নমস্কার!
মধ্য প্রদেশকী মুখ্য মন্ত্রী, শ্রীমান শিবরাজ সিংহ চৌহান, এম.পি. সরকারগী মন্ত্রী, এম.পি., এম
এল.এ., স্তার্ত-অপ মালেমগী ঐহাক্কী মরুপশিং!
ঐহাক্না থৱাই য়াওবা নহা, স্তার্ত-অপকা মরী লীওনবা নহারোল খরগা ৱারী শাবা অদোম্না উরমগনি, মসিদা ঐহাক্না করিগুম্বা খরা থেংনৈ, অদোমসু থেংনরমগনি হায়না ঐহাক্না খল্লি। থম্মোইদা করিগুম্বা তৌনীংবগে অপাম্বা লৈরবা, থৱাই য়াওবা লৈরবা, ইন্নোভেসন পাংথোক্নীংবগী অপাম্বা লৈরবা, মদুগী ইথিল অদু ময়েক শেংনা উবা ফংবনি অমসুং ঙসিদি অসিগুম্বা থৱাই য়াওবা মতৌ অসিনা মরম ওইরগা ৱারোল কয়াসু ফোংদোকখ্রে। ঐহাক্না অদোম খুদিংগা ৱারী শাবগী খুদোংচাবা অমা ফংলিবা অমসুং ঐহাক্কী ৱারোলবু তাবা মীওইশিংনা লৈবাক অসিদা স্তার্ত-অপ পোলিসী কয়া লৈবগা লোয়ননা হীরম কয়াদা স্তার্ত-অপনা লুচিংবগী থৌদাংসু লৌরি হায়না অদোম্না থাজনা হায়বা ঙম্লগনি। মরম অদুনা, লৈবাকপু নহারোলগী মপাঙ্গল অনৌবা অমনা শাফু পীরি, চাউখৎহল্লি। ঙসি মধ্য প্রদেশতা স্তার্ত-অপ পোর্তেল অমসুং আই_হব ইন্দোর হৌদোক্লে। এম.পি.গী স্তার্ত-অপ পোলিসীগী মখাদা স্তার্ত-অপ অমসুং ইনক্যুবেতরশিংদা তেংবাংলে। অসিগুম্বা থৌওং অমসুং ঙসিগী থৌরম অসিগীদমক্তা মধ্য প্রদেশ সরকার, লৈবাক্কী স্তার্ত-অপ ইকোসীস্তেম, অমসুং অদোম খুদিংদা থাগৎ ৱাহৈ ফোংদোক্নীংই।
মরূপশিং,
ইং ২০১৪দা ঐখোয়গী সরকার লাকপা মতমদা লৈবাক্কী মনুংদা চাউরাক্না স্তার্ত-অপ ৩০০-৪০০ লৈরম্মি, স্তার্ত-অপ হায়বা ৱাহৈসি য়াম্না তাবসু ফংলমদে অমসুং মীয়াম্নসু মসিগী মতাংদা ঙাংনরমদে। অদুবু ঙসি চহি ৮গী মতুংদা ভারতনা স্তার্ত-অপ মালেম্বু পুমওন ওন্থোকখ্রে। ঙসিদি ঐখোয়গী লৈবাক অসিদা শকখঙলবা স্তার্ত-অপ চাউরাক্না লিশিং ৭০ লৈরে। মালেমগী ওইনা ভারত্তা স্তার্ত-অপকী খ্বাইদগী অহুমশুবা চাউবা ইকোসীস্তেম লৈরে। ঐখোয়না মালেমগী য়ুনিকোর্ন হবকী মনুংদা খ্বাইদগী মপাঙ্গল লৈবা ওইরক্লি। হৌজিক্কী মতম অসিদা ভারত্তা নুমিৎ ৮-১০গী মনুংদা স্তার্ত-অপ অমা অমসুং য়ুনিকোর্ন অমা থোরক্লে। স্তার্ত-অপ অমনা জিরোদগী হৌদুনা য়ুনিকোর্ন য়ৌবা ফাওবদা য়ামদ্রবদা লুপা করোর লিশিং ৭কী শেনফম য়ৌবা তাই, মদুকান্দা য়ুনিকোর্ন ওইগনি অমসুং ঙসিদি ঐখয়গী নহারোলশিংনা নুমিৎ ৮-১০ খুদিংগী অনৌবা য়ুনিকোর্ন অমা শেম্লে।
মরূপশিং,
মসিদি ভারতকী নহারোলশিংগী মপাঙ্গলনি, মায় পাকপগী অনৌবা থাক য়ৌনীংবা ফাওবগী খুদম্নি। শেন্মিৎলোন মালেমগী পোলিসী নৈনরিবা অখঙ-অহৈশিংনা ৱাফম অমা খঙজিন্নবা ঐহাক্না হায়জনীংই। ভারত্তা স্তার্ত-অপকী অচৌবা মশিং লৈবগা লোয়ননা, মখোয়গী হীরমসু য়াম্না তোঙাল্লি। স্তার্ত-অপশিং অসি রাজ্য অমা নত্ত্রগা নেত্রো শহর খক্তদা অকক্নবা নত্তে। স্তার্ত-অপশিং অসি হিন্দুস্তানগী তোঙানবা রাজ্যশিংদা লৈ, লৈবাক্কী অপীকপা শহর কয়াদা শন্দোক্লগা লৈ। মসিদা নত্তনা, ঐহাক্না চাউরাক্না পাথোকপদা ইন্দস্ত্রী মখল ৫০ হেনবগা স্তার্ত-অপশিং অসিগা মরী লৈনৈ। হায়রিবশিং অসি লৈবাক্কী তোঙানবা রাজ্য অমসুং জিলা ৬০০ হেনবদা শন্দোক্তুনা লৈরি। স্তার্ত-অপকী চাউরাকপা ৫০%দি তাইয়র ২ অমসুং ৩গী শহরশিংদগী লাকই। স্তার্ত-অপ হায়বদি কম্প্যুতরগা মরী লৈনবা থৌওংনি হায়না খন্নবা য়াওরি। মসি অরানবনি, স্তার্ত-অপকী স্কোপ অমসুং পাক-শনবা অসি য়াম্না লৈ হায়বনা অশেংবা ৱারোলনি। ঐখোয়গী অরুবা শিংনবগী ৱারোইশিন স্তার্ত-অপনা পীবি। ঙসিগী স্তার্ত-অপনা হয়েংগী মলতিনেস্নেল কম্পেনী ওই হায়বা ঐখোয়না উরে। এগ্রিকলচর, রিতেল ব্যুজিনেস, হেল্থ সেক্তরশিংদা অনৌবা স্তার্ত-অপ কয়া থোক্লকপা অসিদা ঐহাক্না নুংঙাইবা ফাওই।
মরূপশিং,
ঙসিদি, মালেম্না ভারতকী স্তার্ত-অপ ইকোসীস্তেম্বু থাগৎনবগী মতাংদা ঐখোয়না তাবা ফংলি। মসিদা হিন্দুস্তানী খুদিংনা চাউথোকচৈ। অদুবু মরুপশিং, ৱাহং অমদি লৈরি। চহি ৮গী মমাংদা, স্তার্ত-অপ হায়বা ৱাহৈনা মফম খরখক্তদা, তেক্নিকেল মালেমগী গেলেরী খরখক্তদা ৱারী শাবগী হীরম ওইরম্বদো, মসিনা ভারতকী অচম্বা নহারোলশিংগী মঙলান মঙফাওনহন্নবা পাম্বৈ ওইদুনা মখোয়গী নুংতিগী শাবা ৱারী মনুংদা চল্লিবসি করি মতৌদগীনো? অশুক য়াম্না চাউবা অহোংবা অসি করম্না লাক্লিবনো? খুদক্তা লাকপদি নত্তে। নীংথিনা থৌরাং য়াৎলবা পান্দম অমগী মাইকৈদা হোৎনবগী মহৈনি। অদুগা ঐহাক্না ঙসি স্তার্ত-অপ মালেমগী নহারোল খরগা উন্নবা অমসুং ইন্দোরগুম্বা শহরনা ঐহাক্কী মাঙদা লৈবা অসিদা ঐহাক্না অদোমগী মফমদা ৱারী খরা থম্নীংই। ঙসি ঐখোয়না স্তার্ত-অপকী ইহৌ হায়না খঙনরিবা অসি মতৌ করম্না হৌরকপগে হায়বা নহারোলশিংনা খঙবগী য়াম্না মথৌ তাই হায়না ঐহাক্না খল্লি। মসিনা মশা মথন্তনা ইথিল অমসু ওইগনি। নীংতম্বগী অমৃত কালগী ওইনা মসিনা য়াম্না চাউবা পুক্নিং থৌগৎনীংঙাইসু ওইগনি।
মরূপশিং,
অনৌবা পাংথোকপা, অনৌবা ৱাখল্লোন্না শিংনবশিংগী ৱারোইশিন পুরকপা পাম্বগী মতৌ অসিদা ভারত্তা মতম শাংবদগী লৈদুনা লাক্লি। মসিদি ঐখোয়গী আই.তি.গী ইহৌ লাকপদা ঐখোয়না নীংথিনা খঙলবনি। অদুবু, মতম অদুদা ফংফম থোকপা তেংবাং, পুক্নিং থৌগৎপীবগী মতৌ ফংখিদবা হায়বসি লাইবক থীবনি। আই.তি. ইহৌদগী ওইখিবা ফিভম্বু চেনেলাইজ তৌদুনা মাইকৈ পীরম্বা হায়বসি মতমদুগী তঙাই ফদবনি। অদুবু, মসি ওইথোকখিদ্রে। দিকেদ কয়া অমা ৱাথোক, পোলিসী পেরালাইসিস, নেপোতিজম্না মরম ওইরগা ঐখোয়গী লৈবাক্কী চারোন-শুরোনবু মাঙহনখিবা ঐখোয়না উখরে। ঐখোয়গী নহারোলশিংগী মফমদা অনৌবা ৱাখল্লোন, ইন্নোভেসন পাংথোকপা পাম্বগী মতৌ লৈবনি, অদুবু মমাংগী সরকারগী পোলিসীনা মরম ওইরগা চমম্নবা থোক্তুনা অদুম লোইশিনখ্রে।
মরূপশিং,
ঐখোয়না ইং ২০১৪গী মতুংদা, নহারোলশিংগী অসিগুম্বা ৱাখল্লোনগী পাঙ্গলবু, ইন্নোভেসনগী অসিগুম্বা ইথিলবু অমুক্কা হন্না হিংগৎহনখি, ঐখোয়না ভারতকী নহারোলশিংগী তৌবা ঙম্বগী মতিক্তা থাজবা থমখি। ঐখোয়না আইদিয়াদগী ইন্নোভেসন্দা অমসুং মথংদা ইন্দস্ত্রীদা অমুক য়ৌবগী মপুং ওইবা রোদমেপ শেমখি অমসুং ৱারোল অহুমদা মিৎয়েং চঙখি।
অহানবা- আইদিয়া, ইন্নোভেত, ইনক্যুবেত অমসুং ইনদস্ত্রীগা মরী লৈনবা খুদোংচাবশিংগী ইনফ্রাস্ত্রকচর লৈহনবা।
অনিশুবা- সরকারগী কাঙলোনশিং লাইথোকহনবা।
অমসুং, অহুমশুবা- ইন্নোভেসনগীদমক্তা মাইন্দসেত্তা অহোংবা পুরকপা, অনৌবা ইকোসীস্তেম অমা হৌদোকপা।
মরূপশিং,
ঐখোয়না ৱাফম কয়া অসি খন্নরবা মতুংদা, তোঙান-তোঙানবা ফ্রন্ততা অমত্তা ওইনা থবক পাংথোকপা হৌখি। মসিগী মনুং চনবগী মনুংদা অমা ওইরিবদি হেকাথোন্নি। চহি ৬-৭কী মমাংদা লৈবাক অসিদা হেক্কাথোন হৌদোকখিবা মতমদা, মসিনা স্তার্ত-অপকী মপাঙ্গল লৈবা ফম্বাক অমা শেমগনি হায়বা কনামত্তনা থাজখিবা নত্তে। ঐখোয়না লৈবাক্কী নহারোলশিংবু শিংনখি, নহারোলশিংনা মসিগা থেংননবা য়াজখি অমসুং ৱারোইশিন পীদুনা মখোয়গী মতিক উৎখি। মসিগী হেক্কাথোন অসিনা লৈবাক্কী নহারোল কয়াদা পুন্সি হিংবগী মরম খঙহনখি, মথৌদাং খঙবগী চাং হেনগৎহনখি। নুংতিগী পুন্সিদা মখোয়না থেংনরিবা শিংনবা কয়াগী ৱারোইশিন পুরকপদা মখোয়না তেংবাংবা ঙমগনি হায়বা মশাদা থাজবা লৈহনখি। অসিগুম্বা ৱাখল্লোন অসিনা, তোঙানবা মতৌ অমগুম্না, স্তার্ত-অপকী লোঞ্চপেদ ওইনা মথৌ তৌখি। অদোম্না সরকারগী স্মার্ত ইন্দিয়া হেক্কাথোনবুদি খঙলি, অদোমগী মরক্তগী মীওই খরদি মসিগা মরী লৈনরম্বসু য়াই, ঙসি ঐহাক্কী মাঙদা ফম্লম্বসু য়াই। হৌখিবা চহিশিং অসিদসু অদোমগুম্না তেলেন্ত লৈবা নহারোল চাউরাকপা লাখ ১৫না স্মার্ত ইন্দিয়া হেক্কাথোনগা মরী লৈনখি। ঐহাক্না হেক্কাথোন অসিবু য়াম্না পামজখিবনা, মসিদা অনৌবা থৌওং কয়া খঙবগী খুদোংচাবা ফংখি হায়বা ঐহাক্না নীংশিংলি। ঐহাক্না নুমিৎ কয়া হেক্কাথোনগী মতৌবু য়াম্না কুপ্না য়েংজখি। নুমিদাংগী পুং ১২, ১, ২ ফাওবদা মসিগী ৱারী শাখিবনি। মখোয়গী থৱাই য়াওবগী মতৌবু য়েংজখি। মখোয়না করি তৌই, করম্না খল্লি অমসুং মায় পাকপা ফংবদা কয়াম্না নুংঙাই হায়বা ঐহাক্না কুপ্না য়েংখি, ইশাদা ফাওজখি। অদুগা লৈবাক্কী কাচিন কোয়া অমদা ঙসিসু নুমিৎ খুদিংগী মখল অমগী হেক্কাথোন পাংথোক্লি খঙবদা ঐহাক্না নুংঙাইবা ফাওই। মসিনা হায়বদি, স্তার্ত-অপ হৌদোক্নবা লৈবাক অসিনা লেপ্তনা হোৎনরি হায়বনি।
মরূপশিং,
চহি ৭কী মমাংদা স্তার্ত-অপ ইন্দিয়া হৌদোকখিবা অসি ৱাখল্লোনবু ইন্নোভেসন্দা ওন্থোকপা অমসুং মদুবু ইন্দস্ত্রীগী থাক্তা পুবগী চাউরবা খোঙথাং অমা ওইখি। ঙসিদি মসিগী ৱাখল্লোনশিং অসিবু খুৎ শমদুনা তাক্তুনা অমসুং থৌওং অসিদা ইন্দস্ত্রীদা অহোংবা পুরকপগী অচৌবা পাম্বৈ অমা ওইরে। মসিগী মথংগী চহিদগী ঐখোয়না লৈবাক অসিগী ইন্নোভেসনগী মাইন্দসেৎপু পাকথোক-চাউথোকহন্নবগীদমক্তা অতল ইন্নোভেসন মিসন হৌদোকখি। মসিগী মখাদা, স্কুলশিংদা অতল তিঙ্করিং লেব অমসুং হাইয়র এজুকেসন ইন্সতিত্যুসনশিংদা ইনক্যুবেসন সেন্তর অমসুং হেক্কাথোনগুম্বা অচৌবা ইকোসীস্তেম অমা শেম্বগী থবক চত্থরি। ঙসিদি, স্কুল লিশিং ১০ হেনবদা তিঙ্করিং লেব লৈরে। মহৈরোই লাখ ৭৫ হেনবনা তেক্নোলোজীগী অনকপা মরী লৈনরি। অতল তিঙ্করিং লেবনা স্তার্ত-অপকী নর্সরী ওইনা মথৌ পাংথোক্লি। মহৈরোইশিংনা কোলেজ কারকপা মতমদা মখোয়গী মফমদা লৈগদৌরিবা আইদিয়াবু ইনক্যুবেত তৌনবগীদমক্তা লৈবাক অসিদা অতল ইনক্যুবেসন সেন্তর ৭০০ হেন্না শেম-শারে। লৈবাক অসিনা চৎনবা হৌহনখ্রবা নেস্নেল এজুকেসন পোলিসী অসিনা মহৈরোইগী ইন্নোভেতিব মাইন্দবু হেন্না ফহনবদা তেংবাংগনি।
মরূপশিং,
ইনক্যুবেসনগা লোয়ননা স্তার্ত-অপকী ওইনসু ফন্দিংগী য়াম্না মরু ওই। সরকারগী অহকপা পোলিসীনা মরম ওইরগা মসিদা তেংবাং কয়া ফংবা ঙম্লি। সরকারনা মখোয়গী মাইকৈদগী ফন্দ ওফ ফন্দ অমবুদি শেম্লে, স্তার্ত-অপশিংবু প্রাইভেত সেক্তরশিংগা মরী লৈনহন্নবা তোঙান-তোঙানবা প্লেৎফোর্ম কয়া শেম্লে। অসিগুম্বা খোঙথাং অসিনা মরম ওইরগা লুপা করোর কয়াগী প্রাইভেত ইনভেস্তমেন্ত অমসু স্তার্ত-অপ ইকোসীস্তেমদা পীরি অমসুং মসিনা নোংম-নোংমগী হেনগৎলক্লি।
মরূপশিং,
তেক্স কোম্থোকপদগী হৌরগা অতোপ্পা ইন্সেন্তিব পীবগী থৌওং য়াওনা হৌখিবা চহিশিংদা তোঙানবা রিফোর্ম কয়া লেপ্তনা পাংথোকখ্রে। স্পেস সেক্তর, মেপ্পিং, দ্রোন্নচিংবা সেক্তর কয়াবু অৱাংবা থাক্তা য়ৌহনবা ঙমগদবা তোঙানবা সেক্তরশিংদা রিফোর্ম তৌখিবদগী, স্তার্ত-অপকীদমক্তা অনৌবা সেক্তরগী কয়াগী থোঙ হাংখ্রে।
মরূপশিং,
ঐখোয়না স্তার্ত-অপ্তা হৌজিক য়াম্না মরু ওইবা মিৎয়েং চঙদুনা মতেং অমা পাংথোক্লে। স্তার্ত-অপ ওইখ্রবা তুংদা মখোয়গী পোত্থোক, সর্ভিস কয়াবু কৈথেলদা য়াম্না লায়না ফংহনবা ঙমহন্নবগীদমক্তা, সরকারগী মাইকৈদগী পোত্থোক চাউনা লৈবা য়াহন্নবগীদমক্তা, মখোয়বু ভারত সরকারগী জি.ই.এম.গী মনুং চনহল্লে। ঙসি ফাওবগী ওইনা, জি.ই.এম.দা স্তার্ত-অপ লিশিং ১৩ হেনবনা রেজিস্তর তৌরকখ্রে। পোর্তেল অসিদগী স্তার্ত-অপশিংনা লুপা করোর লিশিং ৬ হেন্না ব্যুজিনেস তৌখ্রে হায়বা তাবদা অদোম্না নুংঙাইবা ফাওগনি।
মরূপশিং,
অচৌবা থবক অমা পাংথোকখিবা অদুনা মতমগী চুনবা ইনফ্রাস্ত্রকচরগী মতাংদনি। স্তার্ত-অপ চাউখৎহনবা অমসুং অনৌবা কৈথেল হাংবগী হীরমদা দিজিতেল ইন্দিয়ানা অচৌবা মিৎয়েং চঙলি। স্মার্ত ফোন অমসুং দেতা হোঙহনবনা খুঙ্গংগী লায়রবা অমসুং মিদ্দল ক্লাসকা শম্নহল্লে। মসিনা স্তার্ত-অপ্তা অনৌবা খুদোংচাবা অমসুং কৈথেল হাংদোক্লে। আইদিয়া তু ইন্দস্ত্রীগী অসিগুম্বা হোৎনজমন অসিনা মরম ওইরগা ঙসিদি স্তার্ত-অপ অমসুং য়ুনিকোর্ন্না লৈবাক্কী নহারোল লাখ কয়াদা থবক পীরি।
মরূপশিং,
ঐখোয়না লৈবাক্কী মায় পাকপদা অনৌবা খোঙজেল হাপকদবনি, অনৌবা থাক্তা পুগদবনি। ঙসিদি, ভারতনা জি.২০ লৈবাকশিংগী মরক্তা শেন্মিৎলোন্দা খ্বাইদগী য়াঙনা শাহৌ লৌরিবা লৈবাক ওইরি। মালেমগী খ্বাইদগী অহুমশুবা চাউবা শেন্মিৎলোন ভারতনা ওইরি। ঙসিদি, ভারতনা স্মার্ত ফোন দেতা শিজিন্নবগী মতাংদা মালেমগী অহানবা থাক্তা লৈরি। ইন্তর্নেত শিজিন্নবগী মতাংদা ভারতনা অনিশুবা নম্বরদা লৈরি। ভারতনা ঙসি গ্লোবেল রিতেল ইন্দেক্সতা অনিশুবা ফম কল্লি। ভারতনা মালেমগী খ্বাইদগী অহুমশুবা ইনর্জী কঞ্জ্যুমর ওইরি। মালেমগী খ্বাইদগী অহুমশুবা চাউবা কঞ্জ্যুমর মার্কেত ভারত্তা লৈ। ভারতনা মমাংগী হৌখিবা শেনবা চহিদা বিলিয়ন দোল্লর ৪১৭, হায়বদি, লুপা করোর লাখ ৩০ হেনবগী পোত্থোক মীরমদা থাদোকখিদুনা অনৌবা রেকোর্দ থমখি। ভারতনা ঙসি মশাগী ইনফ্রাস্ত্রকচরবু মতমগা চুনহন্নবা ইনভেস্ত তৌরি, মসি হান্না তৌরম্বা অমত্তা নত্তে। মমাংদা হান্না তৌখিদ্রিবা চাংদা ঙসি ভারতনা ইজ ওফ লিভিংদা অমসুং ইজ ওফ দুইং ব্যুজিনেস্তা মিৎয়েং চঙলি। হায়রিবা ৱারোলশিং অসিনা ভারত মচা খুদিংবু চাউথোকচবা ফাওহনগনি। অসিগুম্বা হোৎনরিবা ময়াম্না থাজবা অমা লৈহনগনি। ভারতকী শাহৌ লৌবগী ৱারী, ভারতকী মায় পাকপগী ৱারীনা হন্দক্কী দিকেদ অসিদা অনৌবা পাঙ্গল অমগা লোয়ননা মখা চত্থগনি। মসিগী মতমসিদি নীংতম্বগী অমৃতকী মতমসু ওইরি। ঐখোয়না নীংতম্বগী চহি ৭৫ মপুং ফাবগী নুংঙাইবা ফোংদোক্লি। ঙসি ঐখোয়না পাংথোকপা খুদিংনা অনৌবা ভারতকী তুংগী মতম লেপকনি। ঐখোয়না অসুম্না পুন্না হোৎনমিন্নবা অসিদগী ঐখোয় করোর ৩৫গী অনীংবা অপাম্বা ফংগনি। ভারতকী স্তার্ত-অপকী ইহৌনা মসিগী অমৃত কাল অসিদা মশক নাইবা শক্তাক অমা শেম্বা ঙমগনি। নহারোল খুদিংদা ঐহাক্কী ইফমদগী য়াইফ পাউজেল পীজরি।
মধ্য প্রদেশ সরকারবুসু ঐহাক্না থাগৎলি।
য়াম্না থাগৎচরি।
