এক্সিলেন্সী,
তরাম্না ওকপীবা, মসিগী অচৌবা ইকাই খুম্নবা অসিগীদমক ঐহাক্না থমোয় শেংনা অদোমবু থাগৎপা ফোংদোকচরি অমসুং ঙসি ঐখোয়না চেকর্সতা অনৌবা পুৱারী অমা শেম্লগনি। অমসুং ভারত অমসুং UKনা পুন্না অনৌবা পুৱারী অমগী য়ুম্ফম থোল্লি।
এক্সিলেন্সী,
চহি অমগী মনুংদা ঐখোয়না অহুমশুবা ওইনা উন্নবগী খুদোংচাবা ফংলে। মসিমক ঐহাক্না য়াম্না মরু ওই হায়না খল্লি। অদুগা UK অমসুং ভারত, ঐখোয় অসি মওং অমদা মহৌশাগী ওইবা পার্তনরশিংনি। ঙসি অসি ঐখোয়গী মরীদা পুৱারী ওইরবা নুমিৎ অমনি। ঙসি ঐখোয়গী লৈবাক অনিমক্না নাকল অনিমক্তা কান্নবা পীগদবা FTA অমসুং দবল কন্ত্রিব্যুসন কনভেন্সন অমা লোইশিনগদৌরি। মসিমক ভারত অমসুং UKগীদমক, তুংগী মীরোলগীদমক য়াম্না মপাঙ্গল কনবা লম্বী অমা শেমগৎলি। মসিনা ললোন-ইতিক অমসুং ইন্দস্ত্রীগী লমদা অনৌবা পন্দুপ অমা হাংদোক্লি। ঐখোয়গী লৌমীশিং, ঐখোয়গী MSMEশিং, ঐখোয়গী নহারোলশিংগীদমক অনৌবা খুদোংচাবা কয়া অমা শেম্লগনি হায়না ঐনা থাজৈ। মসি খক্তা নত্তে, 21শুবা চহিচা অসি তেক্নোলোজীনা পুরকপা চহিচা অমনি। অসিগুম্বা ফীভম অসিদা ভারত অমসুং UKগী নহারোলশিং অমসুং হৈ-শিংলবা নহারোলশিংনা পুন্না অনৌবা মালেম অমা শেমগৎপদা অচৌবা থৌদাং লৌগনি। 21শুবা চহি চাগী তেক্নোলোজীনা নুমিৎ খুদিংগী অনৌবা খোঙথাংশিং লৌখৎলগনি হায়না আশা তৌরি। UK অমসুং ভারতকী হৈ-শিংলবা নহারোলশিং, মখোয়গী ৱাখল্লোনশিং, মখোয়গী স্কিলশিং পুনশিনবা মতমদা, মসিনা মালেমগী চাউখৎপগী অচৌবা গেরেন্তী অমা পীরি। মসিনা এমপ্লোয়মেন্ত হেনগৎহনগনি, স্কিল লৈরবা মীশিংগী মোবিলিতী মপাঙ্গল কনখৎহনগনি। অমসুং ঐহাক্না থাজৈ মদুদি ঐখোয়গী কমপ্রিহেন্সিব স্ত্রেতেজিক পার্তনরশিপ ‘ভিজন 2035’ অসিনা অনৌবা শাহৌ অমসুং অনৌবা ইনর্জী ফংলগনি।
এক্সিলেন্সী,
ঐহাক্না অমুক্কা হন্না অদোমদা ঐহাক্কী থমোয়দগী নুংঙাইবা ফোংদোকচরি। ভারত অমসুং UKগী মরক্তা পার্তনরশিপ অসি মপাঙ্গল কনখৎহনবদা অদোম্না য়াম্না মরু ওইবা থৌদাং অমা লৌখি। ঐহাক্না অদোমবু থাগৎচরি।
