দেবভুমি উত্তরাখন্দগী ঐগী ইয়াম্বা-ইনাওশিং, ইচে-ইচলশিং, অহললমনশিং। ময়াম পুম্নমক্তা ঐহাক্না খুরুমজরি, ঐগী নুংশিবা অমসুং শেবা উৎচরি।
উত্তরাখন্দগী রাজ্যপাল গুরমিত সিংহ জী, মুখ্য মন্ত্রী ভাই পুস্কর সিংহ, কেন্দ্রগী ঐহাক্কী মরুপ অজয় তম্তা, এসেমব্লীগী স্পিকরগী ইচল রিতু জী, উত্তরাখন্দ সরকারগী মন্ত্রীশিং, হান্নগী মুখ্য মন্ত্রীশিং অমসুং স্তেজতা লংশিল্লিবা এম.পি.শিং, মশিং য়াম্লবা মীওই কয়া লাক্লদুনা ঐহাক্কী মফমদা য়াইফ-মঙ্গোল পীবীরিবা মশক নাইরবশিং অমসুং উত্তরাখন্দগী ঐহাক্কী ইচিল-ইনাওশিং।
মরুপশিং,
নবেম্বরগী তাং 9 অসি অশাংবা অমসুং অৱাবা খোঙচৎ অমগী মহৈনি। ঙসিগী নুমিৎ অসিনা ঐখোয় পুম্নমকপু চাউথোকচবা পোকহল্লি। উত্তরাখন্দগী লাইগুম্লবা মীয়াম্না চহি কয়াগী মমাংদগী খল্লি। হৌখিবা চহি 25গী খোঙচৎ অসিগী মতুংদা, উত্তরাখন্দনা ঙসি ফংলিবা থাক অসি য়েংদুনা, মসিগী ফজরবা রাজ্য অসি শেমগৎনবা হোৎনখিবা মীওই খুদিংমক্না নুংঙাইবা ফাওবা হায়বসি মহৌশানি। চীংশিংবু নুংশিজবা, উত্তরাখন্দগী চৎনবী, মাগী মহৌশাগী ফজবা অমসুং দেবভুমিগী মীয়ামগা চেৎনা শাগোন্নরিবশিংনা ঙসি মখোয়গী থম্মোয়দা হরাও নুংঙাইবা ফাওরি।
মরুপশিং,
দবল ইঞ্জিন BJP সরকারনা উত্তরাখন্দগী পোতেন্সিএলবু অনৌবা অৱাংবা থাক্তা পুখৎনবা হোৎনরিবা অসিদা ঐহাক নুংঙাইবা ফাওই। উত্তরাখন্দগী সিলভর জুবিলীগীদমক ঐনা ময়াম পুম্নমকপু থম্মোয় শেংনা নুংঙাইবা ফোংদোকচরি। মসিগী থৌরম অসিদা, খোঙজং অদুগী মনুংদা মখোয়গী পুন্সি কৎথোকখিবা উত্তরাখন্দগী অথৌবশিংবুসু ঐহাক্না ইকায় খুম্নবা উৎচরি। মতম অদুগী এজিতেতর পুম্নমকপু ঐহাক্না ইকায় খুম্নবা উৎচরি অমসুং থাগৎচরি।
মরুপশিং,
উত্তরাখন্দগা ঐহাক্কা লৈনরিবা মরী অসি কয়া য়াম্না চেৎবগে হায়বসি অদোম্না খংই। ঐহাক্না মফম অসিদা স্পিরিচুএলগী খোঙচৎ অমদা লাকপা মতমদা, চীংগী লমদা লৈবা ঐহাক্কী ইচিল-ইনাওশিং, মখোয়গী কন্না হোৎনজবা অমসুং অৱাবা কয়া মায়োক্ননবা মখোয়গী ৱারেপ্না ঐহাকপু মতম চুপ্পদা ইথিল পীখি।
মরুপশিং,
ঐহাক্না মফম অসিদা লৈখিবা মতমশিং অসিনা উত্তরাখন্দগী অপুনবা পোতেন্সিএল অদু ঐহাক্না হকথেংননা উবা ফংলে। মরম অদুনা, বাবা কেদর্নাথ চৎলবা মতুংদা, ঐনা চহি তরাগী খুজিং অসি উত্তরাখন্দগীনি হায়খিবা মতমদা মসি শুপ্নগী ৱাহৈ খক্তা নত্তে, ঐনা হায়খিবা অদুদা ময়াম পুম্নমক্কী মফমদা থাজবা থমখি। ঙসি, উত্তরাখন্দনা মাগী 25শুবা চহি মপুং ফারকপগা লোয়ননা, উত্তরাখন্দগী চাউখৎপগী মতম অসি ওইগনি হায়বা ঐহাক্কী থাজবা অসি হেন্না মপাঙ্গল কনখৎলক্লি।
মরুপশিং,
চহি 25গী মমাংদা, উত্তরাখন্দ শেমখিবা মতমদা, শিংনবশিং অসি মশিং য়ামখি। রিসোর্সশিং অদু অকক্নবা ওইখি, স্তেৎ বজেৎ অদু অপীকপা ওইখি, ইনকমগী সোর্সশিং অদু মরাং কায়খিদে, অমসুং অয়াম্বা মথৌ তাবশিং অদু সেন্ত্রেল এসিস্তেন্সকী মতেংদগী ফংখি। ঙসিদি, ফিভম অসি মপুং ফানা হোংখ্রে। ঐহাক মফম অসিদা লাক্ত্রিঙৈ মমাংদা, সিলভর জুবিলীগী থৌরমদা কত্থোকপা য়াম্না ফজবা একজিবিসন অদু ঐহাক্না উখি। উত্তরাখন্দগী মীপুম খুদিংমক্না মসিগী একজিবিসন অসি য়েংবা মথৌ তাই হায়না ঐহাক্না অদোমদা হায়জরি। মসিনা হৌখিবা চহি 25 অসিদা উত্তরাখন্দনা চৎখিবা খোঙচৎ অদু উৎলি। ইনফ্রাস্ত্রকচর, এজুকেসন, ইন্দস্ত্রী, তুরিজম, হকশেল, পাৱর অমসুং রুরেল দিবেলপমেন্ত য়াওনা হিরম কয়াদা মাই পাকপগী ৱারীশিং অসি পুক্নিং থৌগৎনিংঙাই ওই। চহি 25গী মমাংদা, উত্তরাখন্দগী বজেৎ অসি লুপা করোর লিশিং মরিখক ওইরম্মি। ঙসি চহি 25 শুরবী মীওইশিংনা মদু করম্না ওইরম্বা হায়বদু খক খঙবা ঙম্লোই। মতম অদুদা, বজেৎ অসি লুপা করোর লিশিং মরি ওইরম্মি। ঙসিদি, মসি লুপা করোর লাখ অমা হেনখ্রে। চহি 25দা উত্তরাখন্দদা পাৱর পুথোকপা অসি শরুক মরি হেনগৎলে। চহি 25গী মনুংদা উত্তরাখন্দদা লম্বীগী অশাংবা শরুক অনি হেনগৎলে। অমসুং মফম অসিদা, থা তরুক খুদিংগী পেসেঞ্জর 4,000না প্লেনদা লাকখি। ঙসিদি নোংমদা পেসেঞ্জর 4,000 হেন্না প্লেনদা থুংলরি।
মরুপশিং,
চহি 25 অসিদা, ইঞ্জিনীয়রিং কোলেজশিংগী মশিং অসি শরুক 10 হেনগৎলে। মমাংদা, মেদিকেল কোলেজ অমা খক্তমক লৈরম্মি। ঙসিদি, মেদিকেল কোলেজ 10 লৈরে। চহি 25গী মমাংদা, ভেক্সিন কাপ্পগী চাং অসি চাদা 25 ফাওবা ওইরমদে। মীওই চাদা 75 হেনবনা ভেক্সিনেসন তৌদনা মখোয়গী পুন্সি হৌখি। ঙসিদি উত্তরাখন্দগী খুঙ্গং খুদিংমক্তা ভেক্সিন কভরেজ ফংলে। মসিনা তাকপদি উত্তরাখন্দনা পুন্সিগী হিরম খুদিংদা চাউখৎপা কয়া অমা উবা ফংলে। চাউখৎপগী খোঙচৎ অসি য়াম্না শিংথানীংঙাই ওই। অহোংবা অসি ইনক্লুসিবনেসকী পোলিসী অমসুং উত্তরাখন্দী খুদিংমক্কী ৱারেপকী মহৈনি। অহানবা চীংশিং কাবনা চাউখৎপগী লম্বী থিংখি। হৌজিক্তি, অহোংবশিং অদু মায়োক্নবা ঙমখ্রে, অমসুং অনৌবা লম্বীশিং হাংদোকপা হৌরে।
মরুপশিং,
মতম খরগী মমাংদা ঐহাক্না উত্তরাখন্দগী নহাশিং অমসুং ওন্তপ্রিন্যুওরশিংগা ৱারী শানখি। মখোয় পুম্নমক উত্তরাখন্দগী চাউখৎপগী মতাংদা য়াম্না থৱায় য়াওনৈ। করিগুম্বা ঐহাক্না গার্হৱালিদা ঙসি উত্তরাখন্দগী মীয়ামগী ৱাখল্লোনশিং অদু হায়রবদি ঐহাক্না অশোয়বা অমা তৌরকপা য়াই। অদুবু 2047দা, ভারত অসি চাউখৎলবা লৈবাকশিংগী লীগ অমদা লৈখি, অমসুং ঐগী উত্তরাখন্দ, ঐগী লাইশিংগী লম অসি মপুং ফানা শেম-শারি।
মরুপশিং,
উত্তরাখন্দগী চাউখৎ-থৌরাংগী খোঙচৎ অসি খুমাং চাউশিলহন্নবা, প্রোজেক্ত কয়া অমা ঙসি শঙ্গাখ্রে অমসুং উরেপ উয়ুংসু তমখ্রে। এজুকেসন, হেল্থ, তুরিজম অমসুং স্পোর্তসকা মরী লৈনবা প্রোজেক্তশিং অসিনা অনৌবা থবক ফংহন্নবগী খুদোংচাবা পীগনি। জামরানী অমসুং সোং দাম প্রোজেক্তশিংনা দেরাদুন অমসুং হালদ্ৱানিদা থক্নবা ঈশিংগী সমস্যা কোকহন্নবা মরুওইবা থৌদাং লৌগনি। স্কিমশিং অসিদা লুপা করোর 8,000 হেন্না চাদিং তৌগনি। প্রোজেক্তশিং অসিগীদমক উত্তরাখন্দগী মীয়াম্বু ঐনা থাগৎচরি।
মরুপশিং,
উত্তরাখন্দ সরকারনা হৌজিক্তি শেম অমসুং কিৱি লৌমীশিংদা দিজিতেল করেন্সীদা সবসিদী পীরি। অনৌবা তেক্নোলোজীনা শেলগী তেংবাংবু মপুং ফানা ত্রেক তৌবা ঙমহল্লি। মসিগীদমক ঐনা রাজ্য সরকার, রিজর্ব বেঙ্ক ওফ ইন্দিয়া অমসুং স্তেকহোল্দর পুম্নমকপু থাগৎচরি।
মরুপশিং,
উত্তরাখন্দগী দেবভুমি অসি ভারতকী স্পিরিচুএল হার্তবিৎনি। গঙ্গোত্রি, য়ামুনোত্রি, কেদর্নাথ, বদ্রীনাথ, জাগেশ্বর অমসুং আদি কৈলাশকুম্বা মশীং থীঙমদ্রবা ঈশ্বরগী মফমশিং অসি ঐখোয়গী থাজবগী খুদম্নি। চহি খুদিংগী ভক্ত মিলিয়ন কয়ানা মসিগী অশেংবা লাইশঙশিং অসিদা চৎলি। মখোয়গী খোঙচৎ অসিনা ভক্তিগী লম্বী অমা হাংদোক্লি, অমসুং, মসিগা লোয়ননা উত্তরাখন্দগী শেন্মিৎলোনদা অনৌবা ইনর্জী পীরি।
মরুপশিং,
হেন্না ফবা কনেক্তিবিতী অসি উত্তরাখন্দগী চাউখৎ-থৌরাংগা য়াম্না মরী লৈনৈ। মসিনা মরম ওইদুনা ঙসি রাজ্য অসিদা লুপা করোর লাখ 2 হেনবগী প্রোজেক্তশিং পায়খৎলি। রিশিকেশ-কার্নপ্রয়াগ রেল প্রোজেক্ত অসি মাংলোমদা চংশিল্লি। দিল্লী-দেহরাদুন এক্সপ্রেসৱে অসি হৌজিক লোইশিল্লক্লে। গৌরিকুন্দ-কেদারনাথ অমসুং গোবিন্দঘাত-হেমকুন্ত সাহিব রোপৱেগী উরেপ উয়ুংসু থমখ্রে। প্রোজেক্তশিং অসিনা উত্তরাখন্দগী চাউখৎ থৌরাংদা অনৌবা ইনোৎ অমা পীরি।
মরুপশিং,
উত্তরাখন্দনা চহি 25 অসিদা চাউখৎপগী অশাংবা খোঙচৎ অমা চৎখ্রে। হৌজিক লাক্লিবা ৱাহংদি, লাক্কদৌরিবা চহি 25 অসিদা উত্তরাখন্দনা করম্বা থাক্তা য়ৌরকপা পাম্বগে হায়বসিনি। "করিগুম্বা অমা তৌগে খল্লবদি, মদু পাংথোক্নবা পাম্বৈ অমা লৈ" হায়বা ৱাহৈ অসি অদোম্না তারমগনি। মরম অদুনা, ঐখোয়না ঐখোয়গী পান্দমশিং খঙলবা মতমদা, মখোয়শিং অদু ফংনবগী রোদমেপ অদু য়াম্না থুনা শেমগনি। অমসুং ঐখোয়গী পান্দমশিং অদু খন্ননবা নবেম্বর 9দগী হেন্না অফবা নুমিৎ করি লৈবগে?
মরুপশিং,
উত্তরাখন্দগী অশেংবা মশক অসি মাগী স্পিরিচুএল পাৱরনি। করিগুম্বা উত্তরাখন্দ অসি লেপ্পা লৈতনা হোৎনরবদি, লাক্কদৌরিবা চহি খরগী মনুংদা মসিনা মশাবু "স্পিরিচুএল কেপিতেল ওফ ৱার্ল্দ" ওইনা লিংখৎপা ঙমগনি। ঐখোয়না মাগী লাইশঙশিং, আশ্রমশিং, মেদিতেসন অমসুং য়োগ কেন্দ্রশিং অসি মালেমগী নেৎৱার্ক্কা শম্নহনবা ঙমগনি।
মরুপশিং,
ভারত অমসুং মপান লৈবাক্কী মীওইশিংনা মফম অসিদা হকচাং ফনা লৈনবা লাকই। লোকেল হর্বশিং অমসুং আয়ুর্বেদকী হিদাক-লাংথকশিংগী দিমান্দ অসি য়াম্না থুনা হেনগৎলক্লি। হৌখিবা চহি 25 অসিদা, উত্তরাখন্দনা অরোমেতিক প্লান্তশিং, আয়ুর্বেদিক হর্বশিং, য়োগ অমসুং ৱেলনেস তুরিজমদা চাউনা খুমাং চাউশিল্লে। হৌজিক্তি উত্তরাখন্দগী এসেমব্লী কন্সতিত্যুএন্সি খুদিংদা য়োগ সেন্তরশিং, আয়ুর্বেদ সেন্তরশিং, নেচরোপেথী ইন্সতিত্যুৎশিং অমসুং হোমস্তেশিং - মপুং ফাবা পেকেজ অমা - লিংখৎনবা খন্নবগী মতম ওইরে। মসিনা ঐখোয়গী মপান লমগী তুরিস্তশিংবু য়াম্না পুক্নিং চিংশিনগনি।
মরুপশিং,
ভারত সরকারনা ঙমখৈদা ভাইব্রেন্ত ভিলেজ প্রোজেক্তদা কয়া য়াম্না মরুওইনা লৌরি হায়বদু অদোম্না খঙই। উত্তরাখন্দগী ভাইব্রেন্ত ভিলেজ খুদিংমক মশাবু মিনি তুরিস্ত দেস্তিনেসন অমা ওইহনবা ঐনা পাম্মি। মফম অদুদা হোমস্তেশিং লিংখৎকদবনি, অমসুং মফম অদুগী চিঞ্জাক অমসুং কলচরবু শৌগৎকদবনি। মপান্দগী লাকপা তুরিস্তশিংনা য়ুমগুম্বা এতমোস্ফিয়র অমদা লৈরবা, চুদাকানি, রোতি-আর্সা, রাস-ভাত, অমসুং ঝাঙ্গোরা খিয়র চাবগী নুংঙাইবা অদু খল্লু। মসিগী নুংঙাইবা অসিনা মখোয়বু উত্তরাখন্দদা অনিরক, অহুমরক ওইনা অমুক হন্না পুরক্কনি।
মরুপশিং,
হৌজিক ঐখোয়না উত্তরাখন্দগী লাপ্লবা পোতেন্সিএল পাকথোক চাউথোকহনবদা মীৎয়েং থমগদবনি। হেরেলা, ফোলেদী, অমসুং ভিতোলিগুম্বা কুমহৈশিংদা শরুক য়ারিবা তুরিস্তশিংনা মতম পুম্নমক্তা মসিগী এক্সপরিয়েন্স অসিবু নীংশিংদুনা লৈ। মফম অসিগী মেলাশিং অসিসু চপ মান্ননা শিংথানিংঙাই ওই। নন্দা দেবী মেলা, জৌলজীবী মেলা, বাগেশ্বরদা উত্তরায়নি মেলা, দেবীধুরা মেলা, শ্রাবনী মেলা অমসুং বতর ফেস্তিবেল অসি উত্তরাখন্দগী থম্মোয়নি। লোকেল ফেয়র অমসুং ফেস্তিবেলশিং মালেমগী মেপতা পুথোক্নবা "ৱান দিস্ত্রিক্ত, ৱান ফেস্তিবেল" অসিগুম্বা কেম্পেন অমা হৌদোকপা য়াই।
মরুপশিং,
উত্তরাখন্দগী চীংগী জিলা পুম্নমক্তা মহৈ-মরোং পুথোকপগী অচৌবা পোতেন্সিএল লৈ। ঐখোয়না চীংগী লমশিং অসি হোর্তিকলচর সেন্তরশিং ওইহন্নবা মীৎয়েং থমগদবনি। ব্লুবেরী, কিৱি, হর্বেল অমসুং হিদাক-লাংথক শিজিন্নবা পাম্বীশিং অসি তুংলমচৎকী মহৈ-মরোংশিংনি। উত্তরাখন্দনা MSMEশিংবু ফুদ প্রোসেসিং, হন্দিক্রাফ্ত অমসুং ওর্গানিক প্রদক্তশিংগীদমক অমুক হন্না থৌগৎপা মথৌ তাই।
মরুপশিং,
উত্তরাখন্দদা চহি চুপ্পগী ওইবা তুরিজমগী পোতেন্সিএল লৈরি। হৌজিক্তি, কনেক্তিবিতী ফগৎলক্লি, অমসুং মসিনা মরম ওইদুনা ঐহাক্না হায়খি মদুদি ঐখোয়না ওল-ৱেদর তুরিজমগী মায়কৈদা চংশিনগদবনি। উত্তরাখন্দনা ৱিন্তর তুরিজমদা অনৌবা দাইমেন্সন অমা পীরক্লিবা অসিদা ঐহাক নুংঙাইবা ফাওই। ঐহাক্না ফংলকখিবা অনৌবা পাউশিং অসি পুক্নিং থৌগৎনিংঙাইনি। ৱিন্তর তুরিস্ত মশিং য়াম্না হেনগৎলক্লি। ফিৎ 14,000গী ৱাংমদা লৈবা পিথোরাগরদা অৱাংবা মফমদা মেরাথোন অমা পাংথোকখি। আদি কৈলাশ পরিক্রম রন অসিসু লৈবাক অসিগীদমক্তা ইথিল অমা ওইরক্লি। চহি অহুমগী মমাংদা, অদি কৈলাশ য়াত্রাদা তীর্থয়াত্রী লিশিং অনিদগী হন্থনা শরুক য়াখি। হৌজিক, হায়রিবা মশিং অসি লিশিং তরাগী মথক্তা হেনগৎখ্রে। নুমিৎ খরনিগী মমাংদা, কেদর্নাথ লাইশঙগী থোঙশিং থিংখি। চহি অসিদা, চাউরাক্না ভক্ত মিলিয়ন 1.7না দর্শনগীদমক্তা কেদর্নাথ ধামদা চৎখি। পিলগ্রিমেজ অমসুং ওল-ৱেদর তুরিজম অসি উত্তরাখন্দগী মপাঙ্গলনি, মসিনা তুং কোইনা চৎনগদবা চাউখৎপগী অনৌবা অৱাংবা থাক্তা পুখৎকনি। ইকো-তুরিজম অমসুং এদভেঞ্চর তুরিজমগীদমক্তা অচৌবা পোতেন্সিএলসু লৈ। মসিনা লৈবাক শীনবা থুংনা লৈরিবা নহাশিংগী পুক্নিং চিংশিনবা মফম অমা ওইরকপা য়াই।
মরুপশিং,
উত্তরাখন্দসু ফিল্মগী লম অমা ওইনা থোরক্লি। স্তেৎকী অনৌবা ফিল্ম পোলিসীনা শুতিংবু হেন্না লায়থোকহল্লে। উত্তরাখন্দসু লুহোংবগী মফম অমা ওইনা মীয়াম্না পাম্নরক্লি। অমসুং ঐহাক্না "ৱেদ ইন ইন্দিয়া" কৌবা কেম্পেন অমা চত্থরি। "ৱেদ ইন ইন্দিয়া"গীদমক্তা, উত্তরাখন্দনা চপ মান্নবা থাক্কী ফজরবা ফেসিলিতীশিং শেমগৎকদবনি। মসি ফংনবগীদমক ঐখোয়না মরুওইবা মফম 5-7 মশক খঙদোকপা অমসুং মখোয়শিং অসি চাউখৎহনবা য়াই।
মরুপশিং,
লৈবাক অসিনা আত্মনির্ভর ভারত অমা ওইহন্নবা ৱারেপ লৌরে। মসিগী লম্বী অসি ভোকেল ফোর লোকেলনা লেপকনি। উত্তরাখন্দনা মতম পুম্নমক্তা মসিগী মীৎয়েং অসি হিংদুনা লাক্লি। লমদমসিগী পোত্থোকশিংবু নুংশিবা, মখোয়বু শীজিন্নবা, অমসুং মখোয়বু পুন্সিগী শরুক অমা ওইহনবা অসি লমদমসিগী চৎনবীগী মরুওইবা শরুক অমনি। উত্তরাখন্দ সরকারনা ভোকেল ফোর লোকেল কেম্পেন অসি খোঙজেল য়াংখৎহনবদা ঐহাক নুংঙাইবা ফাওই। কেম্পেন অসিগী মতুং ইন্না উত্তরাখন্দগী লৌউ-শিংউগী পোত্থোক 15দা GI লোকেল বেদু মহৈ-মরোং অমসুং বদ্রী গাউ ঘীদা GI তেগ ফংখিবা অসি তশেংনা চাউথোকচনিংঙাইনি। বদ্রী কাউ ঘী অসি চীংগী ইমুং খুদিংমক্কী চাউথোকচবনি। হৌজিক, বেদু অসি চীংগী খুঙ্গংশিংদগী হেন্দোক্লগা মপানগী কৈথেলশিংদা য়ৌরক্লি। মসিদগী শেম্বা পোত্থোকশিংদা হৌজিক্তি GI তেগ লৈরগনি। হায়রিবা পোত্থোকশিং অসি চৎপা মফম খুদিংমক্তা, মখোয়না উত্তরাখন্দগী মশক অদু মখোয়গা লোয়ননা চৎলগনি। GI তেগ তৌরবা পোত্থোকশিং অসি লৈবাক অসিগী য়ুমথোং খুদিংমক্তা য়ৌহনগদবনি।
মরুপশিং,
হাউস ওফ হিমালয়স অসি উত্তরাখন্দদা লোকেল আইদেন্তিতী পুনশিন্নদুনা ব্রান্দ অমা ওইরক্লিবা অসিদা ঐহাক নুংঙাইবা ফাওই। ব্রান্দ অসিগী মখাদা, রাজ্য অসিগী পোত্থোক কয়া অসি মালেমগী কৈথেলদা চাংদম্নবা ঙম্নবগীদমক্তা মান্নবা মশক অমা পীরি। স্তেত অসিগী পোত্থোক কয়া অমা হৌজিক দিজিতেল প্লেৎফোর্মশিংদা ফংলি। মসিনা কস্তমরশিংগা হকথেংননা চৎনবা খুদোংচাবা ফংহল্লে অমসুং লৌমীশিং, আর্তিসানশিং অমসুং অপীকপা ওন্তপ্রিন্যুওরশিংগীদমক্তা অনৌবা কৈথেল অমা হাংদোক্লে। অদোম্না হাউস ওফ হিমালয়সকী ব্রান্দিংসু নৌনা পুক্নিং থৌগৎকদবনি। ঐহাক্না থাজৈ মদুদি ঐখোয়না ব্রান্দেদ প্রদক্তশিং অসিগী দেলিভরী মেকানিজমশিংদা লেপ্তনা থবক তৌবগী তঙাইফদবা অদু লৈগনি।
মরুপশিং,
উত্তরাখন্দগী চাউখৎ থৌরাংগী খোঙচৎ অসিদা খুদোংচাদবা কয়া মায়োক্নখি হায়বসি অদোম্না খঙই। অদুম ওইনমক, BJPগী মপাঙ্গল কনবা সরকারনা মসিগী খুদোংচাদবশিং অসি মতম খুদিংগী মায়োক্নদুনা, চাউখৎপগী খোঙজেল অসি হোংহন্দনা লৈহন্নবা হোৎনরি। উত্তরাখন্দগী ধামি সরকারনা য়ুনিফোর্ম সিবিল কোদ অসি চৎনহনবদা লৌখিবা অচৌবা থৌদাং অসি অতোপ্পা রাজ্যশিংদা খুদম অমনি। রাজ্য সরকারনা জাতিগী ইন্তরেস্তকী হীরমশিংদা, হায়বদি কনভর্সন থিংনবা আইন অমসুং রায়ত লাকশিন্নবা আইন অসিগুম্বা থৌনা ফবা পোলিসীশিং লৌখৎলি। রাজ্য অসিদা খোঙজেল য়াংনা থোক্লক্লিবা লম লৌশিনবা অমসুং দেমোগ্রাফিক চেঞ্জগুম্বা সেন্সিতিব ইসুশিংদা BJP সরকারনা অকনবা খোঙথাং লৌখৎলি। দিজাস্তর মেনেজমেন্তকী লমদা, উত্তরাখন্দ সরকারনা মীয়ামদা পীবা য়াবা মতেং পুম্নমক পীদুনা, য়াম্না থুনা অমসুং সেন্সিবিতী লৈনা থবক তৌরি।
মরুপশিং,
ঙসি, ঐখোয়না রাজ্য অসি শেমখিবগী সিলভর জুবিলী পাংথোক্লিবা অসিদা, লাক্কদৌরিবা চহিশিংদা ঐখোয়গী উত্তরাখন্দনা চাউখৎপগী অনৌবা অৱাংবা থাকশিং য়ৌহল্লগনি, মসিগী চৎনবী অমসুং মশক অসি চাউথোকচবা অমগা লোয়ননা মাংলোমদা চংশিল্লগনি হায়না ঐহাক্না থাজবা থম্লি। ঐহাক্না অমুক্কা হন্না উত্তরাখন্দগী মীয়াম পুম্নমকপু মখোয়গী সিলভর জুবিলী থৌরমদা হরাও-তয়াম্বা ফোংদোকচরি। অমসুং ঐহাক্না অদোমদগী অদোমগী পান্দমশিং অদু লেপথোক্নবা, অদোমগী লম্বী অদু খন্বা, অমসুং চহি 25গী মতুংদা লৈবাক অসিনা নীংতম্বা চহি 100 শুরকপা মতমদা উত্তরাখন্দ অসি কদাইদা লৈগদগে হায়বদু য়েংনবা লেপ্পা লৈতনা থবক পায়খৎনবা আশা তৌজরি। ভারত সরকারনা মতম পুম্নমক্তা উত্তরাখন্দ সরকারগা লোয়ননা লেপমিন্নগনি হায়নসু ঐহাক্না থাজবা পীজরি। খোঙথাং খুদিংমক্তা ঐখোয়না অদোমবু মতেং পাংনবা শেম-শারি। উত্তরাখন্দগী ইমুং খুদিংমক্তা অমসুং নাগরিক খুদিংমক্তা নুংঙাইবা, চাউখৎপা অমসুং অফবা তুংলমচৎ অমা ওইরসনু হায়না ঐহাক্না থৌনিজরি। ময়াম পুম্নমকপু হন্না-হন্না থাগৎচরি।
ভারত মাতা কী জয়।
ভারত মাতা কী জয়।
ভন্দে মাতরমনা চহি 150 শুরকপা অসিদা ঐহাক্কা লোয়ননা হায়বীয়ু -
ভন্দে মাতরম।
ভন্দে মাতরম।
ভন্দে মাতরম।
ভন্দে মাতরম।
ভন্দে মাতরম।
ভন্দে মাতরম।
ভন্দে মাতরম।
ভন্দে মাতরম।
ভন্দে মাতরম।
হন্না-হন্না থাগৎচরি।
