদিংমকপু থাগৎপা ফোঙদোকচরি অমসুং হৌজিক নখোয়না বেঙ্কিং সেক্তরদা চংলগনি, নৌবা ইনর্জী অমা হাপচিল্লগনি, থাজবা অমা হাপচিল্লগনি, সমাজগীদমক করিগুম্বা খরা পাংথোকপগী অপাম্বা পোকলগনি। অহল ওইরবশিংনা কন্না হোৎনরিবা অসিদা নখোয়গী কন্না হোৎনবা অদুনা মতেং ওইরগনি। ঐখোয়না বেঙ্কিং সেক্তরদা খ্বাইদগী লাইরবা মীওইশিং অদু মতেং পাংবা পাম্মি। মরম অদুনা ঙসিদি এপোইন্তমেন্ত লেত্তরগা লোয়ননা নখোয়না ৱারেপ লৌবগী কেত্তরগী চৎলবনি।
মরুপশিং,
অচুম্বা ৱাখল্লোনগা লোয়ননা ৱারেপশিং লৌরবদি, অচুম্বা পোলিসীশিং শেম্মি, অদুগা মসিদগী লাকপা ফলশিং অদু য়াম্না ফজবা অমসুং মমাংদা অমুক্তা থোকখিদ্রিবা ওই। নিতি আয়োগকী রিপোর্ত্তা চহি ৫ অসিদা ভারত্তা ভারতমচা করোর ১৩.৫ হেনবনা পোভর্তী লাইন্দগী লান্থোকপা ঙমখ্রে। মসিগী ভারতকী মাই পাকপা অসিদা সরকারগী ইম্প্লোইবীশিংগী কন্না হোৎনবগী মহৈসু য়াওরিবনি। মসি লায়রশিংদা পক্কা য়ুম অমা শাবগী স্কিমবু ওইরো, নত্রগা লাইরবশিংগী তোইলেৎশিং শাবগী স্কিমবু ওইরো, নত্রগা লাইরবশিংদা ইলেক্ত্রিসিতী কন্নেক্সন পীনবা স্কিমবু ওইরো ঐখোয়গী সরকারগী ইম্প্লোইয়ীশিং অসিনা প্রজা মীয়ামদা খুঙ্গং অমদগী খুঙ্গং অমদা, য়ুমথোং অমদগী য়ুমথোং অমদা অসিগুম্বা স্কিমশিং অসি ফংহল্লি। মসিগী স্কিমশিং অসিনা লাইরবশিংগী মনাক্তা য়ৌবা মতমদা লাইরবশিংগী মোরেল অদু হেনগৎহল্লি অমসুং থাজবা লৈহল্লি। মসি করিগুম্বা ঐখোয়না পুন্না ভারত্তগী লাইরবা মুত্থৎনবা হোৎনবা হেনগৎলবদি ভারত্তগী লাইরবা মুত্থৎপা ঙম্মি হায়বগী সিম্বল অমনি। অদুগা লৈবাক অসিগী সরকারগী ইম্প্লোইয়ী খুদিংমক্না মসিগী অচৌবা থৌদাং লৈ। লাইরবশিংগী কান্নবা স্কিমশিং লৈরবদি নখোয়না মদু মুন্না খঙগদবনি অমসুং মীয়ামদা মদু ফংহন্নবা হোৎনগদবনি।
মরুপশিং,
ভারত্তা লাইরবা হন্থরকপগী অতোপ্পা মরম অমসুং লৈ। লাইরবা হন্থরক্লিঙৈ চৈরক অসিদা নিও-মিদ্দল ক্লাস মশিং অসি লৈবাক অসিদা লেপ্পা লৈতনা হেনগৎলক্লি। মসিনা মরম ওইরগা থবক্কী অনৌবা খুদোংচাবশিং হেনগৎহল্লি। ভারত্তা নিও-মিদ্দল ক্লাস হেনগৎলকপা অসিনা মখোয়গী দিমান্দ অমসুং মখোয়গী অপাম্বা হেনগৎলক্লি। মসিগী দিমান্দশিং অসি থুংহন্নবা ঙসিদি লৈবাক অসিদা মেন্যুফেকচরিংদা চাউনা হেনগৎহল্লে। ঙসি ঐখোয়গী ফেক্তরী অমসুং ইন্দস্ত্রীশিংনা রেকোর্দ ওইনা পোত্থোক পুথোক্লিবা অসিদা মরুওইনা ঐখোয়গী নহারোলশিংনা কান্নবা ফংলি। হৌজিক্কান অসিদা নখোয়না উরে মদুদি নুমিৎ খুদিংগী অনৌবা রেকোর্দকী মতাংদা ঙাংনরি, অনৌবা মাই পাকপশিংগী মতাংদা শোন্নরি। ভারত্তগী রেকোর্দ ওইনা মোবাইল ফোনশিং এক্সপোর্ত তৌরি। চহি অসিগী অহৌবা থা ৬তা ভারত্তা কারশিং য়োনখিবগী মশিং অসি পুক্নীং থৌগৎনীংঙাইনি। ভারত্তা ইলেক্ত্রিক ভেহিকলশিংসু রেকোর্দ ওইনা য়োল্লি। মসি পুম্নমক অসিনা লৈবাক অসিদা থবক ফংহনবগী চাং হেনগৎলক্লি।
মরুপশিং,
ঙসিদি মালেম পুম্বনা ভারতকী হৈথোই শিংথোইবদা মীৎয়েং চংলি। মালেমগী চাউখৎলবা শেন্মীৎলোনশিংগী মরক্তা মীয়ামগী পুন্সি নুংশাংবগী চহি অসিসু হেনগৎলক্লি, মালেমগী লৈবাক কয়ামরুমদা মশিং য়াম্লবা সিনিয়র সিতিজেনশিংনা থল্লি, অনৌবা মীরোল হন্থরক্লি, থবক তৌবা মীগী মীশিং হন্থরক্লি। মরম অসিনা ভারতকী নহারোলনা কন্না হোৎনবা, মখোয়গী স্কিল অমদি মতিক-ময়াই হেনগৎহন্নবা হোৎনবা মতম ওইরে। ভারতকী আই.তি. তেলেন্ত, দোক্তর, নর্স অমসুং ঐখোয়গী কন্সত্রক্সনদা থবক তৌরিবা মরুপশিং অসি ঐখোয়গী গল্ফ লৈবাকশিংদা কয়া য়াম্না পাম্নবগে ঐখোয়না উবা ফংলি। ভারত মচাগী তেলেন্ত অসি লৈবাক খুদিংমক্তা, সেক্তর খুদিংমক্তা লেপ্পা লৈতনা হেনগৎলক্লি। মরম অসিনা হৌখিবা চহি ৯দা সরকারনা স্কিল দিবেলপমেন্তদা চাউনা মীৎয়েং চংখি। পি.এম. কৌশাল বিকাস য়োজনাগী মখাদা নহা করোর ১.৫ রোম ত্রেন তৌখ্রে। সরকারনা মালেমগী লৈরিবা খুদোংচাবশিং অসিগীদমক ঐখোয়গী নহারোলবু শেম-শানবা স্কিল ইন্দিয়া ইন্তর্নেস্নেল সেন্তর ৩০ হাংদোক্লি। ঙসি অনৌবা মেদিকেল কোলেজশিং, অনৌবা আই.তি.আই.শিং, অনৌবা আই.আই.তি.শিং, তেক্নিকেল ইন্সতিত্যুতশিং শাগৎনবা কেম্পেন লৈবাক শিনবা থুংবদা কন্না চত্থরি। ২০১৪ ফাওবদা ঐখোয়গী লৈবাক্তা মেদিকেল কোলেজ ৩৮০রোম লৈরমখি। মসিগী মশিং অসি হৌখিবা চহি ৯দা ৭০০ হেন্না হেনখি। মতৌ অসুম্না নর্সিং কোলেজশিংগী মশিংদসু চাউনা হেনগৎলকখি। গ্লোবেল দিমান্দ থুংহল্লিবা স্কিলশিংনা ভারতকী নহারোলগীদমক অনৌবা খুদোংচাবা লাখ কয়া পীরগনি।
মরুপশিং,
নখোয় পুম্নমক্না য়াম্না পোজিতিব ওইবা মওং অমদা গভর্নমেন্ত সর্ভিস তৌনবা লাক্লি। হৌজিক নখোয়না লৈবাক্কী পোজিতিব ওইবা ৱাখল্লোন অসি মাংদা পুনবা থৌদাংসু লৌগদবনি। নখোয় পুম্নমক্না নখোয়গী অনীংবা-অপাম্বশিংসু হেনগৎহন্নবা হোৎনগদবনি। অনৌবা থৌদাংশিং লৌরবা মতুংদা তমশিনবা অমসুং ইশাবু চাউখৎচনবা থৌওং অসি মখা চত্থগদবনি। নখোয়বু মতেং পাংনবা সরকার অসিনা আই.জি.ও.তি. কর্ময়োগী কৌবা ওনলাইন লর্নিং প্লেৎফোর্ম অমা শেমখি। ঐহাক্না নখোয় পুম্নমক্তা মসিগী খুদোংচাবা অসি লৌনবা হোৎনবীয়ু হায়না ফোঙদোকচরি। অমুক হন্না ঐহাক্না অনৌবা থৌদাং অসিগীদমক নখোয় অমদি নখোয়গী ইমুং-মনুংশিংদা নুংঙাইবা ফোঙদোকচরি। অমসুং অনৌবা থৌদাং অসিনা অহৌবা ওইদুনা নখোয়গী পুন্সিদা হেন্না ৱাংবা পনখৈশিং য়ৌবা ঙম্বা ওইরসনু। নখোয়না শেবা তৌবগী খুদোংচাবা অমা ফংবদা নখোয়না মরম ওইদুনা লৈবাক্কী প্রজা খুদিংমক্না মখোয়গী মঙলানশিং থুংহন্নবা অনৌবা শক্তি কয়া অমা ফংলগনি। নখোয়গী মঙলান খুদিংমক, নখোয়গী ফিরেপ খুদিংমক থুংবা ওইরসনু, মসিগী থৌদাং অসিসু পাঙথোকপা ঙম্বা ওইরসনু, মসিগীদমক ঐহাক্না য়াইফ-মঙ্গোল পীজরি। হন্না-হন্না থাগৎচরি।
