থৌরমসিদা তিনবিরিবা ঐগী মরুপ শ্রী জি. কিসন রেদ্দী জী, অর্জুনরাম মেঘৱাল জী, মীনাক্সী লেখী জী, দাইনা কেলোগ জী, মালেমগী তোঙান তোঙানবা লৈবাক্তগী লেঙবিরক্লিবা মীথুংশিং, আর্তকী লমদা মীয়াম্না শকখঙনরবা মরুপশিং, ইবেম্মা অমদি ইবুংঙোশিং !
রেদ ফোর্ত অসি মশানা পুৱারী ওইরবা মফম অমনি। মসি শুপ্নতগী মোনুমেন্ত অমখক নত্তে, মসি পুৱারী অমনি। নীংতমদ্রিঙৈগী মমাঙদা অমদি নীংতম্লবা মতুংদা মীরোল কয়া হৌখ্রে, অদুবু রোদ ফোর্তনা লেঙদনা ঙান্থোইদুনা লৈরি। মালেমগী হেরিতেজ সাইত ওইরিবা রেদ ফোর্ত অসিদা ময়াম পুম্নমকপু তরাম্না ওকচরি।
মরূপশিং,
মালেমগী মফমদা মাগী হৌখ্রবা পুৱারী অমদি ভেল্যুশিংগী মরমদা শক্তাকপা লৈবাক খুদিংগী মশাগী ওইবা খুদম চাংদমশিং লৈজৈ। হায়রিবা খুদম চাংদমশিং অসি শেম্লিবসিনা লৈবাক অমগী আর্ত, কলচর অমদি আর্কিতেকচরননি। ভারতকী কোনুং দিল্লী অসি ভারতকী আর্কিতেকচরগী ফজরবা শক্তমশিংগী মশক অমা উৎলিবা অদুগুম্লবা খুদম চাংদমশিংগী মফম অমনি। মরম অদুনা দিল্লীদা পাঙথোক্লিবা ইন্দিয়া আর্ত, আর্কিতেকচর এন্দ দিজাইন বিএনেল অসি হীরম কয়াদা অখন্নবা থৌরম অমা ওইরি। মফমসিদা শেম্লিবা পেবিলিয়নশিংসিদা ঐ য়েংলম্বনি, অদুগা ঐনা মফমসিদা থেঙনা য়ৌরকপগীদমক ময়ামগী মফমদা ঙাকপিনবা হায়জরি। ঐনা থেঙনা য়ৌরকপগী মরমসু মফমসিদা লৈরিবা পোৎশক খুদিংমক য়েংলমদনা কান্থোক্লগা চৎখিবা ঙম্লোইদবা ঙাক্তনি, অদু ওইদুনসু ঐ থেঙনা য়ৌরকপনা মরম ওইরগা মফম ২-৩দি কান্থোক্লম্লে। পেবিলিয়নশিং অসি মচু মমেন অমদি ফজবা ৱাখল্লোনগী মমি তারি। মসিনা নাৎ অমদি খুন্নাইবু শম্নহল্লি। ঐনা কলচর মন্ত্রালয় অমদি মাগী থৌমীশিংবু, শরুক য়াবিরিবা লৈবাক পুম্নমকপু, অমদি মায় পাক্না হৌদোকপগী থৌরমসিদা শরুক য়াবিরিবা ময়াম পুম্নমক্কী মফমদা নুংঙাইবা ফোঙদোকচরি। ঐখোয়গীসিদা হায়নবা ৱাফম অমা লৈ মদুদি লাইরিক হায়বসি মালেম অসিবু য়েংনবগী অপীকপা থোঙনাও অমগী হৌরকফম্নি হায়না। অদুগা ঐনা খল্লি আর্ত হায়বসিনা মীওইবগী পুক্নিং ইহুল মনুংদা কোয়না চৎননবগী হায়ৱেনি হায়না।
মরূপশিং,
ভারত চহি লিশিং কয়া শুরবা লৈবাক্নি। মালেমদা ভারতকী শেন্মিৎলোন ফবগী ৱারী লিনরম্বা মতম অমা লৈরম্মি। ঙসি ভারতকী সংস্কৃতি, ঐখোয়গী অরিবা মতমগী লনশিং মালেম শিনবা থুংনা মমিং চৎলি। ঙসি লৈবাকসিনা ‘বিরাসত পর গর্ব’ হায়বা ৱাখল্লোনসিদা হায়রিবা চাউথোকচনিংঙাই ওইরবা মীংচৎশিংদুবু মাঙদা পুখত্তুনা চৎলি। ঙসি আর্ত অমসুং আর্কিতেকচরগা মরী লৈনবা হীরম খুদিংদা মশানা চাওথোকচবগী ৱাখল্লোন্দা থবক পায়খৎলি। কেদরনাৎ অমদি কাসীনচিংবা ঐখোয়গী ইনাৎ লাইনিংগী মফমশিং শেমগৎপবু ওইরবসু, মহাকাল মহালোকনচিংবা মফমশিং নৌনা শেমগৎপবু ওইরবসু নৎত্রগা অজাদী কে অমৃৎকালসিদা ভারতকী ইনাৎ লাইনিংগী মীংচৎশিং অনৌবা পন্দোল লোমহন্নবা অখন্নবা থৌরাং পায়খৎলি। ভারত্তা পাঙথোক্লিবা বিয়েনেল অসি মায়কৈ অসিদা থাংজিল্লবা নীংথিরবা খোঙথাং অমনি। মসিগী মমাঙদা মফমসিদা, দিল্লীদা ইন্তরনেস্নেল ম্যুজিয়ম এক্সপো পাঙথোকখিবা ঐখোয়না উখ্রে। ওগস্ততা ফেস্তিবেল ওফ লাইব্রেরিজ হৌদোকখি। হায়রিবা থৌরমশিং অসিগী খুত্থাঙদা ঐখোয়না ভারত্তা মালেমগী কল্চরেল ইনিসিএতি শেমগৎনবা অমদি মসিবু ইন্সতিত্যুস্নেলাইজ তৌনবা থৌরাং তৌখি। মতমগা চুনবা ফীভম অমা শেমগৎনবা হোৎনরি। ঐখোয়না ভারতকী থৌরমশিংবু, ভেনিস, সাউ পাউলো, সিঙ্গাপুর, সীদ্নী, সর্জাহনচিংবগী বিয়েনেওশিং অমদি দুবাই-লন্দনগী আর্ত মেলাশিংগুম্না মালেমগী থাক্তা চাউনা শকখঙনহনবা পাম্লি। মসি মথৌ তাই মরমদি ঙসিগী মালেমসিদা মীওইবগী পুন্সিদা তেক্নোলোজীগী ইথিল অসি য়াম্না ৱাংখ্রে অমদি কনামত্তনা মখোয়গী খুন্নাইবু রিমোৎনা শান্নবা রোবোৎকুম্না লৈহনবা পামদে। ঐখোয় রোবোত শেম্বগী মথৌ তাদে, ঐখোয় মীওইবা শেমগদবনি। মসিগীদমক, অৱাবা ফোঙদোকপা মথৌ তাই, থাজবা পীবা মথৌ তাই, অফবা ৱাখল্লোন মথৌ তাই, নুংঙাইহনবা মথৌ তাই, মথুম মরাং হৌহনবা মথৌ তাই। ঐখোয়না থাজবা অমদি নীংবা কায়বশিংগী মরক্তা হিংনবগী লম্বী মথৌ তাই। হায়রিবা পুম্নমক অসি আর্ত অমসুং কলচরগী খুত্থাঙদা শেম্লিবনি। তেক্নোলোজীনা মেনিপুলেসন তৌবদা খোঙজেল থুবা য়াই। মরম অসিনা মীওইবগী নুংদা লৈরিবা মতিংশিং খঙদোক্নবগীদমক অমগা অমগা তেংবাংনবা মসিদা চাউরবা মতেঙ ওইরিবনি।
অদুগা মরুপশিং,
ঐখোয়গী পান্দমশিং অসি ফংনবগীদমক ঙসি ‘আত্মনিরভর ভারত সেন্তর ফোর দিজাইন’পুবু মীয়ামগী মফমদা কত্থোক্লি। হায়রিবা সেন্তর অসিনা ভারতকী তোপ তোপ্পা অমদি তঙলবা ক্রাফ্তশুং, মাঙলুরবা আর্তশিংবু মাঙদা পুখৎনবগী ফম্পাক অমা পীরগনি। খুৎশা হৈবা অমদি দিজাইনরশিংবু পুনশিন্ননবগীদমক, কৈথেলগী দিমান্দগী মতুং ইন্না মখোয়বু ইনোবেসন তৌবদা মতেঙ পাংগনি। মসিনা খুৎহৈবশিংবু দিজাইন শেমগৎনবগী মচাকশিং ফংগনি, অমদি মখোয়বু দিজিতেল মার্কেতিংদসু পুশিনগনি। অদুগা ঐখোয়না খঙই মদুদি ভারতকী ক্রাফ্তশিংদা মতিং কয়ামুক য়াম্না লৈবগে হায়ববু মতমগা চুনবা ৱাখল লৌশিং অমদি পাম্বৈগা লোয়ননা মখোয়দা মালেমগী মফমদা মফম কন্নবগী মতিং লৈ।
মরূপশিং,
ভারত্তা ময়োল্লম ৫দা কলচর স্পেস শেমবা হৌরক্লিবা অসিসু পুৱারী ওইরবা খোঙথাংনি। দিল্লীগা লোয়ননা কোলকতা, মুম্বাই, অহমদবাদ অমদি বরানসীদা শেমগৎলিবা সলচর স্পেসশিং অসিনা ময়োল্লমশিং অসিবু কলচরগী লমদা হেন্না মমিং চৎহনগনি। হায়রিবা সেন্তরশিং অসিদা লম লমদুগী আর্তপু হেন্না ইনাক খুল্লন্নবা ইনোবেতিব ওইবা ৱাখল্লোনশিংবুসু মাঙদা পুখৎকনি। ময়াম পুম্নমক্না মথঙগী নুমিৎ ৭ অসিদা মরুওইবা থীম ৭ শেম শারি। মসিদা ‘দেসজ ভারত দিজাইন’ অমদি ‘সমত্ব’ হায়রিবা থীম অসিনা ঐখোয়বু মিসন অমগী শক্লোন্দা মাঙদা পুদুনা চৎকনি। দেসজ হায়বদি ইন্দিজিনস, ইন্দিজিনস দিজাইনবু ইনাক খুনবা হেনগৎহন্নবগীদমক ঐখোয়গী নহাশিংগীবু রীছর্চ অমদি দিভেলপমেন্তকী শরুক ওইহনবা মথৌ তাই। সমত্ব থীম্না বাসতুগী লমদা নুপীশিংবু শরুক য়ারিববু সেলেব্রেত তৌরি। নুপীগী মতিক অমদি ৱাখলগী পাঙ্গলনা মখোয়গী ক্রিএতিবিতীবু হীরম অসিদা অনৌবা পন্দোল লোমহনগনি হায়না ঐনা থাজবা থম্লি।
মরুপশিং,
ভারত্তা আর্তপু অথোৎ অমেঙ অমদি মচুবু পুন্সিগা মান্নবা মশক অমদা য়েংই। ঐখোয়গী ইপা ইপুশিংনদি সাহিত্য সঙ্গীৎ কলা বিহীন: সাক্সাত পসু: পুচ্ছ বিশান হীন: হায়না ফাওবা হায়নরম্মি। ৱাহন্থোক্তি, মীওইবা অমদি অতৈ থৱায় পানবা পোৎশকশিংগা খেন্নরিবসি লোয়নসিল্লোন, ঈশৈ নোংমাই অমদি আর্ত হায়বসিদনি হায়বনি। হায়বদি তুম্বা-হৌগৎপা অমদি পুক থন্নবা হোৎনবগী হৈনবী মহৌশাগী মচৎনি। অদুবু আর্ত, লোয়নসিল্লোন অমদি ঈশৈ নোংমাই হায়বসিদি মীওইবগী পুন্সিদা মহাও হাপ্পি, পুন্সিবু মশক থোকহল্লি। মরম অসিনা, ঐখোয়গী পুন্সিগী তোঙান তোঙানবা মথৌ তাবশিংবু, তোঙান তোঙানবা থৌদাংশিংবু, চতুসাস্ত কলা, আর্ত ৬৪গা মরী শম্নহল্লি। খুদম ওইনা ঈশৈ-নোংমাইগীদমক্তা খোঙবা য়ৈবা, জগোয় অমদি ঈশৈ শকপা হায়রিবা আর্তশিং অসিনি। মসিদসু ঈশিংগী ঈথক্নচিংবশিংদা য়ুম্ফম ওইবা ‘উদক-বাধ্যম’ হায়বদি ঈশিংগী তান্থা অসিনচিংবা অকক্নবা আর্তশিং লৈরি। ঐখোয়গীসিদা মখল কয়াগী সেন্তরশিং নৎত্রগা পরফ্যুম শেম্নবগী ‘গন্ধ-য়ুক্তি’ আর্তশিং লৈরি। মীনাকারী অমদি নক্কারীগীদমক ‘তক্ষকর্ম’ কলা তম্বিরি। তুবা লোনবগী ফজবা মশক মওংশিং তম্বিনবগীদমক ‘সুচীৱান-কর্মানি’ কলা লৈরি। ঐখোয়গীসিদা মীওই খুদিংমক্না থবক তৌবদা পর্ফেক্সনগা লোয়ননা তৌই, মসিগী খুদম অদোম্না ভারত্তা পুথোকপা অঙনবা মতমগী ফিজোলশিংদগী খঙবা ঙমগনি। ফিজোলগী থাল পুম্বা খুত্তোন্দা ফাওবা ঙম্বা চাংদা পুথোক্নরম্মি। হায়বদি, মতৌ অসুম্না পুক্নিং লুপচবা মচৎ লৈরম্মি। ভারত্তা নক্কারী মীনাকারীনচিংবা থবকশিংসু শুপ্নতগী লৈতেংগী পোৎলমশিংখক্তদা লোইবা নত্তে। থাঙদা, চুঙ্গোয়দা, তানচিংবা লানগী পোৎশকশিংদসু মশক নাইরবা আর্তকী মচৎ উবা ফংলম্মি। মসিদসু নত্তনা, করিগুম্বা, হীরম অমা হেক্ততা খন্নবা মতমদা, ঐখোয়গী শা-শনগী মতাঙদা খন্নরবসু শগোলদা, হুই লোয়বদা হায়রবসু, শন লোয়বদা ওইরবসু, ফজবা মশক মতৌ কয়া লৈরম্মি, কলা লৈরম্মি হায়বদি মশানা অঙকপা মওংগী ওইরম্মি। পর্ফেক্সন কয়া য়াম্না লৈরম্বগে হায়ববু শা-শনশিংগী মশাদা শোকহন্দনবগীদমক নীংথিনা য়েংশিন্দুনা শেম শারম্মি। হায়বদি হায়রিবা পোৎলমশিং অসি য়েংবদা কয়া য়াম্না পুক্নিং লুপ্না থবক তৌরম্মি হায়বদু খঙবা ঙম্মি।
মরুপশিং,
অসিগুম্বা মখল কয়াগী আর্তশিং লৈবাকসিদা লৈরি। অদুগা মসি ভারতকী অরিবা পুৱারী ওইরি অমদি ঙসিসু ভারতক কাচিন কোয়াদা মসিগী খুদম চাংদমশিং ফংলি। ঐনা এম.পি. ওইরিবা ময়োল্লম, কাসী, হায়রিবসি অথোইবা খুদম অমনি। কাসীগী মীয়াম্না মসিমক হায়নৈ। মরমদি, কাসীদা গঙ্গাগা লোয়ননা লোয়নসিল্লোন, ঈশৈ-নোংমাই অমদি কলাগী অথোয়বা মশক ফংই হায়নৈ। কলাগী হৌরকফম্নি হায়না লৌনরিবা ভগবান সিববু কাসীনা মাগী মথানুংদা থম্লি। হায়রিবা কলা, শিন্ফমশিং অমদি সংস্কৃতি অসি মীওইবগী খুন্থোক্লোনদা মতিং হাপ্লিবনি। অদুগা মতিং হায়বসি লোম্বা নাইদে, মীগী মতিক মঙাল অথোয়বনি। মসিগীদমক কাসীসু অথোইবনি।
মরূপশিং,
থা খরগী মমাঙদা মালেমগী মফম কয়াদগী ভারতকী কলচর অসিবু য়েংবা লাকখিবশিংগীদমক্তা ঐখোয়না অনৌবা থৌরাং অমা হৌদোকখি। ঐখোয়না গঙ্গা বিলাস ক্রুজ চলাইদুনা পেসেঞ্জরশিংবু কাসীদগী অসাম ফাওবা গঙ্গা পরিংদা পুরি। মালেম পুম্বদগী লম কোয়বা কয়ানা মসিদা শরুক য়াখি। মসি নুপিৎ ৪৫-৫০গী থৌরম্নি। খোঙচৎ অমদা মীওই অমনা ময়োল্লম কয়া অমদি খুঙ্গং কয়া ফাওদুনা গঙ্গা তোর্বান পরিংদা চৎলি। অদুগা ঐখোয়গী মীওইবগী নাৎসু তুরেল অসিগী তোর্বান্দা শেম্লকখিবনি। করিগুম্বা কনাগুম্বা অমনা তুরেল অসিগী তোর্বান্দা অমুক্তং ওইরবসু চৎলুরবদি, মখোয়দা পুন্সিগী নুংগী ওইবা মশকশিং খঙনবগী তাঞ্জা অমা ফংগনি। হায়রিবা ৱাখল্লোন অসিদনি ঐখোয়না গঙ্গা ক্রুজ হৌদোকখিবসু।
মরুপশিং,
কলাগী মওং খুদিংমক মহৌশাদগী পোক্লকপনি, মহৌশাগা নক্ননা লৈ। মতাঙসিদসু, ঐনা উবা ঙমজবদা, কলাগা মরী শম্নদবা মহৌশাগী মচাক অমত্তা লৈতে। মরম অসিননি, কলা অ্রসি মশানা, মহৌশাগা চুনবা অমদি অকোয়বগী ফীভমগা, ঈশিং নুংশিৎকা চুনবা ওইরিবসি। মালেমগী লৈবাক কয়াদা লৈরিবা রিভরফ্রন্তশিংগী মতাঙদা ৱাফম কয়া ফোঙদোক্নরি। ভারত্তা চহি লিশিং কয়াগী মমাঙদগী তুরেলশিংগী পরিংদা হিথাংফমগী চৎনবী লৈরকই। ঐখোয়গী কুমহৈ হরাও কয়া হায়রিবা হিথাংফমশিং অসিগা মরী লৈনৈ। মতৌ অসুম্না ঐখোয়গী লৈবাকসিদা গুহা, পাৎনচিংবগী চৎনবীসু পাক শন্না লৈরি। গুজরাত্তা স্তেপ ৱেল কয়ামরুম লৈ, রাজস্থানগী মফম কয়াদসু লৈ, অমদি দিল্লীদসু অদোম্না স্পেত ৱেল কয়ামুক উবা ফংবিগনি। কুইন্স ৱেবকী মশক মওংগী মতাঙদা য়েংলুরগদি মসি মথক মখা ওন্থোক্নবা লাইশঙ অমগী মশক্নি। অতোপ্পা ৱাহৈদা হায়রবদা মতমদুদা লৈরম্বা মীওইশিংনা মসিবু করম্বা ৱাখল্লোন্দা খল্লগা শারিবনো হায়বসিনি। হায়বদি, অদোম্না ঈশিংগী মরী লৈনবশিংগী আর্কিতেকচরশিং অসি উবা মতমদা মখোয়গী দিজাইনশিং উবিরমগনি। মখোয়সি মেগা মার্ভেলদগী করিসু তাদনা উরি। মতৌ অসুম্না, ভারতকী অরিবা লান্বনশিংগী আর্কিতেকচরনা মালেম পুম্বগী মীয়াম্বু ঙক্নহল্লি। লান্বন খুদিংদা মখোয়গী ওইবা তোঙানবা আর্কিতেকচরশিং লৈজৈ মখোয়গী ওইবা খুদম চাংদমশিং য়াওজরি। নুমিৎ খরনিগী মমাঙদা ঐনা সিন্ধুদুর্গতা চৎলুবদা সমুদ্র ইরোন্নুংদা অচৌবা লান্বন অমা শেম্লম্মি। অদোম খরসু জৈসল্মরদা লৈবা পত্বাশিংগী কোনুং উবিরম্লগনি। শঙলেন মঙাগী কোনুং অসি কয়ামুক নিংথিনা শারম্বগে হায়ববু মসি মহৌশাগী ওইবা এয়র কন্দিস্নিং সিস্তেম অমগুম মথৌ তৌই। হায়রিবা আর্কিতেকচরশিং অসি মতম শাংনা চৎপদা নত্তনা, অকোয়বগী ফীভমদসু অকায়বা পীদবা মওংদা শারম্মি। অতোপ্পা ৱাহৈদা ফোঙদোক্লবদা, মালেম পুম্বনা ভারতকী কলা অমদি নাৎ অসিদগী তমজবা য়াবা কয়া অমা লৈ।
মরুপশিং,
আর্ত, আর্কিতেকচর অমদি কলচরনা মীওইবা খুন্নাইগী খেন্নবা মশক অমদি অমত্তা ওইবগী হৌরকফম ওইরি। ঐখোয় মালেমগী মনুংদা খ্বায়দগী হেন্না খেন্নবা মশক লৈবা লৈবাক অমনি, অদুগা অমুকসু হায়রিবা খেন্নবা মশকশিং অসিনা ঐখোয়বু অমত্তা ওইনা পুনশিল্লি। চহি ১-২গী মমাঙদা ঐনা বুন্দেলখন্দদা থৌরম অমগীদমক চৎলম্মি, মফমদুদা ঝান্সীগী লান্বন্দা পাঙথোকপা থৌরম্নি, অদুগা ঐনা মফমদুগী লৈঙাক্কা ৱারী ৱাতায় শান্নবদা মতমদা বুন্দেলখন্দগী লান্বনবু তুরিজমগী মফম ওইনা শেমগৎনবা ৱাফম খন্নখি। অদুগা মহাক্না থিজিন হুমজিনবা পুম্নমক তৌদুনা শেম্লবা লাইরিক অদু য়েংবদা অদোমসু ঙকপা ফাওগনি মরমদি বুন্দেলখন্দগী লান্বন অদুখক্তদা ইনাক খুল্লবা হেরিতেজ কয়া অমা লৈরম্মি, ঝান্সীখক্তগী নত্তনা অকোয়বগী মফমশিংদসু অসিগুম্বা কয়া অমা লৈরি। মসি য়াম্না মতিং লৈ। ঐনা ঐখোয়গী ফাইন আর্তকী মহৈরোয়শিংনা মফমদুদা চত্তুনা আর্তকী থবক তৌদুনা অচৌবা কম্পিতিসন অমা পাঙথোকহন্নিংই। মতমদুদতা মালেম অসিনা ঐখোয়গী ইপা ইপুশিংনা শেমগৎলম্বশিং অদু খঙগদৌরিবনি। ভারতকী খেন্নবা মশকশিং অসিগী হৌরকফম করিনা ওইরিবনো হায়না অদোম্না খনবা য়াওবরা? মসিগী হৌরকফমদি ভারত্তা দিমোক্রেসীগী মমা অমা ওইনা লৈরিবা দিমোক্রেসীগী মচৎ অসিননি। আর্ত, আর্কিতেকচর অমদি কলচর অসি মনিং মখা তম্বা, মখোয়না অনিংবা অপাম্বা তৌবা য়াবা খুন্নাই অমদা চাওখৎপনি। খেন্নবা মশক মওং অসি হায়রিবা য়েৎনবা অমদি ৱা তান্নবগী মচৎ অসিদগী ওইজরকপনি। মরম অসিননি, ঙসিমকসু, ঐখোয়গী লৈঙাক্না কলচরগী মতাঙদা ৱাফম হৌদোরকপদা, ঐখোয়না খেন্নবা মখল পুম্নমকপু তরাম্না ওক্তুনা ঙাক্লৌ পীরিবা। লৈবাকসিগী তোঙান তোঙানবা স্তেত অমদি ময়োল্লমশিংগী জি-২০গী মীফমশিং পাঙথোক্তুনা, ঐখোয়না হায়রিবা খেন্নবা মশক মওংশিং অসিবু মালেমগী মফমদা উৎখি।
মরুপশিং,
ভারত অসি ‘অয়ম নিজ: পরোবেতি গনন লঘুচেতৌআম’ হায়রিবা ৱাখল্লোন অসিদা হিংবা লৈবাক অমনি। মসিগী ৱাহন্থোক্তি, ঐখোয় ইশাগী অমদি মীতোপকী হায়না খন্দুনা হিংবা মীওইশিং নত্তে হায়বনি। ঐখোয়না ইশাদগী হেন্না অতৈদা থাজবা থম্মি। ঐখোয় ইশাগী মহুত্তা তাইবংপানসিগী মতাঙদা ৱারী শানবা মীওইশিংনি। ঙসি, ভারতনা মালেমগী অ্রচৌবা শেন্মিৎলোন অমা ওইরকপসিদা, মালেম পুম্বনা অফবা তুংলমচৎ অমা উবা ফংলক্লি। ভারতকী শেন্মিৎলোন চাওখৎপগা মালেম পুম্বগী খোঙজেলগা মরী লৈনরক্লিবসিদা, ঐখোয়গী ‘আত্মনিরভর ভারত’গী মঙলান্না মালেম পুম্বগী ওইনা অনৌবা খুদোংচাবা কয়াগসু মরী শম্নহল্লি। আর্ত অমদি আর্কিতেকচরনচিংবা হীরমশিংদা ভারতনা অমুক হন্না হিংগৎলকপনা ভারতকী কলচরগী থাক ৱাংখৎহল্লক্তুনা মালেম পুম্বগী য়াইফবগা মরী শম্নহল্লি। ঐখোয়না য়োগগুম্বা ঐখোয়গী পারি পুরিগী লনবু পুখৎলক্তুনা, ঙসি মালেম পুম্বনা মসিদগী কান্নবা ফংলি।
ঐখোয়না অয়ুর্বেদপু মতমসিগী সাইন্তিফিক স্তেন্দর্দতা মপাঙ্গল কনখৎহন্নবা হোৎনবা হৌরকপদা, মালেম পুম্বনা মসিগী মরুওইবা খঙখি। ঐখোয়না ঐখোয়গী নাৎকী মরুওইবা মমলবু মাঙদা থমদুনা তুং কোইগদবা পুন্সি মহিং অমগীদমক অনৌবা ফিরেপ, ৱারেপশিং লৌখি। ঙসিদি মিসন লাইফনচিংবা কেম্পেনশিংনা মালেম পুম্বদা হেন্না ফবা তুংলমচৎ অমগী থাজবা পীরি। আর্ত, আর্কিতেকচর অমদি দিজাইনগী লমদা ভারতনা হেন্না মপাঙ্গল কনখৎলক্লিবমখৈ, মীওইবা খুন্নাই পুম্বনা মসিগী কান্নবা ফংগদৌরিবনি।
মরুপশিং,
খুন্থোক অসি লিংজেল মান্নবা অমদি তেংবাংনবদা তাংদুনা হিংবনি। মরম অদুনা, হীরম অসিদা মালেম পুম্বগী লৈবাক পুম্নমক্না শরুক য়াশিনবা, খোঙবু ওইমিন্নবা হায়বসি য়াম্না মরু ওই। ঐনা থৌরম অসি, হেক য়ারিবমখৈ লৈবাক মশিং য়াম্না শরুক য়াশিল্লক্তুনা মখা তানা পাকথোক চাওথোরকপা উবা পাম্মি। থৌরম অসিনা মায়কৈ অসিদা থাংজিনবা মরুওইবা খোঙহৌ অমা ওইগনি হায়না ঐনা থাজৈ। হায়রিবা ৱাখল্লোন অসি থমজরগা ঐনা ময়াম পুম্নমকপু থাগৎচরি। ঐনা লৈবাক মীয়ামগী মফমদা থমজনিংবা ৱাফম অমনা মার্চ ফাওবদদি মসি ফংলগনি অমদি নোংমা মপুং ফানা কাইথোক্লগা মফমসিদা লৈরিবা ঐখোয়গী হৈ-শিংবা, ঐখোয়গী চৎনবী, ঐখোয়না মহৌশাবু কয়ামুক য়াম্না নুংশিজবা হায়রিবশিং অসি মফমসিদা য়েংবিনবা হায়জরি। হন্না হন্না থাগৎচরি।
