নমস্কার!
কাশী হায়নসু খঙনবা ভরানসীদা অদোম্বু তরাম্না ওকচরি। ঐহাক্কী পার্লিয়ামেন্তরী কনস্তিত্বেন্সীসু ওইরিবা শহর অসিদা অদোম্না উন্নরিবা অসিদা ঐহাক্না নুংঙাইবা ফাওই। কাশী অসিদি মালেমগী খ্বাইদগী লিবা অহিংবা শহর অমনি। মসিদগী পংলাপ লাপ্তনা সার্নাথ লৈ, তাউন অসিদা বুদ্ধনা মহাক্কী অহানবা সর্মোন পীখিবনি। কাশী অসি লৌশিং, থৌদাং অমসুং অচুম্বগী লন তুংফম্নি হায়না খঙনৈ অমসুং মসিদি তসেংনা ভারতকী কলচর অমসুং স্পিরিচুএলগী কোনুংনি। অদোম্না গঙ্গা আর্তী থৌরম য়েংনবা, সার্নাথতা চৎনবা অমসুং কাশীগী অহাও অথুমসু চাবগী মতম ফংগনি হায়না ঐহাক্না খল্লি।
এক্সেলেন্সীশিং,
কলচরনা পুম্নমকপু অমত্তা ওইনা পুনশিনবগী মতিক লৈ। মসিনা ঐখোয়বু তোঙান-তোঙানবা বেকগ্রাউন্দ অমসুং মিৎয়েংশিং খঙবা ঙমহল্লি। অদুনা, অদোমগী থবকশিং অসি মীওইবা খুন্নাই অপুনবগী ওইনা য়াম্না মরু ওই। ভারত্তা লৈরিবা ঐখোয়না মতম নাইদ্রবা অমসুং তোঙানবা মতৌনা থল্লবা চৎনবীগীদমক্তা চাউথোকচৈ। ঐখোয়গী মমল নাইদ্রবা কলচরগী হেরিতেজপু ঐখোয়না য়াম্না লুনা লৌজৈ। ঐখোয়না ইশাগী হেরিতেজ মফমশিংবু ঙাক শেন্নবা অমসুং ইনোৎ হাপ্নবা য়াম্না কন্না হোৎনরি। ঐখোয়না লৈবাক অমসুং খুঙ্গংগী থাক্তা লৈরিবা লৈবাক্কী কলচরগী এসেৎশিং অমসুং আর্তিস্তশিংবু খঙদোক্লে। ঐখোয়না ভারতকী কলচরবু শকখঙনবা মখল কয়াগী সেন্তর শাগৎলে। মসিগী মনুংদা খ্বাইদগী মরু ওইবশিংদি লৈবাক্কী তোঙান-তোঙানবা মফমদা লৈরিবা ত্রাইবেল ম্যুজিয়মশিংনি। ম্যুজিয়মশিং অসিনা ভারতকী ত্রাইবেল খুন্নাইশিংগী মতিক-মগুন লৈরবা কলচর উৎলি। প্রধান মন্ত্রীগী ম্যুজিয়ম অমসু নই দিল্লীদা লৈরে। মসিদি ভারতকী গনতন্ত্রগী হেরিতেজ উৎনবা হোৎনবা খ্বাইদগী তোপ-তোপ্পা থৌওং অমনি। ঐখোয়না ‘য়ুগে য়ুগীন ভারত’ নেস্নেল ম্যুজিয়ম অমা শারি। মসিনা হেক লোইরকপা মতমদা, মসিনা মালেমগী খ্বাইদগী চাউবা ম্যুজিয়ম ওইগনি। মসিনা ভারতকী চহি লিশিং 5000গী পুৱারী অমসুং চৎনবীশিং উৎকনি।
এক্সেলেন্সীশিং,
কলচরগী লন-থুমশিংবু নীংথিনা শেমজিনবা হায়বসি য়াম্না মরু ওইবা হীরম ওইরি। অদোম্না হীরম অসিদা পায়খৎলিবা থবকশিংবু ঐহাক্না তরাম্না ওকচরি। তসেংবদি, মিৎনা উবা ঙম্বা হেরিতেজ হায়বসিনা মেতরিএল ভেল্যু লৈবখক নত্তনা মসিনা ঐখোয়গী লৈবাক্কী পুৱারী অমসুং শক্তাকসু ওইরিবনি। মীপুম খুদিংনা মশাগী কলচরগী হেরিতেজপু খঙজবা অমসুং মদুগী নুংঙাইবা লৌবগী হক লৈ। ভারতনা ইং 2014দগী হৌদুনা লৈবাক্কী অরিবা সিভিলাইজেসনগী নুংঙাই য়াইফবা মতৌ তাকপা মসিগুম্বা আর্তিফেক চা কয়া লৈবাকসিদা অমুক পুরক্লে। অদোম্না অহিংবা হেরিতেজকী মাইকৈদা হোৎনরিবশিং অমসুং ‘কলচর ফোর LiFE’তা তেংবাংবগী থৌওংশিংবু ঐহাক্না থাগৎচরি। কলচরেল হেরিতেজ হায়বসি নুংদা হক্লিবা অদুখক নত্তে, মসিদি চারোন-শুরোন কয়াদগী পীথদুনা লাক্লিবা চৎনবী, নাৎ অমসুং কুহ্মৈশিং অদুবুনি। অদোম্না হোৎনরিবা খুদিংনা সস্তেনেবল ওইবা প্রেক্তিস অমসুং পুন্সি মহিংবু খুমাং চাউশিলহনগনি হায়বগী ঐহাক্না থাজবা থম্মি।
এক্সেলেন্সীশিং,
হেরিতেজ হায়বসি শেন্মিৎলোনগী শাহৌ অমসুং দাইবর্সিফিকেসনগী মরু ওইবা এসেৎ অমনি হায়না ঐখোয়না থাজৈ। মসিমক চাউখৎ থৌরাংগা লোয়ননা হেরিতেজ হায়রিবা ঐখোয়গী ‘বিকাস ভি, বিরাসত ভি’ হায়রিবা মন্ত্র অসিদা মমি তারি। ভারতনা তোপ-তোপ্পা আর্ত অমসুং ক্রাফ 3000মুক্কা লোয়নবা মশাগী চহি লিশিং অনি শুরবা ক্রাফ হেরিতেজকীদমক্তা চাউথোকচরি। ঐখোয়গী ‘ৱান দিস্ত্রিক্ত, ৱান প্রদক্ত’ খোঙথাং অসিনা মরোমদোম লেপচবা ঙম্বগী থৌওংবু খুমাং চাউশিলহনবগা লোয়ননা ভারতকী ক্রাফকী তোপ-তোপ্পা মতৌবুসু উৎলি। অদোম্না কলচর অমসুং ক্রিএতিব ইন্দস্ত্রী খুমাং চাউশিলহন্নবা হোৎনরিবা থৌওংশিং অসিগী অচৌবা মরু ওইবা লৈ। মসিনা হীরম পুম্নমক মনুং চন্দুনা শেন্মিৎলোন চাউখৎহনবদা তেংবাংবগা লোয়ননা ক্রিএতিবিতী অমসুং ইন্নোভেসনবুসু শৌগৎলি। ভারতনা লাক্কদৌরিবা থা খরগী মনুংদা বিলিয়ন দোল্লর 1.8কা লোয়নবা পি.এম. বিশ্বকর্ম য়োজনা হৌদোক্লগনি। মসিনা নাৎকী ওইবা আর্তিসানশিংদা তেংবাংবগী ইকোসীস্তেম অমা শেমগৎকনি অমসুং মখোয়বু মখোয়গী ক্রাফতা চাউখৎহনবদা তেংবাংগনি অমসুং ভারতকী ইনাক খুল্লবা কলচরগী হেরিতেজতা শরুক তম্বগী খুদোংচাবসু পীগনি।
মরুপশিং,
কলচরগী ফজবা শকখঙবদা তেক্নোলোজী অসিসু য়াম্না মরু ওইবা খোঙলোই অমা ওই। ভারত্তা নেস্নেল দিজিতেল দিস্ত্রিক্ত রিপোজিতরী অমা লৈরে। মসিনা ঐখোয়গী নিংতম ইহৌগী ৱারীশিংবু নৌহৌননা থিদোকপদা তেংবাংলি। ঐখোয়না কলচরগী ওইবা মশক নাইবা মফমশিংবু হেন্না নীংথিজনা ঙাক-শেনবগা লোয়ননা কলচরগী লমদা মরু ওইবা মফমশিংবু লমকোয়বশিংনা হেন্না লাক্নিংবা পন্থুংফম অমা ওইহন্নবা তেক্নোলোজী শিজিন্নরি।
এক্সেলেন্সীশিং,
অদোমগী ৱর্কিং গ্রুপ্না বাসুদৈবা কুতুম্বাকম - পৃথীবি অমা, ইমুং অমা, তুংগী মতম অমগী ইথিল শাগোন্নরিবা ‘কলচর য়ুনাইৎস ওল’ কেম্পেন হৌদোকপা অসিদা ঐহাক্না য়াম্না নুংঙাইবা ফাওই। মহৈ য়াল্লে খঙবা ঙমহনগদবা G20 এক্সন প্লান অমা শেম্বদা অদোম্না লৌরিবা মরু ওইবা থৌদাংশিংবুসু ঐহাক্না থাগৎচরি। অদোমগী থবকশিংদা C মরি – কলচর, ক্রিএতিবিতী, কম্মর্স অমসুং কোলাবোরেসনগী মরু ওইবশিংগী মমি তারি। মসিনা ঐখোয়বু কলচরগী শক্তিগী কান্নবা লৌবা ঙমহনগনি অমসুং পুম্নমক্কী খনবা, ইনক্লুসিব ওইবা অমসুং তংদু লৈতাবা তুংগী মতম অমা শেম্বদা তেংবাংগনি। অদোম্না কান্নবা মীফম অমা ফম্বা ওইসনু হায়না ঐহাক্না য়াইফ পাউজেল পীজরি।
থাগৎচরি।
