নমস্কার!
অদোম খুদিংগী মফমদা ঐহাক্কী স্বামিনরায়ন থমজরি! ঐহাক্কী কৎচকী ইচিল ইনাওশিংবু কমদৌরিবগে? নুংঙাইরিকো? ঙসি অসিদি কে.কে. পতেল সুপর স্পিসিএলিতী হোস্পিতালবু মীয়ামগী সেবাগীদমক্তা শঙ্গাবা নুমিৎনি।
অদোম খুদিংবু ঐহাক্না মসিগীদমক্তা থাগৎচরি।
মীয়াম্না য়াবা মৃদু অমসুং মক্কম অমসুং ঐখোয়গী মুখ্য মন্ত্রী, শ্রী ভুপেন্দ্র ভাই পতেল, মহন্ত স্বামী পুজ্য ধর্মনন্দন দাসজী, কেন্দ্রগী হকশেল মন্ত্রী, দাঃ মনশুখ মন্দাবিয়াজী, গুজরাত বিধান সভাগী স্পীকর নীমাবেন আচার্য়া, গুজরাত সরকারগী অতোপ্পা মন্ত্রীশিং, হাউস্তা লৈরিবা ঐহাক্কী মরুপ, শ্রী বিনোদ ছাব্রা, মীয়ামগী অতোপ্পা মীহুৎশিং, ইকায় খুম্ননীংঙাই ওইরবা লাইনীংবশিং, কৎচকী লেৱা পতেল এজুকেসন অমসুং মেদিকেল ত্রস্তকী চেয়র্মেন গোপালভাই গৌরছিয়াজী, অতোপ্পা ত্রস্তী, খুন্নাইগী শক্নাইরবা মরুপশিং, লৈবাক অমসুং মালেমগী চেরিতী পীবীরিবা মীওইশিং, স্পিসিএলিস্ত অমসুং থৌবুরোই অমসুং সেবা তৌরিবশিংগা লোয়ননা ঐহাক্কী কৎচকী নুংশিরবা ইচিল ইনাওশিং!
হকশেলগা মরী লৈনবা অসিগুম্বা চাউরবা থৌরমগীদমক্তা ঐহাক্না কৎচকী মীয়াম্বু থাগৎচরি। গুজরাতপুসু থাগৎচরি। ভুজ অমসুং কুৎচকী মীয়াম্না য়ুহা হাবনা নংহনখিবা অমাঙ-অতাশিংবু তুংদা থনমদুনা, মখোয়গী শুবা-নোম্বা কনবগী থৌওংনা মখোয়না লমদমসিগীদমক্তা অনৌবা লাইবক হৌজিক শেম্লি। ঙসিদি, লমদমসিদা মতমগা চুনরবা মেদিকেল সর্ভিস কয়া অমা লৈরে। পরিং অসিগী মতুং ইন্না, ভুজনা মতমগা চুনবা, সুপর স্পিসিএলিতী হোস্পিতাল অমা ঙসি ফংজরে। হোস্পিতাল অসি লমদমসিগী তঙাই ফদবা মীওইশিংদা তেংবাং পীবা খ্বাইদগী অহানবা সুপর স্পিসিএলিতী হোস্পিতালনি অমসুং মসিনা লান্মী, পেরা মিলিতরী লান্মী অমসুং ত্রেদর লাখ কয়াগা লোয়ননা কুৎচকী মীয়ামদা মগুন লৈবা অনা লাইয়েং শোইদনা ফংহনগনি।
মরুপশিং,
হেন্না ফবা হকশেলগী খুদোংচাবশিং অসি লাইনা লাইয়েংবখক্তা অকক্নবা নত্তে, মখোয়না খুন্নাইদা অচুম্বা ৱায়েল ফংহনববুসু পুক্নিং থৌগৎলি। লাইরবশিংগী মফমদা অহোঙবা অমসুং খাইদগী ফবা লাইয়েংবগী খুদোংচাবা ফংবা মতমদা, মহাক্না পথাপ্তা থাজবগী চাং হেনগৎলি। মখোয়না লাইয়েংবদা শেল চঙবদা ৱাজবগী থৌওংদগী মনিং তম্বা মতমদা, মখোয়না অচেৎপা ৱাখল্লোনগা লোয়ননা লাইরবগী খয়াত্তগী থোক্নবা হেন্না কন্না শু-নোম্মি। অসিগুম্বা ৱাখল্লোনশিং অসিনা তুং ইন্দুনা, মমাংগী চহিশিংদা হেল্থ সেক্তরগী স্কিম খুদিংবু থবক ওইনা পায়খৎখি। অয়ুশমান ভারত স্কিম্না জন ঔশধী য়োজনাগা লোয়ননা লাইরবা অমসুং মিদ্দল ক্লাসকী ইমুংশিংগী অনা লাইয়েংবদা লুপা করোর লাখ কয়া তুংশিনবা ঙমখিবদা অচৌবা থৌদাং য়াখি। অয়ুশমান ভারত হেল্থ ইনফ্রাস্ত্রকচর স্কিমগুম্বা হকশেল অমসুং ৱেলনেস সেন্তর অমসুং কেম্পেনশিংনা মীপুম খুদিংনা অনা লাইয়েং লায়না ফংহনবদা তেংবাংলি।
অয়ুশমান ভারত দিজিতেল হেল্থ মিসন্দগী অনাবশিংনা খুদোংচাবা হেন্না ফংলগনি। মতমগা চুনবা অমসুং অরুবা হেল্থকেয়র ইনফ্রাস্ত্রকচরশিংবু অয়ুশমান হেল্থ ইনফ্রাস্ত্রকচর মিসনগী খুত্থাংদা জিলাশিংদা শেমগৎ-শাগৎলি অমসুং ব্লোক্কী থাক্তসু য়ৌহল্লি। অদুগা জিলা খুদিংদা হৌজিক হোস্পিতাল কয়া শারি। মান্নবা থৌওং ওইনা, এমস কয়াসু লিংখৎখ্রে। মেদিকেল কোলেজনা মেদিকেল এজুকেসন পাকথোক চাউথোকহল্লি অমসুং লৈবাক অসিনা মথংগী চহি ১০গী মনুংদা রেকোর্দ ওইবা দাক্তর মশিংসু ফংবা য়ানা লৈরি।
কান্নবশিং অসি ঐখোয়গী ক্তচকী মরুপশিংনসু ফংলগনি। গোপালভাইনা হৌজিক্তসু ঐহাক্কী ইফমদা হায়বীখ্রে অমসুং ঐহাক্না লাল কিলাদগীসু হায়খিবা অদুনি। নীংতম্বগী অমৃত মহোৎসবকী মতমসিদা মীওই খুদিংনা মশা-মশাগী থৌদাং অমা নত্ত্রগা অমদি শোইদনা য়াগদবনি। ঙসিদি, ৱারেপ অদু মঙফাওনরে। ইশাগী থৌদাং খঙবা, খুন্নাইগীদমক্তা খনবা, খুন্নাইগীদমক্তা অফবা ৱাখল্লোন লৈবা, মসিদি খ্বাইদগী চাউবা থৌওংনি অমসুং কৎচকী ওইনসু য়াম্না শীংথানীংঙাই ওইবা মগুন্নি। অদোম্না মফম অমদা হেক্তা চৎলু, মীওই অমা হেক্তগা থেংনৌ, কৎচতগীনি হায়বীয়ু। মদুগী মতুংদগীদি, অদোম অসি করম্বা খুঙ্গংদগীনো, করম্বা জাৎনো হায়বা কনা অমত্তনা হংলক্লোই। অদোম অসি খুদক্তা মখোয়গী মীওই ওইখ্রগনি। মসি কৎচকী অখন্নবা মগুন্নি। ভুপেন্দ্র ভাইনসু হায়খিবা অদুনি, কৎচ অসি ঐহাক্কী য়াম্না নুংশিজবা জিলা অমনি। অৱাবগী মতমদা তেংবাংখিবা মতমদা, লৈনরম্বা মরীনা হেন্না চেৎশিল্লি অমসুং হেন্না নীংথিজবা অমা ওইহল্লি। কৎচতা য়ুহা হাখিবা মতমদা থোকখিবা অমাঙ-অতাগী মতমদা ঐহাক্না অদোমগা লৈনখিবা মরী অদুনা মরম ওইরগা হৌজিক ঐহাক্কা অদোমগা লৈনরিবা মরী অসি ওইথোক্লিবনি। ঐহাক্না কৎচ থাদোকপা ঙম্লোই, কৎচনসু ঐহাকপু থাদোকপা ঙম্লোই। অসিগুম্বা লাইভক ফবসি মীওই অমগী পুন্সিদা য়াম্না তাঙনা থোকই, অদুগা মসি ঐহাক্কী ওইনা য়াম্না চাউথোকচনীংঙাইনি। গুজরাতনা ঙসিদি মাইকৈ মরিদা চাউখৎলি।
গুজরাতকী চাউখৎপগী ৱারী অসি গুজরাত খক্তদা নত্তনা লৈবাক্নসু মশক খঙই। অদোম্না অমুক্তা খন্থবীয়ু। দিকেদ অনিগী মমাংদা গুজরাত্তা শুপ্নগী মেদিকেল কোলেজ ৯ লৈরম্মি অদুগা গুজরাতকী নহারোলশিংনা দাক্ত ওইনীংবা তারবসু শুপ্নগী সিত ১১০০ খক্তমক লৈরম্মি। ঙসিদি, এমস অমা লৈরে, দর্জন অহুমদগী হেন্না মেদিকেল কোলেজ লৈরে অদুগা দিকেদ অনিগী মতুংদা সিত ৬০০০ লৈরে, অদুগা ইং ২০২১দগী হৌদুনা সিত ৫০গা লোয়ননা রাজকোৎকী এমসনা মথৌ তৌবা হৌখ্রে। ভাবনাগর মেদিকেল কোলেজ অপগ্রেদ তৌবগী থবকসু অয়াম্বনা লোইশিল্লক্লে। মমা অমসুং অঙাং লাইয়েংবগী বেদ ১৫০০ লৈবা অহমেদবাদ সিভিল হোস্পিতাল অসিসু মশক থোকপা থবক অমনি। অঙাং অমসুং মমা অনিমক্কী নীংথিনা য়েংবীনবা মপুং ফাবা খুদোংচাবা অমা মফমসিদা লৈরে। কার্দীওলোজী ওইরো, রিসর্চ ওইরো, মফমসিদা বেদ ৮০০গী তোঙানবা হোস্পিতাল অমা লৈরে অমসুং মসিদা রিসর্চকী থবকসু পাংথোকপা য়ারে। কেন্সর রিসর্চকী থবকসু হৌজিক গুজরাত্তা নীংথিনা পাংথোক্লি। ঐখোয়গী লৈবাক অসিদা কিদনী অমসুং দাইলাইসিসকী অনাবশিংগী শিংনবা কয়া লৈরম্মি। চয়োল অমদা দাইলাইসিস অনিরম তৌফম থোকপদু, থা অমদা অনিরক তৌবদা অৱাবা ওইরম্মি। মসিনা হকচাংদা করি ওইহল্লি? ঙসিদি, জিলা খুদিংদা লেম্না দাইলাইসিস তৌবগী খুদোংচাবা ফংহল্লে। ঐখোয়না হৌদোক্লে। মতৌ অসুম্না, য়াম্না নীংথিনা থবক পায়খৎলি।
ঐহাক্না অদোম ইচিল ইনাওশিংগী মফমদা ৱারী অমা শানিংই। হৌজিক্কী মতমসি নীংতম্বগী অমৃত মহোৎসবকী মতম্নি, ঐখোয়না হোস্পিতাল কয়া অমা শারে, কয়া অমা শারবসু, ফমুং য়াম্না থম্লবসু, মসিনা পুম্নমক্কী ৱারোইশিন ওইবদি য়ারোই। ঐখোয়না খুন্নাইগী মনুংদা ৱাফম কয়া খঙহন্নবা, ইশা-ইশাগী থৌদাং পুম্নমক পাংথোক্নবা অমসুং হোস্পিতাল চৎনদ্রবসু য়াবা ফিভম অমা শেম্বগী থবক পাংথোকপা য়াই। অনাবগী শিংনবা কয়াগী ৱারোইশিনদি হোস্পিতাল চৎনদ্রবসু য়ানবা শীনবনি অদুগা ঐখোয়না ঙসি ফজরবা হোস্পিতাল অমা শঙ্গারি। ঐহাক্না য়াইফ পাউজেল পীয়ু হায়রবসু করি হায়য়ু হায়বনো? ঐখোয়গী কে.কে. পতেল চেরিতেবল ত্রস্তনা লুপা করোর কয়া থাদরগা ফজরবা হোস্পিতাল অমা শারে, অদুবু মীওই অমত্তা হোস্পিতাল চত্তনবা ইশ্বরনা থৌজানবীয়ু, অদুগা হোস্পিতালশিং অসি হাঙদুনা লৈহনবীয়ু হায়রিবরা? ঐখোয়না অসিগুম্বা নুমিৎপুদি য়েংবা পাম্মি। অদুগা হোস্পিতাল করম্না হাঙগনি, ঐখোয়না লু-নানবদা পুক্নিং হেন্না চঙলবা মতমদা। লু-নানবগী মতাংদা মীয়াম মরক্তা থৱাই য়াম্না য়াওনবা, য়ুম মনুংদা অমোৎ অকাই অমত্তা লৈহন্দবা, অমোৎপবু য়েক্নবনি খনবা, অসিগুম্বা ফিভম অমা ঐখোয়না লাকহনবা তাই, মদু ওইরবদি, লাইনা অমত্তনা মীওই অমদা চঙনবা লম্বী লৈররোই, অমত্তা লৈররোই। মতৌ অসুম্না, থক্নবা অশেংবা ঈশিং, লৈবাকসিদা লু-নানবগী খোঙজং চত্থরি, অমাংশঙ শাবগী খোঙজং চত্থরি, মপান থোংদা অমাংবা তৌবদগী নীংতম্বা ফংনবা খোঙজং চঙশিল্লি, খুন্নাইনসু মপুং ওইনা তেংবাংলি। অদুগা কোরোনাগী লনফমদসু, ইশাগী ইম্যু কল্লিবমখৈ, লান অসি মায় পাক্কনি হায়বা পুম্নমক্না খঙনরি। অচৌবা নোংলৈ অমা লাকখি, অদুবু ঐখোয়না হৌজিকসু লান্থেংনরি, কোরোনা হৌজিক লোইদ্রি, ঐখোয়না মসি কাওবা য়াদে। অদুবু, ঐখোয়না অতোপ্পা চেকশিন থৌরাং অমসুং জল জীবন মিসনগী খুত্থাংদগী য়ুম্থোং খুদিংদা তোতি ঈশিং ফংহন্নবা লৈবাক পুম্বদা থবক কন্না পায়খৎলি। থক্নবা ঈশিং অশেংবা ফংবগুম্না মচি ওইবা চিঞ্জাকসু চাগদবনি। অদুগা ঐখোয়না জঙ্ক ফুদ চাদুনা অদুমক লৈরবা, পোস্ত ওফিস্তা চিথি থাদবগুম্না হকচাং মনুংদা অদুমক থাদদুনা লৈরবদি, ইশাদগী কান্নবা ফংলোই, হকশেল অদুমক শোকচিল্লক্কনি। ঐহাক্কী ৱারোল তাবদা ঙসি মফমসিদা ফম্লিবা দাক্তরশিং নোক্লি। দাইতকী মতাংদা থাইনদগী ইরম্লবা ৱারোল কয়াদসু য়াওরম্লবনি। ঐখোয়না চাব খুদিংদা অকক্নবা থম্বসি মরু ওই হায়না। মীয়াম্না পানরম্লগনি, আচার্য়া বিনোবাজীনা য়াম্না ফজবা ৱাফম অমা হায়বীরম্মি, চরা হেনবদি লায়বনি, অদোম্না লায়না চরা হেনবা ঙমগনি, অদুবু চাং অমদা চাবা থকপা হায়বসিনা হেন্না অরুবা ওই। তেবলদা ফমদুনা লৈরিঙৈদা, মথেল মরি মঙা হেক পুথোরকপদা ৱাখলদা চানীংবা অদুমক ফাওবনি।
ইশাগী অরুম্বা হেনগৎলকপা অসিদা ৱাখল য়াম্না ৱানবনি। তিনবীরবা মীয়াম্না ইকায়বীগনি, নোয়বা য়াম্না হেনগৎনরবনি, য়ুম্থোং খুদিংদা দাইবিতিস নারবনি। অসিগুম্বা ৱাফম কয়া লৈ অমসুং দাইবিতিস হায়বসি মালেমদা লৈবা লাইনা খুদিংবু লাকপীয়ু হায়না পাউজেল পীবা লাইনা মখল অমনি। ঐখোয়না ইশাগী অরুম্বা হন্থহন্নবগীদমক্তা মীওই খরনা কে.কে. হোস্পিতালগী মাইকৈদা য়েংই। লাইনা অসিদগী কনগে হায়রবদি অয়ুক্তা খরা-খরা চৎসি, অসিগুম্বা শাজেল পাংথোকপনা ঐখোয়বু হোস্পিতালদা কৈদৌনুংদা চৎহল্লোই। ঐখোয়না মালেমগী য়োগগী নুমিৎ পাংথোক্তুনা মালেম শিনবা থুংবদা য়োগগী খোঙথাং পায়খৎলি, চলায়রি। মালেম পুম্বনা য়োগবু য়ারে। কোরোনাগী মতমদা মালেম শিনবা থুংবনা য়োগ অমসুং অয়ুর্বেদদা মিৎয়েং চঙনখিবা অসি ঐখোয় খুদিংনা উনখ্রবনি। মালেমগী লৈবাক খুদিংদা ঐখোয়না করিগুম্বা অমা নত্ত্রগা অমা অদুম উবা ফংবনি। ঐখোয়গী য়াইঙং অসি খ্বাইদগী য়াম্না এক্সপোর্ত তৌখ্রে। ভারতকী মনা-মশিং অসি হকচাংগীদমক্তা কয়া য়াম্না কান্নবগে হায়বসি মীয়াম্না কোরোনাগী মতমদা কৈদৌবগী খঙনখ্রিবনো? অদুগা, ঐহাক্না কৎচকী মীয়ামদা হায়নীংবদি, হন্দক্কী জুন থাদা মালেমগী য়োগ নুমিৎ লাকপা মতমদা ঐখোয়না মালেমগী রেকোর্দ থম্বা ঙমগদরা? কৎচতা য়োগগী চাউরবা থৌরম ঐখোয়না পাংথোকপা য়াই। মসিদা ঙম্লোইদবা খুঙ্গং অমত্তা কৎচতা লৈতে, অদুগা মসিগী শেম শানবা থা অমা মখায়দি লৈরি। কন্না হোৎনসি, য়োগগী মরী লৈনবা খ্বাইদগী ফবা থৌরম অমা পাংথোকসি। য়েংবীয়ুকো, হোস্পিতাল চৎপগী তাঞ্জা কৈদৌনুংদা ফংলোই। অদুগা মীওই অমত্তনা কে.কে. হোস্পিতালদা চৎপগী তাঞ্জা কৈদৌনুংদা ফংদবা হায়বসি ঐহাক্কী অপাম্বনি। ঐহাক্না পাম্বদি কৎচকী মীয়াম খুদিংনা মশা-মউ ফনা লৈবসিনি। হোই, এক্সিদেন্ত থোকপদগী চত্তবা য়াদবা হায়বসিদি ঐখোয়গী খুত্তা অমুক লৈত্রে, অদুবু ঐহাক্কী ৱাখল্লোন্দি হায়রিবা থৌওং অসি অথুবা মতমদা পাংথোকসি হায়বসিনি।
ঐহাক্না হৌজিক কৎচকী ইচিল ইনাওশিংগা উন্নরবনিনা, ঐহাক্না করিগুম্বা অমা পীবীয়ু হায়বগী হক অসিদি শোইদনা লৈরে, অদোম্না পীদবসু য়ারোই। হায়ফম থোকপনি খঙদুনা হায়রিবনিকো, মালেমগী লৈবাক কয়া অসিদা ঐখোয়গী কৎচকী ইচিল ইনাও কয়া লৈ। ঐখোয়গী কৎচকী হরাওবা পাংথোকপা য়েংনবা মালেমগী লৈবাক্কী মীওইশিংনা মশানা লাকচরবনি। কৎচকী জাহো-জলালী হেনগৎলক্লি। শেন্মিৎলোনসু য়াম্না ফগৎহল্লি। মসিদগী হেন্না নীংথিবা ৱাফমদি, য়ুমদা লাকপা মীওইবু তরাম্না ওকপা অমসুং মখোয়গী নুংঙাইনবা হোৎনবগী কৎচকী মতৌসি লৈবাক পুম্বনা থাগৎনরি। কৎচ হায়বদি কৎচ হায়বনি হায়না মীয়াম্না হায়নবা হৌরবনি। কৎচকী নুংঙাইবা ফোংদোকপদা সরকারনা লোইনমক হোৎনরবা, কৎচকী মীয়াম্না লাক্লিবা মীয়াম্বু নুংঙাইনবা শিল্লবা, মদুবু য়াম্না থাগৎনগনি। অদুগা মীরম মচা অমত্তা কৎচকী মফমদা উদবা হায়বসিদি য়াদে। হেল্থ তুরিজমগীদমক্তা মীয়াম লাক্নবা হায়বগীদমক্তবু ঐখোয়না হোস্পিতাল শারিবনি। অদুনা মীয়াম লাকহন্নবা অমুক্তা হান্না হোৎনসি। ঐহাক্না কৎচকী ইচিল ইনাওশিং, মরু ওইনা, লেৱা পতেল খুন্নাইগী মরুপশিংদা, করিগুম্বা খরা হায়জনীংই। লেৱা খুন্নাইগী মীয়ামদি ভারত্তদা নত্তনা মালেমগী মফম খুদিংদা লৈনরি। ঐহাক্না চহি খুদিংগী পামজবদি, অদোমসু হিসাব তৌবীয়ুকো, ঐখোয়গী গোপালভাইদি হিসাব-কিতাবকী মীওইনি। মহাকপুদি শোইদনা তৌরগনি, অদুনা ঐহাক্না মীয়ামদা হায়নীংবদি, মীরমদা লৈবা কৎচকী ইমুংগী মীওইনা মীরমগী মচা য়ামদ্রবদা মঙাবু ঐখোয়গী কৎচকী রান য়েংনবা শোইদনা লাকহনবীয়ু। কৎচকী রান অসি মীওই কয়ানা পুমথন-থন্না লৈগনি অদুগা মালেম শিনবা থুংবদা য়াম্না ফবা মওংদা কৎচপুসু শক্তাকপা ঙমগনি। মসি য়াম্না চাউবা থবক নত্তে। হাকথী অমত্তং খনবা মতমদা ভুজতা লাক্কদবা মীওইনি অদোমদি। মীরমদা হেক নারকপা মতমদা কৎচকী ভুজতা চত্তুনা চয়োল অমগী অইং-অশা হোংহনবা মতমদা হকচাং অমুক ফরক্কনি হায়নরিবনি। মসিনি ঐখোয়না কৎচপু নুংশিবগী চাং। অসুম্না নুংশিবা ওইরবদি, য়ামদ্রবদা মীরম মচা মঙা, ভারত মচা নত্তেকো, কৎচকী রান্দা পুবীরকউ। হন্দক্কী দিসেম্বরগী খৃস্ত মাস্তা থাবীরক্কদবনিকো। নীংতম্বা ফংলবা মতুংদা, সর্দার পতেল সাহেবপু ইকায় খুম্নবা থৌদোক য়াম্না চাউনা পাংথোক্কদৌরিবনি। সর্দার পতেলগী নীংশিং খুভম অমা শারিবা অসিদসু অদোম্না চাউথোকচরমগনি। অদোম্না ঐহাকপু নীংথিজবা থবক পাংথোকই হায়না থাগৎপীরি। গুজরাত সরকারবুসু অফবা থবক পায়খৎপগী ইকায় খুম্নরি। মসিনা য়াবা নত্তেকো।
মরুপশিং, মীরমগী নাগ্রিক ৫না কৎচকী রান লাকপসিদা মখোয় মীওই ৫ অসিনা স্তেচ্যু ওফ য়ুনিতীবুসু য়েংখিবা হায়বসি ঐহাক্কী অপাম্বনি। মসিদা, গুজরাতকী তুরিজম য়াম্না চাউখৎকনি অমসুং তুরিজম হায়বসি লাইরবশিংদসু থবক য়াম্না পীবা কারবার অমনি। শেল য়াম্না থাদদনা শেল য়াম্না তোংবা য়াবনি। অপীক-অপীকপা পোৎলম কয়া য়োন্দুনা থা তরানিথীগী থবক শুপ্নগী থা অনিদা পাংথোকপগী ফিভম অদোম্না উরবনি। তুরিস্ত লাকপা মতমদা রিক্সো থৌবা মীওইসু শেল তাল্লি, তেক্সি থৌবা মীসু তাল্লি, চা য়োনবা মীসু তাল্লি। অদুনা কৎচপু তুরিজমগী অচৌবা মফম অমা শোইদনা ওইহন্সি হায়না ঐহাক্না অদোমদা হায়জনীংই। মসিদা মীরমদা লৈবা ঐহাক্কী কৎচকী মীওইশিংনা য়ামদ্রবদা মীরম মচা ৫বু ভারত্তা চৎনবা থেমগদবনি, কদাইদা চৎপনা নুংঙাইগনি, মফমসিগী হোস্পিতালিতী য়াম্না নীংথিবনি, অমুক্তা চত্তুনা য়েংউ হায়না শোইদনা লেপকনি হায়না ঐহাক্না অদোমগী মফমদা থাজবা থম্মি। অদুগা, তুরিজমগী মতাংদা ভারতনা মালেমগী পুক্নিং নীংথিনা চিংশিল্লে হায়বসি ঐহাক্না ১০০দা ১০০ শোইদ্রে হায়বা ঙম্মি। কোরোনাগী মমাংদা মফমসিদা তুরিস্ত য়াম্না লাকপা হৌনরম্লবনি, অদুবু কোরোনা লৈবদগী লেপখ্রে। হৌজিক্তি অমুক হৌরবনি, অদোম্না মসিদা ঐহাক্কী মতেং পাংলবদি, মাইকৈ খুদিংদা ঐখোয়বু থাগৎনরগদবনি। মসিগী থবক অদোম্না পাংথোকপা হায়বসি ঐহাক্কী অপাম্বনি। অদুগা থবক অমগা ৱাৎলি। ঐহাক্না কৎচকী মীয়ামদগী মসিগী থাজবদি অদুমক লৈরবনি। ঐখোয়গী মালধারীভাইনা কৎচতা লাক্তুনা থা মরি মঙাদি অদুমক লৈ, অদুগা থা তরুক তরেৎকী মতুংদা মখোয়গী শা-ঙা পুদুনা অমুক লম্বীদা চৎখি। মাইল কয়া মখোয়না চৎলি, মসিনা ঐখোয়গী কৎচপু চাউথোকচহনবরো? অদোম্না কৎচ থাদোক্তবা য়াদবা মতম, চাউরবা মালেমসিদা কৎচ খক্তদগী থাদোক্তুনা চত্তবা য়াদবরা? ঈশিংগী অৱাবা লৈবদগী কৎচতা লৈবদা অৱাবা ওইনখি। অঙাংশিং ৱানখি। অসিগুম্বা ফিভম ওইখি। অদুনা, মালেমগী অতোপ্পা লমদমদা চত্তুনা থবক শুদুনা পুন্সি মহিং তাল্লিবনি। মখোয়না কনা অমত্তা নিরুদে, মশাগী মরোমদোম লেপচদুনা চৎলু চৎলুবা মফম খুদিংদা অফবা ঙাক্তা তৌখি। খরা অমনা স্কুল চলায়রি, খরা অমনা শন লোইফম চলাইরি, চৎলু-চৎলুবা মফমদা কৎচ মচাশিংনা থবক অমা নত্ত্রগা অমা তৌই। অদুগা ঐহাক্না মালধারী ইচিল ইনাওশিংদা হায়জনীংবদি, হান্নগী মতম্না হান্ননি, হৌজিক্তি কৎচতা ঈশিং লৈরে।
হৌজিক্তি থাজবা অমসুং অপাম্বা য়াম্না লৈরে। মীয়ামগী মফমদা স্বামিনরায়ন হায়জনীংই। পুম্নমক্কী য়াইফবা ওইরসনু। থাগৎচরি!
