উত্তর প্রদেসকী রাজ্যপাল অনন্দিবেন পতেল জি, চীফ মিনিস্তর শ্রী য়োগী অদিত্যনাথ জি, দিপুতি চীফ মিনিস্তর কেযব মৌর্য়া জি, ব্রাজেস পাথক জি, উত্তর প্রদেসকী মিনিস্তরশিং, এম.পিশিং অমসুং এম.এল.এশিং, প্রায়াগ্রাজগী মেয়র অমসুং দিস্ত্রিক পঞ্চায়ত প্রসিদেন্ত, অতোপ্পা শক্নাইরবশিং অমসুং ঐগী নুংশিরবা ইনাওশিং অমসুং ইচলশিং।
প্রায়াগ্রাজগী শঙ্গমগী শেংলবা লমদম অসিদা ঐনা কোক নোঞ্জরি। মহা কুম্ভ শরুক য়াবা লাক্লিবা সাধুশিংদা ঐনা কোক নোঞ্জরি। মহা কুম্ভ মাইপাক্নবা অহিং-নুংথিল থবক শুরিবা শিন্মীশিং অমসুং সেনিতেসনগী শিন্মীশিং ঐনা থাগৎপা ফোঙদোকচরি। অসিগুম্বা মালেমগী অচৌবা থৌরম অমদা, নোংমদা ভক্ত লাখ কয়া তরাম্না ওক্নবা অমসুং সেবা তৌনবা থৌরাং তৌরে অমসুং নুমিৎ ৪৫ গী মহা যজ্ঞ অমা লেপ্তনা পাংথোক্লি, অনৌবা সহর অমা শেমগৎনবা অচৌবা কেম্পেন অমা পাংথোক্লি, প্রায়াগ্রাজদা অনৌবা পুৱারি অমা শেম্লে। মথং চহিদা মহা কুম্ভ পাংথোকপা অসিনা লৈবাক অসিগী অধ্যাতিক অমসুং নাতকী শক্তম অনৌবা থাক অমদা পুখৎলগনি। ঐনা থাজবগা লোয়ননা হায়রি, ঐনা কৎথোকপগা লোয়ননা হায়রি, করিগুম্বা ঐনা মসিগী মহা যজ্ঞ অসি ৱাহৈ পরেং অমদা ফোঙদোক্লবদি, ঐনা হায়গনি মদুদি মসি অপুনবগী মহা যজ্ঞ অমা ওইগনি, মালেম শীনবা থুংনা ৱারি লিনগনি। মসিগী থৌরম অসি মাইপাক্নবা ঐনা য়াইফ-পাউজেল পীজরি।
মরুপশিং,
ঐখোয়গী ভারত অসি শেংলবা মফমশিং অমসুং লাইফমশিংগী লৈবাক অমনি। গঙ্গ, যমুনা, সরশ্বতি, কাবেরি, নরমাদাগুম্বা মশিং থিঙমদ্রবা শেংলবা তুরেলশিংগী লৈবাক অমনি। তুরেলশিং অসিগী অশেংবা শক্তম, লাইফম কয়াগী মরুওইবশিং, মখোয়গী মতিক-মগুন, মখোয়গী ইতিনফম, মখোয়গী অপুনবা, মখোয়গী ইথিল, মখোয়গী ফজবা অসি প্রায়াগনি। মফম অসি শেংলবা তুরেল অহুমগী ইতিনফম খক নত্তে। নুমিৎনা কেপ্রিকোর্ন চঙশিল্লকপা মতমদা, ঈশ্বরগী শক্তি পুম্নমক, লাই খুরুম্বা লাকপা মীওই খুদিংমক, সাধুশিং, মহর্ষিশিং প্রায়াগতা লাকখি। মফম অসি, হায়রিবা পুরানাশিংগী ইথিল য়াওদ্রবদি মপুংফাদে। প্রায়াগ্রাজ অসি বেদগী শ্লোগশিংদা থাগৎপা মফম অমনি।
মরুপশিং,
প্রায়াগ অসি খোঙথাং খুদিং অশেংবা মফমশিংগী মফম অমনি। মফম অসিদা ত্রিবেনি মধাবম সোমান, ভারাদৱাজম চা বসুকিম, বন্দে অক্ষ্য-বাতাম সেসাম, প্রায়াগাম তির্থনায়াকম। হায়বদি ত্রিবেনিগী ইথিল অহুম, বেনি মাধবকী ফজবা, সোমেশ্বরগী থৌজালশিং, রিষি ভারদ্বাজগী শেংলবা মফম, নাগ্রাজ বসুকিগী অখন্নবা মফম, অক্ষায়া ভাতকী লোম্বা নাইদবা অমসুং সেসাগী ফজবা… মসি ঐখোয়গী লাইফমগী নিংথৌ প্রায়াগ! পোৎশক মরি-ধর্ম, অর্থ, কাম অমসু মোক্সা লাইনা ফংবা মফম অসি প্রায়াগনি। প্রায়াগ্রাজ অসি শুপ্নগী লম মচেৎ অমা নত্তে। মসি অধ্যাতিক্কী মফম অমনি। প্রায়াগকী থৌজাল অমসুং প্রায়াগকী মীয়ামগী থৌজালদগী ঐ মফম অসিদা হঞ্জিন হঞ্জিন লাকপনি। হৌখিবা চহিগী কুম্ভদা, ঐ শঙ্গম অসিদা ঈরুপখি। কুম্ভ হৌদ্রিঙৈ মমাংদা ঙসি ঐনা মা গঙ্গগী খুয়াদা চঙজবা ফংলে অমসুং মহাক্কী থৌজাল ফংলে। ঙসি ঐ শঙ্গমদা ঈরুপখি। ঐ হনুমান জি দর্শন ফংলে। ঐ অক্ষ্যাবাত উগী থৌজালশু ফংলে। হায়রিবা মফম অনি অসিদা ভক্তশিং খুদোংচানবা হনুমান কোরিদোর অমসুং অক্ষ্যাবাত কোরিদোর শেমগৎলে। ঐ সরশ্বতি কুপ রি-দিবলপমেন্ত প্রোজেক্কী মরমদশু পাউ তারে। ঙসি মফম অসিগীদমক লুপা করোর লিশিং কয়া কাইথোক্লে। মসিগীদমক ঐনা অদোমগী মফমদা হরাওবা ফোঙদোকচরি।
মরুপশিং,
মহা কুম্ভ অসি ঐখোয়গী লৈবাক্কী চহি লিশিং কয়া শুরবা নাত অমসুং অধ্যাতিক্কী খোঙচৎকী শেংলবা অমসুং অহিংবা খুদম অমনি। মসি ধর্ম, লৌশিং, কৎথোকপা অমসুং কলাগী ঈশ্বরগী ওইনা অপুনবা থৌরম অমনি। শঙ্গমদা ঈরুপ্পা অসি লাইফম করোর কয়া চৎপগা মান্নৈ। প্রায়াগতা ঈরুপ্পা মীওইশিং পাপ খুদিংমক্তগী কোকই। নিংথৌশিংগী মতম ওইগেরা নত্ত্রগা চহি চা কয়া মীনাই ওইরিঙৈগী মতম ওইগেরা, মসিগী থাজবা অসি কৈদৌঙৈদা তোক্তে। মসিগী অচৌবা মরমদি কুম্ভদা মপানগী শাফু অমতা পীবা ঙমদে। কুম্ভ অসি মীওইবগী থৱায়না ৱাখল তাবা অদুবুনি। মসিগী ৱাখল তাবা অসি মশা মরোমদোম মিকপ থোকচরকই ভারতকী মফম কয়াগী মীওইশিং শঙ্গমদা চিংশিল্লি।খুঞ্জাশিং অমসুং সহরগী মীওইশিং প্রায়াগ্রাজদা লাকখি। মসিগী অপুনবা ৱাখল্লোন অসি অতাংবা অমনি অমসুং শক্তি লৈবা ফিবম অমনি। মফম অসিদা সাধুশিং, পন্দিৎশিং অমসুং মীচমশিং অমতা ওইনা লাকখি, ত্রেবেনি শঙ্গমদা ঈরুপখি। কাংলুপ-ফুরুপকী খেন্নবা লৈখিদে, কাংলুপকী মুক্নবা লৈখিদে অমসুং পান্দম অমগীদমক মিল্লিয়ন কয়া পুনখি অমসুং থাজবা শরুক য়ামিন্নখি। মহা কুম্ভ মনুংদা, তোঙান-তোঙানবা লোলশিং ঙাংবা, তোঙান-তোঙানবা ফুরুপ অমসুং চৎনবীশিং অমসুং তোঙান-তোঙানবা লাইনিং কয়াগী মীওই করোর কয়া রাজ্য কয়াদগী লাকখি। অদুবু শঙ্গমগী সহর য়ৌরকপদা, মখোয় অমতা ওইখি। মরম অদুনা মহা কুম্ভ অসি মখল খুদিংমক্কী তাথি-তাওইনা তৌবা কৎথোকপা, তশেংনা অপুনবগী মহা যাজ্ঞ অমনি হায়না ঐনা অমুক হন্না হায়রিবা। ভারতমচা খুদিংমক্না শঙ্গমদা ঈরুপ্লিবা অসিনা এক ভারত শ্রেস্থা ভারতকী ফজরবা পান্দম অমা উৎলি।
মরুপশিং,
মহা কুম্ভ চৎনবীগী খ্বাইদগী মরুওইবা ৱাফমশিংগী মনুংদা অমদি মসিনা লৈবাক অসিগী মাইকৈ তাকপা ঙম্বা অসিনি। কুম্ভ মনুংদা লৈবাক অসিনা থেংনরিবা খুদোংচাদবা কয়াগী মরমদা কুপ্না খন্ন-নৈনবা পাংথোকই। সাধুশিংগী মরক্ত মরৈ য়েৎনবা, ৱারি শানবা অমসুং খন্ন-নৈনবা অসিনা লৈবাক অসিগী ৱাখল্লোন্দা অনৌবা শক্তি অমা পীরি অমসুং চাউখৎপগী লম্বীদা মঙাল পীরি। পুৱারি ওইনা, অসিগুম্বা মীয়াম পুনবা থৌরমশিং মনুংদা সাধুশিংনা লৈবাক্কী মরুওইবা ৱারেপ কয়া লৌখি। অনৌবা যুগকী ই-পাউ ফাওন্না পাম্বৈশিং লাক্ত্রিঙৈ মমাংদা, কুম্ভগুম্বা থৌরমশিং অসিনা খুন্নাইগী অচৌবা অওনবশিং পুরক্নবা য়ুম্ফম থোনখি। মফম অসিদা, খুন্নাইগী নুংঙাইবা অমসুং অৱাবশিং খন্ননবা সাধুশিং অমসুং পন্দিৎশিং লাকখি অমসুং হৌজিক্কী অমসুং তুংগী ৱাফমশিং খন্নখি। হৌজিক ফাওবা, কুম্ভগুম্বা অচৌবা থৌরমশিংগী চন্নফম লৈরি। হায়রিবা মীয়াম পুনবা থৌরমশিং অসিনা মখা তানা খুন্নাইদা অফবা পাউজেল পীগনি, লৈবাক্কী ৱাখল খন্নবা মখা তানা ইচেল চেন্থহনগনি। অসিগুম্বা থৌরমশিংগী মমিং, মখোয়গী মফমশিং অমসুং মখোয়গী লম্বীশিং তোঙাল্লবশু, লমকোয়বা মীওইশিংদি পান্দম অমা খক্তগী অমত ওইনা পুনখি।
মরুপশিং,
কুম্ভ অমসুং লাই খুরুম্বা চৎপগী কান্নবা কয়া লৈরবশু, মমাঙগী সরকারশিংনা মখোয়গী মরুওইবা খঙখিদে। হায়রিবা থৌরমশিং অসিগী মনুংদা ভক্ত কয়া খুদোংচাদবা কয়া মায়োক্নখি, মতম অদুগী সরকারশিংদা অহোংবা লৈখিদে। মখোয়গা ভারতকী নাত অমসুং লাইনিংগা শম্নবা ৱাৎপদগী মসি মখোয়না মীরাইবনি। ঙসিদি ভারতকী নাত অমসুং চৎনবীশিং নিংথিনা ইকায়খুম্নবা মীওইশিংনা কেন্দ্র অমসুং রাজ্য সরকারশিং লুচিংলে। কুম্ভ শরুক য়ারিবা ভক্তশিংদা দবল ইঞ্জিন সরকার অসিনা খুদোংচাবা কয়া ফংহল্লে। থৌরম ফজনা পাংথোক্নবা কেন্দ্র অমসুং রাজ্য সরকারশিংনা লুপা করোর লিশিং কয়াগী থৌরমশিং পায়খৎপা হৌরে। মহা কুম্ভগী থৌরাং তৌনবা তোঙান-তোঙানবা সরকারগী ভিবাগশিংনা খুৎশম্নদুনা পায়খৎলিবা থবকশিং অসি য়াম্না থাগৎনিঙাইনি। লৈবাক অসিগী মফম কয়াদগী ভক্তশিং কুম্ভ য়ৌরকপা লাইনবা লম্বী-থোংন ফগৎনবা অখন্নবা পুক্নিং চঙলে। প্রায়াগ্রাজ অমসুং অয়োধ্যা, বারানাসী, রাই বারেলি অমসুং লখনৌ সহরশিংগী মরক্তা লৈবা লম্বীশিং শিংথাবা য়ানা ফগৎলে। সরকারনা থৱায়-হকচাং য়াওনা থবক পায়খৎপগী মমি মহা কুম্ভ অসিগী শেম-শারিবা অসিদা ময়েক শেংনা উবা ফংলে।
মরুপশিং,
চাউখৎপা য়াংখৎহনবগা লোয়ননা ভারতকী হেরিতেচ ঙাক-শেন্নবা অমসুং ফগৎহন্নবা ঐখোয়গী সরকারনা পুক্নিং চঙলে। লৈবাক শীনবা থুংনা তুরিস্ত সর্কুইতশিং হায়বদি রামায়ন সর্কুইত, শ্রী কৃষ্ণ সর্কুইত, বুদ্ধিস্ত সর্কুইত অমসুং তির্থানকর সর্কুইত শেমগৎলে। হায়রিবা থবকশিং অসিনা মতম অমদা য়েংশিনবীরমদ্রবা পুৱারি অমসুং অধ্যাতিক্কী মরুওইবা মফমশিং অমুক হন্না পাম্নবা হেনগৎলক্লে। শ্বাদেস দর্সন য়োজনা অমসুং প্রাসাদ স্কিমগী খুৎথাংদা ঐখোয়না লাইফমশিংদা খুদোংচাবশিং ফজনা শেমগৎলে। অয়োধ্যাদা অচৌবা রাম মন্দির শাবদগী কমদৌনা অপুনবা সহর অমা ফজরবা মফম অমা ওইহনখিবগে হায়বা ঐখোয় খুদিংমক্না উরে। মসিগা চপ মান্ননা, বিশ্বনাথ ধাম অমসুং মহাকাল মহালোক মালেম শীনবা থুংনা মশক খঙলে। প্রায়াগ্রাজদা, অক্ষ্যা ভাত কোরিদোর, হনুমান তেম্পল কোরিদোর, অমসুং ভারদ্বাজ রিসি অশ্রাম কোরিদোরদা অমুক হন্না শেমগৎপগী মমি তারে। মসিগী মথক্ত, ভক্তশিংগী য়াইফনবা শেংলবা লাইফমশিং হায়বদি সরশ্বাতি কুপ, পতালপুরি, নগাবাসুকি অমসুং দ্বাদাস মধাব লাইশঙশিং অমুক হন্না শেমগৎলে।
মরুপশিং,
প্রায়াগ্রাজ অসি নিসাদ্রাজগী লমদম অমসুনি। ভগবান রাম্না মরয়াদা পুরুসুত্তম ওইরক্নবা খোঙচত্তা শ্রীনগাভেরপুর অসি য়াম্না মরুওইবা মফম অমনি। ঙসি ফাওবদা ভগবান রাম অমসুং কেৱাতকী ৱারিনা ঐখোয়দা ইথিল পীরি। কেৱাতনা ভগবান রাম থেংনবা মতমদা, মহাক ভগবান রামগী মখোঙ চামথোকখি অমসুং মহাক্কী হিনা তুরেল লানবদা শ্রী রামগী মতেং পাংখি। ঈশ্বর অমসুং মহাক্কী ভক্ত অনিগী মরক্ত লৈনরিবা মরুপ-মপাং ওইবগী পাউজেল পুরিবা অঙকপা কৎথোকপা অমসুং চঙজবা অদু তাঙ্কক অসিদা মমি তারে। করিগুম্বা মতমদা ঈশ্বর ফাওবনা মহাক্কী মনাইদগী মতেং লৌখি হায়বা মসিনা ঐখোয়না নিংশিংহল্লে। ভগবান রাম মসুং নিসাদ্রাজগী মীতম অসিনা তুংগী মীরোলশিংদা মান্নবা অমসুং নুংশিন্না হিংমিন্নবা নিংশিংহল্লগনি।
মরুপশিং,
কুম্ভগুম্বা অচৌবা অমসুং ঈশ্বরগী থৌরমশিং মাইপাক্না পাংথোকপা লু-নানবনা অচৌবা থৌদাং অমা লৌরি। মহা কুম্ভগী থৌরাং তৌবা ওইনা, নামামি গঙ্গে প্রোগ্রাম য়াংখৎহল্লে। প্রায়াগ্রাজ সহরদা সেনিতেসন অমসুং অমোৎপা লোইশিন্নবা অখন্নবা থবক পায়খৎলে। গঙ্গদুতশিং, গঙ্গ প্রাহারিশিং অমসুং গঙ্গ মিত্রাশিং হাপ্পগী থবকশিং অসিনা লু-নান্না লৈনবা মীয়াম ৱাখল তাহন্নবা পান্দম থম্লি। হৌজিক, ঐগী সেনিতেসন শিন্মী ইনাওশিং অমসুং ইচলশিং ১৫,০০০ হেনবনা কুম্ভগী লম শেংদোকপগী থবকশিং পাংথোক্কনি। কুম্ভগীদমক শেম-শানবা চোকথবা নাইদনা থবক তৌরিবা সেনিতেসনগী ৱার্করশিংদা ঐনা মাঙজৌননা ঐগী তৌবীমল খঙবা উৎচরি। পায়খৎলিবা থবকশিং অসিনা থৌরম মনুংদা মীওই করোর কয়ানা অশেংবা, লু-নানবা অমসুং অধ্যাতিক ফংবা ওইথোক্কনি। মসিগী শেংবা থবক অসিদা, অদোমনা মফম অসিদা লাকপা ভক্ত খুদিংমক্ত শরুক য়াগনি। চাবা লোইদ্রবা পুখম লৌখৎতুনা ভগবান কৃষ্ণনা ঐখোয়গী থবক শুবা তম্বীখিবগুম, অদোমগী থবক্না থৌরম অসি মশক থোকহনগনি। নুমিৎ থোকপগী অহিং অথেংবা ফাওবা থবক শুবা মীওইশিং অসি অদোমনি। কুম্ভ ২০১৯ মনুংদা থৌরম অসিদা পাংথোকখিবা লু-নানবগী থবকশিং মীয়াম্না থাগৎনখি। চহি কয়া মহা কুম্ভ শরুক য়াখিবা মীওইশিংনা অহানবা ওইনা অসিগুম্বা লুবা নানবা উবা ফংখি। মরম অসিনা অদোমগী খোঙ চামথোক্তুনা ঐনা ঐগী তৌবীমল খঙবা উৎচরি। মসিগী থবক অসি পাংথোকপদা ঐনা ফংখিবা অপেনবা অদু ঐগী পুন্সিদা কাউবা ঙমদ্রবা থৌদোক অমা ওইরগনি।
মরুপশিং,
কুম্ভগী মতাংদা খঙদবা মরুওইবা ৱাফম অমা লৈরি; মসিনা শেন-থুমগী থবকশিংদা কান্নবা পীরিবশিং। কুম্ভগী থৌরাং তৌবা হৌরকপদা কমদৌনা লমদম অসিদা শেন-থুম তানবগী থবকশিং খোঙজেল য়াংখৎলকপগে হায়বা ঐখোয়না মাঙজৌননা উরে। চাউরাক্না থা অমগা মখায় অসিদা, শঙ্গমগী তোর্বানশিংদা অনৌবা সহর অমা শেমগৎলগনি, মীওই লাখ কয়া নুমিৎ খুদিংগী লাক্কনি। অশুক চাউবা থৌরম অসি পাংথোক্নবা, প্রায়াগ্রাজদা য়াম্না থবক শুনবা মীওই দরকার ওইগনি। হিহোনবা মীওই ৬০০০ হেনবা, দুকান ফম্বা লিশিং কয়া অমসুং লাই খুরুম্বা অমসুং ধ্যান তৌবগী মতেং পাংনবা মীওই কয়াগী থবক দরকার ওইগনি। মসিনা মশিং থিঙমদ্রবা থবকশিং ফংহনগনি। সপ্লাই চেন লেংদনা থম্নবা, ললোনবশিংনা অতোপ্পা সহরশিংদগী পোৎ-চৈশিং দরকার ওইগনি অমসুং কুম্ভ অসিগী কান্নবা অকোয়বদা লৈবা জিলাশিং ফাওবা য়ৌগনি। মসিগী মথক্ত, অতোপ্পা রাজ্যশিংদগী ভক্তশিং লাকপদা ত্রেনশিং অমসুং প্লেনশিং শীজিন্নবদগী শেন-থুমগী ফিবম ফগৎহনগনি। মসিগী মহা কুম্ভ অসিনা খুন্নাইগী অপুনবা হেনগৎহনবা খক নত্তনা, মীয়ামদা শেন-থুমগী কান্নবশিংশু পীরগনি।
মরুপশিং,
তেক্নোলোজিগী লমদা মমাঙগী থৌরমশিংদগী হেন্না চাউখৎলবা মতম অমদা মহা কুম্ভ ২০২৫ পাংথোক্কদৌরি। ঙসিদি স্মার্দ ফোন শীজিন্নবা মীওই মশিং অঙকপা ফংনা হেনগৎলে। ২০১৩ দা, হৌজিক মমল হোংলিবা অসিগুম্না দেতাগী মমল হোংলমদে। ঙসিদি মোবাইল ফোনশিং শীজিন্নবদা নুংঙাইবা এপ্পশিং য়াওরে অমসুং তেক্নিকেলগী লৌশিং য়াম্না লৈতবা মীওইশিং ফাওবনা শীজিন্নবা ঙম্লে। ঐনা কুম্ভ সাহায়াক চাতবোত হৌদোকখ্রে অমসুং মহা কুম্ভ অসিদা অহানবা ওইনা আর্তিফিসিএল ইন্তিলিজেন্স অমসুং চাতবোত তেক্নোলোজি শীজিন্নরগনি। মসিগী এ.আই য়াওরবা চাতবোত অসিনা ভারতকী লোল ১১দা পাউ ফাওনবদা মতেং পাংগনি। মসিগী অরিবা চৎনবী অমসুং তেক্নোলোজি পুনশিনবা অসি শীজিন্ননবা ঐনা মীয়ামগী পুক্নিং থৌগৎলি। খুদম ওইনা,মহা কুম্ভ অসিদা ফোতোগ্রাফি চাংদম্না অমা পাংথোক্কনি, মসি অপুনবগী মহা যাজ্ঞ অমা ওইনা উৎকনি। অসিগুম্বা থবকশিংনা নহারোলশিংগী পুক্নিং চিংশিনগনি অমসুং থৌরম অসিদা থৱায় য়াওনা শরুক য়াহনগনি। হায়রিবা ফোতোশিং অদু সোসিএল মেদিয়াদা থাগৎপা মতমদা, মখোয়না পাক-চাউরবা কেনভাস অমা শেমগনি, মশিং থিঙমদ্রবা মচুশিং অমসুং নুংশিবনা থনগনি। খুদোংচাবা কয়া মপান নাইদে। মসিগী মথক্ত, অদোম্না অধ্যতিক অমসুং মহৌশাগা মরী লৈনবা চাংদম্নবশিং পাংথোক্তুনা মহা কুম্ভগী নুংঙাইবা হেনগৎহনগনি।
মরুপশিং,
ঙসি, ভারত চাউখৎলবা লৈবাক অমা ওইরক্নবা মাইকৈদা য়াংনা চঙশিল্লি। মসিগী মহা কুম্ভ অসিদগী ফংলকপা অধ্যাতিক অমসুং অপুনবগী শক্তি অদুনা ঐখোয়গী ৱাশক হেন্না মপাঙ্গল কনখৎহনগনি হায়না ঐনা থাজৈ। মহা কুম্ভ ঈরুপ্পা অসি পুৱারি অমসুং কাউবা ঙমদ্রবা থৌদোক অমা ওইরসনু। মা গঙ্গ, মা যমুনা অমসুং মা সরশ্বাতিগী ইতিনফম অসি খুন্নাইগী নুংঙাই-য়াইফবা ওইবা হায়বসি ঐখোয়গী অপুনবা অপাম্বনি। প্রায়াগ্রাজ(শঙ্গম নাগরি) গী শেংলবা সহর অসিদা লাক্লিবা ভক্ত খুদিংমক ঐনা য়াইফ-পাউজেল পীজরি। ঐগী থম্মোয়দগী ময়াম পুম্নমক থাগৎপগা ফোঙদোকচরি। হৌজিক ঐগা লোয়ননা হায়মিন্নসি-
ভারত মাতা কি জয়!
ভারত মাতা কি জয়!
ভারত মাতা কি জয়!
ভারত মাতা কি জয়!
ভারত মাতা কি জয়!
ভারত মাতা কি জয়!
থাগৎচরি!
