নমস্কার!
হিমাচল দিবস অসিদা লাইরম্লেন অসিগী মীয়াম খুদিংদা য়াইফ পাউজেল পীজরি।
নীংতম্বগী চহি ৭৫ মপুং ফাবগী মতমদা হিমাচল প্রদেশ শেমখিবগী ৭৫শুবা নুমিৎ তাবা অসি য়াম্না নুংঙাইরবা তান চান্নবা অমনি। নীংতম্বগী অমৃত মহোৎসবকী মনুংদা হিমাচল প্রদেশতা চাউখৎপগী মঙালবু রাজ্যসিগী মীপুম খুদিংদা য়ৌহন্নবা ঐখোয়না লেপ্তনা হোৎনরি।
অতলজীনা হিমাচলগীদমক্তা অসুম্না ইবীরম্মি-
বর্ফ থঙ্কী পর্বতমালয়,
নদিয়া, ঝর্নে, জঙ্গল,
কিত্ত্রিয়ো কা দেশ,
দেবতা দোলে পল-পল!
মহৌশা লাইরেম্বীগী মমল নাইদ্রবা খুদোল, মীওইবগী মতিক কয়াগী পুনফম অমসুং নুংবু নমখায়দুনা ইশাগী লাইবক লেপচবা ঙম্বা হিমাচলগী মীয়মগী মরক্তা লৈবা, মখোয়গা উন্নবগী তাঞ্জা কয়া হন্না-হন্না ফংজবসি ঐহাক্কী লাইবক ফবনি।
মরুপশিং,
ইং ১৯৪৮দা হিমাচল প্রদেশ শেমখিবা মতমদা শিংনবা কয়া মাইয়োক্নখি। অপীকপা চিংগী ল্ম ওইবনা মরম ওইরগা, অরুবা অমসুং শিংনবনা থল্লবা লম্মিৎ-তুম্মিৎনা মরম ওইরগা ওইথোকপা য়াবা কয়াদগী অকীবনা হেন্না পীক থল্লম্মি। অদুবু হিমাচলগী শুবা নোম্বা কনবা, পুকচেল শেংবা অমসুং থৌজাল হৈবা মীয়াম্না শিংনবশিং অসিবু খুদোংচাবদা ওন্থোকখিবনি। হোর্তিকলচর, মৈ হেন্না পুথোকপা, ইবা-পাবা হৈবগী চাং, খুঙ্গংগী লম্বী শোরোকশিংনা মফম কয়া শম্নহনবা, য়ুম্থোং খুদিংদা তোতি ঈশিং অমসুং মৈ ফংহনবগী মতাংদা মায় পাকপগুম্বা পেরামীতর কয়ানা চিংগী রাজ্য অসিগী খুমাং চাউশিনবগী চাং উৎলি।
কেন্দ্র সরকারনা হিমাচলগী খুদোংচাবশিংবু হেন্না ফগৎহন্নবা মমাংগী চহি ৭-৮দগী লেপ্তনা হোৎনদুনা লাক্লি। ঐখোয়গী নহা ওইরিবা মরুপ, জাই রামজীগা লোয়ননা ‘দবল ইঞ্জিন সরকার’না খুঙ্গংগী শোরোক পাকথোক চাউথোকপা, হাইৱে পাকথোকপা, রেলৱে নেতৱর্ক্কী খোঙথাংশিং পায়খৎলিবশিংগী মহৈশিং হৌজিক উবা ফংলে। কন্নেক্তিবিতীনা অসুম-অসুম ফগৎলকপগা লোয়ননা, হিমাচলগী তুরিজম্না অনৌবা মফমদা চঙশিনবা ঙম্লে। অনৌবা মফম খুদিংনা তুরিজমগীদমক্তা মহৌশা, সংস্কৃতি অমসুং এদভেঞ্চরগী অনৌবা এক্সপেরিএন্স পুদুনা লাক্লি অমসুং লমদমসিগী মীয়ামগী খুদোংচাবা অমসুং থবক্কী অনৌবা থোঙ কয়া হংলক্লি। হকশেলগী খুদোংচাবশিং হেন্না ফগৎহন্নবা হোৎনরিবা কয়া অসিগী মহৈদি কোরোনাগী ভেক্সিন খোঙজেল য়াঙনা কাপ্পা ঙমখিবগী মওংদা ঐখোয়দা উবা ফংহনখি।
মরুপশিং,
হিমাচল প্রদেশকী তসেংবা মতিক হাংদোকপা ঙম্নবগীদমক্তা ঐখোয়না কন্না অমসুং খোঙজেল য়াঙনা হোৎনবা তাই। লাক্কদৌরিবা মথংগী চহি ২৫দা হিমাচল প্রদেশ শেমখিবা অমসুং লৈবাক্কী নীংতম্বগী চহি ১০০ মপুং ফারগনি। মসিদি ঐখোয়গী অনৌবা ৱারেপশিংগী অমৃতগী মতম ওইগনি। অসিগুম্বা মতমসিদা ঐখোয়না হিমাচলগী তুরিজম, অৱাংবা থাক্কী মহৈ-মশিং তম্বা, রিসর্চ, আই.তি., বাইওতেক্নোলোজী, ফুদ প্রোসেসিং অমসুং নেচরেল ফার্মিংগী হীরমশিংদা পায়খৎলিবা থবকশিংবু খোঙজেল য়াঙনা তুংলমচত্তা পুগদবনি। হন্দক্কী চহিগী বজেত্তা লাউথোকখিবা ভাইব্রেন্ত ভিলেজ স্কিম্না হিমাচল প্রদেশতা কান্নবা য়াম্না পীগনি। মসিগী স্কিম অসিনা হিমাচল প্রদেশকী অথাপ্পা মফমশিংদা কন্নেক্তিবিতী হেনগৎহনগনি, তুরিজম্বু হেন্না খুমাং চাউশিলহনগনি অমসুং থবক্কী অনৌবা খুদোংচাবা কয়া অমসু লৈহনগনি। ঐখোয়না হিমাচলগী অশং-অমানবু হেন্না পাকথোক চাউথোকহনবা তাই অমসুং উমংশিংবুসু হেন্না ইনাক খুলহনবা তাই। অমাংশঙগী মতাংদা পাংথোকখিবা নীংথিরবা থবকশিংনা হৌজিক লু-নানবগী অতোপ্পা হীরমশিংবু পুক্নিং থৌগৎলগনি অমসুং মসিদা মীয়াম্না শরুক য়াবগী চাংসু হেনগৎহনগদবনি।
মরুপশিং,
জাই রামজীগী সরকার অমসুং মহাক্কী কাঙবু অপুনবনা কেন্দ্রগী য়াইফ য়ুম্বালগী স্কিমশিংবু হেন্না পাকথোক চাউথোকহনখি। হিমাচল প্রদেশতা সোসিএল সেক্যুরিতীগী মতাংদা মরু ওইনা থাগৎনীংঙাই ওইবা মওংদা থবক পায়খৎলি। পুকচেল শেংনা লুচিংবা, শান্তি পামজবা অকোয়বগী ফিভম, লাইনীংথৌ লাইরেম্বীশিংনা থৌজানবা অমসুং শুবা-নোম্বা কনবা হিমাচলগী মীয়াম, হায়রিবশিং অসিগা চাংদম্ননীংঙাই লৈতে। খোঙজেল য়াঙনা চাউখৎপগী তঙাই ফদবা হীরম খুদিং হিমাচলদা লৈ। অপুনবা অমসুং মপাঙ্গল লৈবা ভারতকীদমক্তা হিমাচলনা মশাগী থৌদাং লেপ্তনা পাংথোকপা ঙম্বা হায়বসিনা ঐহাক্কী অপাম্বনি।
মীয়াম্বু হন্না-হন্না থাগৎচরি।
