ভারত ইমানা য়াইফরে! ভারত ইমানা য়াইফরে! ভারত ইমানা য়াইফরে!
জয় হিন্দ! জয় হিন্দ! জয় হিন্দ!
ইকায়খুম্নরবা অরুনাচল প্রদেশকী গভর্নর, শ্রী কে. তি. পরনাইক জী, মীয়াম্না পাম্নবা ইচঙ থৌরবা স্তেত অসিগী মুখ্য মন্ত্রী পেমা খন্দু জী, ঐগী মন্ত্রী মন্দলগী মরুপ কিরন রিজিজু, স্তেত লৈঙাক্কী মন্ত্রীশিং, পার্লিয়ামেন্তকী মেম্বর মরূপ নাবম রেবিয়া জী, অমদি তাবির গাও জী, এম.এল.এ. পুম্নমক, অতৈ মীয়ামগী মীহুৎশিং, অমদি ঐগী নুংশিরবা অরুনাচল প্রদেশকী ইচিল ইনাওশিং,
বোময়েরুং দোনয়ী পোলো! তাইবং মপু দোনয়ী পোলোনা ঐখোয় পুম্নমক থৌজানবিসনু!
মরূপশিং,
হেলিপেদতগী লম্পাক অসি ফাওবগী লম্বীদা, ঐহাক্না অঙাং, ইচানুপা অমদি ইচানুপী কয়া অমা মচু অহুমগী ফিরাল হাইদুনা লৈবা উরকই। অরুনাচল প্রদেশকী ইকায়খুম্নবা অমদি মীনুংশিনা ঐগী পুক্নিং চাউথোকহল্লি। ময়াম্না তরাম্না ওকপিবনা হেনমনখিদুনা ঐনা মফমসিদা য়ৌরকপদা থেংথহনখিবনি অমদি মসিগীদমক ঐহাক্না ময়ামগী মফমদা ঙাকপিনবা হায়জরি। অরুনাচল প্রদেশকী শেংলবা লমদম অসি নুমিৎ থোকফমখক্তা নত্তে, লৈবাক নিংবগী ইহুল মতোন লোম্বা মফমসুনি। ঐখোয়গী মচু অহুমগী ফিরালগী অহানবা মচু গেরুৱা মচু ওইবগুম্না, অরুনাচল প্রদেশগী অহানবা মচুসু গেরুৱা মচুনি। মফমসিগী মীপুম খুদিংমক থৌনা ফবগী খুদম অমনি, ইচম চম্বগী খুদম অমনি। ঐহাক্না রাজনিতিগী শক্তিগী থোঙজিন্দা চঙলকত্রিঙৈ মমাঙদসু ঐহাক অরুনাচল প্রদেশতা কয়ারক হন্না লাকখ্রে। ঐগী ইফমদা মফমসিগী মশিং লাকঙমদ্রবা থৌদোক কয়া নীংশিংলি, মখোয়বু নীংশিংবখক্তনা ঐবু নুংঙাইহল্লি। অদোমগা লোয়ননা লেনমিন্নবা মীৎকুপ খুদিং ঐগীদমক্তদি নীংশিংবগী লন অমনি। অদোম্না ঐগী ইফমদা উৎপিরিবা মীনুংশি অসি মীওই অমনা মহাক্কী পুন্সিদা ফংবা ঙম্বা খ্বায়দগী চাউবা থৌজালনি হায়না ঐনা থাজৈ। তৱাং মোনাস্তরীদগী নমসাইগী গোল্দন পেগোদা ফাওবদা, অরুনাচল অসি ইং-তপ্পা অমদি নাৎকী ইতিনফম্নি। মসি ইমা ভারতীগী চাউথোকচনিংঙাইনি, অমদি ঐহাক্না শেংলবা লমদম অসিগী মফমদা ইকোক নোঞ্জরি।
মরূপশিং,
ঐনা ঙসি অরুনাচল প্রদেশতা লাক্লিবা অসি মরম অহুমনা য়াম্না অখন্নবা ওইহল্লে। অহানবদা, নবরাত্রীগী অহানবা নুমিৎসিদা ফজরবা চীংজাওশিং উবা ফংজনবা তাঞ্জা ফংলে। নবরাত্রীগী নুমিৎ অসিদা, ঐখোয়না হিমালয়গী মচানুপী ইমা সেলপুত্রিবু খুরুমজরি। অনিসুবা মরম্না ঙসিদগী লৈবাক পুম্বদা চৎনবা হৌরিবা নেক্স জেনেরেসন GST রিফোর্ম অসিনি। “GST সেভিং ফেস্তিবেল” হৌবা মতম্নি। লৈবাক অসিগী মীয়াম্না হন্দক্কী কুমহৈ মতমসিদা দবল বোনাঞ্জা ফংলে। অদুগা অহুমসুবা মরম্না অরুনাচল প্রদেশনা শেংলবা নুমিৎ অসিদা অরুনাচলনা অনৌবা চাওখৎ থৌরাংগী প্রোজেক্ত কয়া অমা ফংলিবসিনি। ঙসি অরুনাচলগী মফমদা মৈ, লম্বী থোং, তুরিজম, অমদি হকশেল য়াওনা সেক্তর কয়াদা প্রোজেক্ত কয়াগী খুদোল ফংলি। মসি BJP গী দবল ইঞ্জিন লৈঙাক্কী দবল কান্নবগী তরং তরংবা খুদম্নি। প্রোজেক্তশিং অসিগীদমক ঐহাক্না অরুনাচল প্রদেশগী মীয়ামগী মফমদা নুংঙাইবা ফোঙদোকচরি। মফমসিদা ঐনা লাকত্রিঙৈদা, ঐহাক্না অপীকপা লল্লোনবা মীওইশিং, উননবা, মখোয়গী দুকান্দা য়োল্লিবা পোৎলমশিং য়েংননবা, অমদি হেন্না মরু ওইনা মখোয়গী ইহুল অমদি ইচঙ থৌবা উননবা তাঞ্জা ফংলম্মি। ঐনা লল্লোনবা মীওইশিং, খুৎহৈবশিং, অমদি মীয়ামগী মফমদা হন্দক্কী সেভিং ফেস্তিবেলগী মতাঙদা মথুম মরাং হৌবা উবা ফংই।
মরূপশিং,
নুমিৎকী অহানবা মঙাল অরুনাচলদা তাজরবসু চাওখৎপগী মঙাল মশেক্তি মফমসি য়ৌরকপদা দেকেদ কয়া চঙলি। ২০১৪ গী মমাঙদসু ঐহাক অরুনাচলদা কয়ারক হন্না লাকখ্রে, ময়ামগী মরক্তা লৈখ্রে অমদি লমদম অসিদা মহৌশা লাইরেম্বীনা পীবিরিবা খুদোল, লমদম অসিগী শুবা নোম্বা কনবা মীয়াম অমদি মফমসিগী লৈরিবা মতিকশিং হকথেংননা উবা ফংখ্রে। অদুবু দিল্লীদা ফম্লিবা অমদি লৈবাক চলাইরিবা মীওইশিংদুনা অরুনাচলবু মীরায়দুনা থম্বিরম্মি। কংগ্রেসকুম্বা পার্তীশিংনা মফমসিদা মীশিং য়াম্না লৈতে অমদি লোক সভাগী সীত অনিখক্তমক লৈ অদুনা অরুনাচলগীদমক করিগী খল্লুগদৌরিবনো খল্লম্মি। অসিগুম্বা কংগ্রেসকী ৱাখল্লোন অসিনা অরুনাচল অমদি অৱাং নোংপোক্তা চাওনা মাঙজবা পীরম্মি। ঐখোয়গী অৱাং নোংপোক পুম্বা চাওখৎ লমজেলদা মনিংদা লৈহল্লম্মি।
মরূপশিং,
অদোম্না ২০১৪ দা ঐহাকপু লৈবাক অসিগী থৌগল তৌনবা খুদোংচাবা পীবিখিবা মতমদা ঐহাক্না লৈবাক অসিবু কংগ্রেসকী ৱাখল্লোন্দগী মনিং তমহন্নবা ফিরেপ লৌখি। ঐখোয়বু পুক্নিং থৌগৎলিবসি স্তেত অমদা লৈরিবা ভোত নৎত্রগা সীত মশিংনা নত্তে। ঐখোয়বু লমজিংলিবা ৱাখল্লোন্দি লৈবাক্না মাঙদা থম্বা হায়বসিননি। ঐখোয়গী লাইৱাদি মীয়াম্না লাইনি হায়বসিনি। কনানসু থৌশাবিরমদ্রবশিংবু মোদীনা ইকায় খুম্নজৈ। মরম অসিননি কংগ্রেল লৈঙাক্কী মতমদা কাউথোক্নরুরবা অৱাং নোংপোক্না ২০১৪ গী মতুংদগী চাওখৎ থৌরাংগী ময়োল ওইরক্লিবা। ঐখোয়না অৱাং নোংপোক্কী বজেত শরুক কয়া হেনগৎহল্লে। ঐখোয়না লাস্ত মাইল কন্নেক্তিবিতী অমদি লাস্ত মাইল দেলিবরীবু ঐখোয়গী লৈঙাক্কী ফিদম ওইহল্লি। মসিদসু নত্তনা, ঐখোয়না লৈঙাক অসি দিল্লীদা ফমদুনা লৈরগা লৈঙাকপা ওইহন্দনবা হোৎনখি। ওফিসর অমদি মন্ত্রীশিংনা অৱাং নোংপোক্তা তোয়না লাকহল্লি, মফমসিদা অহিং য়ারেকহল্লি, অমদি মফমসিদা চত্তুনা থবক পায়খৎহল্লি।
মরূপশিং,
কংগ্রেস লৈঙাক্কী মতমদা, কেন্দ্রগী মন্ত্রী অমা থা অনি নৎত্রগা অহুমগী মনুংদা অমুরক লাক্লম্মি। মদুগী ওন্ন-তৈনবদা, BJP লৈঙাক্কী মখাদা কেন্দ্র মন্ত্রীশিংনা অৱাং নোংপোক্তা ৮০০ হেন্না লাকখ্রে। খোঙচৎশিং অসি ইচম চম্না লাক্লম্লগা হনখিবা খোঙচৎ নত্তে। ঐখোয়গী মন্ত্রীশিং লাকপা মতমদা মখোয়না মনুং হঞ্জিনবা মফমশিং, দিস্ত্রিক্ত, ব্লোক্তা চৎলি, মদুদসু নত্তনা, মখোয়না মফমসিদদা অহিং অমত্তা ওইরবসু য়ারেক্তুনা লৈ। ঐ ইশামক প্রধান মন্ত্রী অমা ওইনা ৭০ গী মথক্তা অৱাং নোংপোক্তা লাকখ্রে। মমাঙগী চয়োলদসু, ঐহাক মিজোরম, মনিপুর, অমদদি অসামদা চৎখি, অমদি গুৱাহাতীদা অহিং য়ারেকখি। অৱাং নোংপোক অসিগী ঐগী থম্মোয়নুংদা থাগোন্নদুনা লৈ। মরম অসিননি ঐখোয়গী থম্মোয়দা লৈরম্বা লাপ্নবা অদু মুত্থত্তুনা দিল্লীবু ময়ামগী নাক্তা পুরক্লিবা।
মরূপশিং,
ঐখোয়না অৱাং নোংপোক্কী স্তেত নিপানবু ‘অস্ত লক্সমী’ হায়না ইকায় খুম্নজৈ। মরম অসিননি ঐখোয়না লমদম অসসিবু চাওখৎ লমজেলদা মনিং হন্দুনা লৈহল্লোইদৌরিবা। কেন্দ্র লৈঙাক্না লমদম অসিদা চাওখৎপা পুরক্নবা অহেনবা শেনফমশিং থাদরি। ঐহাক খুদম অমা পীজগে। অখঙবা মীসু য়াওবিরমগনি, কেন্দ্র লৈঙাক্না খোমগৎলিবা খাজনাগী শরুক খরা স্তেতশিংদা ফংহল্লি। কংগ্রেল লৈঙাক্কী মতমদা, অরুনাচল প্রদেশনা কেন্দ্রগী খাজনাদগী চহি তরাদা লুপা করোর ৬০০০ লোমতমক ফংলম্মি। অদুবু BJP লৈঙাক্কী চহি তরাসিদা অরুনাচলনা লুপা করোর লাখ অমা হেন্না ফংখ্রে। অতোপ্পা ৱাহৈদা হায়রগনা, BJP লৈঙাক্না অরুনাচলদা শেল শরুক ১৬ হেন্না ফংহল্লে হায়বনি। মসি খাজনাগী শরুক খক্তনি। মসিগী মথক্তা, কেন্দ্র লৈঙাক্না স্কীম কয়াগী শেল থাদরি অমদি অচৌবা প্রোজেক্ত কয়া পায়খৎলি। মরম অসিননি ঙসি অদোম্না ঙসি পাক চাউনা অমদি থুনা অরুনাচল শিন-থুংনা চাওখৎলকপা উরিবা।
মরূপশিং,
পুক্নিং চুম্না থবক পায়খৎলবদি, পুকচেল শেংনা হোৎনরবদি, মহৈ উবা ফংই। ঙসি, ঐখোয়গী অৱাং নোংপাক লৈবাক্কী চাওখৎপগী শক্তি ওইরক্লিই। মফমসিদা চাউনা মীৎয়েঙ থম্লিবা ৱাফম অমদি অফবা লৈঙাক্লোন অসিনি। ঐখোয়গী লৈঙাক্কী মফমদা মীয়ামগী য়াইফনবা হায়বসিদগী হেনবা অতৈ অমত্তা লৈতে। অদোমগী পুন্সি হেন্না কোমহন্নবা, ঐখোয়না ইজ ওফ লিভিংগী লমদা থবক পায়খৎলি। অদোম্না চত্থোক চৎশিন তৌবদা অৱাবা মায়োক্নদনবা, ইজ ওফ ত্রাভেলগী থৌরাং পায়খৎলি। অনা লায়েংগী ফীভম ফগৎহন্নবা ইজ ওফ মেদিকেল ত্রীতমেন্ত পায়খৎলি। অঙাংশিং লাইরিক তম্বদা খুরৌ ওইদনবা ইজ ওফ এজুকেসনগী থবক পায়খৎলি। অদোমগী লল্লোন ইতিক্তা ঙাক্লৌ পীননবা, ইজ ওফ দুইং বিজিনেসগী থৌরাং পায়খৎলি। হায়রিবা পান্দমশিং অসি মাঙদা থম্লগা, BJP গী দবল ইঞ্জিন লৈঙাক্না চোকথবা নাইদনা থবক তৌরি। মমাঙদা অফবা লম্বীগী মঙ ফাওবা মঙলমদ্রবা লমদমসিদা, ঙসিদি মতমগা চুনবা হায়ৱেশিং শেমগৎলি। সেলা তন্নেলগুম্বা ইনফ্রাস্ত্রকচরশিং মতম অমদা পুক্নিংনা লাম্বা ফংলম্বা নত্তে, অদুবু ঙসিদি সেলা তন্নেল অরুনাচলগী শক্তমগী খুদম অমা ওইরে।
মরূপশিং,
কেন্দ্র লৈঙাক্না অরুনাচল য়াওনা অৱাং নোংপোক্কী মনুং হঞ্জিনবা মফমশিংদা হেলিপোর্ত শাননবা থৌরাং পায়খৎলি। মরম অসিননি লমদম অসিবু উরান স্কীমগী খুত্থাঙদা শম্নহল্লিবা। হোলোঙ্গী এয়রপোর্তকী অনৌবা তর্মিনেল শাবা লোইশিল্লে। হৌজিক্তি মফমসিদা দিল্লীগা দাইরেক্ত ফ্লাইত লৈরে। মসিনা চুম্নগী পেসেঞ্জর, মহৈরোয় অমদি লম কোয়বশিংদা কান্নবা পীবখক নত্তনা লৌমীশিং অমদি অপীকপা ইন্দস্ত্রীশিংদসু কান্নবা পীরি। উহৈ-ৱাহৈ, মনা মশিং, অমদি মফমসিগী অতৈ পোত্থোকশিং লৈবাকসিগী অচৌববা কৈথেলশিংদা হৌজিক্তি লায়না য়ৌবা ঙম্লে।
মরূপশিং,
ঐখোয় পুম্নমক্না ভারতপু ২০৪৭ ফাওবদা চাওখৎপা লৈবাক অমা ওইহন্নবা পান্দমদা থবক পায়খৎলি। অদুগা লৈবাক অসগী স্তেত খুদিংমক চাওখৎলবা মতমদা ভারতনা চাওখৎপা লৈবাক অমা ওইগদৌরিবনি। স্তেত খুদিংমক্না লৈবাক্কী পান্দমগা লোয়ননা খুৎশম্ননা চৎমিন্নরবা মতমদা ভারতনা খুমাঙ চাওশিনগদৌরিবনি। অৱাং নোংপোক্না পান্দম অসি ফংনবা হ,ৎৎনবদা অচৌবা থৌদাং অমা লৌরি খঙবদা ঐ নুংঙাই। মসিগী নীংথিরবা খুদম হায়রগনি পৱার সেক্তর অসিনি। ভারতনা ২০৩০ ফাওবদা নন-কনভেন্সনেল সোর্সতগী মৈ মেগাৱাত ৫০০ পুথোক্নবা পান্দম থম্লি। পান্দম অসি সোলার পৱার, ৱিন্দ ইনর্জী, অমদি হায়দ্রোপৱারনা ফংহনগদৌরিবনি। অরুনাচল প্রদেশসু লৈবাক্কা লোয়ননা খোঙ থাংমিন্নদুনা মাঙদা চঙশিনমিন্নরি। ঙসি শঙ্গারিববা পৱার প্রোজেক্তশিং অসিনা অরুনাচলবু মৈ পুথোকপা লমদম অমা ওইনা খোঙফম চেৎশিনহল্লগনি। প্রোজেক্তশিং অসিনা স্তেত অসিগী নহা লিশিং কয়াদা থবক পীগনি অমদি চাওখৎ থৌরাংগী থবকশিংগীদমক অতাবা মমলদা মৈ ফংহল্লগনি। কংগ্রেসতা মতম পুম্বদা হৈনবী অমখক লৈ। মখোয়না চাওখৎ থৌরাংগী পায়খৎপা য়াবা থবক কয়া লৈরবসু কৈদৌঙৈদা পায়খৎলোই, মখোয়না মদু হুন্দোক্লম্লগা চেনখিগনি। মরমদি মসি মখোয়গী হৈনবীনি, অৱাং নোংপোক অমদি অরুনাচলনা মসিদগী চাউনা অৱাবা নংদুনা লাক্লি। মনুং হঞ্জিনবা, চীংলক্কী নৎত্রগা উমং মনুংদা লৈবা চাওখৎ থৌরাংগী থবক পায়খৎপদা শিংনবনা থনবা মফমশিংবু কনগ্রেসনা লংথোক্তুনা থম্লম্মি, “শোত্থরবা” মফমনি হায়না লাউথোক্তুনা হন্না য়েংলমদে। মখোয়গী মনুংদা অৱাং নোংপোক্কী ত্রাইবেল মফমশিং অমদি দিস্ত্রিক্তশিংনা অয়াম্বনি। ঙমখৈ ময়াদা লৈবা খুঙ্গংশিংববু কংগ্রেসনা “লৈবাকসিগী চিদাইদা লৈবা খুঙ্গংশিং” হায়না মীরাইবিরম্মি, অমদি মখোয়গী মথৌদাংদগী মায় লৈদুনা চেল্লম্মি। অসুম্না তৌবনা, কংগ্রেসনা মখোয়গগী মায়থিবশিং লোৎশিন্নবা হোৎনরম্মি। মসিগী মহৈনা, ত্রাইবেল অমগী ঙমখৈগী মফমশিংদগী মী কয়া লেপ্পা লৈতনা ময়ুম হোংনরম্মি।
মরূপশিং,
ঐখোয়গী BJP লৈঙাক্না থৌওং অদুদা অহোংবা পুরকখি। কংগ্রেসনা “শোত্থরবা দিস্ত্রিক্ত” হায়না কৌরম্বা মফমশিংবু ঐখোয়না এস্পিরেস্নেল দিস্ত্রিক্ত হায়না মমি হোংদোক্তুনা মফমশিং অসি চাওখৎহনবনা ঐখোয়গী মরুওইবা থৌদাং ওইখি। কংগ্রেসনা “অরোয়বা খুঙ্গংশিং” হায়না কৌরম্বা ঙমখৈ ময়াগী খুঙ্গংশিংবু ঐখোয়না লৈবাক্কী অহানবা খুঙ্গংশিং হায়না ইকায়খুম্নবা হৌরকখি। মদুগী মহৈ ঙসি উবা ফংলি। ঙমখৈগী খুঙ্গংশিং ঙসিদি চাওখৎপগী অনৌবা খোঙজেল উবা ফংলি। ভাইব্রেন্ত ভিলেজ প্রোগ্রাম মায় পাকপনা মীয়ামগী পুন্সি হিংবদা লায়হল্লে। অরুনাচল প্রদেশতসু, ঙমখৈগী খুঙ্গং ৪৫০ হেনবদা খোঙলৈ থুনা চাওখৎপা পুরক্লে। লম্বী, মৈ, অমদি ইন্তরনেতকী খুদোংচাবশিং হায়রিবা মফমশিং অসিদা য়ৌরে। মমাঙদা ঙমখৈগী খুঙ্গংশিংদগী ময়োল্লমশিংদা য়ুম হোংনরম্মি, অদুবু হৌজিক্তি হায়রিবা ঙমখৈগী খুঙ্গংশিং অসি লম কোয়ফমগী অনৌবা মফমশিং ওইরক্লি।
মরূপশিং,
অরুনাচলদা লম কোয়বগী অচৌবা মতিং লৈ। অনৌবা মফমশিংদা লম্বী থোং শেমগৎলকপনা মফমসিগী লম কোয়বগী লমদা থুনা চাওখৎপা উবা ফংলিই। হৌখিবা দেকেদ অসিদা অরুনাচলদা লাকপা লম কোয়বা মীশিং শরুক অনি হেনগৎলকপদা ঐঙোন্দা অপেনবা পোকই। অদুবু অরুনাচলগী মতিংদি মহৌশা অমদি নাত্তা য়ুম্ফম ওইবা তুরিজমদগী হেন্না লৈ। ঙসি মালেমগী ওইনা কন্ফরেন্স অমদি কন্সর্ত তুরিজমগী মচৎ অমা লাক্লি। মরম অদুননি তৱাংদা শাগৎকদৌরিবা মতমগা চুনরবা কনভেন্সন সেন্তর অসিনা অরুনাচলগী তুরিজম সেক্তরদা অনৌবা মায়ওন অমা পীগদৌরিবা। লৈঙাক্কী ভাইব্রেন্ত ভিলেজ প্রোগ্রাম্নসি ঐখোয়গী ঙমখৈ নক্না লৈবা খুঙ্গংশিংদা চাওখৎপগী পন্দোল অমা ফংহল্লি, অমদি মসিনা অরুনাচলদা চাউনা কান্নহনগনি।
মরূপশিং,
ঙসি অরুনাচলদা খোঙলৈ থুনা চাওখৎপগী মশক উবা ফংলি মরমদি দিল্লী অমদি ইতানগর অনিমক্তা BJP লৈঙাক লৈবননি। কেন্দ্র অমগী স্তেত অনিগী অপুনবা মতিংনা চাওখৎপা পুরকবদা কত্থোক্লি।। খুদম ওইনা মফমসিদা কেন্সর ইন্সতিত্যুত অমা শাগৎনবা থবক পায়খৎপা হৌরে, মেদিকেল কলেজশিং লিংখৎলি, অমদি মীওই কয়ানা অয়ুস্মান স্কীমগী মখাদা লেম্না লায়েংবা ফংলিই। পুম্নমক অসি কেন্দ্র অমদি স্তেত অনিমক্তা দবল ইঞ্জিন লৈঙাক লৈবগী ওইথোকপা ঙম্লিবনি।
মরূপশিং,
অরুনাচলনা লৌউ-শিংউ অমদি হোর্তিকলচরগী লমদসু দবল ইঞ্জিন লৈঙাক্না হোৎনরিবসিনা মরম ওইরগা খুমাঙ চাওশিল্লি। মফমসিদগী পুথোকপা কিৱি, কোম্লা, এলাইচি, অমদি কিহোমশিংনা অরুনাচলদা অনৌবা শক্তম অমা পীরি। পি.এম. কিসান সম্মান নিধিগগী শেনফম্না মফমসিগী লৌমীশিংদা চাউনা কান্নবা পীরি।
মরূপপশিং,
ঐখোয়গী ইমা, ইচে-ইচল অমদি ইচানুপীশিং মপাঙ্গল হাপ্পনা ঐখোয়গী খ্বায়দগী থাক ৱাংনা থম্লিবা থৌরাংশিংগী মরক্তা অমনি। ‘লাখপতি দিদি’ করোর অহুম শেমগৎপা হায়বসি অচৌবা মিসন অমনি অমদি মসি মোদীগী মিসন্নি। পেমা খন্দু জী অমদি মহাক্কী কাঙবুনা মিসন অসিদা খোঙজেল হাপ্লি খঙবদা ঐ নুংঙাই। ৱর্কিং ৱুমেন্স হোস্তেল কয়া শাগৎনবা থবক হৌরিবা অসিনা ঐখোয়গী ইচানুপীশিংদা চাউনা খুদোংচাহনগনি।
মরূপশিং,
ঙসি, মফমসিদা ইমা অমদি ইচে ইচল মশিং য়াম্না তিনবা উই। ময়াম পুম্নমক্কী মফমদা ঐহাক্না অমুক্কা হন্না GST সেভিং ফেস্তিবেলগী য়াইফ-পাউজেল পীজরি। নেক্স নেজেরেসন GST রিফোর্ম অসিনা অদোমদা চাউনা কান্নবা পীগনি। হৌজিক্তগী হৌরগা, অদোম্না থাগী ইমুংগী শেনফম শিন-লাংবদা চাউনা কান্নবা ফংলগনি। হৌজিক্তি, চাকখুমগী পোৎ,মশিং ওইরবসু, অঙাংগী মহৈ মশিং তম্বগী মচাকশিং ওইরবসু নৎত্রগা ফিরোল অমদি খোঙউপশিং ওইরবসু পোৎলম খুদিংমক হেন্না মমল তারগনি।
মরূপশিং,
২০১৪ গী মমাঙদা লৈরম্বা মতমদুগী মতাঙদা খনবিয়ু। মতমদুদা খুদোংচাদবা কয়া লৈরম্মি। ইনফ্লেসন অতিয়া পক্না ৱাংলম্মি, মফম খুদিংদা অচৌবা স্কেমশিং থোক্লম্মি, অমদি মতমদুগী কংগ্রেস লৈঙাক্না মীয়াময়গী খাজনাগী পোৎলুম অসুম অসুম হেনগৎহল্লম্মি। মতমদুদা কনাগুম্বনা চহিদা লুপা লাখ অনিখক্তমক তাল্লম্লবসু, মখোয়না ইনকম তেক্স থিবা তারম্মি, মতমদু চহি ১১ গী মমাঙদনি। লুপা লাখ অনিগী শেন্থোক্তা খাজনা লৌরম্মি। মরুওইবা পোৎলম কয়াদা কংগ্রেস লৈঙাক্না চাদা ৩০ হেনবগী খাজনা লৌরম্মি। অঙাংগী তোফী ফাওবদা খাজনা চাউনা লৌরম্মি।
মরূপশিং,
মতমদুদা, ঐহাক্না অদোমগী শেন্থোক অমদি সেভিং অনিমক হেনগৎহন্নবা থবক পায়খৎকনি হায়না ঐহাক্না ৱাশকখি। চহি কয়াসিদা, লৈবাক অসিনা অচৌবা শিংনবা কয়া থেংনখ্রে। অদুবু ঐখোয়না লেপ্পা নাইদনা ইনকম তেক্স হন্থহনখি। খন্দুনা য়েংবিয়ু, চহি ১১ গী মমাঙদা লুপা লাখ ২ গী শেন্থোক্তা ইনকম তেক্স লৌরম্মি। চহি অসিদা ঐখোয়না চহিদা লুপা লাখ ১২ গী শেন্থোকপু খাজনা থিহন্দ্রে। অদুগা ঙসিদগী হৌরগা GST সু থাক অনিখক্তা, হায়বদি চাদা ৫ অমদি চাদা ১৮ দা লায়থোকহল্লে। পোৎলম কয়া খাজনা পুমকোক কোক্লে, অদুগা অতোপ্পা পোৎলমশিংগীনা খাজনাগী চাং ফনা য়াম্না হন্থহল্লে। হৌজিক্তি, অদোম্না অনৌবা য়ুম অমা শানিংলবসু, স্কুতী নৎত্রগা বাইক অমা লৈনিংলবসু, মপান্দা চানিংলবসু, নৎত্রগা লম কোয়নিংলবসু পুম্নমক মমল হন্থরে। হায়রিবা GST সেভিং ফেস্তিবেল অসি অদোমগী কাউঙম্লরোইদবা তাঙ্কক অমা ওইরগনি।
মরূপশিং,
ঐনা মতম পুম্বদা অরুনাচল প্রদেশপু মাগী তোপ তোপ্পা মতিক অমগীদমক কল্লকচৈ, মদুদি অদোম্না “নমক্কার” হায়দ্রিঙৈদা মতম পুম্বদা “জয় হিন্দ” হায়নৈ। অদোম ইশাগী মাঙদা লৈবাকপু থমবা মীওইশিংনি। ঙসি, ঐখোয় পুন্না চাওখৎপা ভারত অমা শেমগৎনবা পুন্না থবক পায়খৎমিন্নবা মতমসিদা, লৈবাক অসিনা ঐখোয়দগী থাজবা অমসু থম্লি। থাজবা অদুদি ‘আত্মনিরভর্তা’ হায়বসিনি। ভারতনা মরোমদোম লেপচবা ঙম্লবা মতমখক্তদা চাওখিপা লৈবাক অমা ওইগদৌরিবনি। অদুগা ভারতনা মরোমদোম লেপচবা ঙম্নবগীদমক, স্বদেসীগী লাইৱা অসি মরু ওই। হৌজিক লৈরিবা দিমান্দদি, লৈবাক অসিনা তাল্লিবা অদুদি ঐখোয়না স্বদেসীবু থাগোন্নদুনা: লৈবাকসিদা পুথোকচবা পোৎলমখক্তমক লৈবা, লৈববাকসিদা শাজবা পোৎলমশিংখক্তমক য়োঞ্জবা, অমদি ইখৌ পোঙনা মসি স্বদেসীনি হায়জসি। ময়াম্না ঐগা লোয়ননা ৱাফমসি হায়বিগদ্রা? ঐনা “ইখৌ পোঙনা লাউবিয়ু” হায়রকপা মতমদা, অদোম্না “মসি স্বদেসীনি” হায়না খুম্বিরকউ। ইখৌ পোঙনা লাউবিয়ু—মসি স্বদেসীনি! ইখৌ পোঙনা লাউবিয়ু—মসি স্বদেসীনি! ইখৌ পোঙনা লাউবিয়ু—মসি স্বদেসীনি! লাইৱা অসি ঙাক্না চৎপনা লৈবাক অসিনা খুমাঙ চাওশিনগদৌরিবনি, অরুনাচল অমদি অৱাং নোংপোক্কী চাওখৎ খোংথাঙ খোঙজেল য়াঙ্খৎকদৌরিবনি। অমুক্কা হন্না ঐনা ময়ামগী মফমদা চাওখৎ থৌরাংগী প্রোজেক্তশিং অসিগীদমক নুংঙাইবা ফোঙদোকচরি। ঙসি অসি নবরাত্রীগী শেংলবা কুমহৈ নুমিৎখক্তা নত্তে, সেভিং ফেস্তিবেল নুমিৎসুনি। ময়াম্না অচৌবা কুমহৈ অসিদা শরুক য়াবিরবনিনা, ঐনা হায়জনিংবা ৱাফম অমা লৈ। অদোমগী মোবাইল ফোন পুথোকপিয়ু, ফ্লাসলাইত থান্বিয়ু, অমদি খুৎ ৱাংনা থাঙ্গৎপিয়ু। কোয়না য়েংবিয়ু: মসি সেভিং ফেস্তিবেলগী শক্তম্নি; মসিনা পাঙ্গলনি। নবরাত্রীগী অহানবা নুমিৎ অসিদা মঙালনা মফম খুদিং ঙাল্লি অমদি অরুনাচলগী মঙালনা লৈবাক পুম্বা শন্দোক্লি। অদোমগী অকোয়বদা য়েংবিয়ু, ঙাল্লিবা মঙালশিং অসি তগুপ তগুপ থোক্লিবা থৱানমিচাক্কুম নীংথিরে। ময়ামগী মফমদা য়াইফ-পাউজেল পীজরি। ময়ামবু থাগৎচরি!
