কেন্দ্রগী মন্ত্রী-মন্দলগী মরুপ পুম্নমক, তোঙান-তোঙানবা রাজ্যশিংগী ইকাই খুম্নরবা মুখ্য মন্ত্রী, পাৱর অমসুং ইনর্জী সেক্তরগা মরী লৈনবা অতোপ্পা দিগ্নিতরীশিং, নুপী অমদুং নুপাশিং,
ঙসিগী থৌরম অসি ২১শুবা চহিচাগী অনৌবা ভারতকী অনৌবা পান্দমশিং অমসুং অনৌবা মাইপাকপশিংগী খুদম অমনি। আজাদী কা অমৃত মহোৎসব অসিদা ভারতনা মথংগী চহি ২৫গী বিজনদা থবক পাইখৎপা হৌখি। মথংগী চহি ২৫দা ভারতকী চাউখৎ খোঙচৎ খোঙজেল য়াংশিনহনবদা ইনর্জী সেক্তর, পাৱর সেক্তরনা অচৌবা থৌদাং অমা লৌখি। ইনর্জী সেক্তরগী পাঙ্গল অসিসু ললোন-ইতিক তৌবদা লাইথোকহনবা অমসুং হিংবদা লাইথোকহনবগা চপ মান্ননা মরু ওই। ঐহাক্না হৌজিক্তা ৱারী শাখিবা বেনিফিসরী মরুপশিংগী পুন্সিশিংদা ইলেক্ত্রিসিতীনা অহোংবা কয়াম পুরকপা ঙম্বগে হায়বা ঐখোয় পুম্নমক্না উবা ফংখ্রে।
মরুপশিং,
ঙসি লুপা করোর কয়াগী প্রোজেক্তশিং হৌদোকখি অমসুং উরেপ-উয়ুং তমখি অসি ভারতকী ইনর্জী সেক্যুরিতী অমসুং গ্রীন ফ্যুচরগী মাইকৈদা থাংজিনবা মরু ওইবা খোঙথাং অমা ওইরি। প্রোজেক্তশিং অসিনা প্রোজেক্তশিংনা ঐখোয়গী রিনুএবল ইনর্জীগী পান্দমশিং, গ্রীন তেক্নোলোজীগীদমক ঐখোয়না খোঙফম চেৎনা লেপ্পিবা অমসুং গ্রীন মোবিলিতীগী ঐখোয়গী অনীংবা-অপাম্বশিং অসি নৌহৌনা মপাঙ্গল হাপ্লগনি। প্রোজেক্তশিং অসিনা লৈবাক অসিদা গ্রীন জোব মশিং য়াম্না পীবসু ঙম্লগনি। প্রোজেক্তশিং অসি তেলঙ্গানা, কেরলা, রাজস্থান, গুজরাত অমসুং লদাখকা মরী লৈনরবসি মসিনা লৈবাক পুম্বদা মখোয়গী কান্নবা অসি শোইদনা য়ৌহনগনি।
মরুপশিং,
লৈবাক অসিদা হাইদ্রোজেন গ্যাসনা চল্লাইবা গারীশিং চেলহনবদগী লৈবাক অসিগী চাকশঙ ফাওবদা মসি শীজিন্নহন্নবা হৌখিবা চহি কয়া অসিদা কয়া অমা খন্ন-নৈনখি। ঙসি ভারতনা মাইকৈ অসিদা অচৌবা খোঙথাং অমা লৌরি। ঙসিদগী গ্রীন হাইদ্রোজেনগী অচৌবা প্রোজেক্ত অনি লদাখ অমসুং গুজরাত্তা হৌরি। লদাখতা শেমগৎলিবা প্লান্ত অসিনা লৈবাক অসিগী গারীশিংগী গ্রীন হাইদ্রোজেন পুথোক্কনি। মসি গ্রীন হাইদ্রোজেন বেজ ত্রান্সপোর্ত অসি কম্মর্সিএলগীদমক শীজিন্নবা ঙমহনগদবা লৈবাক অসিগী অহানবা প্রোজেক্ত ওইরগনি। হায়বদি লদাখনা লৈবাক অসিগী ওইনা ফ্যুএল সেল ইলেক্ত্রিক ভেহিকল অথুবদা চেনবা হৌবা অহানবা মফম ওইরগনি। মসিনা লদাখপু কার্বোন ন্যুত্রেল জোন ওইহনবদসু মতেং ওইরগনি।
মরুপশিং,
অহানবা ওইনা লৈবাক অসিদা পাইপ নেচরেল গ্যাসতা গ্রীন হাইদ্রোজেন ব্লেন্দিং তৌনবা প্রোজেক্তসু গুজরাত্তা হৌখ্রে। হৌজিক ফাওবদা পেত্রোল অমসুং এভিএসন ফুএলদা ইথানোল য়ানবগী থৌওংগী মতুংদা, লৈবাক অসিনা হৌজিক পাইপ নেচরেল গ্যাস পাইপলাইনশিংদা গ্রীন হাইদ্রোজেন য়ানবগী মাইকৈদা চঙশিল্লি। মসিনা মীরমদগী নেচরেল গ্যাসকী পুশিল্লকপগী থৌওং হন্থহনগনি অমসুং মপালদা চৎলিবা শেল অসি লৈবাক্কীদমক শীজিন্নবা য়ারগনি।
মরুপশিং,
চহি ৮গী মমাংদা লৈবাক্কী পাৱর সেক্তরগী ফীভম অসি করম তৌরম্বগে, মসি থৌরম অসিদা লেংশিল্লিবা মীওইশিংনা খঙলবা ৱাফমনি। ঐখোয়গী লৈবাক্তা গ্রীদকী খুদোংচাদবা মায়োক্নখি, গ্রীদ শীজিন্নবা য়ারমখিদে, পাৱর পুথোকপা হন্থরকখি, কত হেনগৎলকখি, দিস্ত্রিব্যুসন্দা খুদোংচাদবা মায়োক্নখি। অসিগুম্বা ফীভম অমদা, চহি ৮গী মমাংদা ঐখোয়না লৈবাক অসিগী পাৱর সেক্তরগী শরুক খুদিংমক্তা অহোংবা পুরক্নবা থৌশিল পাইখৎখি।
পাৱর সিস্তেম ফগৎহন্নবা ঐখোয়না তোঙান-তোঙানবা মাইকৈ মরিদা পুন্না থবক পাইখৎখি – জেনরেসন, ত্রান্সমিসন, দিস্ত্রিব্যুসন অমসুং মরু ওইবা কন্নেক্সন। জেনরেসন লৈত্রবদি, ত্রান্সমিসন-দিস্ত্রিব্যুসন সিস্তেম অসি মপাঙ্গল কল্লোই, অদু ওইরবদি কন্নেক্সন পীবদা কান্নবা অমত্তা ফংলোই। মরম অসিনা মেক্সিমম পাৱর পুথোক্নবগীদমক, লৈবাক শিনবা থুংবদা ইলেক্ত্রিসিতী দিস্ত্রিব্যুসন নীংথিনা ফংহন্নবা, ত্রান্সমিসনগা শম্নবা অরিবা নেৎৱার্ক মতমগা চুনবা ওইহন্নবগীদমক, লৈবাক্কী য়ুমথোং করোর কয়াদা ইলেক্ত্রিসিতী কন্নেক্সনশিং ফংহন্নবা ঐখোয়না কন্না হোৎনখি।
খোঙথাংশিং অসিগী ফল ওইনা ঙসি লৈবাক্কী য়ুম খুদিংমক্তা মৈ ফংহনবা খক নত্তনা মৈ ফংবগী পুংসু হেনগৎহনখি। হৌখিবা চহি ৮ অসিদা লৈবাক অসিদা ইলেক্ত্রিক পুথোকপা ঙম্বগী মতিক চাউরাকপা এম.দবল্যু. ১,৭০,০০০ হেনগৎহনখ্রে। ৱান নেসন ৱান পাৱর গ্রীদনা ঙসিদি লৈবাক্কী পাঙ্গল ওইরে। লৈবাক শিনবা থুংববু শম্নহন্নবগীদমক্তা ত্রান্সমিসন লাইনগী চাউরাকপা সর্কিত কিমি. ১,৭০,০০০ তিংখি। সৌভাগ্য স্কিমগী মখাদা কন্নেক্সন করোর ৩ হেন্না পীদুনা, ঐখোয়না সেচ্যুরেসনগী পান্দম য়ৌবা ঙম্লি।
মরুপশিং,
পাৱর সেক্তর অসি ইফিসিএন্ত, ইফেক্তিব ওইহন্নবা অমসুং মীচম প্রজাদা ইলেক্ত্রিসিতী এক্সেসিবল ওইহন্নবা চহি খরা অসিদা তঙাই ফদবা রিফোর্মশিং লেপ্পা লৈতনা পাইখৎখি। ঙসি হৌদোকখিবা অনৌবা পাৱর রিফোর্ম স্কিম অসি মাইকৈ অসিদা থাংজিনবা অতোপ্পা খোঙথাং অমনি। মসিগী মখাদা স্মার্ত মীতিংগুম্বা থৌশিলশিং পাৱর লোস হন্থহন্নবা পাইখি, মসিন ইফিসিএন্সী হেনগৎহল্লগনি। মৈ চাবগী ৱাকৎ লোইশিনবা ঙমহল্লগনি। লৈবাক শিনবা থুংবদা লৈবা দিস্কোমশিংদা মথৌ তাবা শেলগী তাংবাং পীদুনা মখোয়না মোদর্ন ইনফ্রাস্ত্রকচর শেমগৎপা ঙমহনখি অমসুং শেল-থুমদা মখোয়বু মপাঙ্গল কনখৎহন্নবগী মথৌ তাবা রিফোর্মশিং পাইখৎপা ঙমহনখি। মসিদা দিস্কোমশিংগী পাৱর হেনগৎলক্কনি অমসুং মীয়াম্না পাৱর মরাং কাইনা ফংবা ঙম্লগনি অমসুং ঐখোয়গী পাৱর সেক্তর হেন্না মপাঙ্গল কনখৎহনবা ঙম্লগনি।
মরুপশিং,
ইনর্জী সেক্যুরিতী মপাঙ্গল কনখৎহন্নবা ভারতনা ঙসি রিন্যুএবল ইনর্জীদা মীৎয়েং থম্লিবা মওং অসি মমাংদা অমুক্তা তৌখিদ্রি। ঐখোয়না নীংতম্বগী চহি ৭৫ মপুং ফারবা তুংদা জি.দবল্যু. ১৭৫গী রিনুএবল ইনর্জী কেপাসিতী হেনগৎহন্নবা ঐখোয়না ৱারেপ লৌখি। ঙসিদি, ঐখোয়না পান্দম অসিগী মাইকৈদা য়াম্না নকশিল্লে। নন-ফোসিল সোর্সতগী চাউরাকপা জি.দবল্যু. ১৭০ ঐখোয়না হৌজিক ফাওবদা ইন্সতোল তৌখ্রে। ঙসিদি, ভারতনা ইন্সতোল কেপাসিতীগী হীরমদা মালেমগী মকোক থোংবা লৈবাক ৪-৫গী মনুং চল্লে। মালেমগী খ্বাইদগী চাউবা সোলার পাৱর প্লান্ত কয়া অমা ঙসি ভারত্তা লৈরে। লৈবাক অসিনা ঙসিসু, অচৌবা সোলার পাৱর প্লান্ত অনি ফংখ্রে। তেলঙ্গানা অমসুং কেরলাদা লৈরিবা প্লান্তশিং অসিদি লৈবাক্কী ওইনা খ্বাইদগী অহানবা অমসুং অনিশুবা তাওদুনা লৈবা সোলার পাৱর প্লান্তনি। মখোয়দা গ্রীন ইনর্জী অসি ফংহনবা খক নত্তনা নুমিৎকী মৈশানা মরম ওইদুনা ঈশিং অসি মনিল ওলহনবদা শীজিন্নগনি। ঙসি রাজস্থান্দা এম.দবল্যু. লিশিং অমগী সিঙ্গল লোকেএসন সোলর পাৱর প্লান্ত শানবা থবক পাইখৎপসু হৌখ্রে। প্রোজেক্তশিং অসিনা ইনর্জীগী লমদা ভারতনা আত্মনির্ভর ওইহন্নবা খুদমসু ওইরগনি।
মরুপশিং,
মথৌ তাবা ইনর্জী থুংহন্নবগীদমক ভারতনা অচৌবা সোলর প্লান্তশিং শেমগৎপগা লোয়ননা য়ুমশিংদা সোলর পেনেলশিং হেন্না ইন্সতোল তৌহনবদা মীৎয়েং চংলি। মীয়াম্না লায়না রুফতোপ সোলর প্রোজেক্ত ইন্সতোল তৌনবা ঙসি নেস্নেল পোর্তেল অমসু হৌদোকখি। মসিনা য়ুমদা মৈ পুথোকপদা মতেং পাংগনি অমসুং মৈ পুথোকপদগী শেল লাকহনবসু ঙম্লগনি।
মৈ পুথোকপা হেনগৎহনবগা লোয়ননা সরকারনা মৈ মাংহনদবা হোৎনবদসু মীৎয়েং থম্লি। মৈ মাংহনদবা হায়বা অসি তুংগীদমক তুংশিনবনি, মৈ মাংহনদবা হায়বা অসি তুংগীদমক তুংশিনবনি হায়বা অসি নীংশিংউ। মসিগী খুদম পি.এম. কুসুম য়োজনানি। ঐখোয়না লৌমীশিংদা সোলর পম্পগী ফেসিলিতী পীরি, লৌবুকশিংগী নাকলদা সোলর পেনেলশিং ইন্সতোল তৌবদা মতেং পাংলি। অমসুং মসিনা মরম ওইদুনা চীঞ্জাক পুথোক্লিবশিংনা ইনর্জীসু পুথোক্লি, লৌমীগী চাদিংসু হন্থহনবা ঙম্লে অমসুং মহাক্না অহেনবা শেলসু ফংবা ঙম্লে। উজালা য়োজনানা লৈবাক অসিগী মীচম প্রজাগী মৈগী বিল হন্থহনবদা অচৌবা থৌদাং অমসু লৌখি। য়ুমশিংদা এল.ই.দি. বল্বশিং থানবনা মরম ওইদুনা চহি খুদিংগী লায়রবা অমসুং মিদল ক্লাসকী মৈগী বিলদা লুপা করোর লিশিং ৫০ হেন্না তুংশিনবা ঙমহনখি।
মরুপশিং,
থৌরম অসিদা রাজ্য কয়াগী ইকাই খুম্নরবা মুখ্য মন্ত্রীশিং অমসুং অতোপ্পা মীহুৎশিং য়াওখি। থৌরম অসিদা য়াম্না অরুবা ৱাফম অমা ঐহাক্না নখোয়দা হায়জনীংই। অমসুং ৱাফম অসি য়াম্না মরু ওইবনা ভারতকী প্রধান মন্ত্রীনা ওগস্ত ১৫দা লাল কিলাদা মহাক্কী ৱারোল পীবদা ফোঙদোকখি। মতম হৌখিবগা লোয়ননা ঐখোয়গী রাজনিতীদা অচৌবা খুদোংথিবা অমা থোকখি। রাজনিতীদা মীয়ামদা অচুম্বা ৱাফম ফোঙদোকপা ঙম্বগী থৌনা লৈবা তাই অদুবু রাজ্য খরদদি মসি ঙাকথোক্নবা হোৎনৈ। লালোং অসি অফবা রাজনিতী মানবা য়াই। অদুবু মসি ঙসিগী অচুম্বা, ঙসিগী শীংনবা অদু লোৎশিন্নবা, অমদি হয়েংগী, ঐখোয়গী অঙাংশিংগী, ঐখোয়গী তুংগী মীরোলশিংগীদমক মখোয়গী তুংলমচৎ থুংগাইবা থৌরাংনি। ঙসিগী লৈরিবা সমস্যা অসি কোকহন্নবা ৱারোইশিন পীবগী মহুৎ, অতোপ্পা মীনা কোকহনজগনি, অতোপ্পা মীওইনা তৌজগনি, ঐহাক্কী ওইনদি চহি ৫ নত্ত্রগা ১০ খক্তনি, মসিগী ৱাখল্লোন অসিনা লৈবাক অসিগী অফবা পুরক্লোই। ৱাখল্লোন অসিনা মরম ওইদুনা লৈবাক অসিগী রাজ্য কয়াদা লৈরিবা পাৱর সেক্তরদা অচৌবা খুদোংচাদবা মায়োক্নহনখি। অমসুং রাজ্য অমগী পাৱর সেক্তর অসি মপাঙ্গল শোনহনবা তারবদি মসিনা লৈবাক পুম্বগী পাৱর সেক্তরদা শোকহনগনি অমসুং রাজ্য অদুগী তুংলমচৎ অদু অমম্বা মাইকৈদা পুখিগনি।
ঐখোয়গী দিস্ত্রিব্যুসন সেক্তরদা মাংলিবশিং অসি দিজিত অনিগী মশিং য়ৌরে। মশিং অসি চাউখৎপা লৈবাকশিংদা শুপ্নগী দিজিত অমদা লৈ। মসিনা হায়বদি, ঐখোয়না মৈ য়াম্না মাংহল্লে অমসুং মীয়ামগী অপাম্বা থেংনবা ঙম্নবা হৌজিক পুথোক্লিবা চাংদগী হেন্না পুথোকপগী মথৌ তাই হায়বনি।
লাক্লিবা ৱাহং অসি হৌজিক, দিস্ত্রিব্যুসন অমসুং ত্রান্সমিসন মনুংদা মাংবশিং হন্থহন্নবা রাজ্যশিংনা মথৌ তাবা ইনভেস্তমন্ত করিগীদমক তৌদ্রিবনো? মসিগী পাউখুমদি পাৱর কম্পনী অয়াম্বদা ফন্দশিংগী অৱাৎপা চাউনা লৈ। সরকারগী কম্পনীশিংদসু সমস্যা অসি চপ মান্নৈ। অসিগুম্বা ফীভদা অরিবা ত্রান্সমিসন লাইনশিং অসি চহি কয়া শীজিন্নখি, অমাংবা হেনগৎকো অমসুং মীয়াম্না মৈ তাংনা ফংলি। স্তেতিস্তিক্সনা পাৱর কম্পনীশিং অসিনা মৈ মরাং কাইনা পুথোকখি অদুবু মথৌ তাবা ফন্দশিংদা লৈতে হায়না উৎখি। অমসুং অয়াম্বা কম্পনীশিং অসি সরকারগীনি। নখোয়না অশেংবা অদু খঙলি। দিস্ত্রিব্যুসন কম্পনীশিংনা মতম চানা শেল ফংবা হায়বা অসি য়াম্না তাংনা থোকই। মখোয়গী রাজ্য সরকারশিংদা শেন্দোন অমসুং এরিয়র চাউনা লৈ। তোঙানবা রাজ্য কয়ানা লুপা করোর লাখ ১ ফাওবগী শেল তোল্লি তাবদা মীয়াম্না অঙকপা ফাওগনি। মখোয়না শেনফমশিং অসি মৈ পুথোক্লিবা কম্পেনীশিংদা পীথোকফম থোকপনি। সরকারগী তোঙানবা বিভাগ, লোকেল বোদীশিংনা পাৱর দিস্ত্রিব্যুসন কম্পেনীশিংদা লুপা করোর ৬০,০০০ হেন্না তোন্দুনা হৌজিক লৈরি। তোঙানবা রাজ্যশিংদা মতম চানা অমসুং মপুং ফানা সবসিদী পানবগীদমক্তা শিজিন্নগদবা শেনফম ফাওবা কম্পেনীশিং অসিনা ফংবা ঙমদনা লোইরি। মসিদসু চাউরাক্না লুপা করোর ৭৫,০০০ হেনবগী শেনফম থোকই। মৈ পুথোকপদগী হৌরগা য়ুম্থোং খুদিংদা দেলিভরী তৌরিবা মীওইশিংগী ওইনসু লুপা করোর লাখ ২.৫ মুক পন্দুনা লৈরি। অসিগুমজ্বা ফীভম অসিদা ইনফ্রাস্ত্রকচরদা, তুংগী মথৌ তাবদা করম্বদা ইনভেস্তমেন্ত তৌগনি? ঐখোয়না লৈবাক অসিগী তুংগী মীরোলশিংবু অমম্বা মরক্তা থম্নবা শিল্লিবরা?
মরুপশিং,
শেনফমশিং অসি সরকারগী কম্পনীশিংগীনি, খরা অমনা প্রাইবেৎ কম্পনীশিংনি, মখোয়না শেল অসি ফংদ্রবদি কম্পনীশিংনা চাউখৎপা ঙম্লোই, মৈগী অনৌবা জেনরেসন তৌবা ঙম্লোই অমদি মখোয়গী মথৌ তাবশিং থুংহনবা ঙম্লোই। মরম অসিনা ঐখোয়না ফীভম অসি খঙবা তাই অমসুং করিগুম্বা পাৱর প্লান্ত শেমগৎপা তারবদি চহি মঙা-তরুক্কী মতুংদা মৈ পুথোকপা ঙমগনি। ফেক্তরী অমা লিংখৎপদা চহি ৫-৬ চংই। মরম অসিনা ইরৈবাকচাশিংদা খুৎ লোন্নদুনা হায়জরি, লৈবাক অসিগী অফবা তুংলমচৎকীদমক থৌনিজরি, লৈবাক অসি অমম্বা মরক্তা পুখিদনবা ঐখোয়গী লৈবাক অসিবু ৱাখল তাহনবা মথৌ তাই। অমসুং মরম অসিনা ঐহাক্না হায়রিবা অসি রাজনিতীগী ৱাহং নত্তে অদুবু মসি নেস্নেল পোলিসী অমসুং লৈবাক শেমগৎপগী ৱাহং অমনি, মসি ইলেক্ত্রিসিতীনা শম্নহল্লিবা অপুনবা সিস্তেমগী সেক্যুরিতীগী ৱাহংনি। শেন্দোন তোল্লিবা রাজ্যশিংদা ঐহাক্না শেনফমশিং অথুবা মতমদা পীথোক্নবা হায়জরি। লৈবাক মীয়াম্না মশাগী মৈগী বিলবু চাং নাইনা পুকচেল শেংনা পীদুনা লাক্লি, অদুগা রাজ্যশিংনা এরিয়র হঞ্জিন হঞ্জিন্না ফংগদৌরিবা করিগীনো হায়না হংবা য়াবনি। হৌজিক্কী ওইনা মথৌ তারিবা অসি লৈবাক অসিগী রাজ্য পুম্নমক্না থেংনরিবা শীংনবশিং অসিগী মতিক চাবা ৱারোইশিন অমা পুরকপনি।
মরুপশিং,
লৈবাক অসি খোঙজেল য়াংনা চাউখৎহন্নবা পাৱর অমসুং ইনর্জী সেক্তরগী ইনফ্রাস্ত্রকচর মপাঙ্গল কনখৎহনবা, মোদর্ন ওইহনবা য়াম্না মরু ওই। করিগুম্বা সেক্তর অসি হৌখিবা চহি নিপান অসিদা মীয়ামনা পুন্না হোৎনদুনা ফগৎহল্লমদবা তারবদি করি ওইরমগনি মীয়াম্না খঙবা ঙমগনি, ঙসি অৱাবা কয়ামরুম থেংনখি। তোইনা মৈ মুৎলমখি, সহর নত্ত্রগা খুঙ্গংশিংদা পুং খরা খক্তমক মৈ লাক্লমখি, লৌমীশিংনা লৌবুক্তা ঈশিং চীংনবা ঙাইখি, ফেক্তরীশিং লেপখি। ঙসি লৈবাক অসিগী প্রজাশিংনা ফেসিলিতীশিং পাম্মি, খুদম ওইনা মোবাইল চার্জ তৌবা অসি মহাক্কী চাক, ফী অমসুং য়ুমগুম্না তঙাই ফদবা ওইরি। মমাংগুম্না মৈগী ফীভম অসি ওইরম্বা তারবদি করিগুম্বা অমত্তা ওইথোক্লমলোই। মর অসিনা পাৱর সেক্তরগী মপাঙ্গল কনখৎহনবা অসি মীপুম খুদিংমক্কী ফিরেপ ওইগদবনি, মীপুম খুদিংমক্কী থৌদাং ওইদগবনি, মীপুম খুদিংমক্কী মথৌ ওইগদবনি। ঐখোয়না নীংশিংবা তাই, ঐখোয়না থৌদাং অসি থুংহনবা তাই, মদুতদা ঐখোয়গী ফিরেপশিং অসি মাংফাওনবা ঙমগনি।
ঐহাক্না করিগুম্বা খুঙ্গংগী মীওইশিংগা ৱারী শাবা তারবদি ঐহাক্না হায়জনীংই মদুদি মীপুম খুদিংমক্কী য়ুমদা, ঘী, থাও, আতা, চেক, মরু-মরাই, মনা-মশিং পুম্নমক লৈরবসি স্তোব থাগৎনবা পাম্বৈ লৈত্রবদি নখোয়গী য়ুম অদু চারা হেনগদ্রা নত্ত্রগা হেল্লোইদ্রা? কার অদু ইনর্জী য়াওদনা চেনগদ্রা? য়ুমদা মৈ লৈত্রবদি স্তোব অদু য়াগদ্রা, চারা হেল্লোইদ্রা; করিগুম্বা লৈবাক অসিদা মৈ লৈতবা তারবদি পুম্নমক লেপকনি।
অমসুং মরম অসিনা ঙসি ঐহাক্না ইরৈবাকচাশিংনা য়াম্না অরুবা ৱাফম অমা হায়জগে অমসুং রাজ্য সরকারশিংদসু হায়জরি মদুদি ঐখোয়না রাজনিতীগী লম্বীদগী থোরক্তুনা নেস্নেল পোলিসীগী মাইকৈদা চংশিনসি। ঐখোয়না অমত্তা ওইনা ঙসিদগী লৈবাক অসিগী তুংলমচৎ মঙাল লৈনবা হোৎনরসি। মরম থবক অসি পাঙথোকপদা চহি কয়া চংগনি।
মরুপশিং,
ঐহাক্না ইনর্জীগী মীপুম খুদিংমক্তা অচৌবা থৌরম অসিগীদমক থাগৎপা ফোঙদোকচরি। লৈবাক্কী কাচিন কোয়া শিনবা থুংবদা মৈগী মরমদা অচীবা এৱের্নেস পীনবা হোৎনখিবা অসি থাগৎনীংঙাই ওই। অমুক হন্না অনৌবা প্রোজেক্তশিং অসিগীদমক নুংঙাইবা ফোঙদোকচরি, পাৱর সেক্তরগা মরী লৈনবা স্তেকহোল্দর পুম্নমক্তা, মখোয়গী তুংলমচৎকীদমক ঐহাক্না য়াইফ-মঙ্গোল পীজরি।
হন্না-হন্না থাগৎচরি!
