জয় ভবানি, জয় ভবানি, জয় সেবলাল! জয় বিরসা!
ময়াম পুম্নমক ঐনা তরাম্না ওকচরি!
মহারাস্ত্রাগী রাজ্যপাল শ্রী রমেস বাইস জি, মহারাস্ত্রাগী চীফ মিনিস্তর শ্রী একনাথ সিন্দে জি, অমসুং মহারাস্ত্রাগী দিপুতি চীফ মিনিস্তরশিং শ্রী দেবেন্দ্র ফদনাবিস জি অমসুং শ্রী অজিৎ পৱার জি, দাইজতা ফম্লিবা অতোপ্পা শক্নাইরবা মীওইশিং, থৌরম অসি শরুক য়ারিবা লৈবাক্কী তোঙান-তোঙানবা মফমশিংগী ঐগী মশিং য়াম্লবা লৌমী ইচলশিং অমসুং ইনাওশিং, ঐনা তরাম্না ওকচরি।
মরুপশিং,
ঐনা ছত্রপতি সিবাজীগী শেংলবা লমদম অসিদা কোক নোঞ্জরি অমসুং লমদম অসিগী মপারি বাবা অম্বেদকারগী মফমদা ইকায়খূম্নবা উৎচরি। য়বতমাল-ৱাসিম তন্দর মার গোরে বঞ্জরা ভাই, ভিয়া নয়ক, দাব, কারভারি তামনুন হাত জোদান রাম রামি !
মরুপশিং,
চহি ১০গী মমাঙদা ঐ ২০১৪ দা ‘চাই পে চার্চা’গীদমক লাকপদা অদোম্না ঐঙোন্দা থৌজাল য়াম্না পীখি। লৈবাক অসিগী মীয়াম্না এন.দি.এ ৩০০ হেন্না কাহনখি। ২০১৯গী ফেব্রুৱারিদা ঐ য়বতমালদা লাকখি। মতম অদুদশু অদোম্না ঐখোয়দা থৌজাল পীখি। মতম অদুদা লৈবাক অসিদা এন.দি.এ ৩৫০ হেন্না ফংখি। ২০২৪গী মীখল মমাঙদা চাউখৎ-থৌরাংগী কুহ্মৈশিং শরুক য়ানবা ঙসি ঐ লাক্লে। হন্দক ৪০০ হেনগনি, ৪০০০ হেন্না কাগনি। মশিং য়াম্লবা ইমাশিং অমসুং ইচলশিংনা ঐখোয়দা থৌজাল পীনবা লাকপা ঐ উরে। মসি পুন্সিদা হেন্না ফবা লাইবক অমা ওইগনি। খুঙ্গং খুদিংমক্তগী শরুক য়ারিবা ইমাশিং অমসুং ইচলশিং ঐনা অখন্নবা ওইনা ইকায়খুম্নবা উৎচরি। য়বতমাল, ৱাসিম, চান্দ্রপুর য়াওনা বিদরভা শীনবা থুংনা ঐখোয়দা থৌজাল পীরে, এন.দি.আর সরকার সিত ৪০০ হেন্না কাহন্নবা ৱারেপ লৌরে।
মরুপশিং,
ছত্রপতি সিবাজী মহারাজ ঐখোয়গী ফিদম্নি হায়না খঞ্জবা ঐখোয়নি। মহাক্না লৈবাক ঙাকখিবা চহি ৩৫০ মপুংফারে। মহাক নিংথোই ওইখি অমসুং খুদিংমক ফংখি, মহাক শক্তি কয়া ফংবগী নুংঙাইবা ফংখি। অদুবু মহাক্না শক্তি অদু লৈবাক্কী য়াইফনবগীদমক শীজিন্নখি। লৈবাক্কী অপুনবা ৱাখল্লোন অমসুং মপাঙ্গলগীদমক মহাক্না মরুওইনা হোৎনখি অমসুং মসিগীদমক মহাক্কী পুন্সিগী অরোইবা তাঙ্কক ফাওবা থবক তৌখি। হৌজিক্কী সরকার অসিনা মহাক্কী ফিদমশিং ঙাক্লি অমসুং মীয়ামগী পুন্সিদা অওনবা পুরক্নবা মিসন অমদা থবক তৌরি। হৌখিবা চহি ১০দা পাংথোকখিবা থবক খুদিংমক্না মথং চহি ২৫গী য়ুম্ফম থোল্লে। মফম খুদিং বিকসিত ভারত ওইহন্নবা ঐনা ৱাশক লৌরে। ঐগী হকচাংগী শরুক খুদিংমক অমসুং ঐগী পুন্সিগী মিকুপ খুদিং মসিগী ৱাশক অসিগীদমক কৎথোক্লে। চাউখৎলবা ভারত অমা ওইহন্নবা লায়রবা, নহারোল, নুপীশিং অমসুং লৌমীশিংগী ফিবম ফগৎহনবা য়াম্না মরুওই। মরি অসিদা শক্তি পীবনা ইমুং খুদিংমক অমসুং খুন্নাই শীনবা থুংনা মপাঙ্গল কনগনি।
মরুপশিং,
ঙসি য়বতমালদা হৌদোক্লিবা প্রোজেকশিং অসি ঙসিগী প্রোজেকশিং অসি লায়রবা, নহারোল, নুপীশিং অমসুং লৌমীশিংগী ফিবম ফগৎহনবা অমসুং শক্তি পীনবা ঙাক্তনি। ঙসি মহারাস্ত্রা চাউখৎনবা লুপা করোর লিশিং কয়াগী প্রোজেকশিং উরেপ-উয়ুং তম্লে অমসুং শঙ্গারে। লৌমীশিংগী ইথৈগী খুদোংচাবশিং, লায়রগী পাক্কাগী য়ূম, খুঙ্গংগী নুপীশিংগী শেন্থং অমসুং নহারোলশিংগী তুংগীদমক ইনফ্রাস্ত্রকচর য়াওরে। রেল প্রোজেকশিং অমসুং অনৌবা ত্রেনশিংনা বিদরভা অমসুং মরাথৱারাগী মরক্তা রেলগী চৎথোক-চৎশিন হেন্না ফগৎলগনি। প্রোজেকশিং অসিগীদমক ঐনা ময়াম পুম্নমক্তা হরাওবা ফোঙদোকচরি।
মরুপশিং,
মমাঙদা লৈরম্বা কেন্দ্র সরকারশিংগী ফিবম অদোম নিংশিংলমগনি। মতম অদুদা, এগ্রিকলচর মিনিস্তর রাজ্য মহারাস্ত্রাদগী ওইখি। মতম অদুদা বিদরভাগী লৌমীশিংগী মিংদা দিল্লিদগী পেকেজ অমা লাউথোকখি অমসুং লমখাংদা শগুন তৌখি। মমাঙগী সরকারশিংগী মতমদা লৌমীশিং, ত্রাইবেলশিং অমসুং লায়রবশিংদা শেন্থং পীবদা খপহৌবগী থৌদোক লৈখি। ঐনা ঙসি বত্তম অমা হেক নম্বদা পি.এম কিষান সম্মান নিধিগী লুপা করোর ২১,০০০ হেনবগী শেনফম য়েন্থোকখ্রে। মসি মোদী কি গরেন্তিগী খুদম অমনি। ঙসি লায়রবশিং মখোয়গী ফংফম থোকপা চাকথুং ফংলে। কংগ্রেসনা পানবা মতমদা, দিল্লিদগী লুপা ১ থাবা মতমদা, খুঙ্গংদা পৈশা ১৫ য়ৌখি। করিগুম্বা কংগ্রেস সরকার অমা লৈরম্লবদি, ঙসি অদোমনা ফংলিবা লুপা করোর লিশিং ২১ অসিদগী লুপা করোর লিশিং ১৮ লম্বীদা শগুন তৌখিগনি। অদুবু হৌজিক বি.জে.পি সরকার লৈরে, লায়রবশিংগী শেন খুদিংমক ফংলে। বেনফিসরি খুদিংমক মখোয়গী হকশিং ফংবা, বেঙ্ক একাউন্তদা শিকি অমা ফাওবা চঙহনবা হায়বসি মোদীগী গরেন্তিনি।
মরুপশিং,
মহারাস্ত্রাগী লৌমীশিংগী দবল ইঞ্জিন সরকার দবল গরেন্তি লৈরে। মহারাস্ত্রা শীনবা থুংবগী লৌমী লাখ ৮৮রোমগী লুপা করোর ৩৮০০ গী শেনফম মহারাস্ত্রাগী লৌমীশিংনা তোখায়না ফংলে। পি.এম কিষান সম্মান নিধিগী মখাদা লৈবাক অসিগী লৌমী করোর ১১না লুপা করোর লাখ ৩ ফংলে। মসিগী মনুংদা মহারাস্ত্রাগী লৌমীশিংনা লুপা করোর ৩০,০০০ অমসুং য়বতমালগী লৌমীশিংনা মখোয়গী একাউন্তশিংদা লুপা করোর ৯০০ ফংলে। চুগী এফ.আর.পি কুইন্তল অমদা লুপা ৩৪০দা হেনগৎলে। মসিনা মহারাস্ত্রাগী চু থাবা লৌমী অমসুং শিন্মী করোর কয়া কান্নবা পীরগনি। নুমিৎ খরনিগী মমাঙদা, ঐখোয়গী খুঙ্গংশিংদা মহৈ-মরোং থম্নবা কৈ শানবা মালেমদা খ্বাইদগী চাউবা স্কিম অমা হৌদোক্লে। ঐখোয়গী লৌমীশিংগী কোওপরেতিপ সোসাইতিশিংনা হায়রিবা কৈশিং অসি শাগনি, মখোয়না য়েংশিনগনি। মসিদগী লায়রবা লৌমীশিং কান্নবা ফংলগনি। মখোয় নমদুনা মখোয়গী পোৎথোকশিং অতাবা মমলদা য়োল্লরোই।
মরুপশিং,
খুঙ্গংগী শেন্মিৎলোন ফগৎহনবা হায়বসি বিকসিত ভারত অমা শেম্নবা য়াম্না মরুওই। মখোয়দা শেন্থং পীদুনা খুঙ্গংদা লৈরিবা ইমুংশিংনা থেংনরিবা অৱাবশিং কোকহন্নবা সরকারনা থবক পায়ৎলে। মমাঙগী সরকারশিংগী মতমদা খুঙ্গংশিংদা ইকংগুম্বা ফিবমশিং থেংনদুনা থক্নবা নত্ত্রগা লৌ উনবা ঈশিং ফংখিদে। ২০১৪গী মমাঙদা ইমুং ১০০গী মনুংদা ইমুং ১৫ খক তোতি ঈশিং ফংখি। মীরাইবীরবা ইমুংশিং অয়াম্বা লায়রবা, দিলিতশিং অমসুং ত্রাইবেল ফুরুপশিংনি। ঈশিং তাংবদগী নুপীশিং খুদোংচাদবা কয়া মায়োক্নখি অমসুং মোদীনা ‘হর ঘর জল’গী গরেন্তি পীদুনা চহি ৪-৫গী মনুংদা ইমুং ১০০গী মনুংদা ইমুং ৭৫ তোতি ঈশিং ফংলে। মহারাস্ত্রাগী ওইনা তোতি ঈশিং ফংবা লাখ ৫০ ওইরম্বদগী হৌজিক করোর ১.২৫ য়ৌরে। মোদী কি গরেন্তি হায়বগী ৱাহন্থোক্তি থাজবশিং থবক ওইনা পাংথোকপগী গরেন্তি হায়বনি।
মরুপশিং,
ঙসি মোদীনা লৈবাক অসিগী লৌমীশিংদা অতোপ্পা গরেন্তি অমা পীরি। কংগ্রেস সরকারনা মতম কয়াগী মমাংদগী ইরিগেসন প্রোজেক ১০০ লোইশিন্দনা থম্লকখি। হৌখিবা চহি ১০দা হায়রিবা প্রোজেকশিংগী মনুংদা প্রোজেক ৬০ লোইশিনখ্রে। মহারাস্ত্রাগী ওইনা অসিগুম্বা প্রোজেক ২৬ পন্দুনা লৈরি। মখোয়গী ইমুংশিংনা ৱাবগী মরমশিং বিদরভাগী লৌমীশিংনা খঙগদবনি। হায়রিবা প্রোজেক ২৬ অসিগী মনুংদা ১২ সরকার অসিনা লোইশিল্লে অমসুং অতোপ্পা প্রোজেকশিংগীশু থবক পায়খৎলি। চহি ৫০গী মতুংদা নিলৱান্দে ধাম পরিয়োজনা লোইশিল্লে অমসুং কৃষ্ণ কোয়না অমসুং তেমভু প্রোজেকশিং অমসুং গোসিখুর্দ প্রোজেকশু চহি কয়া পন্দুনা লৈরক্লবা মতুংদা মঙাল উবা ফংলে। পি.এম কৃষি সিঞ্চাই অমসুং বালিরাজা সঞ্জিবিনি স্কিমগী মখাদা ঙসি বিদরভা অমসুং মরাথৱারাদা প্রোজেক ৫১ কৎথোক্লে। হায়রিবা প্রোজেকশিং অসিনা বিদরভাদা লম হেক্তর লিশিং ৮০ হেন্না কান্নবা পীরগনি।
মরুপশিং,
খুঙ্গংশিংদা লাখপতি দিদি কয়া শেমগৎনবা মোদীনা গরেন্তি পীরি। নুপী করোর ১গী পান্দম হান্ননা ফংখ্রে অমসুং চহি অসিগী বজেত্তা লাখপতি দিদি করোর ৩ য়ৌহন্নবা পান্দম থম্লি। হেল্ফ-হেল্প গ্রপশিংদা থবক তৌরিবা নুপী করোর ১০ হেনবদা বেঙ্কতগী লুপা করোর লাখ ৮গী শেন্থং পীখ্রে অমসুং মহারাস্ত্রাগী নুপী লাখ কয়াদা কেন্দ্র সরকারনা লুপা করোর ৪০,০০০গী অখন্নবা ফন্দ অমা পীরে। য়বতমালদা নুপীশিংদা ই-রিক্সোশিং য়েন্থোকখ্রে। থবক অসিগীদমদক মহারাস্ত্রাগী সরকার থাগৎচরি। নুপীশিং দ্রোন পাইলোতশিং ওইনা ত্রেনিং পীনবা সরকারনা নমো দ্রোন দিদি স্কিম পায়খৎলে অমসুং লৌউ-শিংউদা শীজিন্ননবা দ্রোনশিং পীরগনি।
মরুপশিং,
ঙসি য়বতমাল সহরদা পন্দিৎ দীনদয়াল উপাধ্যায়গী মীতম অমা মাইখুম হাংদোক্লে। পন্দিৎ দীনদয়াল উপাধ্যায় এন্তয়োদয়াগী ইথিল পীবা শক্তমনি। মহাক্কী পুন্সি চুপ্পা লায়রবশিংগীদমক কৎথোকখি। হৌখিবা চহি ১০দা লায়রবশিংগীদমক কৎথোক্লবা প্রোজেক কয়া পায়খৎলে। লেম্না চেঙ পীবা অমসুং লেম্না লায়য়েংবগী স্কিমশিং য়াওনা স্কিম কয়া পায়খৎলে। মহারাস্ত্রাগী ইমুং করোর ১দা অয়ুস্মান কার্দশিং পীনবা কেম্পেন অমা ঙসিগী থৌরম অসিদা হৌদোক্লে। লায়রবশিংগী য়ুম শানবা ঙসি হৌদোক্লিবা স্কিম অসিগী মখাদা ও.বি.সি ইমুং লিশিং ১০ পাক্কাগী য়ুমশিং ফংলগনি।
মরুপশিং,
কনা অমতনা য়েংশিনবীদ্রবশিং মোদীনা য়েংশিনবা খক নত্তনা মখোয়শু লাৎলি। খুৎহৈবশিং অমসুং হেন্দিক্রাফকী থবক শুরিবা মীওইশিংগীদমক লুপা করোর ১৩,০০০ গী পি.এম বিশ্বকর্মা য়োজনা পায়খৎলে অমসুং ত্রাইবেলশিংগীদমক লুপা করোর ২৩,০০০গী পি.এম জনমন য়োজনা হৌদোক্লে। মহারাস্ত্রাগী কাতকারি, কোলা অমসুং মাদিয়া য়াওনা ত্রাইবেল ফুরুপ কয়া পি.এম জনমন য়োজননা হিংবদা লাইহল্লগনি। কেম্পেন অসিনা লায়রবশিং, নহারোলশিং, লৌমীশিং অমসুং নহারোলশিংদা শক্তি পীগনি অমসুং মখা তানা নারী শক্তি মপাঙ্গল কনখৎহনগনি। মথং চহি ৫দা য়াংনা চাউখৎপা উদুনা বিদরভাগী ইমুং খুদিংমক হেন্না নুংঙাইবা পুন্সি অমা ফংলগনি।
লৌমীশিংগী ইমুংশিং অমসুং অদোম ঐনা অমুক হন্না থাগৎপা ফোঙদোকচরি। ঐগা লোয়ননা হায়মিন্নসি-
ভারত মাতা কি-জয় !
ভারত মাতা কি-জয় !
ভারত মাতা কি-জয় !
অদোম থাগৎচরি !
