খুরুমজরি! ময়াম পুম্নমকপু ঐহাক্না জাতিগী দোক্তরশিংগী নুমিৎ অসিনা লাকপদা য়াইফ-পাউজেল পীজরি। দোক্তর বি সি রোইজীবু নীংশিংবা ওইনা পাল্লন তৌবা নুমিৎ অসিনা ঐখোয়গী মেদিকেলগী লমদা থবক তৌরিবা, ঐখোয়গী দোক্তরশিংগী অৱাংবা থাক্কী ৱাখল্লোন অদুবা ইকাই খুম্নবা উৎলি। মরু ওইনা ঐখোয়গী দোক্তরশিংনা হৌখিবা চহি অমা মখাই অসিদা ইরৈবাকচা খুদিংমক কন্নবা হোৎনখিবগী মওং অসি খুদম অমা ওইরি। ইরৈবাকচা করোর ১৩০গী মহুৎ শিন্দুনা ঐহাক্না লৈবাক অসিগী দোক্তর পুম্নমক্তা তৌবিমল খংবা উৎচরি!
মরুপশিং,
দোক্তরশিং অসি ঈশ্বরগী শক্লোন অমনি হায়না হায়নৈ অমসুং মখোয়দা অসুম্না হায়রিবা অসি ইচম চম্না হায়বা নত্তে। পুন্সিদা খুদোংথিবা থেংনখিবা মীওই কয়া অমা লৈরমগনি, অনাবা নত্ত্রগা খুদোংথিবা থৌদোক নংখিবা, নত্ত্রগা কয়ারক হন্না ঐখোয়না ঐখোয়গী ইমুং-মনুংগী মীওই অমগী পুন্সি মাংগদৌরে হায়না মীপাইবা পোকখিবা মীকুপ কয়া লৈরমগনি? অদুবু ঐখোয়গী দোক্তরশিংনা পুন্সিগী মাইকৈ অদু ঈশ্বরগী ধুৎ অমগুম্না অসিগুম্বা থেংখাং কয়াদা ঐখোয়দা অনৌবা পুন্সি অমা পীবিখি।
মরুপশিং,
ঙসি লৈবাক অসিনা কোরোনাগী অসুক চাউবা লাঞ্জং অমা শোক্নরিবা মতম অসিদা দোক্তরশিংনা অয়ুক নুংথিল খাইদনা কন্না হোৎনদুনা মীওই করোর কয়াগী পুন্সি কনখি। পুন্যাগী মশক ওইরবা থবক অসি তৌরিঙৈদা লৈবাক অসিগী দোক্তর কয়ানা মখোয়গী পুন্সি পীখম্নখি। ঐহাক্না মখোয়দা ইখাই খুম্নবা উৎচরি, মখোয়গী ইমুং-মনুংশিংগী মীওইশিংদা ঐহাক্না অৱাবা ফোঙদোকচরি
মরুপশিং,
কোরোনাগা লান্থেংনবা অসিদা মায়োক্নবা শীংনবা কয়াগী ঐখোয়গী বিজ্ঞানিকশিং, দোক্তরশিংনা সোল্যুসন কয়া, কান্নরবা হীদাক-লাংথকশিং পুথোকখি। ঙসি ঐখোয়গী দোক্তরশিংনা কোরোনাগী প্রোতোকলশিং শেম্লি অমসুং মদু চৎনহনবদা মতেং পাংলি। ভাইরস অসি অনৌবনি, মসিদা অনৌ-অনৌবা ম্যুতেসনশিংসু তৌরি, অদুবু ঐখোয়গী দোক্তরশিংগী নোলেজ, মখোয়গী এক্সপরিয়েন্স অসিনা ভাইরসকী খুদোংথিবশিং অমসুং শীংনবশিং অসিবু পুন্না লান্থেংনরি। দিকেদ কয়া অসিদা লৈবাক অসিদা লৈরম্বা মেদিকেল ইনফ্রাস্ত্রকচরগী অৱাৎপা অদুগী মতাংদা ময়াম পুম্বনা খংবিরম্লগনি। মমাংদা মেদিকেল ইনফ্রাস্ত্রকচরবু করম্না উশিন্ননদনা লৈরম্বগে হায়বা অসিসু ময়াম্না খংবিরমগনি। ঐখোয়গী লৈবাক্কী লৈরিবা মীশিং অসিনসু শীংনবা অসিদা হেন্না অৱাবা পীরখি। অসুম্না ওইজরবসু, কোরোনাগী মতমদা ঐখোয়না মীশিং লাখ অমদা নাবা অসি য়েংলুরবদি, শীবগী চাংদা য়েংলুরবদি, ভারতকী ওইরিবা ফীভম অসি অচৌবা চাউখৎলবা লৈবাকশিংগা য়েংনবদি শাফবা ফীভম অমদা লৈখি। মনুং মতম চাদনা লৈখিদবা হায়বা অসি নুংঙাইতে অদুবু ভারতনা মীওই করোর কয়াগী পুন্সিবু কোরোনাদগী কনখি। মসিগী মনাদি ঐখোয়গী হোৎনবা কনবা দোক্তরশিং, ঐখোয়গী হেল্থকিয়র ৱর্করশিং, ঐখোয়গী ফ্রন্তলাইন ৱর্করশিংদা পীফম থোকই।
মরুপশিং,
হেল্থকিয়রদা খ্বাইদগী য়াম্না মীৎয়েং চংখিবা অসি ঐখোয়গী সরকারননি। হৌখিবা চহিগী অহানবা ৱেব মনুংদা ঐখোয়না হেল্থকিয়রদা লুপা করোর লিশিং ১৫ কাইথখি, মসিনা ঐখোয়গী হেল্থ ইনফ্রাস্ত্রকচর ফগৎহনবদা মতেং ওইখি। চহি অসিদা হেল্থ সেক্তরগীদমক্তা পীখিবা বজেত এলোকেসন অসি শরুক অনিদগী হেন্না হায়বদি লুপা করোর লাখ অনিগী মথক্তা হেনগৎহনখ্রে। হৌজিক ঐখোয়না হকশেলগী খুদোংচাবশিং ফংদ্রিবা মফমশিংদা হেল্থ ইনফ্রাস্ত্রকচর ফগৎহন্নবগীদমক করোর লিশিং ৫০গী ক্রেদিৎ গরেন্তী স্কিম অমা পুদুনা লাক্লি। ঐখোয়না অঙাংশিংগীদমক মথৌ তাবা হেল্থ ইনফ্রাস্ত্রকচরবু মপাঙ্গল কনখৎহন্নবা লুপা করোর লিশিং ২২ হেন্না এলোকেৎসু তৌখি। ঙসি লৈবাক অসিদা অনৌবা এম্স খোঙজেল য়াংনা হাংদোকপা হৌরক্লি, অনৌবা মেদিকেল কোলেজ শাগৎলক্লি, মতমগা চুনবা হেল্থ ইনফ্রাস্ত্রকচর শেমগৎলি। ২০১৪ ফাওবদা লৈবাক অসিদা শুপ্নগী এম্স ৬তমক লৈরমখি, চহি ৭ অসিদা অনৌবা এম্স ১৫গী থবক পাইখৎপা হৌখ্রে। মেদিকেল কোলেজশিংগী মশিংসু শরুক অমা মখাই রোমগী ময়া নক্না হেনগৎহনখ্রে। খোঙথাং অসিগী ফল ওইনা অতেনবা মতমগী মনুংদা অন্দরগ্রেজ্যুএৎ সীৎশিংদা শরুক অমা মখাইরোম হেন্না হেনগৎহনখ্রে, পি.জি.গী সীৎশিংদসু চাদা ৮০ হেনগৎহনখ্রে। হায়বদি ঐখোয়গী নহারোল, ঐখোয়গী অঙাংশিংনা নখোয়না মফম অসিদা য়ৌরকপদা থেংনখিবা অৱাবশিং অদু থেংনবগী মথৌ তাররোই। অরাপ্পা মফমশিংদসু ঐখোয়গী নহারোল কয়া-কয়ানা দোক্তর ওইরকপা য়াবগী খুদোংচাবা অদু ফংলগনি। মখোয়গী তেলেন্ত, মখোয়গী মঙলান অদু অনৌবা ইনোৎ হাপ্লগনি। মেদিকেল সেক্তরদা অহোংবশিং অসি লাক্লিঙৈ চৈরক অসিদা সরকারনা দোক্তরশিংগী শাফনবা খোঙথাংসু পাইখৎলি। হৌখিবা চহিমক্তদা ঐখোয়গী সরকারনা দোক্তরশিংদা হিংসা তৌবদগী ঙাকথোক্নবা আইনগী ওইবা অকনবা প্রোবিজন কয়া শেমখ্রে। মসিগা লোইননা ঐখোয়না ঐখোয়গী কোবিদ ৱারিয়র্সকীদমক্তা ফ্রী ইন্সুরেন্স কভর স্কিমসু পুদুনা লাকখি।
মরুপশিং,
লৈবাক অসিগী কোরোনাগী লাঞ্জংদা ওইরবসু নত্ত্রগা মেদিকেল সিস্তেম ফগৎহন্নবা লৈবাক্কী পান্দম ওইরবসু নখোয় পুম্নমক্না মসিদা মরু ওইবা থৌদাং অমা লৌদুনা লাকখি। খুদম ওইনা নখোয় পুম্নমক্না অহানবা তাঙ্কক্তা ভেক্সিন কাপ্পা মতমদা লৈবাক অসিনা ভেক্সিন্দা থাজবা থম্বা অদু শরুক কয়া হেনগৎহনখি। মসিগা মান্ননা নখোয়না মীয়ামদা কোবিদকী চুনবা চৎনা লোনচৎ ঙাক্না চৎনবা হায়বা মতমদা মীয়াম্না মদু মপুং ফানা ঙাক্না চৎখি। ঐহাক্না পামজবদি নখোয়না হেন্না থৱাই য়াওনা থৌদাং লৌবা অমসুং নখোয়গী স্কোপ অসি হেন্না পাকথোক-চাউথোকহনবা অসিনি।
মরুপশিং,
মেদিকেল ফ্রেতর্নিতীগী মীওইশিংদা ঐখোয়না উবা ফংলিবা অতোপ্পা অফবা থবক অদুদি য়োগগী মরমদা ভাব তাহন্নবগীদমক্তা য়াম্না মাংজিল থানা হোৎনরিবা অসিনি। নীংতম্লবা মতুং হৌখিবা চহিচাদা য়োগগী কান্নবা খঙহন্নবা তৌফম থোকপা থবক অদু হৌজিক্তা তৌরি। কোরোনাগী মতম অসিদা য়োগ-প্রানায়ামনা মীয়ামগী হকশেলদা করম্না অফবা কান্নবা পীবগে, পোস্ত কোবিদ কম্প্লিকেসনশিং লাকশিনবদা য়োগনা করম্না মতেং পাংবগে হায়বগী মতাংদা মোদর্ন মেদিকেল সাইন্সকা মরী লৈনবা ইন্সতিত্যুসন কয়ানা ইভিদেন্স বেজ স্তদীশিং পাঙথোক্লি।
মরুপশিং,
নখোয়না মেদিকেল সাইন্স অসি করিনো হায়বা খংঙি, নখোয়দি এক্সপর্তশিংনি, স্পেসিএলিস্তনি, অমসুং ভারত মচা অমদা য়োগগী মরমদা ভাব তাহনবা হায়বা অসু অরায়বা থবক অমা ওইগনি। নখোয়না য়োগবু স্তদী তৌবদা মতমদা মালেম পুম্বনা মসিবু হেন্না লুম্না লৌগনি। আই.এম.এ.না মসি মিসন মোদতা মাংদা চংশিনবা য়াগদ্রা, য়োগদা ইভিদেন্স বেজ স্তদী অসি সাইন্তিফিক ওইবা মওংদা মাংদা পুখৎপা য়াগদ্রা। য়োগগী মরমদা স্তদীজ তৌবা অসি ইন্তরনেস্নেল জর্নেলশিংদা ফোঙনবা অমসুং পব্লিসাইজ তৌনবা হোৎনবসু য়াই। স্তদীজ অসিনা মালেমদা লৈরিবা দোক্তর পুম্বনা মখোয়গী পেসেন্তদা য়োগগী মরমদা হেন্না ভাব তাহন্নবা হোৎনগনি হায়না ঐহাক্না থাজবা থম্লি।
মরুপশিং,
হোৎনবা কনবা, তেলেন্ত অমসুং স্কিলগী মতাংদা লাকপা মতমদা নখোয়গী লম্বা লৈতে। ঐহাক্না নখোয়দা হায়জনীংবদি নখোয়গী এক্সপরিয়েন্সশিং অদু কুপ্না মীৎয়েং চংবগা লোইননা দোক্যুমেন্ত তৌবিয়ু। মসিগা লোইননা পেসেন্তশিংগী লাইওংশিং, লায়েংবগী থৌওং অমসুং মখোয়গী রেস্পোন্স অদুসু মরিক চুম্না দোক্যুমেন্ত তৌবিয়ু। মসি তোঙান তোঙানবা হীদাক-লাংথকশিং অমসুং লায়েংশিং চত্থবা অদুগী মতাংদা নোৎ তৌশিন্দুনা রিসর্চ স্তদী অমা ওইনা পাঙথোকপসু য়াগনি। নখোয়না শেবা অমসুং লায়েংলিবা অনাবশিংগী মশিংদা য়েংলবসু নখোয়না মালেমগী ওইনা হান্নদগী মাংজিল থাদুনা লাক্লি। তানফম অসিদসু নখোয়গী থবক অমসুং নখোয়গী সাইন্তিফিক স্তদীশিং অসি মালেমদা খঙহন্নবা হোৎনগদনি অমসুং তুংদা লাক্কদবা মীরোনশিংনা মসিগী কান্নবশিং ফংহনগদবনি। মসিগা লোইননা মালেমদা হীদাক-লাংথক্কা মরী লৈনবা অরুবা ৱাহং কয়াগী মরমদা ভাব তাহনবদা লায়থোকহল্লগনি, মসিনা মদুগী সোল্যুসন পুরক্নবা মাইকৈদা পুরগনি। কোবিদকী লাইচৎ অসিনা মসিগীদমক অফবা অহোংবা অমা ওইরগনি। ভেক্সিনশিংনা ঐখোয়গী মতেং করম্না পাংলি, ঐখোয়না ঙন্না দাইগ্নোস্তিক তৌবগী কান্নবা করম্না ফংলি অমসুং অকক্নবা লায়েং অমনা ঐখোয়দা করম্না মতেং পাংবগে, মসিগী মরমদা ঐখোয়না হেন্না হেন্না স্তদীজ তৌবা য়াগদ্রা। হৌখিবা চহিচাদা লাইচৎ থোকখিবগী দোক্যুমেন্তেসন ঙসি মরাং কাইনা লৈতে। ঙসি ঐখোয়দা তেক্নোলোজীসু লৈরে অমসুং করিগুম্বা ঐখোয়না কোবিদ অসি করম্না থেংনখি হায়বগী প্রেক্তিএল এক্সপরিয়েন্সশিং দোক্যুমেন্ত তৌরবদি মসিনা তুংলমচৎতা অপুনবা মীওইবা খুন্নাইদা য়াম্না কান্নবা ওইগনি। অরোইবদা ঐহাক্না হায়জনীংবদি নখোয়গী সর্ভিস, নখোয়গী হোৎঞ্জমননা শোইদনা ঐখোয়গী ‘সর্বে ভৱন্তু সুখিন’গী ফীরেপ অদু উৎপা ঙমগনি। ঐখোয়গী লৈবাক্না কোরোনাদগী মাই পাকপা ঙমগনি অমসুং চাউখৎ-থৌরাংদা অনৌবা মায়োল ফংবা ঙমগনি। য়াইফ-পাউজেল অসিগা লোইননা ময়ামবু হন্না-হন্না থাগৎচরি!
