ঙসি অসি জম্মু অমসুং কশ্মিরগী নহা, ঐখোয়গী ইচাশিংগী য়াম্না মরু ওইবা নুমিৎনি। ঙসি, জম্মু কশ্মিরগী তোঙান-তোঙানবা মফম ২০দা নহারোল লিশিং ৩দা সরকারগী থবক খনবগী চিথী পীগনি। নহারোলশিং অসিনা পি.দবল্যু.দি., হকশেল বিভাগ, ফুদ অমসুং সিভিল সপ্লাই বিভাগ, এনিমেল হসবেন্দরী, জল শক্তি, এজুকেসন অমসুং কলচরগী বিভাগশিংদা থবক তৌদুনা মীয়ামগী সেবা তৌবগী খুদোংচাবা ফংলগনি। থবক খনবগী চিথী ফংলিবা নহারোল খুদিংবু ঐহাক্না থাগৎলি। অদুগা্ রোজগার মেলাসিবু শীন-লাঙবগীদমক্তা ঐহাক্না শ্রীমান মনোজ সিংহ অমদি মহাক্কী তীম্বু থাগৎচরি। লাক্কদৌরিবা মতম খরসিদা অতোপ্পা বিভাগশিংসু থবক খনবগী চিথী ৭০০ হেন্না য়েন্থোক্নবা শেম শারি হায়না ঐহাক্কী ইফমদা পাউদম্লে। নুমিৎ খরনিগী মনুংদা মসিগী কান্নবা ফংগদৌরিবা মীওইশিংবুসু ঐহাক্না য়াইফ পাউজেল পীজরি।
মরূপশিং,
২১শুবা চহি চাগী চৎলিবা দিকেদ অসিনা জম্মু অমসুং কশ্মিরগী খ্বাইদগী মরু ওইবা মতম্নি। হৌজিক অসিদি মমাংগী শিংনবশিংবু থনমদুনা অনৌবা খুদোংচাবা কয়াগী মাইকৈদা চঙশিনবগী মতম্নি। জম্মু কশ্মিরগী নহারোলশিংনা লৈবাক্কী চাউখৎ-থৌরাংগীদমক্তা, জম্মু কশ্মিরগী চাউখৎ-থৌরাংগীদমক্তা মশিং য়াম্না চোংথোরকপসিদা ঐহাক্না নুংঙাইবা ফাওই। জম্মু কশ্মিরবু চাউখৎপগী অনৌবা লম্বীদা পুগদৌরিবা অসিদি ঐখোয়গী নহারোলশিংনি। মরম অদুনা, রোজগার মেলা হায়বসি লৈবাক্কী য়াম্না মরু ওইবা থৌরম ওইরিবনি।
মরূপশিং,
খোঙজেল য়াঙনা চাউখৎনবগীদমক্তা ঐখোয়না অনৌবা থৌওং, ৱাখল্লোনগা লোয়ননা থবক তৌবগী মথৌ তারে। জম্মু কশ্মিরনা অনৌবা, নুং পান্না ফাওনা উবা অমসুং মীয়ামগী অপাম্বা খঙবা সীস্তেমগী হীরমদা মায় পাক্না খুমাং চাউশিনলি। রাজ্যসিদা ইং ২০১৯দগী হৌজিক ফাওবদা, সরকারগী থবক অহাঙবা লিশিং ৩০মুক মেনশিনখ্রে হায়না ঐহাক্কী ইফমদা পাউদম্লে। মসিদগী চাউরাকপা থবক লিশিং ২০দি মমাংগী চহি অমগা মখায়দা পীখিবনি। থৌওং অসি তরাম্না ওক্নিংঙাই ওইবা অমসুং ইকায় খুম্নফম থোকপা থৌওংনি। ঐহাক্না জম্মু কশ্মিরগী রাজ্যপাল, লেফতেনেন্ত ভাই মনোজ সিনহাজী অমসুং মহাক্কী তীম, লৈঙাক্লোইশিংগী তীম্বু থম্মোই শেংনা থাগৎচরি। মখোয়না ‘য়োগ্যতা সে রোজগার’গী মন্ত্র তুং ইন্দুনা চৎলিবসিনা রাজ্যসিগী নহারোলশিংদা অনৌবা থাজবা অমা পীরি।
মরূপশিং,
মমাংগী চহি ৮সিদা, থবক পীবা অমসুং মশানা মশাবু থবক পীবগী মতৌ খুমাং চাউশিলহন্নবগীদমক্তা কেন্দ্র সরকারনা খোঙথাং কয়া পায়খৎলি। ওক্তোবর ২২দগী হৌদুনা লৈবাক্কী তোঙান-তোঙানবা মফমশিংদা ‘রোজগার মেল’ অসিসু মসিগী শরুক অমনি। কেন্দ্র সরকারগী খোঙথাং অসিগী অহানবা তাঙ্কক্কী মখাদা মথংগী থা খরনিগী মনুংদা থবক খনবগী চিথী লাখ ১০ হেন্না পীরগনি। জম্মু কশ্মির অমসুং অতোপ্পা রাজ্যশিংনা মসিগা মরী লৈনরিবা অসিগুম্না রাজ্য মশিং কয়াসু হেনগৎলক্কনি। জম্মু কশ্মিরদা থবক পীবগী খুদোংচাবা হেনগৎহন্নবগীদমক্তা ঐখোয়না ব্যুজিনেস ইনভাইরনমেন্তসু লৈহল্লে। ঐখোয়গী ইন্দস্ত্রীগী অনৌবা পোলিসী অমসুং ব্যুজিনেস রিফোর্ম এক্সন প্লান্না ইজ ওফ দুইং বিজনেসকী লম্বীসু নীংথিনা য়াৎলে। মসিনা মরম ওইরগা, লমদমসিদা ইনভেস্ত তৌবগী হীরমসু মশক থোক্না পুক্নিং থৌগৎলি। জম্মু কশ্মিরদা ইনভেস্ত হেন্না তৌরকপদগী নহারোলশিংগী থবক্কী খুদোংচাবসু হেনগৎলক্কনি, হেনগৎলক্লি। চাউখৎ থৌরাংগা মরী লৈনবা প্রোজেক্তশিংদগী হৌরগা খোঙজেল য়াঙনা থবক পায়খৎলিবশিং অসিনা মফমসিগী শেন্মিৎলোনবু ফজনা শেমদোক্লগনি। খুদম ওইনা, ঐখোয়না কশ্মির ফাওবা ত্রেন কন্নেক্তিবিতী লৈহন্নবা চঙশিল্লিবা খোঙথাং পায়খৎলি। শ্রীনগরদগী শারজাহ ফাওবগী ইন্তর্নেস্নেল ফ্লাইত পায়বা হৌরে। জম্মু কশ্মিরদগী নুমিদাংদা ফ্লাইত পাইরে। কন্নেক্তিবিতী ফগৎলকপগী কান্নবসি লৌমীশিংসু ফংনরি। জম্মু কশ্মিরগী লৌমীশিংনা মশানা থাজবা শেম মপান্দা থাদোকপদা হেন্না লাইথোক্লগনি। সরকারনা দ্রোন শিজিন্নদুনা ত্রান্সপোর্ত চাউখৎহন্নবা হোৎনরিবা অসিদগী মফমসিগী উহৈগী পোত্থোক্কী মতাংদা লৌমীশিংদা মশক থোক্না তেংবাংগনি।
মরূপশিং,
জম্মু কশ্মিরদা ইনফ্রাস্ত্রকচর ফগৎলক্লিবা, কন্নেক্তিবিতী ফগৎলক্লিবা অসিনা তুরিজম সেক্তরবু মপাঙ্গল হেন্না হাপ্লে। জম্মু কশ্মিরদা লাকপা তুরিস্ত মশিংনা হন্দক্তি রেকোর্দ ওইখিবা ঐখোয়না উরে। রাজ্যসিদা থবক্কী খুদোংচাবা হেনগৎলক্লিবা মতৌসি চহি খরগী মমাংদা ৱাখলনা লাম্বা ফংলম্বা নত্তে। সরকারগী স্কিমশিংগী কান্নবা খুদিংমক খুন্নাইগী খ্বাইদগী অকোনবা মীওই ফাওবদা মীচং মীখাই নাইদনা য়ৌহনবা হায়বসিদা ঐখোয়না কন্না হোৎনরি। চাউখৎপগী খুদোংচাবা খুদিংমক মীপুম খুদিংদা ফংহন্নবা ঐখোয়না খোঙফম চেৎলি। হোলিস্তিক দিভেলপমেন্তকী মসিগুম্লবা মোদেল অসিনা সরকারগী থবক্কা লোয়ননা অতোপ্পা থবক্কী খুদোংচাবশিং লৈহন্নবা হোৎনরি। জম্মু কশ্মিরগী হকশেল অমসুং এজুকেসনগা মরী লৈনবা ইনফ্রাস্ত্রকচর পুম্নমক হেন্না ফগৎহন্নবা ঐখোয়না লেপ্তনা হোৎনরি। অনৌবা এমস ২, অনৌবা মেদিকেল কোলেজ ৭, স্তেত কেন্সর ইন্সতিত্যুত ২ অমসুং নর্সিং কোলেজ ১৫ হাংবদগী লমদমসিগী তেলেন্তকী অনৌবা অহেনবা খুদোংচাবা কয়া লৈহল্লগনি।
মরূপশিং,
জম্মু কশ্মিরগী মীয়াম্না নুং পান ফাওনা উবা পথাপ্ততা মতম চুপ্পদা অহেনবা মিৎয়েং চঙদুনা লাক্লি, ত্থৌওং অসিবু লুনা খল্লি। ঙসি সরকারগী থবক ফংলিবা নহারোলশিংনা থৌওং অসিবু মখোয়গী খ্বাইদগী অহেনবা মিৎয়েং চঙবা থৌওং ওইহনগদবনি। ঐহাক্না জম্মু কশ্মিরগী মীয়ামগা মমাংদা উন্নবা মতমদা মখোয়গী অৱাবা অমা ঐহাক্না মতম পুম্বদা খঙবা ঙমখি। মদুদি পথাপ্তা শেঞ্জা থুমজা তৌবনি। জম্মু কশ্মিরগী মীয়াম্না শেঞ্জা থুমজা পামদে, তুকৎচৈ। মখোয়না মসি পেল্লবনি। শেঞ্জা থুমজাগী লাইনাবু মরু ফংনা মুত্থৎনবা থম্মোই শেংনা হোৎনবগীদমক্তা ঐহাক্না মনোজ সিনহাজী অমসুং মহাক্কী তীম্বু থাগৎচরি। নহারোলশিংনা হৌজিক্তি রাজ্যগী লৈঙাকপগী শরুক ওইরবনি, রাজ্যসিনা হোৎনরিবা কয়া, থম্মোই শেংবা লৈঙাক অসিনা হোৎনরিবা অমসুং মনোজ সিনহাজীনা হোৎনরিবা খুদিংগী শরুক ওইদুনা মসিগী শক্তি পাঙ্গল ওইনবা হোৎনবনা মখোয়গী থৌদাং ওইরবনি। ঙসি থবক খনবগী চিথী ফংলিবা নহারোল খুদিংনা মশাগী থৌদাং খঙনা, পুকচেল শেংনা অমসুং থৱাই হকচাং য়াওনা থবক তৌগনি হায়না ঐহাক্না থাজবা থম্লি। জম্মু কশ্মির অসিদি হিন্দুস্তানগী মমায়নি। ঐখোয় পুন্না জম্মু কশ্মিরবু অনৌবা থাক্তা পুখৎকদবনি। ঐখোয়গী মাঙদা ভারতপু চাউখৎ লৈবাক অমা ইং ২০৪৭ ফাওবদা ওইহনবগী পান্দম লৈরি, মসিবু মঙফাওনহন্নবগীদমক্তা ঐখোয়না অচেৎপা ৱারেপকা লোয়ননা লৈবাক্কী খন্দুনা থবক পায়খৎকপা তাই। অনৌবা অহৌবা অসিগীদমক্তা ঐহাক্না জম্মু কশ্মিরগী নহারোলশিংবু অমুক হন্না থাগৎলি অমসুং য়াইফ পাউজেল পীরি অমসুং অফবা মতম অমা লাক্লগনি হায়বগী থাজবা থম্লি। হন্না হন্না থাগৎচরি।
