মরুপশিং,
অসিগুম্বা মতম অসিদা দীপাবলীগী থৌরম অসিনা অদোম পুম্নমক্কী পুন্সিদা অনৌবা মঙাল অমা পুরক্লি। উৎসবশিংগী মরক্তা শোইদবা থবক ফংনবগীদমক এপোইন্তমেন্ত লেত্তর ফংবগী, হায়বদি, উৎসবশিংগী নুংঙাইবা অমসুং মাইপাকপগী অনিরক নুংঙাইবা অসি ঙসি লৈবাক অসিগী নহা ৫১,০০০ হেনবনা ফংলি। অদোম পুম্নমক্কী ইমুং-মনুং অসিদা কয়া য়াম্না নুংঙাইবা ফাওবগে হায়বদু ঐহাক্না খঙবা ঙম্লি। ঐহাক্না অদোম পুম্নমকপু অমসুং অদোমগী ইমুং-মনুংবু নুংঙাইবা ফোংদোকচরি। পুন্সিগী অনৌবা হৌরকফম অসিগীদমক ঐহাক্না অদোমদা য়াইফ-পাউজেল কয়া পীজরি।
মরুপশিং,
অদোমগী থৌনা, অদোমগী হোৎনজবা ঙম্বা, অদোমগী মঙলানশিং মপুং ফাহনবা ঙম্বা, অদোমগী থাজবগা লোয়ননা লৈবাক অসিগীদমক করিগুম্বা খরা তৌবগী থৌনা অদু য়াওরকপা মতমদা অদোমগী মাইপাকপা অসি অদোমগী ইশাগী মায়পাকপা খক্তা ওইরোই, অদোমগী মায়পাকপা অসিনা লৈবাক অসিগী মাইপাকপা ওইগনি। ঙসিদি অদোম্না সরকারগী থবক খক্তমক ফংদ্রে, অদোম্না লৈবাক্কী সেবাদা থৌনা লৈনা থৌদাং লৌবগী খুদোংচাবা ফংলে। ঐহাক্না থাজবা থম্লি মদুদি অদোম্না ইকাইখুম্নবা অমসুং শুপ্নতগী থবক তৌদুনা তুংলমচৎকী ভারতকীদমক্তা হেন্না ফবা থৌরাংশিং শেমগৎপদা থৌদাং লৌগনি। অমসুং অদোম্না খঙলে, ঐখোয়গীদমক “নাগরিক দেবো ভবঃ” হায়রিবা মন্ত্র অসি লৈ। সেবাগী ৱাখল্লোনগা লোয়ননা, কত্থোকপগী ৱাখল্লোনগা লোয়ননা মীওই খুদিংনা মহাক্কী পুন্সিবু মতৌ করম্না কান্নহনবা য়াবগে হায়বসি কৈদৌনুংদা কাওরোইদবনি।
মরুপশিং,
হৌখিবা চহি ১১ অসিদা লৈবাক অসিনা চাউখৎলবা ভারত অমা শেমগৎনবা ৱাশক লৌদুনা মাংলোমদা চংশিল্লি। মসিদা ঐখোয়গী নহারোলশিংগী, অদোম পুম্নমক্কী খ্বাইদগী চাউবা থৌদাং লৈ। মরম অদুনা, নহারোলশিংবু মপাঙ্গল কনখৎহনবা অসি বিজেপি-এন.দি.এ.গী অহানবা মিৎয়েং অমনি। ঙসি রোজগার মেলা অসি নহারোলশিংগী মঙলানশিং মপুং ফাহন্নবগী লম্বী অমা ওইরে। হায়রিবা থবক পীবগী থৌরমশিং অসিগী খুত্থাংদা, হৌখিবা মতম খরদা এপোইন্তমেন্ত লেত্তর লাখ ১১ হেন্না পীখ্রে। অমসুং, মসিগী হোৎনবা অসি সরকারগী থবকশিং খক্তদা অকক্নবা ওইদে। ঐখোয়না লৈবাক অসিদা পি.এম. বিকশিৎ ভারত রোজগর যোজনাসু হৌদোক্লে। মসিগী মখাদা নহারোল কোতি অহুম অমসুং মঙাদা থবক পীনবা পান্দম থম্লি।
মরুপশিং,
ঙসি স্কিল ইন্দিয়া মিসনগুম্বা অভিয়ানশিংগী খুত্থাংদা নহারোলশিংদা স্কিলগী ত্রেনিং পীরি, অদুগা নেস্নেল কেরিয়র সর্ভিস প্লেৎফোর্মগুম্বা ইনিসিয়েতিবশিংনা মখোয়বু অনৌবা খুদোংচাবশিংগা শম্নহল্লি। মসিগী খুত্থাংদা হৌজিক ফাওবদা ভেকেন্সী কোতি ৭ হেন্না মেনশিনখ্রে হায়না ঐহাক্না খঙজখি। মসিগী কোতি ৭ অসি শোয়দনা ওইগনি, মসি অপীকপা মশিং নত্তে।
মরুপশিং,
নহারোলশিংগীদমক অতোপ্পা অচৌবা খোংথাং অমা লৈরি- “প্রতিভা সেতু পোর্তেল” ! য়ু.পি.এস.সি.গী অরোইবা থাক ফাওবা ফংলবা, অদুবু খনগৎলক্তবা কেন্দিদেৎশিংগী হোৎনজমন অসি কৈদৌনুংদা মাঙজরোই। মরম অদুনা, প্রাইবেৎ অমসুং পব্লিক ইন্সতিত্যুসনশিংনা পোর্তেল অসিগী খুত্থাংদা নহাশিংবু কৌবা, ইন্তর্ভ্যু পীবা অমসুং অতোপ্পা খুদোংচাবশিংসু পীবা য়াই। নহারোলশিংগী হৈশিংবশিং অসি শিজিন্নবনা ভারতকী নহারোলশিংগী শক্তি অসি মালেমগী মাংদা পুথোক্কনি।
মরুপশিং,
থৌরমগী মতম অসিদা জি.এস.তি. বচৎ উৎসবনসু অনৌবা মচু অমা পুরক্লে। লৈবাক অসিদা জি.এস.তি. গী শাফু অসি মীওইশিংগী সেভিংসতা অকক্নবা ওইদে, নেক্স জেনরেসন জি.এস.তি.না মরম ওইরগা নুমিৎ খুদিংগী শিজিন্নবা পোৎলমশিং অসি মমল হোংলকপা মতমদা, দিমান্দসু হেনগৎলকই। দিমান্দ হেনগৎলকপা মতমদা, প্রদক্সন অমসুং সপ্লাই চেনসু খোঙজেল য়াঙখৎলি। অমসুং ফেক্টরীশিংনা পোত্থোক হেন্না পুথোকপা মতমদা, অনৌবা থবকশিং লৈহল্লি। মরম অসিনা, মসি জি.এস.তি বচৎ উৎসব অসি রোজগার উৎসবতা ওন্থোক্লি। হৌজিক ঐখোয়না উবা ফংলি, ধনতেরস, দিপাৱলিদা রেকোর্দ য়োনবা, অনৌবা রেকোর্দশিং শেম্বা, হান্নগী রেকোর্দশিং থুগাইবা অসিনা জি.এস.তি. এম.এস.এম.ই. সেক্তর অমসুং রিতেল ত্রেদতা ঐখোয়না রিফোর্ম অসিগী পোজিতিব ইফেক্ট উবা ফংলি। মসিনা মেনুফেকচরিং, লোজিস্তিক্স, পেকেজিং অমসুং দিস্ত্রিব্যুসনগুম্বা সেক্তরশিংদা থবক ফংবগী অনৌবা খুদোংচাবা কয়া অমা পীরি।
মরুপশিং,
ঙসি ভারত অসি মালেমগী খ্বাইদগী নহা ওইরিবা লৈবাক অমা ওইরে। ঐখোয়না ভারতকী নহাশিংগী শক্তিবু, ভারতকী অচৌবা শক্তি হায়না লৌই। লম খুদিংমক্তা ঐখোয়না অসিগুম্বা ৱাখল্লোন অমসুং থাজবগা লোয়ননা মাংলোমদা চংশিল্লি। ঐখোয়গী ফোরেন পোলিসী অসিদসু ভারতকী নহারোলশিংগী কান্নবশিং য়েংদুনা থবক তৌরি। ঐখোয়গী দিপ্লোমেতিক ৱারী, ঐখোয়গী গ্লোবেল এম.ও.য়ু. লৈরি, মসিদা নহাশিংদা ত্রেনিং, অপ স্কিলিং অমসুং থবক ফংহনবা য়াওরি। য়ুনাইতেদ কিংদমগী প্রধান মন্ত্রী ভারত্তা লাকখিবনি। মহাক্কী খোঙচৎ অসিদা ভারত অমসুং য়ু.কে.না এ.আই., ফিনতেক অমসুং ক্লিন ইনর্জীগুম্বা সেক্তরশিংদা ইনবেস্তমেন্ত হেনগৎনবা য়ানখি। ভারত অমসুং য়ুনাইতেদ কিংদমগী মরক্তা থা খরগী মমাংদা ফ্রী ত্রেদ এগ্রীমেন্ত তৌখিবা অসিনা অনৌবা খুদোংচাবশিং ফংহনগনি। অসুম্না য়ুরোপকী লৈবাক কয়াগা ইনভেস্তমেন্ত পার্তনরশিপসু লৈরি। মসিনা অনৌবা থবক লিশিং কয়া ফংহল্লগনি। ব্রাজিল, সিঙ্গাপুর, কোরিয়া, কানাডা, অসিগুম্বা লৈবাক কয়াগা লোয়ননা য়ানা ৱারোলশিং অসি শেমখ্রে। মসিনা ইনভেস্তমেন্ত হেনগৎহনগনি, স্তার্ত-অপশিং অমসুং এম.এস.এম.ই.শিংদা মতেং পীরগনি, এক্সপোর্তশিং হেনগৎহনগনি, অমসুং নহারোলশিংনা গ্লোবেল প্রোজেক্তশিংদা থবক তৌবগী অনৌবা খুদোংচাবা ফংলগনি।
মরুপশিং,
ঙসি ঐখোয়না লৈবাক অসিগী মাইপাকপা অমসুং মিৎয়েং অদুগী মতাংদা ঙাংলি। লাক্কদৌরিবা মতম অসিদা অদোমগী অচৌবা থৌদাং অমা লৈগনি। ঐখোয়না লেপ্পা লৈতনা "ভিক্সিত ভারত"কী পান্দমগীদমক থবক তৌগদবনি। অদোমগুম্বা নহা ওইরিবা কর্মযোগীশিংনা মসিগী ৱারেপ অসি মপুং ফাহনগনি। মসিগী খোঙচৎ অসিদা iGot কর্মযোগী ভারত প্লেৎফোর্মনা অদোমদা মতেং পাংবা ঙমগনি। চাউরাক্না ইমপ্লোয়ি কোতি অমা অমসুং মঙা অসিনা প্লেৎফোর্ম অসিদা য়াওদুনা মহৈ তম্লি, স্কিল অপগ্রেদ তৌরি। অদোমসু মখোয়শিং অসিগা লোয়নরগদি, অদোমদা অনৌবা থবক তৌবগী চৎনবী অমসুং অফবা লৈঙাকপগী ৱাখল্লোন শেমগৎলগনি। অদোমগী হোৎনবা কন্না হোৎনবনা ভারতকী তুংলমচৎ শেমগনি অমসুং লৈবাক মীয়ামগী মঙলানশিং মপুং ফাহনগনি। ঐহাক্না অমুক্কা হন্না অদোম পুম্নমকপু য়াইফ-পাউজেল পীজরি।
অদোমবু হন্না হন্না থাগৎচরি।
