ভারত তেক্স অসি মালেম শিনবা থুংবদগী পোলিসীমেকরশিং, CEOশিং অমসুং ইন্দস্ত্রী লুচিংবশিংগীদমক থবক তৌমিন্ননবা, চুংশিন্নবা অমসুং মপাং ওইনবগীদমক মপাঙ্গল কল্লবা ফম্পাক অমা ওইরি: পি.এম.
ভারত তেক্সনা ঐখোয়গী ত্রেদিস্নেল গার্মেন্তশিংগী খুত্থাংদা ভারতকী কলচরেল দাইভর্সিতী উৎলি: পি.এম.
ভারতনা মমাং চহিদা তেক্সতাইল অমসুং এপারেল এক্সপোর্ত তৌবদা 7% হেনগৎলকপা উবা ফংখি, অমসুং হৌজিক-হৌজিক্না মালেমগী ওইনা তেক্সতাইল্স অমসুং এপারেলশিংগী তরুক শুবা খ্বাইদগী চাউবা এক্সপোর্তর ওইরি: পি.এম.
সেক্তর অমা হেক্তনা স্কিল লৈরবা ৱার্কফোর্স লৈরবা মতমদা মায়পাকপা ঙম্মি অমসুং তেক্সতাইল ইন্দস্ত্রীদা স্কিলনা মরু ওইবা থৌদাং অমা লৌরি: পি.এম.
তেক্নোলোজীগী চহিচা অসিদা হেন্দলুম ক্রাফমেনশিপকী ওথেন্তিসিতী অসি ঙাক্না থম্বা মরু ওই: পি.এম.
মালেম্না ফেশন ফোর এনভাইর্নমেন্ত অমসুং এম্পাৱরমেন্তগী ভিজন ঙাক্না চৎলি, অমসুং ভারতনা হীরম অসিদা লমজিংলি: পি.এম.
ভারতকী তেক্সতাইল ইন্দস্ত্রীনা ‘ফাস্ত ফেশন ৱেস্ত’ অসি খুদোংচাবদা ওন্থোক্লি, তেক্সতাইল রিসাইক্লিং অমসুং অপ-সাইক্লিংদা লৈবাক্কী চাউরবা ত্রেদিস্নেল স্কিলশিং অসি শীজিন্নরি: পি.এম.
ঐগী মন্ত্রীমন্দলগী মরুপ, শ্রী গিরিরাজ সিংহ জি, পবিত্রা মারগারিতা জি, লৈবাক কয়াগী এম্বেসেদরশিং, সেনিয়র দিপ্লোমেতশিং অমসুং কেন্দ্র অমসুং রাজ্য সরকারগী ওফিসিএলশিং, ফেসন অমসুং তেক্সতাইলগী তাইবংগী লুচিংবশিং, ওন্ত্রাপ্রেন্যুয়রশিং, মহৈরোয়শিং, ঐগী ফিসাবীশিং অমসুং খুৎহৈবা মরুপশিং, ইবেম্মাশিং অমসুং ইবুংঙোশিং।
ঙসি ভারত মন্দাপমদা অনিশুবা ভারত তেক্স পাংথোক্লি। মসিগা লোয়ননা, ঐখোয়গী চৎনবীশিং, বিকসিত ভারতকী ওইথোকপা য়াবশিংশু উবা ফংলে। ঙসি ঐখোয়না হুল্লিবা মরুশিং য়াংনা চাউখৎলক্তুনা খোঙনাং পাম্বী অমা ওইরক্নবগী লম্বীদা লাকপা অসি লৈবাক অসিগী ওইনা য়াম্না চাউথোকচনিঙাইনি। হন্দক্কী থৌরম অসিদা অপুনবা ভেলু চেন, মসিগা থবক তৌমিন্নরিবা কাংবু ১২ মফম অসিদা পুল্লে। এসেসোরিশিং, ফিরোল, মেছিনশিং, কেমিকেলশিং অমসুং মচুশিং উৎলে। মালেম শীনবা থুংবগী সি.ই.ওশিং অমসুং ইন্দস্ত্রিগী লুচিংবশিং অমসুং থৌশিল শেম্বশিং পুন্নবা অফবা মফম অমা ভারত তেক্সনা ওইরে। থৌরম অসিগীদমক মরীলৈনবা খুদিংমক্কী থবকশিং অসি থাগৎনিঙাইনি। থবক অসিদা শরুক য়ারিবা মীওই খুদিংমক ঐনা থাগৎপা ফোঙদোকচরি।
মরুপশিং,
ঙসি ভারত তেক্সতা লৈবাক ১২০ হেন্না শরুক য়ারি, গিরিরাজনা হায়বগী মতুংইন্না লৈবাক ১২৬ হায়বদি মফম অসিদা লাক্লিবা ওন্ত্রাপ্রেন্যুয়র খুদিংমক্না লৈবাক ১২০ খঙবা ঙম্লে। মখোয়গী ললোন-ইতিক্কী থবকশিং মালেমদগী হৌরগা লমদম অমদা পাংথোক্নবগী খুদোংচাবা অমা ফংলে। অনৌবা কৈথেল থিরিবা ওন্ত্রাপ্রেন্যুয়রশিংনা মফম অসিদগী তোঙান-তোঙানবা লৈবাকশিংগী নাৎকী দরকার ওইবশিংগী মরমদা খঙবা ঙম্লে। ঙাইহাক্কী মমাঙদা ঐনা একজিবিসনগী স্তোলশিং য়েংবদা, ঐনা লোইনা য়েংবা ঙমখিদে, করিগুম্বা ঐনা লোইবা য়েংবা তারবদি মসি নুমিৎ নিনি চঙগনি অমসুং অসুক য়াম্বা মতম চঙনা য়েংনবা অদোমগী অয়াবা ঐঙোন্দা পীরোই। স্তোলশিং অসিদা ঐনা তোঙান-তোঙানবা মীওইশিংগা ৱারি শানরে, ঐনা পোৎলম কয়া খঙনবা হোৎনখি। হৌখিবা চহিদা ভারত তেক্স শরুক য়ারবা মতুংদা, মখোয়গী পোৎ লৈনবা অনৌবা মীওই কয়া ফংলে, মখোয়গী ললোন-ইতিক পাকথোক চাউথোক্লে হায়না মরুপ কয়ানা হায়খি। মখোয়না হায়খি মদুদি, সার পোৎ লৈগে হায়বা মীওই অশুক্কী মতিক য়াম্লে, ঐখোয়না পীবা ঙমদ্রে হায়না ঐঙোন্দা হায়রকখি। মরুপ খরনা ঐঙোন্দা হায়খি মদুদি করিগুম্বা ঐখোয়না ফেক্তরি অমা লিংখৎপা পাম্লবদি চাংচত্ত লুপা করোর ৭০-৭৫ চঙগনি অমসুং ঐখোয়না মীওই ২০০০ ফাওবা থবক পীগনি। মীওইশিং অসিগী দরকার ওইবশিং খঙনবা অমসুং মদু পীনবা অহানবদা ঐনা বেঙ্কগী মীওইশিংদা হায়জরি।
মরুপশিং,
থৌরম অসিদা তেক্সতাইল সেক্তরদা শেন থাদবা, মপান্দা থাদোকপা অমসুং হিরম খুদিংমক্ত চাউখৎপা হেনগৎহল্লে।
মরুপশিং,
ভারত তেক্সকী থৌরম অসিদা, ঐখোয়গী ফিরোলশিংদা ভারতকী নাৎ অমসুং চৎনবীশিং উৎলে। নোংপোক্তগী নোংচুপ, অৱাংদগী খা ফাওবা, ঐখোয়গী নাৎকী ফিরোল কয়া লৈরি, মখল কয়াগী ফিরোল শীজিন্নরি। লখনৌৱি চিকান, রাজস্থান অমসুং গুজরাতকী বন্ধানি, গুজরাতকী পতোলা অমসুং ঐগী কাসিগী বারানসী সিল্ক, সাউথকী কাঞ্চিপুরম সিল্ক, জম্মু অমসুং কাস্মিরগী পাসমিনা, মসি চপ চারবা মতমনি, অসিগুম্বা থৌরমশিংগী খুৎথাংদা, ঐখোয়গী ফিরোলগী উদ্যোগ চাউখৎনবা ঐখোয়গী খেন্নবা অমসুং তোপ তোপ্পশিং অসি পাম্বৈ অমা ওইগদবনি।
মরুপশিং,
হৌখিবা চহিদা ঐনা তেক্সতাইল ইন্দস্ত্রিগী ‘এফ’ মঙা-ফার্ম, ফাইবর, ফেব্রিক, ফেসন অমসুং ফোরেনগী মরমদা ফোঙদোকখ্রে। মসিগী ফার্ম, ফাইবর, ফেব্রিক, ফেসন অমসুং ফোরেনগী পান্দম অসি হৌজিক ভারতকী মিসন অমা ওইরে। মসিগী মিসন অসিনা লৌমীশিং, ফি শাবশিং, দিজাইন তৌরিবশিং অমসুং ললোনবশিং চাউখৎনবা অনৌবা খুদোংচাবশিং পীরে। হৌখিবা চহিদা ভারতকী তেক্সতাইল অমসুং ফিরোলশিং মপান্দা থাদোকপা চাদা ৭ হেনগৎলে। হৌজিক করিগুম্বা অদোম্না চাদা ওইবগী খুবাক খুরবদি, ঐঙোন্দা করি ওইগনি? মথংদা চাদা ১৭ ওইরবদি, মতম অদুদা ঐখোয় খুবাক খুগনি। ঙসিদি ঐখোয় মালেমদা তেক্সতাইল অমসুং ফিরোল থাদোকপা ৬শুবা খ্বাইদগী চাউবা লৈবাক ওইরে। ঐখোয়না মপান্দা থাদোকপা অসি লুপা করোর লাখ ৩ য়ৌরে। হৌজিক ঐখোয়গী পান্দম অসি ২০৩০ ফাওবগী মনুংদা লুপা করোর লাখ ৯ ওইরগনি।
মরুপশিং,
মাইপাকপা অসিগী মরুমদা চহি ১০ গী অকনবা থবক, চহি ১০ গী অফবা থৌশিলশিং লৈরি। মরম অদুনা, হৌখিবা চহি ১০ দা ঐখোয়গী তেক্সতাইল সেক্তরদা মপান লৈবাক্তগী শেন থাদরকপা শরুক অনিদা হেনগৎখি। মপান লৈবাক কয়া ভারত্ত শেন থাদবা পাম্লে হায়্যনা ঙসি মরুপ খরনা ঐঙোন্দা হায়খি। ঐনা মখোয়দা হায়খি মদুদি অদোম ঐখোয়গী খ্বাইদগী চাউবা এম্বেসেদরনি, অদোম্না হায়বা মতমদা, কনাগুম্বা অমনা করিগুম্বা অমা হেক্ত য়ানিংগনি, করিগুম্বা সরকারনা হায়রবদি, মদু অচুম্বরা নত্ত্রগা অরানবরা হায়না মখোয়না থিজিনগনি। চপ মান্নবা হিরমদগী ললোনবা মীওই অমনা হায়বা মতমদা, মখোয়না য়াগনি, মসি খুদোংচাবনি, ঐখোয় থবক ওইনা পায়খৎলসি।
মরুপশিং,
তেক্সতাইল অসি লৈবাক অসিদা থবক ফংনবগী খুদোংচাবশিং পীরিবা য়াম্না মরুওইবা ইন্দস্ত্রিশিংগী মনুংদা অমনি হায়বা অদোম খঙলে। সেক্তর অসিনা ভারতকী মেনুফেকচরিংগী চাদা ১১ মতেং পাংলি। চহি অসিগী বজেত্ত মিসন মেনুফেকচরিংদা ঐখোয়না মীৎয়েং চঙবা অদোম উরম্লগনি, মসিদা অদোমশু য়াওরবনি। মরম অদুনা, সেক্তর অসিদা শেন থাদরকপা মতমদা, চাউখৎলক্কনি, মতম অদুদা তেক্সতাইল শিন্মী করোর কয়া কান্নবা ফংলগনি।
মরুপশিং,
ভারতকী তেক্সতাইল সেক্তরগী খুদোংচাদবশিং কোকহনবা হায়বসি ঐখোয়গী ৱাশক্নি। মসিগীদমক, ঐখোয়না পান্দম অমদা অমসুং মীৎয়েং শানবা অনৌবা ৱাখল্লোনশিংগা লোয়ননা থবক তৌরি। ঐখোয়গী থবকশিংগী চাউরাকপা শক্তম অমা চহি অসিগী বজেত্ত উবা ফংগনি। ইন্দস্ত্রিগী দরকার ওইবশিং খঙদুনা, ঐখোয়গী লৈবাক্ত লশিং মতিক চানা ফংহনগদবনি, ভারতকী লশিং অসি মালেমগী ওইনা চাংদম্নবা ঙমগদবনি, ঐখোয়গী ভেলু চেন মপাঙ্গল কনখৎহনগদবনি। লশিং পুথোক্নবগী মিসন অমা ঐখোয়না হৌদোক্লে। মপান ফগৎলক্লিবা তেক্নিকেল তেক্সতাইলগুম্বা হিরমশিংদশু ঐখোয়না মীৎয়েং চঙলি। ঐনা গুজরাতকী চীফ মিনিস্তর ওইরিঙৈদা, ঐনা তেক্সতাইলগী মীওইশিংগা উনখিবা অদু ঐ নিংশিংলি অমসুং ঐনা মখোয়দা তেক্নিকেল তেক্সতাইলগী মরমদা ৱারি শানবা মতমদা, মখোয়না ঐঙোন্দা হংখি, অদোম করি পাম্বগে, হিরম অসিদা ভারতনা থবক পায়খৎপদা ঙসি ঐ হরাওই। ঐখোয়না লৈবাক অসিদা কার্বোন ফাইবর য়োকখৎলে অমসুং মসিদগী পোৎথোকশিং পুথোক্লে। অফবা মখলগী কার্বোন ফাইবর পুথোকপগী মাইকৈদা ভারতশু চঙশিল্লি। হায়রিবা থবকশিং অসিগা লোয়ননা, তেক্সতাইল সেক্তরগী দরকার ওইবশিংগীদমক ঐখোয়না ৱারেপ কয়াশু লৌরে। খুদম ওইনা, চহি অসিগী বজেত্ত, এম.এস.এম.ইশিং মখল খায়দোকপগী মতাংদা অহোংবা পুরক্লে অমসুং মসি পাকথোক চাউথোক্লে। মসিগা লোয়ননা, শেন্থং ফংবশু হেনগৎহল্লে। ঐখোয়গী তেক্সতাইল সেক্তরদা, এম.এস.এম.ইশিংনা চাদা ৮০ মতেং পাংলি।
মরুপশিং,
হৈথোই-শিংথোইবা শিন্মীশিং ফংলবা মতমদা সেক্তর অমা হেক্ত য়াম্না মমিং চৎকনি। তেক্সতাইল ইন্দস্ত্রিদা, স্কিলনা মরুওইবা থৌদাং লৌরি। মরম অদুনা, তেক্সতাইল ইন্দস্ত্রিগী হৈথোই-শিংথোইবা শিন্মীশিং শেমগৎনবা ঐখোয়না থবক পায়খৎলি। হিরম অসিদা ঐখোয়গী নেসনেল সেন্তরস ফোর এক্সলেন্স ফোর স্কিল্লিংনা মরুওইবা থৌদাং অমা লৌরি। ভেলু চেনগী দরকার ওইবা স্কিলশিংগীদমক ঐখোয়না সমার্থ য়োজনাদগী মতেং লৌরি। সমার্থনা ত্রেনিং পীরবা ঐখোয়গী ইচলশিং অমসুং চহি ৫, চহি ৭, চহি ১০ অসিদা মখোয়গী ফিবম ফগৎলকপগী মতাংদা ঙসি ৱারি শানরে, মসি তাবদা ঐ য়াম্না চাউথোকচৈ। তেক্নোলোজিগী যুগ অসিদা, ইয়োং অমসুং খুৎকী হৈশিংবা অসিশু চপ মান্না মরুওইরি। ইয়োংগী খুৎহৈবশিংগী স্কিল অসি মালেমগী কৈথেলশিংদা য়ৌহনগনি, মখোয়গী থবক শুবা ঙম্বগী থৌনা হেনগৎহনগদবনি, মখোয়দা অনৌবা খুদোংচাবশিং ফংহনগদবনি। মাইকৈ অসিদা ঐখোয়শু থবক পায়খৎলি। ইয়োং য়োকখৎনবা, হৌখিবা চহি ১০ দা, য়োনফমগী মতাংদা অচৌবা থৌরম ২৪০০ হেন্না পাংথোকখ্রে। ইয়োংগী পোৎথোকশিং ওনলাইন্দা য়োনবা পুক্নিং থৌগৎনবা ইন্দিয়া-হেন্দ-মেদ কৌবা ই-কম্মর্স প্লেতফোর্ম অমশু হৌদোক্লে। মসিদা হেন্দলুম ব্রান্দ লিশিং কয়া রেজিস্তার তৌরে। ইয়োংগী পোৎথোকশিং জি.আই তেগ তৌবদগী হায়রিবা ব্রান্দশিং য়াম্লবা কান্নবশিং ফংলে।
মরুপশিং,
হৌখিবা চহিগী ভারত তেক্সতাইল থৌরমদা তেক্সতাইল স্তার্দঅপ গ্রান্ত চেলেঞ্চ হৌদোকখ্রে। মসিদা নহারোলশিংদগী তেক্সতাইল সেক্তরগী অনৌবা তুংকোইনা চৎনবা য়াবা পাম্বৈশিং থিখি। চাংদম্নবা অসিদা লৈবাক শীনবা থুংবগী নহারোলশিং থৱায় য়াওনা শরুক য়াখি। চেলেঞ্চ অদুদা মাইপাক্লবশিং থৌরম অসিদা শরুক য়ারি। মখোয় ঙসি ঐখোয়গী ইরক্ত ফম্লি। ঙসি মফম অসিদা স্তার্দঅপশিংশু শরুক য়ারি, মখোয়না হায়রিবা নহারোলশিং অসি মাঙলোমদা পুখৎপা পাম্লি। অসিগুম্বা ফেস্তশিং অসিদা আই.আই.তি মাদ্রাস, অতল ইন্নোবেসন মিসন অমসুং অচৌবা লনাই তেক্সতাইল ওর্গনাইজেসন কয়ানা শৌগৎলি। মসিনা লৈবাক অসিদা স্তার্দ-অপ কলচর য়োকখৎকনি। ঐখোয়গী নহারোলশিং অনৌবা তেক্নো-তেক্সতাই স্তার্দঅপশিং অমসুং অনৌবা ৱাখল্লোন্দা থবক তৌরকপা ঐনা পাম্মী। ঐখোয়গী ইন্দস্ত্রিতশু ঐনা পাউতাক অমা পীনিংই। অনৌবা খুৎলায়শিং শেমগৎনবগীদমক ঐখোয়গী তেক্সতাইল ইন্দস্ত্রিনা আই.আই.তিগুম্বা ইন্দস্ত্রিশিংগা পুন্না থবক তৌমিন্নগদবনি। হৌজিক্কী মীরোলনা মতমগী চৎনবীগা লোয়ননা অরিবা ফিরোলশিং পাম্বগী চৎনবীশিং অমসুং সোসিএল মেদিয়াদা ঐখোয়না উবা ফংলে। মরম অদুনা, মমাংঙৈগী অমসুং অনৌবগা পুনশিনবগী মরুওইবা ঙসিদি য়াম্না হেনগৎলে। ভারত খক নত্তনা মালেম শীনবা থুংবগী নহারোলশিংনা পাম্নবা মমাংঙৈগী ফিরোলশিংনা ইথিল পীবা অসিগুম্বা পোৎথোকশিং ঐখোয়না হৌদোক্কদবনি। অতোপ্পা মরুওইবা ৱাফম অমনা তেক্নোলোজিগী থৌদাং হেনগৎলক্লিবা অসিনি। অনৌবা চৎনবীশিং পুথোকপা অমসুং অনৌবা স্তাইলশিং শেম্বদা এ.আইগুম্বা তেক্নোলোজিগী থৌদা হেনগৎলক্লি। ঐনা নিফ স্তোলদা চৎপা মতমদা, এ.আইগী খুৎথাংদা ২০২৬ গী চৎনবী হৌজিক ঐখোয়না শেমগৎলি হায়না মখোয়না ঐঙোন্দা হায়রকখি। হান্নদি, মালেমগী অতোপ্পা লৈবাকশিংনা ঐখোয়দা অমুবা শেৎগদবনি, ঐখোয় মসি শেৎগদবনি হায়রমখি, হৌজিক ঐখোয়না মালেমদা মসি শেৎগদবনি হায়রে। মরম অদুনা, ঙসিদি খাদি অসি য়োকখৎলে অমসুং অতোপ্পা অমদা এ.আইগী খুৎথাংদা ফেসনগী চৎনবীশিং অসি নৈনরে। ঐনা গুজরাতকী চীফ মিনিস্তর ওইরকপা ২০০৩ দা গান্ধীজিগী পোক্নফম লমদম পোরবন্দরদা ঐনা খাদিগী ফেসন সো অমা শীনখি। মদুদা নিফ অমসুং এন.আই.দিগী মহৈরোয়শিং শরুক য়াখি। ফেসন সো অদু বৈষ্ণব ভজন তো তেরে কে কাহিয়ে ঈশৈ বেকগ্রাউন্দা খোঙদুনা পাংথোকখি। সো অদুদা ঐনা বিনোভা জিগা নক্নবা মীওই খর শরুক চেবাউ পীখি অমসুং মখোয়গা ঐনা ফম্মিন্নখি অমসুং ফেসন সোদা শীজিন্নরিবা ৱাহৈশিং অদুদা অরিবা মীরোলগী মীওইশিং অঙকপা ফাওখি অমসুং তুংদা মখোয়না হায়খি মদুদি করিগুম্বা ঐখোয়না মতৌ অসুম্না পাংথোক্লবদি খাদি পাম্নবা হেনগৎলক্কনি। ঙসিদি খাদি চাউখৎলক্লি অমসুং মালেমগী মীয়াম্না পাম্নরে। ঐখোয়না মসি য়োকখৎকদবনি। নিংতম লালহৌ মনুংদা খাদি অসি লৈবাক্কী ওইখি, হৌজিক খাদি অসিনা ফেসন ওইগদবনি।
মরুপশিং,
ফোরেন তুর অমগী মতুংদা ঐ হল্লকপনি। ঐ মালেমগী ফেসনগী কোনুং ওইরিবা পেরিসতা চৎলুরে। খোঙচৎ অসিদা, তোঙান তোঙানবা হিরমশিংদা লৈবাক অসিগী মরক্ত থবক তৌমিন্নবা হায়না য়ানরে। ঐখোয় ৱারি শানখিবগী মরুওইবা ৱাফমশিংদি মহৌশা অমসুং ক্লাইমেত চেঞ্জনি। ঙসিগী মালেম্না তুংকোইনা চৎনবা য়াবা পুন্সি মহিংগী মরুওইবা খঙলে। ফেসনগী তাইবং অসি ক্লাইমেত চেঞ্জগী চৈথেং ফংদবনা নত্তে। ঙসিগী মালেম্না ইনভাইরোনমেন্তগীদমক ফেসন অমসুং শক্তি পীনবগীদমক ফেসনগী পান্দম থম্লে। ভারতকী তেক্সতাইলগী চৎনবীশিংদা তুংকোইবা হায়বসি তৎনবা য়াদ্রবা শরুক অমা ওইরি। ঐখোয়গী খাদি, ত্রাইবেলগী তেক্সতাইলশিং অমসুং মহৌশাগী মচুশিং শীজিন্নবা অসি তুংকোইনা চৎনবা য়াবা পুন্সি মহিংনি। হৌজিক ভারতকী অরিবা থবকশিং অসি অনৌবা তেক্নোলোজিশিংনা মতেং পাংলে। মসিনা খুৎহৈবশিং, ফিশাবশিং অমসুং নুপী কয়া হকথেংননা কান্নবা ফংলে।
মরুপশিং,
রিছোর্সশিং মপুংফানা শীজিন্নবা অমসুং অমোৎপা য়াম্না পুথোক্তবা অসি তেক্সতাইল ইন্দস্ত্রিগী মশক ওইগদবনি। ঙসি মালেমদা ফি মিল্লিয়ন কয়া অমনবা ওইরক্লি। মসিগী অয়াম্বা শরুক ফাস্ত ফেসন ৱেস্ত ওইরক্লি। ফেসনগী অহোংবা লাকপদগী মীয়াম্না ফিরোলশিং লিৎনদে। হায়রিবা ফিশিং অসি মালেমগী মফম কয়াদা হুন্দোক্নরি। মসিনা মহৌশা অমসুং ইকোলোজিদা অচৌবা শিংনবা অমা ওইরি।
২০৩০ ফাওবদা ফেসনগী অমোৎপা অসি তন মিল্লিয়ন ১৪৮ য়ৌগনি হায়না পানরি। তেক্সতাইলগী শরুক অয়াম্বা রিসাইকল তৌদ্রি। মসিগী কান্নবা ঐখোয়গী তেক্সতাইল ইন্দস্ত্রিনা লৌগদবনি। ঐখোয়গী ওইনা তেক্সতাইল রিসাইকল তৌবগী মমাংঙৈগী লৌশিং লৈজরি। খুদম ওইনা ঐখোয়না অরিবা ফিরোলশিংদগী কার্পেত শারি। ফিশাবশিং অমসুং য়ুমগী নুপীশিংনা অসিগুম্বা অমনবা ফিরোলশিংদগী মেত, রগশিং অমসুং কোভর কয়া শারি। মহারাস্ত্রাদা অমনবা ফিরোলশিংদগী গোধাদিশিং শারি। হৌজিক ভারতকী তেক্সতাইল রিসাইক্লিং মার্কেত অসি দোল্লর বিল্লিয়ন ৪০০ য়ৌরগনি হায়না থাজবা থম্লি। মালেমগী রিসাইকল তেক্সতাইল মার্কেত অসি দোল্লর বিল্লিয়ন ৭.৫ য়ৌরে। ঐখোয়না মাইকৈ অসিদা চঙশিল্লবদি ভারতনা অচৌবা কান্নবা ফংগনি।
মরুপশিং,
চহি চা কয়াগী মমাঙদা ভারতনা মাপন ফরিঙৈদা, ঐখোয়গী নুংঙাই-য়াইফবদা তেক্সতাইল ইন্দস্ত্রিনা অচৌবা থৌদাং অমা লৌরমখি। বিকসিত ভারত অমা ওইহন্নবা অমুক হন্না তেক্সতাইল সেক্তরনা অচৌবা থৌদাং অমা লৌনবা ৱাশক অমগা লোয়ননা ঙসি ঐখোয় মাঙলোমদা চঙশিল্লি। ভারত তেক্সগুম্বা থৌরমনা হিরম অসিদা ভারতকী ফিবম ফগৎহনগনি। থৌরম অসিনা চহি খুদিংগী অনৌবা রেকোর্দশিং থমগনি হায়না ঐনা থাজবা থমলি। থৌরম অসিগীদমক ঐনা অমুক হন্না অদোম থাগৎপা ফোঙদোকচরি।
অদোম থাগৎপা ফোঙদোকচরি।
