নোংচুপ বেঙ্গলগী রাজ্যপাল দোক্তর সি ভি অনন্দ বোস জি অমসুং মন্ত্রীমন্দলদা ঐগী মরুপ শ্রী সান্তনু থাকুর জি, বেঙ্গল এশেমব্লিগী ওপোজিসনগী লুচিংবা সুবেন্দু অধিকারি জি, সংসদকী ঐগী মরুপ জগন্নাথ সরকার জি, রাজ্য সরকারগী মিনিস্তরশিং, অতোপ্পা শক্নাইরবশিং, ইবেম্মাশিং অমসুং ইবুংঙোশিং !
ঙসিগী থৌরম অসি নোংচুপ বেঙ্গল বিকসিত রাজ্য অমা ওইনা মাইকৈদা থাংজিনবা অতোপ্পা খোঙথাং অমনি। ঙরাং ঐনা অরামবাগতা লুপা করোর ৭,০০০ হেনবগী রেলৱে, হিথাংফম অমসুং পেত্রোলিয়ম সেক্তরশিংগী তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে। নোংচুপ বেঙ্গলগী মীয়াম হিংবদা লাইহন্নবা মৈ, লম্বী অমসুং রেলৱে সেক্তরশিংগী লুপা করোর ১৫,০০০ রোমগী তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকপা অমসুং উরেপ-উয়ুং তম্বগী খুদোংচাবা ফংবা অসি ঐ লাইবক ফবনি। হায়রিবা প্রোজেকশিং অসিনা নোংচুপ বেঙ্গলগী চাউখৎপা য়াংখৎকনি অমসুং নহারোলশিংদা থবক ফংনবগী খুদোংচাবশিং পীরগনি। চাউখৎ-থৌরাংগী প্রোজেকশিং অসিগীদমক রাজ্য অসিগী মীয়ামদা ঐনা নুংঙাইবা ফোঙদোকচরি।
মরুপশিং,
হৌজিক্কী মতম অসিদা, চাউখৎ-থৌরাংগী থবকশিংদা মৈ য়াম্না মরুওইরি। মৈ মরাং কাইনা ফংদনা রাজ্য অমা নত্ত্রগা লৈবাক অমা চাউখৎপা ঙম্লোই। মরম অদুনা নোংচুপ বেঙ্গলগী হৌজিক্কী অমসুং তুংগী দরকার ওইবা মৈ মশাগী ওক্নবা পুথোকচনবা ঐখোয়গী সরকারনা থবক পায়খৎলে। দামোদর ভেল্লি কোর্পোরেসনগী কোয়লাগী থর্মেল পৱার প্রোজেক পুরুলিয়াগী রঘুনাথপুরদা লৈবা রঘুনাথপুর থর্মেল সুপর পৱার স্তেস ফেজ-২ (মেগাৱাত ২X৬৬০) না রাজ্য অসিদা লুপা করোর ১১,০০০ হেন্না থাদরক্লগনি। মসিনা রাজ্য অসিগী দরকার ওইবা মৈ ফংহল্লগনি অমসুং লমদম অসিগী শেন-থুম চাউখৎপা হেনগৎহল্লগনি। লুপা করোর ৬৫০ রোম চঙনা শেমগৎপা মেজিয়া থর্মেল পৱার স্তেসনগী য়ুনিত ৭ অমসুং ৮কী ফ্লু গ্যাস দিসলফুরাইজেসন(এফ জি দি) সিস্তেম অসিনা মহৌশাগী অকোয়বগী ফিবম লুম্না লৌবগী খুদম অমনি। মসিনা লমদম অসিদা পোল্লুসন হন্থহনবদা মতেং পাংগনি অমসুং মহৌশাগী অকোয়বগী ফিবম ঙাক্নবা ভারতনা পীরবা থাজবশিং থবক ওইনা পাংথোকপা ঙমগনি।
মরুপশিং,
নোংচুপ বেঙ্গলনা লৈবাক অসিগী অমসুং নোংপোক থংবা রাজ্য কয়াগী নোংপোক থোং ওইরে অমসুং নোংপোক্কী ওইনা মফম অসিদা খুদোংচাবা কয়া লৈরে। মরম অদুনা লম্বীশিং, রেলৱেশিং, এয়রৱেশিং অমসুং ঈশিং লম্বীশিং মতমগা চুনবা মওংদা শেমগৎনবা সরকারনা থবক পায়খৎলি। লুপা করোর ২০০০ চঙনা পায়খৎখিবা এন.ঐচ-১২গী ফারাক্কা-রাইগঞ্জ সেক্সন লেন মরি ওনখৎপগী প্রোজেক(কিমি ১০০) ঙসি ঐনা শঙ্গারে অমসুং মসিনা চৎপদা চঙবা মতম তঙ্খায় হন্থরগনি। মসিনা অনকপ সহরশিংদা মী চিনবা হন্থরগনি অমসুং লৌমীশিংদা মতেং পাংবগা লোয়ননা মফম অসিগী শেন-থুম তানবগী থবকশিং হেনগৎলগনি।
মরুপশিং,
নোংচুপ বেঙ্গলগী ফজরবা পুৱারিদা রেলৱে শরুক অমা ওইরি অমসুং মমাঙগী সরকারশিংনা রাজ্য অসিগী হেরিতেচ অমসুং খুদোংচাবশিং চুম্না পুখৎখিদে। হৌখিবা চহি ১০দা নোংচুপ বেঙ্গলদা রেলৱে ইনফ্রাস্ত্রকচর চাউখৎনবা সরকারনা থবক কয়া পায়খৎলে অমসুং হান্নদগী হেন্না শেন শরুক অনি থাদরে। ঙসি রেলৱে প্রোজেক মরি মীয়ামদা কৎথোকপা অসিনা রাজ্য অসি মতমগা চুননা চাউখৎহনবদা মতেং পাংলগনি অমসুং বিকসিত বেঙ্গলগী ৱাশকশিং থবক ওইনা পাংথোক্লগনি। মীয়ামদা অমুক হন্না য়াইফ-পাউজেল পীজরি। প্রোজেকশিং অসিগীদমক অমুক হন্না অদোমগী মফমদা নুংঙাইবা ফোঙদোকচরি।
অদোম থাগৎচরি!
