জয় মাতা নৈনা দেবিয়া রী, জয় বজিয় বাবে রী!
বিলাসপুরা আল্যো…..ঙসিদি ঐহাক্না থৌজাল ফংজরে…দসেরাগী শেংলবা কুহ্মৈদা ইমা নৈনা দেবিগী থৌজালশিংগা লোয়ননা নখোয় পুম্নমক্কা উনবা ফংজবা অসি লাইবক ফবনি! ময়ামবু খুরুমজরি অমসুং এম্সকীদমক নুংঙাইবা ফোঙদোকচরি।
হিমাচল প্রদেশকী রাজ্যপাল শ্রী রাজেন্দ্র আর্লেকরজী, হিমাচল প্রদেশকী মমিং লৈরবা মুখ্য মন্ত্রী শ্রী জয় রাম থাকুরজী, ভারতীয় জনতা পার্তীগী নেস্নেল প্রসিদেন্ত, ঐখোয় পুম্নমকপু লমজিংলিবা অমসুং লমদম অসিগী মপারি, শ্রী জে.পি. নদ্দাজী, কেন্দ্রগী মন্ত্রী-মন্দলগী ঐহাক্কী মরুপ অমসুং ঐখোয়গী এম.পি. শ্রী অনুরাগ থাকুরজী, হিমাচল প্রদেশকী বি.জে.পি.গী প্রসিদেন্ত অমসুং পার্লিয়ামেন্তদা ঐহাক্কী মরুপ ওইরিবা সুরেশ কশ্যপজী, পার্লিয়ামেন্তগী ঐহাক্কী মরুপ কিশন কপুরজী, ইচল ইন্দু গোস্বামীজী, দা. সিকন্দর কুমারজী, অতোপ্পা মন্ত্রী, এম.পি. অমসুং এম.এল.এ.শিং অমসুং ঐখোয়বু থৌজাল পীবিবা লাক্লিবা য়াম্লবা মীয়াম! বিজয়াদশমীগী য়াইফরবা নুমিৎ অসিদা ইরৈবাকচা পুম্নমক্তা য়াইফ পাউজেল পীজরি।
শেংলবা কুহ্মৈ অসিনা ফত্তবা খুদিংমকপু জয় তৌবগা লোয়ননা অমৃতকালগীদমক লৈবাক অসিগী ফিরেপকীদমক লৌখিবা পঞ্চ প্রনগী লম্বেলদা চৎপদা অনৌবা থৌনা পীরগনি। বিজয়া দশমীদা হিমাচল প্রদেশকী মীয়ামগীদমক হকশেল, মহৈ-মশিং, থবক অমসুং ইনফ্রাস্ত্রকচরগী লুপা করোর লিশিং কয়াগী প্রোজেক্তশিং খুদোল ওইনা পীবা ফংজবগী খুদোংচাবা ফংবা অসি লাইবক ফবনি। অমসুং নুমিৎ অসিগা ইরোইননা মাইপাকপগী মৈরা চুখৎপগী খুদোংচাবসু ফংলি। মসিনা তুংদা মাইপাকপা ঙম্বগী অহৌবা অমা ওইররে। বিলাসপুরনা হকশেল অমসুং মহৈ-মশিংগী দবল গিফ অমা ফংলি।
ইচিল-ইনাওশিং,
জয়রামজীনা হায়বীখিবগী মতুং ইন্না নখোয়দা চাউখৎ-থৌরাংগী থৌশিলশিং অসি খুৎশিন্নরবা মতুংদা ঐহাক্না অতোপ্পা কলচরেল হেরিতেজ অমা উবা ফংজরগনি অমসুং চহি কয়াগী মতুংদা ঐহাক্না অমুক হন্না কূল্লু দসেরাদা শরুক য়াবগী খুদোংচাবা ফংজগনি। লাইরেম্বা-লাইরেম্বী কয়াগা লোয়ননা ভগৱাব রগুনাথজীগী খোঙচৎ অসিদা য়াওদুনা লৈবাক্কীদমক থৌনিজগনি। অমসুং ঙসি ঐহাক্না বিলাসপুরদা লাকপা মতমদা হৌখ্রবা মতম নীংশিংলকপা হায়বা অসি মহৌশানি। মতম অমদা ঐখোয়না মফম অসিদা খোঙনা চৎলমখি। করিগুম্বা মতমদা, ঐহাক, ধুমলজী, নদ্দাজীনা মসিদগী খোঙনা কৈথেল চৎলমখি। ঐখোয়না রথ য়াত্রাগী অচৌবা থৌরমগা লোয়ননা বিলাসপুরগী লম্বীশিং ফাওদুনা চৎখি। অমসুং স্বর্ন জয়েন্তী রথ য়াত্রানা মফম অসিদা ফাওদুনা চৎকি অমসুং মেন মার্কেৎতগী থোরকই অমসুং মফম অসিদা মীয়ামগী মীতিন অমা পাঙথোকখি। অমসুং কয়ারক হন্না ঐহাক্না মফম অসিদা লাকখি অমসুং ময়ামগী মরক্তা লৈখি।
হিমাচলগী লমদম অসিদা থবক তৌবা মতমদা ঐহাক্না হিমাচল চাউখৎ খোঙচৎকা লেপ্পা লৈতনা খোঙলোই ওইবগী খুদোংচাবা ফংজখি। অমসুং অনুরাগজীনা হৌনা হায়খিবা অদু ঐহাক্না তাজৈ, মসি মোদীজীনা তৌরম্বনি, মসি মোদীজীনা তৌরম্বনি, মসি মোদীজীনা তৌরম্বনি হায়খি। ঐখোয়গী নদ্দাজীনসু হায় মসি মোদীজীনা তৌরম্বনি, মসি মোদীজীনা তৌরম্বনি, মসি মোদীজীনা তৌরম্বনি অমসুং ঐখোয়গী মু্খ্য মন্ত্রীনসু হায়, মসি মোদীজীনা তৌরম্বনি, মসি মোদীজীনা তৌরম্বনি, মসি মোদীজীনা তৌরম্বনি। অদুবু ঐহাক্না অচুম্বা অদু হায়জগে, মসি কনানা তৌরম্বনো হায়বা অদু ঐহাক্না হায়য়ুরা? ওইরক্লিবা পুম্নমক অসি নখোয়না ওইহনবনি। মসি নখোয়না মরম ওইরগা ঙমহনবনি। করিগুম্বা নখোয়না দিল্লীদা লৈবা মোদীদা খক্তা থৌজাল পীনবীরগা হিমাচলদা লৈরইবা মোদীজীগী মপাংশিংবু থৌজাল পীনদবা তারবদি থবক পুম্নমক অসিদা অপনবশিং থোকলমগনি। মসি জয়রামজী অমসুং মহাক্কী তীমনা ঐহাক্না দিল্লীদগী পুরকপা থবক অসিবু খোঙজেল য়াইনা পাইখৎতুনা মসি ওইথোকপা ঙমহনখিবনি। অমসুং এম্স শারিবা অসি নখোয়গী ভোৎকী শক্তিননি, তন্নেল শারিবা অসি নখোয়গী ভোৎকী শক্তিননি, হাইদ্রো ইঞ্জিনীয়রিং কোলেজ শারিবা অসি নখোয়গী ভোৎকী শক্তিননি, মেদিকেল দিভাইস পার্ক শারিবা অসিসু নখোয়গী শক্তিননি। ভোৎ অমগী শক্তি অসি য়াম্না লৈ। অমসুং ঙসি হিমাচলগী অনীংবা-অপাম্বশিং অসি য়েংলগা অমগী মথংদা অমা চাউখৎ-থৌরাংগী থবক ঐহাক্না পাইখৎলি।
মতম শাংনা ঐখোয়না চাউখৎ-থৌরাংগা মরী লৈননা লৈবাক অসিদা খল কাইবা উবা ফংখি। মসি করি মরমগীনো? করিগুম্বা অফবা লম্বী লৈরবদি মদু অচৌবা সহর লৈবা রাজ্যশিংদা ওই, মদু দিল্লীগী অকোইবদা ওই। করিগুম্বা অফবা এজুকেস্নেল ইন্সতিত্যুত লৈরবদি মদু য়াম্না চাউবা সহরশিংদা ওই। অফবা হোস্পিতালশিং লৈরবদু মদু দিল্লীদা খক্তা ওই, মদুগী মপালদা লৈবা য়াদে। করিগুম্বা ইন্দস্ত্রীশিং অমসুং বিজিনেসশিং লিংখৎপা তারবদি মদু অচৌবা মফমশিংদা লিংখৎলি অমসুং মরু ওইনা লৈবাক অসিগী চীংগী মফমশিংদা তঙাই ফদবা খুদোংচাবশিং অসি অরোইবদা য়ৌরকই, চহি কয়া ঙাইরবা মতুংদা য়ৌরকই। মসিগী অরিবা ৱাখল্লোন অসিনা মরম ওইরগা লৈবাক অসিগী চাউখৎ খোঙচৎতা অকাইবা পীখি। মসিনা মরম ওইদুনা লৈবাক অসিগী অয়াম্বা শরুকশিং, মসিদা লৈরিবা মীয়াম্না খুদোংচাদবা কয়া থেংনদুনা লৈবা তাখি।
হৌখিবা চহি ৮দা লৈবাক অসিনা অনৌবা ৱাখল্লোন, মতমগা চুনবা ৱাখল্লোনগা লোয়ননা অরিবা ৱাখল্লোন তুংওইনরম্লগা মাংদা চংশিল্লি। য়েংবীয়ু হৌজিক মতম কয়াদগী ঐহাক্না মফম অসিদা লাকপদা মতমদা ঐহাক্না মফম অসিদা য়ুনিভর্সিতী অমা থম্বা পামদুনা লাকখি। অমসুং লায়েং নত্ত্রগা মেদিকেল এজুকেসনগী ওইরবসু আই.জি.এম.সি. শিমলা অমসুং তাতা মেদিকেল কোলেজকী মীপাল তাংদুনা লাকখি। অরুবা অনাবা লায়েংনবা নত্ত্রগা এজুকেসন নত্ত্রগা থবক্কী ওইরবসু হিমাচলগীদমক চান্দিগর অমসুং দিল্লীদা চৎপা তারমখি। অদুবু হৌখিবা চহি নিপান অসিদা ঐখোয়গী দবল ইঞ্জিন সরকারনা হিমাচলগী চাউখৎ খোঙচৎ অসি অনৌবা মায়োল অমদা পুরি। ঙসি হিমালচ প্রদেশতা ঙসিদি আই.আই.তি., আই.আই.এম. অমসুং আই.আই.আই.তি.গুম্বা সেন্ত্রেল য়ুনিভর্সিতীশিং লৈরে। লৈবাক অসিগী খ্বাইদগী চাউবা মেদিকেল এজুকেসন অমসুং হেল্থকী ইন্সতিত্যুত ওইরিবা এম্স অসিনা হৌজিক বিলাসপুর অমসুং হিমাচলগী মীয়ামগী চাউথোকচবা হেনগৎহল্লি।
বিলাসপুর এম্স অসি অতোপ্পা অহোংবা অমগী খুদমসু ওইরি অমসুং মসি এম্স মনুংদা লৈবা গ্রীন এম্সকীদমক্তসু খঙনরগনি, তশেংনা অকোইববু নুংশিজবা এম্স, মহৌশাবু নুংশিজবা এম্স ওইরগনি। হৌজিক্তা ঐখোয়গী মরুপ পুম্নমক্না হায়বীখি মদুদি মমাংগী সরকারশিংনা উরেপ-উয়ুং তম্বসু মীখল লোইখ্রবা মতুংদা কাওখিরম্মি। ঙসিসু ঐখোয়গী ধুমলজীনা উরেপ-উয়ুং তমখিবা মফমশিং থীদুনা থবক পাইখৎতবা মফমশিং য়েংশিনখি।
ঐহাক্না নীংশিংলি অমুখক ঐহাক্না রেলৱে য়েংশিবদা নখোয়গী উনাগী মনাক্তা রেলৱে লাইন অমা শেমগদবনি। মসিগী ৱারেপ অসি চহি ৩৫গী মমাংদা লৌখিবনি। পার্লিয়ামেন্তদা লাউথোকখ্রবসু ফাইল অদু শুখিদে। হিমাচলগী কনানা হংলক্কনি? অদুবু মহাক্তি হিমাচলগী মচানুপানি অমসুং হিমাচল কাউথোকপা ঙমলোই। অদুবু ঐখোয়গী সরকারনা উরেপ-উয়ুং তমখিবা প্রোজেক্ত অদুবু জাতিদা খুৎশিন্নবগী থবক তৌরি। পন্দুনা লৈবা, লোইশিন্দবা হায়বগী চহিচা অদু লোইখ্রে মরুপশিং!
মরুপশিং,
হিমাচলনা জাতিগী ঙাকশেলদা চাউনা শরুক তমদুনা লাকখি, হিমাচল অসি লৈবাক শিনবা থুংবদা লৈরিবা রাস্ত্র রক্ষাগী অথৌবশিংগীদমক খঙনৈ, হৌজিক হিমাচলনা এম্স অসি লাক্লবা মতুংদা মীওইবগী পুন্সি কনবদা মরু ওইবা থৌদাং অমা লৌরগনি। ২০১৪ ফাওবদা হিমাচলদা মেদিকেল কোলেজ ৩ খক্তা লৈরমখি, মসিগী মনুংদা ২দি সরকারগীনি। হৌখিবা চহি ৮দা হিমাচলদা অনৌবা সরকারগী মেদিকেল কোলেজ ৫ শাখি। ২০১৪ ফাওবদা মহৈরোয় ৫০০ খক্তনা অন্দর অমসুং পোস্ত গ্রেজ্যুৎ তম্বা য়ারমখি ঙসিদি মসিগী মশিং অসি ১২০০ য়ৌদুনা শরুক অনি হেনগৎহনবা ঙমখ্রে। চহি খুদিংগী এম্সতা অনৌবা দোক্তরকয়া লৌরগনি, নর্সিং তমলুবা মহৈরোয়শিংনা মসিদা ত্রেনিং ফংলগনি। অমসুং মরু ওইনা ঐহাক্না জয়রামজী, মহাক্কী তীম, হকশেল মন্ত্রালয়গী কেন্দ্রগী মন্ত্রী অমসুং হকশেল মন্ত্রালয়বু থাগৎপা ফোঙদোকচরি। নদ্দাজীনা হকশেল মন্ত্রী ওইরিঙ মনুংদা ঐখোয়না ৱারেপ অসি লৌখি, নদ্দাজীনা মতম অদুদা অচৌবা থৌদাং অমা য়াখি, ঐহাক্নসু উরেপ-উয়ুং তমখি। মতম অদুদা কোরোনাগী শাথিরবা লাইচৎ লাকখি অমসুং ঐখোয়না খঙই মদুদি হিমাচলগী মীয়াম্না মখল অমা হেক্তগী কনস্ত্রক্সন তৌবা মতমদা চীং মথক্তা পোৎ পুখৎপা অসি অৱাবা অমনি। মখাদা শুবদা পুং অমদা লোইবা অদু চীংদদি নুমিৎ অমা চংই। পুম্নমক অসি লৈজরবসু, কোরোনাগী খুদোংথিবা লৈরবসু ভারত সরকারগী হকশেল মন্ত্রালয়না অমসুং রাজ্য সরকারগী জয়রামজীগী তীমনা তৌখিবা থবক অদুগী ফল ওইনা ঙসি এম্স লৈহনবা ঙমখি, এম্স মথৌ তৌবা হৌরি।
মেদিকেল কোলেজ খক্তা নত্তনা ঐখোয়না অতোপ্পা মাইকৈ অমদসু চংশিল্লি। হিমাচলনা হীদাকশিং অমসুং পুন্সি কন্নবা ভেক্সিন পুথোকপদা লৌবা থৌদাং অসি শীংথানীংঙাই ওইনা পাকথোক-চাউথোকহনখি। ব্লক দ্রগস পার্ক্কীদমক খনখিবা রাজ্য অহুমগী মনুংদা হিমাচল প্রদেশসু অমা ওইরকপা অসি রাজ্য অসিগী মীয়ামগীদমক চাউথোকচনীংঙাই ওইবা মীকুপ অমনি। মসিনা নখোয়গী অঙাংশিংগী অফবা তুংলমচৎকী য়ুম্ফল থোনবা নত্তরা? মসি নখোয়গী অঙাংশিংগী অফবা তুংলমচৎকী গরেন্তী অমা নত্তরা? ঐখোয়না অচৌবা শক্তিগা লোয়ননা থবক তৌরি অমসুং মসি ঙসিগী মীরোল লোয়ননা তুংগী মীরোলগীদমক তৌরি।
মতৌ অসুম্না মেদিকেল দিভাইস পার্ক শানবগীদমক রাজ্য ৪ খনখি, ঙসি হীদাক-লাংথক্তা তেক্নোলোজী পাকশন্না শীজিন্নরি। লৈবাক অসিদা খুৎলাই মখল অমা শানবগীদমক লৈবাক অসিদা রাজ্য মরি খনগৎখি। চাউখ্রবা ভারত অসিদা, য়ামখ্রবা মীশিং অসিদা হিমাচল অসি ঐহাক্কী অপীকপা রাজ্য অমনি অদুবু মসি অথৌবশিংগী লমদমনি অমসুং মফম অসিদা ঐহাক লৈরকখি, মসিগীদমক ঐহাক্না লমন তোল্লি। অমসুং মরিশুবা মেদিকেল দিভাইস পার্ক কদায়দা শারি – হিমাচলদা। মালেম শিনবা থুংবদগী অচৌবা মীয়াম্না মফম অসিদা লাক্লি। নালাগর মেদিকেল দিভাইস পার্ক অসি মসিগী শরুক অমনি। দিভাইস পার্ক অসি শান্নবগীদমক মফম অসিদা লুপা করোর লিশিং কয়া থাদখি। মসিগা মরী লৈনবা অপীকপা ইন্দস্ত্রীশিং মনাক নকপদা শেমগৎলগনি। মসিনা লমদম অসিগী নহারোল লিশিং কয়াদা কান্নবা পীরগনি।
মরুপশিং,
হিমাচল প্রদেশকী অতোপ্পা লম অমসু লৈরি, মসিদা চাউখৎপগী লোইনাইদ্রবা ওইথোকপা য়াবা কয়া লোৎতুনা লৈরি। মসি মেদিকেল তুরিজমনি। মফম অসিগী ক্লাইমেৎ, মসি অসিগী অইং-অশা, মফম অসিগী অকোইবগী ফীভম, মফম অসিগী পাম্বী অসি অফবা হকশেলগা য়াম্না চুন্নৈ। ঙসি ভারত অসি মেদিকেল তুরিজমগী লমগা মরী লৈননা অচৌবা মীৎয়েং চংনীংঙাই ওইবা মফম অমা ওইরক্লি। লৈবাক অসিগী মীয়াম্না অমসুং মালেমগী মীয়াম্না মেদিকেল ত্রীৎমেন্তগীদমক ভারত্তা লাকনীংবা পোকপা মতমদা লমদম অসিগী মহৌশাগী ফজবা অসি অদুক্কী মতিক ফজবনা মরম ওইদুনা মখোয়না শোইদনা লাক্কনি, মখোয়না হেল্থ অমসুং তুরিজমগী কান্নবা ফংগনি। হিমাচলগী মখুৎ অনিমক্কতা লদুশিং পাইরি।
মরুপশিং,
কেন্দ্র সরকারনা লায়রবা অমসুং মিদল ক্লাসকী লায়েংবদা শেল চংবা হন্থহন্নবা, অফবা লায়েং ফংহন্নবা অমসুং মসিগীদমক অরাপ্পা মফমদা চৎতনবা খোঙথাংশিং লৌখৎতুনা লাকখি। ঙসি মরম অসিনা ঐখোয়না দিস্ত্রিক্ত হোস্পিতালশিংদা অমসুং খুঙ্গংশিংদা লৈরিবা ৱেলনেস সেন্তরশিংদা এম্সতগী ক্রিতিকেল ক্যের ফাওবদা অপনবা লৈতবা কন্নেক্তেতিবিতী লৈহন্নবা থবক পাইখৎলি। আয়ুশ্মান ভারত স্কিমনা রাজ্য অসিগী অয়াম্বা ইমুংশিংদা লুপা লাখ ৫ ফাওবগী লেম্না লায়েং ফংহল্লি।
স্কিম অসিগী মখাদা লৈবাক শিনবা থুংবদা পেসেন্ত করোর ৩ হেন্না অমসুং হিমাচল প্রদেশতগী বেনিফিসরী লাখ ১.৫ লাকখি। হৌজিক ফাওবদা সরকারনা লৈবাক শিনবা থুংবদা লুপা করোর ৪৫,০০০ হেন্না চাদিং তৌখি। করিগুম্বা আয়ুশ্মান ভারত স্কিম লৈরমদবাতারবদি পেসেন্তশিংনা মশাগী ফুরিৎ খাওদগী লুপা করোর ৯০,০০০ রোম চংদিং তৌরমগনি। হায়বদি অফবা লায়েংগা লোয়ননা লায়রবা অমসুং মিদল ক্লাসকী ইমুংনা য়ামখ্রবা শেনফম অসি তুংশিনবা ঙমহনখি।
মরুপশিং,
ঐহাক্না অপেনবা পোক্লিবা ৱাফম অমগা লৈরি। ঐখোয়গী ইমাশিং, ইচে-ইচলশিং অমসুং ইচানুপীশিংনা সরকারগী স্কিম কয়াদগী চাউনা কান্নবা ফংলি। অমসুং ঐখোয়না খঙই মদুদি ইমাশিং, ইচে-ইচলশিং অমসুং ইচানুপীশিংগী মগুন অমা লৈ মখোয়না অৱাবা কয়া লৈরবসু, হকচাংদা অৱাবা মায়োক্নরবসু মখোয়না কনাগুম্বদা ফোঙদোক্তে। মহাক্না খঙজিল্লি, থবক তৌই, ইমুং পুম্ববু য়েংশিল্লি মরমদি মহাক্কী ৱাখলদা করিগুম্বা ইমুংগী মীওই অমনা অনাবা অদুগী মতাংদা খঙলকপা তারবদি, মহাক্কী অঙাংশিংনা খঙলকপা তারবদি লোন লৌদুনা মহাক্কী অনাবা অদু লায়েংগনি। ইমাশিংনা অনাবা অদু খাংজিন্দুনা মহাক্কী অঙাংশিংবু শেল তোনশিন্দনবা হোৎনৈ, হোস্পিতাল চৎতুনা শেল চাদিং তৌদনবা হোৎনৈ। কনানা অসিগুম্বা ইমাগীদমক খনগনি? ঐহাক্কী ইমানা অৱাবা অসি তুমিন্না খাংজিল্লি। ফীভম অসিদা মচানুপাগী কান্নবা অসি করিনো? অমসুং মসিগী ৱাখল্লোন্দা আয়ুশ্মান ভারত লাকখি। অদুনা ঐহাক্কী ইমাশিং, ইচে-ইচলশিংনা অনাবগা লোয়ননা হিংলরোই। আয়ুশ্মান ভারত স্কিমগী মখাদা কান্নবা লৌরিবা ইমাশিং, ইচে-ইচলশিংনা চাদা ৫০ হেল্লি।
মরুপশিং,
অমাংশঙ শানবা স্বচ্ছ ভারত অভিয়ান, লেম্না গ্যাস কন্নেক্সন পীনবা উজ্জ্বলা য়োজনা, লেম্না সেনিতরী নেপকিনশিং পীনবা কেম্পেন, মাতৃ বন্দনা য়োজনাগী মখাদা মীরোনবী নুপী খুদিংমক্তা মচি ওইবা চীঞ্জাক চানবা লুপা লিশিং কয়াগী মতেং পাংলি নত্ত্রগা হৌজিক পাইখৎলোবা হর ঘর জল পুম্নমক অসিনা ঐখোয়গী ইমাশিং অমসুং ইচে-ইচলশিংবু শক্তি পীনবা ঐখোয়না থবক তৌরি। দবল-ইঞ্জিন সরকারগী য়ুম্ফম অসি ঐখোয়গী ইমাশিং, ইচে-ইচলশিং অমসুং ইচানুপীশিংদা হরাউ তয়াম্বা, এক্সেসিবিলিতী, ইকাই খুম্নবা, ঙাকশেল অমসুং হকশেল ফংহন্দুনা থোনখিবনি।
কেন্দ্র সরকারনা পাইখৎখিবা স্কিমশিং অসি জয়রাম অমসুং মহাক্কী অপুনবা তীমনা, মহাক্কী সরকারনা খোঙজেল য়াংনা থবক ওইনা ওন্থোক্লি অমসুং হীরমশিং অসি থৱায় য়াওনা পাকথোক-চাউথোকহল্লি। পুম্নমক ঐখোয়গী মাংদা লৈরে, মফম অসিদা য়ুম খুদিংমক্তা তোতি ঈশিংগী কন্নেক্সন পীবগী থবক কয়াম খোঙজেল য়াংনা চংশিনবগে। হৌখিবা দিকেদ ৭ অসিদা শুপ্নগী চহি ৩গী মনুংদা হিমাচলদা পীখিবা তোতি ঈশিংগী কন্নেক্সন অসিগী মশিং শরুক অনি হেন্না হেনগৎহনখি। চহি অহুম অসিদা অনৌবা য়ুম লাখ ৮ মখাইনা তোতি ঈশিংগী খুদোংচাবা ফংখি।
ইচিল-ইনাওশিং,
লৈবাক অসিনা জয়রামজী অমসুং মহাক্কী তীম অসিবু অতোপ্পা ৱাফম অমগীদমক থাগৎপা ফোঙদোক্নরি। সোসিএল সেক্যুরিতীগী মতাংদা কেন্দ্র সরকারনা পাইখৎপা খোঙথাংশিং অসি পাকথোক-চাউথোকহনখিবগীদমক থাগৎখি। ঙসি হিমাচলদা লৈরিবা ইমুং খুদিংমক্তা মীওই অমা নত্ত্রগা অমনা পেন্সনগী ফেসিলিতী ফংদবা লৈত্রে। পেন্সন অমসুং মেদিকেলগী চাদিং তৌনবা অসিগুম্বা ইমুংশিংদা পীবা তেংবাং অসি, মরু ওইনা কনা লৈজদ্রবশিংদা পীবা তেংবাং অসি শীংথানীংঙাই ওইরি। হিমাচল প্রদেশকী ইমুং লিশিং কয়ানা ৱান রেঙ্ক ৱান পেন্সন ইমপ্লিমেন্ত তৌবদগী চাউনা কান্নবশিং ফংলি।
মরুপশিং,
হিমাচল অসি খুদোংচাবশিংগী লম অমনি। অমসুং ঐহাক্না জয়রামজীবু অমুক্কা হন্না থাগৎপা ফোঙদোকচনীংই। লৈবাক শিনবা থুংবদা ভেক্সিনেসনগী থবক পাইখৎখি অদুবু নখোয়গী শাফনবগীদমক হিমাচল অসি কোরোনাগী ভেক্সিনেসন চাদা চামা কাপ্পা লোইখিবা অহানবা রাজ্য ওইখি।
মফম অসিদা দাইদ্রোদগী মৈ পুথোকখি, লৈহাউ লৈবা লম ওইরি অমসুং তুরিজম্না মরম ওইরগা লোইবা নাইদ্রবা থবক্কী খুদোংচাবশিং ফংলি। ২০১৪দগী হৌরগা খুঙ্গং অমদগী খুঙ্গং অমদা হিমাচল প্রদেশতা খ্বাইদগী ফবা ইনফ্রাস্ত্রকচর ফংহন্নবা কন্না হোৎনরি। হিমাচল প্রদেশকী মফম খুদিংমক্তা লম্বী পাংথোক্নবা থবক পাইখৎলি। হৌজিক ফাওবগী ওইনা হিমাচল প্রদেশতা কন্নেক্তিবিতীগী থবকশিংদা লুপা করোর ৫০ রোম চাদিং তৌখ্রে। পিঞ্জোরদগী নালাগর ফাওবগী লেন মরী লম্বী পাকথোকপগী থবক অসি লোইশিবা মতমদা নলাগর অমসুং বদ্দিগী ইন্দস্ত্রী ওইবা মফমশিং খক্তা কান্নবা ফংবতা নত্তনা চন্দিগর অমসুং অম্বালাদগী বিলাসপুর, মান্দী অমসুং মনালী তম্না চৎলিবা পেসেঞ্জরশিংসু কান্নবা ফংলগনি। হিমাচলগী মীয়ামদা অথেকপা লম্বীশিংদগী শাফনবা তন্নেলশিংগী নেতৱর্ক অমা য়ুম্ফম থোনখ্রে।
মরুপশিং,
দিজিতেল ইন্দিয়া কন্নেক্তিবিতীগা মরী লৈননা মমাংদা তৌখিদ্রিবা থবক কয়ামরুম পাইখৎলে। হৌখিবা চহি ৮ অসিদা মেদ ইন ইন্দিয়া মোবাইল ফোনশিংগী মমলসু হোংথরে অমসুং খুঙ্গংশিংদা মসিগী নেতৱর্কশিং ফংহল্লে। হিমাচল প্রদেশ অসি অফবা ফোরজি কন্নেক্তিবিতীনা মরম ওইরদুনা দিজিতেল ত্রাঞ্জেক্সনশিংদা খোঙজেল য়াংনা চংশিল্লি। করিগুম্বা কনাগুম্বা অমনা দিজিতেল ইন্দিয়াদগী খ্বাইদগী য়াম্না কান্নবা ফংলবদি মদু হিমাচল প্রদেশকী নখোয় মীয়াম্নি। মসিনা মরম ওইরগা বিল থিবা, বেঙ্ককা মরী লৈনবা থবকশিং, এদমিসনশিং, এপ্লিকেসনশিংনচিংবা থবকশিংদা মতম খ্বাইদগী তেন্না চংলে। হৌজিক অহানবা ওইনা লৈবাক অসিদা মেদ ইন ইন্দিয়া ফাইব জী সর্ভিসশিং হৌখ্রে, মসিগী কান্নবশিং য়াম্না অথুবদা হিমাচলদসু য়ৌরক্লগনি।
ভারত্তা দ্রোনগী চৎন-কাংলোনশিং হোংদোক্লবা মতুংদা ত্রান্সপোর্তেসন্দা মখোয় শীজিন্নবগী চাং অসি হেনগৎপগা লোয়ননা এজুকেসন, হকশেল, লৌউ শিংউ অমসুং তুরিজম সেক্তরদা মসিগী কান্নবা মপুংফানা ফংলগনি। হিমাচল প্রদেশপু দ্রোন পোলিসী অমা শেম্বা অহানবা রাজ্য ওইখিবদা থাগৎপা ফোঙদোকচরি। অমসুং করিগুম্বা ঐখোয়না মসিদা কিন্নোর ফাওবা অলু পুখৎলবদি মখোয়না দ্রোনদগী মদু লৌজবা য়ারগনি অমসুং খুদক্তা অচৌবা কৈথেলদা য়ৌহনবা ঙম্লগনি। ঐখোয়গী উহৈশিংবু মাংলরোই দ্রোনশিংনা লৌখৎপা য়ারগনি। লাক্কদৌরিবা মতমশিংদা কান্নবা মখল কয়া ফংলগনি। ঐখোয়না নাগরিক খুদিংমক্তা খুদোংচাবা ফংবা হেনগৎহন্নবা অমসুং নাগরিক খুদিংমক্না চাউখৎ থৌরাং ফংহন্নবা চাউখৎ থৌরাংগী মখল অমা ফংনবা হোৎনরি। মসিনা চাউখৎলবা ভারত অমসুং চাউখৎলবা হিমাচল প্রদেশকী ফীরেপ তাক্লগনি।
বিজয়া দশমীগী য়াইফরবা কুহ্মৈ অসিদা মাইপাকপগী ঈশৈ শকপা ফংজবা অমসুং রনসিমহা মুত্থৎতুনা মাইপাকপা হৌদোকপগী খুদোংচাবা ফংজবদা ঐহাক্না য়াম্না নুংঙাইবা পোকই। পুম্নমক অসি নখোয়গী থৌজালশিংগা লোয়ননা পাঙথোকপগী খুদোংচাবা ফংজরি। ঐহাক্না এম্স য়াওনা চাউখৎ-থৌরাংগী প্রোজেক্তশিং অসিগীদমক ঐহাক্না নুংঙাইবা ফোঙদোকচরি। খুৎ অনিমক খুদুম তাদুনা ঐহাক্কা লোয়ননা হৌনা হায়বীয়ু-
ভারত ইমানা য়াইফরে। শক্তি পুম্নমক্কা লোয়ননা হৌনা হায়বীয়ু -
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
হন্না-হন্না থাগৎচরি!
