প্রধান মন্ত্রী: ঙসি, ঐ অদোমগী ৱাফমশিং তাবা পাম্মি। অদোম্না করি করি থেংনরকই? মফমদুদা অদোম্না মীওই কয়া থেংনরক্লমগনি; অফবা থৌদোক খরা শোয়দনা থোক্লমগনি। ঐ ময়ামদুগী মরমদা তাবা পাম্মি।
কাপিল পরমর: খুরুমজরি, সর। হর-হর মহাদেব।
প্রধান মন্ত্রী: হর-হর মহাদেব।
কাপিল পরমর: সর, ঐ কাপিল পরমর, অদুগা ঐনা কেজি ৬০গী কাঙলুপ্তা ব্লাইন্দ জুদোদা শরুক য়ারুবনি। ২০২১দগী হৌরগা, ঐ কম্পিতিসন কয়াদা – পুন্না ১৬ তা শরুক য়াখ্রে। মখোয়গী মনুংদা, ঐনা সনাগী নিপাল য়াওনা মেদল ১৪ ফংলকখ্রে। ঐনা ব্রাউন সিল্ভর এসিয়ন গেম্সতা সিলভর অমা ফংলকখিই, ৱর্ল্দ গেম্সতা ব্রোঞ্জ অমা ফংলকখি, অদুগা ঐ ওলিম্পিক্সকীদমক্তা থোইদোক্না মিপাইরুদে মরমদি ঐ মমাঙদা কম্পিতিসন মশিং থিঙমদনা শান্নখ্রে। অদুম ওইনমক, ঐঙোন্দা শাফু খরদি ফাওখি। অদুবু দেবেন্দ্র ভাই সাহব ঝঝারিয়া জীনা ঐগী খ্বায়দগী ফজবা পর্ফোর্মেন্স পীবদা মীৎয়েঙ থম্মু হায়না পাউতাক পীবিখি, অমদি ঐনা প্রাক্তিস মনুংদা তৌখিবদুমক তৌনবা মহাক্না হায়বিখি।
সর, ঐগী কোচ, মনোরঞ্জর জীনসু ঐবু য়াম্না থৌজানবিখি। ঐখোয় ময়াম পানবা হায়বসি খুদোংচাদবতা নত্তনা ওইথোকপা ঙম্লোইদবা অমনি। ঐখোয় করিগুম্বা পোৎশক অমদা হেক হেক থেংজিন্বা থোকই, অদুগা করিগুম্বদা কনাগুম্বনা ঐঙোন্দা থেংজিল্লক্লবদি, ঐনা মীৎ তাঙলিবসি মখোয়রা নৎত্রগা ঐরা হায়না হেক হেক হংই। সর, অসিগুম্বা থৌদোকশিং তোয়না থোকই। ঐনা চৎপদা ঐগী কোচকী খুৎ হেক হেক শমদুনা চৎলি, মীৎ মশেল মরাং উবদুনা ঐগী থবক থৌরমশিং তৌনবা হোৎনৈ। সর, অদোমগী থৌজাল মতম পুম্বদা ঐগা লোয়নদুনা লৈ।
প্রধান মন্ত্রী: য়াম্না ফরে কাপিল, নুমিৎ অদুদা স্তেদিয়মদা তিল্লিবা মীয়ামগী খোঞ্জেল য়াম্না হৌমনখিবনা নহাক্কী কোচকী পাউতাক তাবা ফংদে হায়না অদোম্না হায়খি। ঐ মদু খঙবা পাম্মি। অদোমগী কোচ কদায়দা লৈখ্রে? সর, চান্বিদুনা থেংনখিবা শিংনবা অদু শন্দোক্না তাকপিয়ু।
কোচ: ব্লাইন্দ জুদোদা খ্বায়দগী মরুওইবা ৱাফমদি মখোয়গী ত্রেনিংদা য়াওখ্রবা ঐখোয়না মপান্দগী পীরিবা পাউতাকশিং অদুনি। মখোয়না মেত্তা করিগুম্বা অমত্তা উবা ফংদবনা ঐখোয়না মাঙজৌননা ঐখোয়না অকক্নবা ৱাফম অমা হায়রকপা মতমদা মখোয়না করি তৌগনি হায়বদু তাকই। নুমিৎ অদুদা, মেত এরিয়া অনি লৈরম্মি। ঐখোয়না মশান্ননা মেত অমদা শান্নগদবনি, অদুগা ফ্রান্সকীনা অতোপ্পা মেত অমদা শান্নগদবনি। ফ্রেঞ্চ ফাইত মনুংদা মীয়ামদু য়াম্না লাঙখি – অয়েঙবা মীওই ১৫,০০০ – ১৮,০০০ রোম তিল্লম্মি। অদুনা কাপিলনা সেমি-ফাইনেল শান্নবা মতমদা লাঙলিবা ময়ামদুনা মহাক্না ঐগী পাউতাক নীংথিনা তাবা ফংখিদে। মদুগী মথক্তা, সেমি-ফাইনেলগী শাফুসু লৈরম্মি, মদুনা মরম ওইরগা কাপিইলনা এসিয়ন গেম্সকী সেমি ফাইনেল্সতা ইরানিয়ন শান্নরোয়গী মখুত্তা মায়থিখি। মহৌশানা মদুদগী শাফুসু ফজনা লৈরম্মি। লাইবক থিবদি, ৱাফমশিং অসিনা মরম ওইরগা নুমিৎ অদুদা ঐখোয়না ভারতকীদমক সনাগী মেদল লৌরকপা ঙমখিদে।
প্রধান মন্ত্রী: অদুদি মায়োক্নবা লম্বাদুগী কোচসু মতৌ অদুম্না লমজিংলমগনি?
কোচ: হোয়, অদুবু মদু কোচ অমগা অমগা মান্নদে। ঐখোয়গা শান্নরোয়শিংগা লৈনরিবা মরী অসি কোচ খুদিংমক্তা তাকপি তম্বিবগী মওং মতৌদু য়েংলগা মদুদা য়ুম্ফম ওইরগা ঐখোয়গী ওইবা মওং মতৌ শেমগৎপনি।
প্রধান মন্ত্রী: অদুদি কোচ অদুনা মহাক্কী পাউতাক অদু মী অতৈদগী লোন্না থম্লমগনি?
কোচ: তশেংবমক্নি, করিগুম্বা ঐখোয়না মায়োক্নবা কোচকা চপ মান্নবা লোল শীজিন্নরবদি, ঐখোয়গী শান্নরোয়না খেন্নবা অদু খঙবা ঙম্লোই।
প্রধান মন্ত্রী: করিগুম্বা অদোম্না কাপিলদা ওয়রোমদগী এতেক্ত তৌবা পাম্লবদি, মদু অদোম্না কমদৌনা পাউ ফাউনগনি?
কোচ: মদুমক্নি ঐখোয়না তাক্লিবা সর।
প্রধান মন্ত্রী: কাপিল, মতৌ অসুম্না তৌবা নৎত্রা?
কাপিল পরমর: সর, ঐ স্ত্রাইক তৌগদৌরে হায়না হেক হেক হায়, অদুবু ঐনা এতেক্ত তৌবা মতমদদি, করিগুম্বা মতমদসু পান্দবা য়াওই অমদি ঐ খোঙফম হন্দোকই।
কোচ: ঐখোয়না তেক্নিকশিংদুগী অকক্নবা মমিংশিং শীজিন্নৈ। মাঙদা থাঙজিন্বা ওইরবসু তুংদা হন্দোরকপা ওইরবসু খোঙগী খোঙফমসু তাক্লিবশিংগী শরুক অমনি। অসুম্না ঐখোয়না তাকপি তম্বিখিবা তেক্নিক অদুগী মমিং পন্বা মতমদা শান্নরোয় অদুনা মদু শীজিন্নৈ। পুম্নমক অসি লম্বাদুগী খল – মাঙদা নৎত্রগা তুংদা - কদায়দা লৈবগে হায়বগী মখা পোল্লি অদুগা ঐখোয়না চুনবা তেক্নিক অদু তাকপনি।
প্রধান মন্ত্রী: অদুদি অদোম্না মখোয়দা লম্বাগী ফীভমসু তাকপরা?
কোচ: হোয় তাকই। ঐখোয়না লম্বাগী লেঙ ওৎপগী মওং নীংথিনা য়েংই। করিগুম্বা মখোয়না মখোয়গী অরুম্বা মাঙদা পুখৎলক্লগা চঙশিল্লক্লবদি, ঐখোয়না ফোর্ৱার্দ তেক্নিক শীজিন্নৈ। মতৌ অসুম্না করিগুম্বা মখোয়না তুংলোমদা পৈথখিবা নৎত্রগা খোঙফম হন্দুনা ফীভম শেম্লবদি ঐখোয়না বেকৱার্দ তেক্নিক শীজিন্নৈ। হায়রিবা তেক্নিংকশিং অসিনা পোইন্ত লৌবদা য়াম্না মতেঙ ওই।
প্রধান মন্ত্রী: অদোম্না মফমদুদা ফমদুনা লৈবা মতমদা অদোমদা পুক্নিং ৱাবা কয়া থেংনবিরমগনি?
কোচ: তশেংবনি, অদুগা ঐখোয়না কোচনি হায়দুনা মেত্তা খোঙ থাংজিল্লুবা য়াবসু নত্তে।
কাপিল পরমর: সর, সেমি ফাইনেল মনুংদা, ঐবু খুৎ পায়দুনা লমজিংবিরিবা রেফরী অদু থক থক নিক্লম্মি। অদুক য়াম্না লুখ্রবা মশান্ন অদুদা মহাক্না ফাওবা অরান্বা ফিরেপ লৌখি। ক্রিকেত মশান্নদা থর্দ অম্পাইয়র রিভিউ লৈবগুম্না ঐগী মতাঙদা নীংথিনা য়েংশিনবিখিদনা থুনা ফিরেপ লৌবিখি। মদুদা ঐগীসু অশোয়বা খরদি লৈখি; সেমি ফাইনেলদা ঐগী খোঙজেল মনিং হনখি। অদুবু সর, মথঙদদি হেন্না ফজনা হোৎনগনি হায়না ঐনা অদোমগী মফমদা ৱাশকচরি সর।
প্রধান মন্ত্রী: নত্তে, অদোম্না য়াম্না ফজনা শান্নখি, মদুগীদমক নুংঙাইবা ফোঙদোকচরি।
কাপিল পরমর: থাগৎচরি সর। অদোমবু হন্না হন্না থাগৎচরি।
কোচ: জয় হিন্দ, সর। ঐ লান্মী অমনি, অদুগা ঐগী লোয়নবীনা সিমরন শর্ম কৌই, অদুগা প্রীতিসু শান্নবা য়াওরি। ঐ এথ্লেতিক্স কোচ অমসুং পেরা-এথ্লেতিক্স কোচ অনিমক্নি। ঐনা শান্নরোয় অনি তাকপি তম্বিখি, মখোয় অনিমক ১০০ মিতর অমসুং ২০০ মিতরদা শান্নখি। এথ্লেতিক্সতা অহান্বা ত্রেক মেদলশিং অদু ঐগী শান্নরোয়না ফংখিবনি, অমদি ঐখোয়না পুন্না মেদল অহুম লৌখি। ঐখোয়না কয়া অমসু তমশিন্বা ফংলকখি সর। খুদম ওইনা, মশান্ন অমদা – ১০০ মিতরগীদা, ঐখোয়না মেদল অনি ফংখি। অদোমসু খন্বিয়ু, চপ মান্নবা কাদা লৈমিন্নরিবা শান্নরোয় অনিনা অহান্বা ওইনা ১০০ মিতর লমজেলদা চেনমিন্নবা, অদুগা অনিমক্না অহান্বা ওইনা লৈবাক্কীদমক ত্রেক মেদল ফংলকপা হায়বসি তোপ তোপ্পা এক্সপিরিএন্স অমনি। মেদল অনি কা অমত্তদা থম্মিন্নবা মতমদা, অনিশুবা শান্নরোয়দুগী মশান্নদি হৌদ্রিঙৈনি, ঐঙোন্দা কোচ অমসুং মপুরোয়বা অমা ওইনা শাফু কয়া ফাওরকখি। মদুদা ফাওখিবা ৱাখল ঐ নীংথিনা খঙই। অদুনা ফুনগৎলক্লিবা শাফু অদু নমথনবগীদমক ঐনা নুমিৎ চুপ্পা মহাকপু মথৌ চিলহন্দুনা শান্নবদা পুক্নং চঙহন্দুনা থমখি। ঐখোয়না ১০০ মিতর মায়থিহৌখি অদুবু মদুদা এক্সপিরিএন্স কয়া ফংলকখি সর।
প্রধান মন্ত্রী: ফরে, অদোম্না মফমদুদা লৈরুরে, অদুবু অদোম্না য়ুমদা য়ৌখ্রবা মতুংদদি অদোমদা করি ওইগনি সিমরন?
সিমরন: সর, মহাক তৌশিন্নরিবা অসিগুম্না পুকচেল চাউবা নত্তে। ঐখোয়না মফমসিদা লাকত্রিঙৈদা ৱারী অমা শানখি। ঐখোয়না কনানা হান্না ত্রেক মেদল লৌরক্কনি হায়না ৱারী শানরম্মি। ইভেন্ত লিস্ত থোক্লকপা মতমদা, প্রীতীগী ইভেন্তনা হান্না থোক্লকপা থেংনখি, অদুনা ঐখোয়না মহাক্না অহান্বা মেদল লৌরক্কনি হায়না থাজবা থমখি। ঐখোয়না য়ৌদ্রিঙৈদা মসিগী গজ্জু – হায়বদি মসিগী কোচ অসিনা ঐঙোন্দা থা অমা পোত্থাহনগনি হায়খি। অদুবু ঐখোয়না মফমসিদা হেক হৌরকপগা, মহাক অয়ুক্তা ৱারী খরা শানখি, অদুগা হৌজিক্না ঐ চয়োল অমদগী হেন্না পোত্থাবা য়াররোই হায়রক্লি। ঐনা করিগীনো হংলুবদা মহাক্না, “মসিদি নহাক্না ব্রোঞ্জ মেদল লৌরকপগীনি” হায়রকখি।
প্রধান মন্ত্রী: ফরেনে, হৌজিক্তি অদোম চাক চাবা ফংলরোইদো!
কোচ: থাগৎচরি সর।
শান্নরোয়: মসি ঐগী অহুমশুবা পেরালিম্পিক্সনি। মমাঙগীদসু এ অদোমগা উননবা তাঞ্জা ফংজখি, অমদি অদোম্না ঐবু য়াম্না পুক্নিং থৌগৎপিখি, অদুবু হন্দক্তি ঐ পান্দম য়ৌবা ঙমখিদ্রে। ঐ রাইও পেরালিম্পিক্সতা মরিশুবা তাহৌখি, তোকিওদসু মরিশুবা অদুগা পেরিসতসসু মরিসুবা তাহৌখি সর। মরিশুবা অসি ঐগা অচেৎপা মরী অমা লৈবা মাল্লি। অদুম ওইনমক, ঐনা মরিশুবা পোজিসন ঐসি পুক্নিং থৌগৎনবগী অকন্বা মফম অমা ওইনা লৌরি অমসুং মথঙগী পেরালিম্পিক্সতা, ঐগী মরিশুবা শরুক য়াবদা, ঐনা তশেংনা করিগুম্বা মায় পাকপা খরা পুরকপা ঙমগদৌবা মাল্লি। সর, ঐনা ইশাবু মায়থিবনি হায়না লৌজদে। তশেংবদি, ঐহাক ভারতকীখক্তা নত্তনা মালেমগী ওইনা অসিগুম্বা লেমজনিংঙাই ওইরবা মশান্নশিংদা কয়ারক হন্না থাক অসি য়ৌবা ঙম্বা অমত্তা ঙায়রবা পেরা-শান্নরোয়নি।
মসিগা মান্নবা ৱারী কয়া ওলিম্পিক্সকী পুৱারীদসু লৈরি। খুদম ওইনা, মহাক্কী মঙাশুবা ওলিম্পিক্সতা সিল্ভর মেদল ফংখিবা ফ্রান্সকী দিস্কস থ্রোৱর অমা লৈ। মহাক্কী মঙাশুবা ওলিম্পিক্সতা মেদল অমা ফংখিবা ত্রিপল জম্পর অমসু লৈরি, মহাক USA দগী ওইরমগনি খল্লি। অদুনা ঐনা অসিগুম্বা ৱারীশিংবু ইশাবু পুক্নিং থৌগৎচনবা ওইনা শীজিন্নৈ অমসুং “ঐনা মরিশুবা তারগা ৱাখল হন্থদ্রগা নখোয়না অহান্বা হোৎনবদা মায় পাক্ত্রগা পুক্নিং হল্লিবা করিগীনো” হায়দুনা অতোপ্পশিংবু পুক্নিং থৌগৎনবা পেরা-শান্নরোয় অমা ওইনবা পান্দম থম্লি। মরিশুবা তাখিবা গুরিয়াগুম্বা শান্নরোয় কয়া লৈ, মদুদা পুক্নিং হন্থবা কয়া লৈ। অদুবু মখোয়গী কোচনা ঐবু ফিদম অমা ওইনা লৌই খঙবদা ঐনা নুংঙাইজৈ।
প্রধান মন্ত্রী: অদোম্না পুন্সিদা য়েংলিবা মীৎয়েঙদুনা অদোমগী খ্বায়দগী অচৌবা থৌনানি হায়না ঐনা থাজৈ। অদোম্না চাং নাইনা মরিশুবা তারকপনা অতোপ্পা মীওই মাপলবু অদোম্না মালেমগী ওইনা থৌদাং য়াহন্নবা মাঙদা পুখৎলি হায়না য়েংবসু য়াই।
শান্নরোয়: সর, মদুদা ঐ খোইদোক্না খল্লুদে; হৌজিক্তি দিসাইপলগী মতম্নি। ঐখোয় শান্নরোয় অহুম্না ঐখোয়গী মহৈরোয়শিং তাকপি তম্বিরি। দেবেন্দ্র ভাই সাহবকী মহৈরোয়না সনাগী মেদল ফংলি, সোমন রামাগী মহৈরোয়না ব্রোঞ্জ ফংলি, অদুগা ঐ নবদীপকী ওফিসিএল কোচ নত্তে, ঐ মহাক্কী মেন্তোরনি। জেব্লিনগী লমদা হৌরকপগী লাক্লিবা ঐগী খোঙচৎ অসি মহাক্কী ময়াম্বা অমসুং লমজিং লমতাক্লিবা অমগী শক্লোন্নি। হন্দক, ঐনা নবদীপ্তা হায়খি, “হন্দকসি নহাক্কী পালিনি, লৌশিল্লু”। অদুবু সর, ঐনা অদোমদা ৱাশক্লি, মদুদি মথঙদি ঐগী পালি ওইরগনি। ঐ হৌখিবা পেরালিম্পিক্স অহুমদা শরুক য়াদুনা লাক্লি অমদি মীয়াম্না লৈবাক অসিদি য়াম্না চাউবনি, অদুনা কম্পিতিসন অসি য়াম্না শাথিগনি হায়নবা হেক হেক তায়। অদুবু সর, ভারতনা ২০৩৬ ওলিম্পিক্স অমসুং পেরালিম্পিক্স পাঙথোক্লবদি, মদুনা মালেম অসিদা পাঙথোকখিবা খ্বায়দগী চাউবা থৌরম ওইগনি হায়না ঐনা থাজৈ। অদুগা সর, ঐখোয়না অহল ওইশিল্লক্লবসু, দেবেন্দ্র ভাই সাহবনা ঐখোয়না পুক্নিং থৌগৎনফম ওইদুনা লৈগনি। মায় পাক্নবগীদমক ঐখোয়গী শরু অমসুং খোঙ কায়হন্দনা থম্লবসু ঐখোয়না মশান্নশিং অদুদা শান্ননবা হোৎনগনি।
প্রধান মন্ত্রী: অদোম্না পুন্সিদা য়েংলিবা মীৎয়েঙ তশেংনা পুক্নিং থৌগৎনিংঙাইনি। নহাক্না তুংদা করিগুম্বা খরা ফংনবা চেৎনা লেপ্লিবা অমসুং মদুদা নীংহন্নবা পোক্ত্রিবা অদু তশেংনা পুক্নিং থৌগৎনিংঙাইনি। ঐনা নহাক্কী নফমদা নুংঙাইবা ফোঙদোকচরি।
শান্নরোয়: থাগৎচরি সর,
কোচ: খুরুমজরি সর।
প্রধান মন্ত্রী: খুরুমজরি।
রাধিকা সিংহ: ঐ রাধিকা সিংহ, সুতিং তীমগী মেন্তেল কোচনি। অদোম্না ঐখোয়না থেংনরকপশিং পাউদম্নবা হায়বিখি, অমদি খ্বায়দগী মরুওইবা ৱাফমদি কাঙলুপ মনুংসিদা লৈনরিবা নুংশিবগী মরী অসিনা হায়না ঐনা লৌই। সুতিং তীমদা, কনাগুম্বা অমত্তনা অমগা অমগা হিদান্নবা লৈতে; পুম্নমক্না মখোয় মশাগা হিদান্নদুনা লৈ। মখোয়না মখোয়গী মপাঙ্গল নৎত্রগা অশোন্বা থিদনা মখোয় মশাগী তৌবা ঙম্বগী চাং হেনগৎহন্নবা হোৎনৈ, অদুগা ঐনা চপ মান্নবা ইভেন্ত অমগী শান্নরোয় অনি কোচ তৌরবসু, মখোয়দা লম্বানবগী ৱাখল্লোন লৈতে। মদুগী মহুত্তা, মখোয় মশেল অমনা অমবু ইকায়খুম্নবা অমসুং চেকশিঞ্জবগী মতৌদুনা অমনা অমবু খুমাঙ চাওশিলহন্বদা মতেঙ পাংই। নুংশিনবা অসিমক মখোয়গী পর্ফোর্মেন্সতা ময়েক শেংনা মমি তাখি, সর।
প্রধান মন্ত্রী: অদুগা অদোম্না মেন্তেল হেল্থকী লমদা থবক তৌবদা, অদোম্না করিদা মীৎয়েঙ থম্বগে?
রাধিকা সিংহ: সর, ঐখোয়না পুক্নিংগী ৯০% ওইরিবা সবকন্সিয়স পুক্নিংদা লৈরিবা অশোন্বশিংদা অওন্বা পুরক্নবা থবক তৌই। ঐখোয়না মখোয়গা মপাঙ্গলশিং ফুদোক্নবা, মখোয়দুবু মখোয়গী পর্সনেলিতীশিংগা মরী শম্নহন্নবা, অমসুং মখোয়না খুমাঙ চাওশিন্বদা মতেঙ পাংনবা হোৎনবদা মীৎয়েঙ থম্মি।
প্রধান মন্ত্রী: অদোম্না য়োগ নৎত্রগা হীরী কোন্বগা মরী লৈনবা অকক্নবা ত্রেনিং পীবগদি লৈবরা?
রাধিকা সিংহ: হোয়, সর, য়োগ মখোয়গী ত্রেনিংগী শরুক অমনি। ঐখোয়গী তীম্না য়োগ চাং নাইনা তৌই, অমদি মখোয়না অয়ুক খুদিং হীরী কোল্লি। নুমিদাংৱাইরমদা, শান্নরোয়শিংনা মখোয়না নোংমদুদা তমখিবশিং নীংশিংই, অমদি হায়রিবা পুক্নিংগী ত্রেনিং অসি নুমিৎ খুদিংগীনি। রেঞ্জতা মখোয়গী প্রাক্তিসকা লোয়ননা, মখোয়না য়োগবু মখোয়গী ত্রেনিংদা হাপচিল্লি, মদুনা তীমদা হৌন-লোনচৎকী পরম শেংহল্লি সর।
প্রধান মন্ত্রী: মালেমগী লৈবাক কয়াগী শান্নরোয়শিংনা য়োগ অমসুং হীরী কোন্বগী মরমদা নীংথিনা খঙলমদবা য়াই। মসিনা ঐখোয়গী শান্নরোয়শিংগী মতিংদা করি অহোংবা পুরকপা ঙম্মি।
রাধিকা সিংহ: হোয়, মসিনা খেন্নবা নীংথিনা পুরকপা ঙম্মি। অদোম্না অদোমগী নুংগী পুক্নিংবু লাকশিন্বা ঙম্লবদি, মদুনা অদোমগী মশান্নদু মথঙগী থাক্তা পুখৎপা ঙম্মি। ঐখোয়গী লৈবাকসিদা য়োগ য়োকখত্তুনা, অদোম্না তশেংনা মশক থোকপা থবক অমা তৌবিরে, অমদি মসি মহৈ লোয়শঙশিংদা সবজেক্ত অমা ওইনা তম্বিগদবনি হায়না ঐনা লৌই। য়োগগী মরুমদা লৈরিবা কাঙলোনগী মতিক অসি অতৈগা মান্নদে সর।
প্রধান মন্ত্রী: নুংঙাইবা ফোঙদোকচরি।
কোচ: অহান্বদা, কাপিলনা পেরা জুদো খক্তা নত্তনা এবল্দ-জুদোদসু ভারতকী অহান্বা মেদল লৌরকখিবা অসি তশেংনা লেমজনিংঙাইনি। হৌজিক ফাওবদা, জুদো অমসুং পেরা জুদো অনিমক্তা মেদল অমত্তা লৌরকপা ঙমদ্রিবনি, অমদি কাপিলনা মীৎ নিংথিনা উবা ঙমদ্রবশিংগী শান্নবদা ভারতকী অহান্বা মেদল লৌরক্তুনা পুৱারী শেমলএ। মরম অসিনা মায় পাকপা অসিগীদমক ঐখোয় পুম্নমক্কী মফমদা নুংঙাইবা ফোঙদোকচরি। মালেমগী মকোক থোংবা জুদো ওফিসিএলশিংনা ঐখোয়গী ইফমদা নুংঙাইবা ফোঙদোক্নবগীদমক পোদিয়মদগী কুমথজ্ঞরক্তুনা, মখোয়না পেরা জুদোদা অসুম্না থুনা খুমাঙ চাওশিল্লক্কনি হায়না খল্লুদে হায়রকখি। শরুক য়াখিবা পুম্নমকপু অৱাংবা থাক্তা থাঙ্গৎচরি।
সর, ঐখোয়না মসি ঐখোয় ইথন্তা মায় পাকপা ঙম্লম্লোই। ঐখোয়না SAI, OGQ, অমসুং অমুক হায়নরুদ্রবসু, ভারত লৈঙাক্কী মফমদগী অচৌবা ঙাক্লৌ ফংখি। মসিগীদমক অদোমবু ঙমখৈ লৈতনা থাগৎচরি। ঐখোয়গী অফবা মরুপ ওইরিবা UK, USA অমসুং কোরিয়াগী কোচশিংনা ঐখোয়গী নাক্তা চঙলক্তুনা, “নখোয় মথক্তা কাখৎলক্লি হায়বা ঐখোয় খঙই, অদুবু নখোয়না অসুক থুনা খুমাঙ চাওশিল্লক্কনি হায়বদি ঐখোয় খল্লুদে” হায়রকখি। মীৎকুপ্তুদা ঐখোয় তশেংনা চাওথোকচবা পোকখি। মতম পুম্বদা ঐখোয়দা ঙাক্লৌ পীবিখিবা তীম পুম্বগী মফমদা থাগৎচরি। অদোমবুসু ঙমখৈ লৈতনা থাগৎচরি সর।
প্রধান মন্ত্রী- নুংঙাইবা ফোঙদোকচরি।
কোচ: ঐনা সন্দীপ চৌধুরীগী মরমদা করিগুম্বা খরা থমজগে – “শগোল তোংবা মীতনা লান্ফমদা শগোলদগী তাবনি, শন শাদুনা চৎলিবা অঙাং অমনা তাবা হৌনদে”। অসুম্না নখোয়না শগোল তোংলিবা মীওইখক্তনা তাগদবনি অঙাংনা তাগদবা নত্তে হায়বদু উৎলে। মসি নখোয়গী অচৌবা ৱাফম অমনি। অদুগা সর, ঐ হরবিন্দরগী মরমদসু খরা হায়জগে। সীতর, হরবিন্দর অমসুং ঐহাক আর্চরীদগীনি। মেদাম্না হায়বিখিবগুম, হরবিন্দর পেরালিম্পিক্সতা মেদল লৌরকখিবা অহান্বা তেন কাপ্পা মীওইনি। মহাক্না তোকিওদা ব্রোঞ্জ লৌরকখি অমসুং ২৮, ২৮, অমসুং ২৯ স্কোর তৌদুনা মশা শোইনাইদবা তেন কাপ্পশিংগা মান্ননা কাপ্তুনা পুৱারী শেমখি। মহাক্কী অরোয়বা তেঞ্জৈদা, সর, অদোমসু উবিরমগনি, য়াম্না নক্না পানখি। মদুনা ১০ দা পাল্লক্লবদি, ঐখোয়না কিম ৱুজিন অমসুং ব্রেদী এলিসনগা মান্ননা কাপ্লমগদবনি।
অমিসা: খুরুমজরি সর, ঐগী মিং অমিসা, অদুগা ঐ উত্তরাখন্দদগীনি। মসি ঐগী অহান্বা পেরালিম্পিক্সনি, অমদি ঐনা শান্নবা হৌরকপদগী শুপ্নতগী চহি ২গী মনুংদা ঐনা অসুক য়াম্লবা এক্সপিরিএন্স ফংলকপা অসিদা ঐ য়াম্না হরাওই। চহি ২ খক্তা ঙায়রি, অদুগা ঐনা পুন্সিদা কয়া অমা তমশিন্বা ঙম্লে। ঐনা মদু তৌবা ঙমগনি হায়না থাজবা পোকহনবিখিবা ঐগী কোচকী মফমদা থাগৎচরি মরমদি ঐ তশেংনা কিবা ফাওখি। অদোম্না মফমদুদা তিল্লিবা মীয়ামদু য়েংনবা হায়বিখি।
প্রধান মন্ত্রী: হৌজিক্তি মীয়াম্না নহাক ওইনা কিরম্লগনি; মমাঙদদি নহাক্না মীয়ামবু কিরমবনি, হৌজিক্তি মীয়াম্না নহাকপু কিরম্লগনি।
অমিসা: অদোম্না মীশিংদু য়েংনবা হায়বিখি, ঐনা মদুমক তৌখি অমদি কয়া অমা তমশিনবা ফংখি।
প্রধান মন্ত্রী: হৌজিক্তি অদোমগী ইমুংগী মওং মতৌ কমদৌরে? অদোমগী ইমুংগী মীওইশিংনা করি হায়?
অমিসা: হৌজিক ঐগী ইমুং য়াম্না হরাওই। মখোয়না মতম পুম্বদা ঐবু শৌগৎপিরি, অদুবু হৌজিক্তি মখোয়না ঐবু অমুক্কসু হেন্না শৌগৎপিরে।
প্রধান মন্ত্রী: মখোয়না নঙোন্দা অমুক্কা হেন্না শৌগৎপিরবা!
সুমিৎ অন্তিল: খুরুমচরি সর, ঐগী মিং সুমিৎ অন্তিল, অদুগা ঐনা থংন-থংননা অনিশুবা সনাগী মেদল ফংলকখি। ঐনা তোকিওদগী সনাগী মেদল পুরকপা মতমদা, সর, অদোম্না মদুগুম্বা সনাগী মেদল অনি উবা পাম্মি হায়না ঐবু ৱাশকহনখিবা ঐ হৌজিকসু নীংশিংলি। মরম অসিনা অনিশুবা অসিদি অদোমগীনি সর। পেরালিম্পিক্স মমাঙদা, ঐখোয় তশেংনা পুক্নিং চরাংনখি মরমদি ঐনা আর্তিকলশিং পারুবা মতমদা সনাগী মেদল দিফেন্দ তৌরক্কনি হায়না মীয়াম্না থাজনবা শান্নরোয়শিংগী মরক্তা ঐগী মিং য়াওরমখি। অদুবু ওগস্ত ২০দা, ঐনা অদোমগা ৱারী শানবা মতমদা, ইফমদা তোকিওগী মীৎকুপ নীংশিংহনখি, মদুনা হন্দক ঐ নীংথিনা হোৎনবা তাই হায়বা ফাওহনখি। ঐগী তীম পুম্বা – ঐগী ফীজিও, ঐগী কোচ, ঐখোয় পুম্নমক্না – অদোমগী মফমদা তৌবিমল খঙবা উৎচরি সর, মরমদি ঐখোয়না মেদল অমা লৌরকপদা, ঐখোয়না অদোমগা উনগনি, অদোমগা হকথেংননা ৱারী শানবা ফংগনি হায়না ফাওই। অদোমবু ঙমখৈ লৈতনা থাগৎচরি সর।
প্রধান মন্ত্রী: নুংঙাইবা ফোঙদোকচরি!
শান্নরোয়: ঐখোয় অয়াম্বা লৈঙাক নৎত্রগা তোঙান তোঙানবা লুপশিংনা স্পোন্সর তৌবা শান্নরোয়শিংনি। মরম অসিনা, করিগুম্বদা নীংথিনা শান্ননবা প্রেসরসু লৈ। অদোম্না “চৎলো অদুগা শান্নরুচো, মায় পাকপা নৎত্রগা মায়থিবা হায়বসিদি শান্নবগী শরুক অমনি” হায়বিবা মতমদা, লৈবাক্কী প্রধান মন্ত্রীনা অদোমবু পুক্নিং থৌগৎপিরকপা মতমদা, হায়রিবা প্রেসরশিং অদু য়াম্না হন্থখি। মমাঙদা, সর, ঐনা অদোমগা ৱারী শানজবা মতমদা, তোকিওদা ঐগী পর্ফোর্মেন্স য়াম্না ফবা ওইখিদে; ঐ ৮শুবা রেঙ্কতা লৈখি। অদুম ওইনমক, ঐনা অদোমগী মফমদা অদোম্না মপান লৈবাকশিংদা চৎপা মতমদা করি ফাওই, অদোমদা ৱাখল ফুম্বংনবা ফাওবরা হংখি। অদোম্না লৈবাক পুম্ববু মহুৎ শিন্দুনা চৎলিবনি, অমদিম দুনা থাজবা পোকহল্লি হায়না পাউখুমবিখি। হায়রিবা ৱাহৈশিং অদু পুক্নিংদা থম্লগা, হন্দক ঐনা থাজবগা লোয়ননাও মমাঙগী মতৌগুম প্রেসর লৈতনা চৎখি। হন্দক্তি ঐ নীংথিনা থাজবা পোকখি। ঐখোয়গী তীম, লৈঙাক, ঐখোয়গী কোচ, অমসুং মীপুম খুদিংমক্না ঐখোয়বু নীংথিনা শৌগৎপিখি, অমদি মদু অথোই অহেন তান্নবদা অচৌবা এক্সপিরিএন্স অমা ওইখি। অদোমবু থাগৎচরি সর!
প্রধান মন্ত্রী: নুংঙাইবা ফোঙদোকচরি!
কোচ অমসুং শান্নরোয়শিং: সর, খুরুমজরি। ঐনা চহি ১৬ চঙনা হোৎনরকপা মমৈথঙদা মায় পাক্লে, অমদি সনাগী মেদল ফংলকখিবা ঐগী মহৈরোয় ধরমবির মায় পাকপা অদুগী শরুক অমনি। ঐখোয় অনিমক কম্পিতিতরশিংনি, অমদি ঐহাক ইশানা মহাকপু মতাঙ অসি য়ৌবা ফাওবা তাকপি তম্বিরকখিবনি। তাং ২০দা অদোমগা ৱারী শানরবা মতুংদা, ঐনা ঐগী খ্বায়দগী ফজবা পর্ফোর্মেন্স পীবা মথৌ তাই হায়না খঙবদা ঐঙোন্দা অফবা ইহুল অমা ফাওখি। কোচ অমা ওইনা, মসিদগী হেন্বা ইথিল অমা লৈতে, অমদি মহাক্কী মহৈরোয়গা ফীল্দদা অথোই অহেন তান্নবা মালেমগী ওইনা অমত্তা ঙায়রবা কোচ ঐনা ওইরম্বসু য়াই। ঐনা পুক্নিং লুপ্না হোৎনজরকপা অদু ধরম্বরগী মেদলনা মপুং ফাহল্লে অমদি ঐখোয়গী তীম পুম্বনা য়াখিবা থৌদাংনা মায় পাকপা অসি ফংবদা অচৌবা শক্লোন অমা লৌখি। ঐখোয়গী কাঙলুপ্তা খ্বায়দগী শাথিনা শোইনাইবা মীওইশিং য়াওখি, অদুবু SAI (স্পোর্তস ওথোরিতী ওফ ইন্দিয়া) অমসুং মন্ত্রালয়না সপ্পোর্ত স্তাফ মশিং হেনগৎহন্দুনা মরুওইবা ফিরেপ লৌবিখি। হৌরকপদা, সপ্পোর্ত স্তাফকী ৩৩% খক্তমক মনুংদা চঙবা য়াহল্লম্মি, অদুবু দেবেন্দ্র ঝঝারিয়া ভাই জীগী ফিরেপ্না মরম ওইরগা, ঐখোয়গী মশান্না পাঙথোকপাম তমদা ঐখোয়গী মীওইশিং মনুংদা চঙবা য়াহন্নবগীদমক অতৈ সপ্পোর্ত স্তাফশিং ওন্থাং ওনশিন তৌহনখি। অসুম্না হৈ-শিংলবা মওং মতৌ অসিননি ঐখোয়না মেদল কয়া লৌবা ঙম্লকখিবা। চীঞ্জাক্কী মতাঙদা, মরুওইনা মনা মশিংখক্তমক চাবা মীওইশিংগী মতাঙদা খুদোংচাদবা খরা লৈখি, অদুবু SAI না ভিলেজ অদুমক্তদা মচল শুবা দাইতকী অখন্নবা থৌরাং তৌবিখি, অমদি কনামত্তনা চীঞ্জাক্কী খুদোংচাদবা মায়োক্নখিদে। ঐখোয়গী তীম পুম্বা পুক্নিং থৌগৎপিখিবগীদমক অদোমগী থাগৎচরি সর। অদোমগী ঙমখৈ লৈতনা থাগৎচরি সর।
প্রধান মন্ত্রী: নুংঙাইবা ফোঙদোকচরি!
শান্নরোয়: ঐ এসিয়ন গেম্সতা শরুক য়াখি অদুবু মেল লৌরকপা ঙমখিদে। অদোম্না মেদল লৌরকপশিংগা উনবা মতমদা, অদোম্না ঐগা য়াম্না নক্ননা চৎখি, অদুবু ঐনা অদোমগা হকথেংননা উননবা তাঞ্জা ফংখিদে, মদুনা ঐঙোন্দা লক্নবগুম থোকখি। মদুগী তুংদা, ঐ অদোমগা উননবা চপ য়ুংনা লেপখি, অমদি মদুনা এসিয়ন গেম্সকী মতুংদা ঐবু থৌদুনা পুখি। ঐনা ঙমজবী থাদুনা হোৎনখি, অমদি অদুগুম্বা পুক্নিং থৌগৎনফম অদুনা ঐবু মায় পাকহনখিবনি হায়না ঐনা খল্লি। ঐগী ইচাশিংগা উনখিদবা থা তরুক শুরে, ঐ য়ুমদা হনদ্রি। ঐগী ইচানুপা নৌরি, অমদি ঐনা মহাকপু পুথোকপিবা খুদিং, লম্বী খঙনবা ঐনা ফোন্দা য়াওবা GPS শীজিন্নৈ। হৌজিক্তি মহাক্না ঐঙোন্দা “মামা, নহাক য়ুমগী লম্বী কাউরমাল্লে। GPS শীজিন্নরগা য়ুমদা হল্লকউ” হায়রক্লি। অদুনা সর, অদোমগী ঙাক্লৌ অমসুং থৌজালগীমক অদোমবু থাগৎচরি। অদোম, ঐখোয়গী তীম, অমসুং ঐখোয়গী কোচশিংনা মরম ওইরগনি ঐখোয়না ঙসি মায় পাকপা ঙম্লিবা। অদোমবু থাগৎচরি সর।
প্রধান মন্ত্রী: নুংঙাইবা ফোঙদোকচরি।
শরদ কুমার: সর, ঐ শরদ কুমার, অমদি মসি ঐগী অনিশুবা মেদলনি। ঐ পেরালিম্পিক্সতা শরুক য়াবা অহুম্লক শুরে।
প্রধান মন্ত্রী: করিগুম্বা ঐনা শরদ অমসুং সন্দীপ্তা ৱা ঙাংনবা হায়রবদি, কনানা হেন্না ফজনা ঙাংলক্কনি?
শরদ কুমার: সর, সন্দীপ ৱা ফজনা ঙাংবনি, মদুনা ওইরম্বা য়াই মহাক্না মরিশুবা তারকখিবা (ফাগী ওইনি)। অদুবু শান্নরোয় অমা ওইনা, ঐনা হায়জনিংবদি ঐ পেরা মুভমেন্ত হৌরকপদগী শরুক য়াদুনা লাকখি, অমদি ঙিস, শান্নরোয় ময়াম থাক অসিদা উবা ফংবদা ঐঙোন্দা চাউথোকচবা পোকই। ঐখোয়না ঐখোয়গী কোচ, ফীজিওথেরাপিস্ত, অমসুং তীম পুম্বগা লোয়ননা মপান লমদা চৎপা মতমদা, মীয়াম্না ভারতপু তোপ তোপ্পা মীৎয়েঙ অমদা য়েংই। “শান্নরোয়শিং অসিনবু মকোক থোংবা ঙম্লক্কদ্রানে” হায়না মমাঙদদি মখোয়না ঙক্নরম্মি। অদুবু হৌজিক্তি, মখোয়না ভারতপু পেরা স্পোর্তসতা ফাওবা স্পোর্তিং নেসন অমা ওইনা লৌনরে। খোঙচৎ অসি SAI (স্পোর্তস ওথোরিতী ওফ ইন্দিয়া)না শেমগৎখিবা শক্তমদগী হৌরকখিবনি। মতমগী মতুং ইন্না, সপ্পোর্ত স্তাফ হেনগৎলকখি, অমদি শান্নরোয়শিংগী মরক্তা অফবা ৱাখল্লোন শন্দোরকখি। সর, খ্বায়দগী নুংঙাইবা ৱাফমদি অদোমগা উনবসিনি। থাদোকত্রিঙৈ মমাঙদা, অদোম্না ঐখোয়গী ইফমদা ৱাফম কয়া থম্বিখিবা, অমদি হল্লক্লবা মতুংদা, অদোমগা ঐখোয়গা উনবা – পুম্নমক অসি মেদল লৌরকখিবা অমদি শান্নরোয় খুদিংমক্না থেংনবা পাম্বা এক্সপিরিএন্স অমনি। সর, অদোম্না তৌরিবা অদুগুম্না মীয়াম্না হৌজিকসু পেরা স্পোর্তসপু মপুং ফানা লৌশিন্বা ঙমদ্রি।
পলক কোহলি: খুরুমজরি সর, ঐ পলক কোহলি, অমদি মসি ঐগী থংন-থংননা শরুক য়াবা অনিশুবা পেরালিম্পিক্সনি। তোকিওদা, ঐনা মরিশুবা তারকখি, অমদি হন্দক্না ঐ মঙাশুবা তারকখি। অদুবু পেরালিম্পিক্স অনিমক্কী খোঙচৎদি পুমখেন খেন্নৈ। ইং ২০২২গী তোকিও পেরালিম্পিক্স মতুংদা ঐহাক বোন ত্যুমর, স্তেজ ১ কেন্সর নারে হায়বা খঙখি, অমদি চহি অমা মখায়রোম, ঐ তুর্নামেন্ত অমত্তদা শান্নবা য়াওখিদে নৎত্রগা করিগুম্বা অমত্তা তৌখিদে। মমাঙ চহি, ২০২৩দা, ঐ হল্লকখি, অমদি ঐগী কোচশিং অমসুং গৌরব সরগী ঙাক্লৌ অমদি লমজিংনা মরম ওইরগা ঐ পেরিসকীদমক ক্বালিফাই ওইরকপদা ঐ য়াম্না হরাওখি অমদি চাউথোকচবা পোকখি। তোকিও মতুংদা ঐহাক, ৱর্ল্দ চেম্পিয়নসিপকুম্বা অচৌবা তুর্নামেন্ত কয়া য়াওবা ঙমখিদে, মরমদি ঐনা ৱাল্কওভর পীবা তাখি, অমদি এসিয়ন গেম্সতা ঐহাক কোবিদনা নাখি। চহি অসিদা, ঐ ৱর্ল্দ চেম্পিয়নসিপকীদমক ক্বালিফাইদ ওইখি অমদি ব্রোঞ্জ মেদল লৌরকখি, অদুদগী ঐ মথং মথং পেরিসকীদমক ক্বালিফাইদ ওইখি। ঐনা তুর্নামেন্ত অমত্তা শরুক য়াখিদবনা মরম ওইরগা ঐগী ৱর্ল্দ রেঙ্কিং ৩৮দা হন্থরকখি, অদুবু হৌজিক্তি ঐ তোপ ৪ দা হল্লক্লে অমদি ঐ পেরিসকীদমক ক্বালিফাইদ ওইখি। ঐনা মেদল লৌরকপা ঙমখিদবা নীংহন্ননিংঙাইগী মশক্নি, অদুবু অদোমগী থৌজাল অমদি মীপুম খুদিংমক্কী ঙাক্লৌগা লোয়ননা, ঐনা LA, ২০২৮তা মীৎয়েঙ থম্লি। ঐনা তশেংনমক অদোমগা লোয়ননা পোদিয়মদা ফোতো অমা কাপমিন্নবা পাম্মি, সর। অদোমবু থাগৎচরি সর!
প্রধান মন্ত্রী: মমাঙদা, অদোমগী ত্রেনিং লখ্নৌদা পাঙথোকখিবা নৎত্রা?
পলক কোহলি: হো সর।
প্রধান মন্ত্রী: ঐ অদোমগী ইমা পাবুংগসু ৱারী শানরে।
পলক কোহলি: হোয়, সর, ঐনা তোকিও চৎত্রিৎঙৈ মমাঙদনি।
প্রধান মন্ত্রী: অদোম হন্দক্তি কমদৌরি?
পলক কোহলি: সর, ঐ লখ্নৌদা গৌরব সরগী মখাদা ত্রেনিং তৌরি, অমদি মহাক্কী লমজিং মখাদনি ঐনা পেরা-বেদমিন্তনগী মরমদা খঙলকখিবা। ঐ বোন ত্যুমর নারে খঙলকপা মতমদা, মীওই কয়ানা পলক্কী শান্নবগী করিয়র লোইরে হায়নখি। দোক্তরশিংনা ঐ অমুক হন্না নোর্মেল পুন্সিদা হল্লকপা ঙমগনি হায়না থাজবা পীবা ঙমদে হায়রকখি। ত্যুমর মতুংদা, খুদোংথিবা কয়া লৈখি। ঐগী হান্নদগী থম্মোয়গী অনাবা লৈখি, অমদি ত্যুমর মতুংদা, ঐগী খোঙ শোইনাইরক্তুনা, খোঙ অনি শাংবা মান্নদবা অমসুং অতৈ খুদোংচাদবশিং থোক্লকখি। অদুবু ঐগী ইমুংনা ঐবু নুংঙাইনা লৈহন্বা পামখি, অমদি মখোয়গী থৌজালগা লোয়ননা, ঐগী পুক্নিং হন্থহন্দনবা মখোয়না কন্না হোৎনখি।
প্রধান মন্ত্রী: য়েংউ, পলক, অদোমগী ৱারীনা মীওই কয়াগী পুক্নিং থৌগৎনফম ওইবা য়াগনি। খুদোংথিবা কয়া থেংনরবসু, অদোম্না পরম চুম্না থাংদুনা লাক্লি, অদোমগী পুন্সিদা অপনবা কয়া থেংনখি, অদুবু অদোমগী পান্দমদি কৈদৌনুংদা থাদোকখিদে। মদুমক অচৌবা মায় পাকপা অমনি। অদোমগী মফমদা নুংঙাইবা ফোঙদোকচরি।
পলক কোহলি: অদোমবু ঙমখৈ লৈতনা থাগৎচরি সর!
শ্যাম সুন্দর স্বামী: খুরুমজরি সর, ঐ শ্যাম সুন্দর স্বামী, অমদি ঐ বিকানের, রাজস্থান্দগী লাকপনি। ঐ পেরা-অর্চর অমনি। ঐখোয়গী বিকানেরদা, কর্নি সিংহনা ওলিম্পিক্স মঙাদা শরুক য়াখি। ঐনা দেবেন্দ্র ভৈয়াদগী ৱাফম কয়া তমশিনবা ঙমখি মরমদি চহি ৪০গী মতুংদা, ঐ তোকিও ওলিম্পিক্সতা শরুক য়াখি। ঐনা ভৈয়ানা শান্নবা উরগা “শান্নবা অসি অসুম তৌবোইরে” হায়না খনখি। পেরা স্পোর্তস য়াওদ্রিঙৈদা, ঐ শোইনাইদবা মীওইশিংগী শান্নবদা শরুক য়াখি। ২০১৬দা, ঐনা পেরা স্পোর্তসকী মরমদা খঙখি মরমদি ঐনা ভৈয়াগী ফোতো অচৌবা অমা পাউচেদা উবা ফংখি। মঙোন্দগী তমদুনা, ঐনা তোকিও ওলিম্পিক্সতা চহি ৪০গী তুংদা শরুক য়াখি।
শান্নরোয়: হন্দক্তি, ঐ ঐগী কেতরীগী গোল্দ মেদলিস্ত নিতেস কুমার জীদগী ৱাফম কয়া তমহৌখি। মহাক্কী পুন্সি চুপ্পা, মহাক্না গোল্দ লৌবদা মায়থিবা পীরমখিবা মীওইদুগা লম্বানবদা অমুক্তা মায় পাকখিদ্রি। অদুগা ঐনা নিতেজ জীনা মরম ওইরগা মমাঙদা মহাকপু মায়থিবা পীখি। মহাক্কী মফমদগী করিগুম্বা মহাক্না তৌবা ঙম্লগদি, ঐসু মহাকপু অমুক হন্না মায়থিবা পীবা ঙমগনি অমদি মালেমসিগী মীওই অমা হেক্তবু মায়থিবা পীবা ঙমগনি হায়বা খঙবা ঙমখি।
প্রধান মন্ত্রী: নুংঙাইবা ফোঙদোকচরি!
Athlete: অদোমবু থাগৎচরি সর।
কোচ: ঐগী মিং দোক্তর সত্যপাল, অমদি ঐ পেরা-এথ্লেতিক্স কোচ অমনি। ঐগী মমাঙদা পেরা-শান্নরোয়শিংদা ত্রেনিং পীবা হৌরকপা কোচ অমত্তা য়াওরমদবা য়াই। ঐ পেরা-শান্নরোয়শিং ত্রেনিং পীবা ২০০৫-০৬তগী হৌরকখি।
প্রধান মন্ত্রী: মদু হৌরক্নবা ৱাখল্লোন অদোমদা কমদৌনা লাকখি?
কোচ: সর, ঐনা শান্নরোয়শিং ত্রেন তৌনবা নেহরু স্তেদিয়মদা হেক হেক চৎলম্মি, অমদি শান্নরোয় খরা মখোয়গী মখোঙদা খুদোংচাদবা উবা ফংখি। ঐনা মখোয়বু য়েংলম্মি, মখোয়গী ফীভমগী মরমদা পাখি, অমদি ২০০৪ এথেন্স ওলিম্পিক্সতা সনাগী মেদল লৌরকখিবা দেবেন্দ্র জীগী মরমদা তাখি। মতমদুদগীনি ঐনা মদুগী মরমদা থিজিন্বা হৌরকখিবা, অমদি পেরা-শান্নরোয়শিং খরা খরা ত্রেনিং পীবা হৌরকখিবা। হৌরকপদা, নেহরু স্তেদিয়মদা লৈরিবা কোচ পুম্নমক্না ঐঙোন্দা ঙক্না য়েংনরম্মি মরমদি ঐনা দীপা মলিক জীগী ৱীলচেয়র ইল্লম্মি নৎত্রগা অঙ্কুর ধমাবু স্তেদিয়মগী অকোয়বদা মখুৎ শমদুনা চৎলম্মি। ঐনা মতম মাঙহল্লি হায়না মখোয়না খনখি। অদুবু ঙসি, মতমদুদা ঐবু শিথিবিখিবা পেরা-শান্নরোয়শিং অমসুং কোচশিং অদুনা হৌজিক্তি পেরা-শান্নরোয়শিং ত্রেন তৌবা পাম্লক্লে। ঐনা ৱাফমশিং অসি ঐগী থম্মোয়নুংদগী ফোঙদোক্লিবনি মরমদি ঐনা হীরম অসিদা থবক তৌদুনা লাক্লি। ঐ য়াম্না নুংঙাই, অমদি ঐনা অদোমগী মফমদা ৱাশকচরি সর, মদুদি মথঙদদি, ঐখোয়না মেদল ২৯ খক্তা নত্তনা, ঐখোয়না মেদল ৫০ পুদুনা লাক্কনি মরমদি মদুগীদমক ঐখোয় কন্না হোৎনরি।
প্রধান মন্ত্রী: য়াম্না ফৈ!
কোচ: থাগৎচরি সর।
প্রধান মন্ত্রী: য়েংবিয়ু মরুপশিং, মশান্ন খুদিংদা সপ্পোর্ত স্তাফ নৎত্রগা কোচশিং কন্না হোৎনবা মথৌ তাই হায়বা ৱাফমসি অচুম্বনি। অদুবু হকচাঙগী ফীভম মীমান্নদ্রবা মীওইশিংগা থবক তৌমিন্নবা মতমদদি, মখোয়দা তাকপি তম্বিদ্রিঙৈদা, মীওই অমনা মখোয়গী পুন্সিগী মরমদা থম্মোয় শেঙনা খঙননবা শেম শাবা মথৌ তাই। অদোম্না ইশাবু মখোয়গী ফীভমদা থমদুনা য়েংজবা তাই, মখোয়গী পুন্সিদা থেংনরিবা শিংনবশিং লৌশিন্বা তাই, মতমদুখক্তদা অদোম্না মখোয়বু লমজিংবা ঙমগদৌরিবনি। মদু নৎত্রবদি, “চেল্লু!” খক্তা হায়বদুদি য়াম্না লায়। অদুবু শান্নরোয় অদুনা “ঐ চেন্বা ঙমদ” হায়রকপা য়াই। কোচ অমনা মখোয়না চেনবা ঙমদ্রিবা করিগীনো হায়বা খঙই অমদি মদু ঙমহন্নবা অচুম্বা লম্বী থিদোকই। মরম অসিননি পেরা-শান্নরোয়শিং ত্রেন তৌরিবা কোচশিং অসি তোপ তোপ্পনি হায়রিবা; মখোয়দা তোপ তোপ্পা পাঙ্গল অমা লৈরি। মীওই খরখক্তনা মসি মপুং ফানা লৌশিন্বা ঙম্মি, অদুগা ঐহাকসু মদু মপুং ফানা খঙবা ঙম্মি। ঐনা মমাঙদা শাখিবা ৱারী কয়াদা হায়খ্রে, ফোন্দসু হায়খ্রে। চুম্নগী শান্নরোয়শিংনা তেক্নিকখক্তমক তম্বিবা মথৌ তাবদা, পেরা-শান্নরোয়শিংনা পুন্সি কমদৌনা হিংগনি হায়বা তম্বিবসু মথৌ তারিবনি। মসি পুক্নিং চেৎপগী মওং অমনি, অমদি অসিগুম্বা থৌওংশিং তৌরিবা মীওইশিং অদু খ্বায়দগী ৱাংনা ইকায়খুম্নবিবা মতিক চায়।
কোচ: সর, ঐহাক্না শান্নরোয় অমদি এদমনিস্ত্রেতর অমা ওইনা মালেমগী কম্পিতিসনশিংদা শরুক য়াবা হৌরকখিবা চহি ৩০ শুরে। ভারতকী ফিরাল অমত্তা উবা ফংদবা মতম অমা লৈরম্মি। হৌজিক্তি ভারতকী ফিরাল চিংখৎলি অমদি ঐখোয়গী শান্নরোয়শিংনা “পেরা স্পোর্তসনা মরম ওইরগা ঐখোয় মেদল লৌবা ঙম্লে” হায়রগা হল্লক্নরি। মমাঙদা, শরুক য়াবখক্তদা মীৎয়েঙ থম্লম্মি, অদুবু হৌজিক্তি ৱাখল্লোন অসি হোংলে। ঐনা অদোমবু থাগৎচনিংই সর। ঐনা মীওই কয়াদা হেক হেক হায়, ঐখোয়গী ব্রান্দ এম্বেসেদরদি অতৈ কনা নত্তা ঐখোয়গী মোদী জীনি – অদোম্না ঐখোয়গী ব্রান্দ এম্বেসেদরনি। অদুগা সর, ভারতনা চুম্নগী শান্নরোয়শিংগী মশান্নশিংদসু মেদল হেন্না ফংবা ঙমগনি। ঐ ইস্ত জর্মনী অমদি চেন্নাইদা চৎলুরে, অমদি হৌজিক্তি ঐখোয় ভারত্তা য়াম্না ফবা ফেসিলিতীশিং লৈরে। ঐখোয়না মখোয়দু মওং চুম্না শীজিন্নগদবা খক্তা মঙায়রে, ফীজিকেল এজুকেসন ওজাশিং এক্তিবেত তৌবদা, ঐখোয়না ১০০% মেদল মশিং হেন্না পুরকপা ঙমগনি। থাগৎচরি সর!
নিসদ কুমার: সর, ঐগী মিং নিসদ কুমার, অমদি ঐ T47 হায় জম্পতা শরুক য়াখি। ঐনা পেরালিম্পিক্সতা থংন-থংননা মেদল লৌরকখি। সর, ঐহাক ঐগী এক্সপিরিএন্স পাউদমজবা পাম্মি। ঐখোয়গী তীম্না তোকিওদা য়ৌখিবা মতমদা, মফমদুদা কোবিদ লৈরম্মি, মরম অদুনা ঐখোয়না মীৎয়েঙ তাবিনবা য়াওদনা শান্নখি। অদুবু হন্দক্তি, পেরিস পেরালিম্পিক্সতা, স্তেদিয়ম অদু পীক থনখি। ঐনা শান্নখিবা নুমিত্তুদা, মীৎয়েঙ তাখিবা পুম্নমক্না “ইন্দিয়া, ইন্দিয়া” হায়না লাউবা তাবদা য়াম্না পুক্নিং থৌগৎনিংঙাই ওইখি। মদুনা ঐঙোন্দা নীংথিনা শান্ননবা অমসুং মেদল অমা লৌরক্নবা ইনোৎ হাপখি। মথঙগী নুমিত্তনা মেদল সিরেমোনীনি। মেদল লৌরক্লবা মতুংদা, ঐনা হায় জম্পতা লৈরিবা ঐগী অতৈ তীম মেম্বরশিংগী শৌগৎনবা চৎখি। মেদল অদু ঐগী ঙক্তা শিদুনা চৎখি, অমদি ফ্রেয়্চ ইমুং অমনা ঐবু য়েংদুনা লৈরম্মি। মখোয়না ঐগা ফোতো অমা কাপমিন্নবা পামদুনা লৈরম্বনি। কম্পিতিসন হেক লোইবগা, ঐনা ফোতো কাপ্নবা কুমথখি, অমদি মখোয়না ফোতো অমা কাপ্নবা হায়রকখি, মখোয়গী অঙাংশিং, চহি ৬ নৎত্রগা ৭ লোমগী ওইরমগনি, মেদল উবদা য়াম্না হরাওখি। অঙাংশিং অদুনা ঐগীদমক লাউরম্মি, অদুগা কোন্না মখোয়না ঐগা পুন্না লেপমিন্নরগা ফোতো কাপমিন্নখি। অঙাংশিংদুগী মমাদুনা ঐঙোন্দা অদোম্না ঐখোয়গী অঙাংশিংগা পুন্দুনা ফোতো কাপমিন্নবা অমদি ওতোগ্রাফ পীবিবা অসিনা পেরিসতা লাক্তুনা কম্পিতিসন য়েংবগী মহৈ য়াল্লে হায়খি। ইমুং পুম্বা হরাওখি। মদু ঐগীদমক্তদি য়াম্না নুংঙাইবা এক্সপিরিএন্স ওইখি সর।
প্রধান মন্ত্রী: য়াম্না ফৈ।
বিসাল কুমার- থাগৎচরি সর।
য়োগেস কথুনিয়া: খুরুমজরি সর! ঐগী মিং য়োগেস কথুনিয়া। ঐ সিল্ভর মেদল অনিরক লৌরক্লবা মীওইনি। ঐনা ঐগী এক্সপিরিএন্সকী মরমদা ৱাফম অমা থমজবা পাম্মি। মসি এক্সপিরিএন্সখক্কী ৱাফম নত্তে, লেপ্পা নাইদনা হোৎনবগী ৱাফম্নি। হায়রিবা ফীভম অসি অদোম্না মরম ওইরগা লাকখিবনি, TOPS স্কীম, খেলো ইন্দিয়া স্কীম, নৎত্রগা NSUs ওইরবসু অদোম্না ভারত্তা হৌদোকখিবা তোঙান তোঙানবা স্কীমশিং পুম্নমক অদোম্না মরম ওইরগা লৈরিবনি। হন্দক, ঐখোয়না মেদল ২৯ ফংলকখি, অমদি সর, ঐনা ময়ামগীদমক অতোপ্পা ৱাফম অমগা হাপচিঞ্জগে: অদোমগী ওইনদি PM হায়বদি প্রধান মন্ত্রী হায়বনি, অদুবু ঐখোয়গীদমক্তদি PM হায়বসি পরম মিত্র (অথোইবা মরুপ) হায়বনি।
প্রধান মন্ত্রী: ৱাউ! অদোম্না ঐগী ইফমদা পীবিরিবা মিংথোল অদুদা ঐ তশেংনা পেল্লে। ঐহাক্নসু অদোমগা লোয়ননা অশেঙবা মরুপকী মতৌগুম থবক তৌমিন্নবা পাম্মি।
নবদীপ: সর, ঐগী মিং নবদীপ।
প্রধান মন্ত্রী: হন্দক্তি, খ্বায়দগী মীয়াম্না পাম্নবা রীল্স অদোম অমদি সীতলগী ওইখ্রে।
নবদীপ: সর, ঐ F41 কাঙলুপ্তা জেব্লিন থ্রোদা শরুক য়াখি। হন্দক্কী অসি ঐগী অনিশুবা পেরালিম্পিক্সনি। ঐগী ইভেন্ত অরোয়বা নুমিত্তা তাখি, অমদি ঐনা মফমদুদা তাং ২১ অদুৱাইদা চৎখি। মেদল ফংবা হৌরকপগা, ঐঙোন্দা করম থোক্লগদবনো খন্বদা ঐ পুক্নিং লাংতক্নখি। অদুবু সর, ঐনা সুমিত ভাই, অজিত ভাই, সন্দীপ ভাই, অমসুং দেবেন্দ্র সরগুম্বা ইথক থোংবা শান্নরোয়শিংগা ৱারী শান্নদুনা, মখোয়দা করি ফাওই অমদি ঐনা করি তৌগনি হায়বনচিংবা এক্পিরিএন্সশিং ফংখি। মমৈদদি ঐহাক পুক্নিংদা পোৎলুম পুদনা শান্নবা ঙমখি।
প্রধান মন্ত্রী: ফজৈ।
নবদীপ: থাগৎচরি সর।
রক্সিথা রাজু: খুরুমজরি সর, ঐ রক্সিথা রাজু, মীৎ নীংথিনা উবা ঙমদ্রবা শান্নরোয় অমনি। মসি ঐগী অহান্বা ওলিম্পিক্সনি। ঐ য়াম্না নুংঙাই অমদি এক্পিরিএন্স কয়া ফংখি। ঐ পেরা এসিয়ন গেম্সতা অনিরক সনাগী মেদল লৌরকখ্রে। ঐহাক ঐগী গাইদ রন্নর অমসুং ঐগী কোচ রাহুল বালাকৃষ্ণ সরগী মফমদা লমন তোনশিঞ্জরে। মহাক মফমসিদা ঐগা লৈমিন্নরি। গাইদ রন্নর অমা য়াওদনা ঐ চেন্বা ঙমদে। ঐ য়াম্না নুংঙাই অমদি ২০২৮গী পেরালিম্পিক্সতা সনাগী মেদল অমা লৌরক্নবা ফিরেপ লৌরি।
প্রধান মন্ত্রী: ৱাউ, নুংঙাইবা ফোঙদোকচরি অমদি ময়াম পুম্নমক্কী মফমদা য়াইফবতা ওইরসনু হায়জরি।
রক্সিথা রাজু: ঐগী গাইদ রন্নর অমসুং ঐগী কোচনা ঐবু য়াম্না পুক্নিং থৌগৎপিখি। ঐনা মখোয়বু হন্না হন্না থাগৎচরি মরমদি মখোয়না ঐগা লোয়ননা করিসু ওইজবা থিদনা অয়ুক নুংথিল নুমিদাং লোয়নদুনা লৈখি। অদোমবু ঙমখৈ লৈতনা থাগৎচরি সর।
প্রধান মন্ত্রী: ফরে মরূপশিং, ময়ামগা ৱারী ৱাতায় শাননবগী তাঞ্জা ফংজদবা ঐ য়াম্না নুংঙাইরে। হন্দক অদোম্না চৎখিবা মতমদা, ঐনা অদোমগা হকথেংননা উনবা ঙমখিদে মরমদি অদোম তোঙান তোঙানবা মফমদা ত্রেনিং তৌখি অমদি মতমগী খুদোংচাদবা খরসু লৈখি। অদুনা ঐনা অদোমগা ভর্চুএল ওইনা উননবা হোৎনখি, অমদি নুমিত্তুদা ঐনা ৱা অমা হায়খি, অদোম্না নীংশিংলমগনি হায়না খল্লি। ঐনা হায়খি, ঐহাক্না লৈবাক মীয়ামগী পাউজেল অমা পুদুনা লাক্লি, অমদি পাউজেল অদুদি “বিজয়ী ভব” (মায় পাকপা ওইরসনু) হায়বসিনি। ঐখোয়না পামখিবা মায় পাকপগী লৈবাক মীয়ামগী ইহুল অদু অদোম্না থম্মোয়নুংদা থাগোন্নদুনা চৎখি। মসি মশানা য়াম্না মরুওইবা ৱাফম অমনি হায়বা ঐ খঙই। অনিশুবদা, ঐনা য়েংবদা, মরমদি ঐ অদোমগা মওং অমদা হেন্না মরী শম্নবনা মরম ওইরগা, তাইবঙ মপুনা অদোমগী মফমদা অহেন্বা মতিক ময়ায় পীনবিবা মাল্লি। হকচাঙগী ওইনা খুদোংচাদবা খরা লৈরম্বদি য়াই, অদুবু তাইবঙ মপুনা অদোমগী পর্সনেলিতীদা অহেন্বা মতিক ময়ায় হাপ্পিরি। অদোম্না লনাইগী শিংনবা কয়া থেংনদুনা লাক্লে, অমদি করিগুম্বদা মীনোক মৈশা মায়োক্নবসু য়াওরমগনি। অদোম্না মখল মখা কয়াগী অৱা অনা থেংনদুনা লাক্লে, অমদি শান্নবদসু, মায় পাকপা অমসুং মায়থিবগী শাফুনা অদোমগী ৱাখলদা চৈথেং পীদবা মাল্লি। মদু নৎত্রবদি, মায়থিরবা মীওই অমনা, করিগুম্বা মখোয়না মেদল অমা ফংদ্রবদি, পোৎলুম অমা পুদুনা হেক হেক লৈ। অদোমদি অদুগুম্বা পোৎলুম অদু পুবা মান্দে, মদুমক পুন্সিগী অচৌবা মায় পাকপা অমনি অমদি অদোমগী মফমদা মাঙদা চঙশিন্নবগী থৌনা হাপ্লিবনি। ঐনা মীওই মশিং হেন্না মশান্ন অসিদা শরুক য়াবা অমদি মেদল হেন্না লৌরকপা পাম্মি; মদু য়াম্না অফবা থৌওং ওইগনি অমদি মদুমক ওইহনগদবনি। অদুম ওইনমক, অদোমগী খুত্থাঙদা, ঐনা লৈবাকসিদা চৎনবী অমা শেম্বা পাম্মি। চৎনবী অদুদি মীপুম খুদিংমক্না, মীমান্নদ্রবা মীওইশিংদা য়েংবা মতমদা, মখোয়গী মীৎয়েঙ হোংদোকপনি। মখোয়না হায়রিবা মীওইশিংসিবু ইকায়খুম্নবগা লোয়ননা য়েংবিগদবনি, তোল্ল-তারবগুম্না উবিরোইদবনি। ঐখোয়না তোল্ল-তারবশিংদা উৎপা মীনুংশি পামদে; ঐখোয়না ইকায়খুম্নবা পাম্মি, অমদি হায়রিবা ৱাখল্লোন অসি ঐহাক্না লৈবাকসিদা শেমগৎপা পাম্মি। মখোয়না স্পোর্তস শান্নরবসু নত্রগা শান্নদ্রবসু, মখোয়দা পুক্নিং হন্থনবগী মথৌ তাদে। ঐগীদমক্তদি, অদোম্না শরুক য়ারিবা, অয়ুক পুং ৪ নৎত্রগা ৫দা হৌগৎনবা অমদি চহি কয়া হুমাং তাহন্বদা থাদরিবা হোৎনজমল পুম্বা কৈদৌঙৈদা মাঙলোই। মসিবদি ঐনা অদোমগী মফমদা থাজবা পীজরি।
মরমদি, হৌজিক খুন্নাইসিদা দিব্যংজন (মীমান্নদ্রবা মীওই)শিংগী ওইবা অনৌবা ফীভম অমা শেম্লকপগী অহৌবা মতমদুনি। সিস্তেম অসি হোংলক্লি। মীপুম খুদিংমক্না মখোয়না মতেঙ পাংবা মথৌ তাই হায়না ফাওনরক্লি। করিগুম্বা ঐনা ফম্লগা কনাগুম্বা অমনা লেপ্তুনা লৈরবদি, ঐনা হৌগৎলগা মখোয়দা ফমফম অদু পীগদবনি। হায়রিবা অহোংবা অসি লাক্লি। অদোমগী থৌদাংদি মেদল ফংলকপা খক্কী নত্তে; খুন্নাই পুম্বগী ৱাখল্লোন হোংদোকপনি। মীমান্নদ্রবা মীওই খুদিংমক্না মখোয় কনাদগীসু তাদে হায়না খন্বা ফীভম অমা নখোয়না শেম্লিবনি। ঐখোয়না হায়রিবা ৱাখল্লোনসিদা মখা চঙশিন্বা মথৌ তাই হায়না ঐনা থাজৈ। ঙসিগী মালেমসিদা মেদল অমসুং মখোয়গী মশিং মরু ওই। অদুবু মীওই করোর ১৪০গী লৈবাকসিনা মায় পাকপখক্কী নত্তনা শান্ননবগীদমক হৌরক্লিবা ৱাখল্লোন অসি মরুওই। শরুক য়াবখক্তনা নত্তনা পর্ফোর্মর অমা ওইবগী ৱাখল্লোন অসিনা লৈবাকসিগী মপাঙ্গল হাপ্লি। নখোয়না হায়রিবা পাঙ্গল অদুদা মথৌ হাপ্লি। মরম অসিনা ঐগী মায়কৈদগী, ময়ামগী মফমদা নুংঙাইবা ফোঙদোকচরি। মীপুম খুদিংগী মায়থোঙদা তারিবা নুংঙাইবগী মমি উবদা ঐ নুংঙাই। মদু নত্তবদা, মথঙগী ওলিম্পিক্স য়ৌদ্রিবা ফাওবা নোক্তবা মীওই খরা ঐ উখ্রে মরমদি মখোয়না মখোয়গী হৌখিবা পর্ফোর্মেন্সতা উংদুনা লৈ। মদু মফমসিদদি উদে; নখোয়না মথঙগী ওলিম্পিক্স মায় পাক্লবগুম ঐঙোন্দা ফাওই। ঐনা অদোমগী মীত্তা উবা ফংই; ঐনা অদোমগী নুংদা লৈরিবা থাজবা অদু উবা ঙম্মি। মরম অসিনা মরূপশিং, ঐনা অদোমগী মফমদা য়াইফবতা ওইরসনু হায়জরি। অমুক্কা হন্না নুংঙাইবা ফোঙদোকচরি। থাগৎচরি।
