ঐহাক্কী নুংশিরবা নহা ওইরিবা মরুপশিং,
ঙসিদি, লৈবাক্কী নহা লাক্ষ অমা হেনবগী মফমদা সরকারগী থবক খনবগী চিথী য়েন্থোক্লি। ইশানা ৱানা হোৎনবগী মহৈ অসু ঙসিদি ফংলে। ঐহাক্না অদোম খ্বাই খীবিক অমসুং অদোমগী ইমুং মনুংবু থাগৎচরি। নহাশিংদা ভারত সরকারগী থবক পীবগী থবক অসিসু খোঙজেল য়াঙনা চঙশিল্লি। মমাংগী সরকারগী মতমদা থবক্কী এদভর্তাইজ থোকপদগী হৌরগা থবক খনবগী চিথী পীবগী থৌওংদা মতম য়াম্না শাংনা চঙলম্মি। অসুম্না মতম চঙবগী খুদোংচাবা লৌদুনা, মতমদুদা শেঞ্জা থুমজা য়াম্না তৌনখি। ঐখোয়না ভারত সরকারগী থবক খনবগী পথাপ অসিবু নুং-পান ফাওনা উহল্লে। মসিদা নত্তনা, সরকার অসিনা থবক খনবগী থৌওংশিংবু অকক্নবা মতমগী মনুংদা লোইশিনহল্লে। মসিগা লোয়ননা, নহা খুদিংনা মশাগী মতিক উৎচবগী অতোপ্পগা চপ মান্নবা খুদোংচাবা ফংহল্লে। ঙসিদি, নহাশিংনা মশাগী হোৎনজমনগী মতুং ইন্না মশাগী ফম অমা কনবা ঙমগনি হায়বগী থাজবা লৈনরে। ঐখোয়না ইং 2014দগী হৌদুনা, নহাশিংগা নক্নবা মরী লৈনদুনা মখোয়বু লৈবাক শেম্বগী থৌওংদা শরুক য়াহন্নবা হোৎন্দুনা লাক্লি। বি.জে.পি. সরকারগী চহি 10 অসিদা মমাংগী সরকারনা মখোয়গী চহি 10দা পীখিবা থবক মশিংদগী শরুক অমগা মখায় হেন্না পীখ্রে। ঙসিদি, ইন্তিগ্রেতেদ ত্রেনিং কমপ্লেক্স অমগী উরেপ উয়ুংসু দিল্লীদা তমখ্রে। মসিগী ত্রেনিং কমপ্লেক্স অসিনা ঐখোয়গী কেপাসিতী বিলদিং তৌবগী থবকশিংদা অনৌবা পাঙ্গল হাপকনি হায়না ঐহাক্না থাজবা থম্লি।
মরুপশিং,
ঙসিদি, ঐখোয়গী সরকারগী হোৎনজমন্না মরম ওইরগা লৈবাক্কী নহাশিংগীদমক্তা অনৌবা সেক্তর কয়া হাংদোক্লে। হায়রিবা সেক্তরশিং অসিদা সরকার অসিনা হৌদোকখিবা কেম্পেন কয়ানা মরম ওইরগা, থবক পীবা অমদি ইশানা ইশাবু থবক পীজবগী অনৌবা খুদোংচাবা কয়া লৈহল্লে। হন্দক্কী বজেৎ অসিদা ইমুং করোর 1গী সোলর রুফতোপ স্কিম অমা লাউথোকখ্রে হায়বা পুম্নমক্না থেংনরম্লগনি। হৌজিক্তি, মশাগী য়ুম্থক্তা সোলর পেনেল খিনবশিংনা কান্নবা মখল অনি থোক্না ফংলগনি। মখোয়গী ইলেক্ত্রিসিতী বিল জিরো ওইরগনি অমসুং মখোয়না পুথোক্লিবা অহেনবা ইলেক্ত্রিসিতীদগী মখোয়না অহেনবা চাগা তানবসু য়ারগনি। মসিগুম্বা সোলর রুফতোপ স্কিম অসিনা লৈবাক মনুংদা থবক লাক্ষ কয়া পীবগী খুদোংচাবসু লৈহল্লগনি। মীওই খরনা সোলর পেনেলগী থবক তৌগনি, মীওই খরনা মসিগা মরী লৈনবা অতোপ্পা থবকশিং তৌনগনি। মীওই খরনা ৱাইরিংগী থবক তৌনগনি। স্কিম অসিনা থাক কয়াদা থবক লৈহনগনি।
ঐহাক্কী নহা ওইরিবা মরুপশিং,
ঙসিদি, ভারত্তা মালেমগী স্তার্তঅপকী খ্বাইদগী অহুমশুবা চাউবা ইকোসীস্তেম লৈরে। লৈবাক্কী অপুনবা স্তার্তঅপ মশিংনা চাউরাক্না লাক্ষ 1.25 য়ৌগদৌরে। হায়রিবা স্তার্তঅপশিং অসিগী মনুংদগী অয়াম্বনা দিস্ত্রিক্ত সেন্তর ফাওবা ওইদবা তাইয়র 2 অমসুং 3গী শহরশিংদগী থোক্লকপা অসিদা ঐহাক্না য়াম্না নুংঙাইবা ফাওই। স্তার্তঅপশিং অসিদা নহা লাক্ষ কয়াগী থবক্কী খুদোংচাবা লৈরি। হন্দক্কী চহিগী বজেৎ অসিদা, স্তার্তঅপশিংদা পীবা তেক্স একজেম্পসন অসিবুসু শাংদোক্লগনি হায়না লাউথোকখ্রে। ঐখোয়গী নহাশিংনা মসিদগী য়াম্না চাউনা কান্নগনি। রিসর্চ অমসুং ইন্নোভেসনগীদমক্তা লুপা করোর লাক্ষ অমগী অনৌবা ফন্দ অমা শেম্লগনি হায়না হন্দক্কী বজেৎ অসিদা লাউথোকখ্রে।
মরুপশিং,
ঙসিদি, থবক্কী মেলা অসিগী খুত্থাংদা ইন্দিয়ন রেলৱেজকী থবক লৌরি। মীয়াম্না মখোয়গী ইমুং-মনুংগা লোয়ননা অশাংবা খোঙচৎ চৎনবা থৌরাং তৌনরকপা খুদিংদা, অচম্বা ইমুংশিংনা ইন্দিয়ন রেলৱেজপু খ্বাইদগী অহানবা ওইনা খন্নরি। ইন্দিয়ন রেলৱেজ অসিমক্তা য়াম্না চাউবা অহোংবা অমা হৌজিক লাক্লি। হন্দক্কী দিকেদকী অরোইবা ফাওবদা, ইন্দিয়ন রেলৱেজ অসি পুমওন ওল্লগনি। ইং 2014গী মমাংদা রেলৱেজকী করি ফিভম ওইরম্বগে হায়বা অদোম্না নীংশিংলগনি। রেলৱে লাইনগী দব্লিং তৌবা নত্ত্রগা ইলেক্ত্রিফিকেসন তৌবা ওইরো, ত্রেনগী ওপরেসন ফগৎহনবা ওইরো, নত্ত্রগা পেসেঞ্জরশিংগী ফেসিলিতী হেনগৎহনবা ওইরো, মমাংগী সরকারনা মসিদা চঙফম থোকপা মিৎয়েং অমত্তা চঙদনা লাকখি। মমাংগী সরকারনা মীচম মীয়ামগী শিংনবশিংগী মতাংদা করিমত্তা নাচুংদনা লৈথোকখি। ঐখোয়না ইং 2014গী মতুংদগী ত্রেন ত্রাভেল এক্সপেরিএন্স অসিদা অনৌবা শক্তাক পীনবা হোৎনখি। ঐখোয়না রেলৱেবু মোদর্নাইজেসন অমসুং অপগ্রেদ তৌবগী হীরমদা মিৎয়েং চঙখি। হন্দক্কী চহিগী বজেত্তা অদোম্না উরম্বা য়ারে, মহৌশাদগী চেন্দুনা লাক্লিবা ত্রেনশিংদা বোদী লিশিং 40বু মতমগা চুনবা বন্দে ভারত ত্রেনগী থাক্তা অপগ্রেদ তৌদুনা হাপচিল্লগনি হায়না লাউথোকপা লৈখ্রবনি। মসিনা অচম্বা পেসেঞ্জরশিংগী ত্রেন ত্রাভেল এক্সপেরিএন্স য়াম্না হেন্না নুংঙাইহল্লগনি।
মরুপশিং,
ঐখোয়গী লৈবাক অসিদা কন্নেক্তিবিতী পাকথোক চাউথোক্লকপগা লোয়ননা, মসিনা অতোপ্পা থবক কয়াদা মতম অমত্তদা শাফু কয়া পীরি। কন্নেক্তিবিতী ফগৎলকপদগী অনৌবা কৈথেল থোক্লকপা হৌরে, লমকোয়ফম চাউখৎপা হৌরক্লে, অনৌবা কারবার থোক্লকহল্লে অমসুং মীওই মিলিয়ন কয়াদা থবক্কী খুদোংচাবা লৈহল্লে। মসিনা হায়বদি, অফবা কন্নেক্তিবিতী লৈবনা লৈবাক্কী চাউখৎ থৌরাংদা হকথেংননা তেংবাংই হায়বনি। চাউখৎ থৌরাংগী খোঙজেল হেনগৎহন্নবা ইনফ্রাস্ত্রকচরদা শেল থাদবগী চাংসু য়াম্না হেনগৎলক্লি। হন্দক্কী বজেৎ অসিদা, ইনফ্রাস্ত্রকচরদা শেল থাদবগীমক্তা লুপা করোর লাক্ষ 11গী পান্দম থমখ্রে। মসিগুম্বা ইনফ্রাস্ত্রকচরগী অচৌবা চাদিং অসিনা রোদ, রেল, এয়রপোর্ত, মেত্রো অমসুং ইলেক্ত্রিসিতীগী প্রোজেক্ত কয়াগী খোঙজেল হেনগৎহনগনি। মসিনা থবক্কী খুদোংচাবা কয়াসু পীগনি।
মরুপশিং,
ঙসি, থবক্কী চিথী ফংলবা নহাশিংগী মরক্তগী মশিং য়াম্লবা নহাশিংনা পেরামিলিতরী ফোর্সকী শরুক ওইরগনি। মসিমক নহাশিংগী অপাম্বা মঙলানগী মঙফাওনবনি। হৌখিবা চহি খরসিদা, পেরামিলিতরী ফোর্স্তা থবক খনবগী থৌওংদা অহোংবা কয়া পুরকখ্রে। হিন্দি অমসুং ইংলিশ্তগী হেন্দোক্তুনা অতোপ্পা লোল 13দা অইবা পরিক্ষা থাহনবগী থৌওংসু হন্দক্কী জনুৱারীদগী হৌখ্রে। মসিনা পার্তিসিপেন্ত লাক্ষ কয়াদা মশাগী মতিক উৎপগী অতোপ্পনা ফংলিবা চপ মান্নবা খুদোংচাবা পীরি। ঙমখৈ অমসুং লালহৌবগী শিংনবনা অৱাবা পীবা মফমশিংদা লৈবা জিলাশিংগী কোতাসু হেনগৎখ্রে।
মরুপশিং,
সরকারগী থৌমী খুদিংনা ভারতপু চাউখৎহন্নবা চৎলিবা খোঙচৎ অসিদা চাউরবা থৌদাং য়াগনি। ঙসি ঐখোয়গা পুনগদৌরিবা ইমপ্লোয়ী লাক্ষ কয়ানা হায়রিবা খোঙচৎ অসিদা অনৌবা পাঙ্গল অমসুং খোঙজেল হাপকনি। অদোম্না বিভাগ অমদবু থবক তৌবা ওইরো, অদোমগী মতম অসিদি লৈবাক্কী চাউখৎ থৌরাংগীদমক্তা শিজিন্নগদবনি হায়বসি কাওবীগনু। সরকারগী থৌমীশিংগী কেপাসিতী বিলদিং তৌনবগীদমক্তা ভারত সরকারনা মখোয়গীদমক্তা কর্ময়োগী পোর্তেল হৌদোকখ্রবনি। পোর্তেল অসিদা মখল কয়াগী সবজেক্ত কয়াগা মরী লৈনবা তোঙান-তোঙানবা কোর্স 800 হেন্না য়াওরি। পোর্তেল অসিদা ঙসি ফাওবদা য়ুজর লাক্ষ 30না শরুক য়ারকখ্রে। অদোম খ্বাই খিবীক্নসু পোর্তেল অসিগী খুদোংচাবা লৌদুনা ইশাগী স্কিল হেনগৎহনগদবনি। ঙসি থবক খনবগী চিথী ফংলবা মীপুম খুদিংবু ঐহাক্না অমুক্কা হন্না থাগৎচরি অমসুং য়াইফবা তুংগী মতম অমগা লোয়ননা ইশাগী কেরিয়রগী থাক খুদিংদা লৈবাক্কীদমক্তা মশক থোকপা থবক তৌদুনা তুংলমচত্তা চঙশিনবা ওইয়ু হায়বগী য়াইফ পাউজেল পীজরি। লৈবাক্কী চাউখৎ থৌরাংদা শরুক য়াদুনা ইশাগী পুন্সি শেম্বীয়ু। ঐহাক্না পুম্নমকপু য়াইফ পাউজেল পীবগা লোয়ননা অদোমগী ইমুং মনুংগী মফমদসু থাগৎপা ফোংদোক্লি। পুম্নমকপু থাগৎচরি।
