থৌরম অসিদা শরুক য়ারিবা কেবিনেত্তা ঐগা লোইননা থৌ পুমিন্নরিবা, শ্রীমান রাজনাথ সিং জী, দা. জিতেন্দ্র সিং জী, সাইন্স অমসুং তেক্নোলোজী কম্যুনিতীগী ইকাইখুম্নরবা মীওইশিং, অমসুং ঐগী নহা ওইরিবা মরুপশিং!
ঙসি মে ১১গী নুমিৎ অসি ভারতকী পুৱারিগী খ্বাইদগী চাউথোকচনিংঙাই ওইবা নুমিৎশিংগী মনুংদা অমনি। ঙসি ভারতকী সাইন্তিস্তশিংনা পোখ্রানদা মাইপাকখিবা অদুনা ভারত ইমাগী মচা পুম্বা চাউথোকহল্লে। ঐহাক্না নুমিৎ অদু কৈদৌনুংদা কাওবা ঙম্লরোই, মতম অদুদা অতল জীনা ভারতপু মাইপাক্না ন্যুক্লিয়র তেস্ত তৌবগী মতাংদা লাউথোকখি। পোখ্রানগী ন্যুক্লিয়র তেস্তকী খুত্থাংদা ভারতনা সাইন্সকী লমদা খুমাং চাউশিনবা অদুবু মশক তাকপদা নত্তনা ভারতপু মালেমগী থাক্তা অনৌবা থাক অমদা পুখৎখি। অতল জীগী ৱাঙাংদা থম্লগদি – “ঐখোয়গী মিসনদা ঐখোয়না কৈদৌনুংদা লেপ্পা লৈখিদে। শিংনবা খুদিংদা কেদৌনুংদা কোক নোল্লক্তে”। ঐহাক্না লৈবাক অসিগী মীপুম খুদিংমকপু ঙসিগী নুমিৎ অসিগী, নেস্নেল তেক্নোলোজী দে অসিগী হন্না-হন্না নুংঙাইবা ফোংদোক্লি
মরুপশিং,
ঙসিগী তাঞ্জা অসিদা ফ্যুচরিস্তিক ইনিসিয়েতিব কয়া অমা হৌদোকখ্রে অমসুং উরেপ-উয়ুংসু তমখ্রে। মুম্বাইদা নেস্নেল হেদ্রোন বীম থেরাপী ফেসিলিতী অমসুং রেদিয়োলোজিকেল রিসর্চ সেন্তর, ৱিশাখাপত্নমগী বি.এ.আর.সি. কেমপসতা রেয়র অর্থ পার্মনেন্ত মেগ্নেত প্লান্ত, মুম্বাইগী ফিজন মোলী-৯৯ প্রোদক্সন ফেসিলিতী, অদুগা সহর কয়া অমদা কেন্সর হোসপিতালশিং, হায়রিবা ইনস্তিত্যুশনশিং অসি ন্যুক্লিয়র তেক্নোলোজীগী মতেংনা মীওইবা জাতিগী অমসুং ভারতকী চাউখৎ-খোংথাংদা খোংজেল য়াংখৎহল্লগনি। ঙসি তাতা ইনস্তিত্যুত ওফ ফন্দামেন্তেল রিসর্চ অমসুং ‘লেজর ইন্তরফেরোমিতর গ্রেভিতেস্নেল- ৱেব ওবজার্ভেতরী- ইন্দিয়া (এল.আই. জি.ও.- ইন্দিয়া)’গী উরেপ-উয়ুংসু তমখ্রে। (এল.আই. জি.ও.) ২১শুবা চহি চাগী খ্বাইদগী ফবা সাইন্স অমসুং তেক্নোলোজী ইনিসিয়েতিশিংগী মনুংদা অমনি। মালেম অসিদা অখন্নবা লৈবাক খরা খক্তমক অসিগুম্বা ওবজার্ভেতরী অসি লৈ। ভারতকী মহৈরোইশিং অমসুং সাইন্তিস্তশিংগীদমক্তা মসিগী ওবজার্ভেতরী অসিনা মতম অসিগী ওইবা অনৌবা মখলগী রিসর্চকীদমক্তা খুদোংচাবা অমা পুরক্লগনি। ঐহাক্না মসিগী প্রোজেক্তশিং অসিগীদমক্তশু লৈবাক অসিগী সাইন্তিফিক কম্যুনিতীবু, লৈবাক অসিগী মীপুম খুদিংমকপু নুংঙাইবা ফোংদোক্লি।
মরুপশিং,
হৌজিক ঐখোয় আজাদি কা অমৃতকালগী অহৌবা থাশিংগী মনুংদা লৈরি। ঐখোয়গী ইমাংদা ২০৪৭গী ময়েক শেংলবা পান্দম অমা লৈরি। ঐখোয়না লৈবাক অসিবু চাউখৎহনগদবনি, ঐখোয়না লৈবাক অসিবু মীপাল তাংদনা মরোমদোম লেপচবা ঙমহনগদবনি। ভারতকী ইকোনোমিক গ্রোথ, সস্তেনেবল দেবেলপমেন্তকী পান্দমশিংবু ওইরো নত্রগা ইন্নোভেশনগীদমক্তা ইনক্লুসিব ওইবা সীস্তেম অমা হৌদোকপবু ওইরো, খোংথাং খুদিংদা তেক্নোলোজী অসি ঐখোয়গীদমক্তা য়াম্না মরু ওই। মরম অদুনা ঙসি ভারতনা অনৌবা ৱাখল্লোন অমগা লোইননা ৩৬০° হোলিস্তিক এপ্রোচকা লোইননা মসিগী লমসিদা ঐখোয়না মাংলোমদা খোং থাংজিল্লি। ভারতনা তেক্নোলোজীবু নমথনবগী পাম্বৈ অমা ওইনা লৌদে, মসিগী মতেংনা লৈবাক অসিগী চাউখৎ-থৌরাংদা খোজেল য়াংখৎহন্নবগী তুল অমা ওইনা লৌই। অমসুং ঐহাক্না হন্দক্কী চহি অসি ‘স্কুল তু স্তার্তঅপস- ইগ্নাইতিং য়ং মাইন্দস তু ইন্নোভেত’ হায়বা থীম অসি থম্বা অসিদা য়াম্না নুংঙাইবা ফাওই। নিংখা তম্বগী অমৃতকাল অসিদা ভারতকী তুংগী লম্বি অসি মতম অসিগী ঐখোয়গী নহারোলশিং, মতম অসিগী ঐখোয়গী মহৈরোইশিং অসিনা লেপকদৌরিবনি। মতম অসিগী নহারোলশিংদা অনৌবা মঙলান অমসুং অনৌবা ফিরেপ কয়া অমা লৈ। মখোয়গী শক্তি, মখোয়গী ইথিল, মখোয়গী থৱায় য়াওবা অদুনা ভারতকী খ্বাইদগী চাউবা পাঙ্গলনি।
মরুপশিং,
ঐখোয়গী লৈবাক অসিগী মমিং লৈরবা সাইন্তিস্ত অমসুং হান্নগী রাস্ত্রপতি দোক্তর কলামনা তোইনা হায়রম্মি- নোলেজ ৱিত এক্সন, কনভর্তস এদভর্সিতী ইনতু প্রোসপরিতী. ঙসি ভারতনা নোলেজ সোসাইতী অমা ওইনা চাউখৎলকপগী মতুং ইন্না অদুগা চপ মান্ননা থবক-থৌরমসু পাইখৎলি। ভারতকী য়ং মাইন্দশিংবু ইন্নোভেশনগী মাইকৈদা পুক্নিং থৌগৎনবগীদমক্তা হৌখিবা চহি ৯ অসিদা লৈবাক অসিদা য়াম্না লিংবা য়ুম্ফম অমা শেমখি। চহি খরগী মমাংদা হৌদোকখিবা অতল তিংকরিং লেবস- এ.তি.এল., ঙসিদি লৈবাক অসিগী ইন্নোভেশন নর্সরী ওইরক্লি। ঙসি লৈবাক অসিগী রাজ্য ৩৫দা, জিলা ৭০০তা লিশিং ১০দগীসশু হেনবা অতল তিংকরিং লেবস শেমখ্রে। অমসুং মসিগী সাইন্স, তেক্নোলোজী, ইন্নোভেশন অমসুং ইনক্যুবেশনগী মিসন অসি অচৌবা সহরশিংদা খক্তমক লোইবা নত্তে। অতল তিংকরিং লেবস চাউরাক্না চাদা ৬০দি সরকার অমসুং খুঙ্গংগী স্কুলশিংদা হাংদোকই। নখোয়না খন্দুনা য়েংঙু, মশিং কয়াদা য়াম্লবা অঙাংশিংগীদমক্তা লাইরিক তম্বগী মওং অদু হোংলক্লি, মখোয়না ইন্নোভেশনগী মাইকৈদা পুক্নিং থৌগৎলি। নখোয়না খঙবদা নুংঙাইবা ফাওগনি মদুদি ঙসি অতল তিংকরিং লেবসতা মহৈরোই লাখ ৭৫ হেনবনা ইন্নোভেশন প্রোজেক্ত লাখ ১২ হেনবদা থৱায়-হকচাং য়াওনা থবক তৌরি। হায়বদি লাক্কদবা মতমশিংদা জুনিয়র সাইন্তিস্ত লাখ কয়া অমা স্কুলদগী থোরক্তুনা লৈবাক অসিগী কাচিন-কোয়াদা শিনবা থুংনা য়ৌরগনি। মখোয়বু হেন্দ-হোল্দিং তৌবা, মওং অমহেক্তদা মখোয়গী মতেং পাংবা , মখোয়গী আইদিয়াশিং অদুবু ইমপ্লিমেন্ত তৌবদা মখোয়গী মতেং পাংবা, হায়রিবা থবকশিং অসি ঐখোয় পুম্নমক্কী য়াম্না চাউরবা থৌদাংনি। ঙসি মশিং য়াম্না য়াম্লবা স্তার্তঅপশিংগী ইনক্যুবেশন অতল ইন্নোভেশন সেন্তরশিংদগী ওইরকখি। অতল তিংকরিং লেবসগুম্না অতল ইন্নোভেশন সেন্তরশিং- এ.আই.সি.শিংশু ন্যু ইন্দিয়াগী লেবোরেতী অমা ওইনা থোরক্লি। নখোয়না খন্দুনা য়েংঙু, ভারতকী মসিগী তিংকর-প্রেনরশিং, এন্ত্রপ্রেনরশিংবু তিংকর-প্রেনরশিং ওইনা উই। হয়েংদি মখোয়শিং অসি মকোক থোংবা এন্ত্রপ্রেনরশিং ওইরক্লগনি।
মরুপশিং,
মহার্সি পতাঞ্জলিগী সুত্র অমা লৈ- পর্মানু পরম মহত্ব অন্ত: অস্য ৱশিকার:।। হায়বদি করিগুম্বা পান্দম অমগীদমক্তা মপুং ফানা পুক্নিং-হকচাং য়াওনা লুপ্পা তারবদি এতমশিংদগী হৌরগা জগত পুম্বা পোৎ খুদিংমক নহাক্না খুদুম চনবা ঙমগনি। ২০১৪গী মতুংদা ভারত্তা সাইন্স অমসুং তেক্নোলোজীদা অহেনবা মিৎয়েং চংলক্লিবা অসি অহোংবা কয়া অমনা মরম ওইরগা ওইরক্লিবনি। ঐখোয়না হৌদোকখিবা স্তার্তঅপ ইন্দিয়া কেমপেন, ঐখোয়না হৌদোকখিবা দিজিতেল ইন্দিয়া কেমপেন, শেমখিবা নেস্নেল এজুকেশন পোলিসী, মখোয়নসু তেক্নোলোজীগী লমদা ভারতকী মাইপাকপাবু অনৌবা অৱাংবা থাক অমদা পুখৎখি। হান্না লাইরিক খক্তদা লৈরম্বা সাইন্সশিং অদু হৌজিক্তি এক্সপরিমেন্ত তৌদুনা খুমাং চাউশিন্দুনা পেতেন্তশিংদা ওইনা ওন্থোরক্লি। ভারত্তা চহি ১০গী মমাংদা, চহি অমদা লিশিং ৪গী ময়া নক্না পেতেন্ত গ্রান্ত তৌরম্মি। ঙসিদি মসিগী মশিং অসি চহিগী ওইনা লিশিং ৩০দগীশু হেন্না ওইখ্রে। ভারত্তা চহি ১০গী মমাংদা চহি অমদা দিজাইন লিশিং ১০ রেজিস্তর তৌরম্মি। ঙসিদি ভারত্তা চহি খুদিংগী দিজাইন লিশিং ১৫ হেন্না রেজিস্তর তৌরক্লি। ভারত্তা চহি ১০গী মমাংদা চহি অমগী ওইনা ত্রেদমার্ক লিশিং ৭০দগীশু তানা রেজিস্তর তৌরম্মি। ঙসিদি ভারত্তা চহি খুদিংগী ত্রেদমার্ক লাখ অনি মখাইদগীশু হেন্না রেজিস্তর তৌরি।
মরুপশিং,
ঙসি ভারতনা মাইকৈ খুদিংমক্তা খুমাং চাউখৎলক্লি, হায়রিবা অসি তেক লীদর কন্ত্রী অমগীদমক্তা য়াম্না তঙাইফদে। নখোয়গী মরক্তগী মরুপ কয়া অমনা খঙই মদুদি ২০১৪দা ঐখোয়গী লৈবাক অসিদা ইনক্যুবেশন সেন্তর চাউরাক্না ১৫০ মুক্তং লৈরম্মি। ঙসিদি ভারত্তআ ইনক্যুবেশন সেন্তরশীংগী মশিং অসি ৬৫০গী মথক হেনখ্রে। ঙসি ভারত অসি গ্লোবল ইন্নোভেশন ইন্দেক্সতা ৮১শুবদা লৈরম্মি অদুবু হৌজিক্তি হায়গৎলক্তুনা ৪০শুবদা লৈরে। ঙসি লৈবাক অসিগী নহারোলশিং, ঐখোয়গী মহৈরোইশিংনা মশাগী দিজিতেল ভেঞ্চরশিং লিংখৎলক্লি, স্তার্তঅপশিং হৌদোরক্লি। ২০১৪দা ঐখোয়গী লমদম অসিদা স্তার্তঅপশিংগী মশিং অসি চাউরাক্না চামা রোমতমক লৈরম্মি। ঙসি ঐখোয়গী লৈবাক অসিদা রিকোগ্নাইজ স্তার্তঅপশিংগী মশিং অসি চাউরাক্না লাখ ১ য়ৌখ্রে। ঙসিদি ভারত অসি মালেমগী ওইনা অহুমশুবা খ্বাইদগী চাউবা স্তার্তঅপ ইকোসীস্তেমনি। অমসুং মসিগী গ্রোথ অসি মালেমগী ওইনা শেন্মিৎলোনগী ফিভম য়াম্না শোকপা মতম অদুদা লাকখি। মসিনা ভারতকী তৌবা ঙম্বা মতিক অদু তাক্লি, ভারতকী তেলেন্ত অদুবু তাকই। অমসুং মরম অদুনা ঐহাক্না অমুক্কসু হন্না হায়গনি মদুদি, পোলিসী মেকরশিংগীদমক্তা, ঐখোয়গী সা্তিফিক কম্যুনিতীগীদমক্তা, লৈবাক শিনবা থুংনা শন্দোক্তুনা লৈরিবা ঐখোয়গী রিসর্চ লেবশিংগীদমক্তা, ঐখোয়গী প্রাইভেত সেক্তরগীদমক্তা, মতম অসি য়াম্না মরু ওই। ‘স্কুল তু স্তার্তঅপস’কী খোংচৎ অসি ঐখোয়গী মহৈরোইশিংনা পাংথোক্কনি, অদুবু নখোয়না লেপ্তনা গাইদ তৌবা তাই, পুক্নিং থৌগৎপা তাই। অমসুং মসিদা নখোয় পুম্নমক্তা ঐহাক্কী সপোর্ত পীগনি।
মরুপশিং,
ঐখোয়না তেক্নোলোজীগা খুনাই অসিগা লৈনরিবা মরি অসিবু খঙনা খুমাং চাউশিনবা মতমদা তেক্নোলোজীনা এমপাৱরমেন্তকী খ্বাইদগী চাউবা পাম্বৈ অমা ওইরগনি। মসিনা সোসিয়েল জস্তিস পুরক্নবগী অমসুং খেৎনবা লৈরবশিং অসি মুথৎনবগী পাম্বৈ অমা ওইরগনি। মতম অমদা তেক্নোলোজী অসি মীচম প্রজাদা য়ৌরমদে। নখোয়শু নিংশিংলমগনি, করিগুম্বা মতমদা ফুরিৎখাওদা ক্রেদিৎ নত্রগা দেবিৎ কার্দ পুদুনা চৎপা হায়বসি স্তেতস সীম্বোল ওইরম্মি। অদুবু ভারতকী য়ু.পি.আই. ঙসিদি ঐখোয়গী সিম্প্লিসিতীনা মরম ওইরগা অনৌবা নোর্মল ওইরে। ঙসিদি রোদসাইত ভেন্দরশিংদগী হৌরগা রিকশো থৌবা মী ফাওবা, মীপুম খুদিংমক্না দিজিতেল পেমেন্ত শিজিনরি। ঙসি ভারতনা মালেম অসিগী ওইনা ইন্তর্নেত দেতা খ্বাইদগী য়াম্না শিজিন্নবা লৈবাকশিংগী মনুংদা অমা ওইরে। সহরগী মফমশিংগা চাংদম্নবদা খুঙ্গংগী মফমশিংদনা ইন্তর্নেত য়ুজরগী মশিং অসি য়াম্বা হেল্লি। মসিদগী মীয়ামদা ইনফোর্মেশনশিং, ফেসিলিতীশিং অমসুং খুদোংচাবা কয়া অমগী অনৌবা তাইবং অমা হাংলরে। জে.এ.এম. ত্রিনিতীবু ওইরো, জি.ই.এম. পোর্তলবু ওইরো, কোৱিন পোর্তলবু ওইরো নত্রগা লৌমীশিংগীদমক্তা দিজিতেল এগ্রিকলচর মার্কেত- ই-নাম ঐখোয়গী সরকারনা এজেন্ত ওফ ইনক্লুজনগী শক্তমদা তেক্নোলোজীবু শিজিন্নখি।
মরুপশিং,
তেক্নোলোজীবু নিয়ম চুম্না, মতম চানা শিজিন্নবনা খুনাই অসিদা অনৌবা শক্তি অমা পী। ঙসি ভারত্তা পুন্সি খোংচৎ অসিগী তাঙ্কক খুদিংমক্কী তেক্নোলোজিকেল সোল্যুশন অমা নত্রগা অমা শেম্লি। পোকপা মতমদা ওনলাইন বর্থ সার্তিফিকেতকী খুদোংচাবা পীরি। অঙাংনা স্কুল কাবা হৌরকপা মতমদা মখোয়দা ই-পাথসালা অমসুং দিক্সাগুম্বা ফ্রী ই-লর্নিং প্লেতফোর্মশিং লৈ। অমসুং চাউখৎলকপা মতমদা নেস্নেল স্কোলারশিপ পোর্তলদা স্কোলার্শিপকীদমক্তা এপ্লাই তৌবা য়াই। মখোয়না থবক তৌবা হৌরকপা মতমদা মখোয়দা য়ুনিভর্সেল এক্সেস নম্বরগী ফেসিলিতী লৈ, মরমদি মখোয়না থবক হোংবা মতমদা অৱাবা অমত্তা মায়োক্নদনবা। অনা-অয়েক থোকপা মতমদাফাওবা হৌজিক্তি খুদক্তা ই-সঞ্জীৱনিগী মতেংনা দোক্তরগা কন্সল্ত তৌবগী ফেসিলিতী লৈরে। নখোয়না খন্দুনা য়েংউ, হান্নদি অহলশিংদা পেন্সনগুম্বা থবকশিংগীদমক্তা হিংলি হায়বগী খুদম-চাংদম পীবগী মথৌ তারম্মি। হৌজিক্তি মসিগী অৱাবশিং অসি তেক্নোলোজীগি মতেংনা কোহল্লে। দে তু দে লাইফতা খোংথাং খুদিংদা তেক্নোলোজী সোল্যুশনশিংনা লৈবাক অসিগী নগরিকশিংবু মতেং পাংলি। করিগুম্বা মখোয়না অথুবদা পাসপোর্ত শাহন্নিংলবদি, এম.পাসপোর্ত সেবা লৈরে। করিগুম্বা মখোয়না এয়র্পোর্ত্তা হেসল-ফ্রী এক্সপরিয়েন্স পাম্লবদি, দিজিয়াত্রা এপ লৈরে। করিগুম্বা মখোয়না মরু ওইবা দোক্যুমেন্তশিং চেকশিন্না তম্বা পাম্লবদি, দিজিলোকর লৈরে। পাইখৎলিবা থবকশিং অসিনা সোসিয়েল জস্তিস ফংহনবদা অমসুং ইজ ওফ লিবিং হেনগৎহনবদা মতেং পাংলি।
মরুপশিং,
ঙসিদি নুমিৎ তেক্নোলোজীগী তাইবংদা য়াম্না য়াংনা অহোংবা লাক্লি। ভারতকী নহাশিং খক্তনা মসিগী স্পীদ অসিগা লেং মান্ননা চৎপদা, মসিগী স্পীদ অসিবু ক্রোস তৌবদা লৈবাক অসিবু লমজিংলগনি। ঙসিদি এ.আই. তুলশিংনা অনৌবা গেম চেঞ্জর ওইদুনা থোরক্লি। হেল্থ সেক্তরদা ঙসিদি মপাল নাইদ্রবা ওইথোকপা য়াবা কয়া উবা ফংলে। দ্রোন তেক্নোলোজীদসু নুমিৎ খুদিংগী অনৌবা ইন্নোভেশনশিং তৌরি। অসিগুম্না থেরোপেতিক্স সেক্তরসু য়াম্না য়াংনা খুমাং চাউশিল্লক্লি। ঐখোয়না অসিগুম্বা রিভোল্যুসনরী তেক্নোলোজীদা মাংজিল থাদুনা চৎপগী তঙাইফদবা লৈ। ঙসি ভারতনা মখোয়গী দিফেন্স সেক্তরবু মীপাল তাংদনা মরোমদোম লেপচবা ঙম্নবা হোৎনরি। মসিদসু ঐখোয়গী নৌরিবা স্তার্তঅপশিংবু তাঞ্জা কয়া অমা ফংলি। দিফেন্সতা ইন্নোভেশন তৌনবগীদমক্তা ঐখোয়না ইন্নোভেশন ফোর দিফেন্স এক্সেলেন্স হায়বদি, আই.দেক্সশু হৌদোকখ্রে। দিফেন্স মন্ত্রালয়না আই.দেক্সকী লুপা করোর অহুম মখাই হেনবা ইন্নোভেশন ১৪ প্রোক্যোর তৌখি হায়বসি ঐহাক্না য়াম্না হরাওবা ফাওই।
মরুপশিং,
আই.-ক্রিয়েতপু ওইরো, নত্রগা দি.আর.দি.ও. য়ং সাইন্তিস্ত লেবসগুম্বা ইনিসিয়েতিব অসিনা ঙসিদি অসিগুম্বা থবকশিং অসিবু অনৌবা মাইকৈ অমা পীরি। স্পেস সেক্তরদশু ন্যু রিফোর্মশিংগী খুত্থাংদা ভারতনা গ্লোবল গেম চেঞ্জরগী থৌদাংদা মাংজিল থারক্লি। হৌজিক ঐহাক্না এস.এস.এল.ভি. অমসুং পি.এস.এল.ভি. ওর্বিতল প্লেতফোর্মগুম্বা তেক্নোলোজী উবা ফংলি। ঐখোয়না স্পেস সেক্তরদা ঐখোয়গী স্তার্তঅপশিংগীদমক্তা, নহাশিংগীদমক্তা অনৌবা খুদোংচাবা অমা ফংহনবা তাই। ঐখোয়না কোদিংদগী হৌরগা গেমিং অমসুং প্রোগ্রামিং ফাওবা, হিরম খুদিংমক্তা মাংজিল থাবা মথৌ তাই। হৌজিক ভারতনা সেমি কন্দক্তরগুম্বা অনৌবা এভেন্যুশিংদশু ঐখোয়না শরুক য়াবা হেনগৎপা তাই। পোলিসী লেভেলগী থাক্তা ঐখোয়না পি.এল.আই. স্কীমগুম্বা অনৌবা থৌরাংশিং লৌখৎলি। ইন্দস্ত্রী অমসুং ইনস্তিত্যুশনশিংনা মসিগী ফীল্দ অসিদা হৈ-শিংলবা নহাশিংবু সপোর্ত তৌবা হায়বসি মখোয়গী মথৌদাংনি।
মরুপশিং,
ঙসিদি ইন্নোভেশনদগী হৌরগা সেক্যুরিতী ফাওবগীদমক্তা হেকাথোনশিংগী য়াম্না চাউরবা থৌদাং অমা লৈ। সরকারনা মসিবু লেপ্তনা প্রোমোত তৌরি। ঐখোয়না হেকাথোন কলচরবু খুমাং চাউশিনহনবা মথৌ তাই, স্তার্তশপশিংবু অনৌবা শিংনবশিংগিদমক্তা শেম-শাবা মথৌ তাই। মসিগী হৈথোই-শিংথৌইরবশিংগী হেন্দ-হোল্দিংবু ওইরো, মখোয়শিং অসিবু খুমাং চাউশিহন্নবগীদমক্তা অৱাবা মায়োক্নদনবা, ঐখোয়না মসিগীদমক্তা ফ্রেমৱার্ক অমা শেম্বগী মথৌ তাই। মরু ওইনা অতল তিংকরিং লেবশিংদগী থোরকপা নহাশিং অদুবু মসিদা শরুক য়াহন্নবগীদমক্তা ইনস্তিত্যুস্নেলাইজ সীস্তেম অমা থমগদবনি। ঐখোয়না অসিগুম্না তোঙান-তোঙানবা মফমশিংদা লৈবাক অসিগী লেব ১০০ খনগত্তুনা নহাশিং খক্তগী ওইবা অমা ওইনা শেমগৎপা য়ারোইদ্রা? ক্লীন ইনর্জী অমসুং নেচরেল ফার্মিংগুম্বা লৈবাক অসিনা অহেনবা মিৎয়েং থম্লিবা হিরম অসিদা ঐখোয়না রিসর্চ অমসুং তেক্নোলোজীবু প্রোমোত তৌবা তাই। মসিগীদমক্তসু নহাশিংবু মিসন মোদতা মসিদা শরুক য়াহনবা হায়বসি য়াম্না মরু ওই। ঐহাক্না থাজৈ মদুদি নেস্নেল তেক্নোলোজী ৱীকনা মসিগি ওইথোকপা য়াবশিং অসিবু মপুং ফাহনবদা য়াম্না মরু ওইবা থৌদাং অমা লৌরগনি। মসিগী থাজবা অসিগা লোইননা নখোয় ময়াম্বু অমুক্কশু হন্না মসিগী থৌরম অসিগীদমক্তা হন্না-হন্না থাগৎপা ফোংদোক্লি।
হন্না-হন্না থাগৎচরি।
