কেন্দ্রগী মন্ত্রীমন্দলগী ঐগী মরুপ শ্রী রাজনাথ সিংহ জি, শ্রী অজয় ভাত জি, সি.দি.এস জেনেরেল অনিল চৌহান জি, সর্বিস অহুমগী মকোকশিং, দিফেন্স সেক্রেতরি, দি.জি এন.সি.সি, শক্নাইরবশিং অমসুং ঐগী নহা ওইরিবা এন.সি.সি কেদেদ মরুপশিং।
হান্নগী এন.সি.সি কেদেদ অমা ওইনা, ঐনা অদোমগী নাক্তা লাকপদা থৌদোক কয়া নিংশিংলকই। এন.সি.সি কেদেদশিংগী অহানবা পান্দমদি এক ভারত শ্রেস্থা ভারত অমগী ৱাখল্লোন অমা লৈহনবনি। অদোম ভারতকী মফম কয়াদগী লাকপনি। চহি খর অসিদা এন.সি.সি রেল্লি পাক-চাউবা হেনগৎলকপদা ঐ হরাওই। ঙসি, সরকারনা ভাইব্রেন্ত ভিলেজশিং ওইনা শেমগৎলিবা লৈবাক অসিগী ঙমখৈশিংদা লৈরিবা খুঙ্গংশিংদগী গ্রাম পঞ্চায়তশিংগী প্রধান ৪০০ হেন্না ঐখোয়গী ইরক্তা য়াওরি। মসিগী মথক্তা, লৈবাক শীনবা থুংনা লৈরিবা সেল্ফ হেল্প গ্রুপশিংগী মীহুৎশিং ওইনা ইচল ১০০ হেনবা মফম অসিদা শরুক য়ারি। ঐনা ময়াম পুম্নমক তরাম্না ওকচরি।
মরুপশিং,
এন.সি.সি রেল্লি অসিনা মখা তানা মালেম অমা, ইমুং অমা, তুংলমচৎ অমগী ৱাখল্লোন হেন্না মপাঙ্গল কনখৎহল্লে। ২০১৪ দা রেল্লি অসিদা লৈবাক ১০গী কেদেদশিং শরুক য়াখি। ঙসি লৈবাক ২৪গী কেদেদশিং শরুক য়ারে। ঐনা ময়াম পুম্নমক মরুওইনা মপান লৈবাকশিংদগী লাক্লিবা নহা ওইরিবা কেদেদশিং থাগৎপা ফোঙদোকচরি।
ঐগী নহা ওইরিবা মরুপশিং,
চহি অসিদা লৈবাক অসিনা ৭৫শুবা গনতন্ত্র দিবস থৌরম পাংথোক্লি। পুৱারি ওইরবা খুমাঙচাউশিনবা অসি লৈবাক অসিগী নুপীশিংগী থৌনাদা কৎথোক্লে। ঐখোয়না ঙরাং থৌরম অসি নুপীশিংগী থৌনাদা কৎথোকপা উখ্রে। কমদৌনা ভারতকী নুপীশিংনা অচৌবা থবকশিং পাংথোকপগে হায়বা ঐখোয়না মালেমদা উৎখ্রে। কমদৌনা ভারতকী নুপীশিংনা হিরম খুদিংমক্তা অনৌবা থবকশিং পাংথোকপগে হায়বা ঐখোয়না মালেমদা উৎখ্রে। মসি নুপীশিং মশিং খ্বাইদগী য়াম্না শরুক য়াবা অহানবা গনতন্ত্র দিবস থৌরমশু ওইরে। নখোয় ময়ামশু ফজনা পাংথোকখি। ঙসি কেদেদ কয়া মনা-মথুমশিং ফংলে। কন্যাকুমারিদগী দিল্লি ফাওবা অমসুং গুৱাহাতিদগী দিল্লি… ঝান্সিদগী দিল্লি ফাওবা সাইকল থৌদুনা নারী শক্তি বন্দন উৎতুনা নুমিৎ তরুক্নিদা কিমি ৪৭০ থৌখি, হায়বদি নুমিৎ খুদিংগী কিমি ৮০ থৌবা হায়বসি অরাইবা নত্তে। হায়রিবা তোঙান-তোঙানবা থৌরমশিংদা শরুক য়াখিবা কেদেদশিং ঐনা থাগৎপা ফোঙদোকচরি। বরোদাদগী কাংলুপ অমা অমসুং কাসিদগী কাংলুপ অমা য়াওনা সাইকলগী কাংলুপ অনি লৈখি। ঐ অহানবদা বরোদাদগী এম.পি ওইখি অমসুং মতুংদা কাসিদগী ওইখি।
ঐগী নহা ওইরিবা মরুপশিং,
করিগুম্বা মতমদা নুপীমচাশিং নাৎকী থৌরমশিং খক্তদা শরুক য়াখি। ঙসিদি, ভারতকী নুপীশিংনা ঈশিং, কংফাল, সুনদ্রংদা লান্থেংনবা মালেম্না উরে। মীওই খুদিংমক্না ঙরাং নুপীশিংনা মথৌ পাংথোকপা তেব্লোদা উরে। ঙরাং মালেম্না উখিবা খুদিংমক, মসি খুদক্তা ওইখিবা নত্তে। মসি হৌখিবা চহি ১০ লেপ্তনা হোৎনরকপগী ফলনি। ভারতকী চৎনবীদা, মতম পুম্নমক্তা নুপীশিং শক্তি অমা ওইনা উরি। রানি লক্সমীবাই, রানি চেনাম্মা অমসুং ভেলু নাচিয়ারগুম্বী অথৌবীশিং ভারতকী লৈমায়দা লৈরমখি। নিংতম ইহৌদা নুপী য়াওল লান্মী অমদগী হেনবনা বৃতিস মাইথিবা পীখি। হৌখিবা চহি ১০দা, ঐখোয়গী সরকারনা লেপ্তনা নুপীশিংগী শক্তি হেনগৎহল্লে। মমাঙদা নুপীশিং শরুক য়াবা য়ারমদবা হিরমশিং, ঐখোয়না অথিংবা খুদিংমক লৌথোক্লে। ঐখোয়না সর্বিস অহুমক নুপীমচাশিং শরুক য়াবা য়াহল্লে। ঙসি নুপী ওফিসারশিং ফোর্সশিংদা পর্মনেন্ত কম্মিসন য়াহল্লে। আর্মদ ফোর্স অহুমদা নুপীশিং লুচিংবা অমসুং লান্থেংনবগী মফম ঐখোয়না পীরে। অগ্নিবিরদগী হৌরগা ফাইত্তর পাইলোতশিং ফাওবদা নুপীশিং শরুক য়াবা হেনগৎলকপা ঙসি অদোম্না উরে। হান্নদি, নুপীমচাশিং মিলিতরি স্কুলশিংদা ফাওবা তম্বা য়াহল্লমদে। হৌজিক ইচানুপীশিং লৈবাক শীনবা থুংনা লৈরিবা মিলিতরি স্কুলশিংদা তম্লে। চহি ১০ অসিদা সেন্ত্রেল সেকুরিতি ফোর্সশিংদা নুপীশিং শরুক য়াবা শরুক অনিদা হেনগৎলে। রাজ্যগী পুলিস ফোর্সশিংদা নুপীশিং হেন্না শরুক য়াহন্নবা রাজ্যশিংগী পুক্নিং থৌগৎলে।
মরুপশিং,
ইচানুপীশিং অসিগুম্বা শীনফমশিংদা চঙলকপা মতমদা, মসিনা খুন্নাইগী ৱাখল্লোন্দা অহোংবা পুরকই। মসিনা নুপীশিংগী মথক্তা মীওৎ-মীনৈ চৎথবা হন্থহনবদা মতেং পাংই।
নহা ওইরিবা মরুপশিং,
খুন্নাইগী অতোপ্পা হিরমশিংদা নুপীমচাশিং শরুক য়াবা মখা তানা হেনগৎলক্লি। মশিং য়াম্লবা ঐখোয়গী ইচানুপীশিং বেঙ্কিং, ইন্সুরেন্স অমসুং খুঙ্গংশিংদা থবক কয়া পাংথোকপগা মরী লৈনবদা শরুক য়াবা হেনগৎলক্লে। ঙসিদি, স্তার্দ-অপশিং নত্ত্রগা সেল্ফ হেল্প গ্রুপশিং ওইগেরা, হিরম খুদিংমক্তা ইচানুপীশিংনা মফম অমা কল্লে।
হৈথোই-শিংথোইরবা ইচানুপাশিং অমসুং ইচানুপীশিংদা লৈবাক অমনা চপ মান্নবা খুদোংচাবশিং পীবা মতমদা, লৈবাক অদুগী হৈথোই-শিংথোইবা মীওই মশিং হেনগৎলক ই। মসি চাউখৎলবা ভারত অমা শেমগৎনবা খ্বাইদগী চাউবা থৌনানি। ঙসিগী অপুনবা মালেমগী শক্তি অসি ভারতকী অপুনবা হৈথোই-শিংথোইরবা মীয়াম অসিনি। ঙসি মালেম শীনবা থুংবনা ভারত অসি মালেমগী মরুপ অমা ওইনা য়েংলি। ভারতকী পাসপোর্তকী মপাঙ্গল অঙকপা ফংনা হেনগৎলক্লি। নহাকগুম্বা নহারোলশিংনা মসিগী কান্নবা খ্বাইদগী য়াম্না ফংলি। ঙসিদি মালেমগী লৈবাক কয়ানা ভারতকী হৈথোই-শিংথোইরবা নহারোলশিং অসি খুদোংচাবা অমা ওইনা উরি।
মরুপশিং,
ঐনা য়াম্না তোইনা হায়বা অমা লৈরি, অমৃত কাল অসিদা মোদী কান্নবা ফংলবা মীওই অমা নত্তে। মথং চহি ২৫ দা ঐখোয় চাউখৎলবা ভারত অমা শেমগৎকনি। মসিদা লৈবাক অসিগী স্কুল, কলেজ অমসুং য়ুনিভর্সিতি তম্লিবা মহৈরোয়শিং কান্নবা ফংগনি। চাউখৎলবা ভারত অমসুং ভারতকী নহারোলশিংগী শীনফম পুন্না মাঙলোমদা চৎমিন্নগনি। মরম অদুনা নখোয় থবক কন্না শুনবা মিকুপ অমা ফাওবা মতম মাঙহল্লোইদবনি। হৌখিবা চহি ১০দা স্কিল, থবক ফংবা অমসুং মশানা মশাবু থবক পীজবা য়াওনা হিরম খুদিংমক্তা থবক কয়া পাংথোক্লে। নহারোলশিংগী হৈথোই-শিংথোইবশিং কমদৌনা শীজিন্নগনি হায়বদা মীৎয়েং চঙলে। অনৌবা যুগ অসিগী অনৌবা শিংনবশিং থেংননবা অদোম থৌরাং তৌনবা অনৌবা ইজুকেসন পোলিসি শেম্লে। পি.এম স্কুল অভিয়ানগী মখাদা লৈবাক শীনবা থুংনা স্কুল লিশিং কয়া স্মার্দ ওইহল্লে। হৌখিবা চহি ১০দা মালেমগী রেঙ্কিংশিংদা ভারতকী য়ুনিভর্সিতিশিংগী ফিবম শিংথাবা য়ানবা ফগৎলে। লৈবাক অসিদা মেদিকেল কলেজ মশিং হেনগৎলকপগা লৌয়ননা মেদিকেল সিত মশিং য়াম্না হেনগৎলে। রাজ্য কয়াদা অনৌবা আই.আই.তিশিং অমসুং অনৌবা এ.আই.আই.এম.এসশিং লিংখৎলে। সরকারনা নহারোলশিংগীদমক দিফেন্স,স্পেস অমসুং মেপ্পিং সেক্তরশিং হাংদোক্লে। থিজিনবা পুক্নিং থৌগৎনবা অনৌবা আইনশিং শেম্লে। পুম্নমক অসি লৈবাক অসিগী নহারোলশিংগীদমক্নি।
মরুপশিং,
ঐনা মেক ইন ইন্দিয়া অমসুং অত্মানির্ভর ভারতকী মরমদা য়াম্না তোইনা হায়বা নহাক খঙলম্লগনি। খোঙজং অনিমক অসি নখোয়গুম্বা নহারোলশিংগীদমক্নি। হায়রিবা খোঙজং অনি অসিনা ভারতকী নহারোলশিংদা অনৌবা থবকশিং ফংনবা খুদোংচাবশিং পীরি। হৌখিবা চহি ১০ দা ভারতকী দিজিতেল ইকোনোমি ঐখোয়গী নহারোলশিংগী অনৌবা থৌনা, ঐখোয়গী নহারোলশিংগী অনৌবা শক্তম ওইরক্লে। চহি ১০গী মমাঙদা ৱাখলনা লাম্বদা ফংখিদবা মওং অমদা, ভারত দিজিতেল ইকোনোমিদা মাঙজিল থাবা লৈবাক অমা ওইরক্লে। ঙসি ভারত মালেমদা অহুমশুবা খ্বাইদগী চাউবা স্তার্দ-অপকী থবকশিং লৈরে। ঙসিগী অঙাংশিংনা স্তার্দঅপশিং, য়ুনিকোর্নশিংগী মরমদা ৱারি শানরে। ঙসি ভারত্তা রেজিস্তার তৌরবা স্তার্দঅপ লাখ কয়া লৈরে অমসুং য়ুনিকোর্ন ১০০ হেন্না লৈরে। মখোয়গীদমক নহারোল মিল্লিয়ন কয়ানা অফবা থবকশিং পাংথোক্লি। হায়রিবা স্তার্দ-অপশিং অয়াম্বনা দিজিতেল ইন্দিয়াদা হকথেংননা কান্নবা পীরি। চহি ১০গী মমাঙদা ঐখোয় 2G-3G গী অৱাবা কয়া থেংনখি, হৌজিক খুঙ্গংশিংদা 5G ফংলে। খুঙ্গংশিংদা ওপ্তিকেল ফাইবর য়ৌরে।
মরুপশিং,
ঐখোয়না মপান লৈবাকশিংদগী মোবাইল ফোনশিং লৈরিঙৈ মতমদা, মখোয় মমল য়াম্না তাংবদগী মতম অদুগী নহারোল কয়া মোবাইল ফোনশিং শীজিন্নবা ঙমখিদে। ঙসি ভারত মালেমদা অনিশুবা খ্বাইদগী চাউবা মোবাইল ফোন শাবা লৈবাক ওইরে অমসুং মপান্দা থাদোকপা খ্বাইদগী চাউবা অনিশুবা লৈবাক ওইরে। মসিনা অদোমগী মোবাইল ফোন মমল হোংহল্লে। দেতা য়াওদনা ফোনগী শীজিন্নফম করিশু লৈতে হায়বা নহাক খঙলে। ভারতনা মালেমদা খ্বাইদগী মমল হোংবা দেতা ফংহন্নবা ঐখোয়না থৌশিলশিং শেম্লে।
মরুপশিং,
ঙসি লৈবাক অসিদা ই-কর্ম্মস, ই-সোপ্পিং, হোম দেলিভরি, ওনলাইন ইজুকেসন, রিমোত হেল্থকিয়ারগী ললোন-ইতিক চাউখৎলক্লি। হৌখিবা চহি ১০দা মসিগী দিজিতেলগী অওনবা অসিদা নহাক্কী অনৌবা থবকশিংনা কান্নবা খ্বাইদগী য়াম্না ফংলে। ঙসি ভারত্তা দিজিতেল কন্তেন্ত কয়া য়াম্না পাকথোক-চাউথোক্লবগে হায়বা নহাক উরে। মসিদা ভারতকী অচৌবা ইকোনোমি অমা লৈরে। হৌখিবা চহি ১০দা খুঙ্গংশিংদা কম্মন সর্বিস সেন্তর লাখ ৫ হেন্না লিংখৎলে। সেন্তরশিংদা ভারতকী নহারোল মিল্লিয়ন কয়া থবক তৌরি। দিজিতেল ইন্দিয়ানা কমদৌনা খুদোংচাবা অমসুং থবক ফংবা অনিমক হেনগৎহনবগে হায়বগী খুদমনি।
মরুপশিং,
তুংগী খূদোংচাবশিং য়েংলগা হৌজিক সরকার অমনা থৌশিলশিং শেম্লি অমসুং ৱারেপশিং লৌরি। সরকার অমনা মসিগী মরুওইবশিং নাখৈ শেংনা থম্লি। ঐখোয়গী লৈবাক্কী ঙমখৈগী শরুকশিংগী চাউখৎ-থৌরাং মীরাইবা মতম অমা লৈরমখি। করিগুম্বা ঙমখৈশিংদা লম্বীশিং শেম্লবদি, মসি য়েক্নবা নুংঙাইখিগনিহায়না মমাঙগী সরকারশিংনা হায়রমখি। ঙমখৈদা লৈবা খুঙ্গংশিং অরোইবা খুঙ্গংশিংনি হায়নখি। মসিগী ৱাখল্লোন অসি ঐখোয়গী সরকারনা হোঙদোক্লে। মমাঙগী সরকারশিংনা অরোইবা খুঙ্গংনি হায়না লৌরম্বা খুঙ্গংশিং, ঐখোয়গী সরকারনা মখোয় অহানবা খুঙ্গং ওইনা লৌরে। হায়রিবা খুঙ্গংশিং অসি শেমগৎনবা ঙসি ভাইব্রেন্ত ভিলেজ স্কিম পায়খৎলে। ঙসিগী থৌরম অসিদা হায়রিবা খুঙ্গংশিংগী সরপঞ্চ কয়া শরুক য়ারি। অদোমগী থৌনা উবদা মখোয় হরাওরি। হয়েংদগী, হায়রিবা ঙমখৈগী খুঙ্গংশিং তুরিজমগী অচৌবা মফমশিং ওইরক্লগনি। নহাক্না ভাইব্রেন্ত ভিলেজগী মরমদা হেন্না খঙবা ঐ পাম্মী।
মরুপশিং,
চাউখৎলবা ভারতনা নহাক্কী মঙলানশিং মঙফাউনহনগনি। মরম অদুনা ঙসি চাউখৎলবা ভারত অমা শেমগৎনবা লম্বী অমা শেম্বদা অদোম শরুক য়াবা হায়বসি য়াম্না মরুওই। নহাকগুম্বা নহারোলশিংগীদমক সরকারনা মাই যুব ভারত নত্ত্রগা মাইভারত লুপ শেম্লে। মসি ২১শুবা চহিচাদা ভারতকী খ্বাইদগী চাউবা নহারোলশিংগী লুপ ওইরগনি। শুপ্নগী থা অহুমদা, লুপ অসিদা নহারোল করোর ১ হেন্না মিং চল্লে। নশামক মেরা যুব ভারত সঙ্গথন্দা মিং চন্নবা ঐনা হায়জরি। মাই গোভতা চঙদুনা চাউখৎলবা ভারত অমা শেমগৎনবা নহাক্না নহাক্কী পাউতাকশিং পীবা য়াগনি। অদোম শরুক য়ারবা মতমদা নহাক্কী মঙলানশিং মঙফাওনবা ঙমগনি। অদোম চাউখৎলবা ভারতকী আর্কিতেক্নি। ঐনা অদোমদা মপুংফানা থাজবা থম্লি। ঐনা ময়াম পুম্নমক অমুক হন্না থাগৎপা ফোঙদোকচরি। নখোয়গী তুংগী য়াইফনবগীদমক ঐনা য়াইফ-পাউজেল পীজরি। ঐগা লোয়ননা হায়মিন্নসি-
ইমা ভারতনা য়াইফরে।
ইমা ভারতনা য়াইফরে।
ইমা ভারতনা য়াইফরে।
অদোম থাগৎচরি।
