য়োর হাইনেস,
য়োর এক্সলেন্সী,
অমসুং ইবেম্মা অমদি ইবুংঙোশিং,
খুরুমজরি,
ৱর্ল্দ গবর্নমেন্ত সম্মিত্তা মপুং ওইবা ৱারোল থম্বা হায়বসি য়াম্না ইকায়খুম্ননীংঙাই ওইবা থৌওং অমনি। মসিগুম্বা লাইবক ফরবা খুদোংচাবা অসি ঐহাক্না অনিরক ফংজরে। হিস হাইনেস, শৈখ মোহম্মদ বিন রশিদজীবু ঐহাকপু লাকপীনবা পাউজেনবীরকপা অমসুং থম্মোই শেংনা ঐহাকপু ওকপীবগীদমক্তা থাগৎচরি। ঐহাক্কী ইনাও, হিস হাইনেস শৈখ মোহম্মদ বিন জায়দপুসু ঐহাক্না থম্মোই শেংনা ইকায়খুম্নজরি। হন্দক্কী মতম খরসিদা ঐহাক্না মহাক্কা উন্নবগী খুদোংচাবা খরা ফংজৈ। মহাক অসিদি মিৎয়েং লৈবা লুচিংবা অমা ওইবখক নত্তনা ৱারেপ চেৎপা অমসুং খোঙফম চেৎপা লুচিংবা অমসু ওই।
মরুপশিং,
ৱর্ল্দ গবর্নমেন্ত সম্মিত অসি মালেম পুম্বগী ৱাখল ৱাংবা লুচিংবশিংবু ফম্বাক অমদা পুরকপগী চাউরবা পাম্বৈ অমা ওইরে। হিস হাইনেস শৈখ মোহম্মদ বিন রশিদকী মিৎয়েং শানবা লুচিংবা মহাক্কী মসিদা চাউরবা থৌদাং য়াওরি। দুবাইনা ঙসি মালেমগী শেন্মিৎলোন, কম্মর্স অমসুং তেক্নোলোজীগী ময়োল অমা ওইরক্লিবা মতৌ অসিদি য়াম্না চাউবা ৱাফম অমনি। কোবিদ মনুংদা এক্সপো 2020 পাংথোকপা নত্ত্রগা হন্দক্তা Cop-28 পাংথোকখিবা ওইরো, মসিদি ‘দুবাই স্তোরী’গী শক্নাইরবা খুদম অমনি। ঐহাক্না অদোম্বু সম্মিৎ অসিগীদমক্তা থাগৎপা ফোংদোক্লি, মসিগী মায় পাকপগীদমক্তা ঐহাক্না য়াইফ পাউজেল পীজরি।
মরুপশিং,
ঐখোয়না ঙসি 21শুবা চহি চাদা হিংলি। নাকল অমদা মালেম অসিনা মোদর্ন ওইবগী মায়কৈদা খোঙদারি, নাকল অমদনা, হৌখিবা চহি চাদগী মখা তারকপা শিংনবা কয়াসু পাক শন্না শন্দোক্লি। ফুদ সেক্যুরিতী ওইরো, হেল্থ সেক্যুরিতী ওইরো, ৱাতর সেক্যুরিতী ওইরো, ইনর্জী সেক্যুরিতী ওইরো, এজুকেসন ওইরো, খুন্নাইবু ইনক্লুসিব ওইহনবা ওইরো, সরকার খুদিংনা মশাগী মীয়ামগী মাইকৈদা থৌদাং কয়া লৌনরি। তেক্নোলোজীনা নেগেতিব ওইরো, নত্ত্রগা পোজিতিব ওইরো, মরু ওইবা দিসরপ্তর অমা ওইরি। তেরোরিজম্না মীওইবা খুন্নাইগী মফমদা নুমিৎ খুদিংগী অনৌবা শক্তম লৌদুনা অনৌবা শিংনবা কয়া পুদুনা লাক্লি। ক্লাইমেতকা মরী লৈনবা শিংনবা কয়ানা মতমগা লোয়ননা চাউবা হেনগৎলক্লি। নাকল অমদনা লৈবাক্কী খনবা মতমদা, নাকল অমদনা মালেমগী পথাপশিং মরায় চায়থরকপগী শক্তম উরি। পুম্নমক অসিগী মরকসিদা, সরকার খুদিংগী মাঙদা মশাগী শক্তাক কঞ্জবগী চাউরবা শিংনবা কয়া লৈরি। মসিগুম্বা শিংনবা, ৱাহং, ফিভম কয়াগী মরকসিদা, ৱর্ল্দ গবর্নমেন্ত সম্মিৎকী মরু ওইবা অসি হেনগৎলক্লি।
মরুপশিং,
ঐখোয়না করম্বা ৱাখল্লোনগা লোয়ননা তুংলমচত্তা চঙশিনগদগে হায়বগী ৱাহং অমা হৌজিক সরকার খুদিংগী মাঙদা লৈরি। ঐহাক্না খনবদদি, মালেম পুম্বনা ইনক্লুসিব ওইবা, পুম্নমকপু শরুক য়াহন্দুনা চৎমিন্নবা, স্মার্ত ওইবা, অওনবা পুরক্নবা তেক্নোলোজী চাউনা শিজিন্নবা, ক্লীন অমসুং গ্রীন ওইবা, ইনভাইরনমেন্তকী মতাংদা লুনা লৌবা, শেঞ্জা থুমজা য়াওদবা, নুং-পান ফাওনা উবা সরকার অমগী মথৌ তাই। লোয়ননা, ইজ ওফ লিবিং, ইজ ওফ জস্তিস, ইজ ওফ মোবিলিতী, ইজ ওফ ইন্নোভেসন অমসুং ইজ ওফ দুইং বিজনেস্তা অহেনবা মিৎয়েং চঙবা সরকার অমগী ঐখয়না ঙসি মথৌ তাই।
মরুপশিং,
ঐহাক্না সরকারগী মকোক অমা ওইনা থবক তৌরক্লিবা অসি চহি 23 মপুং ফারক্লে। ঐহাক্না চহি 13 অসি ভারতকী অচৌবা রাজ্য, গুজরাত সরকারদা লৈদুনা মীয়ামগী সেবা তৌদুনা লাকখি অদুগা কেন্দ্র সরকারদা লৈদুনা লৈবাক মীয়ামগী সেবা তৌরকপনা চহি 10 ফারক্কদৌরে। সরকার লৈতে হায়বগী ৱাখল্লোন লৈহনগদৌবা নত্তে, অদুগা সরকারনা অচৌবা পোৎলুম অমা পীগদৌবসু নত্তে হায়না ঐহাক্না খল্লি। মীচম মীয়ামগী পুন্সিদা সরকারগী অয়েৎপা য়াম্না লৈরোইদবনি হায়না ঐদি খল্লি। মসিমক ওইহনবা হায়বসিনা সরকারগী থৌদাংনি।
কোবিদকী মতুংদগী মীয়াম্না সরকারদা থম্বা থাজবগী চাং য়াম্না হন্থরে হায়না অখঙ-অহৈশিংনা হায়বা ঐখোয়না তত্তনা তাবা ফংই। অদুবু, ফিভম অসিগা তাইয়োন্নবা মতৌ ঐখোয়না ভারত্তা উবা ফংই। হৌখিবা চহি খরসিগী মনুংদা মীয়াম্না সরকারদা থাজবগী চাং য়াম্না হেনগৎখি। মীয়াম্না ঐখোয়গী সরকারগী ৱাখল্লোন অমসুং খোঙফম চেৎপগী মতৌদা থাজবা থম্লি। মসি করম্না ওইরিবনো? ঐখোয়না লৈঙাকপদা মীয়ামগী ৱাখল্লোন খঙদুনা লৈঙাকপননি। ঐখোয়না লৈবাক্কী তঙাই ফদবদা মিৎয়েং চঙখি। মীয়ামগী মঙলান মঙফাওনগদবনি, মখোয়গী তঙাই ফদবা খুদিংমক পীগদবনি হায়বা ৱাফম অনিসিদা ঐখোয়না অহেনবা মিৎয়েং চঙখি।
চহি 23 অসিদা ঐহাক্না সরকারগী মতাংদা খনবা ৱাখল্লোন্দি – মিনিমম গবর্নমেন্ত, মেক্সিমম গবর্নেন্স হায়বসিনি। ঐহাক্না মসিগুম্বা ইনভাইরনমেন্ত অমা শেম্বদা অহেনবা মিৎয়েং চঙখি। মসিনা মীয়ামগী ইন্তর্প্রাইস অমসুং ইনর্জী অনিমক হেনগৎহনগনি। ঐখোয়না তোপ দাউন অমসুং বোত্তম অপ এপ্রোচকী ৱাখল্লোনগা লোয়ননসু চৎখি। ঐখোয়না হোলিস্তিক এপ্রোচতা প্রাইওরিতী পীখি। মীয়াম্না শরুক য়াবা হায়বা হীরমসিদা খ্বাইদগী অহেনবা মিৎয়েং চঙখি। খোঙথাং কয়া অমা সরকারনা হৌদোক্লবসু, মমৈথংদদি, মীয়াম্না শরুক য়াদুনা মদুবু মায় পাকহন্দুনা অচৌবা অওনবা অমা লাকহনবা হায়বসিদা ঐখোয়না মিৎয়েং চঙখি। ঐখোয়গী সেনিতেসন দ্রাইব ওইরো, নুপীমচাশিংগী এজুকেসন খুমাং চাউশিলহনবা ওইরো, দিজিতেল লিতরেসী ওইরো, পুম্নমক অসিগী মায় পাকপদা মীয়াম্বুসু শরুক য়াহনখি।
মরুপশিং,
সোসিএল অমসুং ফাইনেন্সিএল ইনক্লুজন্দা ঐখোয়না প্রাইওরিতী পীরি। একাউন্ত লৈজরমদবা মীওই করোর 50 হেনবগী বেঙ্ক একাউন্ত হাংদোকপীখি। মখোয়গী মফমদা এৱিয়র্নেস পীনবা অচৌবা খোঙথাং পায়খৎখি। মসিগী মরম ওইদুনা, ঐখোয়না ঙসিদি ফিন্তেক অমসুং দিজিতেল পেমেন্ততা য়াম্না কা হেন্না মাঙজিল থারে। ঐখোয়না নুপীনা লুচিংদুনা চাউখৎপা পুরকপগী হীরম্বু খুমাং চাউশিলহনখি। ঐখোয়না ভারতকী নুপীশিংগী শেন্মিৎলোন, সোসিএল অমসুং পোলিতিকেলগী পাঙ্গল হাপখি। থা খরগী মমাংদা ঐখোয়না নুপীশিংগী আইন অমা শেমদুনা পার্লিয়ামেন্ততা মখোয়গী ফম খাক্লে। ঐখোয়না ঙসি ঐখোয়গী নহাশিংগী অনৌবা খুদোংচাবা কয়া শেম্লি, মখোয়গী স্কিল দিভেলপমেন্ততা মিৎয়েং চঙলি। ভারতনা অতেনবা মতমগী মনুংদা মালেমগী স্তার্তঅপকী খ্বাইদগী অহুমশুবা চাউবা ইকোসীস্তেম ওইখি।
মরুপশিং,
সবকা সাথ, সবকা বিকাসকী মন্ত্রদা চত্তুনা ঐখোয়না লাস্ত মেইল দেলিবরী অমসুং সেচ্যুরেসনগী এপ্রোচতা প্রাইওরিতী পীরি। সেচ্যুরেসন হায়বদি, সরকারগী স্কিমশিংগী কান্নবা খুদিংমক মতিক চাবা বেনেফিশরী অমত্তা চিত্থদনা ফংহনবা অমসুং মখোয়গী মনাক্তা সরকার মশামক্না য়ৌশিনবা হায়বগী এপ্রোচ ইন্দুনা চৎলি। লৈঙাকপগী মসিগুম্বা মোদেল অসিদা মীচঙ মীখাই নাইবা অমসুং শেঞ্জা থুমজাগী থৌওং মুত্থৎলে। ভারতনা মমাংগী চহি 10দা মীওই করোর 25পু লাইরবগী খয়াত্তগী মনিং তমহনখি হায়না স্তদী অমনা হায়রি। মসিদা ঐখোয়গী গবর্নেন্স মোদেল অসিগী অচৌবা থৌদাং য়াওরি।
মরুপশিং,
নুং-পান ফাওনা উবা হায়বসিদা সরকারনা প্রাইওরিতী পীরক্লবদি, মদুগী মহৈসু অদুম ফংগনি, মসিমক ভারতনা খুদম অমা ওইরি। ঙসিদি ভারতকী মীয়াম করোর 130 হেনবগী মনাক্তা দিজিতেল আইদেন্তিতী লৈরে। মীয়ামগী মসিগুম্বা দিজিতেল আইদেন্তিতী অসিনা মখোয়গী বেঙ্ক, মখোয়গী মোবাইলগা ইন্তর্কনেক্তেদ ওইহল্লি। ঐখোয়না তেক্নোলোজীগী মতেংদগী পথাপ অমা শেমখি – দাইরেক্ত বেনেফিত ত্রান্সফর (DBT)। পথাপ অসিগী মতেংদগী ঐখোয়না মমাংগী চহি 10 অসিদা মীয়ামগী বেঙ্ক একাউন্তশিংদা বিলিয়ন দোল্লর 400 হেনবগী শেনফম হকথেংননা হাপখি। থৌওং অসিনা শেঞ্জা থুমজাবু মরু ফংনা মুত্থৎখি। ঐখোয়না লৈবাক্কী বিলিয়ন দোল্লর 33বু অরানবা খুত্তা তাগদবদগী কনখি।
মরুপশিং,
ক্লাইমেত চেঞ্জকী মতাংদা মাইয়োক্নবগী ওইনদি, ভারতকী মশাগী এপ্রোচ অমা লৈজরি। ভারতনা ঙসিদি সোলর, ৱিন্দ, হাইদ্রোগা লোয়ননা বাইওফুএল, গ্রীন হাইদ্রোজেনগী হীরমদসু থবক কয়া পায়খৎলি। মহৌশাগা অচেৎপা মরী লৈনগদবনি হায়না ঐখোয়গী সংস্কৃতীনা তাকপীদুনা লাক্লি। মসিনা মরম ওইরগা ভারতনা মালেমগী মফমদা লম্বী তাকপা ঙম্লিবনি, মসিদা চত্তুনা ঐখোয়না অকোয়বগী ফিভমদা মশক থোক্না মতেং পাংবা ঙমগনি। মিসন লাইফ – হায়বদি, লাইফস্তাইল ফোর ইনভাইরনমেন্তকী মিসন অসিনা প্রো প্লানেত পীপল হায়বগী লম্বী তাক্লি। ঐখোয়না কার্বন ক্রেদিতকী ৱাখল্লোন্দসু য়াম্না কুপ্না মিৎয়েং চঙলি। মসিদগী হেন্দোক্তুনা ঐখোয়না গ্রীন ক্রেদিতকী মতাংদসু খনফম থোক্লি। হীরম অসিগা মরী লৈননা, ঐহাক্না দুবাইমক্তদা পাংথোকখিবা Cop-28কী মনুংদা য়াম্না কুপ্না ফোংদোকখিবনি।
মরূপশিং,
ঐখোয়না তুংগী য়েংবা মতমদা, সরকার খুদিংমক্না ৱাহং কয়া অমা ঙসি থেংনরি। ঐখোয়না মতৌ করম্না ঐখোয়গী নেস্নেল সোভরেন্তি অমসুং ইন্তরনেস্নেল ইন্তরদিপেনদেন্সকি মরক্তা করম্না চাং অমা শেমগদগে? মতৌ করম্না নহাক্কী জাতিগী থাক্কী ইন্তরেষ্টতা থবক তৌবগা লোয়ননা অন্তরজাতিগী লোগী চৎন কাংলোন্দা নহাক্কী ফিরেপ অদুদা লেংদনা লৈগদগে? মতৌ করম্না ঐখোয়না জাতিগী চাওখৎপা হেনগৎহনবগা লোয়ননা মালেমগী য়াইফ থৌরাংদা হেন্না শরুক তমগদগে? মতৌ করম্না ঐখোয়না ঐখোয়গী নাত অমসুং চৎনবীশিংদগী বুধি লৌশিং লৌশিনবগা লোয়ননা য়ুনিভর্সেল ভেলুশিং হেনগৎহনগদগে? মতৌ করম্না ঐখোয়না দিজিতেল তেক্নোলোজিগী খুদোংচাবা লৌগদগে অমসুং সমাজপু মদুগী ফত্তবা ফলশিংদগী কনগদগে? মতৌ করম্না ঐখোয়না মালেমগী শান্তিগীদমক হোৎনবগা লোয়ননা তেরোরিজমগী মায়োক্তা পুন্না থবক তৌমিন্নগদগে? ঙসি, ঐখোয়না ইরৈবাক অসিবু অহোংবা পুরক্লিবা মতম অসিদা, গ্লোবেল গভর্নেন্স ইন্সতিত্যুসনশিংদসু অহোংবা পুরকফম থোক্তব্রা? অসিগুম্বা ৱাহং কয়া অমা ঐখোয়গী মাঙদা লৈ। হায়রিবা ৱাহংশিং অসি ৱাখলদা থম্লগা, ঐখোয়না ঐখোয়গী সরকারদা মায়কৈ উৎকদবনি অমসুং তুংগী থৌশিল থৌরাং তৌগদবনি।
- ঐখোয়না কোহেসিভ, কোওপরেতিভ অমসুং কোলাবোরেতিভ ওইবা মালেম অমগী ভেল্যুশিং পুন্না য়োকখৎমিন্নগদবনি।
- মালেমগী ফিরেপ লৌবদা ঐখোয়না দিভলপিং ৱার্ল্ডগী অৱাবশিং অমসুং গ্লোবেল সাউথকি শরুক য়াবা অদু প্রমোত তৌগদবনি।
- ঐখোয়না গ্লোবেল সাউথকি খোলাও তাগদবনি, মখোয়গী প্রাইওরিতিশিং মাংদা পুখৎকদবনি।
- ঐখোয়না লৈজদবা লৈবাকশিংদা ঐখোয়গী রিসোর্সশিং অমসুং তৌবা ঙম্বা পাঙগলশিং মতেং পীবীগদবনি।
- AI, আর্তিফিসিএল ইন্তেলিজেন্তস অমসুং ক্রিপতোকরেন্সি, সাইবর ক্রাইমদগী থোক্লকপা শিংনবশিংগী গ্লোবেল প্রোতোকোল শেমগদবনি।
- ঐখোয়না ঐখোয়গী নেস্নেল সোভরেন্তিদা খুদোংচাবা পীগদবনি অমসুং অন্তরজাতিগী লোগী ইকাইখুম্নবা অদুসু ঙাক্কদবনি।
হায়রিবা সেন্তিমেন্তশিং অসিগী মতুং ইন্না, সরকারনা মায়োক্নরিবা খুদোংচাদবশিং অদুবু কোকহনবতা নত্তনা ঐখোয়না মালেমগী ব্রদরহুদপুসু মপাঙ্গল কনখৎহনগদবনি। মালেমগী মরূপ অমা ওইনা, ভারতনা ৱাখল্লোন অসিগা লোয়ননা খুমাং চাওশিন্না চৎলি। ঐখোয়না ঐখোয়গী জি20 প্রসিদেন্সিদসু মসিগী থৌনা অসিগা শাগোন্ননা চৎখি। ঐখোয়না “ৱান আর্থ, ৱান ফেমিলি, ৱান ফ্যুচর”গী থৌনা অদুবু ইল্লি।
মরূপশিং,
গভর্নেন্সকি মতাংদদি ঐখোয় পুম্নমক্না খঙনরে। ঐখোয়না অমগা-অমগা পুন্না থবক তৌমিন্নবতা নত্তনা অমনা অমদগী তমগদবনি। সমিত অসিগীসু পান্দম অমা লৈ। মসিদগী থোক্লকপা পাউখুমশিং অদুনা মালেমগী তুংগী শক্লোন শেমগনি। মসিগী থাজবা অসিগা লোয়ননা, ময়াম পুম্নমকপু য়াইফ পাউজেল পীজরি !
