“ঐহাক্না অদোমগী নাক্তা চত্তুনা অদোমগী থৱাই য়াওবা, খোঙফম চেৎপা, থৌনা, থাজবগীদমক্তা থাগৎনীংবনা ঙাইঙমদ্রে”
“ভারত থাদা য়ৌরে! ঐখোয়না লৈবাক্কী মিংচৎপু থাদা থমখ্রে”
“মসিগী অনৌবা ভারত অসিনা 21শুবা চহি-চাগী মালেমগী অচৌবা শিংনবশিংগী ৱারোইশিন পুরক্লগনি”
“তচদাউন তৌখিবগী মিৎকুপ্না চহি-চা অসিগী ইথিল খ্বাইদগী পীবা পুংফম অমা ওইরে”
“ঙসিদি, মালেম পুম্বনা ভারতকী সাইন্সকী ইথিল, ঐখোয়গী তেক্নোলোজী অমসুং সাইন্তিফিক তেম্পরামেন্তপু উরে অমসুং মসিগী মপাঙ্গলবু শকখঙলে”
“ঐখোয়গী ‘মুন লেন্দর’ অসিনা অঙ্গদকুম্না থা লৈমায়দা চেৎনা খোঙদারে”
“চদ্রয়ান-3গী মুন লেন্দরনা তাখিবা মফম্বু হৌজিক ‘শিব শক্তি’ হায়না খঙনরগনি”
“চন্দ্রয়ান-2গী খোঙ্গুল তাখিবা মফম্বু হৌজিক ‘তিরঙ্গা’ হায়না কৌরগনি”
“চন্দ্রয়ান-3 লুনার মিসনগী মায় পাকপদা ঐখোয়গী নুপী সাইন্তিস্ত, লৈবাক্কী নারী শাক্তিগী অচৌবা থৌদাং য়াওরি”
“ঐখোয়গী ‘অহুমশুবা পরিং’দগী ‘অহানবা পরিং’ ফাওবগী খোঙচত্তা ‘ISRO’গুম্বা ঐখোয়গী ইন্সতিত্যুসনগী অচৌবা থৌদাং য়াওরি”
“ভারতকী খা থংবা মফমদগী থাগী খা মাইকৈ ফাওবগী খোঙচৎ অসি অরায়বা নত্তে”
“ঙসিদগী হৌনা, ওগস্ত 23 অসিবু চহি খুদিংগী লৈবাক্কী স্পেস নুমিৎ হায়না পাংথোক্লগনি”
“ভারতকী স্কৃপচরশিংদা য়াওরিবা এস্ত্রোনোমীগী ফোর্মুলাশিংবু সাইন্তিফিক ওইনা চুম্মী তাক্নবা অমসুং নৌহৌননা অমুক নৈননবা অনৌবা চারোন শুরোন্না মাঙদা থোক্লকপা তারে”
“21শুবা চহি চাগী মতমসিদা, সাইন্স অমসুং তেক্নোলোজীগী লমদা লুচিং থৌদাং লৌরিবা লৈবাক অসিনা তুংলমচত্তা চঙশিল্লগনি”

নমস্কার মরুপশিং!

ঙসি অদোমগী মরক্তা লাকপদা ঐহাক্না তোঙানবা নুংঙাইবা অমা ফাওই। মসিগুম্বা নুংঙাইবা অসি য়াম্না তাঙনা থোকপজাৎনি। পুন্সিদা মসিগুম্না হকচাং অমসুং ৱাখল্লোন অনিমকপু অশুক য়াম্বা হরাও নুংঙাইবা ফাওবসিদি ঙাইঙমদবা মতৌ অমসু য়াওরকই। ঐহাক্কী মফমদা মসিমক হন্দক থোক্লে। সাউথ অফ্রিকা অমসুং গ্রীসতা প্রোগ্রাম লৈবগী ঐ চৎলুরে, অদুবু ৱাখলদি অদোমগী নাক্তা অদুম লৈখি। ঐহাক্না অদোমগী মফমদা মীচঙ মীখায় নাইরে হায়না করিগুম্বা মতমদসু খল্লি। ঙাইঙমদবা ঐগী, অৱাবনা অদোমগী। অসুক ঙনবসিদা অদোমগী নাক্তা চৎনীংবা ফাওবদগী অদোমগা উন্ননীংবদগী ঐ লাক্লে। অদোমদা খুদোংচাদবদি থোক্লম্বা য়াই, অদুবু, ভারত্তা হেক্তা য়ৌবগা অদোমগা য়াম্না থুনা উন্নবা পামখি। অদোমগী থৌনা, হোৎনজমন, থাজবা, ৱাখল চেৎপবু ঐহাক্না সলাম তৌজরি। অদোম্না লৈবাকপু থাক অসিদা পুরক্লিবা অসি ইচম চম্বা মায় পাকপা নত্তে। মসিদি স্পেসকী লমদা ভারতকী তসেংবা পাঙ্গল তাকপনি।

ভারতা থাদা য়ৌরে, ভারতকী মিংচৎ থাদা য়ৌরে। কনা অমত্তনা য়ৌবা ঙমদবা মফমদা ঐখোয়না য়ৌরে। কনামত্তা তৌখিদ্রিবা অমা ঐখোয়না পাংথোক্লে। মসিনি ঙসিগী অনৌবা ভারত। অনৌবা ৱাখল্লোন খনবা, অনৌবা পাম্বৈ পুথোকপা অনৌবা ভারতনি। 21শুবা চহি চাসিগী মালেমগী অচৌবা শিংনবশিংগী ৱারোইশিন ভারতনা পুরক্লগনি। ঐহাক্কী মিৎমাঙদা ওগস্ত 23গী নুমিৎ অদু শং-শঙনা উরি। তচদাউন তৌরে হেক তাবদা মফমসিগী ইস্রো সেন্তর, লৈবাক পুম্বনা নুংঙাইমনবদগী চোংখৎপদু কনানা কাওগনি, পুংফম অদু অমর ওইরবনি। পুংফমদু ঐখোয়গী ওইখ্রবনি, হন্দক্কী চহি-চা অসিগী খ্বাইদগী ইথিল পীবা মতমশিংগী মনুংদা অমা ওইরবনি। ভারত মচা খুদিংনা মশামক্কী মায় পাকপনি খল্লিবনি। অচৌবা পরিক্ষা অমা মায় পাক্লে খন্নরিবনি। থাগৎ ৱারোল কয়াসু ঙসিসু লাকপা লেপ্ত্রি। পুম্নমক অসি অদোম্না ওইথোকহল্লিবনি। লৈবাক্কী সাইন্তিস্তশিংনা ওইথোকহল্লিবনি। ঐহাক্না অদোম্বু থাগৎলিবমখৈ অদুম তাদৌরবনি, অদোমগী মতাংদা হায়বা খুদিং ৱাত্তৌরবনি।

মরুপশিং,

মুন লেন্দরনা অঙ্গদকুম্না থা লৈমায়দা খোঙফম চেৎনা লৈবগী ফোতো ঐহাক উরে। নাকল অমদনা বিক্রমগী থাজবা, অদুগা নাকল অমদনা প্রগ্যানগী তৌবা ঙম্বগী মতিক লৈরিবনি। ঐখোয়গী প্রগ্যান্না থা লৈমায়দা মহাক্কী খোঙ্গুল লেপ্তনা তাহল্লি। তোঙান-তোঙানবা কেমেরানা নমখিবা ফোতো হৌজিক থাদোকপা হৌরক্লে, ঐহাক্না মদু য়েংবগী খুদোংচাবা ফংলে, মদুনা ঐগী পুক্নিং শুমহৎলে। মীওই খুন্নাইগী চহি লাক্ষ কয়াগী পুৱারীদা মফমদুগী ফোতো ঐখোয়না খ্বাইদগী অহানবা ওইনা উবা ফংলে। অদুগা মদুগী ফোতোশিং অদুবু মালেমদা উৎপগী থবক ভারতনা তৌরিবনি, ঐখোয়গী সাইন্তিস্তশিংনা তৌরিবনি। ঙসিদি, মালেম পুম্বনা ভারতকী সাইন্সকী ইথিল, তেক্নোলোজী অমসুং সাইন্তিফিক তেম্পরামেন্ত শকখঙলে। মসিগুম্বা অচৌবা মায় পাকপা অসি ভারতখক্কী নত্তে, মীওইবা খুন্নাইগী মায় পাকপনি। ঐখোয়গী মিসন্না একপ্লোর তৌগদৌরিবা মফম অদুনা লৈবাক খুদিংগী মফমদা থাগী মিসন পাংথোকপগী অনৌবা পাম্বৈ কয়া হাংদোক্লগনি। মসিনা থাগী অরোনবা কয়া হাংদোকপগা লোয়ননা পৃথিবীগী শিংনবশিংগী ৱারোইশিন পুরকপদসু মতেং পাংগনি। অদোমগী মায় পাকপা অসিগীদমক্তা ঐহাক্না সাইন্তিস্ত, তেক্নিসিয়ন, ইঞ্জিনিয়র অমসুং চন্দ্রয়ান মিসনগা মরী লৈনবা মীওই খুদিংবু অমুক্কা হন্না থাগৎচরি।

ঐহাক্কী ইমুংগী মীওইশিং,

স্পেস মিসনগী তচদাউন তৌবা মফম্বু মিংথোনবগী চৎনবী অমা লৈ হায়বা অদোম খঙলবনি। ঐখোয়গী চন্দ্রয়ান্না খোঙদারিবা থা লৈবাক্কী মফমদুগী মমিং থোন্নবা ভারতনা ৱারেপ লৌরে। চন্দ্রয়ানগী মুন লেন্দরনা খোঙদাখিবা পোইন্ত অদুবু ‘শিবশক্তি’ হায়না খঙনরগনি। শিব হায়বসিদা মীওইবা খুন্নাইগী য়াইফ য়ুম্বালগী ৱারেপ য়াওরি অমসুং শক্তিনা ৱারেপশিং অসিবু মঙফাওনহনবগী পাঙ্গল ঐখোয়দা পীরিবনি। থাগী শিব শক্তি পোইন্ত অসিনা হিমালয়গা কন্যাকুমারীগা লৈনবা মরীগী ৱাখল্লোন অমসু তাক্লি। ঐখোয়গী ঋষিশিংনা হায়রম্মি – য়েন কর্মন্যপ্সো মনীশিনে য়গ্য কৃনৱন্তি বিদধেশু ধিরাঃ য়দপুর্ন য়ক্সমন্তঃ প্রজানা তন্মে মনঃ শিব শঙ্কল্প-মস্তু। মসিনা হায়বদি, ঐখোয়গী ৱাখল্লোন অমগা লোয়ননা ইশাগী থৌদাং পাংথোক্লিবা, ৱাখল্লোন অমসুং সাইন্সপু খুমাং চাউশিনহল্লিবা, অদুগা মীপুম খুদিংগী নুংদা য়াওরিবা ৱাখল্লোন অদু য়াইফবা অমসুং চাউখৎপা থবক অমা পাংথোক্কে হায়বা অপাম্বগা লোয়নবনি হায়বনি। মসিগুম্বা অপাম্বা থবকশিং পাংথোকপা ঙম্নবগীদমক্তা শক্তিগী থৌজাল মথৌ তাই। অদুগা মসিগী শক্তি অসিদি ঐখোয়গী নারী শক্তিনি। ঐখোয়গী ইমা, ইচে-ইচলশিংনি। ঐখোয়গী লমদমসিদা হায়নবা অমা লৈ- শৃস্তি স্থিতি বিনাশানা ভক্তিভুতে সনাতনি। হায়বদি, হৌবদগী লোইবা ফাওবা, পুম্নমক অসিগী য়ুম্ফমদি নারী শক্তিনি হায়বনি। অদোম পুম্নমক্নসু উখ্রে, চন্দ্রয়ান-3দা ঐখোয়গী নুপী সাইন্তিস্ত, লৈবাক্কী নারী শক্তিনা অচৌবা থৌদাং য়াখি। থা লৈমাইগী শিব শক্তি পোইন্তনা ভারতকী মসিগুম্বা সাইন্তিফিক অমসুং ফিলোসোফোগী ৱাখল্লোন অসিগী শাখি ওইগনি। মসিগী শিব শক্তি পোইন্ত অসিনা হৌরক্লিবা চারোন শুরোনশিংদা ইথিল পীগনি, সাইন্স অসি মীওইবা খুন্নাইগী কান্নবা পুরক্নবগীদমক্তা শিজিন্নগদবনি হায়বা পাউজেল পীরগনি। মীওইবা খুন্নাইগী য়াইফ য়ুম্বাল হায়বসিনা ঐখোয়গী খ্বাইদগী মকোক থোংবা কম্মিৎমেন্তনি।

মরুপশিং,

মিংথোনবগী থবক অমা মতম কুইনদগী পাংথোক্তনা লাক্লে। চহি মরিগী মমাংদা চন্দ্রয়ান 2না থাগী লৈমাইদা য়ৌখিবা, খোঙ্গুল তাহনখিবা মফমদুগী মমিং অমা থোনবা হায়না খন্নদুনা লাক্লিবনি। অদুবু, চন্দ্রয়ান 3না থাগী লৈমাইদা মায় পাক্না তারবা মতুংদতা, মফম অনিগী মমিং থোনগনি হায়না ঐখোয়না ৱারেপখিবনি। অদুনা, য়ুম্থোং খুদিংদা তিরঙ্গা পাইরিবা, ৱাখল্লোন খুদিংবু তিরঙ্গানা থল্লিবা, থাগী লৈমাইদসু তিরঙ্গা পাইরবনিনা, চন্দ্রয়ান 2গী মফমদুবু ‘তিরঙ্গা’ নত্তনা অতোপ্পা করি মমিং থোনগনি হায়না ঐনা খল্লিবনি। মরম অদুনা, চন্দ্রয়ান-2গী খোঙ্গুল তাখিবা মফম্বু হৌজিক ‘তিরঙ্গা’ হায়না কৌরগনি। মসিগী পোইন্ত অসিনা ভারতনা হোৎনরকপা খুদিংগী ইথিল ওইগনি অমসুং মায়থীবা অসিনা অরোইবা নত্তে। তৌগে হায়না খনবগী অকনবা মতৌ লৈরবদি, মায় পাকপা হায়বসিদি শোইদ্রবনি। ঐ অমুক্কা হন্না হায়গেকো, চন্দ্রয়ান 2না খোঙ্গুল থমখিবা মফম অদুবু ‘তিরঙ্গা’ অদুগা চন্দ্রয়ান 3না খোঙ্গুল থম্লিবা মফমদুবুনা ‘শিবশক্তি’ হায়না খঙনরগনি।

মরুপশিং,

ভারতনা থাগী লৈমায়দা মায় পাক্না খোঙদাবা ঙম্বা 4শুবা লৈবাক অমা ওইরে। ভারতকী স্পেস প্রোগ্রাম্না মতৌ করম্না হৌরকখিবগে য়েংলুরগদি, মসিগুম্বা মায় পাকপা অসি য়াম্না চাউবা মায় পাকপা অমা ওইরি। ভারতকী নাক্তা তঙাই ফদবা তেক্নোলোজী, তেংবাং লৈতবা মতম অমা লৈরম্মি। ঐখোয় অসি ‘থর্দ ৱর্ল্দ’ হায়বদি ‘অহুমশুবা পরিং’গী লৈবাক মনুংদা চল্লম্মি। মদুদগী থোক্লক্তুনা ঐখোয়না ঙসিদি মালেমগী খ্বাইদগী মঙাশুবা চাউবা শেন্মিৎলোন ওইরে। ঙসিদি, ত্রেদতগী হৌরগা তেক্নোলোজী ফাওবদা ভারত অসি হৌজিক অহানবা পরিং, হায়বদি ‘ফর্স্ত রো’দা লেপ্লিবা অখন্নবা লৈবাকশিংগী মনুংদা চল্লে। ঐখোয়গী ‘অহুমশুবা পরিং’দগী ‘অহানবা পরিং’ ফাওবগী খোঙচত্তা ‘ISRO’গুম্বা ঐখোয়গী ইন্সতিত্যুসনগী অচৌবা থৌদাং য়াওরি হায়বনি। ঙসিদি মখোয়না মেক ইন ইন্দিয়াবু থাদা য়ৌহল্লে।

ঐহাক্কী ইমুংগী মীওইশিং,

ঐহাক্না ঙসি অদোমগী নাক্তা লাকপসিদা লৈবাক মীয়ামদা অদোমগী হোৎনবগী মতৌগী মতাংদা পাউদম্বা পাম্মি। ঐহাক্না হায়গদৌরিবা অসি অদোমগী নত্তে। অদুবু, অদোম্না তৌখিবশিং অদু লৈবাক মীয়াম্না খঙফম থোকই। ভারতকী খা থংবা মফমদগী থাগী খা মাইকৈ ফাওবগী খোঙচৎ অসি অরায়বা নত্তে। মুন লেন্দরনা মায় পাক্না মুন লেন্দিং তৌনবগীদমক্তা ISROনা মখোয়গী রিসর্চ ফেসিলিতীদা খুৎশেম্না শাবা থা অমসু শেমখ্রবনি। মসিগী খুৎশেমগী থা অসিদা বিক্রম লেন্দরবু তোঙান-তোঙানবা মওংদা থাদদুনা তেস্ত তৌখিবনি। মসিগুম্বা পরিক্ষা কয়া পীরবা মতুংদা ঐখোয়গী মুন লেন্দরনা থাদা চৎখ্রিবনি, অদুদদি মায়দি শোইদনা পাকপা তাবনি।

মরুপশিং,

ভারতকী নহাশিংনা সাইন্স, স্পেস, ইন্নোভেসনগী মতাংদা থৱাই য়াম্না য়াওবগী মতৌ ঐহাক্না উবা ফংই। মঙ্গলয়ান, চন্দ্রয়ানগী মায় পাকপা, গগনয়ানগীদমক্তা শেম শারিবা অসিনা লৈবাক্কী নহাশিংদা অনৌবা অপাম্বা অমা লৈহল্লে। চন্দ্রয়ান হায়না মিং অসি ভারতকী অঙাং খুদিংনা শোন্নরি। অঙাং খুদিংনা সাইন্তিস্তশিংদা মখোয়গী তুংগী মতম্বু উনরি। অদুনা, অদোমগী মায় পাকপা অসিদি অদোম্না থা লৈমাইদা তিরঙ্গা পাইহনখিবা অসিখক নত্তে, মসিদগী হেনবা অমসু অদোম্না ফংবা ঙম্লবনি। অদোমগী অচৌবা মায় পাকপা অসিনা ভারতকী চারোন শুরোন কয়াবু মীকপ থোকহল্লে অমসুং মপাঙ্গল হাপ্লবনি। অদোম্না চারোন শুরোন অমদা মায় পাকপগী অচৌবা খুদম অমা পীরম্লবনি। ঙসি ঐখোয়গী অঙাং অমা হেক্তনা নুমিদাংদা থাদা য়েংবা মতমদা, অদোম্না থাদা য়ৌনবা খোঙফম চেৎখিবা অদুমক মখোয়না নুংদা ফাওরগদবনি। অদোম্না ঙসিদি, লৈবাক্কী অঙাংশিংদা মায় পাক্নিংবগী মরু হুল্লম্লবনি। মদুনা হয়েং অচৌবা উপাল ওইরক্তুনা ভারতকী মমায় পুরক্কদৌরিবনি।

ঐখোয়গী নহাশিংদা ইথিল লেপ্তনা পীনবা হায়দুনা ঐখোয়না ৱারেপ অমা লৌরে। ঙসিদগী হৌনা, ওগস্ত 23, চন্দ্রয়ান 3না থাদা সোফ লেন্দিং তৌখিবা নুমিৎ অসিবু চহি খুদিংগী ‘লৈবাক্কী স্পেস নুমিৎ’ হায়না পাংথোক্লগনি। লৈবাক্কী স্পেস নুমিৎনা সাইন্স, তেক্নোলোজী অমসুং ইন্নোভেসনগী ইথিলগী নুংঙাইবা ফোংদোক্কনি অমসুং ঐখোয়গী ইফমদা মতম পুম্বদা ইথিল পীদুনা লৈগনি।

ঐহাক্কী ইমুংগী মীওইশিং,

স্পেস সেক্তরগী মতিক অসিদি সেতিলাইত থাগৎপা অমসুং স্পেস এক্সপ্লোরেসনখক্তদা অকক্নবা লৈতে হায়বা অদোমসু খঙলে। ঐহাক্না উবা ফংবা মসিগী অচৌবা পাঙ্গল অসিদি মসিগী পাঙ্গল অসিদি ইজ ওফ লিবিং অমসুং ইজ ওফ গবর্নেন্সনি। ঙসিদি, লৈবাক অসিদা স্পেস এপ্লিকেসন অমসুং গবর্নেন্সকা মরী লৈনহন্নবা অচৌবা খোঙথাং কয়া পায়খৎলি। ঐহাক্না নৌনা প্রধান মন্ত্রী ওইরকপা মতমদা কেন্দ্র সরকারগী জোইন্ত সেক্রেতরীগী থাক্তা লৈবা ওফিসরশিং অমসুং ISROগী মরক্তা ৱর্কশোপ কয়া পাংথোকখি। গবর্নেন্সতা ত্রান্সপরেন্সী পুরকপদা স্পেস সেক্তরগী পাঙ্গলবু য়ারিবমখৈ য়াম্না শিজিন্নবা হায়বসি মসিগী পান্দমনি। মতমদুদা, কিরঞ্জীনা ঐখোয়গা লোয়ননা থবক তৌমিন্নরম্বা য়াই। মসিনা মরম ওইরগা, ঐখোয়না স্বচ্ছ ভারত অভিয়ান হৌদোকখি, অমাংশঙ শাবা হৌখি, য়ুম করোর কয়া শাবগী অভিয়ান হৌদোকখি, হায়রিবশিং অসি য়েংশিনবদা স্পেস সাইন্সনা য়াম্না তেংবাংখি। ঙসিদি, লৈবাক্কী মনুং হঞ্জিনবা মফমদা এজুকেসন, কম্ম্যুনিকেসন অমসুং হেল্থ সর্ভিসশিং য়ৌহনবদা স্পেস সেক্তরনা অচৌবা থৌদাং য়ারি। নিংতম্বগী অমৃত মহোৎসবকী মখাদা জিলা খুদিংদা অমৃত সরোবর শেম্লি। মখোয়বু তেগিং তৌবা, মোনিতর তৌবসি স্পেসকী খুত্থাংদগী তৌই। স্পেস তেক্নোলোজী য়াওদনা ঐখোয়না তেলি মেদিসিন অমসুং তেলি এজুকেসনগী মতাংদা খনবা ফাওবা ঙম্লোই। স্পেস সাইন্সনা লৈবাক্কী রিসোর্সশিংবু মতিক চানা শিজিন্নহনবদা চাউনা মতেং পাংলি। ঐখোয়গী লৈবাক্কী লৌউ-শিংউবগী সেক্তরগী মপাঙ্গল হেনগৎহনবা, ৱেদর ফোর্কাস্ত তৌবদা স্পেসনা কয়া য়াম্না তেংবাংই হায়বা লৈবাক্কী লৌমী খুদিংনা খঙই। মথংগী চয়োলদা নোং তাগদরা তারোইদরা হায়বা মখোয়না ঙসিদি মশাগী মোবাইলদা ইয়েংলে। লৈবাক্কী ঙামী করোর কয়ানা ‘নাবিক’ সীস্তেমগী খুত্থাংদগী ফংলিবা ই-পাউশিং অসি অদোম্না পীবা ঙাক্তনি। লৈবাক অসিদা ঙসি ঈশিং ইচাউ থোকপা মতমদা, মহৌশাগী অমাঙ অতা অমা হেক্তা থোকপা মতমদা, ফিভম কয়া য়াম্না লুবগে নত্ত্রগা লুদবগে খঙনিংবা মতমদা অদোম্না হান্না নীংশিংই। সাইক্লোন লাকপা মতমদা, ঐখোয়গী সেতিলাইতনা মদুগী মাইকৈ তাকই, মতম তাকই, অদুদগী মীয়ামগী পুন্সি কনবা ঙম্মি, লন থুন কনবা ঙম্মি। অদুগা সাইক্লোন্না মরম ওইরগা মাঙ তাকহনবা লন থুমগী মমল থিদোক্লুরবদি, স্পেস্তা তৌরিবা চাদিংদগী য়াম্না হেল্লমগনি। ঐখোয়গী পি.এম. গতিশক্তি নেস্নেল মাস্তর প্লান অসিসু স্পেস তেক্নোলোজীদা য়ুম্ফম ওইরিবনি। মালেম্না ঙসিদি ভারতকী মসিগুম্বা গতিশক্তি প্লেতফোর্ম্বু নৈনরিবনি, প্লান্নিং অমসুং একজেক্যুত তৌবগী থবকশিং কতৌ করম্না পাংথোকপগে নৈনরিবনি, মেনেজমেন্ত তৌবদা মসিগী প্লেতফোর্ম কতৌ করম্না শিজিন্নগনি হংনরিবনি। মসিগী মতেংদগী প্রোজেক্ত প্লান্নিং, একজেক্যুসন অমসুং মোনিতরিং তৌবদা য়াম্না লাইহল্লে। মতমগী মতুং ইন্না চাউখৎলক্লিবা স্পেস এপ্লিকেসনশিংনা নহাশিংগী অনৌবা খুদোংচাবা কয়াসু লৈহল্লে। মরম অদুনা, ঐহাক্না ঙসি পাউতাক অমা পীজনিংই। অদোমগী মরক্তা লৈরিবা থবক্তগী পোত্থারবা মীওইশিংনা মসিদা চাউনা তেংবাংবা য়াগনি। মোদীনা অয়ুক ঙন্তা লাক্লগা থবক পীরম্লগা চৎখ্রে হায়বদি হায়বীগনুকো।

মরুপশিং,

ঐহাক্না ISROনা ‘স্পেস তেক্নোলোজী ইন গবর্নেন্স’কী মতাংদা কেন্দ্র অমসুং রাজ্য সরকারগী তোঙান-তোঙানবা বিভাগশিংগা খুৎশম্নদুনা নেস্নেল স্পেস হেক্কাথোন শিলহন্নিংই। হেক্কাথোন অসিদা য়ারিবমখৈ নহাশিং মশিং য়াম্না শরুক য়াহন্নীংই। মসিগী নেস্নেল হেক্কাথোন অসিনা ঐখোয়গী গবর্নেন্সপু ইফেক্তিব হেন্না ওইহনগনি অমসুং লৈবাক মীয়ামদা মতমগা চুনবা ৱারোইশিন পীবা ঙমগনি হায়বগী ঐহাক্না চেৎনা থাজৈ।

অদুগা মরুপশিং,

অদোমগী মথক্তা, ঐহাক্না নহাশিংদা তোঙানবা থবক অমসু পীবা পাম্মি। হোম পীদ্রবদি, অঙাংশিংদি থবক তৌনিংদবনি। ভারত অসিদি চহি লিশিং কয়াগী মমাংদগী লৈমাইগী মথক্তা লৈরিবা স্পেসপু য়েংবগী থৌওং হৌখ্রবনি হায়বা অদোম খঙলবনি। হীরম অসিদা থিজিন হুমজিন্দুনা লাক্লবা আর্য়ভত্ত, ব্রহ্মগুপ্ত, বরাহমিহির অমসুং ভাস্করচার্য়গুম্বা মুনি ঋষি কয়া ঐখোয়গী লৈবাক্তা লৈরম্লবনি। পৃথিবীগী মওং-মতৌগী ওইনা ঐখোয়গী ব্রহ্ম লৈরম্বগুম্না, আর্য়ভত্তনা মহাক্কী লাইরিক আর্য়ভত্তিয় অসিদা মালেম অসি মতুম তাই হায়না ইরম্লবনি। মহাক্না পৃথিবীনা কোয়না চৎপগী এক্সিস অমসুং সর্কম্ফরেন্স হোৎলম্লবনি। নুমিৎ অমসুং পৃথিবীগী মরক্তা থা লাকপা মতমদা গ্রহন থোকই হায়বা ৱাফম ঐখোয়গী স্কৃপচরশিংদা ইরম্লবনি। পৃথীবি খক্তা নত্তনা অতোপ্পা গ্রহশিংগী চাউবগী চাং অমসুং অতোপ্পা মরী লৈনবা এস্ত্রোনোমীগী ৱারোল কয়া ঐখোয়গী স্কৃপচরশিংদা ইদুনা লৈবা ঐখোয়না থেংনরবনি। গ্রহ অমসুং উপগ্রহগী খোঙজেলদগী হৌরগা অরুবা অঙ্ক কয়া হোৎপগী মতিক ঐখোয়দা লৈরম্লবনি। ঐখোয়না চহি চা কয়া খুমাং চাউশিনবা কেলেন্দর ইরম্লবনি। মরম অদুনা, মসিগা মরী লৈনবা থবক অমা ঐহাক্না হৌরক্লিবা চারোন শুরোনগী মফমদা পীজনিংই। স্কুল, কোলেজ অমসুং য়ুনিভর্সিতীগী মহৈরোইশিংদা পীবা পাম্মি। ঐহাক্না অনৌবা চারোন শুরোন্না ভারতকী স্কৃপচরশিংদা য়াওরিবা এস্ত্রোনোমীগী ফোর্মুলাশিংবু সাইন্তিফিক ওইনা চুম্মী তাক্নবা অমসুং নৌহৌননা অমুক নৈননবা মাঙদা থোক্লকপা পাম্মি। মসিদি ঐখোয়গী হেরিতেজ অমসুং সাইন্সকীদমক্তা য়াম্না মরু ওইবনি। মসিনা স্কুল, কোলেজ অমসুং য়ুনিভর্সিতীশিংগী মহৈরোইশিংগী ঙসিগী অনিশুবা থৌদাং অমসু ওইগনি। মীখা পোনবগী শাংলবা মতমদা ভারতকী সাইন্সকী লৌশিংগী লন-থুম অসি ফুমদুনা অমসুং লোত্তুনা লৈরুরে। ঙসিগী নিংতম্বগী অমৃত কাল অসিদা ঐখোয়না লন-থুম অসি থিদোক্কদবনি, রিসর্চ তৌগদবনি অমসুং মালেমদা মসিগী মতাংদা তাক্কদবনি। অতোপ্পা থৌদাং অমনা, ঐখোয়গী নহাশিংনা ঙসিগী মোদর্ন সাইন্স অসিবু অৱাংবা থাক্তা পুগদবনি, সমুদ্রগী ইরোন্নুংদগী নোংদোন অতিয়া ফাওবদা, নহা ওইরিবা চারোন শুরোনশিংনা তৌগদবা য়াম্না লৈ। দীপ আর্থতসু য়েংবীয়ু, দীপ সিসু এক্সপ্লোর তৌবীয়ু। নেক্স জেনেরেসন কম্প্যুতর শাবীয়ু, জেনেতিক ইঞ্জিনিয়রিংদসু ইশাগী মিং থম্বীয়ু। অদোমগী অনৌবা খুদোংচাবা কয়া ঙসিদি ভারত্তা হাংদোক্লবনি। অদুগা, ঙসিগী 21শুবা চহি-চাগী মতমসিদা, সাইন্স অমসুং তেক্নোলোজীগী লমদা লুচিং থৌদাং লৈবাক অদুনা পুম্নক্কী মকোক ওইগদৌরিবনি।

মরুপশিং,

ভারতকী স্পেস ইন্দস্ত্রীনা মথংগী চহি খরসিদা বিলিয়ন দোল্লর 8তগী বিলিয়ন দোল্লর 16 য়ৌগনি হায়না অখঙ-অহৈশিংনা পানরিবনি। ৱাফম অসিবু লুনা লৌদুনা, ঐখোয়গী সরকারসু স্পেস সেক্তর রিফোর্মগীদমক্তা লেপ্পা লৈতনা হোৎনরিবনি। মমাংগী চহি মরিদা স্পেস সেক্তরদা থবক তৌবা স্তার্তঅপ মশিংনা শুপ্না 4দগী চাউরাকপা 150 য়ৌখি তাবদা অদোম্না ঙক্কনি। স্পেস্তা লৈবা খুদোংচাবা কয়ানা ভারতপু ঙাইরিবনি। মাইগোবনা সেপ্তেম্বর 1দগী হৌনা শিল্লিবা চন্দ্রয়ান মিসনগী অচৌবা ক্বিজ কম্পিতিসন অসিদা লৈবাক শিনবা থুংবগী মহৈরোইশিংনা শরুক য়াবীয়ু হায়না ঐহাক্না হায়জরি।

ঐহাক্কী ইমুংগী মীওইশিং,

লৈবাক্কী হৌরক্লিবা তুংগী চারোন শুরোনশিংবু অদোম্না লমজিং-লমতাকপীবা হায়বসি য়াম্না মরু ওই। অদোমদি মরু ওইবা মিসন কয়াদা থবক তৌরিবনি। মদুবু তুংলমচত্তা পুদুনা চৎকদৌরিবদি ঐখোয়গী নহাশিংনি। অদোম খুদিংমক মখোয়গী রোল মোদেলনি। ঐখোয়না পাংথোক্কে খল্লবদি পাংথোকপা ঙম্মি হায়বসি অদোমগী রিসর্চ অমদি চহি কয়াদগী কন্না হোৎনরক্লিবা অসিনা তাক্লে। লৈবাক মীয়াম্না অদোমগী মফমদা থাজবা থম্লি। থাজহনবা হায়বসি য়াম্না চাউবা থবক অমসু ওইরিবনি। অদোম্না অদোমগী হোৎনজমন্দগী থাজবা অসি তানবা ঙম্লিবনি। লৈবাক মীয়াম্না অদোম্বু থৌজানবীরি। থৌজালশিং অসিগী শক্তিনা, অদোম্না লৈবাকপু সাইন্স অমসুং তেক্নোলোজীদা মালেমগী লুচিংবা ওইহনগদৌরিবনি। ঐহাক্না অদোমগী মরক্তা লৈদুনা য়াম্না থাজবগা লোয়ননা ৱাফম অমা হায়বা পাম্মি। ঐখোয়গী ইন্নোভেসনগী মসিগুম্বা ইথিল অসিনা ঐখোয়না ইং 2047দা চাউখৎ ভারত অমা ওইগনি হায়বগী মঙলান মঙফাওনহনগদৌরিবনি। থাজবশিং অসিগা লোয়ননা, ঐহাক্না অদোম খুদিংগা উন্নবগী তাঞ্জাসু ফংজরে। লৈবাক মীয়াম অসি হৌজিক য়াম্না চাউথোকচরিবনি। মঙলানশিং য়াম্না য়াঙনা মঙফাওনরক্লি, অদুগা অদোমগী থবকশিংনা মঙলানশিং অসিবু মঙফাওহল্লিবা অসিদা অচৌবা ইথিল পীরি। অদোম্বু থাগৎলিবমখৈ অদুম ৱাৎকনি, ইকায় খুম্নরিবমখৈ অদুম ৱাৎকনি। ঐহাক, লৈবাক মীয়াম করোর-করোর কয়াগী মাইকৈদগী, মালেম পুম্বগী সাইন্তিফিক কম্ম্যুনিতীগী মাইকৈদগী, পুম্নমকপু অমুক্কা হন্না থাগৎচরি।

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

থাগৎচরি।

 

Explore More
৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল

Popular Speeches

৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল
India could become 3rd largest economy by 2027-28, extreme poverty in rural areas largely conquered: Arvind Panagariya

Media Coverage

India could become 3rd largest economy by 2027-28, extreme poverty in rural areas largely conquered: Arvind Panagariya
NM on the go

Nm on the go

Always be the first to hear from the PM. Get the App Now!
...
সোসিয়েল মিদিয়াগী মফম 17 মে, 2024
May 17, 2024

Bharat undergoes Growth and Stability under the leadership of PM Modi