য়োর মেজেস্তী ভুতানগী নীংথৌ,
য়োর মেজেস্তী মরিশুবা নীংথৌ,
ইকাই খুম্নরবা নীংথৌগী ইমুং-মনুংগী মীওইশিং,
ভুতানগী প্রধান মন্ত্রী,
অতোপ্পা দিগ্নিতরীশিং,
অমসুং ভুতানগী ঐগী ইচিল-ইনাওশিং!
কুজুজাংপো লা!
ঙসি অসি ভুতানগীদমক্তা, ভুতানগী নীংথৌগী ইমুং-মনুংগীদমক্তা অমসুং মালেমদা শান্তি লৈবদা থাজবা থম্লিবা মীওই পুম্নমক্কীদমক্তা য়াম্না মরু ওইবা নুমিৎ অমনি।
ভারত অমসুং ভুতান্না চহি চা কয়াগী মমাংদগী অচেৎপা স্পিরিচুএল অমসুং কলচরেলগী মরী লৈনরি। মরম অদুনা, অসিগুম্বা মরুওইবা থৌরম অসিদা শরুক য়ানবা ভারত অমসুং ঐহাক্কী ফিরেপ ওইখি।
অদুবু ঙসি ঐহাক মফম অসিদা য়াম্না নুংঙাইতবগা লোয়ননা লাক্লি। ঙরাং নুমিদাং দিল্লীদা থোকখিবা অকিবা ফংলবা থৌদোক অসিনা ঐখোয় পুম্নমকপু য়াম্না নুংঙাইতবা ফাওহল্লে। ঐহাক্না লৈখিদ্রবশিংগী ইমুং-মনুংশিংগী অৱাবশিং অদু ফাওবা ঙম্মি। লৈবাক অসিনা মখোয়গী অৱাবদা শরুক য়ারি অমসুং মখোয়গীদমক লেপ্পী।
ঐহাক্না কেস অসিগা মরী লৈন্ননা এজেন্সীশিং অমসুং মরুওইবা ওফিসিএলশিংগা লোয়ননা নুমিদাং চুপ্পা ৱারী শানখি। খন্ন-নৈনবগী থবকশিং মখা তানা চত্থখি, অমসুং ইনফোর্মেসনগী শরুকশিং অদু অমত্তা ওইনা পুনশিনখি।
ঐখোয়গী এজেন্সীশিংনা মসিগী লৌতুনবা অসি মপুং ফানা থীদোক্কনি। মসিদা য়াওরিবা মীওইশিং অসি লেম্না থারোই।
মরাল লৈবা পুম্নমকপু ৱায়েল-পথাপকী মতুং ইন্না চৈরাক পীগনি।
মরুপশিং,
ঙসি, অমরোমদা, ঐখোয়না গুরু পদ্মাসম্ভাবাগী থৌজালশিংগী মখাদা গ্লোবেল পিস প্রেয়র ফেস্তিবেলগীদমক মফম অসিদা পুল্লি অদুগা অতোপ্পা অমরোমদনা ঐখোয়না ভগৱান বুদ্ধগী অশেংবা পিপ্রাহৱাগী রেলিকশিং উৎলি। মসিগা লোয়ননা, ঐখোয়না হিস মেজেস্তী মরিশুবা নীংথৌগী 70শুবা মপোক কুমওনসু পাংথোক্লি।
মসিগী থৌরম অসি অমসুং নখোয় ময়াম্না মফম অসিদা লাকপা অসিনা ভারত অমসুং ভুতানগী মরক্তা লৈনরিবা অচেৎপা মরী অদু উৎলি।
মরুপশিং,
ভারত্তা, ঐখোয়গী ইপা-ইপুশিংনা ঐখোয়দা "বসুধৈব কুতুম্বকম" হায়বদি মালেম পুম্বা ইমুং অমনি হায়না তাকপীখি।
ঐখোয়না হায়নৈ – সর্বে ভবন্তু সুখিন হায়বদি, মালেমসিদা লৈরিবামীপুম খুদিংমক নুংঙাইবা ওইরসনু।
ঐখোয়না হায়-
ধ্যৌ শান্তি
অন্তরিক্ষম শান্তি
পৃথিবী শান্তি
আপ শান্তি
ওশাধয় শান্তি
হায়বদি, তাইবংপাল পুম্বদা, অতিয়া, শুন্দ্রংদা, পৃথিবীদা, ঈশিংদা, হিদাক-লাংথকশিংদা, পাম্বীশিংদা, অমসুং অহিংবা জিবা পুম্নমক্তা শান্তি লৈবা ওইরসনু। মসিগী ৱাখল্লোন অসিগা লোয়ননা, ভারতনা ঙসি ভুতান্দা পাংথোকপা গ্লোবেল পিস প্রেয়র ফেস্তিবেলদা শরুক য়ারি।
ঙসিদি মালেমগী মফম কয়াদগী লাকপা লম্বোইবশিংনা মালেমগী শান্তিগীদমক পুন্না লাই খুরুম্লি। অমসুং মসিদা ভারত মচা বিল্লিয়ন 1.4গীদমক্তা লাই খুরুমনসু য়াওরি।
মীওই কয়ানা খঙদবসু য়াই, অদুবু ঐগী পোক্নফম লমদম, ভদ্নগর অসি মতম কয়াগী মমাংদগী বদ্ধ হেরিতেজকী অশেংবা মফম অমা ওইদুনা লাক্লি। অমসুং ঐহাক্কী থবক মফম বারানসী অসিসু বদ্ধ ধর্মগী ইকাই খুম্নরবা মফম অমনি। মরম অসিনা থৌরম অসিদা শরুক য়াবা হায়বসিগী অখন্নবা ৱাহন্থোক লৈ। শান্তিগী মঙাল অসিনা ভুতান অমসুং মালেমগী য়ুমথোং খুদিংমক্তা মঙাল শন্দোকপা ওইরসনু হায়না ঐহাক্না থৌনিজরি।
মরুপশিং,
ভুতানগী মরিশুবা নীংথৌগী পুন্সি অসি লৌশিং, নোলুকপা মতৌ, থৌনা অমসুং লৈবাক অসিগীদমক্তা কত্থোকপগা লোয়ননা শেবা তৌবা অসিগী অপুনবা অমনি।
মহাক্না চহি 16 খক্তদা অচৌবা থৌদাং অমা লৌখি। মহাক্না মহাক্কী লৈবাক অসি মপাদা পীবা মীনুং অদু পীখি অমসুং ভিজন অমগা লোয়ননা মাংলোমদা চংশিনখি। মহাক্কী চহি 34 নীংথৌ ওইরিঙৈ মতমদা, মহাক্না ভুতানগী হেরিতেজ অমসুং দিবেলপমেন্ত অনিমক মাংলোমদা পুখৎখি।
ভুতানদা দিমোক্রেতিক সিস্তেমশিং লিংখৎপদা অমসুং ঙমখৈগী মফমশিংদা শান্তি লৈহন্নবা হিস মেজেস্তীনা মরু ওইবা থৌদাং লৌখি।
অদোম্না হৌদোকখিবা "গ্রোস নেস্নেল হেপ্পিনেস"কী ৱাখল্লোন অসি ঙসিদি মালেম শীনবা থুংনা চাউখৎপগী মরু ওইবা চাং ওন্নবা অমা ওইরে। লৈবাক অমা শেমগৎপা হায়বসি GDP খক্তা নত্তে, মীওইবা খুন্নাইগী য়াইফ-থৌরাংগী মতাংদসু অমনি হায়বসি অদোম্না উৎলে।
মরুপশিং,
ভারত অমসুং ভুতানগী মরক্তা লৈনরিবা মরুপ-মপাং ওইবগী মরী অসি মপাঙ্গল কনখৎহনবদা হিস মেজেস্তীনা মরু ওইবা থৌদাং লৌখি। মহাক্না থোনখিবা য়ুম্ফম অদুদা ঐখোয়গী লৈবাক অনিগী মরক্তা লৈনরিবা মরী অসি মখা তানা হেনগৎলক্লি।
ভারত মচা পুম্নমক্কী মায়কৈদগী ঐহাক্না হিস মেজেস্তীদা নুংঙাইবা ফোংদোকচরি অমসুং মহাক্কী হকচাং ফনা লৈনবা অমসুং পুন্সি শাংনা হিংনবা থৌনিজরি।
মরুপশিং,
ভারত অমসুং ভুতান অসি ঙমখৈনা শম্নবতা নত্তনা নাৎশিংনা শম্নরি। ঐখোয়গী মরী অসি ভেল্যুশিং, ইমোসনশিং, শান্তি, অমসুং প্রোগ্রেসকী মরী অমনি।
ঐহাক্না 2014দা প্রধান মন্ত্রী ওইরকপা মতমদা ঐহাক্কী অহানবা মপাল লমগী খোঙচৎ ভুতানদা ওইখি। হৌজিক ফাওবা ঐহাক্কী থম্মোয়দা হায়রিবা মতমশিং অদু নীংশিংদুনা লৈরি। ভারত অমসুং ভুতানগী মরক্তা লৈনরিবা মরুপ-মপাং ওইবগী মরী অসি চেৎলি অমসুং মপাঙ্গল কল্লি। ঐখোয়না অৱাবা মতমদা অমনা অমবু মতেং পাংখি, ঐখোয়না পুন্না অৱাবা মায়োক্নখি, অমসুং ঙসিদি, ঐখোয়না খুমাং চাউশিনবা অমসুং চাউখৎপগী মায়কৈদা চংশিল্লকপগা লোয়ননা, মসিগী মরী অসি হেন্না মপাঙ্গল কনখৎলক্লি।
হিস মেজেস্তী ইনীংথৌনা ভুতানবু অনৌবা থাক্তা পুখৎলি। ভারত অমসুং ভুতানগী মরক্তা থাজবা অমসুং চাউখৎ থৌরাংগী মরী অসি লমদম পুম্বগীদমক্তা মোদেল অমা ওইরি।
মরুপশিং,
ঙসি, ঐখোয়গী লৈবাক অনিমক্না খোঙজেল য়াংনা খুমাং চাউশিল্লকপগা লোয়ননা, ঐখোয়গী ইনর্জী পার্তনরশিপ অসিনা মসিগী গ্রোথ অসিবু হেন্না খুমাং চাউশিলহল্লি। হিস মেজেস্তী, মরিশুবা নীংথৌগী লুচিং মখাদা ইন্দিয়া-ভুতান হাইদ্রোপাৱর পার্তনরশিপকী উরেপ-উয়ুংসু তমখি।
মরিশুবা নীংথৌ অমসুং মঙাশুবা নীংথৌ অনিমক্না সস্তেনেবল দিবেলপমেন্ত অমসুং অকোইবগী ফিভম ঙাক-শেনবগী ৱাখল্লোনবু শৌগৎলি। মসিগী ভিজন অসিগী মতুং ইন্না, ভুতান অসি মালেমগী অহানবা কার্বোন নেগেতিব লৈবাক ওইরে। মসি য়াম্না চাউরবা মায় পাকপা অমনি। ঙসিদি, ভুতান অসি পর কেপিতা রিন্যুএবল ইনর্জী পুথোকপগী খ্বাইদগী মকোক থোংবা লৈবাকশিংগী মরক্তসু চল্লি।
মরুপশিং,
হৌজিক্তি ভুতাননা রিন্যুএবল ইনর্জীদগী 100%গী ইলেক্ত্রিসিতী পুথোক্লি। মসিগী খুমাং চাউশিনবা অসি মখা চত্থদুনা, ঙসি অতোপ্পা মরু ওইবা খোঙথাং অমা লৌখৎলি। 1,000 MW হেনবগী অনৌবা হাইদ্রোইলেক্ত্রিক প্রোজেক্ত অমা হৌদোক্লে। মসিনা ভুতানগী হাইদ্রোইলেক্ত্রিক কেপাসিতী চাদা 40 হেনগৎহনগনি। মসিগী মথক্তা, মতম শাংনা লেপখিবা অতোপ্পা হায়দ্রোইলেক্ত্রিক প্রোজেক্ত অমগী থবকসু অমুক হন্না হৌখ্রে।
ঐখোয়গী পার্তনরশিপ অসি হায়দ্রোইলেক্ত্রিসিতি খক্তদা লোইদে। হৌজিক ঐখোয়না সোলর ইনর্জীদা পুন্না অচৌবা খোঙথাং কয়া অমা লৌখৎলি। মসিগা মরী লৈনবা মরুওইবা এগ্রীমেন্তসু ঙসি খুৎয়েক পীনখ্রে।
মরুপশিং,
ঙসি, ইনর্জী কোওপরেসনগা লোয়ননা, ভারত অমসুং ভুতানগী মরক্তা কনেক্তিবিতী হেনগৎহনবদা ঐখোয়না মীৎয়েং থম্লি।
ঐখোয় পুম্নমক্না খঙই:
কনেক্তিবিতীনা খুদোংচাবা পীরি
অমসুং খুদোংচাবা অসিনা চাউখৎপা পুরকই।
মসিগী পান্দম অসিগা লোয়ননা, গেলেফু অমসুং সম্তেবু ভারতকী পাক চাউরবা রেল নেৎৱার্ক্কা শম্নহন্নবা ৱারেপ লৌখ্রে। প্রোজেক্ত অসি লোইরবা মতুংদা ভুতানগী ইন্দস্ত্রীশিং অমসুং লৌমীশিংনা ভারতকী অচৌবা কৈথেলশিংদা হেন্না লায়না চঙবা ঙম্লগনি।
মরুপশিং,
রেল অমসুং লম্বীগী কনেক্তিবিতীগা লোয়ননা ঐখোয়না ঙমখৈগী ইনফ্রাস্ত্রকচরদা খোঙজেল য়াংনা খুমাং চাউশিল্লি।
গেলেফু মাইন্দফুলনেস সিতীগীদমক হিজ মেজেস্তীগী মঙলান অদুদা ভারতনা মপুং ফানা মতেং পাংলি। ঙসি, ঐহাক্না অতোপ্পা মরুওইবা পাউজেল অমা পীবা পাম্মি। অথুবা মতমদা, ভারতনা গেলেফুগী মনাক্তা ইমিগ্রেসন চেক পোস্ত অমা লিংখৎলগনি। মসিনা মফম অসিদা লাকপা ভিজিস্তরশিং অমসুং ইনভেস্তরশিংদা হেন্না খুদোংচাবা ফংহল্লগনি।
মরুপশিং,
ভারত অমসুং ভুতানগী চাউখৎপা অমসুং নুংঙাই-য়াইফবা অসি নক্ননা মরী লৈনৈ। হায়রিবা ৱাখল্লোন অসিগা লোয়ননা হৌখিবা চহিদা ভারত সরকারনা ভুতানগী চহি মঙাগী থৌরাংদা মতেং পাংনবা লুপা করোর লিশিং 10গী তেংবাং পীরগনি হায়না লাউথোকখি। হায়রিবা শেনফমশিং অসি লম্বী-থোংদগী হৌরগা লৌউ-শিংউ ফাওবা, শেল-থুমদগী হৌরগা হকশেলগী লম ফাওবা সেক্তর খুদিংমক্তা শীজিন্নরি। মসিনা ভুতানগী মীয়ামগী পুন্সি মহিংদা হেন্না লাইথোকহল্লগনি।
মমাংদা, ভারতনা ভুতানগী মীয়ামদা তঙাইফদবা পোৎলমশিং লেপ্পা লৈতনা ফংহন্নবা খোঙথাং কয়া লৌখৎখি।
অমসুং হৌজিক্তি, UPI পেমেন্ত ফংহনবগী থৌওং অসি মফম অসিদা পাকথোক চাউথোক্লি। ভুতানগী নাগরিকশিংনা ভারত্তা লাকপা মতমদা UPIগী খুদোংচাবা ফংহন্নবা ঐখোয়না হোৎনরি।
মরুপশিং,
ঐখোয়গী নহাশিং অসি ভারত অমসুং ভুতানগী মরক্তা লৈরিবা মপাঙ্গল কনবা পার্তনরশিপ অসিগী খ্বাইদগী চাউবা কান্নবা ফংলবশিংগী মরক্তা অমনি। নেস্নেল সর্ভিস, ভোলুন্তিয়র প্রোগ্রামশিং অমসুং ইনোবেসনগী লমদা হিস মেজেস্তীনা মশক থোকপা খোঙথাং কয়া লৌখৎলি। নহাশিংবু মপাঙ্গল কনখৎহন্নবা অমসুং তেক্নোলোজীগা লোয়ননা মখোয়বু ইক্বিপ তৌদুনা শক্তি পীবগী মহাক্কী ৱাখল্লোন অসিনা ভুতানগী নহাশিংবু মশক থোকপা মওংদা ইথিল পীরি।
ভারত অমসুং ভুতানগী নহারোলশিংগী মরক্তা তেংবাং পীনবা অসি এজুকেসন, ইন্নোবেসন, স্কিল দিবেলপমেন্ত, স্পোর্তস, স্পেস অমসুং কলচরগুম্বা হিরম কয়াদা হেনগৎলক্লি। ঙসিদি ঐখোয়গী নহাশিংনা সেতেলাইত অমা শাবদা পুন্না থবক তৌরি। মসি ঐখোয়গী লৈবাক অনিমক্কীদমক চাউথোকচনীংঙাই ওইবা মায় পাকপা অমনি।
মরুপশিং,
ভারত - ভুতানগী মরুপ ওইবগী খ্বাইদগী চাউবা য়ুম্বীশিংগী মরক্তগী ঐখোয়গী মান্নবা স্পিরিচুএল হেরিতেজনি। থা অনিগী মমাংদা রাজগিরদা রোয়েল ভুতানিজ তেম্পল শঙ্গাখি। হৌজিক্তি মসিগী থৌরাং অসি ভারতকী অতোপ্পা মফমশিংদা শন্দোরক্লি।
ভুতানগী মীয়াম্না বরানসীদা ভুতানগী লাইশঙ অমসুং গেস্ত হাউস অমা লৈহন্নবগী অপাম্বা ফোঙদোকখ্রে। মসিগীদমক ভারত সরকারনা মথৌ তাবা লম পীরি। লাইশঙশিং অসিনা ঐখোয়গী লৈবাক অনিগী মরক্তা লৈরিবা কলচরেল বোন্দ অসি মখা তানা চেৎশিলহল্লগনি।
মরুপশিং,
ভারত অমসুং ভুতান্না শান্তি, নুংঙাই-য়াইফবা অমসুং অমগা অমগগী চাউখৎ থৌরাংদা পুন্না খুমাং চাউশিল্লকপা ওইরসনু হায়না ঐহাক্না থৌনিজরি। ভগৱান বুদ্ধ অমসুং গুরু রিনপোচেগী য়াইফ-মঙ্গোলনা ঐখোয়গী লৈবাক অনিমকপু লমজিংবা অমসুং ঙাকপীবা ওইরসনু।
ময়াম পুম্নমকপু ঐহাক্না থাগৎচরি।
থাগৎচরি!
