কেন্দ্রগী মন্ত্রীমন্দলগী ঐগী মরুপশিং, মনোহর লাল জি, সি.আর পতিল জি, তোখান সাহু জি, রাজ ভুষন জি, অতোপ্পা শক্নাইরবশিং, ইবেম্মাশিং অমসুং ইবুংঙোশিং!
ঙসি অসি বাপু অমসুং লাল বহাদুর শাস্ত্রি জিগী মপোক নুমিৎশিংনি। ইমা ভারতকী মচাশিংদা ঐনা ঐগী ইকায়খুম্নবা উৎচরি। ঙসিগী নুমিৎ অসিনা গান্ধী জি অমসুং লৈবাক অসিগী অথৌবশিংনা মঙ মঙজরম্বা ভারত অদু মঙফাওন্নবা ঐখোয়দা ইথিল পীরে।
মরুপশিং,
ঙসি ওক্তোবর ২ লাকপদা, ঐগী থৌদাং পাংথোক্নবগী ৱাখল অমা ঐঙোন্দা ফাওহল্লে অমসুং ঐ পুক্নিং নুংশিহল্লে। ঙসি ঐখোয়না শ্বাছ ভারত মিসন চহি ১০ মপুংফারে। শ্বাছ ভারত মিসনগী খোঙচৎ অসি ভারতমচা করোর কয়াগী মাইথিবা পীবা ঙমদবা থৌনাগী খুদম অমনি, ভারতমচা করোর কয়ানা মিসন অসি চৎনরে, মসি মখোয়গী মিসন ওইহল্লে, মসি মখোয়গী পুন্সিগী শরুক অমা ওইহল্লে। ঐগী চহি ১০গী খোঙচৎকী মাইপাকপা অসিদা, লৈবাক অসিগী মীওই খুদিংমক, ঐখোয়গী সেনিতেসনগী মরুপশিং, ঐখোয়গী লাইনিংগী লুচিংবশিং, ঐখোয়গী শান্নরোয়শিং, ঐখোয়গী শক্নাইরবশিং, এন.জি.ওশিং, মেদিয়াগী মরুপশিং ঐনা থাগৎপা ফোঙদোকচরি।
অদোম্না অমত ওইনা শ্বাছ ভারত মিসন অসি অচৌবা ইহৌ অমা ওইহল্লে। ঐনা রাস্ত্রপতি, উপ-রাস্ত্রপতি, হান্নগী রাস্ত্রপতি, হান্নগী উপ-রাস্ত্রপতি থাগৎপা ফোঙদোকচরি, লু-নানবগী থবকশিংগীদমক অমসুং লৈবাক অসিদা অচৌবা ইথিল অমা পীনবা থৌরম অসিদা মখোয়গী মপাঙ্গল কৎখি। ঙসি, ঐনা থম্মোয় শেংনা রাস্ত্রপতি অমসুং উপ-রাস্ত্রপতি থাগৎপা ফোঙদোকচরি। ঙসি, লু-নানবগা মরী লৈনবা থৌরমশিং লৈবাক শীনবা থুংনা পাংথোক্লি। মীয়াম্না মখোয়গী খুঙ্গংশিং, সহরশিং, লৈকায়শিং, চাউলশিং, ফ্লেতশিং, সোসাইতিশিং হরাও-তয়াম্না শেংদোক্লি। রাজ্য কয়াগী চীফ মিনিস্তরশিং, মিনিস্তরশিং অমসুং অতোপ্পা মীয়ামগী মীহুৎশিংনা থৌরম অসি লুচিংদুনা থৌরম অসিগী শরুক অমা ওইরি। হৌখিবা থাখায়দা, ঐনা পাংথোক্লিবা থৌরম অসিগী মরমদা ৱা ঙাংখ্রে, লৈবাক শীনবা থুংবগী মীওই করোর কয়া শ্বাছতা হি সেবা থৌরমশিং শরুক য়াখ্রে। লৈবাক শীনবা থুংনা মীওই করোর ২৮ হেন্না শরুক য়াদুনা, নুমিৎ ১৫ গী সেবা পাখৱারাগী থৌরম লাখ ২৭ হেন্না পাংথোকখ্রে হায়বা ঐ খঙলে। থবকশিং লেপ্তনা মখা তানা চৎথবা খক্তনা ঐখোয়গী ভারত লু-নানবা ঙমগনি। ঐনা মীওই খুদিংমক, ভারতমচা খুদিংমক থম্মোয় শেংনা তৌবীমল খঙবা উৎচরি।
মরুপশিং,
ঙসি মরুওইবা মাইপাকপগী তাঞ্জা অসিদা, লুপা করোর লিশিং ১০ রোমগী লু-নানবগা মরী লৈনবা প্রোজেকশিং হৌদোক্লে। মিসন অমৃতকী মখাদা, লৈবাক অসিগী সহর কয়াদা ঈশিং অমসুং অমোৎপশিং শেংদোক্নবা প্লান্তশিং শেমগৎলগনি। মসি নমামি গেঙ্গে নত্ত্রগা অমোৎপগী বাইওগ্যাস পুথোক্নবা গোবর্ধন প্লান্তগা মরী লৈনবা ওইগনি। হায়রিবা থবক অসিনা শ্বাছ ভারত মিসন অনৌবা থাক অমদা পুখৎকনি অমসুং শ্বাছ ভারত মিসন হেন্না মাইপাক্তুনা, ঐখোয়গী লৈবাক হেন্না মশক থোকহনগনি।
মরুপশিং,
ঙসিদগী চহি লিশিং কয়াগী মতুংদা, ২১শুবা চহিচাগী ভারতকী খন্ন-নৈনরকপা মতমদা, শ্বাছতা ভারত মিসন অসি শোইদনা নিংশিংগনি। শ্বাছ ভারত মিসন অসি মালেমদা খ্বাইদগী চাউবা অমসুং লৈবাক অসিদা খ্বাইদগী মাইপাকপা, মীয়াম্না শরুক য়াবা অমসুং মীয়াম্না লমজিংবা ইহৌ অমনি। মিসন অসিনা ঐঙোন্দা ঈশ্বরগুম্লবা মীয়ামগী অশেংবা থৌনা অদু ঐঙোন্দা উৎলে। ঐঙোন্দা, লু-নানবা অসি মীয়ামগী থৌনা পুনফম কুহ্মৈ অমা ওইরে। ঙসিদি ঐ থৌদোক কয়া নিংশিংলক্লে… খোঙজং অসি হৌরকপদা, মীওই লাখ কয়া লু-নান্না লৈনবা অমতা ওইনা পুনখি। লুহোংবশিংদগী হৌরগা মীয়ামগী থৌরম কয়াদা, মফম খুদিংমক্তা লু-নানবগী পাউজেল শন্দোকখি… মফম অমদা অহল ওইরবী ইমা অমা খোঙজং অসি শরুক য়ানবা তোইলেতশিং শানবা মহাক্কী হামেশিং য়োনখি… কনাগুম্বনা মহাক্কী মঙ্গলসুত্রা য়োনখি… অমসুং কনাগুম্বনা তোইলেতশিং শানবা লম কৎখি। মফম অমদা থবক্তগী পোথারবা ওজা অমনা মহাক্কী পেন্সন কৎখি… অমসুং মফম অমদা লান্মী অমনা থবক্তগী পোথাবদগী ফংলকপা শেনফম অদু লু-নানবগী থবকশিংগীদমক কৎথোকখি। করিগুম্বা কৎথোক্লিবা অসি লাইশঙ অমদা নত্ত্রগা অতোপ্পা থৌরম অমদা ওইরবদি, মসি পাউচেশিংগী মকোক্তা য়াওগনি অমসুং চয়োল অমা চুপ্না খন্নগনি। অদুবু লৈবাক অসিনা খঙগদবদি কৈদৌঙৈদা তি.ভিদা থোক্তবা মীওইশিং, পাউচেশিংগী হেদলাইনশিংদা মখোয়গী মমিংশিং য়াওদবা মীওইশিং, অসিগুম্বা মীওইশিং অসিনা করিগুম্বা খর কৎথোক্লি, মসি মতম কাইথোকপা নত্ত্রগা লন-থুম কৎপা ওইবা য়াই অমসুং মসিনা খোঙজং অসিগী অনৌবা থৌনা অমসুং মপাঙ্গল অমা ওইরে। মসিগা লোয়ননা, মসিনা ঐগী লৈবাক্কী অনৌবা মশক তাক্লে।
শিঙ্গল-য়ুজ প্লাস্তিক শীজিন্নবা লেপ্নবা ঐনা হায়বা মতমদা, মীওই করোর কয়া পোৎ-চৈ লৈবা মতমদা লিমোন অমসুং ফিগী খাউশিং শীজিন্নবা হৌখি। ঐনা মখোয়গী মফমদা তৌবীমল খঙবা উৎচরি। অমরোমদা, করিগুম্বা ঐনা শিঙ্গল-য়ুজ প্লাস্তিক থিংনবা হায়রবদি, প্লাস্তিক ইন্দস্ত্রিগী মীওইশিং য়ানিংদবা ফোঙদোরকপা য়াই, চারা হেনবগী খোঙজং চঙশিল্লক্কনি… অদুবু মখোয় তৌখিদে। শেন মাঙলবা ফাওবদা মখোয়না মতেং পাংখি। মোদীনা শিঙ্গল-য়ুজ প্লাস্তিক থিংনবগী থবক ফংহন্দ্রে হায়না রাজনিতি দলশিংনা খোঙজং চঙশিনবা য়াই, অদুবু মখোয়না চঙশিনখিদে, মসিগীদমক ঐনা দলশিং থাগৎপা ফোঙদোকচরি। ৱাফম অদুদা মখোয়না পুক্নিং চঙখিদবা অদুগীদমক ঐনা মখোয় থাগৎপা ফোঙদোকচরি।
মরুপশিং,
খোঙজং অসিদা ঐখোয়গী ফিল্ম ইন্দস্ত্রি তুংদা লৈহৌবা নত্তে। শেন তানবা খক্তগী খনবা মহুত্তা, হৌখিবা চহি ১০ অসিদা ইন্দস্ত্রি অসিনা লু-নানবগী পাউজেল পীবা ফিল্মশিং পুথোকখি অমসুং লু-নানবা অসি নোংম খক্তগী থবক নত্তে মসি মিকুপ খুদিং অমসুং নুমিৎ খুদিং লেপ্তনা পাংথোক্কদবা থবক অমনি। ঐনা মসি তকশিনবগা লোয়ননা, মসিগী থাজবা অসিগা লোয়ননা ঐ হিংলি। মন কি বাত্তা ঐনা লু-নানবগী মরমদা ৮০০ রক পনখিবা অদু ঐ নিংশিংলি। লু-নান্না লৈনবা মখোয়গী থবকশিং অমসুং কৎথোকপশিং ৱারি লিবা চিথি লাখ কয়া মীয়াম্না থারকখি।
মরুপশিং,
ঙসি, লৈবাক অসিগী অমসুং লৈবাক অসিগী মীয়ামগী মাইপাকপা পুরকপা মতম অসিদা, ৱাহং অমা চোংথোরক্লে: করিগী থবক অসি মাঙজৌননা পাংথোক্ত্রিবনো? নিংতম ইহৌ মনুংদা মহাত্মা গান্ধীনা ঐখোয়দা লু-নান্না হিংনবা লম্বী তাক্লমখি। মহাক্না লম্বী তাক্লম্বা খক নত্তনা ঐখোয়না তাকপীরমখি। নিংতম্লবা মতুংদা করিগীদমক লু-নানবদা পুক্নিং চঙখিদ্রিবনো? গান্ধীগী মিংদা শক্তি পায়নবা হোৎনখিবশিং অমসুং মহাক্কী মিংদা ভোৎ খোমখিবশিংনা মহাক্না পামজবা হিরম- লু-নানবা কাউথোকখি। তোইলেতশিং লৈতবা অসি লৈবাক অসিগী খুদোংচাদবা অমনি হায়বা মখোয়না খঙখিদে। মসিগী ফল ওইনা, মীয়াম অমোৎপা মরক্তা হিংখি। অমোৎপা অসি নোংমগী পুন্সিগী শরুক অমা ওইখি। লু-নানবগী মতাংদা খন্ন-নৈনবা লেপখি। মরম অদুনা, ঐনা ৱাফম অসি লাল কিলাদগী পুখৎলকপা মতমদা, মসি ৱাথোক অমা ওইখি। তোইলেতশিং অমসুং লু-নানবগী থবকশিং অসি ভাতকী প্রধান মন্ত্রী অমগী থবক নত্তে হায়না মীওই খরনা ঐবু করেম্নখি। মখোয়না মখা তানা ঐঙোন্দা করেম্নখি।
মরুপশিং,
ভারতকী প্রধান মন্ত্রী অমগী অহানবা থবক্তি লৈবাক অসিগী মীচম মীয়ামগী পুন্সি হিংবদা লাইহনবনি। ঐগী থৌদাং মশক খঙবগা লোয়ননা, ঐনা তোইলেতশিংগী মরমদা ৱা ঙাংখি, ঐনা সেনিতরি পেদশিংগী মরমদা ৱা ঙাংখি। ঙসিদি, ঐখোয়না অফবা ফলশিং উবা ফংলে।
মরুপশিং,
চহি ১০গী মমাংদা, ভারতকী অপুনবা মীশিংগী চাদা ৬০ হেন্না লম্হাংদা খোঙহামখি। মসি মীওইবগী ইকায়খুম্নবা মাঙবা থবক অমনি। মসি খক নত্তনা, মসি লৈবাক অসিগী লায়রবশিং, দলিতশিং, ত্রাইবেলশিং অমসুং তোল্লিবশিংদা ইকায়বা পীবা অমনি- মীরোল কয়া মখা তানা ইকায়বা পীবা অমনি। তোইলেতশিং লৈতবদগী ঐখোয়গী ইচলশিং অমসুং ইচানুপীশিং খুদোংচাদবা কয়া মায়োক্নখি। মখোয় অৱাবা কয়া খাংবা, মখোয় খোঙহাম্নবা নুমিৎ তাবা ঙাইবা নত্তনা উপায় অমতা লৈখিদে, মসিনা মখোয় অশোই-অঙাম থোকপা য়াবগী অচৌবা খুদোংচাদবা লৈখি। নিংথম থা ওইগেরা নত্ত্রা নোংজু থা ওইগেরা, মখোয় নুমিৎ থোক্ত্রিঙৈদা য়াহৌখি। ঐগী লৈবাক অসিগী ইমা করোর কয়া নুমিৎ খুদিংমগী মসিগী অৱাবা অসি মায়োক্নখি। লম্হাংদা খোঙহাম্বা অসিনা ঐখোয়গী অঙাংশিংগী পুন্সিদা খুদোংথিবা কয়া থোকহল্লি। মসিনা অঙাংশিং শিনবগী মরুওইবা মরম অমনি। সেনিতরিগী ফিবমশিং চাপ মান্নবদগী খুঙ্গংশিং অমসুং স্লমশিংদা লায়না লাইচৎশিং শন্দোরকখি।
মরুপশিং,
অসিগুম্বা ফিবম অমদা লৈবাক অমা করম্না চাউখৎকনি? মরম অদুনা অসিগুম্বা থবকশিং অসি মখা তানা থোকহন্দনবা ঐখোয়না ৱারেপ লৌখিবনি। ঐখোয়না মসি লৈবাক অমগী অমসুং মীওইবা খুন্নাইগী শিংনবনি হায়না লৌখি অমসুং মসি কোকহন্নবা খোঙজং অমা হৌদোকখি। মরম অসিদগী শ্বাছ ভারত মিসনগী মরু হুনখিবনি। থৌরম অসি, পান্দম অসি, খোঙজং অসি, থবক অসি, মীয়াম ৱাখল তাহন্নবা থবক অসি অৱাবগী শিওমনুংদগী পোক্লকখিবনি। মতম অমদা হেক্তা, ভারতমচা করোর কয়ানা মসিগী মাইপাকপা অসি পুরকখিবা নত্তে। লৈবাক অসিদা তোইলেত করোর ১২ হেন্না শারে। তোইলেত শীজিন্নবা অসি চাদা ৪০গী মখাদা লৈরম্বা অদু হৌজিক চাদা ১০০ য়ৌরে।
মরুপশিং,
শ্বাছ ভারত মিসন্না লৈবাক অসিগী মীচম মীয়ামগী পুন্সিদা পীরিবা কান্নবা অসি মমল নাইদে। মালেমগী মমিং লৈরবা চেফোঙ অমদা থিজিনবা অমা হন্দক ফোঙখ্রে। থিজিনবা অদু য়ু.এস.এগী ৱাশিংতন্দা লৈবা ইন্তরনেসনেল ফুদ পোলিসি রিছার্স ইন্সতিতুৎ, কালিফোর্নিয়া য়ুনিভর্সিতি অমসুং ওহাইয়ো স্তেৎ য়ুনিভর্সিতিগী সাইন্তিস্তশিংনা পাংথোকখিবনি। শ্বাছ ভারত মিসন্না চহি অমদা অঙাং ৬০,০০০ দগী ৭০,০০০ ফাওবগী থৱায় কনবা ঙম্লে হায়না থিজিনবা অদুদা খঙবা ঙমখি। করিগুম্বা কনাগুম্বা অমনা ঈ পীদুনা কনাগুম্বা অমগী থৱায় কল্লবদি, মসি অচৌবা থবক অমনি। অদুবু ঐখোয়না, লু-নান্না লৈদুনা, অমোৎ লৌথোক্তুনা অমসুং ফত্তবা পোৎলমশিং লৌথোক্তুনা, অঙাং ৬০,০০০ দগী ৭০,০০০ ফাওবগী থৱায় কনবা ঙম্লে- মসিদগী হেন্না চাউবা ঈশ্বরগী থৌজাল করি লৈরবগে? দব্লিউ.ঐচ.ওগী মতুংইন্না, ২০১৪ অমসুং ২০১৯গী মনুংদা, দাইরিয়ানা শিরগদবা থৱায় ৩০০.০০ কনবা ঙমখি। মসি মীওইবগী সেবা তৌবা অমনি। য়ুমদা তোইলেতশিং শাবদগী নুপীশিংগী চাদা ৯০ হেন্না অশোই-অঙাম থোক্ত্রে হায়না য়ুনিসেফকী রিপোর্ত অমনা হায়রি। শ্বাছ ভারত মিসন্না মরম ওইদুনা নুপীশিংদা লৌনগনবা লায়নাশিং নাবগী চাং শিংথাবা য়ানা হন্থরে। মসিনা লোইবা নত্তে। নুপীমচাশিংগী তোখাইবা তোইলেতশিং শাবদগী, স্কুল লিশিং কয়াদা নুপীমচাশিং স্কুল কাবা তোকপগী চাং হন্থরে। য়ুনিসেফকী অতোপ্পা থিজিনবা অমদা, লু-নানবা মরম ওইদুনা চাংচৎ অমদা, খুঙ্গংগী ইমুংশিংনা চহি অমদা লুপা ৫০,০০০ কনবা ঙম্লে হায়রি। মমাঙদা, হায়রিবা শেনফমশিং অসি য়াম্না তোইনা নাবদগী লায়েংনবা নত্ত্রগা নাবদগী থবক শুবা ঙমদবগী চৎখিবা ঙাক্তনি।
মরুপশিং,
লু-নানবা অসিনা অঙাংশিংগী পুন্সি কনবা ঙম্লে অমসুং অতোপ্পা খুদম অমা পীবা ঐনা পাম্মী। চহি খরগী মমাংদা, গোরাখপুর অমসুং মসিগী অকোয়বা মফমশিংদা ইন্সেফেলাইতিসনা অঙাং কয়া শিহনবগী ব্রিকিং ন্যুজ তাখি। অদুবু হৌজিক অমোৎপশিং লৌথোকখিবা অমসুং লু-নানবা হৌরকপদগী, হায়রিবা পাউশিং অদু তাখিদ্রে। য়েংউ অমোৎপশিং অদুগা লোয়ননা করি মাঙখ্রবগে হায়বা! মসিগী মরুওইবা মরমদি শ্বাছ ভারত মিসন্না মীয়াম ৱাখল তাহনবা অমসুং মতুং তারকপদা লু-নানবগী থবক চৎথরকপা অসিনি।
মরুপশিং,
লু-নানবা ইকায়খুম্নবা হেনগৎলকপা অসিনা লৈবাক অসিগী ৱাখল্লোন্দা অচৌবা অহোংবা অমা লাক্লে। ৱাফম অসি পনবা য়াম্না মরুওই হায়না ঐনা খল্লি। মমাঙদা, লু-নানবগী থবক শুবা মীওইশিং করিগুম্বা মওং অমা ওইনা য়েংখি অমসুং মখোয়বু করি ওইনা উবগে হায়বা ঐখোয়না খঙলে। খুন্নাইগী মশিং য়াম্লবা কাংলুপনা মখোয়গী হক শিংনখি অমসুং অমোৎপা শেংদোকপগী থবক অসি কনাগুম্বা অমগী থবকনি হায়না থাজনখি অমসুং অমোৎপা শেংদোক্লিবা মীওইশিং অসি হন্থনা য়েংবগী অপংবা ৱাখল্লোন অমা লৈখি। ঐখোয় খুদিংমক্না লু-নানবগী থবকশিং শরুক য়ারকপা মতমদা, মখোয়না পাংথোক্লিবা থবক অসিগী মরুওইবা অদু অমোৎপা শেংদোক্লিবা মীওইশিং অদুনা খঙবা হৌরকখি অমসুং অতোপ্পা মীওইশিংশু মখোয়গী থবক্কী মতেং পাংবা হৌরকখি। মসিনা ৱাখল্লোন্দা অচৌবা অহোংবা অমা পুরকখি। শ্বাছ ভারত মিসন্না সেনিতেসনগী শিন্মীশিং অমসুং মখোয়গী ইমুং-মনুংদা ইকায়খুম্নবা ফংহল্লে অমসুং মখোয়না পাংথোক্লিবা থবকশিং অদুগীদমক মখোয়দা চাউথোকচবা পোকহল্লে। ঙসিদি, ইকায়খুম্নবা অমগা লোয়ননা মখোয়না ঐখোয়দা য়েংলে। মখোয়গী মবুক থন্নবা খক মখোয়না থবক শুবা নত্তে, লৈবাক অসি মশক থোক্নবা মখোয়না থবক শুরিবনি হায়বগী চাউথোকচবা মখোয়গী মফমদা হৌজিক লৈরে। শ্বাছ ভারত মিসন্না সেনিতেসন শিন্মী করোর কয়াদা চাউথোকচবা অমসুং ইকায়খুম্নবা ফংহল্লে। সেনিতেসনগী শিন্মীশিং অশোই-অঙাম থোকহন্দনবা অমসুং মখোয়দা ইকায়খুম্নবা পুন্সি অমা ফংহন্নবা ঐখোয়গী সরকারন থবক পায়খৎলে। সেপতিক তেঙ্কশিংগী মনুংদা চঙবদা থেংনরিবা খুদোংথিবশিং কোকহন্নবা ঐখোয়না থবক পায়খৎলে। সরকার, লনাই কাংবু অমসুং মীয়াম পুন্না থবক তৌমিন্নরি অমসুং অনৌবা স্তার্দঅপ কয়া থোরক্লে, অনৌবা তেক্নোলোজিশিং লাক্লে।
মরুপশিং,
শ্বাছ ভারত মিসন অসি লু-নানবা খক্তগী থৌরম অমা নত্তে; মসিগী পান্দম পাকথোক-চাউথোরক্লি। লু-নানবনা লমজিংদুনা নুংঙাইনা হিংনবা লম্বী অমা মিসন অসিনা শেম্লে। শ্বাছ ভারত মিসন্না মশিং য়াম্লবা থবকশিং ফংহল্লে। হৌখিবা চহি খর অসিদা, তোইলেত করোর কয়া শাখিবা অসিনা সেক্তর কয়া কান্নবা পীরে, মীওইশিংদা থবক কয়া ফংহল্লে। খুঙ্গংশিংদা, শিন্মী কয়াদা অনৌবা থবকশিং ফংহল্লে। য়ুনিসেফকী মতুংইন্না, মিসন অসিনা থবক পীবদগী মীওই করোর ১.২৫ রোম শেন-থুমগী কান্নবা খর ফংলে হায়রি। মিসন অসিগী খুদোল অমা ওইনা, চেক শুবী নুপী কাংবু অমশু থোরক্লে। মমাঙদা, ঐখোয়না চেক্কী য়ুম শাবা নুপীশিং উরমদে, হৌজিক নুপীশিংনা চেক্কী য়ুমশিং শাবা অদোম উবা ফংলগনি। ঐখোয়গী নহারোলশিংগী লু-নানবগী তেক্নোলোজি, অফবা থবকশিং অমসুং খুদোংচাবা কয়া ফংলে। ঙসিদি, স্তার্দঅপ ৫০০০ রোম ক্লিন তেক্নোলোজি রেজিস্তার তৌরে। ঈশিং অমসুং সেনিতেসনগী লমদা, অমোৎপদগী শেন ওন্থোকপা, অমোৎপা খোমজিনবা অমসুং পুথোক-পুশিন তৌবা, ঈশিং অমুক হন্না শীজিন্নবগী খুদোংচাবশিং লৈরে। চৎলিবা দিকেদ অসি লোইরকপদা, সেক্তর অসিনা অনৌবা থবক লাখ ৬ রোম ফংহনগনি হায়না পানরি অমসুং মসিদা শ্বাছ ভারত মিসন্না মরুওইবা থৌদাং অমা লৌগনি।
মরুপশিং,
শ্বাছ ভারত মিসন্না সর্কুলার ইকোনোমিদা অনৌবা ইনোৎ অমশু পীরে। হৌজিক ঐখোয়না য়ুমদগী পুথোরকপা অমোৎপদগী হার, বাইওগ্যাস, ইলেক্ত্রিতিসি অমসুং লম্বী শেম্নবা মৈতালগুম্বা পোৎলমশিং পুথোক্লে। ঙসিদি, গোবর্ধন য়োজননা খুঙ্গং অমসুং সহরগী লমশিংদা অচৌবা অওনবশিং পুরক্লে। স্কিম অসিগী মখাদা, খুঙ্গংশিংদা বাইওগ্যাস প্লান্ত চা কয়া লিংখৎলে। শা-ষন লোইরিবা অমসুং অহল ওইরবা শা-ষনশিং য়োক্লিবা লৌমীশিংদা শেন-থুমগী অৱাবা অমা মায়োক্নরি। হৌজিক, গোবর্ধন য়োজনাদা থাগৎপা ফোঙদোকচরি, মখা তানা শঙ্গোম থোক্ত্রবা নত্ত্রগা থবক শুবা য়াদ্রবা শা-ষনশিং শেন তানবা য়ারে। মসিগী মথক্তা, লৈবাক শীনবা থুংনা সি.বি.জি প্লান্ত কয়া মাঙজৌননা লিংখৎখ্রে। ঙসি, অনৌবা প্লান্ত কয়া শঙ্গারে অমসুং অনৌবা প্রোজেক কয়া পায়খৎপা হৌরে।
মরুপশিং,
য়াংনা হোংলক্লিবা মতম অসিদা, লু-নানবগা মরী লৈনবা খুদোংচাদবশিং খঙদোকপা অসি ঐখোয়গী ওইনা য়াম্না মরুওই। ঐখোয়গী শেন-থুমগী ফিবম ফগৎলকপা অমসুং সহর পাকথোক-চাউথোরকপগা লোয়ননা, অমোৎপা পুথোকপশু হেনগৎলকই। হৌজিক্কী “শীজিন্নবা লোইরগা লংথোকপা”গী শেন্মিৎলোনগী নমুনা অসিনা অমোৎপগী অৱাবা অসিদা মতেং পাংলি। ইলেক্ত্রোনিক ৱেস্ত য়াওনা অনৌবা মখলগী অমোৎপা ফত্তবশিং ঐখোয়না থেংনরে। মরম অদুনা, ঐখোয়না ঐখোয়গী তুংগী লাল্লোংশিং ফগৎহনগদবনি। য়ুম-কৈ শাবদা রিসাইকল তৌবা য়াবা মচাকশিং হেন্না শীজিন্নবা য়াবা তেক্নোলোজিশিং শেমগৎপা ঐখোয়না দরকার ওইরি। য়ারিবমখৈ অমোৎপা পুথোক্তবা ঙম্বা লম্বী অমা থিনবা ঐখোয়গী লৈকায়শিং, হাওসিং কমপ্লেক্সশিং অমসুং বিল্দিংশিং দিজাইন তৌবা দরকার ওইরে। করিগুম্বা ঐখোয়না অমোৎপা অমতা পুথোক্তবা ঙম্লবদি, মসি য়াম্না ফরে। ঐখোয়না ঈশিং মাঙহল্লোইদবনি অমসুং অমোৎপা ঈশিং শেংদোক্লগা অমুক হন্না শীজিন্নগদবনি। নামামি গেঙ্গে প্রোজেক অসি ঐখোয়গী মোদেল অমনি। থবক অসিগী মহৈ ওইনা, হৌজিক তুরেল অসি হেন্না নানলে। অমৃত মিসন অমসুং অমৃত সরোভর কেম্পেন্না অচৌবা অহোংবশিং পুরক্লে। থবকশিং অসি সরকার অমসুং মীয়াম শরুক য়াদুআন অহোংবশিং পুরকপগী শক্তি লৈরবা নমুনাশিংনি। অদুবু, মসিনা য়ারে হায়বা ঐনা খনদে। ঈশিং তুংশিন্দুনা থম্নবা, ঈশিং শেংদোক্নবা অমসুং ঐখোয়গী তুরেলশিং লু-নান্না থম্নবা ঐখোয়না মখা তানা অনৌবা তেক্নোলোজিশিংদা শেন থাদগদবনি। লু-নানবা অসি তুরিজমগা মরী লৈনৈ হায়বা ঐখোয়না খঙলে। মরম অদুনা, ঐখোয়গী লমকোয়ফমশিং, শেংলবা মফমশিং অমসুং হেরিতেচগী মফমশিং ঐখোয়না লু-নান্না থমগদবনি।
মরুপশিং,
হৌখিবা চহি ১০ অসিদা, লু-নানবগী লমদা ঐখোয়না মাইপাকপা কয়া পুরক্লে। অমোৎপা পুথোকপা অসি নোংমগী তৌদ্রবা য়াদ্রবা থবক অমা ওইবগুম, লু-নান্না থম্বা হায়বসিশু নোংমগী হৈনবী অমা ওইহনগদবনি। মখোয়না কৈদৌঙৈদা অমোৎপা অমতা পুথোক্তে হায়না মীওই অমনা নত্ত্রগা থৱায় পানবা অমতনা হায়বা ঙম্লোই। অমোৎপা অসি পুথোক্তবা য়াদবগা লোয়ননা, লু-নানবা অসিশু তৌদ্রবা য়াদ্রবা থবক অমা ওইগদবনি। ঐখোয়না মসিগী থবক অসি নোংমা খক্তগী নত্ত্রগা মীরোল অমা খক্তগী মখা চৎথবা খক নত্তনা, তুংগী মীরোলশিংগীদমক পাংথোক্কদবনি। মীওই খুদিংমক্তা লু-নানবা অসি মখোয়গী থৌদাংনি হায়না মখোয়না খঙলকপা মতমদা, লৈবাক অসিদা শোইদনা অহোংবা পুরক্কনি হায়না ঐনা থাজৈ। মসিগী থাজবা অসিনা লৈবাক অসি মশক থোকহনগনি। লু-নানবগী পান্দম অসি নোংম খক্তগী থবক নত্তে মসি পুন্সি চুপ্পা পাংথোক্কদবা থবক অমনি। মসি ঐখোয়না মীরোল অমদগী মীরোল অমদা থংথরমগদবনি। লু-নানবা হায়বসি মীওই খুদিংমক্কী পোকপদগী য়াওরক্লবা হৈনবী অমা ওইগদবনি। মসি ঐখোয়গী নুমিৎ খুদিংগী পুন্সিগী শরুক অমা ওইগদবনি অমসুং ঐখোয়না অমোৎপা হৈনদবগী ৱাখল্লোন অমা লৈহনগদবনি। করিগুম্বা ঐখোয়গী অকোয়বদা অমোৎপা লৈবা মতমদা ঐখোয়না তুমিন্না লৈথোক্লোইদবনি। অমোৎপদা তুক্কৎচবা ফাওগদবনি অমসুং লু-নানবগী থবক তৌনবগী ঐখোয়দা থৌনা লৈগদবনি। কমদৌনা ইমুংশিংদা অপীকপা অঙাংশিংনা মখোয়গী অহলশিং লু-নান্না হিংনবা পুক্নিং থৌগৎপগে হায়বা ঐখোয়না উরে। মোদীজিনা হায়রিবা অসি য়েংউ। করিগী নহাক্না অমোৎপা চাইখাইরিবনো? হায়না মখোয়গী মশুশিং নত্ত্রগা অঙাংশিংনা মখোয়দা হায়রকই হায়না মীওই কয়ানা ঐঙোন্দা পাউদম্লকখি। কারগী থোংনাউদগী বোত্তল অমা লংথোকপা মীওইশিং অঙাংশিংনা থিংখি। মসিগী খোঙজং অসিনা মখোয়দা মরু অমা হুল্লে।
মরম অদুনা, ঙসি ঐনা নহারোলশিং অমসুং তুংগী মীরোলশিংগী অঙাংশিংদা হায়নিংই: ঐখোয় ৱাশক ঙাক্লসি, ঐখোয় অতোপ্পশিং শন্দোক্না তাক্নবা অমসুং পুক্নিং থৌগৎনবা থবক মখা চৎথসি অমসুং ঐখোয় অমতা ওইরসি। লৈবাক অসি লু-নান্দ্রি ফাওবা ঐখোয় লেপ্লোইদবনি। হৌখিবা চহি ১০দা মাইপাকপা অসিনা ঐখোয়দা উৎলে মদুদি, ঐখোয়না মসি ফংবা ঙমগনি অমসুং ঐখোয়না ইমা ভারত অমোৎপদগী কনবা ঙমগনি।
মরুপশিং,
খোঙজং অসি জিলা, ব্লোক, খুঙ্গং, লৈকায় অমসুং লৈরক্তগী থাকশিংদা য়ৌহন্নবা ঐনা রাজ্য সরকারশিংদা হায়জরি। তোঙান-তোঙানবা জিলাশিং অমসুং ব্লোকশিংদা লু-নানবা স্কুলশিং, লু-নানবা হোস্পিতালশিং, লু-নানবা ওফিসশিং, লু-নানবা লৈকায়শিং, লু-নানবা পুখ্রিশিং অমসুং লু-নানবা গুহাশিংগী চাংদম্নবা পাংথোক্কদবনি। মসিনা চাংদম্নবগী ফিবম অমা শেমগৎকনি অমসুং থা-থাগী ওইনা নত্ত্রগা থা ৩-৪গী ওইনা শেনগী মনা অমসুং শক্তাকচেশিং পীগদবনি। ভারত সরকারনা সহর ২-৪ লু-নাল্লে নত্ত্রগা জিলা ২-৪ নানলে হায়না লাউথোকপা অসিনা য়াবা নত্তে। ঐখোয়না মফম খুদিংমক লু-নানহনবা দরকার ওইরে। মীয়ামগী তোইলেতশিং ফজনা থম্নবা ঐখোয়গী ম্যুনিসিপালিতিশিংনা মখা তানা হোৎনগদবনি অমসুং মসিগীদমক ঐখোয়না মখোয়দা মনা পীগদবনি। থবকশিং হান্নগী ফিবমদা হঞ্জিল্লকপা অসিদগী হেন্না ফত্তবা অমা লৈতে। লোকেল বোদিশিংনা লু-নানবা মরুওইনা লৌনবা অমসুং মসি মখোয়গী মরুওইবা থবক ওইহন্নবা ঐনা হায়জরি। ঐখোয় অমতা ওইনা ৱাশক্লসি। ঐখোয়না লৈরুবা মফম খুদিং- য়ুম ওইগেরা, ঐখোয়গী লৈকায় ওইগেরা, নত্ত্রগা ঐখোয়গী থবক মফম ওইগেরা- ঐখোয়না অমোৎপা মফম ওইহন্দনবা অমসুং মসি ঐখোয়না খাংদুনা লৈথোক্তনবা ঐখোয়গী মীওই খুদিংমক্না ৱাশক লৌনবা ঐনা হায়জরি। লু-নানবা অসি ঐখোয়গী হৈনবী অমা ওইহল্লসি। ঐখোয়গী মফমশিং লু-নান্না থম্বগা লোয়ননা, মসিগী ৱাখল্লোন অসি ঐখোয়গী অকোয়বদা ঐখোয়না লৈহনগদবনি। বিকসিত ভারত অমগী খোঙচৎ অসিদা ঐখোয়না পায়খৎলিবা থবক খুদিংমক্না লু-নানবনা নুংঙাই-য়াইফবা পুরকই হায়বা লাইৱা অসি হেন্না মপুংফাহনগনি। ঐনা অমুক হন্না ময়ামগী মফমদা ঐগী য়াইফ-পাউজেল পীজরি। অনৌবা থাজবা অমসুং হরাওবগা লোয়ননা, ঐখোয় মাঙলোমদা চঙশিল্লসি অমসুং অমোৎপা পুথোক্তনবা, লু-নানবগী থবকশিং পাংথোক্নবা অমসুং ঐখোয়গী থৌদাং পাংথোকপদা কৈদৌঙৈদা মনিং হন্দনবা ৱাশক অমা লৌদুনা পুজ্যা বাপুদা অশেংবা ইকায়খুম্নবা অমা উৎলসি। ঐনা অদোমগী মফমদা য়াইফ-পাউজেল পীজরি।
অদোম থাগৎপা ফোঙদোকচরি।
