ইকায়খুম্নরবা,
চান্সেল্লর মর্জ, লৈবাক অনিমক্কী ললোন-ইতিক্কী লুচিংবশিং, খুরুমজরি।
ইন্দিয়া-জর্মনি সি.ই.ওস ফোরম শরুক য়াবদা ঐ হরাওই। ঐখোয়না ভারত-জর্মনিগী মরীশিংগী প্লেতিনম জুব্লি অমসুং ইন্দিয়া-জর্মনি ষ্ট্রাতেজিক পার্তনরশিপগী সিলভর জুব্লি পাংথোক্লিঙৈ য়াম্না মরুওইবা মতম অমদা মীফম অসি পাংথোক্লি। মসিনা তাক্লিবদি ঐখোয়গী মরীশিং অদু প্লেতিনমগী মপাঙ্গল অমসুং সিলভরগী মঙাল অদুগুম্না লৈরি হায়বনি।
মরুপশিং,
ভারত অমসুং জর্মনিগী মরক্ত লৈনরিবা মরী অসি মান্নবা গুনশিং অমসুং অমনা অমবু থাজনবদা য়ুম্ফম ওইবা শাগৎপা অফবা মরী অমনি। হিরম খুদিংমক্ত, মখোয়না অমনা অমগী খুদোংচাবশিং পীনরি। ঐখোয়গী এম.এস.এম.ইশিং অমসুং জর্মনিগী মিত্তেলষ্টেন্দগী মরক্ত মেনুফেকচরিংগী মতেং পাংনরি, আই.তি অমসুং সর্বিসেসতা পুন্না থবক তৌমিন্নবা য়াংনা চাউখৎলি, ওতোমেতিপ, ইনর্জি, মেছিন্নরি অমসুং কেমিকেল সেক্তরশিংদা অপুনবা থবকশিং অমসুং পুন্না থিজিনবগী থবকশিংদা অনৌবা তেক্নোলোজিশিং শীজিন্নবা হেনগৎলক্লি। হায়রিবা অফবা মরীশিং অসিনা ঐখোয়গী ললোন-ইতিক্ত হকথেংননা কান্নবা পীরে অমসুং মসি হৌজিক দোল্লর বিল্লিয়ন ৫০ রোম য়ৌরে।
মরুপশিং,
মালেম অসি য়াংনা হোংলক্লি অমসুং কমদৌনা মরুওইবা তেক্নোলোজিশিংগী মখা পোনবগে অমসুং ঙসি কেপিতেল মেছিন্নরিশিং খুৎলায় ওইনা শীজিন্নবগে হায়বা ঐখোয়না উরে। শ্বামী বিবেকানন্দগী মপোক কুমওনগী শেংলবা থৌরম অসিদা, মহাক্কী ৱাখল্লোনশিং অমসুং পাউজেলদগী ঐখোয়না ইথিল ফংলে। মহাক্কী পাউজেলনা ময়েক শেংনা হায়রি: মপাঙ্গল কনবা লৈবাক অমা হায়বসি মশানা মশাবু থাজবা, মশাগী ওক্নবা পোৎথোক পুথোকপা অমসুং দাইত্ব খঙবা মালেমগা শম্নবা লৈবাক অদুবুনি। ঙসিগী মালেমগী ওইরিবা ফিবম অসিদা, মহাক্কী পাউজেল অসি অমুক্কা হেন্না চুনরে। মসিগী ৱাখল্লোন অসিগা লোয়ননা, মালেমগীদমক ঐখোয়গী থৌদাং অসি থাজনবা হেনগৎহনগদবনি অমসুং সপ্লাই চেনশিংগী ফগৎহনগদবনি অমসুং থবক অসিদা ভারত অমসুং জর্মনিগুম্বা থাজনবা মরুপশিংনা মরুওইবা থৌদাং অমা লৌরি।
মরুপশিং,
মহাক্কী অহানবা এসিয়া খোঙচত্ত, চান্সেল্লর মর্জনা ভারত খনখি। জর্মনিগী মখল কয়াগী মরুওইবা থবকশিংদা ভারতনা লৌরিবা মরুওইবা থৌদাং অদু মসিদা মমি তারে অমসুং জর্মনিনা ভারত্ত থাজবা থম্লি হায়বা মসিনা নাখৈ শেংনা তাক্লে। থাজবা অসিগী মতুংইন্না, ঙসি ঐখোয়না মরুওইবা ৱারেপ কয়া লৌরে। অহানবদা, অফবা শেন-থুমগী মরী অসি মপান নাইদবা ওইহন্নবা ঐখোয়না ৱারেপ লৌরে। মসিনা তাক্লিবদি, হান্নদগী লৈরক্লবা শেন-থুমগী হিরমশিংগা লোয়ননা, মরুওইবা হিরমশিংদসু মখা তানা চেৎনবা মতেং পাংনবা উরগনি। দিফেন্সকী লমদা, ঙসি ঐখোয়না জোইন্ত দিক্লারেসন ওফ ইন্তেন্ত অমা খুৎশীন্নরে। মসিনা কো-ইন্নোবেসন অমসুং কো-প্রদক্সনগীদমক ঐখোয়গী কম্পেনিশিংদা ময়েক শেংবা থৌশিল পীগনি। স্পেস সেক্তরদা মতেং পাংন্নবা অনৌবা খুদোংচাবশিংসু পীরগনি। অনিশুবদা, থাজনবা মরী অসি হৌজিক তেক্নোলোজিগী মরী অমা ওইহনবা হায়না ঐখোয় য়ানরে। মালেমগী অচৌবা গনতন্ত্র চৎপা ইকোনোমিশিং মরুওইবা অমসুং নৌনা থোক্লকপা তেক্নোলোজিশিংদা মতেং পাংনবা হেনগৎহনগনি। মসিগা লোয়ননা, পৱার ইলেক্ত্রোনিক্স, বাইওতেক, ফিন্তেক, ফার্মা, ক্বান্তম অমসুং সাইবরদা খুদোংচাবা কয়া লৈরি। অহুমসুবদা, ভারত অমসুং জর্মনিগী মরী অসি লৈবাক অনিমক কান্নবা খক নত্তনা, মালেমগী হেন্না য়াইফনবনি হায়বগী মপুংফানবা নাখৈ শেংবা ঐখোয়গী লৈরি। গ্রিন হায়দ্রোন, সোলার ৱিন্দ অমসুং বাইওফ্যুলদা মালেমগী লুচিংবা অমা ওইনবা ভারত মাঙলোমদা চঙশিল্লি। জর্মনিগী কম্পেনিশিংগী ওইনা, সোলার সেলশিং, ইলেক্ত্রোলাইজরশিং, বেত্তরিশিং অমসুং ৱিন্দ তর্বাইনশিং শানবগী য়াম্লবা খুদোংচাবশিং লৈরি। অপুনবা ওইনা, ঐখোয়না ই-মোবিলিতিগী হৌরগা চীঞ্জাক অমসুং ফুদ সেকুরিতি ফাওবগী মালেমগীদমক পাম্বৈশিং পুথোকপা ঙমগনি। মীওই খুদিংমক এ.আইগী কান্নবা ফংহন্নবা ভারতকী পান্দম অমা লৈরি অমসুং মসিগা জর্মনিগী এ.আইগী থবকশিংগা শম্নবা মতমদা, ঐখোয়না মীওইবগী য়াইফনবা দিজিতেলগী তুংলমচৎ অমা শেমগৎপা ঙমগনি।
মরুপশিং,
ভারতকী হৈথোই-শিংথোইরবা মীওইশিংনা জর্মনিগী উদ্যোগকী ইন্নোবেসন অমসুং পোৎথোক হেনগৎহনবা ঙমগনি। চহি খর অসিদা, মরুওইনা হায়-তেক সেক্তরদা, স্কিল মোবিলিতি য়াংনা হেনগৎলক্লি। ভারতকী হৈথোই-শিংথোইরবা মীওইশিং মপুংফানা শীজিন্ননবা অমসুং মখা তানা স্কিল, ইন্নোবেসন অমসুং উদ্যোগকী মরীশিং ফগৎনবা ঐখোয়না জর্মনিগী কম্পেনিশিংদা তকশিল্লি।
মরুপশিং,
ঙসিগী খুদোংচাদবা কয়া মায়োক্নরিবা মালেমগী ফিবম অসিদা, চাদা ৮ হেনবগী গ্রোথগা লোয়ননা ভারত মাঙলোমদা চঙশিল্লি। মসি মরম অম খক্তনা ওইহনবা নত্তে, লেপ্তনা অমসুং অপুনবা অওনবশিংনা ওইহনবনি। দিফেন্স, স্পেস, মাইনিং নত্ত্রগা ন্যুক্লিয়ার ইনর্জি য়াওনা হিরম খুদিংমক্ত প্রাইভেদ সেক্তর শরুক য়াহল্লে। দরকার ওইবা কমপ্লাইয়েন্সশিং মখা তানা হন্থহল্লে, লাইনা ললোন-ইতিক পাংথোকপা হেনগৎলক্লি। হায়রিবা থবকশিং অসিনা ঙসিগী ভারত মালেমদা চাউখৎপা অমসুং থাজবগী খুদম অমা ওইরে। ইন্দিয়া-ই.য়ু ফ্রি ত্রেদ এগ্রিমেন্তসু অথুবা মতমদা য়ানবা পুরক্লগনি। মসিনা ঐখোয়গী ললোন-ইতিক, শেন থাদবা অমসুং মরীদা অনৌবা পন্দুব অমা হাংদোক্লগনি। মসিনা তাক্লিবদি, অদোমগী লম্বী নাখৈ শেংলে হায়বনি। জর্মনিগী য়াম্না কুপ্পা থবকশিং অমসুং ইন্নোবেসনগা ভারতকী পাক-চাউবা অমসুং খোঙজেলগা শম্ননবা ঐনা খঙহল্লি। অদোম ভারত্ত পোৎ-চৈ শাবা য়াগনি, লৈবাক অসিগী দরকার ওইবশিং পীনবা খুদোংচাবা লৌগদবনি অমসুং অথিংবা অমতা লৈতনা মপান লৈবাকশিংদা থাদোকপা য়াগনি।
মরুপশিং,
সরকারগী মহুৎশীন্দুনা, তংদু-লৈতাবা থৌশিলশিং, অমনা অমবু থাজনবা অমসুং অশানবা মীৎয়েং অমগা লোয়ননা, ভারতনা জর্মনিগী পুন্না থবক তৌমিন্নবা খুমাঙ চাউশিনগনি হায়বগী থাজবা ঐনা পীরি। য়াম্না তেনবা ঐগী পাউজেলদি: ভারত থৌরাং তৌরে, য়ানিংলে অমসুং থবক ঙমগনি। ঐখোয় পুন্না অনৌবা থবক পায়খৎলসি, শেন থাদরসি অমসুং পুন্না চাউখৎমিন্নরসি। ভারত অমসুং জর্মনি খক্তগী নত্তনা, মালেমগী তুংগীদমক ঐখোয় তুংকোইনা চৎনবা য়ারবা পাম্বৈশিংগীদমক ঐখোয় শেম-শারসি।
দানকে চোন।
অদোম থাগৎচরি।
